May 25, 2021

ಕಾಸ್ರೋಡು ದೇವಸ್ಥಾನಡ್ ಕೋವಿಡ್ ಜಾಗೃತಿ ಸಂದೇಶ

ಕಾಸ್ರೋಡು, ಮೇ 25: ಕೇರಳದ ದೇವಸ್ಥಾನಡ್ ಭಕ್ತಿಗೀತೆದ ಬದಲಾದ್ ಕೋವಿಡ್ ಜಾಗೃತಿ ಪದ್ಯನ್ ಪನ್ಪಿನ ಮುಖೇನ ಮಾದರಿಯಾತುಂಡು.

ಕೋವಿಡ್ ಸೋಂಕುದ ರಡ್ಡನೆ ಅಲೆತ ನಿಯಂತ್ರಣಗಾದ್ ಕೇರಳಡ್ ಲಾಕ್ ಡೌನ್ ಇಂಚಿನ ಕಠಿಣ ಕ್ರಮ ಜಾರಿ ಮಲ್ಪುನ ಮುಖೇನ ಕೋವಿಡ್ ನಿಯಂತ್ರಣಗ್ ಅಲ್ಪದ ಸರ್ಕಾರ ಪ್ರಯತ್ನ ಮಲ್ತೊಂದು ಉಂಡು .

ಕುಂಜೂರು ಪಂಜ ಶಾಲೆಗ್ ಶಿಕ್ಷಣ ಪ್ರೇಮಿಲೆನ ಸಾಕಾರ

ಪುತ್ತೂರು, ಮೇ 25: ಊರುದ ಶಾಲೆನ್ ಕರಸೇವೆ ಮಾದರಿಡ್ ಕಟ್ಟುನ ಕಜ್ಜ ಪೇಂಟೆದ ಕೆಲವು ಕಡೆಟ್ ನಡತೊಂದು ಉಂಡು.

ಕುಂಜೂರುಪಂಜ ಅನುದಾನಿತ ಹಿರಿಯ ಪ್ರಾಥಮಿಕ ಶಾಲೆಲ ಈ ಸಾಲ್ ಗ್ ಸೇರ್ದುಂಡು.
ಊರುದಕುಲು , ಪರ ವಿದ್ಯಾರ್ಥಿಲೆನ ಸಾಕಾರಡ್ ಕಟ್ಟಡದ ಛಾವಣಿ ದುರಸ್ತಿ ಕಾರ್ಯ ಪ್ರಗತಿಡ್ ಉಂಡು..

1ರ್ದ್ 7ನೇ ತರಗತಿ ಮುಟ ಇಪ್ಪುನ ಈ ಶಾಲೆಡ್ 76 ಜೋಕುಲು ವ್ಯಾಸಂಗ ಮಲ್ತೊಂದು ಉಲ್ಲೆರ್. ಈ ಶಾಲೆದ ಛಾವಣಿ ಹಾಳ್ ಆಯಿನ ಪರಿಣಾಮ ಪೊಸ ಪರಿಕರಲೆನ್ ಪಾಡ್ಯರೆ ಕಾರ್ಯ 9 ಲಕ್ಷ ರೂಪಾಯಿ ಖರ್ಚ್ ಆಪಿನ ನಿರೀಕ್ಷೆ ಉಂಡು .

ಬ್ಲಾಕ್ ಫಂಗಸ್ ಮೂಲ ಪತ್ತೆಗ್ ಸೂಚನೆ

ಬೆಂಗ್ಳೂರು, ಮೇ 25: ರಾಜ್ಯಡ್ ಕೊರೊನಾರ್ದ್ ಹುಷಾರ್ ಆಯಿನಕ್ಲೆನೆಟ್ಟ್ ತೋಜೋoದು ಉಪ್ಪುನ ಅಪಾಯಕಾರಿ ಬ್ಲ್ಯಾಕ್‌ ಫಂಗಸ್‌ ಮೂಲ ಪತ್ತೆ ನಾಡೆರೆ ವೈದ್ಯೆರ್ ಅಂಚನೆ ಸೂಕ್ಷಾಣು ಜೀವಿ ತಜ್ಞರೆಗ್ ಕೊರೊನಾ ಕಾರ್ಯಪಡೆ ಗುರ್ಕಾರ್ಲಾಯಿನ ಉಪ ಮುಖ್ಯಮಂತ್ರಿ ಡಾ.ಸಿ.ಎನ್‌.ಅಶ್ವತ್ಥನಾರಾಯಣಸೂಚನೆ ಕೊರ್ತೆರ್ .

ಖ್ಯಾತ ತಜ್ಞ ವೈದ್ಯೆರ್ ಬೊಕ್ಕ ಕೊರೊನಾ ಬೊಕ್ಕ ಬ್ಲ್ಯಾಕ್‌ ಫಂಗಸ್‌ ಚಿಕಿತ್ಸಾ ಶಿಷ್ಟಾಚಾರ ಸಮಿತಿದ ತಜ್ಞರ ಸಭೆಟ್ ಪಾಲ್ ಪಡೆದ್ ನೆತ್ತ ಮೂಲ ನಾಡ್ ಪತ್ತೆರೆ ಸೂಚನೆ ಕೊರಿಯೆರ್.

ಕದ್ರಿ ಅಗ್ನಿಶಾಮಕ ಸಿಬ್ಬಂದಿ ಕೋವಿಡ್ ಗ್ ಬಲಿ

ಕುಡ್ಲ, ಮೇ 25: ಕುಡ್ಲದ ಕದ್ರಿ ಅಗ್ನಿಶಾಮಕದಳಟ್ ಬೇಲೆ ಮಲ್ತೊಂದು ಇತ್ತಿನ ಸಿಬ್ಬಂದಿ ನವೀನ್ ಆಂಡ್ರಾ ಕೋವಿಡ್ ಸೋಂಕುಗು ಬಲಿಯಾತೆರ್ .

54 ವರ್ಷದ ನವೀನ್ ಮೆರೆಗ್ ಮೇ. 9 ತಾರೀಖ್ ಗ್ ಕೋವಿಡ್ ಸೋಂಕು ದೃಢ ಆದಿತ್ತುಂಡು .ಅವ್ವೆ ದಿನ ಖಾಸಗಿ ಆಸ್ಪತ್ರೆಗ್ ದಾಖಲಾಯಿನ ಮೆರ್ ಮೇ.23 ಐತಾರ ಸೋಂಕಿಗೆ ಬಲಿಯಾತೆರ್ .

1997 ಟ್ಟ್ ಸೇವೆ ಶುರು ಮಲ್ತಿನ ನವೀನ್, ಕದ್ರಿದ ಅಗ್ನಿಶಾಮಕದಳಟ್ ಸಿಬ್ಬಂದಿಯಾದಿತ್ತೆರ್.

ಉದ್ಯೋಗಿಲೆಗ್ ಕೋವಿಡ್ ಪರಿಹಾರ ಘೋಷಣೆ ಮಲ್ತಿನ ಅಮೇಜಾನ್

ಕುಡ್ಲ, ಮೇ 25 : ಕೊರೋನ ಸಾಂಕ್ರಾಮಿಕ ರೋಗರ್ದಾವರ ದೇಶಡ್ ನಕಾರಾತ್ಮಕ ಬೆಳವಣಿಗೆ ಜಾಸ್ತಿ ಆವೊಂದು ಉಪ್ಪುನ ನೆಲೆಟ್ಟ್ ಅಂಚನೆ ತನ್ನ ಬೇಲೆ ದಕ್ಲೆನ ಕೂಟ ಬೊಕ್ಕ ಅಕ್ಲೆನ ರಕ್ಷಣೆಗಾದ್ ಅಮೆಝಾನ್ ಇಂಡಿಯಾ ಕೋವಿಡ್-19 ಪರಿಹಾರ ಯೋಜನೆ (ಸಿಆರ್‍ಎಸ್) ಪ್ರಕಟ ಮಲ್ದೆರ್.

ಕೋವಿಡ್ ಪರಿಹಾರಗಾದ್ 25 ದಶಲಕ್ಷ ಡಾಲರ್ ನೆರವು ನಿಧಿ ಬುಡುಗಡೆ ಮಲ್ದೆರ್, ಕೋವಿಡ್-19 ಲಸಿಕೆದ ರಡ್ಡ್ ಡೋಸ್ ಪಡೆಯಿನ ಸಿಬ್ಬಂದಿಗ್ 1500 ರೂಪಾಯಿ ಹೆಚ್ಚುವರಿ ವಿಶೇಷ ವೇತನನ್ಲಾ ಕೊರ್ರೆ ಉಲ್ಲೆರ್ ಪಂದ್ ಅಮೆಝಾನ್ ಇಂಡಿಯಾ ಮಾನವ ಸಂಪನ್ಮೂಲ ವಿಭಾಗದ ನಿರ್ದೇಶಕೆರಾಯಿನ ಸ್ವಾತಿ ರುಸ್ತಗಿ ಪ್ರಕಟಣೆಡ್ ತೆರಿಪಾಯೆರ್.

ಕ್ರಿಕೆಟ್ ಗೊಬ್ಬೊoದು ಇತ್ತಿನಕ್ಲೆನ ಮಿತ್ತ್ ಪ್ರಕರಣ ದಾಖಲ್

ಕಾಪು, ಮೇ 25: ಕಾಪು : ಲಾಕ್‍ಡೌನ್ ಆದೇಶ ಉಲ್ಲಂಘನೆ ಮಲ್ತ್ದ್ ಕ್ರಿಕೆಟ್ ಗೊಬ್ಬೊನ್ದು ಇತ್ತಿನ ಜಾಗೆಗ್ ಕಾಪು ಇನ್ಸ್ ಪೆಕ್ಟರ್ ನೇತೃತ್ವದ ಕೂಟ ದಾಳಿ ಮಲ್ತ್ 9 ಜನಕ್ಲೆನ ವಿರುದ್ಧ ಪ್ರಕರಣ ದಾಖಲ್ ಮಲ್ತಿನ ಘಟನೆ ಉಚ್ಚಿಲದ ಭಾಸ್ಕರ್ ನಗರಡ್ ಐತಾರ ನಡತುಂಡು ಳ್.

ಎರ್ಮಾಳ್ ದ ಸೂರಜ್, ಉಚ್ಚಿಲದ ರೂಪೇಶ್ ಬಂಗೇರ, ಭಾಸ್ಕರ್ ನಗರದ ಅಕ್ಷಯ್ ಸಾಲಿಯಾನ್, ಉಚ್ಚಿಲದ ಚೇತನ್ ವೈ, ಭಾಸ್ಕರ್ ನಗರದ ಸಂದೀಪ್ ಕುಮಾರ್, ಬಡಾ ಗ್ರಾಮದ ಸರ್ವೋತ್ತಮ್ ಸೋನ್ಸ್, ಪ್ರಜ್ವಲ್, ಪ್ರಖ್ಯಾತ್, ರಾಕೇಶ್ ವಿರುದ್ಧ ಪ್ರಕರಣ ದಾಖಲ್ ಮಲ್ದೆರ್ .

ಇನ್ಸ್ ಪೆಕ್ಟರ್ ಪ್ರಕಾಶ್ ನೇತೃತ್ವದ ತಂಡ ದಾಳಿ ನಡಪಾದೆರ್ , ನಾಲ್ ದ್ವಿಚಕ್ರ ಗಾಡಿ , 1 ಕಾರ್ ಕ್ರಿಕೆಟ್ ಗೊಬ್ಬೆರೆ ಉಪಯೋಗ ಮಲ್ತಿನ ವಸ್ತುಲೆನ್ ವಶಕ್ ದೆತೊನ್ದೆರ್.

ಜೂನ್ 1 ತಾರೀಖ್ ರ್ದ್ ಕುಡ್ಲಡ್ ಮೀನುಗಾರಿಕೆ ನಿಷೇದ

ಕುಡ್ಲ , ಮೇ 25: ಕೊರೊನಾ ವೈರಸ್, ಚಂಡಮಾರುತದ ಭೀಕರತೆಗ್ ಕುಡ್ಲಡ್ ಮತ್ಸೋದ್ಯಮ ಕುಗ್ಗು ದುಂಡು. ಮೀನುಗಾರಿಕೆ ಉತ್ತುಂಗವಿತ್ತಿನ ಪೊರ್ತುಡು ಲಾಕ್‌ಡೌನ್ ಬರೆ ಬುರ್ದು ಒಂಚೂರ್ ಸುಧಾರ್ನಗನೇ ಚಂಡಮಾರುತ ಪೆಟ್ಟ್ ಕೊರ್ತುಂಡು.

ನೆತ್ತ ನಡುಟು ಇತ್ತೆ ಮೀನುಗಾರಿಕಾ ಋತು ಮುಗಿಯೊಂದು ಇತ್ತಿಲಕನೇ , ಜೂನ್ 1 ರ್ದ್ ಮೀನುಗಾರಿಕೆನ್ ಉಂತಾವೊಡು ಪಂದ್ ರಾಜ್ಯ ಸರ್ಕಾರ ಸೂಚನೆ ಕೊರ್ತುಂಡು.

ಕೆ.ವಿ ರಾಜೇಂದ್ರಕುಮಾರ್ ಫೌಂಡೇಶನ್ ವತಿರ್ದ್ ಅನ್ನದಾಸೋಹ

ಬೆಂಗ್ಳೂರು , ಮೇ 25: ನಂದಿನಿ ಬಡಾವಣೆ ಸ್ಮಾರ್ಟ್ ವಾರ್ಡ್ಡ್ 30 ಕಡೆ ಸುಮಾರ್ 3000 ಜನಕ್ಲೆಗ್ ಕರಿನ 3 ವಾರರ್ದ್ ಗೋಪಾಲಯ್ಯ ಮೆರ್ನ ಮಾರ್ಗದರ್ಶನಡ್ ಕೆ.ವಿ ರಾಜೇಂದ್ರಕುಮಾರ್ ಫೌಂಡೇಶನ್ ವತಿರ್ದ್ ಅನ್ನದಾಸೋಹನ್ ಕಾರ್ಯಂತೆರ್ ಮಲ್ತೊಂದು ಉಲ್ಲೆರ್.

ಜೈ ಮಾರುತಿ ನಗರ, ರವಿ ಬಡಾವಣೆ, ಸಾಕಮ್ಮ ಬಡಾವಣೆ, ನರಸಿಂಹ ಲೇಔಟ್, ಜೆ.ಎಸ್ ನಗರ, PWD ಕ್ವಾಟ್ರಸ್, EWS ಕ್ವಾಟ್ರಸ್, ಪರಿಮಳ ನಗರ, ಕಂಠೀರವ ನಗರ, ಫಾರಂ ರೋಡ್, ಶ್ರೀನಿವಾಸ ನಗರ, ರಾಮಕೃಷ್ಣ ನಗರ ಬೊಕ್ಕ ಸುಮಾರ್ 30 ಕಡೆ ಮಾಜಿ ಬಿಬಿಎಂಪಿ ಸದಸ್ಯೆರಾಯಿನ ಕೆ.ವಿ ರಾಜೇಂದ್ರ ಕುಮಾರ್ ಮುತಾಲಿಕೆಡ್ ಕಾರ್ಯಂತೆರ್ ಇಂಚಿನ ಸೇವೆ ಮಲ್ತೊಂದು ಉಲ್ಲೆರ್.

ಕಾರವಾರದ ಜವಣ್ಯೆಗ್ ತೆಲುಗುದ ” ಡಾನ್ಸ್ ಪ್ಲಸ್ 2021″ ಮಾನದಿಗೆ

ಕಾರವಾರ, ಮೇ 25: ಕಾರವಾರದ ಜವಣ್ಯೆ ಸಂಕೇತ್ ಸಹದೇವ ಪ್ರಸಿದ್ಧ ತೆಲುಗು ಡ್ಯಾನ್ಸ್ ಶೋ “ಡ್ಯಾನ್ಸ್ ಪ್ಲಸ್ 2021” ಡ್ ಗೆಂದ್ ದ್ ಪಿದಾಯಿ ಬೈದೆರ್.

ಫೈನಲ್ ಬತ್ತಿನ ಸಂಕೇತ್ ತನ್ನ ಅದ್ಭುತ ನೃತ್ಯದ ಮುಖೇನ ಇನಾಮು ಗೆಂದ್ ದೆರ್.ಸಂಕೇತ್ ಮೆರೆಗ್ ಟ್ರೋಫಿದೊಟ್ಟುಗು 20 ಲಕ್ಷ ರೂ. ಪನವುದ ಇನಾಮು ತಿಕ್ಕ್ ದುಂಡು.

ಇಂದುವೆ ರಿಯಾಲಿಟಿ ಶೋಡ್ ಶಿವಮೊಗ್ಗದ ನಿವೇದಿತಾ ಬೊಕ್ಕ ಕುಡ್ಲದ ವೆಲಾಸಿಟಿ ಕೂಟ ಪಾಲ್ ಪಡೆದ್ ಇತ್ತುಂಡು.