ಮುಲ್ಕಿ : ತಾಲೂಕುಡು ಕೋವಿಡ್ ಕೇಸ್ ಜಾಸ್ತಿ ಆವೊಂದಿತ್ತಿನೆರ್ದಾವರ ಮುಲ್ಕಿದ ಕಾರ್ನಾಡ್ ಬೊಕ್ಕ ಕಿನ್ನಿಗೋಳಿದ ಮೆನ್ನಬೆಟ್ಟುಡು 2 ಕೋವಿಡ್ ಕೇರ್ ಸೆಂಟರ್ ಸ್ಥಾಪನೆ ಮಲ್ತೊಂದುಲ್ಲ ಪಂಡ್ ದ್ ಮುಲ್ಕಿ – ಬೆದ್ರ ಶಾಸಕೆರ್ ಉಮಾನಾಥ ಕೋಟ್ಯಾನ್ ತೆರಿಪಾಯೆರ್.
ಮುಲ್ಕಿ ಸಮುದಾಯ ಭವನೊಡು ಗುರುವಾರ ನಡತಿನ ತಾಲೂಕು ಕೋವಿಡ್ ಕಾರ್ಯ ಪಡೆತ್ತ ರಡ್ಡನೇ ಪ್ರಗತಿ ಪರಿಶೀಲನೆ ಸಭೆತ್ತ ಗುರ್ಕಾರ್ಮೆ ಒಯಿಸ್ ದ್ ಆರ್ ಪಾತೆರಿಯೆರ್.
ಕಾರ್ನಾಡ್ ದ ಡಿವೈನ್ ಸೆಂಟರ್ ಡ್ 160 ಬೆಡ್ ದ ಕೋವಿಡ್ ಕೇರ್ ಸೆಂಟರ್ ಸುರು ಆಪುಂಡು. ಮೆನ್ನಬೆಟ್ಟುದ ಮೊರಾರ್ಜಿ ದೇಸಾಯಿ ಶಾಲೆಡ್ 160 ಸೇರ್ದ್ ಒಟ್ಟು 320 ಬೆಡ್ ದ ವ್ಯವಸ್ಥೆ ಮಲ್ದ್ಂಡ್ ಪಂಡೆರ್.ಕೋವಿಡ್ ಲಕ್ಷಣ ಇತ್ತಿನಕುಲು ಮಾತೆರ್ಲ ಟೆಸ್ಟ್ ಮಲ್ಪಾಲೆ. ಏರ್ಲಾ ಪೋಡ್ಯುನ ಬೊಡ್ಚಿ. ಒಡಿಪುದ ಯುವ ಉದ್ಯಮಿ ಒರಿ ಟೆಸ್ಟ್ ಮಲ್ಪಾವಂದೆ ಎಂಕ್ಲೆನ ಒತ್ತಾಯೊಡು ಕಡೆ ಕಾಲೊಗು ಚಿಕಿತ್ಸೆಗ್ ಪೋದು ಜೂವ ಕಳೆವೊಂಡೆರ್. ಕೆಮ್ರಾಲ್ ವ್ಯಾಪ್ತಿಡ್ ರಡ್ಡ್ ಜನ ಆರೋಗ್ಯ ಕಾರ್ಯಕೆರ್ತೆರ್ ಎಚ್ಚೆರ್ಗೆ ಕೊರ್ಂಡಲ ನಿರ್ಲಕ್ಷ್ಯ ಮಲ್ತ್ ದ್ 2 ಜನ ತೀರ್ ಪೋತೆರ್. ಉಂದು ನಮಕ್ಕ್ ದೇವೆರ್ ಕೊರಿನ ಶಿಕ್ಷೆ ಅತ್ತ್. ಪರೀಕ್ಷೆ. ಉಂದೆಟ್ಟ್ ಮಾತೆರ್ಲ ಪಾಸ್ ಆವೊಡು. ಕೋವಿಡ್ ಕಾರ್ಯ ಪಡೆತ್ತ ಮಾತೆರ್ಲ ನೆಟ್ಟ್ ಸಕ್ರಿಯವಾದ್ ಪಾಲ್ ಪಡೆವೊಡು. ಜನೊಕ್ಲೆಗ್ ಧೈರ್ಯ ದಿಂಜಾವೊಡು. ಪರೀಕ್ಷೆ ಮಲ್ಪಾವರೆ, ವ್ಯಾಕ್ಸಿನೇಶನ್ ಪಾಡಾವರೆ ಪ್ರೋತ್ಸಾಹ ಕೊರೊಡು ಪಂಡೆರ್.
ಮುಲ್ಕಿ ಸರಕಾರಿ ಆಸ್ಪತ್ರೆದ ವೈದ್ಯಾಧಿಕಾರಿ, ನೋಡಲ್ ಆಫೀಸರ್ ಡಾ.ಕೃಷ್ಣ ಪಾತೆರ್ದ್, ಜ.18 ರ್ದ್ 3750 ಜನೊಕ್ಲೆಗ್ ವ್ಯಾಕ್ಸಿನ್ ಕೊರ್ತುಂಡು. ಸದ್ಯೊಗು 2 ನೇ ಡೋಸ್ ದ ಮಾಹಿತಿ ಬೈದಿಜಿ ಪಂಡೆರ್.
ಕೆಮ್ರಾಲ್ ಆರೋಗ್ಯ ಕೇಂದ್ರದ ವೈದ್ಯಾಧಿಕಾರಿ ಡಾ.ಚಿತ್ರಾ ಪಾತೆರ್ದ್, ಮಾರ್ಚ್ 16 ರ್ದ್ 3512 ಜನಕ್ಕ್ ವ್ಯಾಕ್ಸಿನೇಶನ್ ಮಲ್ತ್ ದ ಪಂಡೆರ್.
ತಹಶೀಲ್ದಾರ್ ಕಮಲಮ್ಮ, ಮುಲ್ಕಿ ನಗರ ಪಂಚಾಯ್ತಿ ಸಿಇಒ ಚಂದ್ರ ಪೂಜಾರಿ, ಗ್ರಾಮಾಂತರ ಇಒ ನಾಗರಾಜ್, ಮುಲ್ಕಿ ಸ್ಟೇಶನ್ ದ ಇನ್ಸ್ ಪೆಕ್ಟರ್ ಕುಸುಮೋಧರ್, ಡಾ. ಭಾಸ್ಕರ ಕೋಟ್ಯಾನ್, ನಗರ ಪಂಚಾಯ್ತಿ ಅಧ್ಯಕ್ಷೆರ್ ಸುಭಾಷ್ ಶೆಟ್ಟಿ, ಉಪಾಧ್ಯಕ್ಷೆರ್ ಸತೀಶ್ ಅಂಚನ್ ಮಿತ್ತರ್ಮೆಡ್ ಇತ್ತೆರ್.ಮುಲ್ಕಿ ತಾಲೂಕು ವ್ಯಾಪ್ತಿಡ್ ಬರ್ಪಿನ 7 ಗ್ರಾಮ ಪಂಚಾಯ್ತಿ, 2 ನಗರ ಪಂಚಾಯ್ತಿದ ಪಿಡಿಒನಕುಲು, ಸಿಬ್ಬಂದಿಲು, ಕೋವಿಡ್ ವಾರಿಯರ್ಸ್, ಆಶಾ ಕಾರ್ಯಕರ್ತೆ ರ್ ಸಭೆಟ್ಟ್ ಪಾಲ್ ಪಡೆತೆರ್.ನಗರ ಪಂಚಾಯ್ತಿ ಮಾಜಿ ಅಧ್ಯಕ್ಷೆರ್ ಸುನಿಲ್ ಆಳ್ವ ಸಭೆತ್ತ ಸುಧಾರ್ಮೆ ಮಲ್ತ್ ದ್ ಸೊಲ್ಮೆ ಸಂದಾಯೆರ್.
pallavi shetty