ಅಟಲ್ ಪೆನ್ಶನ್ ಯೋಜನೆದ ಅನುಷ್ಠಾನ: ಕರ್ನಾಟಕ ವಿಕಾಸ ಗ್ರಾಮೀಣ ಬ್ಯಾಂಕ್ ಗ್ ನನೊರ ರಾಷ್ಟ್ರ ಮಟ್ಟದ ಪುರಸ್ಕಾರ

ಕುಡ್ಲ: ಪ್ರಮುಖ ಗ್ರಾಮೀಣ ಬ್ಯಾಂಕ್ ಆಯಿನ ಕರ್ನಾಟಕ ವಿಕಾಸ ಗ್ರಾಮೀಣ ಬ್ಯಾಂಕ್, ಅಟಲ್ ಪಿಂಚಣಿ ಯೋಜನೆದ (ಏಪಿವೈ) ಅನುಷ್ಠಾನಗ್ ಸಂಬಂಧ ಪಟ್ಟಿನಂಚೆನೆ 2022-23 ನೇ ಅವಧಿಡ್ ಮಲ್ತಿನ ಎಡ್ಡೆ ಸಾಧನೆಗ್ ಸಂಬಂಧಪಟ್ಟಿನಂಚೆನೆ ಕುಡೊರ ರಾಷ್ಟ್ರಮಟ್ಟದ ಪ್ರಶಸ್ತಿನ್ ಪಡೆತ್ಂಡ್.

ಬುಧಾರ ಡೆಲ್ಲಿಡ್ ನಡತಿನ ನಡತಿನ ಇಸೇಸ ಲೇಸ್ ಒಂಜೇಟ್ ಬ್ಯಾಂಕ್‌ ಅಧ್ಯಕ್ಷೆರ್ ಶ್ರೀಕಾಂತ ಎಮ್ ಭಂಡಿವಾಡ, ಕೇಂದ್ರ ಸರ್ಕಾರದ ಹಣಕಾಸು ವಿಭಾಗದ ಕಾರ್ಯದರ್ಶಿ ಡಾ. ವಿವೇಕ ಜೋಶಿ ಮೆರೆರ್ದ್ ಪ್ರಶಸ್ತಿ ಫಲಕ ಸ್ವೀಕಾರ ಮಲ್ತೆರ್. ಈ ಪೊರ್ತುಡು ಪಿಂಚಣಿ ನಿಧಿ ನಿಯಂತ್ರಣ ಬೊಕ್ಕ ಅಭಿವೃದ್ಧಿ ಪ್ರಾಧಿಕಾರದ (ಪಿ ಎಫ್‌ ಆರ್ ಡಿ ಏ) ಅಧ್ಯಕ್ಷೆರ್ ಡಾ.ದೀಪಕ್ ಮೊಹಾಂತಿ ಇತ್ತೆರ್.

ಪ್ರಶಸ್ತಿ ಸ್ವೀಕಾರ ಮಲ್ತ್ ದ್, ಕರ್ನಾಟಕ ವಿಕಾಸ ಗ್ರಾಮೀಣ ಬ್ಯಾಂಕ್‌ ಅಧ್ಯಕ್ಷೆರ್, ಶ್ರೀಕಾಂತ ಭಂಡಿವಾಡ ಪಾತೆರ್ದ್, ಆರ್ಥಿಕವಾದ್ ಪಿರವೊರಿನ ಬೊಕ್ಕ ಕಮ್ಮಿ ಆದಾಯದ ವಿಶಾಲ ವರ್ಗಗ್ ಕಮ್ಮಿ ಕರ್ಚಿಡ್ ಪನವುದ ಸೇವೆನ್ ಎತ್ತಯೆರೆ ಬ್ಯಾಂಕ್ ಆದ್ಯತೆ ಕೊರ್ತುಂಡು. ಅಟಲ್ ಪೆನ್ಶನ್ ಯೋಜನೆ ಅಸಂಘಟಿತ ಕಾರ್ಮಿಕ ವರ್ಗಗ್ ವರದಾನ ಆತ್ಂಡ್. ನಿರ್ದಿಷ್ಟ ಕಂತ್ ಪಾವತಿ ಮಲ್ತ್ ದ್ 61ನೇ ವರ್ಷರ್ದ್ ರೂ.1 ಸಾರ ರ್ದ್ ರೂ. 5 ಸಾರ ಮಿತಿಡ್ ಪಿಂಚಣಿ ಪಡೆವೊಲಿ.

ಕರ್ನಾಟಕ ವಿಕಾಸ್‌ ಗ್ರಾಮೀಣ ಬ್ಯಾಂಕ್ ಇಡೇ ಮುಟ್ಟ 342852 ಅಟಲ್ ಪಿಂಚಣಿ ಅಕೌಂಟ್ ಮಲ್ದ್ಂಡ್. ಈ ದಾಖಲೆರ್ದ್ ರೈತೆರ್, ರೈತ ಕಾರ್ಮಿಕೆರ್, ಕಾರ್ಖಾನೆಡ್ ಬೇಲೆ ಮಲ್ಪುನಕುಲು, ನಿಶ್ಚಿತ ಪಿಂಚಣಿ ಇಜ್ಜಂದಿನ ಶ್ರಮಿಕೆರ್ ತನ್ನ 60ನೇ ವರ್ಷದ ಬೊಕ್ಕ ನೆಮ್ಮದಿಡ್ ಬದ್ ಕರೆ ಅನುಕೂಲ ಆಪುಂಡು ಪನ್ಪುನವೇ ಸಮಾಧಾನದ ಇಸಯ ಪಂದ್ ಶ್ರೀಕಾಂತ್ ಪಂಡೆರ್.

ಪ್ರಶಸ್ತಿ ಸ್ವೀಕಾರ ಮಲ್ತಿನ ಬಗೆಟ್ ಕುಸಿ ಆಯಿನ ಮೇರ್, ಈ ಯೋಜನೆದ ಅನುಷ್ಠಾನಡ್ ಬ್ಯಾಂಕ್ ದ ಸಿಬ್ಬಂದಿವರ್ಗ ಮಸ್ತ್ ಸಕ್ರಿಯವಾದ್ ಪಾಲ್ ಪಡೆತೆರ್. ನನ ಬರ್ಪಿನ ದಿನಟ್ಟ್ ನನ ಎಚ್ಚದ ಸಾಧನೆ ಮಲ್ಪೆರೆ ಉಂಡು ಪಂದ್ ಪಂಡೆರ್.

ಕರ್ನಾಟಕ ವಿಕಾಸ ಗ್ರಾಮೀಣ ಬ್ಯಾಂಕ್ ಸಾಧನೆ:

2022-23ನೇ ಹಣಕಾಸು ವರ್ಷಡ್ ಪಿಂಚಣಿ ನಿಧಿ ನಿಯಂತ್ರಣ ಬೊಕ್ಕ ಅಭಿವೃದ್ಧಿ ಪ್ರಾಧಿಕಾರ (ಪಿ ಎಫ್‌ ಆರ್ ಡಿ ಏ) ಬ್ಯಾಂಕ್ ಗ್ ಪ್ರತಿ ಶಾಖೆಗ್ 80 ಅಕೌಂಟ್ ದ ಸರಾಸರಿಡ್ 50320 ಅಕೌಂಟ್ ದ ಗುರಿ ದೀದಿತ್ಂಡ್. ಅಯಿಕ್ಕ್ ಪ್ರತಿಯಾದ್ ಬ್ಯಾಂಕ್ 121ತ್ತ ಸರಾಸರಿಡ್ 76569 ಅಕೌಂಟ್ ಮಲ್ಪುನ ಮುಖೇನ ಗುರಿ ಮೀರಿನ ಸಾಧನೆ ಮಲ್ದ್ಂಡ್. ಉಂದು ದಕ್ಷಿಣ ಭಾರತ ಮಟ್ಟಡ್ ಒರಿನ ಮಾತ ಬ್ಯಾಂಕ್ ದ ಸರಾಸರಿರ್ದ್ ಎಚ್ಚಾತ್ಂಡ್.

ಕರ್ನಾಟಕ ವಿಕಾಸ ಗ್ರಾಮೀಣ ಬ್ಯಾಂಕ್ ಕರಿನ ಮೇ ತಿಂಗೊಲ್ಡ್ ಒಂಜೇ ದಿನ 44 ಸಾರರ್ದ್ ಎಚ್ಚ ಅಕೌಂಟ್ ಲಾಗಿನ್ ಆಪಿನ ಮುಖೇನ ರಾಷ್ಟ್ರೀಯ ದಾಖಲೆ ಸ್ಥಾಪನೆ ಮಲ್ದ್ಂಡ್. ಇತ್ತೆ ಕರ್ನಾಟಕ ವಿಕಾಸ್‌ ಗ್ರಾಮೀಣ ಬ್ಯಾಂಕ್ ಕುಡ್ಲರ್ದ್ ವಿಜಯಪುರ ಮುಟ್ಟ 9 ಜಿಲ್ಲೆದ ವ್ಯಾಪ್ತಿಡ್ 629 ಶಾಖೆ ಉಂಡು. 33150 ಕೋಟಿ ರೂ. ವೈವಾಟ್ ಇಪ್ಪುನ ಮಲ್ಲ ಗ್ರಾಮೀಣ ಬ್ಯಾಂಕ್ ಉಂದಾತ್ಂಡ್.

ಫೋಟೋ ಶೀರ್ಷಿಕೆ:

ಅಟಲ್ ಪಿಂಚಣಿ ಯೋಜನೆದ ನೋಂದಣಿ ಅಭಿಯಾನಡ್ ಮಲ್ತಿನ ಎಡ್ಡೆ ಸಾಧನೆಗ್ ಸಂಬಂಧಪಟ್ಟಿನಂಚೆನೆ ಕರ್ನಾಟಕ ವಿಕಾಸ ಗ್ರಾಮೀಣ ಬ್ಯಾಂಕ್ ಗ್ ರಾಷ್ಟ್ರ ಮಟ್ಟದ ಪ್ರಶಸ್ತಿ ತಿಕ್ ದ್ಂಡ್. ಬುಧಾರದಾನಿ ಡೆಲ್ಲಿಡ್ ನಡತಿನ ಇಸೇಸ ಲೇಸ್ ಡ್ ಬ್ಯಾಂಕ್ ದ ಅಧ್ಯಕ್ಷರ ಶ್ರೀಕಾಂತ ಎಮ್ ಭಂಡಿವಾಡ ಮೆರೆಗ್ ಕೇಂದ್ರ ಸರ್ಕಾರದ ಹಣಕಾಸು ಇಲಾಖೆದ ಕಾರ್ಯದರ್ಶಿ ಡಾ. ವಿವೇಕ ಜೋಶಿ ಪ್ರಶಸ್ತಿ ಫಲಕ ಕೊರಿಯೆರ್.