ಕಾಪು: ಕಟಪಾಡಿದ ಮಟ್ಟು ಶ್ರೀ ಚಿಕ್ಕಮ್ಮ ದೇವಿ ದೇವಲ್ಯಡ್ ಪುನರ್ ಪ್ರತಿಷ್ಠೆ ಬೊಕ್ಕ ಸಿರಿ ಸಿಂಗಾರದ ನೇಮ ಎ.26-30 ಮುಟ್ಟ ನಡಪರೆ ಉಂಡು.
ಎ.26 ಬುಧಾರ ಮಧ್ಯಾಹ್ನ ಮಟ್ಟು ಬ್ರಹ್ಮಸ್ಥಾನರ್ದ್ ಚಿಕ್ಕಮ್ಮ ದೇವಿ ದೇವಲ್ಯ ಮುಟ್ಟ ಪುದೆಕಾಣಿಕೆ ಮೆರವಣಿಗೆ ಬರಿಯೆರೆ ಉಂಡು. ಎ.27 ಗುರುವಾರ ಬೊಲ್ಪುಗು ಶ್ರೀ ಚಿಕ್ಕಮ್ಮ ದೇವಿ ಬೊಕ್ಕ ಪರಿವಾರ ಶಕ್ತಿಲೆನ ಪ್ರತಿಷ್ಠಾಪನೆ, ಗಣಹೋಮ, ಶ್ರೀ ಸತ್ಯನಾರಾಯಣ ಪೂಜೆ, ಬಯ್ಯಗ್ ಶ್ರೀ ಚಿಕ್ಕಮ್ಮ ದೇವಿನ ದರ್ಶನ ಸೇವೆ ನಡಪರೆ ಉಂಡು. ಎ.28 ಸುಕ್ರಾರ ಬೊಲ್ಪುಗು ಚಂಡಿಕಾಯಾಗ, ದೇವಿನ ದರ್ಶನ, ಮಧ್ಯಾಹ್ನ ನೇಮದ ಚಪ್ಪರ ಮೂರ್ತ, ಸಾರ್ವಜನಿಕ ಅನ್ನಸಂತರ್ಪಣೆ ನಡಪರೆ ಉಂಡು. ಬಯ್ಯಗ್ ದೈವೊದ ಭಂಡಾರ ಪ್ರವೇಶ ಆಪುಂಡು. ರಾತ್ರೆ ವರ್ತೆ ಜೋಡಿ ಪಂಜುರ್ಲಿ ದೈವೊದ ನೇಮ ನಡಪರೆ ಉಂಡು. ಎ.29 ಸನಿಯಾರ ಬೊಲ್ಪುಗು ಚೌಂಡಿ, ರಾಹು-ಗುಳಿಗ ದೈವೊದ ನೇಮ ನಡಪರೆ ಉಂಡು. ಎ.30 ಐತಾರ ಶ್ರೀ ಕ್ಷೇತ್ರ ಶುದ್ಧೀಕರಣ ಅವೆರೆ ಉಂಡು. ಈ ಲೇಸ್ ಗ್ ಮಾತೆರ್ಲಾ ಬತ್ತ್ ದ್ ಸಿರಿಮುಡಿ ಗಂಧ ಪ್ರಸಾದ ದೆತೊಂದು ಶ್ರೀ ದೇವಿನ ಕೃಪೆಗ್ ಪಾತ್ರರಾವೊಡು ಪಂದ್ ಶ್ರೀ ಚಿಕ್ಕಮ್ಮ ದೇವಿ ದೇವಲ್ಯದ ಆಡಳಿತ ಸಮಿತಿ, ಜೀರ್ಣೋದ್ಧಾರ ಸಮಿತಿದ ಅಧ್ಯಕ್ಷೆರ್, ಗೌರವಾಧ್ಯಕ್ಷೆರ್, ಪದಾಧಿಕಾರಿಲು, ಸರ್ವಸದಸ್ಯೆರ್ ಬೊಕ್ಕ ಕುಟುಂಬಸ್ಥೆರ್ ಲೆಪ್ಪೋಲೆಡ್ ತೆರಿಪಾದೆರ್.
pallavi shetty