ಪುತ್ತೂರ್: ಐನೂದು ವರ್ಷೊದ ಪಿರವು ತುಳುನಾಡ್ ದ ಇತಿಹಾಸಡ್ ಪೊಸ ಮೈಲ್ ಗಲ್ಲ್ ಊರ್ದಿನ ಗೆಜ್ಜೆಗಿರಿ ನಂದನ ಬಿತ್ತಿಲ್ ಕ್ಷೇತ್ರ ಇತ್ತೆ ಜೀರ್ಣೋದ್ಧಾರ ಆದ್, ದೇಯಿ ಬೈದ್ಯೆತಿ, ಕೋಟಿ ಚೆನ್ನಯರೆನ ಕಾರ್ಣಿಕದ ನಿಲೆ ಪಂದ್ ಲೋಕೊರ್ಮೆ ಪುಗರ್ತೆ ಪಡೆದ್ಂಡ್.
2020ನೇ ಇಸವಿಡ್ ಫೆ.26ರ್ದ್ ಮಾ.2 ಮುಟ್ಟ ಗೌಜಿಡ್ ಪ್ರತಿಷ್ಠಾ ಬ್ರಹ್ಮಕಲಶ ಉಚ್ಚಯ ನಡತ್ ದ್ಂಡ್. 2017 ತ ಫೆ.19 ಕ್ ಕ್ಷೇತ್ರದ ಪುನರ್ ನಿರ್ಮಾಣಗ್ ಕೆಸರ್ ಕಲ್ಲ್ ಪಾಡ್ದಿತ್ತೆರ್. ತುಳುನಾಡ್ ಮಾತ್ರ ಅತ್ತಂದೆ, ಬೆಂಗ್ಲೂರ್, ಬೊಂಬೈ, ಗುಜರಾತ್, ಡೆಲ್ಲಿ ಬೊಕ್ಕ ಪಿದಯಿ ದೇಶೊರ್ದುಲ ಲಕ್ಷ ಲಕ್ಷ ಸಂಖ್ಯೆಡ್ ಭಕ್ತೆರ್ ಆನಿದ ಐತಿಹಾಸಿಕ ಲೇಸ್ ಡ್ ಪಾಲ್ ಪಡೆಯೆರ್. ಕೋಟಿ ಚೆನ್ನಯೆರೆನ ಮೂಲ ಇಲ್ಲ್ ಆಯಿನ ಗೆಜ್ಜೆಗಿರಿ ಅಪ್ಪೆ ದೇಯಿ ಬೈದ್ಯೆತಿಗ್ ಪುನರ್ಜನ್ಮ ಕೊರ್ತಿನ ತಾನ. ಉಂದು ಗುರು ಸಾಯನ ಬೈದ್ಯೆನ ಕರ್ಮಭೂಮಿ. ಈ ಮೂಜಿ ತಲೆಮಾರ್ ದ ಕಾರಣಿಕ ಶಕ್ತಿಲೆನ ಆರಾಧನೆ ಗೆಜ್ಜೆಗಿರಿಟ್ ಐನ್ ಶತಮಾನದ ಬೊಕ್ಕ ಇತ್ತೆ ಸುರುತ ಸರ್ತಿ ಸುರು ಆತ್ಂಡ್. ಕೋಟಿ ಚೆನ್ನಯೆರೆನ್ ಆರಾಧನೆ ಮಲ್ಪುನ ಸುಮಾರ್ 247 ದಾತ್ ಗರಡಿಲು ಉಂಡು. ಅವು ಮಾತೆಕ್ಲಾ ಕಲಶಪ್ರಾಯ ಆತ್ಂಡ್ ಗೆಜ್ಜೆಗಿರಿ ಮೂಲಸ್ಥಾನ ಗರಡಿ ಕೋಟಿ ಚೆನ್ನಯೆರೆನ ಮೂಲ ಮಣ್ಣ್. ಮುಲ್ಪ ಅಪ್ಪೆ ಬೊಕ್ಕ ಜೋಕುಲೆನ ಸಮಾಗಮ ಆರಾಧನೆ ಕೌಟುಂಬಿಕ ತರವಾಡ್ ಚೌಕಟ್ಟ್ ಡ್ ನಡತೊಂದು ಉಂಡು.
ಒಲ್ಪ ಉಂಡು ಗೆಜ್ಜೆಗಿರಿ?
ದಕ್ಷಿಣ ಕನ್ನಡ ಜಿಲ್ಲೆದ ಪುತ್ತೂರ್ ತಾಲೂಕ್ ದ ಬಡಗನ್ನೂರು ಗ್ರಾಮಡ್ ಇಪ್ಪುನ ಗೆಜ್ಜೆಗಿರಿ ಕ್ಷೇತ್ರ ಐನ್ ಶತಮಾನದ ಪಿರವು ಪಡುಮಲೆ ಬಲ್ಲಾಳರೆನ ಸಂಸ್ಥಾನ ಆದಿತ್ತ್ಂಡ್. ನೆತ್ತ ವ್ಯಾಪ್ತಿಡ್ ಬರ್ಪುನ ಏರಾಜೆ ಬರ್ಕೆ ಪನ್ಪುನ ಪುಗರ್ತೆದ ಇಲ್ಲ್ ಉಂದಾತ್ಂಡ್. ಬಲ್ಲಾಳ ಅರಸೆರೆಗ್ ಸೈನ್ಯ ತಯಾರ್ ಮಲ್ತ್ ದ್ ಕೊರೊಂದು ಇತ್ತಿನ ಇಲ್ಲ್ ಉಂದು. ಉಂದುವೇ ಇಲ್ಲ್ ಗೆಜ್ಜೆಗಿರಿ ನಂದನ ಬಿತ್ತ್ಲ್ ಪಂದ್ ಪುದರಾಂಡ್. ಸಾಯನ ಬೈದ್ಯೆರ್ ಈ ಅಮರ್ ವೀರೆರೆನ ಮಾಮು ಆದ್, ಮಾರ್ಗದರ್ಶಕೆರಾದ್, ಗುರುಕುಲು ಆದಿತ್ತೆರ್. ಅಪ್ಪೆ ಬಂಜಿಡ್ ಪುಟ್ಟಂದೆ ಪುಟ್ಟಿನ ಸ್ವರ್ಣ ಕೇದಗೆನ್ ಆರೆನ ತಾಂಕಿನ ಅಮ್ಮೆರ್, ಕಾಡ್ ಡ್ ಬುಡ್ದ್ ಪೋಯಿನೆರ್ದ್ ಬೊಕ್ಕ ಸಾಯನ ಬೈದ್ಯೆರ್ ಮೆರೆನ್ ಮೆಗ್ದಿ ಪಂದ್ ಸ್ವೀಕಾರ ಮಲ್ತ್ ದ್ ತನ್ನ ಗೆಜ್ಜೆಗಿರಿ ಇಲ್ಲಗ್ ಲೆತೊಂದು ಬತ್ತ್ ದ್ ತಾಂಕಿನಿ ಅತ್ತಂದೆ, ದೇಯಿ ಬೈದ್ಯೆತಿ ಪನ್ಪುನ ಪುದರ್ ದೀದ್, ಪುಗರ್ತೆದ ನಾಟಿ ವೈದ್ಯ ವಿದ್ಯೆ ಕಲ್ಪಾಯೆರ್.
ಕರ್ಗಲ್ಲ ತೋಟ ಕಾಂತಣ್ಣ ಬೈದ್ಯೆರೆನ ಬೊಡೆದಿ ಆಯಿನ ದೇಯಿ ಗೆಜ್ಜೆಗಿರಿ ಇಲ್ಲಲ್ ದಿಂಜಿ ಬಂಜಿನಾಲ್ ಆದ್ ಪಡುಮಲೆ ಬಲ್ಲಾಲ್ರೆನ ಕಾರ್ ದ ನಂಜಿದ ಬೇನೆ ಕಮ್ಮಿ ಮಲ್ಪೆರೆ ಬರ್ಪೆರ್. ನೇರ್ದ್ ಅರಸುಲು ಗುಣ ಆಪೆರ್. ಬೊಕ್ಕ ಅಮರ್ ಜೋಕುಲೆಗ್ ಜನ್ಮ ಕೊರ್ನ ದೇಯಿ ತೀರ್ ಪೋಪೆರ್. ಈ ಪೊರ್ತುಡು ಅಣ್ಣೆ ಸಾಯನ ಬೈದ್ಯೆರ್ ಮೆಗ್ದಿನ ಸರ್ರೊನು ಗೆಜ್ಜೆಗಿರಿಕ್ ಕನತ್ ದ್ ಮಣ್ಣ್ ಮಲ್ಪುವೆರ್. ಆ ಸಮಾಧಿ ಇತ್ತೆಲ ಗೆಜ್ಜೆಗಿರಿಟ್ ಉಂಡು. ದೇಯಿ ಬೈದ್ಯೆತಿ ಮಹಾಸಮಾಧಿ ಪನ್ಪುನ ಪುದರ್ ನ್ ಪಡೆತ್ಂಡ್. ಅಪ್ಪೆನ್ ಕಳೆವೊನ್ನ ಕೋಟಿ ಚೆನ್ನಯೆರ್ ಮಾಮುನ ನಿರೆಲ್ ಡೇ ಗೆಜ್ಜೆಗಿರಿಟ್ ಬುಲೆದ್ ಮಾತ ವಿದ್ಯೆನ್ ಕಲ್ತ್ ದ್, ಕಾರಣಿಕ ಪುರುಷೆರಾಯೆರ್. ಮಂತ್ರಿ ಬುದ್ಧಿವಂತನ್ ಕೆರ್ನ ಬೊಕ್ಕ ಪಂಜರ್ದ್ ಎಣ್ಮೂರುಗ್ ಪೋಪುನ ಮೊಕುಲು ಮಸ್ತ್ ಕಾರಣಿಕ, ಶೌರ್ಯ, ಪರಾಕ್ರಮ ತೂಪಾವೆರ್. ಸತ್ಯ ಧರ್ಮಗಾದ್ ಪ್ರಾಣಾರ್ಪಣೆ ಮಲ್ಪುವೆರ್. ಆನಿರ್ದ್ ಮೊಕ್ಲೆನ ಗರಡಿ ಆರಾಧನೆ ಸುರು ಆಂಡ್.
ಕ್ಷೇತ್ರದ ವಿಶೇಷ
*ದುಂಬು ಕೋಟಿ ಚೆನ್ನಯೆರ್, ದೇಯಿ ಬೈದ್ಯೆತಿ ಬೊಕ್ಕ ಸಾಯನ ಗುರುಕುಲು ಬಾಳ್ ದ್ ಬದ್ ಕ್ ದಿನ ಗೆಜ್ಜೆಗಿರಿತ್ತ ಮೂಲ ಇಲ್ಲೇ ಇನಿ ಭವ್ಯವಾದ್ ಪುನರ್ ತಾನ ಆತ್ಂಡ್. ಅವೆನ್ ಸತ್ಯಧರ್ಮ ಚಾವಡಿ ಪಂದ್ ಲೆಪ್ಪುವೆರ್. ಈ ಚಾವಡಿದ ಗರ್ಭ ಗುಡಿಟ್ ದೇಯಿ ಬೈದ್ಯೆತಿದ ಮೂರ್ತಿ ಪ್ರತಿಷ್ಠಾಪನೆ ನಡತ್ಂಡ್.
ಸತ್ಯಧರ್ಮ ಚಾವಡಿದುಲಯಿ ಈಶಾನ್ಯ ಭಾಗಡ್ ಸಾಯನ ಗುರುಕುಲೆನ ಗುರುಪೀಠ ಸ್ಥಾಪನೆ ಆತ್ಂಡ್.
* ಸಾಯನ ಗುರುಕುಲೆನ ಪೆರಿಯೆರೆನ ಕಾಲರ್ದ್ ಇಂಚ ಈ ಮಣ್ಣ್ ಡ್ ಆರಾಧನೆ ಪಡೆವೊಂದು ಇತ್ತಿನ ಧರ್ಮದೈವ ಧೂಮಾವತಿ ಬೊಕ್ಕ ಕುಪ್ಪೆ ಪಂಜುರ್ಲಿ ದೈವೊಲೆನ ಸಾನಿಧ್ಯ ಪುನರ್ ನಿರ್ಮಾಣ ಆಂಡ್.
*ಅಪ್ಪೆ ದೇಯಿ ಬೈದ್ಯೆತಿನ ಸಮಾಧಿ ಬನತ್ತ ರೂಪಡ್ ಸಂರಕ್ಷಣೆ ಆವೊಂದು ಬೈದ್ಂಡ್. ಅವೆನ್ ಇತ್ತೆ ಸುಂದರ ಸ್ಮಾರಕವಾದ್ ಅಭಿವೃದ್ಧಿ ಮಲ್ದೆರ್.
*ಪಡುಮಲೆ ಬಲ್ಲಾಳ ಅರಸು ಅಪ್ಪೆ ದೇಯಿ ಬೈದ್ಯೆತಿಗಾದ್ ಕಡಪಾದ್ ಕೊರ್ದಿತ್ತಿನ ರಾಜ ದಂಡಿಗೆನ್ ದೀದಿತ್ತಿನ ಚಾರಿತ್ರಿಕ ಸರೋಳಿ ಸೈಮಂಜ ಕಟ್ಟೆನ್ ಸುಂದರವಾದ್ ಮರು ನಿರ್ಮಾಣ ಆತ್ಂಡ್.
*ಗೆಜ್ಜೆಗಿರಿತ್ತ ಕೊಡಿಟ್ಟ್ ಕೋಟಿ ಚೆನ್ನಯೆರೆನ ಮೂಲಸ್ಥಾನ ಗರಡಿ ನಿರ್ಮಾಣ ಆತ್ಂಡ್. ಗರಡಿಗ್ ಎದುರುಡು ಬೆರ್ಮೆರ್ ಗುಂಡ ಉಂಡು.
ಅಪ್ಪೆ ದೇಯಿ ಬೈದೆತಿ-ಕೋಟಿ ಚೆನ್ನಯ ಮೂಲಸ್ಥಾನ ಕ್ಷೇತ್ರವಾಯಿನ ಗೆಜ್ಜೆಗಿರಿ ನಂದನ ಬಿತ್ತ್ ಲ್ ಡ್ ಈ ವರ್ಷದ ಜಾತ್ರೆ ಮಾ.16-20 ಮುಟ್ಟ ನಡಪರೆ ಉಂಡು.
ಬೆದ್ರ ಶಿವಾನಂದ ತಂತ್ರಿಲೆನ ಮುತಾಲಿಕೆಡ್ ವೈದಿಕ ವಿಧಿ ವಿಧಾನಲು ನಡಪರೆ ಉಂಡು. ಈ ಲೇಸ್ ಗ್ ಮಾತೆರ್ಲಾ ಬತ್ತ್ ದ್ ಸಿರಿಮುಡಿ ಗಂಧ ಪ್ರಸಾದ ದೆತೊಂದು ಶ್ರೀ ದೇವೆರೆನ ಕೃಪೆಗ್ ಪಾತ್ರರಾವೊಡು ಪಂದ್ ಅನುವಂಶಿಕ ಮೊಕ್ತೇಸರೆರ್, ನೇಮ ಉಚ್ಚಯ ಸಮಿತಿದ ಸಂಚಾಲಕೆರ್, ಸದಸ್ಯೆರ್, ಶ್ರೀ ಕ್ಷೇತ್ರ ಗೆಜ್ಜೆಗಿರಿತ್ತ ಅಧ್ಯಕ್ಷೆರ್, ಪದಾಧಿಕಾರಿಲು ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.
pallavi shetty