ಬೊಂಬೈ: ವರ್ಲಿದ ಮಧುಸೂದನ್ ಮಿಲ್ ಕಾಂಪೌಂಡ್ ಡ್ ಉಪ್ಪುನ ಅಪ್ಪಾಜಿ ಬೀಡು ಫೌಂಡೇಶನ್ (ರಿ.) ಬೊಕ್ಕ ಐ ಲೇಸಾ ದಿ ವಾಯ್ಸ್ ಆಫ್ ಓಷನ್ (ರಿ.) ಸಂಸ್ಥೆದ ಒಟ್ಟುಸೇರಿಗೆಡ್ ಕಲಾವಿದೆರ್ ಸೂರಿ ಮಾರ್ನಾಡ್ ಸಾಹಿತ್ಯದ ಹಸಿರು ಬೆಟ್ಟದ ಒಡೆಯ ಭಕ್ತಿ ಸುಗಿಪುನ್ ಬುಡುಗಡೆ ಲೇಸ್ ನಡತ್ಂಡ್.
ಮಲ್ಲ ಬಿನ್ನೆರಾದ್ ಟೀಂ ಐಲೇಸಾದ ಕಬಿ, ಸಾಹಿತಿ ಶಾಂತಾರಾಮ ಶೆಟ್ಟಿ ಮೇರ್ ಪಾತೆರ್ದ್, ಕೊರೊನಾದ ಪೊರ್ತುಡು ಕಬಿತೆ ಒಂಜೆನ್ ಬರೆದಿತ್ತೆ, ಅವೆನ್ ಆತ್ಮೀಯೆರಾಯಿನ ಕೆಲವೆರ್ ಓದುದು ಅಯಿಕೊಂಜಿ ಗಟ್ಟಿತನದ ಶಕ್ತಿ ಕೊರಿಯೆರ್. ಅತ್ತಂದೆ ಕಡಲಾಯೆರೆ ದೇಶದ ದೋಸ್ತಿಲು ಅಯಿಕ್ ಸಹಕಾರ ಮಲ್ತೆರ್. ಆ ಶಕ್ತಿಯೇ ಐ ಲೇಸಾ ಕೂಟವಾದ್ ಬುಲೆಂಡ್. ಸೂರಿ ಮಾರ್ನಾಡ್ ಒರಿ ಅದ್ಭುತ ಕಲಾವಿದೆರ್, ಅಯ್ಯಪ್ಪ ಸ್ವಾಮಿ ಭಕ್ತೆರಾಯಿನ ಆರ್ ಭಕ್ತಿದ ಅನುಭವನ್ ಸಾಹಿತ್ಯಡ್ ತೂಪಾಯೆರ್. ಭಕ್ತಿ ಸುಗಿಪುನ್ ಜನಸಾಮಾನ್ಯರೆಗ್ ಎತ್ತುನವು ಬೇಲೆ ನಮ್ಮ ಮಾತೆರ್ನಾಲ ಆತ್ಂಡ್, ಅವು ಅರೆನ್ ನಮ ಕೊರ್ಪುನ ಕೊಡುಗೆ ಪಂದ್ ಪಂಡೆರ್.
ಅಂಧೇರಿ ಅಯ್ಯಪ್ಪ ಭಕ್ತ ವೃಂದದ ಸಂಸ್ಥಾಪಕೆರ್ ಚಂದ್ರಹಾಸ್ ಗುರುಸ್ವಾಮಿ ಇನ್ನಂಜೆ ಆಶೀರ್ವಚನದ ಪಾತೆರನ್ ಪಾತೆರ್ದ್, ಕಲಿಯುಗಡ್ ತೋಜುನ ದೇವೆರ್ ಪಂಡ ಅವು ಅಯ್ಯಪ್ಪ ಸ್ವಾಮಿ. ಆರೆನ್ ಭಕ್ತಿಡ್ ಸ್ಮರಣೆ ಮಲ್ತ್ಂಡ ನಮಕ್ ಆಶೀರ್ವಾದ ಮಲ್ಪುವೆರ್. ಇನಿ ಬುಡುಗಡೆ ಆಯಿನ ಈ ಭಕ್ತಿ ಸುಗಿಪುನ್ ಕೇನುನ ಮುಖೇನ ನನಾತ್ ಜನ ಆಧ್ಯಾತ್ಮಿಕದ ತಾದಿಡ್ ನಡಪಾಡ್ ಪಂದ್ ಪಂಡೆರ್.
ಭಕ್ತಿ ಸುಗಿಪುನ್ ಬುಡುಗಡೆ ಮಲ್ತಿನ ಅಪ್ಪಾಜಿ ಬೀಡುದ ಸಂಸ್ಥಾಪಕೆರ್ ರಮೇಶ್ ಗುರುಸ್ವಾಮಿ ಆಶೀರ್ವಚನ ಕೊರ್ದು, ಟೀಂ ಐಲೇಸಾದ ಕೂಟದಕ್ಲೆಗ್ ಈ ಭಕ್ತಿ ಸುಗಿಪುನ್ ವಿದೇಶಡ್ ಬುಡುಗಡೆ ಮಲ್ಪುನಾತ್ ಸಾಮರ್ಥ್ಯ ಇತ್ತ್ಂಡ್. ಆಂಡ ಅಪ್ಪಾಜಿ ಬೀಡುದ ಪುಣ್ಯ ಭೂಮಿಡ್ ಬುಡುಗಡೆ ಆವೊಡು ಪನ್ಪುನ ಅಕ್ಲೆನ ಮಾತೆರ್ನಾಲ ಭಕ್ತಿಗ್ ಕಲಿಯುಗ ವರದೆ ಅಯ್ಯಪ್ಪೆ ಏಪಲ ಮಾತೆರೆಗ್ಲ ಅನುಗ್ರಹ ಮಲ್ಪುವೆ, ಈ ಭಕ್ತಿ ಸುಗಿಪುಡ್ ಅಯ್ಯಪ್ಪ ಚಿಂತನೆ ಉಂಡು. ಸೂರಿ ಮಾರ್ನಾಡ್ ಸಹೋದರೆರ್ ಮಾತ ಕ್ಷೇತ್ರಡ್ಲಾ ಪರಿನಿತೆರ್. ನಮ್ಮ ಕ್ಷೇತ್ರದ ಮಿತ್ತ್ ದೀನ ಭಕ್ತಿಗ್ ಈ ಲೇಸ್ ಕೊಡುಗೆ ಆತ್ಂಡ್. ಈ ಭಕ್ತಿ ಸುಗಿಪು ಲೋಕ ಪ್ರಸಿದ್ಧಿ ಆವಡ್, ಅಯ್ಯಪ್ಪ ಸ್ವಾಮಿನ ಸ್ಮರಣೆಡ್ ದಿವ್ಯ ಶಕ್ತಿ ಉಂಡು ಪಂದ್ ಪಂಡೆರ್.
ಗೌರವ ಬಿನ್ನೆರಾದ್ ಗೋಪಾಲ್ ಪಟ್ಟೆ ಬೊಕ್ಕ ಯುಕೆದ ವಿವೇಕಾನಂದ ಮಂಡೆಕರ ಮೊಕ್ಲೆನ ಉಪಸ್ಥಿತಿದೊಟ್ಟಿಗೆ ಬೊಂಬೈದ ಶ್ರೇಷ್ಠ ಗುರುಸ್ವಾಮಿಲಾಯಿನ ರಮೇಶ್ ಗುರುಸ್ವಾಮಿ, ಶಾಂಭವಿ ಗುರುಸ್ವಾಮಿ, ರಾಜಮಣಿ ಸ್ವಾಮಿ, ಚಂದ್ರಹಾಸ ಸ್ವಾಮಿ ಬೊಕ್ಕ ರೇರೋಡಿದ ಶ್ರೀ ಅಯ್ಯಪ್ಪ ಭಕ್ತ ವೃಂದದ ಸಂಸ್ಥಾಪಕೆರ್ ಸತೀಶ್ ಗುರು ಸ್ವಾಮಿ, ಅಪ್ಪಾಜೀ ಬೀಡುದ ಟ್ರಸ್ಟಿ, ಮಹಿಳಾ ವಿಭಾಗ ಕಾರ್ಯಾಧ್ಯಕ್ಷೆರ್ ಕವಿತಾ ಶೆಟ್ಟಿ ಮೊಕುಲು ಮಾತ ಸೇರ್ದ್ ತುಡರ್ ಅರ್ಲಾದ್, ಭಕ್ತಿ ಸುಗಿಪು ಬುಡುಗಡೆ ಮಲ್ತ್ ದ್, ಆಶಿರ್ವಾದ ಮಲ್ತೆರ್.
ಈ ಲೇಸ್ ಡ್ ಪಾಲ್ ಪಡೆಯಿನ ಸ್ವಾಮೀಜಿ ನಕ್ಲೆಗ್ ಗುರುಕಾಣಿಕೆ ಕೊರ್ದು ಸೂರಿ ಮಾರ್ನಾಡು ದಂಪತಿಲು ಗೌರವಿಸಾಯೆರ್. ಭಕ್ತಿ ಸುಗಿಪು ಪದ ಪಂಡಿನಕ್ಲೆಗ್ ತಾಂತ್ರಿಕ ವರ್ಗದಕ್ಲೆಗ್ ಪಲಕ ಕೊರ್ದು ಮಾನಾದಿಗೆ ಮಲ್ತೆರ್. ಶಕುಂತಲಾ ಶೆಟ್ಟಿ ಮೇರ್ ಹಸಿರು ಬೆಟ್ಟದ ಸಾಹಿತ್ಯ, ಸಂಗೀತ, ಪದ ಪಂಡಿನಕ್ಲೆನ ಬಗ್ಗೆ ತೆರಿಪಾಯೆರ್.
ಭಕ್ತಿ ಸುಗಿಪುದ ಸಾಹಿತ್ಯ ಬರೆಯಿನ ಸೂರಿ ಬೊಕ್ಕ ಆರೆನ ಪರಿವಾರಗ್ ತಮ್ಮನ ಮಲ್ತೆರ್. ಬೊಕ್ಕ ಈ ಲೇಸ್ ಗ್ ಅನು ಕೊರ್ನ ಅಪ್ಪಾಜಿ ಬೀಡು ಫೌಂಡೇಶನ್ ದ ಸ್ಥಾಪಕೆರ್, ಅಧ್ಯಕ್ಷೆರ್ ಸುರೇಶ್ ಶೆಟ್ಟಿ ಕೇದಗೆ ಮೆರೆನ್ ಮಾನಾದಿಗೆ ಮಲ್ತೆರ್.
ಭಕ್ತಿ ಸುಗಿಪು ಬುಡುಗಡೆ ಆಯಿ ಬೊಕ್ಕ ರಮೇಶ್ ಗುರುಸ್ವಾಮಿನ ಅಮರ್ ಜೋಕುಲು ರಾಣಿ ಬೊಕ್ಕ ರಾಗಿಣಿ ಪದ ಪಂಡಿನ ಅಪ್ಪಾಜಿ ಬೀಡುದ ಪದನ್ ಉಂದುವೇ ಪೊರ್ತುಡು ಬಿಡುಗಡೆ ಮಲ್ತೆರ್. ಅಪ್ಪಾಜಿ ಬೀಡುದ ಅಧ್ಯಕ್ಷೆರ್ ಸಂತೋಷ್ ಶೆಟ್ಟಿ ಲೇಸ್ ದ ಯಶಸ್ಸಗ್ ಸಹಕಾರ ಮಲ್ತಿನ ಭಕ್ತೆರೆಗ್ ಮಾತೆರೆಗ್ಲಾ ನನದ ದಿನಟ್ಲಾ ಕ್ಷೇತ್ರಡ್ ನಡಪುನ ಸೇವಾ ಕಾರ್ಯಲೆಡ್ ಪಾಲ್ ಪಡೆಯೆರೆ ಬಿನ್ನಾಪು ಮಲ್ತ್ ದ್ ಸೊಲ್ಮೆ ಸಂದಾಯೆರ್. ರಘುನಾಥ್ ಶೆಟ್ಟಿ ಕಾಂದಿವಲಿ ಮೇರ್ ಲೇಸ್ ದ ಸುಧಾರಿಕೆ ಮಲ್ತೆರ್. ಅಪ್ಪಾಜೀ ಬೀಡುದ ಮಹಿಳಾ ವಿಭಾಗದಕುಲು ಪ್ರಾರ್ತನೆ ಮಲ್ತ್ ದ್ ಲೇಸ್ ದ ಉದಿಪನ ಮಲ್ತೆರ್.
ಈ ಪೊರ್ತುಡು ಅಪ್ಪಾಜಿ ಬೀಡುದ ಮಾತ ಕಾರ್ಯಕರ್ತೆರ್, ಕಾರ್ಯಕಾರಿ ಸಮಿತಿದ ಸದಸ್ಯೆರ್, ಕರ್ನಾಟಕ ಸಂಘದ ಭರತ್ಕುಮಾರ್ ಪೊಲಿಪು, ಓಂದಾಸ್ ಕಣ್ಣಂಗಾರ್, ಕವಿ ವಿಶ್ವನಾಥ್ ಪೇತ್ರಿ, ರಂಗನಟೆ ಮೋಹನ್ ಮಾರ್ನಾಡ್, ಅಹಲ್ಯ ಬಲ್ಲಾಳ್, ಮನೋಹರ ನಂದಳಿಕೆ, ಅವಿನಾಶ್ ಕಾಮತ್, ರಮೇಶ್ ಶಿವಪುರ್, ನಮನ ಫ್ರೆಂಡ್ಸ್ದ ಪ್ರಭಾಕರ್ ದಿವಾಕರ್, ಬಂಟರ ಸಂಘ ಸಿಟಿ ರೀಜನ್ದ ಅಧ್ಯಕ್ಷೆರ್ ಶಿವರಾಮ್ ಶೆಟ್ಟಿ, ಆಶೋಕ್ ಪಕ್ಕಳ, ವಿಶ್ವನಾಥ್ ಶೆಟ್ಟಿ, ಸುಚಿತ್ರಾ ಶೆಟ್ಟಿ, ಐಲೇಸಾದ ಪದಗಾರೆರ್ ಡಾ .ಪಲ್ಲವಿ, ರಾಶಿ, ರಮೇಶ್ ನಾರಾಯಣ, ವಿಜಯರಾಘವನ್, ಸುವಿದ್ ಸೂರಿ ಮಾರ್ನಾಡ್ ಇತ್ತೆರ್. ಅಪ್ಪಾಜೀ ಬೀಡುದ ಸದಸ್ಯೆರ್ ಸಹಕಾರ ಕೊರಿಯೆರ್. ಅಪ್ಪಾಜೀ ಬೀಡುದ ಅಧ್ಯಕ್ಷೆರ್ ಸದಸ್ಯೆರೆನ್ ಐಲೇಸಾದ ಪರವಾದ್ ಮಾನಾದಿಗೆ ಮಲ್ತೆರ್. ಬೊಕ್ಕ ಶಿವರಾತ್ರಿದ ಲೆಕ್ಕೊಡು ಭಜನೆ ಬೊಲ್ಪು ಮುಟ್ಟ ನಡತ್ಂಡ್.
ಚಿತ್ರ, ವರದಿ: ದಿನೇಶ್ ಕುಲಾಲ್
” Hasiru Bettada Odhaya” devotional song series released
Mumbai: Appaji Beedu foundation Worli;” Ilaysa the voice of the Ocean”, organization together released a devotional songs series “Hasiru Bettada Odhaya” the lyrics of which has been composed by Suri Marnad.
pallavi shetty