ರಥಬೀದಿ ಕಾಲೇಜಿದ ಹಿಜಾಬ್ ಕೇಸ್ ದ ತನಿಖಾ ವರದಿ ಬೇಗೊಡೆ ಕೋರ್ಟ್ ಗ್ ಕೊರ್ಪ: ಎನ್ ಶಶಿಕುಮಾರ್

ಕುಡ್ಲ, ಮಾ.8; ಪೇಂಟೆದ ರಥಬೀದಿದ  ದಯಾನಂದ ಪೈ-ಸತೀಶ್ ಪೈ ಸರಕಾರಿ ಪದವಿ ಕಾಲೇಜ್ ಡ್ ಹಿಜಾಬ್ ವಿವಾದಗ್ ಸಂಬಂಧಿಸಾದ್ ಸೆನ್ ಠಾಣೆಡ್ ಒಂಜಿ ಪ್ರಕರಣ ಸೇರಿನಂಚನೆ ಒಟ್ಟು ಮೂಜಿ ಕೇಸ್ ದಾಖಲಾದಿತ್ತ್ ದ್, ಕಾನೂನು ತಜ್ಞೆರ್ನ ಅಭಿಪ್ರಾಯ ಪಡೆದ್ ಪ್ರಕರಣದ ಸರಿಯಾಯಿನ ತನಿಖೆನ್ ಬೇಗೊಡೆ ಮಲ್ತ್ ದ್ ವರದಿನ್ ಕೋರ್ಟುಗು ಕೊರಿಯರೆ ಉಂಡು ಪಂದ್ ಪೊಲೀಸ್ ಆಯುಕ್ತೆರ್ ಎನ್.ಶಶಿಕುಮಾರ್ ಪಂಡೆರ್.

ಆರ್ನ ಕಚೇರಿಡ್ ಅಂಗಾರೆ ಪತ್ರಿಕಾಗೋಷ್ಠಿಡ್ ಪಾತೆರ್ದಿನ ಆರ್, ಜೀವ ಬೆದರಿಕೆದ ವಿಷಯಗ್ ಸಂಬಂಧಿಸಾದ್ ಯಂಕ್ ಆವಡ್ ಅತ್ತ್ಂಡ ಠಾಣೆಗಾವಡ್ ಒವ್ವೆ ರೀತಿದ ದೂರು, ಸುದ್ದಿ ಬೈದಿಜಿ. ಆಂಡಲಾ ಮಾತ ವಿದ್ಯಾರ್ಥಿಲೆನ್ ರಕ್ಷಣೆ ಮಲ್ಪುನ ಕರ್ತವ್ಯ ಯಂಕಲ್ನ ಆದಿತ್ತ್ ದ್, ಈ ಬಗೆಟ್ಟ್ ಮಾಹಿತಿ ಪಡೆಯೊಂದ್ ಅಗತ್ಯ ಕ್ರಮ ದೆತೊನರೆ ಅಧಿಕಾರಿಲೆಗ್ ಸೂಚನೆ ಕೊರ್ಪೆ ಪಂದ್ ಆರ್ ಭರವಸೆ ಕೊರಿಯೆರ್.

ರಾಜ್ಯದ ಮಸ್ತ್ ಕಡೆಟ್ಟ್ ಹಿಜಾಬ್ ಅಂಚನೇ ಕೇಸರಿ ಶಾಲ್ ಲಡಾಯಿ ಸುರು ಆದ್ ಕುಡ್ಲ ಪೇಂಟೆಡ್ ಮಾತ ವಿದ್ಯಾರ್ಥಿ ಸಂಘಟನೆಲು, ಧಾರ್ಮಿಕ ಮುಖಂಡೆರ್, ಶಿಕ್ಷಣ ಸಂಸ್ಥೆಲು ಒವ್ವೆ ರೀತಿದ ಬೊಡ್ಚಾಂದಿನ ಘಟನೆ ನಡಪಂದಿಲೆಕ್ಕ ಸಾಕಾರ ಕೊರ್ತ್ಂಡ್. ಮಾ.3ಕ್ಕ್ ದಯಾನಂದ ಪೈ ಪ್ರಥಮ ದರ್ಜೆ ಕಾಲೇಜ್ ಡ್ ಹಿಜಾಬ್ ದ ಲಡಾಯಿಗ್ ಸಂಬಂಧಿಸಾದ್ ವಿದ್ಯಾರ್ಥಿನಿ ಒರ್ತಿಗ್ ಕಿರಿಕಿರಿ ಆತಿನ ವಿಷಯಗ್ ಸಂಬಂಧಿಸಾದ್ ಮಾ.4ಕ್ಕ್ ಬಂದರ್ ಠಾಣೆಡ್ ದೂರು ದಾಖಲಾತ್ಂಡ್. ಈ ಬಗೆಟ್ಟ್ ಕಾನೂನು ತಜ್ಞೆರ್ನ ಅಭಿಪ್ರಾಯನ್ ಪಡೆಯೊಂದ್ ಸೆಕ್ಷನ್ 324 ಅಂಚನೆ 504 ದ ಅಡಿಟ್ಟ್ ಪ್ರಕರಣ ದಾಖಲಾತ್ಂಡ್. ಘಟನೆಗ್ ಸಂಬಂಧಿಸಾದ್ ಕಾಲೇಜ್ ದ ಸಿಸಿಟಿವಿ ಫೂಟೇಜ್, ಶಿಕ್ಷಕ ವೃಂದದ ಹೇಳಿಕೆ, ಅಂಚನೆ ಬೇತೆ ಬೇತೆ ಸಾಕ್ಷಿದ ತನಿಖೆಗ್ ಸಹಕರಿಸಾದ್ ನೋಟಿಸ್ ಕೊರ್ದ್ ತನಿಖೆ ಮಲ್ತೊಂದ್ಂಡು. ಉಂದುವೇ ಪೊರ್ತುಡ್ ವಿದ್ಯಾರ್ಥಿ ಪಂಡಿನ ಪುದರ್ ದ ವಿದ್ಯಾರ್ಥಿನಿ ಮಿತ್ತ್ ಸಾಮಾಜಿಕ ಜಾಲತಾಣಡ್ ಬೊಡ್ಚಾಂದಿನ ಪೋಸ್ಟ್ ಲೆನ್ ಮಲ್ತ್ ದಿನ ಬಗೆಟ್ಟ್ ಸೆನ್ ಠಾಣೆಡ್ ದೂರು ಒಂಜಿ ದಾಖಲಾತ್ಂಡ್. ಉಂದುವೇ ಪೊರ್ತುಡ್ ಅವ್ವೆ ಕಾಲೇಜ್ ದ ವಿದ್ಯಾರ್ಥಿನಿ ಅಂಚನೆ ಬೇತೆ ವಿದ್ಯಾರ್ಥಿಲು ಸೇರ್ದ್ ಉಪದ್ರನ್ ಮಲ್ತ್ ದ್, ಕಾನೂನ್ ದ ರೀತಿಡ್ ಆಕ್ಷೇಪಾರ್ಹ ರೀತಿಡ್ ವರ್ತನೆ ಮಲ್ದಿನೆಕ್ಕ್ ದೂರು ದಾಖಲಾತ್ಂಡ್. ಈ ಮೂಜಿ ಪ್ರಕರಣಡ್ ಕಾನೂನು ತಜ್ಞೆರ್ನ ಅಭಿಪ್ರಾಯನ್ ಪಡೆದ್ ಪೆರಿಯ ಅಧಿಕಾರಿಲೆನ ಮೇಲ್ವಿಚಾರಣೆಡ್ ತನಿಖೆ ಆವೊಂದ್ಂಡು ಪಂದ್ ಪೊಲೀಸ್ ಆಯುಕ್ತೆರ್ ಎನ್.ಶಶಿಕುಮಾರ್ ತೆರಿಪಾಯೆರ್.