ತುಳು ಕೂಟ ಫೌಂಡೇಶನ್ ನಲಾಸೋಪಾರ; ವಿಶ್ವ ಮಹಿಳಾ ದಿನಾಚರಣೆ
ನಲಾಸೋಪಾರ ಪಶ್ಚಿಮದ ಗ್ಯಾಲೇಕ್ಸಿ ಸಭಾಗೃಹಟ್ಟ್ ತುಳು ಕೂಟ ಫೌಂಡೇಶನ್ ನಲಾಸೋಪಾರ ಉಂದೆತ್ತ ಪೊಂಜೋವ್ ನಕ್ಲೆನ ವಿಭಾಗದ ಮುತಾಲಿಕೆಡ್ ವಿಶ್ವ ಮಹಿಳಾ ದಿನಾಚರಣೆ ನಡತ್ಂಡ್.
ಸಮಾರಂಭದ ಅಧ್ಯಕ್ಷೆತೆನ್ ತುಳು ಕೂಟ ಫೌಂಡೇಶನ್ ನಲಾಸೋಪಾರ ಉಂದೆತ್ತ ಅಧ್ಯಕ್ಷೆರ್ ಆಯಿನ ಶಶಿಧರ್ ಕೆ.ಶೆಟ್ಟಿ ಇನ್ನಂಜೆ ವಹಿಸೊಂದೆರ್. ಡಾ. ವಿಜೇತಾ ಎಸ್ ಶೆಟ್ಟಿ ಮುಕುಲ್ ಶೈಕ್ಷಣಿಕ ಕ್ಷೇತ್ರಡ್ ಮಲ್ತಿನ ಸಾಧನೆ ಮುಲ್ಪದ ಜವನ್ಯೆರೆಗ್ ಪ್ರೇರಣೆಯಾವಡ್. ಮುಲ್ಪದ ಯುವ ಪ್ರತಿಭೆಲೆನ್ ಗುರ್ತಿಸಾದ್ ಸನ್ಮಾನ ಮಲ್ತಿನವ್ ಬೇತೆ ಯುವ ಪ್ರತಿಭೆಲೆಗ್ ಪ್ರೋತ್ಸಾಹ ಆವಡ್ ತುಳು ಕೂಟಗ್ ಇತ್ತೆ 5 ವರ್ಷ ಆದಿತ್ತ್ ದ್, ಈ ಕಮ್ಮಿ ಪೊರ್ತುಡ್ ನಮ್ಮ ತುಳುಕೂಟ ಮಲ್ತಿನ ಸಾಧನೆ ಆಪಾರ ಪಂದ್ ಪಂಡೆರ್.
ಬಿಲ್ಲವರ ಅಸೋಷಿಯೇಶನ್ ಸಂಘದ ಉಪಾಧ್ಯಕ್ಷೆರ್ ಜಯಂತಿ ಉಳ್ಳಾಲ್ ಪಾತೆರ್ದ್, ಇತ್ ಮಲ್ಲ ಸಂಖ್ಯೆಡ್ ತುಳು ಭಾಷೆನ್ ಪಾತೆರೊಂದ್ ಇಪ್ಪುನ ಪೊಂಜೋವ್ ನಕ್ಲೆನ್ ತೂನಗ ನಮ್ಮ ಊರುಡೇ ಇತ್ತಿನ ಅನುಭವ ಆಪ್ಂಡ್ ಪಂದ್ ಪಂಡೆರ್. ರಜಕ ಸಂಘ ಬೊಂಬೈ ಪೊಂಜೋವ್ ನಕ್ಲೆನ ವಿಭಾಗದ ಕಾರ್ಯಧ್ಯಕ್ಷೆರ್ ಪ್ರವೀಣಾ ಪಿ. ಕುಂದರ್ ಪಾತೆರ್ದ್ ಇತ್ತೆ ಪೊಂಜೋವ್ ನಕುಲ್ ಒಯಿಟ್ಟ್ ಲ ಕಮ್ಮಿ ಇಜ್ಜೆರ್ ಪಂದ್ ಪಂಡೆರ್.
ಈ ಪೊರ್ತುಡ್ ವಸಾಯಿ-ವಿರಾರ್ ಮಹಾ ನಗರ ಪಾಲಿಕೆದ ಅಸಿಸ್ಟಂಟ್ ಕಮಿಷನರ್ ರೂಪಾಲಿ ರಾಜೇಂದ್ರ ಶಂಖೆ, ಲೇಖಕಿ ಸುರೇಖಾ ಶೆಟ್ಟಿ ವಸಯಿ, ಕ್ರೀಡಾಪಟು ಕ್ರಿತಿ ತೇಜ್ಪಾಲ್ ಕರ್ಕೇರ ವೇದಿಕೆಡ್ ಪಾಲ್ ಪಡೆದಿತ್ತೆರ್. ತುಳು ಕೂಟ ಫೌಂಡೇಶನ್ ನದ ಅಧ್ಯಕ್ಷೆರ್ ಶಶಿಧರ ಕೆ ಶೆಟ್ಟಿ, ಮಾತ ಬಿನ್ನೆರೆಗ್ ಅಂಚನೆ ಪದಾಧಿಕಾರಿಲೆಗ್ ಮಾನಾದಿಗೆ ಮಲ್ತೆರ್.
ಮನೋರಂಜನೆದ ಅಂಗವಾದ್ ಬೇತೆ ಬೇತೆ ರೀತಿದ ಭಜನೆ, ನೃತ್ಯ ಕಾರ್ಯಕ್ರಮ ಬೊಕ್ಕ ಮಹಿಳಾ ಸದಸ್ಯೆರ್ದ್ ನಾರಾಯಣ ಶೆಟ್ಟಿ ನಂದಳಿಗೆ ರಚನೇ ಮಲ್ತಿನ, ಚಿತ್ರ ನಟ ಚಂದ್ರಕಾಂತ್ ಸಾಲ್ಯಾನ್ ಸಸಿಹಿತ್ಲು ನಿರ್ದೇಶನ ಮಲ್ತಿನ “ಮಗಲಾಲ್ ಮರ್ಮಾಲತ್ತ್” ತುಳು ನಾಟಕ ಪ್ರದರ್ಶನ ಇತ್ತ್ಂಡ್.
