March 25, 2022

ಎಲ್ಲೆ ಕುಡ್ಲಡ್ “ಮಂಗಳೂರು ಕಂಬುಲ”ದ ಗೌಜಿ

ಕುಡ್ಲ, ಮಾ.25: ಕುಡ್ಲದ ಕಂಬುಲ ಸಮಿತಿದ ಮುತಾಲಿಕೆಡ್ ನಡಪುನ 5ನೇ ವರ್ಷದ ರಾಮಲಕ್ಷ್ಮಣ ಜೋಡುಕರೆ ಕಂಬುಲ ಪೇಂಟೆದ ಬಂಗ್ರಕೂಳೂರು ಗೋಲ್ಡ್ ಪಿಂಚ್ ಸಿಟಿಟ್ಟ್ ಮಾ.26, 27 ತಾರೀಕ್ ಗ್ ನಡಪರೆ ಉಂಡು.

26 ತಾರೀಕ್ ಗ್ ಕಾಂಡೆ 8.30 ಗ್ ಉದಿಪನ ಆದ್ ಮನದಾನಿ 27 ತಾರೀಕ್ ಗ್ ಕಾಂಡೆ ಇನಾಮು ಕೋರ್ಪಿನ ಮುಖೇನ ಮುಗಿತಲ ಆಯರೇ ಉಂಡು ಪಂದ್ ಸಮಿತಿದ ಅಧ್ಯಕ್ಷೆರ್ ಕ್ಯಾಪ್ಟನ್ ಬೃಜೇಶ್ ಚೌಟ ಗುರುವಾರದಾನಿ ಸುದ್ದಿಗೋಷ್ಠಿಡ್ ತೆರಿಪಾಯೆರ್.

ಜನವರಿಡ್ ನಡಪರೆ ಇಪ್ಪುನ ಕಂಬುಲ ಮಾರ್ಚ್ ಡ್ ಅವೊಂದ್ಂಡ್. ಆಂಡಲ 130 ಜೊತೆ ಎರುಕುಲು ಪಾಲ್ ಪಡೆಯುನ ನಿರೀಕ್ಷೆಡ್ ಉಲ್ಲ. 26 ತಾರೀಕ್ ಗ್ ಕಾಂಡೆ ಕರಾವಳಿ ಕಾಲೇಜು ಸಮೂಹ ಸಂಸ್ಥೆದ ಮುಖ್ಯಸ್ಥೆರ್ ಎಸ್. ಗಣೇಶ್ ರಾವ್ ತುಡರ್ ಆರ್ಲಾಯರೆ ಉಲ್ಲೆರ್. ಕಂಕನಾಡಿ ಬ್ರಹ್ಮ ಬೈದರ್ಕಳ ಗರಡಿ ಕ್ಷೇತ್ರದ ಅಧ್ಯಕ್ಷೆರ್ ಕೆ.ಚಿತ್ತರಂಜನ್ ಉದಿಪನ ಮಲ್ಪುವೆರ್. ಕದ್ರಿ ಯೋಗೇಶ್ವರ ಮಠತ್ತ ಶ್ರೀ ನಿರ್ಮಲ್ ನಾಥ್ ಜಿ, ರಾಮಕೃಷ್ಣ ಮಠತ್ತ ಏಕಗಮ್ಯಾನಂದಜಿ, ಆದಿಚುಂಚನಗಿರಿ ಶಾಖಾ ಮಠತ್ತ ಡಾ. ಧರ್ಮಪಾಲನಾಥ ಸ್ವಾಮೀಜಿ, ವಜ್ರದೇಹಿ ಮಠತ್ತ ಶ್ರೀ ರಾಜಶೇಖರಾನಂದಜಿ ಲೇಸ್ ಡ್ ಪಾಲ್ ಪಡೆಯರೆ ಉಲ್ಲೆರ್.

ಈ ಸರ್ತಿ ಬಲ್ಲ್ ಪೆರಿಯ, ಬಲ್ಲ್ ಕಿನ್ಯ, ನೇಗಿಲು ಪೆರಿಯ, ಕಿನ್ಯ, ಕನೆಪಲಾಯಿ, ಅಡ್ಡ ಪಲಾಯಿ ವಿಭಾಗೊಡ್ ಪಂಥೋ ನಡಪರೆ ಇತ್ತ್ ದ್, ಕನೆಪಲಾಯಿ 7.5 ಕೋಲ್ ದ ಎತ್ತರಗ್ ಎರುಕುಲು ನೀರ್ ಬೀಜಾಂಡ 2 ಪವನ್ ಬಂಗಾರ್, 6.5 ಕೋಲ್ ಎತ್ತರಗ್ ನೀರ್ ಬೀಜಾಂಡ 1 ಪವನ್ ಇನಾಮು ತಿಕ್ಕುಂಡ್. ಬಲ್ಲ್, ನೇಗಿಲು ಪೆರಿಯ ವಿಭಾಗಡ್ ಸುರುತ್ತ ಇನಾಮು 2 ಪವನ್ ಬಂಗಾರ್ ಅಂಚನೆ ರಡ್ಡನೇ ಇನಾಮು 1 ಪವನ್ ಬಂಗಾರ್, ಅಡ್ಡ ಪಲಾಯಿ ಬಲ್ಲ್, ನೇಗಿಲು ಕಿರಿಯ ವಿಭಾಗಡ್ ಸುರುತ್ತ ಇನಾಮು 2 ಪವನ್ ಬಂಗಾರ್ ಅಂಚನೆ ರಡ್ದನೇ ಇನಾಮು ಅರ್ಧ ಪವನ್ ದ ಬಂಗಾರ್ ದ ಇನಾಮು ತಿಕ್ಕರೇ ಉಂಡು.

ಸಾಮಾನ್ಯವಾದ್ ಕಂಬುಲದ ಕಡೆತ್ತ ಹಂತೋದ ಕ್ವಾಟರ್ ಫೈನಲ್, ಸೆಮಿಫೈನಲ್, ಫೈನಲ್ಸ್ ಲು ಮಾ.27 ತಾರೀಕ್ ಗ್ ಐತಾರ ಕಾಂಡೆ 6 ಗಂಟೆರ್ದ್ ಬೊಕ್ಕ ನಡಪರೆ ಉಂಡು. ಅಂಚಾದ್ ಪೇಂಟೆದ ಕಂಬುಲ ಪ್ರೇಮಿಲು ಈ ಪೊರ್ತುಡ್ ಬತ್ತ್ಂಡ ಮಸ್ತ್ ರೋಚಕವಾಯಿನ ಪಂಥೋನ್ ತೂಪಿನ ಅವಕಾಶ ಉಂಡು ಪಂದ್ ಕ್ಯಾಪ್ಟನ್ ಬೃಜೇಶ್ ಚೌಟ ತೆರಿಪಾಯೆರ್.

ಫೊಟೊಗ್ರಫಿ, ಇನ್ಸ್ಟಾಗ್ರಾಮ್ ರೀಲ್ಸ್ ಪಂಥ

ಈ ಸರ್ತಿ ಕುಡ್ಲ ಕಂಬುಲಡ್ ಫೊಟೊಗ್ರಫಿ ಪಂಥೋ ಉಂಡು ಅಂಚನೆ ಸುರುತ್ತ ಸರ್ತಿ ಕಂಬುಲದ ರೀಲ್ಸ್ ಪಂಥೋನ್ ಆಯೋಜನೆ ಮಲ್ತ್ ದೆರ್. ಮಾ.26 ಜೆಡ್ದ್ 27 ಗ್ ಕಾಂಡೆ 11 ಗಂಟೆ ಮುಟ್ಟ ಇನ್ಸ್ಟಾಗ್ರಾಂ ರೀಲ್ಸ್ ನ್ ಅಪ್ ಲೋಡ್ ಮಲ್ಪೊಲಿ. ಅವೆನ್ Mangalorekambala2022 ಪಂದ್ ಹ್ಯಾಷ್ ಟ್ಯಾಗ್ ಪಾಡ್ದ್ ಅಪ್ ಲೋಡ್ ಮಲ್ಪೊಡ್. ಈ ಸರ್ತಿ ಜೋಕುಲೆಗ್ ಪರೀಕ್ಷೆ ಅವೊಂದಿಪ್ಪುನ ಕಾರಣ ಡ್ರಾಯಿಂಗ್ ಪಂಥೋ ಇಪ್ಪುಜಿ ಪಂದ್ ಈಶ್ವರ್ ಶೆಟ್ಟಿ ಪಂಥೋದ ಬಗ್ಗೆ ಮಾಹಿತಿನ್ ಕೊರಿಯೆರ್.

ಮಾರ್ಚ್ ಡ್ ಕಂಬುಲ ನಡಪುನೆಡ್ದಾವರ ಕಂಬುಲದ ಎರುಕುಲೆಗ್, ಬಲ್ಪಾವುನಕ್ಲೆಗ್ ದೊಂಬುದ ಬೆಚ್ಚ ತಾಗುನೆಡ್ದಾವರ ಮಾತ ಕಂಬುಲದ ಎರುಕ್ಲೆನ ಯಜಮಾನೆರ್, ಬಲ್ಪಾವುನಕುಲು ಸಾಕಾರ ಕೊರೊಡ್ ಪಂದ್ ಕುಡ್ಲ ಕಂಬುಲದ ಗೌರವ ಸಲಹೆಗಾರೆರ್ ಆಯಿನ ವಿಜಯ್ ಕುಮಾರ್ ಕಂಗಿನಮನೆ ಪಂಡೆರ್.

ಈಶ ಫೌಂಡೇಶನ್ ಇತ್ತೆ ಸದ್ಗುರು ಮುತಾಲಿಕೆಡ್ “ನಮ್ಮ ಮಣ್ಣ್ ದ ಸತ್ವನ್ ಒರಿಪಾಗ” ಪನ್ಪಿನ ಅಭಿಯಾನನ್ ಮಲ್ತ್ ದೆರ್. ಈಶಾ ಫೌಂಡೇಶನ್ ನ ಪ್ರತಿನಿಧಿಲು ಈ ಕಂಬುಲದ ಪೊರ್ತುಡ್ ನೆತ್ತ ಬಗ್ಗೆ ಪ್ರಚಾರದ ಕಾರ್ಯನ್ ಮಲ್ಪರೆ ಉಲ್ಲೆರ್ ಪಂದ್ ಫೌಂಡೇಶನ್ ದ ದೀಪಕ್ ಭಟ್ ತೆರಿಪಾಯೆರ್.

ಪತ್ರಿಕಾಗೋಷ್ಠಿಡ್ ಕಂಬುಲ ಸಮಿತಿದ ಪ್ರಧಾನ ಕಾರ್ಯದರ್ಶಿ ಸುಜಿತ್ ಪ್ರತಾಪ್ ಮಂಗಲ್ಪಾಡಿ, ಸಂಚಾಲಕೆರ್ ಸಚಿನ್ ಶೆಟ್ಟಿ ಸಾಂತ್ಯಗುತ್ತು, ಸಲಹೆಗಾರೆರ್ ಪಿ. ಆರ್. ಶೆಟ್ಟಿ, ತೀರ್ಪುಗಾರೆರ್ ಸುಧಾಕರ್ ಶೆಟ್ಟಿ ಮೊಗರೋಡಿ, ಸಂಜಯ್ ಪ್ರಭು, ಗುರುಚಂದ್ರ ಹೆಗ್ಡೆ ಗಂಗಾರಿ ಇತ್ತೆರ್.