March 20, 2022

ಬೇಲಾಡಿಡ್ “ಬಲೆ ತುಳು ಲಿಪಿ ಕಲ್ಪುಗ”  ಮುಗಿತಲ ಬೊಕ್ಕ ಮಾನಾದಿಗೆದ ಲೇಸ್

ಕುಡ್ಲ : ತುಳುವೆರೆ ಜವನೆರ್ , ಪುಂಡರೀಕ ಶ್ರೀ ವಿಷ್ಣುಮೂರ್ತಿ ಭಜನಾ  ಮಂಡಳಿದ ಮುತಾಲಿಕೆಡ್ ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿ, ಜೈ ತುಲುನಾಡ್ (ರಿ) ಒಟ್ಟು ಸೇರಿಗೆಡ್   ಪುಂಡರೀಕ ಶ್ರೀ ವಿಷ್ಣುಮೂರ್ತಿ  ದೇವಲ್ಯಡ್ ನಡತಿನ ” ಬಲೆ ತುಳು ಲಿಪಿ ಕಲ್ಪುಗ”  ಕಜ್ಜ ಕೊಟ್ಯದ ಮುಗಿತಲದ ಲೇಸ್ ,ಸಾಧಕೆರೆಗ್ ಮಾನಾದಿಗೆ ದ ಲೇಸ್ ನಡತುಂಡು.

ಲೇಸ್ ದ ಗುರ್ಕಾರ್ಲಾಯಿನ    ಅಶೋಕಾನಂದ ಶೆಟ್ಟಿ ಪಾತೆರಿಯೆರ್ .ಮಲ್ಲ ಬಿನ್ನೆರ್ ಆಯಿನ  ಡಾ| ಆಕಾಶ್ ರಾಜ್ ಜೈನ್ ಪಾತೆರ್ದ್ ತುಳು ರಾಜ್ಯ ಭಾಷೆ ಆವೊಡು ಪಂದ್ ಆಂಡ ನಮ ಮಾತೆರ್ಲ ಮಲ್ಲ ಮಟ್ಟದ ಸೊರ ಲಕ್ಕಾವೊಡು ಪಂದ್ ಪಂಡೆರ್.

ರಂಗಭೂಮಿ ಕಲಾವಿದೆರಾಯಿನ ನಿತೇಶ್ ಕುಲಾಲ್ ಬೇಲಾಡಿ ಮೆರೆಗ್ ಮಾನದಿಗೆ ಮಲ್ತೆರ್ .
ತುಲು ಲಿಪಿ  ಶಿಕ್ಷಕೆರಾಯಿನ ರಾಜೇಶ್ ತುಲುವೆ , ಅಕ್ಷತಾ ಕುಲಾಲ್ ಮೆಕ್ಲೆಗ್ ಮಾನದಿಗೆ ಮಲ್ತೆರ್  .
ಜೈ ತುಲುನಾಡ್ ಸಂಘಟನೆದ   ಉಪಾಧ್ಯಕ್ಷ  ವಿಶು ಶ್ರೀಕೇರ  ಪಾತೆರ್ದ್ ನಮಕ್ ತುಳುನಾಡ್ಡೇ ಸರಿಯಾಯಿನ ಸ್ಥಾನಮಾನ ತಿಕ್ಕೊಂದು ಇಜ್ಜಿ ಪಂದ್ ಪನೊಂದು ತುಳುನಾಡ್ ದ ಅವ್ವೆತೋ ಜನ ಸರ್ಕಾರಿ ಬೇಲೆಡ್ ಉಲ್ಲೆರ್ ಪಂದ್ ಪ್ರಶ್ನೆ ಮಲ್ತೆರ್.

ಜೈ ತುಲುನಾಡ್  ಸಂಘಟನೆದ ಸ್ಥಾಪಕ  ಸದಸ್ಯಶರತ್ ಕೊಡವೂರ್  ಪಾತೆರಿಯೆರ್ .
ಲೇಸ್ ಡ್ ತುಳು ಲಿಪಿ ಪರೀಕ್ಷೆಡ್ ಇಂಚೋಗು   ಉತ್ತೀರ್ಣರಾಯಿನಕ್ಲೆಗ್ ಆಜೋಲೆ ಪಟ್ಟುನ ಲೇಸ್ ನಡತುಂಡು.ಈ ಪೊರ್ತುಡು   ಕ್ಷೇತ್ರದ  ಅರ್ಚಕೆರಾಯಿನ   ಗೋಪಾಲ್ ಕೃಷ್ಣ  ಭಟ್  ,ತುಳು ಲಿಪಿ ಶಿಕ್ಷಕೆರಾಯಿನ ಸುದೀಪ್ ಶೆಟ್ಟಿ , ನಿಶಿಲ್ ಶೆಟ್ಟಿ ,ದೀಪಕ್ ಶೆಟ್ಟಿ,  ಪಾಲ್ ಪಡೆದಿತ್ತೆರ್ .

ಐರ್ದ್ ಬೊಕ್ಕ ನಡತಿನ ಸಾಂಸ್ಕೃತಿಕ ಲೇಸ್ ಡ್ ನೃತ್ಯ, ತುಳು ಗೀತೆ, ಪಾರ್ದನ, ಗಾದೆದ ಮುಖೇನ ತುಳುನಾಡ್ ದ ಸಂಸ್ಕೃತಿನ್ ನೆಂಪು ಮಲ್ತೆರ್ .
ದಿವ್ಯಾ ನಾಯ್ಕ್  ಎದುಕೊಂಡೆರ್ ,ಪ್ರಭಾಕರ್ ಕುಲಾಲ್ ಸೊಲ್ಮೆ ಸಂದೈತ ಮಲ್ತೆರ್ . ಸಾಮಾನಿ ಅಶ್ವಿತ್ ಬೇಲಾಡಿ ಲೇಸ್ ನಡಪಾದ್ ಕೊರಿಯೆರ್ .