ಕೇಂದ್ರ ಭೂ ಸಾರಿಗೆ ಸಚಿವೆರ್ ನಿತಿನ್ ಗಡ್ಕರಿ ಮೇರ್ ಫೆ.22 ಕ್ಕ್ ಶಿವಮೊಗ್ಗಗ್ ಭೇಟಿ ಕೊರಿಯೆರೆ ಉಲ್ಲೆರ್.
ರಾಜ್ಯದ ಒಟ್ಟು 6168 ಕೋಟಿ ರೂ. ಕರ್ಚಿದ 18 ಅಭಿವೃದ್ಧಿ ಕಾಮಗಾರಿಗ್ ಚಾಲನೆ ಕೊರಿಯೆರೆ ಉಲ್ಲೆರ್. ಬಳ್ಳಾರಿ, ಚಿತ್ರದುರ್ಗ, ಶಿವಮೊಗ್ಗ, ಹಾಸನ, ಚಿಕ್ಕಮಗಳೂರು, ಒಡಿಪು, ದಕ್ಷಿಣ ಕನ್ನಡ ಜಿಲ್ಲೆಗ್ ಸಂಬಂಧಪಟ್ಟಿನ ಒಟ್ಟು 296.92 ಕಿ.ಮೀ ಉದ್ದದ ರಾಜ್ಯ ಮಾರ್ಗ ಕಾಮಗಾರಿಲು ಉಂಡು. ನೆಹರೂ ಕ್ರೀಡಾಂಗಣಡ್ ಮಧ್ಯಾಹ್ನ 2 ಗಂಟೆಗ್ ಉದಿಪನ ಲೇಸ್ ನಡಪರೆ ಉಂಡು ಪಂದ್ ಸಂಸದೆರ್ ಬಿವೈ ರಾಘವೇಂದ್ರ ತೆರಿಪಾದೆರ್.
ಮುಲ್ಕಿ: ಕಲ್ಪಾರ್ಥಿಲು ಶಾಲೆದ ಮಲ್ಲ ಆಸ್ತಿ. ಶಿಕ್ಷಕೆರೆನ ಮೌಲ್ಯ ಬೊಕ್ಕ ಮಹತ್ವನ್ ತೆರಿಪಾವುನಲ್ಪ ಕಲ್ಪಾರ್ಥಿಲು ಮಲ್ಲ ಪಾತ್ರ ಒಯಿಸೊನ್ವೆರ್. ಶಿಕ್ಷಕೆರೆಗ್ ವಿಧೇಯರಾದಿಪ್ಪುನವು ಕಲ್ಪಾರ್ಥಿಲೆನ ಕರ್ತವ್ಯ ಪಂದ್ ಶಿಮಂತೂರು ಶ್ರೀ ಶಾರದಾ ಸೊಸೈಟಿ (ರಿ.) ಗುರ್ಕಾರೆ, ಧರ್ಮದರ್ಶಿಲು ಡಾ. ಹರಿಕೃಷ್ಣ ಪುನರೂರು ಪಂಡೆರ್.
ಮೇರ್ ಶ್ರೀ ಶಿಮಂತೂರುದಶಾರದಾ ಸೆಂಟ್ರಲ್ ಸ್ಕೂಲ್ ದ ಕಿರಿಯ ಕಲ್ಪಾರ್ಥಿಲು ಆಯೋಜನೆ ಮಲ್ತಿನ ಎಸ್ ಎಸ್ ಎಲ್ ಸಿ ಕಲ್ಪಾರ್ಥಿಲೆನ ಬೀಳ್ಕೊಡುಗೆ ಲೇಸ್ ಡ್ ಪಾತೆರಿಯೆರ್.
ಮಲ್ಲ ಬಿನ್ನೆರಾದ್ ಆಡಳಿತ ಮಂಡಳಿದ ನಿರ್ದೇಶಕೆರ್ ಕೊ.ಭುವನಾಭಿರಾಮ ಉಡುಪ ಪಾತೆರಿಯೆರ್. ಈ ಪೊರ್ತುಡು ಶಾಲೆದ ಸಂಚಾಲಕೆರ್ ದೇವಪ್ರಸಾದ್ ಪುನರೂರು, ಪ್ರಾಂಶುಪಾಲೆರ್ ಜಿತೇಂದ್ರ ವಿ ರಾವ್ ಪಾಲ್ ಪಡೆದಿತ್ತೆರ್. ಕಲ್ಪಾರ್ಥಿ ಕೇಶವ ಲೇಸ್ ದ ಸುಧಾರಿಕೆ ಮಲ್ತೆರ್. ಶ್ರೀಯ ಎದ್ಕೊನಿಯೆರ್. ಯಶಸ್ ಸೊಲ್ಮೆ ಸಂದಾಯೆರ್.
ಬಂಟ್ವಾಳ: ಒಡಿಯೂರು ಶ್ರೀ ಗುರುದೇವದತ್ತ ಸಂಸ್ಥಾನಡ್ ಫೆ.18 ಬೊಕ್ಕ 19 ಕ್ಕ್ ತುಳುನಾಡ ಜಾತ್ರೆ, ತೇರ್ ಉಚ್ಚಯ ಬೊಕ್ಕ 24ನೇ ಸಿರಿರಾಮೆ ತುಳು ಸಾಹಿತ್ಯ ಸಮ್ಮೇಳನ ನಡತ್ಂಡ್.
ಈ ಲೇಸ್ ಶ್ರೀ ಗುರುದೇವಾನಂದ ಸ್ವಾಮೀಜಿಲೆನ ಮಾರ್ಗದರ್ಶನಡ್ ಅಂಚೆನೆ ವೇ.ಮೂ. ಚಂದ್ರಶೇಖರ ಉಪಾಧ್ಯಾಯೆರೆನ ಪೌರೋಹಿತ್ಯಡ್ ನಡತ್ಂಡ್.
ಫೆ.18 ಐತಾರ ಕಾಂಡೆ 24ನೇ ಸಿರಿರಾಮೆ ತುಳು ಸಾಹಿತ್ಯ ಸಮ್ಮೇಳನದ ಉದಿಪನ, ಚಿಟ್ಕ-ಕಬಿಕೂಟ, ತುಲಿಪು ಲೇಸ್, ಮಧ್ಯಾಹ್ನ ಕಬಿತೆ ಪದ ಚಿತ್ರೊ, ಮುಗಿತಲ ಲೇಸ್ ತುಳುಸಿರಿ ಮಾನಾದಿಗೆ ಬಯ್ಯಗ್ ಪಾವಂಜೆ ಮೇಳದಕ್ಲೆರ್ದ್ ಅಯೋಧ್ಯಾ ದೀಪ ಯಕ್ಷಗಾನ ಬಯಲಾಟ ನಡತ್ಂಡ್.
ಫೆ.19 ಬೊಲ್ಪುಗು ಶ್ರೀ ಒಡಿಯೂರು ತೇರ್ ಉಚ್ಚಯ, ತುಳುನಾಡ ಜಾತ್ರೆ, ಸಾರ್ವಜನಿಕ ಶ್ರೀ ಸತ್ಯನಾರಾಯಣ ಪೂಜೆ, ಮಂಗಳಾರತಿ, ಧರ್ಮಸಭೆ, ಮಧ್ಯಾಹ್ನ ಅನ್ನ ಪ್ರಸಾದ ಸೇವೆ, ಸುಂದರಕಾಂಡ ಕಾವ್ಯ ವಾಚನ, ಬಯ್ಯಗ್ ಬೊಳ್ಳಿಮಲೆತ ಶಿವಶಕ್ತಿಲು ತುಳು ನಾಟಕ, ರಾತ್ರೆ ಸಾಂಸ್ಕೃತಿಕ ಲೇಸ್, ಟ್ಯಾಬ್ಲೋ, ಚೆಂಡೆ ಮೇಳ, ಬ್ಯಾಂಡ್ ಸೆಟ್, ಬೊಂಬೆ ಪ್ರದರ್ಶನ, ತೇರ್ ಅಲಂಕಾರ, ಬೆಡಿಮರ್ದ್ ಪ್ರದರ್ಶನದೊಟ್ಟಿಗೆ ಲೇಸ್ ಸಂಪನ್ನ ಆಂಡ್.
ಈ ಸರ್ತಿದ ಸೆಕೆಂಡ್ ಪಿಯುಸಿ ಪರೀಕ್ಷೆ ಮಾ.1-22 ಮುಟ್ಟ ನಡಪರೆ ಉಂಡು.
ಎಸ್ ಎಸ್ ಎಲ್ ಸಿ ಪರೀಕ್ಷೆ ಮಾ.25 ರ್ದ್ ಎ.6 ಮುಟ್ಟ ನಡಪರೆ ಉಂಡು ಪಂದ್ ಶಿಕ್ಷಣ ಸಚಿವೆರ್ ಮಧು ಬಂಗಾರಪ್ಪ ತೆರಿಪಾದೆರ್.
ವಿಕಾಸಸೌಧಡ್ ಸುದ್ಧಿಗೋಷ್ಠಿಡ್ ವೇಳಾಪಟ್ಟಿ ಪ್ರಕಟ ಮಲ್ತೆರ್.
ಈ ವರ್ಷ 8,96,271 ಕಲ್ಪಾರ್ಥಿಲು SSLC ಪರೀಕ್ಷೆ ಬರೆವೊಂದು ಉಲ್ಲೆರ್.
2741 ಪರೀಕ್ಷೆ ಕೇಂದ್ರಲು ಉಂಡು. ಅಂಚೆನೆ 698624 ಕಲ್ಪಾರ್ಥಿಲು ಸೆಕೆಂಡ್ ಪಿಯುಸಿ ಪರೀಕ್ಷೆ ಬರೆವೊಂದು ಉಲ್ಲೆರ್. ಮೂಜಿ ಸರ್ತಿ ಪರೀಕ್ಷೆ ಬರೆಯೆರೆ ಅವಕಾಶ ಉಂಡು. ಗರಿಷ್ಠ ಅಂಕಲೆನ್ ಪರಿಗಣನೆಗ್ ದೆತೊನಿಯೆರೆ ಆಪುಂಡು ಪಂಡೆರ್.
ಬೊಲ್ತೇರ್: ಪಟ್ರಮೆ ಶ್ರೀ ಮಹಾವಿಷ್ಣುಮೂರ್ತಿ ದೇವಲ್ಯಡ್ ವರ್ಷದ ಜಾತ್ರೆ ಬೊಕ್ಕ ದೈವೊಲೆನ ನೇಮ (ಫೆ.20) ಇನಿರ್ದ್ ಫೆ.23 ಮುಟ್ಟ ನಡಪರೆ ಉಂಡು.
ಈ ಲೇಸ್ ಶ್ರೀ ಕ್ಷೇತ್ರ ಧರ್ಮಸ್ಥಳದ ಧರ್ಮಾಧಿಕಾರಿ ಡಾ| ಡಿ.ವೀರೇಂದ್ರ ಹೆಗ್ಗೆಡೆರೆನ ಆಶೀರ್ವಾದಡ್, ಭಕ್ತೆರೆನ ಸಹಕಾರಡ್, ಬ್ರಹ್ಮಶ್ರೀ ವೇದಮೂರ್ತಿ ನೀಲೇಶ್ವರ ಕೆ.ಯು ಪದ್ಮನಾಭ ತಂತ್ರಿಲೆನ ಮುತಾಲಿಕೆಡ್ ನಡಪರೆ ಉಂಡು.
ಫೆ.20 ಅಂಗಾರೆ (ಇನಿ) ಬೊಲ್ಪುಗು ತೋರಣ ಮೂರ್ತ, ಪುದೆಕಾಣಿಕೆ, ಉಗ್ರಾಣ ಮೂರ್ತ ನಡತ್ಂಡ್. ರಾತ್ರೆ ವಾಸ್ತು ಹೋಮ, ವಾಸ್ತು ಪೂಜೆ, ರಕ್ಷೋಘ್ನ ಹೋಮ ಬಯ್ಯಗ್ ಊರುದ ಜೋಕ್ಲೆರ್ದ್ ಸಾಂಸ್ಕೃತಿಕ ಲೇಸ್ ನಡಪರೆ ಉಂಡು.
ಫೆ.21 ಬುದಾರ ಬೊಲ್ಪುಗು ಗಣಹೋಮ, ತ್ರಿಕಾಲ ಪೂಜೆ, ಕಲಶಾಭಿಷೇಕ, ಪವಮಾನ ಅಭಿಷೇಕ, ನಾಗ ತಂಬಿಲ, ಮಹಾಪೂಜೆ, ಪ್ರಸಾದ ವಿತರಣೆ, ಅನ್ನ ಪ್ರಸಾದ ಸೇವೆ, ಬಯ್ಯಗ್ ದೀಪಾರಾಧನೆ, ಶ್ರೀ ಮಹಾಗಣಪತಿ ಬೊಕ್ಕ ಶ್ರೀ ಮಹಾವಿಷ್ಣುಮೂರ್ತಿ ದೇವೆರೆಗ್ ರಂಗಪೂಜೆ, ಶ್ರೀ ಭೂತ ಬಲಿ ಉಚ್ಚಯ, ವಸಂತ ಕಟ್ಟೆ, ಅಶ್ವತ್ಥ ಕಟ್ಟೆ ಪೂಜೆ, ಅನ್ನ ಪ್ರಸಾದ, ಫಲಾಹಾರ ಪ್ರಸಾದ, ನಲಿಕೆ ಭಜನೆ ಲೇಸ್ ನಡಪರೆ ಉಂಡು.
ಫೆ.22 ಗುರುವಾರ ಬೊಲ್ಪುಗು ಗಣಹೋಮ, ಉಚ್ಚಯ, ದರ್ಶನ ಬಲಿ, ಬಟ್ಟಲ್ ಕಾಣಿಕೆ, ಕಲಶಾಭಿಷೇಕ, ಮಹಾಪೂಜೆ, ಅನ್ನ ಪ್ರಸಾದ ಸೇವೆ, ಬಯ್ಯಗ್ ಊರುದ ಜೋಕ್ಲೆರ್ದ್ ಸಾಂಸ್ಕೃತಿಕ ಲೇಸ್ ರಾತ್ರೆ ಧಾರ್ಮಿಕ ಸಭಾ ಲೇಸ್ ಬೊಕ್ಕ ಕಾಯರ್ತ್ತಡ್ಕ ತುಡರ್ ಕಲಾವಿದೆರ್ದ್ ಅಂಚಾಯಿನೆಟ್ ಇಂಚಾಂಡ್ ತುಳು ನಾಟಕ ನಡಪರೆ ಉಂಡು.
ಫೆ.23 ಸುಕ್ರಾರ ಬಯ್ಯಗ್ ಶ್ರೀದುರ್ಗಾಪೂಜೆ, ಪ್ರಸಾದ ವಿತರಣೆ, ರಾತ್ರೆ ಶ್ರೀ ದೈವೊಲೆನ ಭಂಡಾರ ಪಿದಾಡಿಯೆರೆ, ಅನ್ನ ಪ್ರಸಾದ ಸೇವೆ, ಬ್ರಹ್ಮಚಾಮುಂಡಿ, ಇಷ್ಟದೈವ, ಕೊಡಮಣಿತ್ತಾಯಿ, ರಕ್ತೇಶ್ವರಿ, ಪಾಷಾಣಮೂರ್ತಿ, ವರಾಹಮೂರ್ತಿ, ಗುಳಿಗ ದೈವೊಲೆನ ನೇಮ ನಡಪರೆ ಉಂಡು.
ಈ ಲೇಸ್ ಡ್ ಭಕ್ತೆರ್ ಮಾತೆರ್ಲಾ ಪಾಲ್ ಪಡೆದ್, ಶ್ರೀ ದೇವೆರೆನ ಬೊಕ್ಕ ದೈವೊಲೆನ ಕೃಪೆಗ್ ಪಾತ್ರರಾವೊಡು ಪಂದ್ ದೇವಲ್ಯದ ಗುರ್ಕಾರೆ ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.
ಬ್ರಹ್ಮಾವರ: ಕಜ್ಕೆ ಶ್ರೀ ಅನ್ನಪೂರ್ಣೇಶ್ವರೀ ದೇವಲ್ಯಡ್ ಫೆ.21 ಕ್ಕ್ ನಡಪುನ ಪೊಸ ಶಿಲಾಮಯ ದೇಗುಲ ಸಮರ್ಪಣೆ, ಪ್ರತಿಷ್ಠೆದ ಲೆಕ್ಕೊಡು ಐತಾರ ಪುದೆಕಾಣಿಕೆ ಸಮರ್ಪಣೆ ನಡತ್ಂಡ್.
ಮುದ್ದೂರು ಬಸ್ ನಿಲ್ದಾಣ ಕೈತಲ್ ರ್ದ್ ಅರೆಮಾದನಹಳ್ಳಿ ವಿಶ್ವಬ್ರಾಹ್ಮಣ ಮಹಾಸಂಸ್ಥಾನದ ಶ್ರೀ ಶಿವಸುಜ್ಞಾನ ತೀರ್ಥ ಸ್ವಾಮೀಜಿ ಮೆರವಣಿಗೆಗ್ ಚಾಲನೆ ಕೊರಿಯೆರ್.
ಪೊಂಜೋವುನಕಲೆರ್ದ್ ಪೂರ್ಣಕುಂಭ ಸ್ವಾಗತ, ಬೇತೆ ಬೇತೆ ಭಜನಾ ಕೂಟ, ಚೆಂಡೆ ಬಳಗ ಮೆರವಣಿಗೆಡ್ ಇತ್ತೆರ್.
ಈ ಪೊರ್ತುಡು ದೇವಲ್ಯದ ನಿರ್ಮಾಣ ಸಮಿತಿ, ಮಹಾ ಕುಂಭಾಭಿಷೇಕ ಸಮಿತಿ, ಬೇತೆ ಬೇತೆ ಉಪಸಮಿತಿಲೆನ ಗುರಿಕಾರೆರ್, ಪದುಕೆರ್, ಕೈತಲ್ದ ಪ್ರಮುಖೆರ್, ಭಕ್ತೆರ್ ಪಾಲ್ ಪಡೆದಿತ್ತೆರ್.
ತೊಕ್ಕೊಟ್ಟು ಬಸ್ ಸ್ಟಾಂಡ್ ದ ಇಂದಿರಾ ಕ್ಯಾಂಟೀನ್ ಕೈತಲ್ದ ದ್ವಾರಕಾ ಕಾಂಪ್ಲೆಕ್ಸ್ ಡ್ ಶ್ರೀರಾಮ್ ಪೂಜಾ ಭಂಡಾರ ಅಂಗಡಿ ಫೆ.18 ಐತಾರ ಉದಿಪನ ಆತ್ಂಡ್.
ಮುಲ್ಪ ತಾಮ್ರ, ಹಿತ್ತಾಳೆ, ಸ್ಟೀಲ್, ಅಲ್ಯೂಮಿನಿಯಂ ಪಾತ್ರೆಲು, ಪೂಜೆದ ಸಲಕರಣೆಲು, ದೇವೆರೆನ ಪೋಟೋ, ಊದುಬತ್ತಿ, ಬಲೆದ ಬಟ್ಟಲ್, ಅರಿತ್ತ ಮುಡಿ ತಿಕ್ಕುಂಡು ಪಂದ್ ಹರ್ಷದೀಪ್ ಎನ್.ಟಿ ತೆರಿಪಾದೆರ್.
ಕರ್ನಾಟಕ ಸರಕಾರ ಈ ಸರ್ತಿದ ಬಜೆಟ್ ಡ್ ಬಂಟ ಸಮುದಾಯನ್ ನಿಲರ್ಕ್ಷ್ಯ ಮಲ್ದ್ಂಡ್. ಬಂಟರ ಅಭಿವೃದ್ಧಿ ನಿಗಮ ಸ್ಥಾಪನೆ ಮಲ್ಪುವೆ ಪಂದ್ ಮಲ್ದಿಜಿ. ಬಜೆಟ್ ಅಧಿವೇಶನದ ಚರ್ಚೆಡಾಂಡಲ ನಿಗಮ ಸ್ಥಾಪನೆ ದ ಘೋಷಣೆ ಮಲ್ಪೊಡು ಪಂದ್ ಜಾಗತಿಕ ಬಂಟರ ಸಂಘಗಳ ಒಕ್ಕೂಟ ಆಗ್ರಹ ಮಲ್ದ್ಂಡ್. ಈ ವಿಷಯೊನು ಜಾಗತಿಕ ಬಂಟರ ಸಂಘಗಳ ಒಕ್ಕೂಟದ ಅಧ್ಯಕ್ಷೆರ್ ಐಕಳ ಹರೀಶ್ ಶೆಟ್ಟಿ ಮೇರ್, ಸೋಮಾರ ಬಂಟ್ಸ್ ಹಾಸ್ಟೆಲ್ ದ ಭವನೊಡು ನಡತಿನ ಸುದ್ದಿಗೋಷ್ಠಿಡ್ ತೆರಿಪಾಯೆರ್.
ರಾಜ್ಯದ ಮುಖ್ಯಮಂತ್ರಿಲು ಸಿದ್ದರಾಮಯ್ಯೆರ್ ” ನುಡಿದಂತೆ ನಡೆದವರು” ಪನ್ಪಿನವು ನಿಜ ಅಂದ್ಂದಾಂಡ, ಈರ್ ಒಡಿಪುಡು ನಡತಿನ ಬಂಟರ ಸಮ್ಮೇಳನಡ್ ಭರವಸೆ ಕೊರ್ತಿನ ಪ್ರಕಾರ ಬಂಟರ ನಿಗಮ ಸ್ಥಾಪನೆ ಮಲ್ತ್ ದ್ ಆ ಪಾತೆರೊನು ನಡಪಾದ್ ಕೊರ್ಲೆ ಪಂದ್ ಆರ್ ಹಕ್ಕೊತ್ತಾಯ ಮಲ್ತೆರ್. ಬಂಟರ ಸಂಘದ ಒಕ್ಕೂಟಗ್ ಇದ ಮುಟ್ಟ ಒವ್ವೇ ಸರಕಾರರ್ದ್ ಲ ಸಹಕಾರ ತಿಕಿದಿಜಿ. ಬಂಟ ಸಮುದಾಯ ತೂವರೆ ಬಲಿಷ್ಠ ಸಮಾಜ. ಆಂಡ ಎಂಕಲ್ನೆಟ್ಟ್ ಲ ಶೇ.50ರ್ದ್ ಲ ಜಾಸ್ತಿ ಜನ ಬಡಪತ್ತ್ ದಕುಲು ಉಲ್ಲೆರ್. ಅಕಲ್ನ ಕಷ್ಟ ಎಂಕ್ಲೆಗ್ ಗೊತ್ತುಂಡು ಜಾಗತಿಕ ಬಂಟರ ಸಂಘಗ್ ಒವ್ವೇ ಆದಾಯ ಇಜ್ಜಿ. ಆಂಡ ಸಮಾಜ ಸೇವೆದ ಒರುಟ್ಟು ಇತ್ತಿನಕ್ಲೆಡ ಕೇಂಡ್ ದ್ ಉಪ್ಪಂದಿನಕ್ಲೆಗ್ ಜಾತಿ ಬೇಧ ತೂವಂದೆ ಪಟ್ಟುವ.ಅಂಚಾದ್ ಬಂಟ ಸಮುದಾಯಗ್ ಲ ಅಭಿವೃದ್ಧಿ ನಿಗಮ, ಮೀಸಲಾತಿ ಕೊರೊಡು ಪಂದ್ ಪಂಡೆರ್. ಎಂಕ್ಲೆಗ್ ಬಿಜೆಪಿ, ಕಾಂಗ್ರೆಸ್ ಮಾತಲ ಒಂಜೆಲೆಕ. ಬೇಧ ಇಜ್ಜಿ. ಬಂಟ ಜನಪ್ರತಿನಿಧಿನಕುಲು ಬಜೀ ರಾಜಕೀಯ ಹೇಳಿಕೆ ಕೊರ್ಪಿನ ಬುಡ್ದು, ಅಕ್ಲೆಗ್ಲ ಜವಾಬ್ದಾರಿ ಉಂಡು ಪಂದ್ ತೆರಿದ್ ನಮ್ಮ ಬೇಡಿಕೆ ಈಡೇರಿಕೆ ಮಲ್ಪರೆ ಸ್ಪಂದನೆ ಕೊರೊಡು.
ರಾಜ್ಯಡ್ ಬಿಜೆಪಿ ಸರಕಾರ ಇಪ್ಪುನಗ ನಳಿನ್ ಕುಮಾರ್ ಕಟೀಲ್ ರೆನ್ ಮೂಜಿ-ನಾಲ್ ಸರ್ತಿ ಭೇಟಿ ಮಲ್ತ್ ದ್ ಬಂಟರ ನಿಗಮಗಾದ್ ಮನವಿ ಕೊರ್ತ. ಕಾಂಗ್ರೆಸ್ ಸರಕಾರ ಬತ್ತಿನೆರ್ದ್ ಬೊಕ್ಕ ರಮಾನಾಥ ರೈ, ಮಂಜುನಾಥ ಭಂಡಾರಿ, ಅಶೋಕ್ ರೈ, ಮಿಥುನ್ ರೈ ಮೊಕ್ಲೆನ್ ಭೇಟಿ ಮಲ್ತ್ ದ್ ಕುಡ ಬಿನ್ನಾಪು ಮಲ್ತ್ ದ. ಬಂಟರ ಅಭಿವೃದ್ಧಿ ನಿಗಮ ಸ್ಥಾಪನೆ ಬಗೆಟ್ಟ್ ಕಾಂಗ್ರೆಸ್ ಪಕ್ಷ ಚುನಾವಣಾ ಪ್ರಣಾಳಿಕೆಡ್ ಬೊಕ್ಕ ಬಂಟರ ಸಮ್ಮೇಳನಡ್ ಸಿಎಂ ಪಂತೆರ್ಡಲ ಬಜೆಟ್ಡ್ ಅಯಿತ್ತ ಪ್ರಸ್ತಾವನೆ ಮಲ್ಪಂದೆ ನಿರ್ಲಕ್ಷ್ಯ ಮಲ್ದೆರ್ ಪಂದ್ ಹರೀಶ್ ಶೆಟ್ರ್ ಮಾಧ್ಯಮದಕ್ಲೆಡ ಬೇಜಾರ್ ಪಟ್ಟೊಂಡೆರ್. ಬಂಟರ ನಿಗಮ ಸ್ಥಾಪನೆಗ್ ಸರಕಾರಗ್ ಡೆಡ್ಲೈನ್ ಕೊರ್ಪುಜ. ಪೊಸ ಸರಕಾರ ಬತ್ತ್ ದ್ ವರ್ಷ ಮಾತ್ರ ಆಂಡ್. ಲೋಕಸಭೆ ಚುನಾವಣೆರ್ದ್ ದುಂಬು ಕುಡೊರ ಸಿದ್ದರಾಮಯ್ಯೆರೆನ್ ಭೇಟಿ ಮಲ್ತ್ ಮನವಿ ಕೊರ್ದು ಬೊಕ್ಕ ತೀರ್ಮಾನ ದೆತೊನುವ ಪಂದ್ ಪಂಡೆರ್.
ಸುದ್ದಿಗೋಷ್ಠಿಡ್ ಉಪಾಧ್ಯಕ್ಷೆರ್ ಕರ್ನಿರೆ ವಿಶ್ವನಾಥ ಶೆಟ್ಟಿ, ಪ್ರಧಾನ ಕಾರ್ಯದರ್ಶಿ ಜಯಕರ ಶೆಟ್ಟಿ ಇಂದ್ರಾಳಿ, ಜತೆಕಾರ್ಯದರ್ಶಿ ಚಂದ್ರಹಾಸ ಡಿ.ಶೆಟ್ಟಿ, ಮಾಧ್ಯಮ ಸಂಚಾಲಕೆರ್ ಬಾಳ ಜಗನ್ನಾಥ ಶೆಟ್ಟಿ ಇತ್ತೆರ್.
ಸುಬ್ರಹ್ಮಣ್ಯ: ಇತ್ತೆದ ಕಾಲಡ್ ಕಂಪ್ಯೂಟರ್ ದ ಜ್ಞಾನ ಅಗತ್ಯ. ಕಂಪ್ಯೂಟರ್ ಲು ಶಾಲೆ ಕಾಲೇಜ್ ಗ್ ಅತ್ಯವಶ್ಯಕ, ಅವ್ವೇ ರೀತಿ ವಿದ್ಯಾಸಂಸ್ಥೆಲೆಡ್ ವ್ಯವಸ್ಥಿತವಾಯಿನ ಪ್ರಯೋಗ ಶಾಲೆ ಇಪ್ಪುನವು ಅತ್ಯವಶ್ಯಕ, ಉತ್ಕೃಷ್ಠ ಮಟ್ಟದ ಸುಸಜ್ಜಿತ ಪ್ರಯೋಗ ಶಾಲೆಲು ಕಂಪ್ಯೂಟರ್ ದ ಜ್ಞಾನಾರ್ಜನೆಗ್ ಅಡಿಪಾಯ ಆತ್ಂಡ್. ಎಸ್ಎಸ್ಪಿಯು ಕಾಲೇಜ್ ಡ್ ಜಿಲ್ಲೆಡೇ ಪುದರ್ ಪಡೆಯಿನ ಶ್ರೇಷ್ಠ ಮಟ್ಟದ ಕಂಪ್ಯೂಟರ್ ಬೊಕ್ಕ ವಿಜ್ಞಾನ ಪ್ರಯೋಗ ಶಾಲೆ ಉಂಡು ಪನ್ಪುನವು ಗ್ರಾಮೀಣ ಭಾಗದ ಪೆರ್ಮೆ ಪಂದ್ ಕುಕ್ಕೆ ಶ್ರೀ ಸುಬ್ರಹ್ಮಣ್ಯ ದೇವಲ್ಯದ ಕಾರ್ಯನಿರ್ವಹಣಾಧಿಕಾರಿ, ಎಸ್ಎಸ್ಪಿಯು ಕಾಲೇಜ್ ದ ಕಾರ್ಯದರ್ಶಿ ಡಾ.ನಿಂಗಯ್ಯ ಪಂಡೆರ್.
ಮೇರ್ ಕುಕ್ಕೆ ಶ್ರೀ ಸುಬ್ರಹ್ಮಣ್ಯ ದೇವಲ್ಯದ ಆಡಳಿತ ಎಸ್ಎಸ್ಪಿಯು ಕಾಲೇಜ್ ಗ್ ಡಾ.ಚಂದನ್ ಬೆಂಗ್ಲೂರು ಮೇರ್ ಕೊರ್ನ 10 ಕಂಪ್ಯೂಟರ್ ನ್ ದೆತೊಂದು ಪಾತೆರಿಯೆರ್.
ಶ್ರೀ ದೇವಲ್ಯರ್ದ್ ತಿಕಿನ ಕಂಪ್ಯೂಟರ್ ದೊಟ್ಟಿಗೆ ಇತ್ತೆ ದಾನಿಲು ಕೊರ್ನ ಪೊಸ ಕಂಪ್ಯೂಟರ್ ಲು ಪ್ರಯೋಗ ಶಾಲೆಡ್ ಉಂಡು. ನೆತ್ತ ಉಪಯೋಗನ್ ಕಲ್ಪಾರ್ಥಿಲು ಪಡೆವೊನೊಡು. ಕಾಲೇಜ್ ಡ್ ಇತ್ತೆ 1000 ರ್ದ್ ಎಚ್ಚ ಕಲ್ಪಾರ್ಥಿಲು ಕಲ್ತೊಂದು ಉಲ್ಲೆರ್. ಗಣಕ ವಿಜ್ಞಾನ ವಿಭಾಗಲ ಉಂಡು. ಅತ್ತಂದೆ ಕಲೆ ಬೊಕ್ಕ ವಾಣಿಜ್ಯ ವಿಭಾಗಗ್ ಕಂಪ್ಯೂಟರ್ ತರಬೇತಿ ನಡತೊಂದು ಉಂಡು. ಈ ಪೊರ್ತುಡು ಪೊಸ ಕಂಪ್ಯೂಟರ್ ಲು ಕಲ್ಪಾರ್ಥಿಲೆಗ್ ಎಚ್ಚದ ಅನುಕೂಲತೆ ಕೊರ್ಪುಂಡು ಪಂದ್ ಪಂಡೆರ್.
ಈ ಪೊರ್ತುಡು ದೇವಲ್ಯದ ವ್ಯವಸ್ಥಾಪನಾ ಸಮಿತಿ ಸದಸ್ಯೆರ್, ದಾನಿ ಡಾ.ಚಂದನ್ ಬೆಂಗ್ಲೂರು, ಆರೆನ ದೋಸ್ತಿ ಶ್ರೀವತ್ಸ ಬೆಂಗ್ಲೂರು, ಕಾಲೇಜ್ ದ ಪ್ರಾಚಾರ್ಯೆರ್ ಸೋಮಶೇಖರ ನಾಯಕ್, ಕೆಎಸ್ಎಸ್ ಕಾಲೇಜ್ ದ ಪ್ರಾಂಶುಪಾಲೆರ್ ಡಾ. ದಿನೇಶ್ ಪಿ.ಟಿ, ಗ್ರಂಥಪಾಲಕೆರ್ ಜಯಪ್ರಕಾಶ್ ಆರ್.ವಿ, ಕುಕ್ಕೆ ದೇವಲ್ಯದ ಶಿವ ಸುಬ್ರಹ್ಮಣ್ಯ ಭಟ್, ನಂದೀಶ್ ಕಟ್ರಮನೆ, ಪ್ರವೀಣ್ ಸುಬ್ರಹ್ಮಣ್ಯ, ಪ್ರಶಾಂತ್, ಎಸ್ಎಸ್ಪಿಯು ಕಾಲೇಜ್ ದ ಉಪನ್ಯಾಸಕೆರ್, ಶಿಕ್ಷಕೆರ್, ಸಿಬ್ಬಂದಿ ವರ್ಗದಕುಲು ಪಾಲ್ ಪಡೆದಿತ್ತೆರ್.
ಡಾ.ಚಂದನ್ ಬೆಂಗ್ಲೂರು ಮೇರ್ ಕುಕ್ಕೆ ದೇವಲ್ಯದ ಆಡಳಿತದ ಕೆ.ಎಸ್.ಎಸ್ ಕಾಲೇಜ್ ಗ್ 10 ಕಂಪ್ಯೂಟರ್ ಕೊರಿಯೆರ್. ಈ ಮುಕೇನ ಒಟ್ಟು 20 ಕಂಪ್ಯೂಟರ್ ನ್ ಶ್ರೀ ದೇವಲ್ಯದ ವಿದ್ಯಾಸಂಸ್ಥೆಗ್ ಕೊರ್ಲೆಕ್ಕ ಆಂಡ್.
ಶ್ರೀ ಸಂತ ಸೇವಾಲಾಲ್ 285ನೇ ಜಯಂತಿದ ಲೆಕ್ಕೊಡು ಬಂಜಾರ ಬಾಯ್ಸ್ ಯುವಕ ಸಂಘ ತೋಗುಣಶಿದ ಮುತಾಲಿಕೆಡ್ ಸುರುತ್ತ ಸರ್ತಿ 55 ಕೆಜಿ ವಿಭಾಗದ ಸ್ಯಾಟ್ ಲೈಟ್ ಕಬಡ್ಡಿ ಪಂತೊ ಫೆ.25 ಕ್ಕ್ ಬಾಗಲಕೋಟೆ ಜಿಲ್ಲೆದ ಗುಳೇದಗುಡ್ಡ ತಾಲೂಕ್ ದ ತೋಗುಣಶಿ ಎಲ್ ಟಿ ಗ್ರಾಮಡ್ ನಡಪರೆ ಉಂಡು.
ಈ ಪಂತೊಡು ಗೆಂದಿನಕ್ಲೆಗ್ ಸುರುತ್ತ ಇನಾಮು 7001 ಬೊಕ್ಕ ಟ್ರೋಫಿ, ರಡ್ಡನೇ ಇನಾಮು 5001 ಬೊಕ್ಕ ಟ್ರೋಫಿ, ಮೂಜಿನೇ ಇನಾಮು 3001 ಬೊಕ್ಕ ಟ್ರೋಫಿ, ನಾಲ್ ನೇ ಇನಾಮು 2001 ಬೊಕ್ಕ ಟ್ರೋಫಿ ತಿಕ್ಕುಂಡು.
ಈ ಪಂತೊದ ನಿಯಮಲು:
•ಒಂಜಿ ಕೂಟಡ್ ಗೊಬ್ಬಿನ ಗೊಬ್ಬುಗಾರೆರ್ ಕುಡೊಂಜಿ ಕೂಟಡ್ ಗೊಬ್ಬೆರೆ ಇಜ್ಜಿ.
•ನಿರ್ಣಾಯೆಕೆರೆನ ನಿರ್ಣಾಯನೇ ಅಕೇರಿ.
•ಗೊಬ್ಬುಗಾರೆರೆಗ್ ದಾದಂಡಲ ಕಮಿಟಿದ ಜಬದಾರಿದ ಅತ್ತ್.
•ಒಂಜೇ ಊರುದ ಗೊಬ್ಬುಗಾರೆರ್ ಇಪ್ಪೊಡು.
•ಆಧಾರ ಕಾರ್ಡ್ ಕಡ್ಡಾಯವಾದ್ ಕನವೊಡು.
•ತೂಕಗ್ 2 ಸರ್ತಿ ಅವಕಾಶ ಉಂಡು.
•ನನ ಒರಿನ ನಿಯಮನ್ ಮೈದಾನಡೇ ತೆರಿಪಾವೆರ್.
ಈ ಪಂತೊದ ಎಚ್ಚದ ಪೊಲಬುಗಾದ್ ತರುಣ 9845403158, ಲಕ್ಷ್ಮಣ 6363671796, ಮಂಜುನಾಥ 7892114951 ಮೊಕ್ಲೆನ್ ಸಂಪರ್ಕ ಮಲ್ಪೊಲಿ.
