ರಾಜ್ಯಮಟ್ಟದ ಕಾಂಗ್ರೆಸ್ ಸಮಾವೇಶಗ್ ಮುಲ್ಕಿ ಬೆದ್ರ ಕ್ಷೇತ್ರರ್ದ್ 55 ಬಸ್ : ಮಿಥುನ್ ರೈ
ಮುಲ್ಕಿ : ಕುಡ್ಲ ಕೈತಲ್ದ ಅಡ್ಯಾರ್ ಗಾರ್ಡನ್ ಡ್ ಫೆ.17 ಸನಿಯಾರ ನಡಪುನ ರಾಜ್ಯಮಟ್ಟದ ಕಾಂಗ್ರೆಸ್ ಸಮಾವೇಶಗ್ ರಾಜ್ಯಾದ್ಯಂತ ಅಂದಾಜಿ 40 ಸಾರ ಜನ ಸೇರ್ರೆ ಉಲ್ಲೆರ್. ಮುಲ್ಕಿ- ಬೆದ್ರ ಕ್ಷೇತ್ರರ್ದ್ 55 ಬಸ್ ಟ್ಟ್ ಕಾರ್ಯಕರ್ತೆರ್ ಪಾಲ್ ಪಡೆಯರೆ ಉಲ್ಲೆರ್ ಪಂದ್ ಕೆಪಿಸಿಸಿ ಪ್ರಧಾನ ಕಾರ್ಯದರ್ಶಿ ಮಿಥುನ್ ರೈ ತೆರಿಪಾಯೆರ್.
ಆರ್ ಮುಲ್ಕಿ ಬ್ಲಾಕ್ ಕಾಂಗ್ರೆಸ್ ಕಚೇರಿಡ್ ಗುರುವಾರ ನಡತಿನ ಪತ್ರಿಕಾಗೋಷ್ಠಿಡ್ ಈ ವಿಷಯ ತೆರಿಪಾಯೆರ್.
2024ನೇ ಲೋಕಸಭೆ ಚುನಾವಣೆದ ಹಿನ್ನೆಲೆಡ್ ನಡಪುನ ಸುರೂತ್ತ ರಾಜ್ಯಮಟ್ಟದ ಈ ಸಭೆಟ್ಟ್ ಮುಖ್ಯಮಂತ್ರಿ ಸಿದ್ದರಾಮಯ್ಯ, ಉಪಮುಖ್ಯಮಂತ್ರಿ ಡಿಕೆ ಶಿವಕುಮಾರ್ ಸೇರ್ದ್ ಪಕ್ಷದ ನಾಯಕೆರ್, 35 ಸಚಿವೆರ್,135 ಶಾಸಕೆರ್, ಕೆಪಿಸಿಸಿ ಪ್ರತಿನಿಧಿನಕುಲು, ಪ್ರಜಾಪ್ರತಿನಿಧಿನಕುಲು ಬೊಕ್ಕ ಕಾರ್ಯಕರ್ತೆರ್ ಸಮಾವೇಶಡ್ ಪಾಲ್ ಪಡೆಯರೆ ಉಲ್ಲೆರ್. ಅಯಿಕ್ಕಾದ್ ಮಾತ ರೀತಿದ ಅಟ್ಟಣೆ ಆತ್ಂಡ್ ಪಂದ್ ಆರ್ ಪಂಡೆರ್.
ಕಾಂಗ್ರೆಸ್ ಪಕ್ಷ ವಿಧಾನಸಭೆ ವೋಟುದ ಪೊರ್ತುಡು ಘೋಷಣೆ ಮಲ್ದಿನ 5 ಗ್ಯಾರಂಟಿ ಯೋಜನೆಲೆನ್ ನೆರವೇರಿಸಾದ್ಂಡ್. ಈ ಯೋಜನೆರ್ದ್ ಮಸ್ತ್ ಜನಕ್ಲೆಗ್ ಪ್ರಯೋಜನ ಆತ್ಂಡ್.ಪೊಂಜೊವುಲೆನ ಫ್ರೀ ಬಸ್ ತ್ತ “ಶಕ್ತಿ ಯೋಜನೆ” ರ್ದ್ ದೇವಸ್ಥಾನಲೆಗ್ ಆದಾಯ ಎಚ್ಚ ಆತ್ಂಡ್. ಬಿಜೆಪಿದಕುಲು ಬಜೀ ಬಾಯಿ ಪಾತೆರೊಡು ಧರ್ಮ ಪ್ರಚಾರ ಮಲ್ಪುವೆರ್. ಆಂಡ ಕಾಂಗ್ರೆಸ್ ಸರಕಾರ ಬೇಲೆ ಮಲ್ತ್ ದ್ ಧಾರ್ಮಿಕ ಪ್ರಚಾರ ಮಲ್ತೊಂದುಂಡು. ಸರಕಾರದ ಈ ಮಾತ ಯಶಸ್ವಿದ ನಿಲೆಟ್ಟ್ ಕುಷಿನ್ ಪಟ್ಟೊನ್ರೆ ಸಮಾವೇಶ ನಡತೊಂದುಂಡು ಪಂಡೆರ್.
ಲೋಕಸಭೆತ್ತ ವೋಟುಗು ಕುಡ್ಲದ ಅಭ್ಯರ್ಥಿ ಸ್ಥಾನೊಗು 6-7 ಅರ್ಜಿ ಪೋತುಂಡು. ಆಂಡ ಅಭ್ಯರ್ಥಿ ಏರ್ ಪಂದ್ ನಿರ್ಧಾರ ಆತಿಜಿ ಪಂದ್ ಮಿಥುನ್ ರೈ ಪಂಡೆರ್.
ಕುಡ್ಲದ ಒಂಜಿ ವಿದ್ಯಾಸಂಸ್ಥೆಡ್ ಧರ್ಮ ನಿಂದನೆ ಮಲ್ದಿನಿಂದಾಂಡ ಅವು ತಪ್ಪು. ಆ ಬಗ್ಗೆ ತನಿಖೆ ಆವೊಡು. ಆಂಡ ಆ ವಿಷಯೊಡು ಬಿಜೆಪಿ ಶಾಸಕೆರ್ ರಾಜಕೀಯ ಮಲ್ಪುನವು ಸರಿಯತ್ತ್ ಪಂಡೆರ್. ಕಾರ್ಲದ ಪರಶುರಾಮ ದೇವೆರ್ನ ಮೂರ್ತಿನ್ ಕಂಚಿದ ಪಂದ್ ಫೈಬರ್ ದ ಮೂರ್ತಿ ಮಲ್ತ್ದ್ ಅವಮಾನ ಮಲ್ದಿನೆನ್ ಬಿಜೆಪಿದಕುಲು ದಾಯೆ ವಿರೋಧ ಮಲ್ದಿಜೆರ್ ಪಂದ್ ಆರ್ ಪ್ರಶ್ನೆ ಮಲ್ತೆರ್.
ಪತ್ರಿಕಾಗೋಷ್ಠಿಡ್ ಕೆಪಿಸಿಸಿ ವಕ್ತಾರೆರ್ ಎಚ್. ವಸಂತ ಬೆರ್ನಾಡ್, ಮುಲ್ಕಿ ಬ್ಲಾಕ್ ಕಾಂಗ್ರೆಸ್ ಅಧ್ಯಕ್ಷೆರ್ ಮೋಹನ್ ಕೋಟ್ಯಾನ್, ಪಕ್ಷದ ವಕ್ತಾರೆ ಬಾಲಚಂದ್ರ ಕಾಮತ್, ರಾಜ್ಯ ಸೇವಾ ದಳದ ಧರ್ಮಾನಂದ ಶೆಟ್ಟಿಗಾರ್, ಮುಲ್ಕಿ ನಗರ ಪಂಚಾಯತ್ ಸದಸ್ಯೆರ್ ಯೋಗೀಶ್ ಕೋಟ್ಯಾನ್ , ಹಳೆಯಂಗಡಿ ಪಂಚಾಯತ್ ಸದಸ್ಯೆರ್ ಅಬ್ದುಲ್ ಖಾದರ್ ಇತ್ತೆರ್.
