February 19, 2024

ಫೆ.21: ತಿಬಾರ ಕೊಡಮಣಿತ್ತಾಯ ಕ್ಷೇತ್ರಡ್ ಪೊಸ ಕೊಡಿಮರ ಸ್ಥಾಪನೆ

ಸುರತ್ಕಲ್: ತಿಬಾರ್ ದ ಶ್ರೀ ಕೊಡಮಣಿತ್ತಾಯ ಕ್ಷೇತ್ರಡ್ ಪೊಸ ಕೊಡಿಮರ ಸ್ಥಾಪನೆದ ಲೇಸ್ ಫೆ.21 ಬುದಾರ ಮಧ್ಯಾಹ್ನ 12.21 ಕ್ಕ್ ನಡಪರೆ ಉಂಡು.

ಶಿಬರೂರು ವೇದವ್ಯಾಸ ತಂತ್ರಿಲೆನ ಪೌರೋಹಿತ್ಯಡ್ ಕಟೀಲ್ ದ ಅಸ್ರಣ್ಣ ಬಂಧುಲೆನ ಸಮಕ್ಷಮಡ್ ಪೊಸ ಕೊಡಿಮರ ಸ್ಥಾಪನೆ ಆಪುಂಡು.

ಶ್ರೀ ಕ್ಷೇತ್ರ ಕಟೀಲ್ ದ ಅನುವಂಶಿಕ ಪ್ರಧಾನ ಅರ್ಚಕೆರ್ ಲಕ್ಷ್ಮೀ ನಾರಾಯಣ ಅಸ್ರಣ್ಣೆರ್ ಆಶೀರ್ವಚನ ಕೊರಿಯೆರೆ ಉಲ್ಲೆರ್.

ಈ ಲೇಸ್ ಡ್ ಸಂಸದೆರ್ ನಳಿನ್ ಕುಮಾರ್ ಕಟೀಲ್, ಶಾಸಕೆರ್ ಉಮಾನಾಥ ಕೋಟ್ಯಾನ್, ಹರಿಕೃಷ್ಣ ಪುನರೂರು, ಅಭಯಚಂದ್ರ ಜೈನ್, ಐಕಳ ಹರೀಶ್ ಶೆಟ್ಟಿ, ಕನ್ಯಾನ ಸದಾಶಿವ ಶೆಟ್ಟಿ, ಶಶಿಧರ ಶೆಟ್ಟಿ ಬರೋಡಾ, ತೋನ್ಸೆ ಆನಂದ ಶೆಟ್ಟಿ, ಕೃಷ್ಣ ಜೆ ಪಾಲೇಮಾರ್, ಮಿಥುನ್ ರೈ, ಬೋಳ ಸುಬ್ಬಯ್ಯ ಶೆಟ್ಟಿ, ದಿವಾಕರ ಶೆಟ್ಟಿ ಕೊಂಜಾಲಗುತ್ತು, ರವಿ ಶೆಟ್ಟಿ ಸಾಯಿರಾಧ, ರಾಮಚಂದ್ರ ಶೆಟ್ಟಿ ಶಿಬರೂರು ಗುತ್ತು, ಸುಧಾಕರ ಎಸ್ ಪೂಂಜ, ಮನೋಜ್ ಸರಿಪಳ್ಳ, ಯದು ನಾರಾಯಣ ಶೆಟ್ಟಿ ಕೆದಿಂಜೆ ಪರಾರಿ, ಬಿವಂಡಿ ಸಂತೋಷ್ ಶೆಟ್ಟಿ, ಸಿಎ ಉದಯ ಕುಮಾರ್ ಶೆಟ್ಟಿ, ಕಿಶೋರ್ ಎಮ್ ಶೆಟ್ಟಿ ಶಿಬರೂರುಗುತ್ತು, ಅಂಕಿತ್ ಬನ್ಸಾಲ್, ಬಾಲಕೃಷ್ಣ ಕೊಟ್ಟಾರಿ, ಲೋಕೇಶ್ ಬೊಳ್ಳಾಜೆ, ಗೀತಾ ಎಸ್ ಶೆಟ್ಟಿ ಪಾಲ್ ಪಡೆಯೆರೆ ಉಲ್ಲೆರ್.

ಶಿಬರೂರುಗುತ್ತು ಉಮೇಶ್ ಎನ್ ಶೆಟ್ಟಿ, ಎಸ್ ವಾಸುದೇವ ಶಿಬರಾಯೆರ್, ಹರ್ಷವರ್ಧನ್ ಎಸ್ ಜೆ, ಪುರಂದರ ಎಂ ಶೆಟ್ಟಿ, ಪ್ರಭಾಕರ ಶೆಟ್ಟಿ ಕೊಂಜಾಲುಗುತ್ತು ಈ ಲೇಸ್ ಗ್ ಬರಿಯೆರೆ ಉಲ್ಲೆರ್.

ಫೆ.21: ನಡಿಕುದ್ರು ಧರ್ಮದೈವ ಜಾರಂದಾಯ ದೈವೊಲ್ಯಡ್ ನೇಮ

ಮುಲ್ಕಿ: ಪೆಜಮಾಡಿ ಕೋಡಿದ ನಡಿಕುದ್ರು ಧರ್ಮದೈವ ಜಾರಂದಾಯ ದೈವೊಲ್ಯಡ್ ವರ್ಷಾಧಿದ ನೇಮ ಫೆ‌.21 ಬುದಾರ ನಡಪರೆ ಉಂಡು.

ಆನಿ ಬೊಲ್ಪುಗು ನವಕ ಕಲಶಾಭಿಷೇಕ, ನಾಗದೇವೆರೆಗ್ ಪೇರ್ ದ ಅಭಿಷೇಕ, ವಿದ್ಯಾರ್ಥಿ ವೇತನ ಪಟ್ಟುನ ಲೇಸ್, ಮಧ್ಯಾಹ್ನ ಅನ್ನ ಪ್ರಸಾದ ಸೇವೆ, ರಾತ್ರೆ ಭಂಡಾರ ಜಪ್ಪೆರೆ, ಅನ್ನ ಪ್ರಸಾದ ಸೇವೆ, ಮೈಸಂದಾಯ ನೇಮ, ಧರ್ಮದೈವ ಜಾರಂದಾಯ, ಬಂಟ ಪರಿವಾರ ದೈವೊಲೆನ ಗಡಿನಾಡು ನೇಮ ನಡಪರೆ ಉಂಡು.

ಫೆ.17 ಸನಿಯಾರ ಬೊಲ್ಪುಗು ಪಂಚಕಜ್ಜಾಯ ಸೇವೆ, ಶ್ರೀ ಜಾರಂದಾಯ ಸೇವಾ ಯುವಕ ವೃಂದದ 46ನೇ ಭಜನಾ ಮಂಗಳ ನಡತ್ಂಡ್.

ಈ ಲೇಸ್ ಡ್ ಭಕ್ತೆರ್ ಮಾತೆರ್ಲಾ ಪಾಲ್ ಪಡೆದ್, ಗಂಧ ಪ್ರಸಾದ ದೆತೊಂದು, ಶ್ರೀ ಧರ್ಮದೈವೊದ ಕೃಪೆಗ್ ಪಾತ್ರರಾವೊಡು ಪಂದ್ ಅರ್ಚಕೆರ್ ಗಂಗೆ ಬೈದೆತಿ ನಟ್ಟಿ ಸಾನದಮನೆ, ನಡಿಕುದ್ರು ಗ್ರಾಮದ ಗುರಿಕಾರೆರ್, ಪತ್ತ್ ಸಮಸ್ತೆರ್, ಶ್ರೀ ಜಾರಂದಾಯ ಸೇವಾ ಸಮಿತಿ, ಶ್ರೀ ಜಾರಂದಾಯ ಸೇವಾ ಯುವಕ ವೃಂದ, ಮಹಿಳಾ ವೃಂದ ಲೆಪ್ಪೋಲೆಡ್ ತೆರಿಪಾದೆರ್.

ಕಾಸ್ರೋಡುಡ್ ಶಾಲೆಡ್ ತುಲು ಲಿಪಿ ಪರೀಕ್ಷೆ

ಕಾಸ್ರೋಡುಡ್ ಸುರುತ್ತ ಸರ್ತಿ ಶಾಲೆಡ್ ತುಲು ಲಿಪಿ ಕಲ್ಪಾದ್ ಬೊಕ್ಕ ತುಲು ಲಿಪಿ ಪರೀಕ್ಷೆನ್ ಮಲ್ತಿನ ಪುಗರ್ತೆ ಪೆರಡಾಲ ನೀರ್ಚಾಲು ಮಹಾಜನ ಸಂಸ್ಕೃತ ಕಾಲೇಜ್ ಗ್ ಸಂದ್ ದ್ಂಡ್.

ಜೈ ತುಲುನಾಡ್ (ರಿ.) ಸಂಘಟನೆ ಕಾಸ್ರೋಡು ವಲಯ ಸಮಿತಿ ಬೊಕ್ಕ ಕರ್ನಾಟಕ ತುಲು ಸಾಹಿತ್ಯ ಅಕಾಡೆಮಿದ ಒಟ್ಟುಸೇರಿಗೆಡ್ ಮಹಾಜನ ಸಂಸ್ಕೃತ ಕಾಲೇಜ್ ನೀರ್ಚಾಲು ಮುತಾಲಿಕೆಡ್ ಶಾಲೆದ ಜೋಕ್ಲೆಗ್ ತುಲು ಲಿಪಿ ಕಲಿಕಾ ಕಾರ್ಯಾಗಾರನ್ ಇಂಚಿಪ್ಪ ಸುರು ಮಲ್ದ್ಂಡ್.

ಸುಮಾರ್ ನಾಲ್ ತಿಂಗೊಲ್ ಕಲ್ತಿನ ಬೊಕ್ಕ ಕರಿನ ಸನಿಯಾರ ಫೆ.17 ಕ್ಕ್ ಜೋಕುಲು ಮಾಸ್ತ್ ಆಸಕ್ತಿರ್ದ್ ತುಲು ಲಿಪಿ ಪರೀಕ್ಷೆ ಬರೆಯೆರ್.

ಈ ಪೊರ್ತುಡು ಜೈ ತುಲುನಾಡ್ ಕಾಸ್ರೋಡು ವಲಯದ ಲಿಪಿ ಕಲ್ಪಾದಿ ವಿನೋದ ಪ್ರಸಾದ್ ರೈ ಕಾರಿಂಜ, ಕೇಂದ್ರ ಸಮಿತಿದ ತುಲು ಲಿಪಿ ಕಲಿಕಾ ಮೇಲ್ಪಿಚಾರಕೆರ್ ಪ್ರಶಾಂತ್ ಪೂಜಾರಿ ನಂದಳಿಕೆ, ಶಾಲೆದ ಮುಖ್ಯೋಪಾಧ್ಯಾಯೆರ್ ಶಿವಪ್ರಕಾಶ್ ಎಂ.ಕೆ. ಬೊಕ್ಕ ಶಿಕ್ಷಕಿ ಶೈಲಜಾ ಟೀಚರ್ ಪಾಲ್ ಪಡೆದಿತ್ತೆರ್.

ವೇಣೂರು ಮಹಾಮಸ್ತಕಾಭಿಷೇಕದ ನಿಲೆಟ್ಟ್ ಚಾರುಕೀರ್ತಿ ಭಟ್ಟಾರಕ ಸ್ವಾಮೀಜಿ ಸಮಾಲೋಚನೆ

ಉಜಿರೆ: ವೇಣೂರುಡು ಭಗವಾನ್ ಬಾಹುಬಲಿ ಸ್ವಾಮಿನ ಮೂರ್ತಿಗ್ ಫೆ.22 ರ್ದ್ ಮಾ.1 ಮುಟ್ಟ ಮಹಾಮಸ್ತಕಾಭಿಷೇಕ ನಡಪರೆ ಉಂಡು. ಈ ನಿಲೆಟ್ಟ್ ಬೆದ್ರ ಜೈನ ಮಠತ್ತ ಪೂಜ್ಯ ಚಾರುಕೀರ್ತಿ ಭಟ್ಟಾರಕ ಸ್ವಾಮೀಜಿ ಮೇರ್ ಫೆ‌.17 ಕ್ಕ್ ವೇಣೂರುದ ಯಾತ್ರಿನಿವಾಸಡ್ ಬೇತೆ ಬೇತೆ ಸಮಿತಿಲೆನೊಟ್ಟಿಗೆ ಸಮಾಲೋಚನೆ ನಡಪಾದ್ ಸಕಾಲಿಕ ಮಾರ್ಗದರ್ಶನ ಕೊರಿಯೆರ್. ಮಾತೆರೆನ ಸಹಕಾರಡ್ ಮಹಾಮಸ್ತಕಾಭಿಷೇಕ ಯಶಸ್ವಿಯಾದ್ ಧರ್ಮ ಬೆಳಗಡ್ ಪಂದ್ ಎಡ್ಡೆಪ್ಪು ಬಯಕಿಯೆರ್. ಬೊಕ್ಕ ಅಭಿಷೇಕ ಸಮಿತಿ, ಪೂಜಾ ಸಮಿತಿ, ಆಹಾರ ಸಮಿತಿ, ಮಹಿಳಾ ಸಮಿತಿ ಇಂಚ ಬೇತೆ ಬೇತೆ ಸಮಿತಿಲೆನೊಟ್ಟಿಗೆ ಸಮಾಲೋಚನೆ ನಡಪಾದ್ ಪೂಜ್ಯ ಸ್ವಾಮೀಜಿಲು ಸರಿಯಾಯಿನ ಮಾರ್ಗದರ್ಶನ ಕೊರಿಯೆರ್.

ಮಸ್ತಕಾಭಿಷೇಕಗ್ ಬೋಡಾಯಿನ ಪೂಜ್ಯ ದ್ರವ್ಯಲೆನ್ ಕೊಡುಗೆಯಾದ್ ಕೊರ್ನ ತುಮಕೂರುದ ಉದ್ಯಮಿ ರಾಜೇಂದ್ರ ಕುಮಾರ್ ಮೆರೆನ್ ಸ್ವಾಮೀಜಿ ಮೇರ್ ಮಾನಾದಿಗೆ ಕೊರ್ದು ಅಶೀರ್ವಾದ ಮಲ್ತೆರ್.

ಮಸ್ತಕಾಭಿಷೇಕ ಸಮಿತಿದ ಕಾರ್ಯಾಧ್ಯಕ್ಷೆರ್ ಅಳದಂಗಡಿ ಅರಮನೆ ತಿಮ್ಮಣ್ಣರಸೆರ್ ಡಾ. ಪದ್ಮಪ್ರಸಾದ ಅಜಿಲ ಈ ಲೇಸ್ ದ ಗುರ್ಕಾರ್ಮೆನ್ ಒಯಿಸ್ ದಿತ್ತೆರ್.

ಈ ಪೊರ್ತುಡು ಸರ್ಕಾರದ ಮುತಾಲಿಕೆಡ್ ಮಾರ್ಗದರ್ಶಿ ಅಧಿಕಾರಿ ಬೆದ್ರದ ಮಾಣಿಕ್ಯೆ, ಎಂ. ಮಸ್ತಕಾಭಿಷೇಕ ಸಮಿತಿದ ಪ್ರಧಾನ ಕಾರ್ಯದರ್ಶಿ ಪ್ರವೀಣ ಕುಮಾರ್ ಇಂದ್ರ, ಕೋಶಾಧಿಕಾರಿ ಜಯರಾಜ ಕಂಬಳಿ, ವಿಕಾಸ್ ಜೈನ್ ಪೆರಿಂಜೆ ಪಾಲ್ ಪಡೆದಿತ್ತೆರ್.

ಸಾಮೂಹಿಕ ಪಂಚ ನಮಸ್ಕಾರ ಮಂತ್ರ ಪಠಣದೊಟ್ಟಿಗೆ ಸುರು ಆಯಿನ ಸಭೆಟ್ಟ್ ಮಹಾವೀರ ಜೈನ್ ಮೂಡುಕೋಡಿಗುತ್ತು ಲೇಸ್ ದ ಸುಧಾರಿಕೆ ಮಲ್ತೆರ್.

ದೇವೆರೆ ಪಾದೋ ಸೇರಿಯೆರ್ ಪುಗರ್ತೆದ ಕಾದಂಬರಿಕಾರೆ ಕೆ.ಟಿ.ಗಟ್ಟಿ

ಕರ್ನಾಟಕ ಸಾಹಿತ್ಯ ಅಕಾಡಮಿ ಗೌರವ ಪ್ರಶಸ್ತಿ, ಕರ್ನಾಟಕ ರಾಜ್ಯೋತ್ಸವ ಪ್ರಶಸ್ತಿ ಪಡೆಯಿನ ಪುಗರ್ತೆದ ಕಾದಂಬರಿಕಾರೆ ಕೆ.ಟಿ.ಗಟ್ಟಿ (86) ದೇವೆರೆ ಪಾದೋ ಸೇರಿಯೆರ್.

ಮೂಲತಃ ಕಾಸ್ರೋಡುದ ಕೂಡ್ಲುದಾರಾಯಿನ ಕೂಡ್ಲು ತಿಮ್ಮಪ್ಪ ಗಟ್ಟಿ ಪ್ರಾಧ್ಯಾಪಕೆರಾದ್ ಕೆಲಸ ಮಲ್ದೆರ್. ಪತ್ರಿಕಾ ಕಾದಂಬರಿಲೆನ ಮುಕೇನ ಪುಗರ್ತೆ ಪಡೆತೆರ್.

ಒಡಿಪುದ ಟಿ.ಎಂ.ಪೈ. ಮಹಾವಿದ್ಯಾಲಯಡ್ ಅಧ್ಯಾಪಕೆರಾದಿತ್ತೆರ್. ಭಾರತ ಸರಕಾರರ್ದ್ ಪ್ರಾಧ್ಯಾಪಕೆರಾದ್ ಇಥಿಯೋಪಿಯಗ್ ಪ್ರಯಾಣ ಮಲ್ತ್ ದೆರ್. ಅತ್ತಂದೆ ಕಲ್ಪುನೆಟ್ಟ್ ಆಸಕ್ತಿ ಇತ್ತಿನ ಮೇರ್ ಇಂಗ್ಲೆಂಡ್ ರ್ದ್ ಟ್ರಿನಿಟಿ ಬೊಕ್ಕ ಆಕ್ಸಫರ್ಡ್ ಕಾಲೇಜ್ ಲೆರ್ದ್ ಇಂಗ್ಲಿಷ್ ಡ್ ಡಿಪ್ಲೋಮ ಮಲ್ತೆರ್. ಬೊಕ್ಕ ಇಥಿಯೋಪಿಯರ್ದ್ ಬತ್ತಿನ ಮೇರ್ ಉಜಿರೆಡ್ ಇತ್ತ್ ದ್ ಕೃಷಿ ಮಲ್ಪೆರೆ ಸುರು ಮಲ್ತೆರ್.

ಮೇರ್ ಶಬ್ದಗಳು (1976), ಸೌಮ್ಯ (1978), ಮನೆ, ರಾಮಯಜ್ಞ, ನಿರಂತರ, ಅಬ್ರಾಹ್ಮಣ, ಅಮುಕ್ತ, ಅವಿಭಕ್ತರು, ಕರ್ಮಣ್ಯೇ ವಾಧಿಕಾರಸ್ತೇ, ಕೂಪ, ಪೂಜಾರಿ, ಬಿಸಿಲುಗುದುರೆ, ಮೃತ್ಯೋರ್ಮಾ ಅಮೃತಂ ಗಮಯ, ಯುಗಾಂತರ, ಶಿಲಾತಪಸ್ವಿ, ಸ್ವರ್ಣಮೃಗ, ಅರಗಿನ ಮನೆ ಇಂಚ ಕಾದಂಬರಿಲೆನ್ ಬರೆದ್ ಕನ್ನಡ ಸಾಹಿತ್ಯ ಲೋಕಗ್ ಕೊಡುಗೆನ್ ಕೊರ್ತೆರ್.

23 ಗಂಟೆದ ಉಲಯಿ ಮುಗಿದ್ ದಾಖಲೆ ಬರೆಯಿನ ವಾಮಂಜೂರು ಸಂಕು ಪೂಂಜ- ದೇವು ಪೂಂಜ ಕಂಬುಲ

ವಾಮಂಜೂರು: ತಿರುವೈಲುಗುತ್ತು ಅಮೃತೇಶ್ವರ ದೇವಲ್ಯದ ಎದುರುದ ಕಂಡಡ್ ನಡತಿನ ಪುಗರ್ತೆದ ಸಂಕು ಪೂಂಜ- ದೇವು ಪೂಂಜ ಜೋಡುಕರೆ ಕಂಬುಲ ಈ ಸರ್ತಿದ ಕಂಬುಲ ಕೂಟಡ್ ಭಾರೀ ಬೇಗ ಮುಗಿದ್ ದಾಖಲೆ ಬರೆತ್ಂಡ್.

ಫೆ.17 ಸನಿಯಾರ ಬೊಲ್ಪುಗು 9.45 ಕ್ಕ್ ಸುರು ಆತಿನ ವಾಮಂಜೂರು ಕಂಬುಲ ಅಕೇರಿದ ಹಂತದ ಪಂತೊ ಐತಾರ ಬೊಲ್ಪುಗು 8.50 ಕ್ಕ್ ಸಂಪನ್ನ ಆತ್ಂಡ್. ಈ ಕಂಬುಲ ಕೂಟಡ್ 166 ಜತೆ ಎರ್ಲುಲು ಪಾಲ್ ಪಡೆದಿತ್ತ್ಂಡ್.

ಕರಿನ ವರ್ಷ 23 ಗಂಟೆದೊಲಯಿ ಮುಗಿನ ವಾಮಂಜೂರು ತಿರುವೈಲುಗುತ್ತು ಕಂಬುಲ ಈ ಸರ್ತಿಲ 23 ಗಂಟೆದೊಲಯಿ ಮುಗಿದ್ ಮಾದರಿ ಆತ್ಂಡ್. ಕಂಬುಲನ್ ಸರಿಯಾಯಿನ ಪೊರ್ತುಡು ಮುಗಿಪೆರೆ ಪೊಸ ಪೊಸ ತಂತ್ರಜ್ಞಾನದಡೆಗ್ ಪೋಪುನ ಪೊರ್ತುಡು ವಾಮಂಜೂರು ಕಂಬುಲ ಬೇತೆ ಕೂಟಲೆಗ್ ಮಾದರಿ ಆತ್ಂಡ್.

ಕನೆಪಲಯಿ ವಿಭಾಗಡ್ ಆಜಿ ಜತೆ, ಅಡ್ಡಪಲಯಿ ವಿಭಾಗಡ್ ಐನ್ ಜತೆ, ಬಲ್ಲ್ ಮಲ್ಲ ವಿಭಾಗಡ್ 14 ಜತೆ, ನಾಯೆರ್ ದ ಮಲ್ಲ ವಿಭಾಗಡ್ 35 ಜತೆ, ಬಲ್ಲ್ ದ ಎಲ್ಯ ವಿಭಾಗಡ್ 23 ಜತೆ ಬೊಕ್ಕ ನಾಯೆರ್ ದ ಎಲ್ಯ ವಿಭಾಗಡ್ 83 ಜತೆ ಎರ್ಲು ಪಾಲ್ ಪಡೆದಿತ್ತ್ಂಡ್.

ತಿರುವೈಲುಗುತ್ತುದ “ಸಂಕುಪೂಂಜ – ದೇವುಪೂಂಜ” ಜೋಡುಕರೆ ಕಂಬುಲಡ್ ಗೆಂದಿನಕುಲು

ವಾಮಂಜೂರು ತಿರುವೈಲುಗುತ್ತುದ 12ನೇ ವರ್ಷದ “ಸಂಕುಪೂಂಜ – ದೇವುಪೂಂಜ” ಜೋಡುಕರೆ ಕಂಬುಲ ಕೂಟ ಫೆ.17 ಕ್ಕ್ ನಡತ್ ದ್ ಒಟ್ಟು 166 ಜತೆ ಎರ್ಲು ಪಾಲ್ ಪಡೆದಿತ್ತ್ಂಡ್.

ಈ ಕಂಬುಲ ಕೂಟಡ್ ಗೆಂದಿನಕ್ಲೆನ ಪೊಲಬು ಇಂಚ ಉಂಡು.

ಕನೆಪಲಯಿ:
ಸುರುತ್ತ ಇನಾಮು: ಬೋಳಾರ ತ್ರಿಶಾಲ್ ಕೆ ಪೂಜಾರಿ
ಪಲಯಿ ಮುಟ್ಟಿನಾರ್: ಬೈಂದೂರು ಮಹೇಶ್ ಪೂಜಾರಿ
ರಡ್ಡನೇ ಇನಾಮು: ತಿರುವೈಲುಗುತ್ತು ನವೀನ್ಚಂದ್ರ ಆಳ್ವ “ಬಿ”
ಪಲಯಿ ಮುಟ್ಟಿನಾರ್: ತೆಕ್ಕಟ್ಟೆ ಸುಧೀರ್ ದೇವಾಡಿಗ

ಅಡ್ಡ ಪಲಯಿ:
ಸುರುತ್ತ ಇನಾಮು: ಬೋಳಾರ ತ್ರಿಶಾಲ್ ಕೆ ಪೂಜಾರಿ
ಪಲಯಿ ಮುಟ್ಟಿನಾರ್: ಸಾವ್ಯ ಗಂಗಯ್ಯ ಪೂಜಾರಿ
ರಡ್ಡನೇ ಇನಾಮು: ನಾರಾವಿ ಯುವರಾಜ್ ಜೈನ್
ಪಲಯಿ ಮುಟ್ಟಿನಾರ್: ಭಟ್ಕಳ ಹರೀಶ್

ಬಲ್ಲ್ ದ ಮಲ್ಲ:
ಸುರುತ್ತ ಇನಾಮು: ನಂದಳಿಕೆ ಶ್ರೀಕಾಂತ್ ಭಟ್ “ಎ”
ಗಿಡತಿನಾರ್: ಕಾವೂರು ದೋಟ ಸುದರ್ಶನ್
ರಡ್ಡನೇ ಇನಾಮು: ಹರೇಕಳ ಕೈಡೇಲುಗುತ್ತು ಮಿಥುನ್ ಎಂ ರೈ “ಎ”
ಗಿಡತಿನಾರ್: ಮಿಜಾರು ಅಶ್ವಥಪುರ ಶ್ರೀನಿವಾಸ ಗೌಡ

ಬಲ್ಲ್ ದ ಎಲ್ಯ:
ಸುರುತ್ತ ಇನಾಮು: ಕಾರ್ಲ ನೆಕ್ಲಾಜೆ ಗುತ್ತು ಪ್ರವೀಣ್ ಪ್ರದೀಪ್ ಕೋಟ್ಯಾನ್ “ಎ”
ಗಿಡತಿನಾರ್: ಬೈಂದೂರು ಮಂಜುನಾಥ ಗೌಡ
ರಡ್ಡನೇ ಇನಾಮು: ಕಾರ್ಲ ನೆಕ್ಲಾಜೆ ಗುತ್ತು ಪ್ರವೀಣ್ ಪ್ರದೀಪ್ ಕೋಟ್ಯಾನ್ “ಬಿ”
ಗಿಡತಿನಾರ್: ಮಂಗಲ್ಪಾಡಿ ರಕ್ಷಿತ್ ಶೆಟ್ಟಿ

ನಾಯೆರ್ ದ ಮಲ್ಲ:
ಸುರುತ್ತ ಇನಾಮು: ಮಿಜಾರು ಬರ್ಕೆ ಪ್ರವೀಣ್ ಭಂಡಾರಿ
ಗಿಡತಿನಾರ್: ಕಕ್ಕೆಪದವು ಪೆಂರ್ಗಾಲು ಕೃತಿಕ್ ಗೌಡ
ರಡ್ಡನೇ ಇನಾಮು: ನಾವುಂದ ಆಶ್ರಿತ ಇಶಾನಿ ವಿಶ್ವನಾಥ ಪೂಜಾರಿ “ಎ”
ಗಿಡತಿನಾರ್: ಬೈಂದೂರು ಮಂಜುನಾಥ ಗೌಡ

ನಾಯೆರ್ ದ ಎಲ್ಯ:
ಸುರುತ್ತ ಇನಾಮು: ವಾಮಂಜೂರು ತಿರುವೈಲು ಮಜಲುಮನೆ ಸಂಜೀವ ಮೂಲ್ಯ “ಎ”
ಗಿಡತಿನಾರ್: ಹೀರೇಬೆಟ್ಟು ಹರ್ಷಿತ್
ರಡ್ಡನೇ ಇನಾಮು: ನೆಲ್ಲಿಕಾರು ಸ್ವಸ್ತಿಕ್ ಯುವ ಬಾಂಧವರು “ಎ”
ಗಿಡತಿನಾರ್: ಕಕ್ಕೆಪದವು ಗೌತಮ್ ಗೌಡ