February 6, 2024

ಫೆ.10: ಮಂಜೇಶ್ವರಡ್ ಕೆಡ್ಡಸದ ಪೊರ್ಲು ತಿರ್ಲ್ ಲೇಸ್

ಮಂಜೇಶ್ವರ ರಾಷ್ಟ್ರಕವಿ ಗೋವಿಂದ ಪೈ ಸ್ಮಾರಕ ಸಮಿತಿ ಬೊಕ್ಕ ಜೈ ತುಲುನಾಡ್ (ರಿ.) ಕಾಸ್ರೋಡು ಎಗ್ಗೆದ ಒಟ್ಟುಸೇರಿಗೆಡ್ ಕೆಡ್ಡಸದ ಪೊರ್ಲು ತಿರ್ಲ್ ಲೇಸ್ ಫೆ.10 ಗಿಳಿವಿಂಡು ಮಂಜೇಶ್ವರಡ್ ನಡಪರೆ ಉಂಡು.

ಈ ಲೇಸ್ ನ್ ಮಂಜೇಶ್ವರ ಶಾಸಕೆರ್ ಎ.ಕೆ.ಎಂ ಅಶ್ರಫ್ ಉದಿಪನ ಮಲ್ಪೆರೆ ಉಲ್ಲೆರ್. ಈ ಲೇಸ್ ದ ಗುರ್ಕಾರ್ಮೆನ್ ಮಂಜೇಶ್ವರ ಗೋವಿಂದ ಪೈ ಸ್ಮಾರಕ ಸಮಿತಿದ ಕಾರ್ಯಂತೆರ್ ಉಮೇಶ್ ಸಾಲಿಯಾನ್ ಒಯಿಸೊನ್ವೆರ್. ಜೈ ತುಲುನಾಡ್ (ರಿ.) ದ ಪದುಕೆರ್ ವಿನೋದ ಪ್ರಸಾದ್ ರೈ ಬದಿಯಡ್ಕ ಕೆಡ್ಡಸದ ಪೊರ್ಲು ತಿರ್ಲ್ ದ ಬಗೆಟ್ಟ್ ಪೊಲಬು ಕೊರಿಯೆರೆ ಉಲ್ಲೆರ್. ‌

ಈ ಲೇಸ್ ಗ್ ಮಲ್ಲ ಬಿನ್ನೆರಾದ್ ಕೇರಳ ತುಲು ಅಕಾಡೆಮಿ ಗುರ್ಕಾರ್ಲು ಜಯಾನಂದ, ಮಂಜೇಶ್ವರ ಗ್ರಾಮ ಪಂಚಾಯತ್ ಗುರ್ಕಾರ್ಲು ಜೀನ್ ಲೆವಿನೋ ಮೊಂತೆರೊ, ಜೈ ತುಲುನಾಡ್ (ರಿ.) ಕೇಂದ್ರ ಸಮಿತಿದ ವಿಶು ಶ್ರೀಕೇರ ಪಾಲ್ ಪಡೆಯೆರೆ ಉಲ್ಲೆರ್.

ಜೈ ತುಲುನಾಡ್ (ರಿ.) ಕಾಸ್ರೋಡು ಎಗ್ಗೆದ ಕುಶಲಾಕ್ಷಿ ವಿ ಕುಲಾಲ್ ಕಣ್ವತೀರ್ಥ, ಒತ್ತು ಗುರ್ಕಾರ್ಲು ಉಮೇಶ್ ಶಿರಿಯಾ ಒತ್ತು ಪಾಲ್ ಪಡೆಯೆರೆ ಉಲ್ಲೆರ್.

ಬೊಕ್ಕ ಉಮೇಶ್ ಶಿರಿಯಾ ಬರೆಯಿನ ದಾರಗೆದ ಕೂಟ ಬುಕು ಬುಡುಗಡೆನ್ ಬಹುಭಾಷಾ ಕಲಿಕಾ ಕೇಂದ್ರ ಕಣ್ಣೂರು ವಿಶ್ವವಿದ್ಯಾಲಯದ ಡೈರೆಕ್ಟರ್ ಡಾ.ಎ.ಎಂ ಶ್ರೀಧರ ಮಲ್ಪೆರೆ ಉಲ್ಲೆರ್.

ಪಾಕಿಸ್ತಾನದ ಮಾಜಿ ಪ್ರಧಾನಿ ಇಮ್ರಾನ್ ಖಾನ್ ಗ್ ಕೂಲಿ ಬೇಲೆ!

ಬೇತೆ ಬೇತೆ ಕೇಸ್ ಡ್ ಶಿಕ್ಷೆಗ್ ಗುರಿಯಾದ್ ಜೈಲ್ ಸೇರಿನ ಪಾಕಿಸ್ತಾನದ ಮಾಜಿ ಪಿಎಂ ಇಮ್ರಾನ್ ಖಾನ್ ಬೊಕ್ಕ ಮಾಜಿ ವಿದೇಶಾಂಗ ಸಚಿವೆರ್ ಶಾ ಮೊಹಮ್ಮದ್ ಖುರೇಷಿಗ್ ಜೈಲ್ ಡ್ ಕೂಲಿ ಬೇಲೆ ಕೊರ್ತೆರ್.

ಆಂಡ ರಡ್ಡ್ ಜನಲ ಗಣ್ಯೆರ್ ಆಯಿನ ಕಾರಣ ಒರಿನ ಕೈದಿಲೆನೊಟ್ಟಿಗೆ ಬೇಲೆ ಮಲ್ಪೆರೆ ಇಜ್ಜಿ. ಅಡಿಗೆ ಇಲ್ಲ್, ಕೈತೋಟದ ಬೇಲೆನ್ ಮಲ್ಪೊಡು ಪಂದಿಜ್ಜಿ. ಈ ರಡ್ಡ್ ಜನನ್ ಒರಿನ ಕೈದಿಲೆರ್ದ್ ಬೇತೆನೇ ದೀದ್ ಉನ್ನತ ಸೌಕರ್ಯ ಕೊರ್ತೆರ್.

ಜಿಮ್ ಸಾಧನ, ಸ್ವತಃ ಅಡಿಗೆ ಮಲ್ತ್ ದ್ ವನಸ್ ತಿನ್ಪುನ ಸೌಕರ್ಯನ್ ಕೊರ್ತೆರ್.

ಕಾಶ್ಮೀರಡ್ ಹಿಮಪಾತ: ಅಪಾಯದ ಎಚ್ಚರಿಕೆ

ಜಮ್ಮು ಬೊಕ್ಕ ಕಾಶ್ಮೀರಡ್ ಹಿಮಪಾತ ಎಚ್ಚಾದ್ ಉಂಡು.‌ ನೆರ್ದ್ ಮಲ್ಲ ಹಿಮದ ದಿಬ್ಬಲು ಬೆಟ್ಟರ್ದ್ ತೀರ್ತ್ ಬರ್ಪುನ ಅಪಾಯ ಉಂಡು ಪಂದ್ ರಾಜ್ಯ ವಿಪತ್ತು ನಿರ್ವಹಣಾ ಸಂಸ್ಥೆ ಎಚ್ಚರಿಕೆ ಕೊರ್ತುಂಡು.

ಬಂಡಿಪೋರ್, ಬಾರಾಮುಲ್ಲಾ, ಕುಪ್ವಾರ, ದೋಡಾ, ಕಿಶ್ತ್ವಾರ್, ಪೂಂಚ್, ರಾಂಬನ್ ಬೊಕ್ಕ ಗಂದರ್ ಬಾಲ್ ಜಿಲ್ಲೆದ ಜನಕ್ಲೆಗ್ ಎಚ್ಚರಿಕೆಡ್ ಇಪ್ಪೆರೆ ಸೂಚನೆ ಕೊರ್ತುಂಡು. ಅತ್ತಂದೆ ಭಾರೀ ಹಿಮಪಾತರ್ದ್ ಶ್ರೀನಗರ ಇಮಾನ ನಿಲ್ದಾಣಡ್ ಇಮಾನದ ಹಾರಾಟನ್ ಬಂದ್ ಮಲ್ದೆರ್.

ಇನಿರ್ದ್ 1 ಕೆಜಿ ಅರಿಕ್ಕ್ 29 ರೂಪಾಯಿ

ಅರಿತ್ತ ಕಿರಯ ನಿಯಂತ್ರಣ ಮಲ್ಪೆರೆ ಕೇಂದ್ರ ಸರ್ಕಾರ ಘೋಷಣೆ ಮಲ್ತಿನ ಭಾರತ್ ಅರಿ ಯೋಜನೆಗ್ ಇನಿ ಚಾಲನೆ ತಿಕ್ಕುಂಡು.

ಅಮೆಜಾನ್, ಫ್ಲಿಪ್ ಕಾರ್ಟ್ ಇಂಚಿನ ಇ-ಕಾಮರ್ಸ್ ತಾಣಡ್ ಅರಿನ್ ದೆತೊನೊಲಿ. ನೆತ್ತೊಟ್ಟಿಗೆ ನಾಫೆಡ, ಎನ್ ಸಿಸಿಎಫ್, ಕೇಂದ್ರೀಯ ಭಂಡಾರಲೆಡ್ಲಾ ಅರಿ ತಿಕ್ಕುಂಡು.

ಭಾರತ್ ಅರಿ 5 ಕೆಜಿ, 10 ಕೆಜಿ ಪ್ಯಾಕೆಟ್ ಡ್ ಮಾರಾಟ ಆಪುಂಡು. ಪ್ರತಿ ಕೆಜಿಗ್ 29 ರೂಪಾಯಿ ನಿಗದಿ ಮಲ್ದೆರ್. ಸುರುತ್ತ ಹಂತಡ್ 5 ಲಕ್ಷ ಟನ್ ಅರಿ ಬುಡುಗಡೆ ಮಲ್ಪೆರೆ ಕೇಂದ್ರ ಸರ್ಕಾರ ನಿರ್ಧಾರ ಮಲ್ದ್ಂಡ್.

ರೇಡಿಯೊ ಮಣಿಪಾಲಡ್ ಹೊಂಬೆಳಕು-ವ್ಯಕ್ತಿತ್ವ ವಿಕಸನ ಸರಣಿ ಲೇಸ್

ಮಣಿಪಾಲ: ರೇಡಿಯೊ ಮಣಿಪಾಲ್ 90.4 Mhz ಡ್ ಜೆಸಿಐ ಕಲ್ಯಾಣಪುರದ ಒಟ್ಟುಸೇರಿಗೆಡ್ ಹೊಂಬೆಳಕು-ವ್ಯಕ್ತಿತ್ವ ವಿಕಸನ ಸರಣಿ ಲೇಸ್ ದ 44ನೇ ಸಂಚಿಕೆ ಫೆ.6 ಅಂಗಾರೆ ಬಯ್ಯಗ್ 5.30 ಕ್ಕ್ ಪ್ರಸಾರ ಆಪುಂಡು.

ಈ ಲೇಸ್ ಡ್ ಶಿಕ್ಷಕೆರ್, ಬರವುಗಾರೆ ನರೇಂದ್ರ ಕುಮಾರ್ ಕೋಟ ಪಾಲ್ ಪಡೆಯೆರೆ ಉಲ್ಲೆರ್. ಫೆ.7 ಮಧ್ಯಾಹ್ನ 1.30 ಕ್ಕ್ ಕುಡೊರ ಪ್ರಸಾರ ಆಪುಂಡು.

ಈ ಲೇಸ್ ನ್ ರೇಡಿಯೊ ಮಾತ್ರ ಅತ್ತಂದೆ ಆಂಡ್ರಾಯ್ಡ್ ಫೋನ್ ಬೊಕ್ಕ ಐಫೋನ್ ಡ್ ರೇಡಿಯೊ ಮಣಿಪಾಲ್ ಆಪ್ ಡೌನ್‌ಲೋಡ್ ಮಲ್ತ್ ದ್ ಕೇನೊಲಿ ಪಂದ್ ರೇಡಿಯೊ ಮಣಿಪಾಲ್ ಸಮುದಾಯ ಬಾನುಲಿ ಕೇಂದ್ರದ ಪ್ರಕಟಣೆ ತೆರಿಪಾದ್ಂಡ್.

ರೈಲ್ವೆ ಇಲಾಖೆಡ್ 2860 ಬೇಲೆ

ರೈಲ್ವೆ ಇಲಾಖೆದ ಬೇತೆ ಬೇತೆ ವಿಭಾಗಡ್ ಖಾಲಿ ಇಪ್ಪುನ 2860 ಅಪ್ರೆಂಟಿಸ್ ಬೇಲೆಗ್ ಅರ್ಜಿ ಸಂದಾವೊನ ಪ್ರಕ್ರಿಯೆ ಸುರು ಆತ್ಂಡ್.

50% ಮಾರ್ಕ್ ಡ್ 10ನೇ ಕ್ಲಾಸ್ ಡ್ ಪಾಸಾಯಿನಕುಲು ಬೊಕ್ಕ ಸಂಬಂಧಪಟ್ಟಿನ ಟ್ರೇಡ್ ಡ್ ITI ದೊಟ್ಟಿಗೆ ಇಂಟರ್ ಡ್ ಪಾಸಾಯಿನಕುಲು ಅರ್ಜಿ ಸಂದಾವೊಲಿ.

ತರಬೇತಿದ ಅವಧಿ ರಡ್ಡ್ ವರ್ಷ ಮುಟ್ಟ ಇಪ್ಪುಂಡು. ಆಸಕ್ತ ಅಭ್ಯರ್ಥಿಲು ಫೆ‌.28 ತ್ತೊಲಯಿ ಆನ್ ಲೈನ್ ಡ್ ಅರ್ಜಿ ಸಂದಾವೊಲಿ. ಎಚ್ಚದ ಪೊಲಬುಗಾದ್ ವೆಬ್ ಸೈಟ್: https://sr.indianrailways.gov.in/ ಗ್ ಸಂಪರ್ಕ ಮಲ್ಪೊಲಿ.