February 27, 2024

ಕಜಮಲೆ ಶ್ರೀ ವಿಷ್ಣುಮೂರ್ತಿ ದೇವಲ್ಯಡ್ ತುಲು ಲಿಪಿ ಪುದರ್ ಪಲವೆ ಉದಿಪನ

ಕಾಸ್ರೋಡು ಜಿಲ್ಲೆದ ಕಜಮಲೆ ಶ್ರೀ ವಿಷ್ಣುಮೂರ್ತಿ ದೇವಲ್ಯದ ಬ್ರಹ್ಮಕಲಶ ಉಚ್ಚಯದ 5ನೇ ದಿನ ದೇವಲ್ಯದ ಆಡಳಿತ ಮಂಡಳಿ ಬೊಕ್ಕ ಜೈ ತುಲುನಾಡ್ (ರಿ.) ಸಂಘಟನೆದ ಸಾರಥ್ಯಡ್ ಕಜಮಲೆ ಶ್ರೀ ವಿಷ್ಣುಮೂರ್ತಿ ದೇವಲ್ಯದ ತುಲು ಲಿಪಿ ಪುದರ್ ಪಲವೆನ್ ಫೆ.25 ಐತಾರ ಕುಂಟಾರು ರವೀಶ್ ತಂತ್ರಿಲು ಉದಿಪನ ಮಲ್ತೆರ್.

ಉದಿಪನ ಮಲ್ತ್ ದ್ ಪಾತೆರ್ನ ಮೇರ್, ತುಲು ಭಾಷೆ, ಲಿಪಿ ಬೊಕ್ಕ ಸಂಸ್ಕೃತಿನ್ ಒರಿಪಾಯೆರೆ ಬೆನೊಂದು ಇಪ್ಪುನ ಜೈ ತುಲುನಾಡ್ (ರಿ.) ಸಂಘಟನೆನ್ ಮೆಚ್ಚೊಡಾಯಿನವು, ಅವ್ವೇ ರೀತಿ ಮಾತೆರ್ಲಾ ನಿರಂತರವಾದ್ ಬೆನೊಡು ಪಂದ್ ಪಂಡೆರ್.

ಲೇಸ್ ದ ಗುರ್ಕಾರ್ಮೆನ್ ಮಾನಾದಿಗೆದ ಗುರ್ಕಾರೆ ಬ್ರಹ್ಮಕಲಶ ಉಚ್ಚಯದ ಸಮಿತಿದ ಗುರ್ಕಾರೆ ಡಾ| ವೇಣುಗೋಪಾಲ ಕಳೆಯತ್ತೋಡಿ ಒಯಿಸ್ ದಿತ್ತೆರ್.

ಈ ಪೊರ್ತುಡು ಬ್ರಹ್ಮಕಲಶ ಉಚ್ಚಯ ಸಮಿತಿದ ಪ್ರಧಾನ ಕಾರ್ಯದರ್ಶಿ ಹರಿನಾರಾಯಣ ಶಿರಂತಡ್ಕ,‌ ವಿಶ್ವ ಹಿಂದೂ ಪರಿಷತ್ ಬದಿಯಡ್ಕದ ಪ್ರಖಂಡ ಗುರ್ಕಾರೆ ಹರಿಪ್ರಸಾದ್ ರೈ, ಗೋಸಾಡ ಕ್ಷೇತ್ರದ ಸೇವಾ ಸಮಿತಿದ ಪ್ರಧಾನ ಕಾರ್ಯದರ್ಶಿ ರವೀಂದ್ರ ರೈ ಗೋಸಾಡ, ಮಧುಸೂದನ್ ಐಯ್ಯರ್ ಕುಡ್ಲ, ಪತ್ರಕರ್ತೆರ್ ಅಖಿಲೇಶ್ ನಗುಮುಗಂ, ಜೈ ತುಲುನಾಡ್ (ರಿ.) ಕಾಸ್ರೋಡು ಘಟಕದ ಕಾರ್ಯದರ್ಶಿ ಜಗನ್ನಾಥ ಕಂಡತ್ತೋಡಿ ಬೊಕ್ಕ ಬ್ರಹ್ಮಕಲಶ ಉಚ್ಚಯ ಸಮಿತಿದ ಪದುಕೆರ್ ಪಾಲ್ ಪಡೆದಿತ್ತೆರ್.

ಮಂಜುನಾಥ್ ಉಡುಪ ಲೇಸ್ ಗ್ ಎಡ್ಡೆಪ್ಪು ಬಯಕಿಯೆರ್. ಪ್ರಚಾರ ಸಮಿತಿದ ಮುಖ್ಯಸ್ಥೆರ್ ರಾಜೇಶ್ ಮಾಸ್ಟರ್ ಆಗಲ್ಪಾಡಿ ಎದ್ಕೊನಿಯೆರ್. ಕಬಿ, ತುಲು ಸಾಹಿತಿ ವಿಜಯರಾಜ್ ಪುಣಿಂಚಿತ್ತಾಯ ಸೊಲ್ಮೆ ಸಂದಾಯೆರ್. ಅಮೃತ್ ರಾಜ್ ರೈ ಮುಕ್ಕೂರು ಲೇಸ್ ದ ಸುಧಾರಿಕೆ ಮಲ್ತೆರ್.

ಪಾಣೇರ್ ಶ್ರೀ ಭಯಂಕೇಶ್ವರ ಸದಾಶಿವ ದೇವಲ್ಯದ ಬ್ರಹ್ಮಕಲಶ ಉಚ್ಚಯಗ್ ದೊಂಪದ ಮೂರ್ತ

ಬಂಟ್ವಾಳ: ಸುಮಾರ್ ಏಳುನೂದು ವರ್ಷಲೆನ ಇತಿಹಾಸ ಪುಗರ್ತೆದ ಪಾಣೇರ್ ಶ್ರೀ ಭಯಂಕೇಶ್ವರ ಸದಾಶಿವ ದೇವಲ್ಯದ ಅಷ್ಟಬಂಧ ಬ್ರಹ್ಮಕಲಶ ಉಚ್ಚಯ ಬೊಕ್ಕ ಜಾತ್ರೆದ ಲೆಕ್ಕೊಡು ದೊಂಪ ಮೂರ್ತ ಐತಾರ ಕ್ಷೇತ್ರದ ಪ್ರಾಂಗಣಡ್ ನಡತ್ಂಡ್.

ವೇ.ಮೂ. ವೆಂಕಪ್ಪಯ್ಯ ಭಟ್ ಕರ್ಬೆಟ್ಟು ಬೊಕ್ಕ ಪ್ರಧಾನ ಅರ್ಚಕೆರ್ ನಾರಾಯಣ ಮಯ್ಯರು, ಸಹ ಅರ್ಚಕೆರ್ ಲಕ್ಷಣ ಆಕಾಶೆ, ಪ್ರಸನ್ನ ಹೆಗ್ಡೆ ಪೂಜೆದ ವಿಧಿವಿಧಾನನ್ ಮಲ್ತೆರ್.

ಈ ಪೊರ್ತುಡು ಬ್ರಹ್ಮಕಲಶ ಉಚ್ಚಯ ಸಮಿತಿದ ಮಾನಾದಿಗೆದ ಗುರ್ಕಾರೆ ಡಾ.ಎಂ. ಮೋಹನ ಆಳ್ವ ಬೆದ್ರ, ಜೀರ್ಣೋದ್ದಾರ ಸಮಿತಿ ಗುರ್ಕಾರೆ ಬಿ.ರಘುನಾಥ ಸೋಮಯಾಜಿ, ಒತ್ತು ಗುರ್ಕಾರೆ ರಘು ಸಪಲ್ಯ, ಜಿಲ್ಲಾ ಕಸಾಪ ಮಾಜಿ ಗುರ್ಕಾರೆ ಪ್ರದೀಪ ಕುಮಾರ ಕಲ್ಕೂರ, ಕಾರ್ಯಾಧ್ಯಕ್ಷೆರ್ ಜಗನ್ನಾಥ ಚೌಟ ಬದಿಗುಡ್ಡೆ, ಗುರ್ಕಾರೆ ಜಗನ್ನಾಥ ಬಂಗೇರ, ಕೋಶಾಧಿಕಾರಿ ಕೆ. ಶಂಕರನಾರಾಯಣ ರಾವ್, ಸಹಸಂಚಾಲಕೆರ್ ಕೃಷ್ಣಪ್ಪ ಗಾಣಿಗ, ಕೇಶವ ಕೋಡಿ, ನರಸಿಂಹ ಮಯ್ಯ ಬಿ.ಸಿ.ರೋಡ್, ಡಾ. ಆತ್ಮರಂಜನ್ ರೈ ಪಾಣೇರ್, ಗೋವಿಂದ ಪೈ, ನವೀನ ಮಾಣಿಮಜಲು, ವಸಂತ ಪಿ., ಶ್ರೀಶ ರಾಯಸ, ಪುರುಷೋತ್ತಮ ಸಾಲ್ಯಾನ್ ಪಾಲ್ ಪಡೆದಿತ್ತೆರ್.

ಮಾ.2-12 ಮುಟ್ಟ ಬ್ರಹ್ಮಕಲಶ ಉಚ್ಚಯದ ಬೇತೆ ಬೇತೆ ಧಾರ್ಮಿಕ ಬೊಕ್ಕ ಸಾಂಸ್ಕೃತಿಕ ಲೇಸ್ ನಡಪರೆ ಉಂಡು. ಮಾ.5 ಕ್ಕ್ ಪುದೆಕಾಣಿಕೆ ಸಮರ್ಪಣೆ ನಡಪರೆ ಉಂಡು.

ಮೋಹನದಾಸ ಕೊಟ್ಟಾರಿ ಈ ಲೇಸ್ ದ ಸುಧಾರಿಕೆ ಮಲ್ತೆರ್. ಕಾರ್ಯದರ್ಶಿ ಪದ್ಮನಾಭ ಮಯ್ಯ ಏಲಬೆ ಸೊಲ್ಮೆ ಸಂದಾಯೆರ್.

ಪೊವಾಯಿ ಕನ್ನಡ ಸೇವಾ ಸಂಘಡ್ ಅರಸಿನ ಕುಂಕುಮ, ಎಲ್ಯ ನಾಟಕ ಪಂತೊ

ಕನ್ನಡ ಸೇವಾ ಸಂಘ ಪೊವಾಯಿ, ಪೊಂಜೊವುಲೆನ ಕೂಟದಕ್ಲೆರ್ದ್ ಅರಸಿನ ಕುಂಕುಮ ಲೇಸ್ ಬೊಕ್ಕ ಎಲ್ಯ ನಾಟಕದ ಪಂತೊ ಫೆ.25 ಐತಾರ ಮದ್ದೆನ ಸಂಘದ ವಠಾರೊಡು ಬಾರಿ ಗೌಜಿಡ್ ನಡತ್ಂಡ್.

ಸಾಂಸ್ಕೃತಿಕ ಸಮಿತಿದ ಪ್ರಶಾಂತಿ ದಿವಾಕರ ಶೆಟ್ಟಿ, ಬೊಕ್ಕ ಕೂಟದ ಗುರ್ಕಾರ್ದಿ ಸುಗುಣ ಕೃಷ್ಣ ಶೆಟ್ಟಿ ಮೊಕ್ಲೆನ ಮುತಾಲಿಕೆಡ್ ಲೇಸ್ ನಡತ್ಂಡ್.

ಲೇಸ್ ಉದಿಪನ ಮಲ್ತಿನ ಬಂಟರ ಸಂಘದ ಮಹಿಳಾ ವಿಭಾಗದ ಮಾಜಿ ಕಾರ್ಯಾಧ್ಯಕ್ಷೆರ್ ಲತಾ ಜಯರಾಮ್ ಶೆಟ್ಟಿ ಪಾತೆರ್ದ್, ಪೊವಾಯಿ ಕನ್ನಡ ಸಂಘದ ಸದಸ್ಯೆರೆನ ಒಗ್ಗಟ್ಟ್, ಅಕುಲು ಮಲ್ಪುನ ಸಮಾಜ ಪರ ಕಾರ್ಯ ಎಂಕ್ ಮಸ್ತ್ ಖುಷಿ ಕೊರ್ತುಂಡು. ಯಾನ್ ಸುಮಾರ್ ಸರ್ತಿ ಬೈದೆ ಈ ಕಾರ್ಯಕ್ರಮಗು, ನೆತ್ತ ಪಿರವುಡ್ ಪ್ರಶಾಂತಿ ಬೊಕ್ಕ ಕೂಟದಕ್ಲೆನ ಮಸ್ತ್ ಪ್ರಯತ್ನ ಉಂಡು, ಯಾನ್ ಈ ಸಂದರ್ಬೊಡು ಸಂಘದ ಮಾತಾ ಸದಸ್ಯರೆಗ್ ಸೊಲ್ಮೆ ಸಂದಾಯ ಮಲ್ತೊಂದುಲ್ಲೆ ಪಂದ್ ಪಂಡೆರ್.

ಎಲ್ಯ ನಾಟಕ ಪಂತೊದ ತೀರ್ಪು ಕೊರಿನ ಡಾ| ಭಾರತ್ ಕುಮಾರ್ ಪೊಲಿಪು ಬೊಕ್ಕ ನಾರಾಯಣ ಶೆಟ್ಟಿ ನಂದಳಿಕೆ ಮೊಕ್ಲು, ಇಂಚಿನ ಪಂತೊ ಪ್ರತಿ ವರ್ಷ ಮಲ್ಪುಲೆ. ನೆಟ್ ಪೊಂಜೊವುಲೆಗ್ ತನ್ನ ಪ್ರತಿಭೆ ತೋಜಾವರೆ ಅವಕಾಶ ತಿಕ್ಕುಂಡು, ಇನಿ ಪಾಲ್ ಪಡೆಯಿನ ಮಾತಾ ತಂಡ ದಕುಲು ಮಸ್ತ್ ಎಡ್ಡೆ ಮಲ್ದೆರ್. ಮಾತೆರೆಗ್ಲಾ ಅಭಿನಂದನೆ ಪಂಡೆರ್.

ಪಂತೊಡು ಸುರುತ್ತ ಇನಾಮುನು ಭ್ರಾಮರಿ ಮಹಿಳಾ ತಂಡ, ರಡ್ಡನೇ ಇನಾಮುನು ಉಮಾಮಹೇಶ್ವರಿ ತಂಡ, ಮೂಜಿನೇ ಇನಾಮುನು ಬಂಟರ ಸಂಘದ ನವಿ ಮುಂಬೈ ಪ್ರಾದೇಶಿಕ ಸಮಿತಿ ಮೊಕ್ಲು ಪನವು ಬೊಕ್ಕ ನೆಂಪು ಕಾಣಿಕೆದೊಟ್ಟುಗು ಪಡೆಯೆರ್.

ಲೇಸ್ ದ ಮಿತ್ತ ಚಾವಡಿದ್ ಗುರ್ಕಾರ್ತಿ ಸುಗುಣ ಕೆ ಶೆಟ್ಟಿ,ಮಲ್ಲ ಬಿನ್ನೆದಿ ರತ್ನ ವಸಂತ್ ಶೆಟ್ಟಿ, ಶೋಭಾ ಶಂಕರ್ ಶೆಟ್ಟಿ , ಮಾನಾದಿಗೆದ ಬಿನ್ನೆರ್ ಅಶ್ವಿನಿ ಅಶೋಕ್ ಮಟೆಕಾರ್, ಅಂಧೇರಿ – ಬಾಂದ್ರಾ ಪ್ರಾದೇಶಿಕ ಸಮಿತಿದ ಮಹಿಳಾ ಕಾರ್ಯಾಧ್ಯಕ್ಷೆರ್ ಶೋಭಾ ಶೆಟ್ಟಿ ಇತ್ತೆರ್.

ಸಂಘದ ಗುರ್ಕಾರೆ ಸಂದೇಶ್ ಆರ್ ಶೆಟ್ಟಿ, ಮಹಿಳಾ ವಿಭಾಗ ಮಲ್ಪುನ ಕಾರ್ಯ ಕಜ್ಜ ದ ಬಗ್ಗೆ ಪಾತೆರಿಯೆರ್.

ಈ ಪೊರ್ತುಡು ಸಮಾಜ ಸೇವಕಿ, ಡಾಕ್ಟರ್ ರಜನಿ ವಿನಾಯಕ್ ಪೈ ಮೆರೆನ್ ಸಹಕಾರ ರತ್ನ ಪನ್ಪಿನ ಬಿರ್ದ್ ಕೊರ್ದು ಮಾನಾದಿಗೆ ಮಲ್ತೆರ್ . ಅಂಚೆನೇ ಸಂಘದ ಸದಸ್ಯೆ ಭಾರತಿ ಬಾಲಕೃಷ್ಣ ಶೆಟ್ಟಿ ಮಾನಾದಿಗೆ ಮಲ್ತೆರ್.

ಸಂಘ ಕೊರಿನ ಈ ಮಾನಾದಿಗೆ ಎನ್ನ ಜೀವ ಮಾನೊಡು ನೆಂಪು ದೀಪಿನವು. ಕನ್ನಡ ಸೇವಾ ಸಂಘ ನನಾತ್ ಎಡ್ಡೆ ಕೆಲಸ ಮಲ್ತ್ ಪುದರ್ ಮಲ್ಪಡ್. ನಿಕೆಗ್ ಎನ್ನ ಎಡ್ಡೆಪ್ಪು ಬಯಕುವೆ ಪಂದ್ ಡಾ. ರಜನಿ ವಿನಾಯಕ್ ಪೈ ಪಂಡೆರ್. ಬಿನ್ನೆರೆ ಚಾವಡಿಡ್ ಮಹಿಳಾ ಕಾರ್ಯದರ್ಶಿ ಆಶಾ ಸತೀಶ್ ಶೆಟ್ಟಿ, ಕೋಶಾಧಿಕಾರಿ,ಕುಶಲ ಎ ಬಂಗೇರ ಇತ್ತೆರ್ .

ಭವಾನಿ ಸೀತಾರಾಮ್ ಶೆಟ್ಟಿ ಪ್ರಾರ್ಥನೆ ಮಲ್ತೆರ್. ಬತ್ತಿನ ಬಿನ್ನೆರೆನ್ ಗುರ್ಕಾರ್ದಿ ಸುಗುಣ ಕೃಷ್ಣ ಶೆಟ್ಟಿ ಎದುಕೊಂಡೆರ್. ಸಾಂಸ್ಕೃತಿಕ ಸಮಿತಿದ ಪ್ರಶಾಂತಿ ದಿವಾಕರ್ ಶೆಟ್ಟಿ ಬೊಕ್ಕ ಶಿಕ್ಷಣ ಸಮಿತಿದ ಯಶೋದಾ ಎಸ್ ಪೂಜಾರಿ ಲೇಸ್ ಸುಧಾರಿಕೆ ಮಲ್ತೆರ್.

ಅಂಚೆನೆ ಎಲ್ಯ ನಾಟಕ ಪಂತೊನು ಸಂಘದ ಗೌರವ ಪ್ರಧಾನ ಕಾರ್ಯದರ್ಶಿ ಅನಿತಾ ಎಸ್ ಶೆಟ್ಟಿ ಸುಧಾರಿಕೆ ಮಲ್ತೆರ್ . ಜತೆ ಕಾರ್ಯದರ್ಶಿ ಪ್ರಮೀಳಾ ಡಿ ಶೆಟ್ಟಿ, ಪ್ರಶಾಂತಿ ದಿವಾಕರ್ ಶೆಟ್ಟಿ, ಯಶೋಧ ಎಸ್ ಪೂಜಾರಿ, ಅನಿತಾ ಯು ಶೆಟ್ಟಿ ಬಿನ್ನೆರ್ನ ಪೊಲಬು ಮಲ್ತ್ ಕೊರಿಯೆರ್ . ಜ್ಯೋತಿ ಆರ್ ಜಿ ಶೆಟ್ಟಿ ಸೊಲ್ಮೆ ಸಂದಾಯ ಮಲ್ತೆರ್.

ಮಾ.9-10: ಡೊಂಬಿವಲಿ ಶ್ರೀ ಜಗದಂಬಾ ಮಂದಿರಡ್ 9ನೇ ವರ್ಷದ ಉಚ್ಚಯ

ಡೊಂಬಿವಲಿ ಶ್ರೀ ಜಗದಂಬಾ ಮಂದಿರಡ್ 9ನೇ ವರ್ಷದ ಉಚ್ಚಯ ಬೊಕ್ಕ ಪಲ್ಲಕ್ಕಿ ಉಚ್ಚಯ ಮಾ.9 ಬೊಕ್ಕ 10 ಕ್ಕ್ ನಡಪರೆ ಉಂಡು.

ಈ ಲೇಸ್ ಪ್ರಧಾನ ಅರ್ಚಕೆರ್ ರಘಪತಿ ಭಟ್ರೆನ ಮುತಾಲಿಕೆಡ್ ನಡಪರೆ ಉಂಡು.

ಮಾ.8 ಸುಕ್ರಾರ ಮಹಾ ಶಿವರಾತ್ರಿ ನಡಪುಂಡು. ಆನಿ ಬೊಲ್ಪುಗು ರುದ್ರಾಭಿಷೇಕ ಬಯ್ಯಗ್ ಭಜನೆ, ಮಹಾಮಂಗಳಾರತಿ ನಡಪರೆ ಉಂಡು.

ಮಾ.9 ಸನಿಯಾರ ಬೊಲ್ಪುಗು ಸಾಮೂಹಿಕ ಪ್ರಾರ್ತನೆ, ತೋರಣ ಮೂರ್ತ, ಗಣಪತಿ ಹೋಮ, ಶನಿಶಾಂತಿ, ಸಾಮೂಹಿಕ ಸತ್ಯನಾರಾಯಣ ಪೂಜೆ ಮಧ್ಯಾಹ್ನ ಶನಿಪೂಜೆ, ಯಕ್ಷಗಾನ ತಾಳಮದ್ದಳೆ, ಪಲ್ಲಪೂಜೆ ಬಯ್ಯಗ್ ದುರ್ಗಾ ನಮಸ್ಕಾರ ಪೂಜೆ, ಕುಂಕುಮಾರ್ಚನೆ ನಡಪರೆ ಉಂಡು.

ಮಾ.10 ಬೊಲ್ಪುಗು 25 ಕಲಶದ ಕಲಶಾರಾಧನೆ ಪ್ರಧಾನ ಹೋಮ, ಪಂಚಾಮೃತ ಅಭಿಷೇಕ, ನವಕಲಶ, ಕಲಶಾಭಿಷೇಕ, ಉಚ್ಚಯ ಬಲಿ ಕಟ್ಟೆಪೂಜೆ, ಶೋಭಾಯಾತ್ರೆ, ಪಲ್ಲಪೂಜೆ, ಮಧ್ಯಾಹ್ನ ಅನ್ನ ಪ್ರಸಾದ ಸೇವೆ, ಬಯ್ಯಗ್ ಕುಂಕುಮಾರ್ಚನೆ ಮಹಾಪೂಜೆ, ರಂಗಪೂಜೆ, ಕೊರಬ್ಬು ಬಾರಗ ತುಳು ಆಟ ನಡಪರೆ ಉಂಡು.

ಮಾ.11 ಸೋಮಾರ ಬೊಲ್ಪುಗು ಸಂಪ್ರೋಕ್ಷಣೆ, ನವಕ ಕಲಶಾಭಿಷೇಕ ನಡಪರೆ ಉಂಡು.

ಈ ಲೇಸ್ ಡ್ ಮಾತೆರ್ಲಾ ಪಾಲ್ ಪಡೆದ್ ಶ್ರೀಗಂಧ ತೀರ್ಥ ಪ್ರಸಾದ ದೆತೊಂದು ಪ್ರಧಾನ ದೇವೆರೆರಾಯಿನ ಜಗದಂಬಾ ದೇವಿ, ಕಲಿಯುಗ ಒಡೆಯೆ ಶ್ರೀ ಶನೀಶ್ವರ ಮಹಾಗಣಪತಿ, ನಾಗದೇವೆರೆನ ಅನುಗ್ರಹಗ್ ಪಾತ್ರರಾವೊಡು ಪಂದ್ ಮಾನಾದಿಗೆದ ಗುರ್ಕಾರೆ ಹರೀಶ್ ಡಿ ಶೆಟ್ಟಿ, ಗುರ್ಕಾರೆ ದಿವಾಕರ ಜಿ ರೈ ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.

ಪಕ್ಷಿಕೆರೆ ಶ್ರೀ ವಿನಾಯಕ ಮಿತ್ರ ಮಂಡಲಿದ ಮುತಾಲಿಕೆಡ್ ಸಾಧಕೆರೆಗ್ ಸನ್ಮಾನ, ದತ್ತಿನಿಧಿ, ಆರೋಗ್ಯ ನಿಧಿ ಪಟ್ಟುನ ಲೇಸ್

ಶ್ರೀ ವಿನಾಯಕ ಮಹಿಳಾ ಮಂಡಳಿ ಉದಿಪನ

ಪಕ್ಷಿಕೆರೆ : ಕುಡ್ಲ ಯುವ ಕಾರ್ಯ ಬೊಕ್ಕ ಕ್ರೀಡಾ ಸಚಿವಾಲಯ ನೆಹರು ಯುವ ಕೇಂದ್ರ, ಜಿಲ್ಲಾ ರಾಜ್ಯೋತ್ಸವ ಪ್ರಶಸ್ತಿ, ಜಿಲ್ಲಾ ಯುವಮಂಡಲ ಪ್ರಶಸ್ತಿ ಗೆಂದಿನ ಪಕ್ಷಿಕೆರೆ ಶ್ರೀ ವಿನಾಯಕ ಮಿತ್ರ ಮಂಡಲದ ಒಟ್ಟುಸೇರಿಗೆಡ್ ಸಾಧಕೆರೆಗ್ ಸನ್ಮಾನ-ಪ್ರತಿಭಾ ಪ್ರದರ್ಶನ, ದತ್ತನಿಧಿ-ಆರೋಗ್ಯ ನಿಧಿ ವಿತರಣೆ ಬೊಕ್ಕ ಶ್ರೀ ವಿನಾಯಕ ಮಹಿಳಾ ಮಂಡಳಿದ ಉದಿಪನ ಲೇಸ್ ಪಕ್ಷಿಕೆರೆ ಶ್ರೀ ಗಣೇಶ ಕಲಾ ಮಂಟಪದ ಚಾವಡಿಡ್ ನಡತ್ಂಡ್.

ಮುಲ್ಕಿ-ಬೆದ್ರ ಶಾಸಕೆರ್ ಉಮಾನಾಥ ಕೋಟ್ಯಾನ್ ಲೇಸ್ ನ್ ಉದಿಪನ ಮಲ್ತ್ ದ್ ಪಾತೆರ್ದ್, ಬೇತೆ ಬೇತೆ ರೀತಿದ ಸಮಾಜ ಸೇವೆ ಮಲ್ತೊಂದು ಇಪ್ಪುನ ಸಾಧಕೆರ್ ಬೊಕ್ಕ ಸಂಘ ಸಂಸ್ಥೆಲೆನ್ ಮಾನಾದಿಗೆ ಮಲ್ಪುನ ಲೇಸ್ ಮೆಚ್ಚೊಡಾಯಿನವು ಪಂದ್ ಪಂಡೆರ್.

ಶ್ರೀ ವಿನಾಯಕ ಮಹಿಳಾ ಮಂಡಳಿದ ಉದಿಪನನ್ ದಕ ಜಿಲ್ಲಾ ಪಂಚಾಯತ್ ಮಾಜಿ ಒತ್ತು ಗುರ್ಕಾರ್ದಿ ಕಸ್ತೂರಿ ಪಂಜ ಮಲ್ತೆರ್.

ಲೇಸ್ ಡ್ ಪಕ್ಷಿಕೆರೆ ಸಾರ್ವಜನಿಕ ಶ್ರೀ ಗಣೇಶೋತ್ಸವ ಸಮಿತಿದ ಪ್ರಧಾನ ಅರ್ಚಕೆರ್ ಶ್ರೀ ವಾಸುದೇವ ಭಟ್ ಪಂಜ ಮೇರ್ ಎಡ್ಡೆಪ್ಪು ಬಯಕಿಯೆರ್. ಲೇಸ್ ದ ಗುರ್ಕಾರ್ಮೆನ್ ಕಿನ್ನಿಗೋಳಿ ಉದ್ಯಮಿ ಪ್ರರ್ಥ್ವಿರಾಜ್ ಆಚಾರ್ಯ ಒಯಿಸ್ ದಿತ್ತೆರ್.

ಈ ಪೊರ್ತುಡು ಭಾರತೀಯ ವಾಯುಪಡೆತ್ತ ನಿವೃತ್ತ ಯೋಧೆರ್ ಅರವಿಂದ ಆರ್ ಭಟ್ ಕುದ್ಕೋಳಿ, ಹಿರಿಯ ಸಾವಯವ ಕೃಷಿಕೆ ಜಯ ಶೆಟ್ಟಿ ನಲ್ಯಗುತ್ತು ಪಂಜ, ಸಮಾಜ ಸೇವೆದ ಶಿವ ಸಂಜೀವಿನಿ ಸುರಗಿರಿ, ರಾಷ್ಟ್ರೀಯ ಕರಾಟೆ ಪಟು ಸುಶಾನ್ ಜೆ ದೇವಾಡಿಗ, ಶೈಕ್ಷಣಿಕ ಕ್ಷೇತ್ರಡ್ ಸಾಧನೆ ಮಲ್ತಿನ ಕುಮಾರಿ ಸುಶ್ಮಿತಾ ಸಿ ಆಚಾರ್ಯ ಪಕ್ಷಿಕೆರೆ ಮೊಕ್ಲೆಗ್ ಸನ್ಮಾನ ಮಲ್ತ್ ದ್ ಮಾನಾದಿಗೆ ಮಲ್ತೆರ್.

ಕಿನ್ನಿಗೋಳಿ ಉದ್ಯಮಿ ಡೋಲ್ಫಿ ಸಂತುಮಾಯೇರ್ ಆರೋಗ್ಯ ನಿಧಿ ಬೊಕ್ಕ ಕೆಮ್ರಾಲ್ ಶ್ರೀ ಕೋರ್ದಬ್ಬು ದೈವೊಲ್ಯ ಜೀರ್ಣೋದ್ಧಾರ ಬೊಕ್ಕ ಕುಂಭಾಭಿಷೇಕ ಸಮಿತಿದ ಗುರ್ಕಾರೆ ಸಂತೋಷ್ ಬಿ ಶೆಟ್ಟಿ‌ ದತ್ತಿ ನಿಧಿ ಪಟ್ಟಿಯೆರ್.

ಈ ಪೊರ್ತುಡು ಚಾವಡಿಡ್ ಕೆಮ್ರಾಲ್ ಪಂಚಾಯತ್ ಗುರ್ಕಾರೆ ಮಯ್ಯದಿ, ಮಾಜಿ ಜಿಲ್ಲಾ ಪಂಚಾಯತ್ ಸದಸ್ಯೆರ್ ವಿನೋದ್ ಬೊಳ್ಳೂರು,ತಾಲೂಕ್ ಪಂಚಾಯತ್ ಮಾಜಿ ಸದಸ್ಯೆರ್ ದಿವಾಕರ ಕರ್ಕೇರ, ಹಳೆಯಂಗಡಿ ಪಿಸಿಎ ಬ್ಯಾಂಕ್ ಮಾಜಿ ನಿರ್ದೇಶಕೆರ್ ಜಯರಾಮ್ ಆಚಾರ್ಯ, ಸುರಗಿರಿ ಯುವಕ ಮಂಡಲದ ಮಾನಾದಿಗೆದ ಗುರ್ಕಾರೆ ಸುನಿಲ್ ಭಂಡಾರಿ, ತೋಕೂರು ರಜತ ಮಹೋತ್ಸವ ಸಮಿತಿ ಮಹಿಳಾ ಮಂಡಲದ ಮಾನಾದಿಗೆದ ಗುರ್ಕಾರ್ದಿ ಅನುಪಮಾ ಎ ರಾವ್, ತೋಕೂರು ಶ್ರೀ ಸುಬ್ರಹ್ಮಣ್ಯ ಮಹಾಗಣಪತಿ ಸ್ಪೋರ್ಟ್ಸ್ ಕ್ಲಬ್ ಮಹಿಳಾ ಕಾರ್ಯಧ್ಯಕ್ಷೆರ್ ಯಶೋಧ ದೇವಾಡಿಗ, ಗಣಪತಿ ಆಚಾರ್ಯ, ಪಿಸಿಎ ಬ್ಯಾಂಕ್ ಕಾರ್ಯನಿರ್ವಾಹಣಾಧಿಕಾರಿ ಹಿಮಕರ, ಶ್ರೀ ವಿನಾಯಕ ಮಹಿಳಾ ಮಂಡಲ ಗುರ್ಕಾರ್ದಿ ಸರಸ್ವತಿ ಶ್ರೀನಿವಾಸ್, ವಿನಾಯಕ ಮಹಿಳಾ ಮಂಡಲ ಗುರ್ಕಾರೆ ಯತೀಶ್ ಬಂಗೇರ ಪಾಲ್ ಪಡೆದಿತ್ತೆರ್.

ಶ್ರೀ ವಿನಾಯಕ ಮಿತ್ರ ಮಂಡಳಿ ಮಾನಾದಿಗೆದ ಗುರ್ಕಾರೆ ಧನಂಜಯ್ ಶೆಟ್ಟಿಗಾರ್ ಎದ್ಕೊನಿಯೆರ್. ಯಜ್ಞೇಶ್ ಪಿ ಶೆಟ್ಟಿಗಾರ್ ಸೊಲ್ಮೆ ಸಂದಾಯೆರ್. ಅಭಿಷೇಕ್ ಶೆಟ್ಟಿ ಲೇಸ್ ದ ಸುಧಾರಿಕೆ ಮಲ್ತೆರ್.

ಉರ್ವಸ್ಟೋರ್ ದ ಅಂಗಡಿಗುಡ್ಡೆ ಕೋಟೆದ ಬಬ್ಬುಸ್ವಾಮಿನ ಪೊಸ ಬಿಂಬ ಪ್ರತಿಷ್ಠೆ, ಬ್ರಹ್ಮಕಲಶ ಉಚ್ಚಯ, ನೇಮದ ಲೆಪ್ಪೋಲೆ ಬುಡುಗಡೆ

ಉರ್ವಸ್ಟೋರ್ ದ ಅಂಗಡಿಗುಡ್ಡೆ ಶ್ರೀ ಕೋಟೆದ ಬಬ್ಬುಸ್ವಾಮಿ ದೈವೊಲ್ಯಡ್ ನಡಪುನ ಪೊಸ ಬಿಂಬ ಪ್ರತಿಷ್ಠೆ, ಬ್ರಹ್ಮಕಲಶ ಉಚ್ಚಯ ಬೊಕ್ಕ ನೇಮದ ಲೆಪ್ಪೋಲೆ ಬುಡುಗಡೆ ಲೇಸ್ ಫೆ.24 ಕ್ಕ್ ಬಯ್ಯಗ್ ದೈವೊಲ್ಯದ ಚಾವಡಿಡ್ ನಡತ್ಂಡ್.

ಈ ಪೊರ್ತುಡು ಜೀರ್ಣೋದ್ಧಾರ ಸಮಿತಿದ ಮಾನಾದಿಗೆದ ಗುರ್ಕಾರೆ, ಶಾಸಕೆರ್ ವೇದವ್ಯಾಸ್ ಕಾಮತ್, ಗುರ್ಕಾರೆ ಉದ್ಯಮಿ ರಾಜ್ ಗೋಪಾಲ್ ರೈ, ಮಾನಾದಿಗೆದ ಸಲಹೆಗಾರೆ, ಮಾಜಿ ಸಚಿವೆರ್ ನಾಗರಾಜ್ ಶೆಟ್ಟಿ, ಮಹಾ ಪೌರೆರ್ ಸುಧೀರ್ ಶೆಟ್ಟಿ, ಕೃಷ್ಣ ಅಡಿಗ ಕದ್ರಿ, ಶ್ರೀ ಜಗದೀಶ್ ಶೇಣವ, ಸಮಿತಿದ ಒತ್ತು ಗುರ್ಕಾರೆ, ಮ.ನ.ಪಾ ಸದಸ್ಯೆರ್ ಗಣೇಶ್ ಕುಲಾಲ್, ಮನೋಜ್ ಕೋಡಿಕಲ್, ಜಯಲಕ್ಷ್ಮಿ ಶೆಟ್ಟಿ, ಕಟ್ವಾನ ಸಮಿತಿ ಗುರ್ಕಾರೆ ವಿನೋದ್ ಶೆಟ್ಟಿ, ಸಮಿತಿ ಕೋಶಾಧಿಕಾರಿ, ಉರ್ವಸ್ಟೋರ್ ಶ್ರೀ ಶಾರದ ಪೂಜಾ ಸಮಿತಿದ ಗುರ್ಕಾರೆ ಉದಯ್ ಕುಮಾರ್, ಉತ್ತರ ಮಹಾ ಶಕ್ತಿ ಕೇಂದ್ರದ ಒತ್ತು ಗುರ್ಕಾರೆ ಚರಿತ್ ಪೂಜಾರಿ, ಸಮಿತಿ ಕಾರ್ಯದರ್ಶಿ, ಮ.ನ.ಪಾ ಸದಸ್ಯೆರ್ ಕಿರಣ್, ಸಾಯಿಪ್ರಸಾದ್ ಶೆಟ್ಟಿ, ನಿವೃತ್ತ ಶಿಕ್ಷಕೆರ್ ಕೆ.ಎ ರೋಹಿಣಿ, ಸಚಿನ್ ರೈ, ಸಮಿತಿ ಕಾರ್ಯದರ್ಶಿ ಹೇಮಾನಂದ ಕೊಡಿಯಾಲ್ ಬೈಲ್, ಅರುಣ್ ಉರ್ವ, ಸಂಘಟನಾ ಕಾರ್ಯದರ್ಶಿ ಸುಬ್ರಮಣಿ ಎಸ್, ಗುರುಪ್ರಸಾದ್ ರಾವ್ ಬೊಕ್ಕ ಗ್ರಾಮದ ಗುರಿಕಾರೆರ್ ದಿನಕರ ದಡ್ಡಲ್ ಕಾಡ್ ಬೊಕ್ಕ ಊರುದ ಭಕ್ತೆರ್ ಪಾಲ್ ಪಡೆದಿತ್ತೆರ್.

ದೇವೆರೆ ಪಾದೊ ಸೇರಿಯೆರೆ ಗಿರಿಜಾ ತೂಮಿನಾಡು

ಮಂಜೇಶ್ವರ: ಕನ್ನಡ ಬೊಕ್ಕ ತುಳು ಚಿತ್ರರಂಗದ ಪುಗರ್ತೆದ ಪೋಷಕೆರ್ ಬೊಕ್ಕ ಹಾಸ್ಯ ನಟೆ ಪ್ರಕಾಶ್ ಕೆ. ತೂಮಿನಾಡು ಮೆರೆನ ಅಮ್ಮ ಗಿರಿಜಾ ಮೇರ್ ಹುಷಾರ್ ದಾಂತೆ ತೀರ್ ಪೋಯೆರ್.

ಮೆರೆನ ಅಕೇರಿದ ಕ್ರಿಯೆ ಅಂಗಾರೆ ಬೊಲ್ಪುಗು (ಇನಿ) ತೂಮಿನಾಡು ಇಲ್ಲಲ್ ನಡಪರೆ ಉಂಡು ಪಂದ್ ಕುಟುಂಬ ಸದಸ್ಯೆರ್ ತೆರಿಪಾದೆರ್.