ಬೊಂಬೈ: ಮುಲುಂಡ್ ಪೂರ್ವದ ನೀಲಂ ಪೇಂಟೆದ ಸಂಸ್ಕಾರ್ ಕೋ ಆಪ್ ಕ್ರೆಡಿಟ್ ಹೌಸಿಂಗ್ ಸೊಸೈಟಿ ನಿವಾಸಿ, ಬೊಂಬೈ ತೀಯಾ ಸಮಾಜದ ಮಾಜಿ ಗುರ್ಕಾರೆ ಚಂದ್ರಶೇಖರ್ ಆರ್.ಬೆಳ್ಚಡ ಮೆರೆನ ಧರ್ಮಪತ್ನಿ ದಿವೀಜಾ ಸಿ.ಬೆಳ್ಚಡ (65) ಮೇರ್ ತಿಗಲೆ ಬೇನೆಡ್ ತೀರ್ ಪೋತೆರ್.
ಮೇರ್ ಕೆ.ಜಿ ಸೋಮಯ್ಯ ಕಾಲೇಜ್ ವಿದ್ಯಾವಿಹಾರ್ ದ ಮಾಜಿ ಉಪಪ್ರಾಂಶುಪಾಲೆರಾದಿತ್ತೆರ್. ಮೆರೆಗ್ ಕಂಡನಿ, ಒರಿ ಮಗೆ ಸೇರಿನಂಚೆನೆ ಸುಮಾರ್ ಜನ ಬಂಧು ಬಳಗದಕಲು ಉಲ್ಲೆರ್.
ನಿಟ್ಟೆ ಪರಿಗಣಿತ ವಿಶ್ವವಿದ್ಯಾಲಯದ ಅಧೀನ ಸಂಸ್ಥೆ ನಿಟ್ಟೆ ಮಹಾಲಿಂಗ ಅಡ್ಯಂತಾಯ ಸ್ಮಾರಕ ತಾಂತ್ರಿಕ ಮಹಾವಿದ್ಯಾಲಯದ ಗ್ರಂಥಾಲಯ ಬೊಕ್ಕ ಮಾಹಿತಿ ಕೇಂದ್ರದ ಮುತಾಲಿಕೆಡ್ ಗ್ರಂಥಾಲಯ ಸಪ್ತಾಹ-2024 ಲೇಸ್ ಇಂಚಿಪ್ಪ ನಡತ್ಂಡ್.
ಈ ಲೇಸ್ ದ ಉದಿಪನನ್ ಕಾಲೇಜ್ ದ ಪ್ರಾಂಶುಪಾಲೆರ್ ಡಾ. ನಿರಂಜನ್ ಎನ್. ಚಿಪ್ಲೂಣ್ಕರ್ ಮಲ್ತ್ ದ್ ಗ್ರಂಥಾಲಯ ಆಯೋಜನೆ ಮಲ್ತಿನ ಈ ಲೇಸ್ ಡ್ ಕಲ್ಪಾರ್ಥಿಲು ಪಾಲ್ ಪಡೆಯೆರೆ ಪಂಡೆರ್.
ಕಾಲೇಜ್ ದ ಉಪಪ್ರಾಂಶುಪಾಲೆರ್ ಡಾ. ಐ.ಆರ್ ಮಿತ್ತಂತಾಯ ಪಾಲ್ ಪಡೆದ್ ಎಡ್ಡೆಪ್ಪು ಬಯಕಿಯೆರ್. ಗ್ರಂಥಪಾಲಕೆರ್ ಡಾ. ಪ್ರೀತಮ್ ಶೆಟ್ಟಿ ಕೆ.ವಿ ಎದ್ಕೊನಿಯೆರ್. ಗ್ರಂಥಾಲಯ ಸಿಬ್ಬಂದಿಲು ಬೊಕ್ಕ ಗ್ರಂಥಾಲಯ, ಸಾಹಿತ್ಯಿಕ ಘಟಕದ ಕಲ್ಪಾರ್ಥಿಲು ಪಾಲ್ ಪಡೆದಿತ್ತೆರ್.
ಈ ಪೊರ್ತುಡು ಕಲ್ಪಾರ್ಥಿಲೆಗ್ ಪೇಪರ್ ಮಾಡೆಲ್, ಜ್ಞಾನ ಪರೀಕ್ಷೆ, ಸುಡುಕು, ಪೆನ್ಸಿಲ್ ಸ್ಕೆಚ್ ಬೊಕ್ಕ ಪ್ರಬಂಧ ಪಂತೊ ಇಂಚ ಬೇತೆ ಬೇತೆ ಆಕರ್ಷಕ ಪಂತೊನ್ ಆಯೋಜನೆ ಮಲ್ತ್ ದಿತ್ತೆರ್. ಬೇತೆ ಬೇತೆ ವಿಭಾಗಲೆಗ್ ಸಂಬಂಧಪಟ್ಟಿನ ಬೂಕುಲು ಬೊಕ್ಕ ನಿಯತಕಾಲಿಕೆನ್ ಪ್ರದರ್ಶನಗ್ ದೀದಿತ್ತೆರ್. ಗ್ರಂಥಾಲಯ ಬೊಕ್ಕ ಮಾಹಿತಿ ವಿಜ್ಞಾನ ವಿಭಾಗದ ಸಿಬ್ಬಂದಿಲು ಸಹಕಾರ ಕೊರಿಯೆರ್.
ಕಿನ್ನಿಗೋಳಿ : ಕೊಡೆತ್ತೂರು ಶ್ರೀ ಅರಸು ಕುಂಜರಾಯ ದೈವೊಲ್ಯದ ಶಿಲಾಮಯ ಪೊಸತ್ತ್ ಗುಂಡದ (ಮಾಡ) ಮುಟ್ಟಿಮರ (ಮೆಟ್ಟಿಲು ಮರ) ಉಂತಾವುನ ಲೇಸ್ ಫೆ.11 ಐತಾರ ನಡತ್ಂಡ್.
ಈ ಪೊರ್ತುಡು ದೈವೊಲ್ಯಗ್ ಸಂಬಂಧಪಟ್ಟಿನ ಮನೆತನದಕುಲು, ಬೇತೆ ಬೇತೆ ಸಮಿತಿದ ಪದುಕೆರ್, ಗ್ರಾಮಸ್ಥೆರ್ ಪಾಲ್ ಪಡೆದಿತ್ತೆರ್.
ಕಾರ್ಲ: ನಂದಳಿಕೆ ಇಂಚರ ಸೇವಾ ಬಳಗ (ರಿ.) ದಕುಲು ಒಂಜಿ ಬಡಪತ್ತ್ ದ ಕುಟುಂಬಗ್ ಪನವುದ ಸಕಾಯನ್ ಮಲ್ತೆರ್.
ಹೃದಯ ಸಂಬಂಧಿ ಸೀಕ್ ರ್ದ್ ನರಲೊಂದು ಇತ್ತಿನ ಸೂಡ ನಿವಾಸಿ ಆಯಿನ ಕೃಷ್ಣ ಮೇರ್ ಕುಡ್ಲದ ಎ.ಜೆ ಆಸ್ಪತ್ರೆಡ್ ಚಿಕಿತ್ಸೆ ಪಡೆವೊಂದು ಉಲ್ಲೆರ್. ಮೆರೆನ ಚಿಕಿತ್ಸೆದ ಖರ್ಚಿಗ್ ಸಕಾಯ ಮಲ್ಪರೆ ನಂದಳಿಕೆ ಇಂಚರ ಸೇವಾ ಕೂಟಗ್ ಬಿನ್ನಾಪು ಮಲ್ತಿತ್ತೆರ್. ಈ ಬಿನ್ನಾಪುಗ್ ಸ್ಪಂದಿಸಾಯಿನ ಕೂಟದಕುಲು 20,000/- ರೂ. ದ ಚೆಕ್ ನ್ ಸೂಡ ಸುಬ್ರಮಣ್ಯ ದೇವಲ್ಯದ ಅರ್ಚಕೆರ್ ವಿಷ್ಣುಮೂರ್ತಿ ಮೆರೆನ ಮುಕೇನ ಶಕುಂತಳ ಮೆರೆಗ್ ಕೊರಿಯೆರ್.
ಈ ಪೊರ್ತುಡು ಕೂಟದ ಮಾನಾದಿಗೆದ ಗುರ್ಕಾರೆ ಶೈಲೇಶ್ ಕೋಟ್ಯಾನ್ ಸೂಡ, ಗುರ್ಕಾರೆ ದೀಕ್ಷಿತ್ ದೇವಾಡಿಗ ನಂದಳಿಕೆ, ಕೋಶಾಧಿಕಾರಿ ಅನಿಶ್ ಸೂಡ, ಸದ್ಯಸೆರಾಯಿನ ಜಾನ್ ಕಡಾರಿ, ಸೂರಜ್, ರೋಹಿತ್ ಸೂಡ, ಜೋಸೆಫ್ ನಂದಳಿಕೆ, ಬ್ರೈಟ್ ಗ್ರೂಪ್ ಸಂಸ್ಥೆದ ಸದಸ್ಯೆರ್ ಜೇರಿಯಲ್ ಡಿ ಸೋಜಾ, ವಿಜಯಕೃಷ್ಣ, ನಿತಿನ್ ದೇವಾಡಿಗ ಪಾಲ್ ಪಡೆದಿತ್ತೆರ್.
ಮಣಿಪಾಲ: ರೇಡಿಯೋ ಮಣಿಪಾಲ್ ಸಮುದಾಯ ಬಾನುಲಿ ಕೇಂದ್ರಡ್ ಫೆಬ್ರವರಿ ತಿಂಗೊಲ್ದ ರಡ್ಡನೇ ವಾರ ಆಚರಣೆ ಮಲ್ಪುನ ಮದ್ಯವ್ಯಸನಿಲೆನ ಜೋಕ್ಲೆನ ಜಾಗೃತಿ ಸಪ್ತಾಹದ ನಿಲೆಟ್ಟ್ ಒಡಿಪು ದೊಡ್ಡಣಗುಡ್ಡೆದ ಡಾ.ಎ.ವಿ ಬಾಳಿಗ ಸ್ಮಾರಕ ಆಸ್ಪತ್ರೆದ ಒಟ್ಟುಸೇರಿಗೆಡ್ ಫೆಬ್ರವರಿ 11 ರ್ದ್ ಸರಣಿ ಪೊಲಬು ಲೇಸ್ ಪ್ರಸಾರ ಆವೊಂದು ಉಂಡು.
(ಇನಿ) ಫೆ.12 ಸೋಮಾರ ಬಯ್ಯಗ್ 6 ಗಂಟೆಗ್ ಮದ್ಯವ್ಯಸನಿಲೆನ ಜೋಕ್ಲೆನ ವ್ಯಕ್ತಿತ್ವದ ಬಗೆಟ್ಟ್ ಒಡಿಪುದ ಡಾ.ಎ.ವಿ ಬಾಳಿಗ ಸ್ಮಾರಕ ಆಸ್ಪತ್ರೆಡ್ ಮನಶಾಸ್ತ್ರಜ್ಞೆರಾಯಿನ ನಾಗರಾಜ್ ಮೂರ್ತಿ ಮೇರ್ ವಿಶೇಷ ಪೊಲಬು ಕೊರಿಯೆರೆ ಉಲ್ಲೆರ್. ಫೆ.13 ಅಂಗಾರೆ ಮದ್ಯಾಹ್ನ 2 ಗಂಟೆಗ್ ಕುಡೊರ ಪ್ರಸಾರ ಆಪುಂಡು.
ಈ ಲೇಸ್ ನ್ ರೇಡಿಯೊ ಮಾತ್ರ ಅತ್ತಂದೆ ಆಂಡ್ರಾಯ್ಡ್ ಫೋನ್ ಬೊಕ್ಕ ಐಫೋನ್ ಡ್ ರೇಡಿಯೊ ಮಣಿಪಾಲ್ ಆಪ್ ಡೌನ್ಲೋಡ್ ಮಲ್ತ್ ದ್ ಕೇನೊಲಿ ಪಂದ್ ರೇಡಿಯೊ ಮಣಿಪಾಲ್ ಸಮುದಾಯ ಬಾನುಲಿ ಕೇಂದ್ರದ ಪ್ರಕಟಣೆ ತೆರಿಪಾದ್ಂಡ್.
2024 ತ್ತ ವೋಟುಡು NDA ಗೆಂದ್ಂಡ ಮೋದಿ 3 ವರ್ಷ, ಜೈಶಂಕರ್ ಮೆರೆನ್ 2 ವರ್ಷ ಪ್ರಧಾನಿ ಮಲ್ಪೆರೆ RSS ಲೆಕ್ಕಾಚಾರ ಪಾಡ್ದ್ಂಡ್.
ನೆಕ್ಕ್ ಪ್ರಮುಖ ಕಾರಣನೇ ಜೈಶಂಕರ್ ಮೆರೆನ ಕೆಲಸ, 2019 ಟ್ಟ್ ವಿದೇಶಾಂಗ ಸಚಿವೆರಾಯಿನ ಮೇರ್, ಚೀನಾ, ಅಮೆರಿಕ, ಚೆಕ್ ಗಣರಾಜ್ಯಡ್ ಭಾರತದ ರಾಯಭಾರಿಯಾದ್, ಸಿಂಗಾಪೂರಡ್ ಹೈಕಮಿಷನರ್ ಆದಿತ್ತೆರ್. ಮೇರ್ ದೆತೊನ್ನ ನಿರ್ಧಾರನ್ ಮೋದಿಲ ಮೆಚ್ಚ್ ದಿತ್ತೆರ್.
ಪ್ರಧಾನಿ ರೋಜ್ ಗಾರ್ ಮೇಳ ಯೋಜನೆದ ಮುಕೇನ ಪ್ರಧಾನ ಮಂತ್ರಿ ನರೇಂದ್ರ ಮೋದಿ ಇನಿ 1 ಲಕ್ಷ ಜನಕ್ಲೆಗ್ ಉದ್ಯೋಗ ನೇಮಕಾತಿ ಪತ್ರ ಪಟ್ಟಿಯೆರೆ ಉಲ್ಲೆರ್.
ಒಂಜೇ ಪೊರ್ತುಡು 1 ಲಕ್ಷ ಜನಕ್ಕ್ ನೇಮಕ ಪತ್ರ ಪಟ್ಟುನೆ ಉಂದುವೇ ಸುರು. ಸೋಮಾರ ಬೊಲ್ಪುಗು ನಡಪುನ ಲೇಸ್ ಡ್ ಪ್ರಧಾನಮಂತ್ರಿ ಮೋದಿ ವೀಡಿಯೋ ಕಾನ್ಫರೆನ್ಸ್ ಮುಕೇನ ಪಾಲ್ ಪಡೆಯೆರೆ ಉಲ್ಲೆರ್.
47 ಕಡೆಟ್ಟ್ ಈ ಲೇಸ್ ನಡಪರೆ ಉಂಡು. ನೆರ್ದ್ ದುಂಬು 70000 ಜನಕ್ಕ್ ನೇಮಕಾತಿ ಪತ್ರ ಕೊರ್ದಿತ್ತೆರ್. ಆಕ್ಟೋಬರ್ 2022 ತ್ತ ಬೊಕ್ಕ ರೋಜ್ ಗಾರ್ ಮೇಳಡ್ ಒಟ್ಟು 8 ಲಕ್ಷ ನೇಮಕಾತಿ ಪಟ್ಟ್ ದೆರ್. 2024 ತ್ತೊಲಯಿ 10 ಲಕ್ಷ ನೇಮಕ ನಡಪಾವುನ ಉದ್ದೇಶ ಉಂಡು.
ಬೆಳಾಲು: ಆರಿಕೋಡಿ ಶ್ರೀ ಚಾಮುಂಡೇಶ್ವರಿ ದೇವಲ್ಯಡ್ ಆರಿಕೋಡಿ ಉಚ್ಚಯ ಇನಿರ್ದ್ (ಫೆ.12) ಫೆ.15 ಮುಟ್ಟ ನಡಪರೆ ಉಂಡು.
ಈ ಲೇಸ್ ಡ್ ಮಾತೆರ್ಲಾ ಪಾಲ್ ಪಡೆವೊಡು ಪಂದ್ ದೇವಲ್ಯದ ಗುರ್ಕಾರೆರ್ ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.
ಬಂದಾರು: ಬಂದಾರು ಗ್ರಾಮದ ಕುರಾಯ ಶ್ರೀ ಸದಾಶಿವ ದೇವೊಲ್ಯಡ್ ಬೇತೆ ಬೇತೆ ಅಭಿವೃದ್ಧಿ ಕಾರ್ಯಲೆಗ್ ಧಾರ್ಮಿಕ ದತ್ತಿ ಇಲಾಖೆದ 25 ಲಕ್ಷದ ಅನುದಾನ ಒದಗಿಸಾಯಿನ ಬೊಲ್ತೇರ್ ವಿಧಾನಸಭಾ ಕ್ಷೇತ್ರದ ಶಾಸಕೆರ್ ಹರೀಶ್ ಪೂಂಜಾ ಮೇರ್ ಕಾಮಗಾರಿಗ್ ಕೆಸರ್ ಕಲ್ಲ್ ಪಾಡಿಯೆರ್.
ಈ ಪೊರ್ತುಡು ಬಂದಾರು ಗ್ರಾಮ ಪಂಚಾಯತ್ ಗುರ್ಕಾರೆ ದಿನೇಶ್ ಗೌಡ ಖಂಡಿಗ, ಒತ್ತು ಗುರ್ಕಾರ್ದಿ ಪುಷ್ಪಾವತಿ, ದೇವಲ್ಯದ ವ್ಯವಸ್ಥಾಪನ ಸಮಿತಿ ಗುರ್ಕಾರೆ ಬಾಬು ಗೌಡ ಮಡ್ಯಲಕಂಡ, ಪದ್ಮುಂಜ ಸಿ.ಎ ಬ್ಯಾಂಕ್ ದ ಒತ್ತು ಗುರ್ಕಾರೆ ಅಶೋಕ್ ಗೌಡ ಬೊಕ್ಕ ವ್ಯವಸ್ಥಾಪನ ಸಮಿತಿ ಸದಸ್ಯೆರ್, ಪ್ರಮುಖೆರ್ ಪಾಲ್ ಪಡೆದಿತ್ತೆರ್.
ದಕ್ಷಿಣ ಕನ್ನಡ ಕೊರಗರ ಜಿಲ್ಲಾ ಸಂಘದ ಮುತಾಲಿಕೆಡ್ ತುಳುನಾಡ್ ದ ಮೂಲ ನಿವಾಸಿಲಾಯಿನ ಆದಿವಾಸಿ ಕೊರಗ ಸಮುದಾಯದ ಸಾಮೂಹಿಕ ಮದಿಮೆದ ಲೇಸ್ ಫೆ.11 ನಡತ್ಂಡ್. ಈ ಮದಿಮೆದ್ ಲೆಪ್ಪೋಲೆನ್ ಕೊರಗ ಭಾಷೆಡ್ ಅಚ್ಚಿ ಮಲ್ಪಾದ್ ತುಳುನಾಡ್ ದ ಪಿರಾಕ್ ದ ಬಾಷೆನ್ ಒರಿಪಾವುನ ಪ್ರಯತ್ನನ್ ಸಂಘಟಕೆರ್ ಮಲ್ದಿನವು ವಿಶೇಷ.
ಸುರತ್ಕಲ್ ಕುತ್ತೆತ್ತೂರುದ ಆದಿವಾಸಿ ಸಮುದಾಯ ಭವನಡ್ ಐತಾರ (ಫೆ.11) ಬೊಲ್ಪುಗು 11.15ಕ್ಕ್ ಒಟ್ಟು ಆಜಿ ಜೋಡಿ ಮದಿಮೆ ನಡತ್ಂಡ್.
ಕೊರಗ ಸಮುದಾಯ ತುಳುನಾಡ್ ದ ಮೂಲ ನಿವಾಸಿ ಸಮುದಾಯ ಆದ್ ತನ್ನನೇ ಆಯಿನ ಭಾಷೆನ್ ಒರಿತೊಂದು ಬೈದ್ಂಡ್. ಈ ಸಾಮೂಹಿಕ ಮದಿಮೆದ ಲೇಸ್ ದ ಲೆಪ್ಪೋಲೆನ್ ಕನ್ನಡ ಬೊಕ್ಕ ಕೊರಗ ಭಾಷೆಡ್ ಅಚ್ಚಿ ಮಲ್ದೆರ್.
ಕೊರಗ ಸಮುದಾಯದ ಸಂಪ್ರದಾಯದಂಚೆನೆ ಸಮುದಾಯದ ಗುರಿಕಾರೆರೆನ ಮುತಾಲಿಕೆಡ್ ಪೋಷಕೆರ್ ಮದಿಮೆಯೆ ಮಾದಿಮಾಲೆಗ್ ಧಾರೆ ಮೈತೆರ್.
ಮದುಮೆದ ಮಾತ ಸಂಪ್ರದಾಯ, ಆಚರಣೆನ್ ಸಮುದಾಯದ ಜನಕ್ಲೆ ಮಲ್ಪುನವು ಸಮುದಾಯದ ವಿಶೇಷತೆ ಆತ್ಂಡ್. ಮದಿಮೆ ಲೇಸ್ ಮಾಂಸಹಾರಿ ಬೊಕ್ಕ ಸಸ್ಯಹಾರಿ ವನಸ್ ದ ವ್ಯವಸ್ಥೆ ಇತ್ತ್ಂಡ್.
ಜಿಲ್ಲಾ ಕೊರಗ ಸಂಘದ ಮುತಾಲಿಕೆಡ್ ಆಯೋಜನೆ ಮಲ್ತಿನ 5ನೇ ವರ್ಷದ ಸಾಮೂಹಿಕ ವಿವಾಹ ಲೇಸ್ ಉಂದಾತ್ಂಡ್. ಮದಿಮೆ ಲೇಸ್ ಡ್ ಸುಮಾರ್ ರಡ್ಡ್ ಸಾರ ಜನ ಪಾಲ್ ಪಡೆಪ್ಪೆರ್ ಪಂದ್ ದಕ್ಷಿಣ ಕನ್ನಡ ಕೊರಗರ ಜಿಲ್ಲಾ ಸಂಘದ ಗುರ್ಕಾರೆ ಸುಂದರ ಬೆಳುವಾಯಿ ಮೇರ್ ತೆರಿಪಾದಿತ್ತೆರ್.
