ಸುಬ್ರಹ್ಮಣ್ಯ: ಇತ್ತೆದ ಕಾಲಡ್ ಕಂಪ್ಯೂಟರ್ ದ ಜ್ಞಾನ ಅಗತ್ಯ. ಕಂಪ್ಯೂಟರ್ ಲು ಶಾಲೆ ಕಾಲೇಜ್ ಗ್ ಅತ್ಯವಶ್ಯಕ, ಅವ್ವೇ ರೀತಿ ವಿದ್ಯಾಸಂಸ್ಥೆಲೆಡ್ ವ್ಯವಸ್ಥಿತವಾಯಿನ ಪ್ರಯೋಗ ಶಾಲೆ ಇಪ್ಪುನವು ಅತ್ಯವಶ್ಯಕ, ಉತ್ಕೃಷ್ಠ ಮಟ್ಟದ ಸುಸಜ್ಜಿತ ಪ್ರಯೋಗ ಶಾಲೆಲು ಕಂಪ್ಯೂಟರ್ ದ ಜ್ಞಾನಾರ್ಜನೆಗ್ ಅಡಿಪಾಯ ಆತ್ಂಡ್. ಎಸ್ಎಸ್ಪಿಯು ಕಾಲೇಜ್ ಡ್ ಜಿಲ್ಲೆಡೇ ಪುದರ್ ಪಡೆಯಿನ ಶ್ರೇಷ್ಠ ಮಟ್ಟದ ಕಂಪ್ಯೂಟರ್ ಬೊಕ್ಕ ವಿಜ್ಞಾನ ಪ್ರಯೋಗ ಶಾಲೆ ಉಂಡು ಪನ್ಪುನವು ಗ್ರಾಮೀಣ ಭಾಗದ ಪೆರ್ಮೆ ಪಂದ್ ಕುಕ್ಕೆ ಶ್ರೀ ಸುಬ್ರಹ್ಮಣ್ಯ ದೇವಲ್ಯದ ಕಾರ್ಯನಿರ್ವಹಣಾಧಿಕಾರಿ, ಎಸ್ಎಸ್ಪಿಯು ಕಾಲೇಜ್ ದ ಕಾರ್ಯದರ್ಶಿ ಡಾ.ನಿಂಗಯ್ಯ ಪಂಡೆರ್.
ಮೇರ್ ಕುಕ್ಕೆ ಶ್ರೀ ಸುಬ್ರಹ್ಮಣ್ಯ ದೇವಲ್ಯದ ಆಡಳಿತ ಎಸ್ಎಸ್ಪಿಯು ಕಾಲೇಜ್ ಗ್ ಡಾ.ಚಂದನ್ ಬೆಂಗ್ಲೂರು ಮೇರ್ ಕೊರ್ನ 10 ಕಂಪ್ಯೂಟರ್ ನ್ ದೆತೊಂದು ಪಾತೆರಿಯೆರ್.
ಶ್ರೀ ದೇವಲ್ಯರ್ದ್ ತಿಕಿನ ಕಂಪ್ಯೂಟರ್ ದೊಟ್ಟಿಗೆ ಇತ್ತೆ ದಾನಿಲು ಕೊರ್ನ ಪೊಸ ಕಂಪ್ಯೂಟರ್ ಲು ಪ್ರಯೋಗ ಶಾಲೆಡ್ ಉಂಡು. ನೆತ್ತ ಉಪಯೋಗನ್ ಕಲ್ಪಾರ್ಥಿಲು ಪಡೆವೊನೊಡು. ಕಾಲೇಜ್ ಡ್ ಇತ್ತೆ 1000 ರ್ದ್ ಎಚ್ಚ ಕಲ್ಪಾರ್ಥಿಲು ಕಲ್ತೊಂದು ಉಲ್ಲೆರ್. ಗಣಕ ವಿಜ್ಞಾನ ವಿಭಾಗಲ ಉಂಡು. ಅತ್ತಂದೆ ಕಲೆ ಬೊಕ್ಕ ವಾಣಿಜ್ಯ ವಿಭಾಗಗ್ ಕಂಪ್ಯೂಟರ್ ತರಬೇತಿ ನಡತೊಂದು ಉಂಡು. ಈ ಪೊರ್ತುಡು ಪೊಸ ಕಂಪ್ಯೂಟರ್ ಲು ಕಲ್ಪಾರ್ಥಿಲೆಗ್ ಎಚ್ಚದ ಅನುಕೂಲತೆ ಕೊರ್ಪುಂಡು ಪಂದ್ ಪಂಡೆರ್.
ಈ ಪೊರ್ತುಡು ದೇವಲ್ಯದ ವ್ಯವಸ್ಥಾಪನಾ ಸಮಿತಿ ಸದಸ್ಯೆರ್, ದಾನಿ ಡಾ.ಚಂದನ್ ಬೆಂಗ್ಲೂರು, ಆರೆನ ದೋಸ್ತಿ ಶ್ರೀವತ್ಸ ಬೆಂಗ್ಲೂರು, ಕಾಲೇಜ್ ದ ಪ್ರಾಚಾರ್ಯೆರ್ ಸೋಮಶೇಖರ ನಾಯಕ್, ಕೆಎಸ್ಎಸ್ ಕಾಲೇಜ್ ದ ಪ್ರಾಂಶುಪಾಲೆರ್ ಡಾ. ದಿನೇಶ್ ಪಿ.ಟಿ, ಗ್ರಂಥಪಾಲಕೆರ್ ಜಯಪ್ರಕಾಶ್ ಆರ್.ವಿ, ಕುಕ್ಕೆ ದೇವಲ್ಯದ ಶಿವ ಸುಬ್ರಹ್ಮಣ್ಯ ಭಟ್, ನಂದೀಶ್ ಕಟ್ರಮನೆ, ಪ್ರವೀಣ್ ಸುಬ್ರಹ್ಮಣ್ಯ, ಪ್ರಶಾಂತ್, ಎಸ್ಎಸ್ಪಿಯು ಕಾಲೇಜ್ ದ ಉಪನ್ಯಾಸಕೆರ್, ಶಿಕ್ಷಕೆರ್, ಸಿಬ್ಬಂದಿ ವರ್ಗದಕುಲು ಪಾಲ್ ಪಡೆದಿತ್ತೆರ್.
ಡಾ.ಚಂದನ್ ಬೆಂಗ್ಲೂರು ಮೇರ್ ಕುಕ್ಕೆ ದೇವಲ್ಯದ ಆಡಳಿತದ ಕೆ.ಎಸ್.ಎಸ್ ಕಾಲೇಜ್ ಗ್ 10 ಕಂಪ್ಯೂಟರ್ ಕೊರಿಯೆರ್. ಈ ಮುಕೇನ ಒಟ್ಟು 20 ಕಂಪ್ಯೂಟರ್ ನ್ ಶ್ರೀ ದೇವಲ್ಯದ ವಿದ್ಯಾಸಂಸ್ಥೆಗ್ ಕೊರ್ಲೆಕ್ಕ ಆಂಡ್.
pallavi shetty