ಬಂಟ್ವಾಳ: ಬಂಟ್ವಾಳ ವಲಯ ಅರಣ್ಯಾಧಿಕಾರಿಯಾದ್ ಪ್ರಪುಲ್ ರೈ ಅಧಿಕಾರ ಸ್ವೀಕಾರ ಮಲ್ತ್ದೆರ್. ಶನಿವಾರ ಸಂತೆದ ವಲಯ ಅರಣ್ಯಾಧಿಕಾರಿಯಾದಿತ್ತಿನ ಪ್ರಪುಲ್ ಅ.5 ದಾನಿ ಗುರುವಾರ ಬಯ್ಯಗ್ ಬಂಟ್ವಾಳಡ್ ಕರ್ತವ್ಯಗ್ ಹಾಜರಾತೆರ್. ಬಂಟ್ವಾಳ ವಲಯ ಅರಣ್ಯಾಧಿಕಾರಿಯಾದಿತ್ತಿನ ರಾಜೇಶ್ ಬಳಿಗಾರ್ ಕುಡ್ಲಗ್ ವರ್ಗಾವಣೆ ಆಯಿನ ಹಿನ್ನೆಲೆಡ್ ಪ್ರಪುಲ್ ರೈನ್ ಬಂಟ್ವಾಳಗ್ ವರ್ಗಾವಣೆ ಮಲ್ತ್ ಆದೇಶ ಕೊರ್ದಿತ್ತೆರ್.
ಏಷ್ಯನ್ ಗೇಮ್ಸ್ ಡ್ ಭಾರತದ ಆನ್ ಲೆನ ಹಾಕಿ ಕೂಟ ಜಪಾನ್ ಕೂಟನ್ ಸೋಪಾದ್ ಬಂಗಾರ್ ದ ಪದಕ ಗೆಂದ್ ದ್ಂಡ್.
ನೆತ್ತ ಬೆರಿಕ್ಕೆ ಹಾಕಿ ಇಂಡಿಯಾ ಸಂಸ್ಥೆ ಪ್ರತಿ ಆಟಗಾರೆರೆಗ್ಲಾ 5 ಲಕ್ಷ ರೂ. ನಗದ್ ಇನಾಮುನ್ ಘೋಷಣೆ ಮಲ್ದ್ಂಡ್. ಹಾಕಿ ಕೂಟದ ಪ್ರತಿ ಸಹಾಯಕ ಸಿಬ್ಬಂದಿಗ್ 2.5 ರೂ. ಕೊರ್ತುಂಡು. ಈ ಗೆಲ್ಮೆದೊಟ್ಟಿಗೆ ಭಾರತೀಯ ಆನ್ ಲೆನ ಹಾಕಿ ಕೂಟ 2024 ತ್ತ ಪ್ಯಾರಿಸ್ ಒಲಿಂಪಿಕ್ಸ್ ಗ್ ಅರ್ಹತೆ ಪಡೆತ್ಂಡ್.
ಕಬಡ್ಡಿಡ್ ಭಾರತದ ಪೊಂಜೋವ್ ಲೆನ ಕೂಟ ಬಂಗಾರ್ ದ ಪದಕನ್ ಗೆಂದ್ ದ್ಂಡ್.
ಭಾರತಗ್ ಉಂದು 100 ನೇ ಪದಕ ಆತ್ಂಡ್. ಸುರುತ್ತ 20 ನಿಮಿಷಡ್ ಭಾರತ ಲೀಡ್ ಡ್ ಇತ್ಂಡ್. ಭಾರತದ ರೈಡರ್ ಪೂಜಾ ಹತ್ವಾಲಾ ಒಂಜೇ ರೈಡ್ ಡ್ 4 ಅಂಕ ಪಡೆತೆರ್. ರಡ್ಡನೇದಾದ್ ಜೈನೀಸ್ ತೈಪೆ ಅಮೋಘ ಪ್ರದರ್ಶನ ಕೊರ್ತುಂಡು. 39ನೇ ನಿಮಿಷಡ್ ರಡ್ಡ್ ಕೂಟಲು 24-24 ಸಮಬಲ ಸಾಧಿಸಾಂಡ್. ಅಕೇರಿದ ನಿಮಿಷಡ್ ಭಾರತ 26-25 ರ್ದ್ ಬಂಗಾರ್ ದ ಪದಕ ಗೆಂದ್ ದ್ಂಡ್.
ಮಾಜಿ ಪ್ರಧಾನಿ ಹೆಚ್.ಡಿ. ದೇವೇ ಗೌಡ ಅ.8 ದಾನಿ ಸುಬ್ರಹ್ಮಣ್ಯ ದೇವಸ್ಥಾನಕ್ಕೆ ಭೇಟಿ ಕೊರಿಯೆರೆ ಉಲ್ಲೆರ್. ಎಲ್ಲೆ ಬಯ್ಯಗ್ ಕುಕ್ಕೆ ಸುಬ್ರಹ್ಮಣ್ಯಡ್ ಪೂಜೆ ಸಲ್ಲಿಸಾದ್, ಸುಬ್ರಹ್ಮಣ್ಯಡ್ ವಾಸ್ತವ್ಯ ಉಲ್ಲೆರ್ ಅ. 9 ದಾನಿ ಕಾಂಡೆ ಸುಬ್ರಹ್ಮಣ್ಯ ದೇವಸ್ಥಾನಡ್ ಪೂಜೆ ಸಲ್ಲಿಸಾದ್ ಬೊಕ್ಕ ತನ್ನ ಊರುಗು ಪೋವೆರೆ ಉಲ್ಲೆರ್ ಪಂದ್ ತೆರಿದ್ ಬೈದುಂಡ್.
ಒಟ್ಟಾವಾ: ಕೆನಡಾದ ಬ್ರಿಟಿಷ್ ಕೊಲಂಬಿಯಾ ಪ್ರಾಂತ್ಯಡ್ ವಿಮಾನ ಅಪಘಾತಡ್ ರಡ್ಡ್ ಭಾರತೀಯೆರ್ ಸೇರ್ದ್ ಮೂಜಿ ಜನ ತೀರ್ಪೋಯಿನ ಘಟನೆ ವರದಿ ಆತ್ಂಡ್.
ಡಬಲ್ಎಂಜಿನ್ದ ಲಘು ಪೈಪರ್ ಪಿಎ-34 ಸೆನೆಕಾ ವಿಮಾನ ಮೋಟೆಲ್ ಕೈತಲ್ ಮರಕ್ಕ್ ಬೊಕ್ಕ ಬಲ್ಲೆಗ್ ಬೂರ್ದುಂಡು ಪಂದ್ ವರದಿ ಆತ್ಂಡ್. ನನ ವ್ಯಾಂಕೋವರ್ರ್ದ್ ಪೂರ್ವಗ್ 100 ಕಿಲೋಮೀಟರ್ ದೂರಡ್ ಇಪ್ಪುನ ಚಿಲ್ಲಿವಾಕ್ದ ವಿಮಾನ ನಿಲ್ದಾಣದ ಕೈತಲ್ ಈ ಘಟನೆ ನಡತ್ಂಡ್. ಪೈಲೆಟ್ ಬೊಕ್ಕ ರಡ್ಡ್ ಜನ ಪ್ರಯಾಣಿಕೆರ್ ತೀರ್ಪೋತೆರ್.
ಪುತ್ತೂರು ಶ್ರೀ ಶಾರದಾ ಭಜನಾ ಮಂದಿರಡ್ 89ನೇ ವರ್ಷದ ನವರಾತ್ರಿ ಉತ್ಸವ ಅ.15 ರಿಂದ 24 ಮುಟ್ಟ ಬೇತೆ ಬೇತೆ ಧಾರ್ಮಿಕ ಕಾರ್ಯಕ್ರಮ ಬೊಕ್ಕ ಸಾಂಸ್ಕೃತಿಕ ಕಾರ್ಯಕ್ರಮದೊಟ್ಟಿಗೆ ನಡಪೆರೆ ಉಂಡು. ಅ.15 ದಾನಿ ನವರಾತ್ರಿ ಪೂಜೆ ಶುರು ಆದ್, ಅ.20 ದಾನಿ ಶ್ರೀ ಶಾರದಾ ದೇವಿನ ಪ್ರತಿಷ್ಠೆ, ಅ.24 ದಾನಿ ಶ್ರೀ ಶಾರದಾ ಮೂರ್ತಿನ ವಿಸರ್ಜನೆ ನಡಪೆರೆ ಉಂಡು.
ಅ.24 ದಾನಿ ಶ್ರೀ ಶಾರದಾ ದೇವಿಯ ಭವ್ಯ ಶೋಭಾಯಾತ್ರೆ ನಡಪೆರೆ ಉಂಡು. ಕಾರ್ಯಕ್ರಮನ್ ಸಂಸದೆರ್ ನಳಿನ್ ಕುಮಾರ್ ಕಟೀಲ್ ಉದಿಪನ ಮಲ್ಪೆರೆ ಉಲ್ಲೆರ್. ಶೋಭಾಯಾತ್ರೆದ ಸಂಚಾಲಕೆರಾಯಿನ ಸೀತಾರಾಮ ರೈ ಕೆದಂಬಾಡಿಗುತ್ತು ನೇತೃತ್ವಡ್ ಬೊಳ್ವಾರು ಸರ್ಕಲ್ರ್ದ್ ವೇದಘೋಷ, ಚೆಂಡೆಮೇಳ, ವಾದ್ಯವೃಂದ, ಕುಣಿತ ಭಜನೆದೊಟ್ಟಿಗೆ ಶ್ರೀ ದೇವಿನ ಭವ್ಯ ಶೋಭಾಯಾತ್ರೆ ನಡಪೆರೆ ಉಂಡು. ಮೆರವಣಿಗೆಡ್ ಪಾಲ್ಪಡೆನ ಸ್ತಬ್ದ ಚಿತ್ರಗ್ ಬಹುಮಾನ ಈ ಸರ್ತಿ ಶ್ರೀ ಶಾರದಾ ದೇವಿಯ ಭವ್ಯ ಶೋಭಾಯಾತ್ರೆಡ್ ಶಿಸ್ತುಬದ್ಧವಾದ್ ಪ್ರದರ್ಶನ ಮಲ್ಪುನ ಸ್ತಬ್ದ ಚಿತ್ರಗ್ (ಟ್ಯಾಬ್ಲೋ) ಬಹುಮಾನ ಉಂಡು. ಸುರುತ ಇನಾಮು 1 ಲಕ್ಷ ರೂ. ರಡ್ಡನೇ ಇನಾಮು 50 ಸಾವಿರ ರೂ. ಜಿಲ್ಲೆದ ಬೇತೆ ಬೇತೆ ಭಾಗರ್ದ್ ಪಾಲ್ ಪಡೆಯುನ ತಂಡಲೆಗ ಮುಕ್ತ ಅವಕಾಶ ಉಂಡು ಪಂದ್ ಶೋಭಾಯಾತ್ರೆ ಸಂಚಾಲಕೆರ್ ಸೀತಾರಾಮ ರೈ ಕೆದಂಬಾಡಿಗುತ್ತು ತೆರಿಪಾದೆರ್.
ಪುತ್ತೂರು : ಬೆಳಗಾವಿದ ವಿಶ್ವೇಶ್ವರಯ್ಯ ತಾಂತ್ರಿಕ ವಿಶ್ವವಿದ್ಯಾನಿಲಯದ ಸ್ನಾತಕೋತ್ತರ ಎಂ.ಸಿ.ಎ ವಿಭಾಗದ ಕಲಾರ್ಥಿಲೆನ ಫಲಿತಾಂಶ ಪ್ರಕಟ ಆದ್, ಪುತ್ತೂರುದ ವಿವೇಕಾನಂದ ಕಾಲೇಜ್ ಆಫ್ ಇಂಜಿನಿಯರಿಂಗ್ ಎಂಡ್ ಟೆಕ್ನಾಲಜಿಯ ಎಂ.ಸಿ.ಎ ವಿಭಾಗದ ಕಲ್ಪಾರ್ಥಿಲು 100% ಫಲಿತಾಂಶದೊಟ್ಟಿಗೆ ಎಡ್ಡೆ ಸಾಧನೆ ಮಲ್ತ್ದೆರ್.
ಕರಿನ ಸೆಪ್ಟೆಂಬರ್ ತಿಂಗೊಲುಡು ನಡತ್ತಿನ ಪರೀಕ್ಷೆಡ್ ಕಾಲೇಜ್ರ್ದ್ ಒಟ್ಟು 51 ಕಲ್ಪಾರ್ಥಿಲು ಹಾಜರಾದ್ 48 ಕಲ್ಪಾರ್ಥಿಲು ವಿಶಿಷ್ಟ ಶ್ರೇಣಿಡ್ ಬೊಕ್ಕ 3 ಕಲ್ಪಾರ್ಥಿಲು ಸುರುತ ಶ್ರೇಣಿಡ್ ತೇರ್ಗಡೆ ಆತೆರ್. ಅರ್ಹ ಕಲ್ಪಾರ್ಥಿಲು ಕ್ಯಾಂಪಸ್ ಸೆಲೆಕ್ಷನ್ದ ಮುಖೇನ ಬೇತೆ ಬೇತೆ ಕಂಪೆನಿಲೆಗ್ ಆಯ್ಕೆಯಾತೆರ್.
ಕುಡ್ಲ ನಕಲಿ ದಾಖಲಾತಿ ಪತ್ರ ಮಲ್ತ್ ಕೊರೊಂದು ಸಾರ್ವಜನಿಕರಿಗೆ ಬೊಕ್ಕ ಸರಕಾರಗ್ ವಂಚನೆ ಮಲ್ತೊಂದು ಇತ್ತಿನ ಘಟನೆ ವರದಿ ಆತ್ಂಡ್.
ಪೇಂಟೆದ ಕಂಕನಾಡಿ–ಪಂಪ್ ವೆಲ್ ಪರ ರೋಡ್ದ ವಿಶ್ವಾಸ್ ಕ್ರೌನ್ ಅಪಾರ್ಟ್ ಮೆಂಟ್ದ ತೀರ್ತ ಮಾಳಿಗೆಡ್ “ಹೆಲ್ಪ್ ಲೈನ್ ಕುಡ್ಲ” ಪನ್ಪುನ ಪುದರ್ದ ಸಂಸ್ಥೆನ್ ದಿಯೊಂದು ಆಧಾರ್ ಕಾರ್ಡ್, ಪಡಿತರ ಚೀಟಿ(ರೇಶನ್ ಕಾರ್ಡ್) ,ಅಂಕ ಪ್ರಮಾಣ ಪತ್ರ, ಜನನ ಪ್ರಮಾಣ ಪತ್ರ ನಕಲಿ ದಾಖಲೆ ಪತ್ರಲೆನ್ ಸೃಷ್ಟಿ ಮಲ್ತ್ ಉಂದೆನ ಗಲಸಾವೊಂದು ಬೇತೆ ದಾಖಲಾತಿನ್ ಮಲ್ತ್ ಕೊರ್ದು ಸಾರ್ವಜನಿಕರಿಗೆ ಬೊಕ್ಕ ಸರಕಾರಗ್ ವಂಚನೆ ಮಲ್ತೊಂದು ಇತ್ತಿನ ಬಗೆಟ್ ಬರ್ನಾಡ್ ರೋಶನ್ ಮೆಸ್ಕರೆನಸ್(41) ಸಿಸಿಬಿ ಪೊಲೀಸೆರ್ ಅರೆಸ್ಟ್ ಮಲ್ತ್ದೆರ್.
ಆರೋಪಿರ್ದ್ ನಕಲಿ ಪ್ರಮಾಣ ಪತ್ರ ತಯಾರ್ ಮಲ್ಪೆರೆ ಗಲಸೊಂದು ಇತ್ತಿನ ಲ್ಯಾಪ್ ಟಾಪ್, ಕಲರ್ ಪ್ರಿಂಟರ್, ಲ್ಯಾಮಿನೇಟರ್ ಮೆಶಿನ್, ಬಯೋ ಮೆಟ್ರಿಕ್ ಡಿವೈಸ್ ನ್ ವಶಕ್ಕ್ ಪಡೆಯೊಂದೆರ್. ಈ ಬಗ್ಗೆ ಸೆನ್ ಕ್ರೈಂ ಪೊಲೀಸ್ ಠಾಣೆಡ್ ಕೇಸ್ ದಾಖಲಾತ್ಂಡ್. ಈ ನಕಲಿ ದಾಖಲೆ ಪತ್ರ ತಯಾರ್ ಮಲ್ಪುನ ಜಾಲಡ್ ನನಲ ಮಸ್ತ್ ಜನ ಇತ್ತ್ದ್, ಅಕ್ಲೆನ ಪತ್ತೆ ಕಾರ್ಯ ನಡತೊಂದು ಉಂಡು.
ವೇಣೂರು: ಭಗವಾನ್ ಶ್ರೀ ಬಾಹುಬಲಿ ಸ್ವಾಮಿ ಮಹಾ ಮಸ್ತಕಾಭಿಷೇಕ ನಿಮಿತ್ತ ಅಟ್ಟಳಿಗೆದ ಸ್ತಂಬ ನ್ಯಾಸ ಕಾರ್ಯಕ್ರಮ ಡಾ| ಡಿ. ವೀರೇಂದ್ರ ಹೆಗ್ಗಡೆ ಮೇರ್ನ ಗುರ್ಕಾರ್ಮೆಡ್ ಅ.16 ದಾನಿ ಶ್ರೀ ಬಾಹುಬಲಿ ಸಭಾಭವನಡ್ ನಡಪರೆ ಉಂಡು.
ದ.ಕ ಜಿಲ್ಲಾ ಕೇಂದ್ರ ಸಹಕಾರಿ ಬ್ಯಾಂಕ್ದ ಗುರ್ಕಾರ್ಲು ಸಹಕಾರ ರತ್ನ ಡಾ| ಎಂ.ಎನ್ ರಾಜೇಂದ್ರ ಕುಮಾರ್ ಸ್ತಂಭ ನ್ಯಾಸ ಮಲ್ಪೆರೆ ಉಲ್ಲೆರ್. ಯೋಜನೆ ಬೊಕ್ಕ ಅಂಕಿ ಅಂಶ ಇಲಾಖೆದ ಸಚಿವೆರ್ ಡಿ.ಸುಧಾಕರ್ ಗುರ್ಕಾರ್ಮೆನ್ ವಹಿಸೆರೆ ಉಲ್ಲೆರ್. ಮಹಾಮಸ್ತಕಾಭಿಷೇಕದ ಕಾರ್ಯಾಧ್ಯಕ್ಷೆರ್ ಅರುವ ಅರಮನೆತ ತಿಮ್ಮಣ್ಣರಸೆರ್ ಡಾ| ಪದ್ಮಪ್ರಸಾದ್ ಅಜಿಲೆರ್ ಗೌರವ ಉಪಸ್ಥಿತಿನ್ ವಹಿಸೊನಿಯೆರೆ ಉಲ್ಲೆರ್. ಮಲ್ಲ ಬಿನ್ನೆರಾದ್ ಸಂಸದೆರ್ ನಳಿನ್ ಕುಮಾರ್ ಕಟೀಲು, ಬೋಲ್ತೆರ್ ಶಾಸಕೆರ್ ಹರೀಶ್ ಪೂಂಜ, ವಿಧಾನ ಪರಿಷತ್ ಶಾಸಕೆರಾಯಿನ ಕೆ.ಪ್ರತಾಪ ಸಿಂಹ ನಾಯಕ್, ಎಲ್.ಎಸ್ ಭೋಜೇ ಗೌಡ, ಡಾ| ಮಂಜುನಾಥ ಭಂಡಾರಿ, ಮಾಜಿ ಸಚಿವೆರ್ ಅಭಯಚಂದ್ರ ಜೈನ್ ಪಾಲ್ ಪಡೆಯೆರೆ ಉಲ್ಲೆರ್.
ಪುತ್ತೂರು : ಹೋಟೇಲ್ ಒಂಜೆಟ್ಟ್ ತೂ ಪೊತ್ತಿನ ಘಟನೆ ಪಡೀಲ್ ಕೈತಲ್ ನಡತ್ಂಡ್. ಪಡೀಲ್ದ ಹೋಟೆಲ್ಡ್ ಗ್ಯಾಸ್ ಸಿಲಿಂಡರ್ಗ್ ತೂ ಪತ್ತಿನ ಪರಿಣಾಮಡ್ ಈ ಅವಘಡ ಆತ್ಂಡ್. ಘಟನೆ ನಡತ್ತಿನ ಜಾಗೆಗ್ ಅಗ್ನಿಶಾಮಕದಕುಲ್ ಬತ್ತ್ದ್ ತೂ ತೆಕ್ಕಾದೆರ್ ಪಂದ್ ತೆರಿದ್ ಬೈದುಂಡ್.
