ಅಮೆರಿಕ: : 104 ನೇ ಪ್ರಾಯಡ್ 13,500 ಮೀಟರ್ ಎತ್ತರರ್ದ್ ಸ್ಕೈಡೈವ್ ಮಲ್ತ್ದ್ ಗಿನ್ನೀಸ್ ವಿಶ್ವ ದಾಖಲೆ ಬರೆದ್ ಗಮನ ಸೆಳೆದಿತ್ತಿನ ಅಮೆರಿಕದ ಚಿಕಾಗೊ ಪೊಂಜೊವ್ ಡೊರೊಥಿ ಹಾಫ್ನರ್ ತೀರ್ಪೋತೆರ್. ಈ ಬಗ್ಗೆ ಸುದ್ದಿಸಂಸ್ಥೆ ರಾಯಿಟರ್ಸ್ X ಚಾವಡಿಡ್ ಮಾಹಿತಿನ್ ಪಟ್ಟೊಂದೆರ್. ಅಮೆರಿಕದ ಚಿಕಾಗೋದ ಡೊರೊಥಿ ಹಾಫ್ನರ್(104) ಚಿಕಾಗೊಡ್ ವಯೋಸಹಜವಾದ್ ಜೆತ್ತಿನಲ್ಲೆ ತೀರ್ಪೋಯೆರ್ ಪಂದ್ ತೆರಿದ್ ಬೈದ್ಂಡ್.
ಕುಡ್ಲ: ಜಾಗತಿಕ ಬಂಟರ ಸಂಘಲೆನ ಒಕ್ಕೂಟದ ಗುರ್ಕಾರೆ ಐಕಳ ಹರೀಶ್ ಶೆಟ್ಟಿ ಮೆರೆನ ಮುತಾಲಿಕೆಡ್ ಅ.28 ಬೊಕ್ಕ 29 ಕ್ಕ್ ಒಡಿಪುಡ್ ನಡಪರೆ ಇಪ್ಪುನ ವಿಶ್ವ ಬಂಟರ ಸಮ್ಮೇಳನ-2023 ದ ಲೆಪ್ಪೋಲೆ ಬುಡುಗಡೆ ಲೇಸ್ ಬುಧಾರ ಬಯ್ಯಗ್ ಪೇಂಟೆದ ಗೋಲ್ಡ್ ಫಿಂಚ್ ಹೋಟೆಲ್ ಡ್ ನಡತ್ಂಡ್.
ಈ ಲೇಸ್ ನ್ ಬತ್ತಿ ಬಿನ್ನೆರ್ ತುಡರ್ ಅರ್ಲಾದ್ ಉದಿಪನ ಮಲ್ತೆರ್.
ಸಂಸದೆರ್, ಬಿಜೆಪಿ ರಾಜ್ಯಾಧ್ಯಕ್ಷೆರ್ ನಳಿನ್ ಕುಮಾರ್ ಕಟೀಲ್ ಪಾತೆರ್ದ್, ಐಕಳ ಹರೀಶ್ ಶೆಟ್ಟಿ ಮೇರ್ ಬಂಟ ಸಮಾಜದ ಅತ್ಯದ್ಭುತ ನಾಯಕೆ. ಅರೆನ ಸಂಘಟನಾ ಶಕ್ತಿ ಬೇತೆಕ್ಲೆಗ್ ಮಾದರಿ. ಇನಿ ವಿಶ್ವ ಬಂಟರ ಸಮ್ಮೇಳನದ ಲೆಪ್ಪೋಲೆನ್ ಬುಡುಗಡೆ ಮಲ್ದ. ಉಂದು ಬಂಟ ಸಮಾಜದ ಇಲ್ಲ ಇಲ್ಲಗ್ ಎತ್ತೊಡು. ಆ ಮುಖೇನ ಒಂಜೇ ಚಾವಡಿಡ್ ಸಮಾಜದ ಮಾತೆರ್ಲಾ ಪಾಲ್ ಪಡೆಪುಲೆಕ್ಕ ಅವಡ್, ಸಮ್ಮೇಳನರ್ದ್ ಸಮಾಜಗ್ ಪ್ರಯೋಜನ ಅವಡ್ ಪಂದ್ ಎಡ್ಡೆಪ್ಪು ಬಯಕಿಯೆರ್.
ಬಂಟರ ಯಾನೆ ನಾಡವರ ಮಾತೃಸಂಘದ ಗುರ್ಕಾರೆ ಅಜಿತ್ ಕುಮಾರ್ ರೈ ಮಾಲಾಡಿ ಪಾತೆರ್ದ್, ಲೇಸ್ ಖಂಡಿತಾ ಯಶಸ್ವಿ ಆಪುಂಡು. ಆಂಡ ಮಲ್ಲ ಸಂಖ್ಯೆಡ್ ನಮ್ಮ ಸಮುದಾಯದ ಜನಕ್ಲೆನ್ ಸೇರಿಸಾವುನ ಮುಖೇನ ನಮ್ಮ ಶಕ್ತಿನ್ ಈ ಮುಖೇನ ತೂಪಾವೊಡು ಪಂದ್ ಪಂಡೆರ್.
ಜಾಗತಿಕ ಬಂಟರ ಸಂಘಲೆನ ಒಕ್ಕೂಟದ ಗುರ್ಕಾರೆ ಐಕಳ ಹರೀಶ್ ಶೆಟ್ಟಿ ಪಾತೆರ್ದ್, ಜಾಗತಿಕ ಬಂಟರ ಸಂಘಲೆನ ಒಕ್ಕೂಟದ ಮುಖೇನ ಸಮಾಜದ ಜನಕ್ಲೆನ ಹಿತದೃಷ್ಟಿಗಾದ್ ಸಂಘಟನೆ ಮುಖೇನ ಸುಮಾರ್ ಲೇಸ್ ನ್ ಆಯೋಜನೆ ಮಲ್ದ. ಸಮುದಾಯದ ಮಾತೆರೆನ್ಲಾ ಒಂಜೇ ಚಾವಡಿಗ್ ಕನಪುನ ಉದ್ದೇಶರ್ದ್ ವಿಶ್ವ ಬಂಟರ ಸಮ್ಮೇಳನ ಆಯೋಜನೆ ಮಲ್ದ. ಮಾತೆರ್ಲಾ ಒಗ್ಗಟ್ಟಾದ್ ರಡ್ಡ್ ದಿನ ಮುಟ್ಟ ಲೇಸ್ ದ ಯಶಸ್ಸಿಗಾದ್ ಕೆಲಸ ಮಲ್ಪೊಡು ಪಂದ್ ಪಂಡೆರ್.
ಬಂಟ್ಸ್ ವೆಲ್ ಫೇರ್ ಟ್ರಸ್ಟ್ ದ ಗುರ್ಕಾರೆ ಎ. ಸದಾನಂದ ಶೆಟ್ಟಿ ಮೇರ್ ಪಾತೆರ್ದ್, ಜಾಗತಿಕ ಬಂಟರ ಸಂಘಲೆನ ಒಕ್ಕೂಟಗ್ ಪೊಸ ದಿಕ್ಕ್ ತೋಜಿಪಾಯಿನಕುಲು ಐಕಳ ಹರೀಶ್ ಶೆಟ್ಟಿ ಮೇರ್. ಮೆರೆರ್ದ್ ಇನಿ ಬಂಟರ ಸಂಘಲು ಒಗ್ಗಟ್ಟಾದ್ ಕೆಲಸ ಸುರು ಮಲ್ತೊಂದುಂಡು. ಬಲಿಷ್ಟ ಸಮಾಜದ ನಿರ್ಮಾಣಗ್ ಬಂಟರ ಸಮ್ಮೇಳನದ ಯಶಸ್ಸಿಗ್ ನಮ ಮಾತ ಒಟ್ಟಾದ್ ಬೇಲೆ ಮಲ್ಪುಗ ಪಂಡೆರ್.
ಮಾಜಿ ಸಚಿವೆರ್ ಬಿ. ರಮಾನಾಥ್ ರೈ ಮೇರ್ ಪಾತೆರ್ದ್, ಒಂಜಿ ಪುಗರ್ತೆದ ಲೇಸ್ ಗ್ ನಮ ಮಾತೆರ್ಲಾ ದಿನಗಣನೆ ಮಲ್ತೊಂದು ಉಲ್ಲ. ಒಡಿಪುಡ್ ನಡಪರೆ ಇಪ್ಪುನ ಈ ಲೇಸ್ ಗ್ ಕುಡೊಂಜಿ ಇತಿಹಾಸ ನಿರ್ಮಾಣ ಮಲ್ದ್ಂಡ್. ನಮ್ಮ ಸಂಘಟನೆ ಶಕ್ತಿ ಈ ಮುಖೇನ ತೋಜಿಪಾವೊಡಾಪುಂಡು. ಲೇಸ್ ದ ಯಶಸ್ಸಿಗ್ ನಮ ಮಾತ ಬೆನೊಡು ಪಂದ್ ಪಂಡೆರ್.
ಈ ಪೊರ್ತುಡು ಬಂಟರ ಮಾತೃ ಸಂಘದ ಉಪಾಧ್ಯಕ್ಷೆರ್ ಕಾವು ಹೇಮನಾಥ್ ಶೆಟ್ಟಿ, ಒಕ್ಕೂಟದ ಉಪಾಧ್ಯಕ್ಷೆರ್ ಕರ್ನಿರೆ ವಿಶ್ವನಾಥ್ ಶೆಟ್ಟಿ, ಪ್ರಧಾನ ಕಾರ್ಯದರ್ಶಿ ಜಯಕರ ಶೆಟ್ಟಿ ಇಂದ್ರಾಳಿ, ಜತೆ ಕಾರ್ಯದರ್ಶಿ ಚಂದ್ರಹಾಸ ಶೆಟ್ಟಿ ರಂಗೋಲಿ, ಕೋಶಾಧಿಕಾರಿ ಉಳ್ತೂರು ಮೋಹನ್ ದಾಸ್ ಶೆಟ್ಟಿ, ಸುಧಾಕರ ಎಸ್. ಪೂಂಜ, ಎ.ಜಗನ್ನಾಥ ಚೌಟ, ಲೋಕೇಶ್ ಶೆಟ್ಟಿ ಕೊಳ, ಸುರೇಶ್ ರೈ ಮಕರಜ್ಯೋತಿ ಪಾಲ್ ಪಡೆದಿತ್ತೆರ್. ಕರ್ನಿರೆ ವಿಶ್ವನಾಥ್ ಶೆಟ್ಟಿ ಬಿನ್ನೆರೆನ್ ಎದ್ಕೊನಿಯೆರ್. ನಿತೇಶ್ ಶೆಟ್ಟಿ ಎಕ್ಕಾರ್ ಲೇಸ್ ದ ಸುಧಾರಿಕೆ ಮಲ್ತೆರ್. ಪ್ರಖ್ಯಾತ್ ಶೆಟ್ಟಿ ಪ್ರಾರ್ತನೆ ಮಲ್ತೆರ್.
ಮಣಿಪಾಲ: ರೇಡಿಯೊ ಮಣಿಪಾಲ್ 90.4 Mhz ಡ್ ಬನ್ನಂಜೆ ಬತ್ತೆರ್ ಪನ್ಪುನ ಸರಣಿ ಲೇಸ್ ಅ.12 ಗುರುವಾರ ಬಯ್ಯಗ್ 5ಕ್ಕ್ ಪ್ರಸಾರ ಆಪುಂಡು.
ಈ ಲೇಸ್ ಡ್ ಜಾನಪದ ವಿದ್ವಾಂಸೆರ್ ಬನ್ನಂಜೆ ಬಾಬು ಅಮೀನ್ ಪಾಲ್ ಪಡೆಯೆರೆ ಉಲ್ಲೆರ್. ಅ.13 ಕ್ಕ್ ಮಧ್ಯಾಹ್ನ 1 ಗಂಟೆಗ್ ಕುಡೊರ ಪ್ರಸಾರ ಆಪುಂಡು. ಈ ಲೇಸ್ ನ್ ರೇಡಿಯೊ ಮಾತ್ರ ಅತ್ತಂದೆ ಆಂಡ್ರಾಯ್ಡ್ ಫೋನ್ ಬೊಕ್ಕ ಐಫೋನ್ ಡ್ ರೇಡಿಯೊ ಮಣಿಪಾಲ್ ಆಪ್ ಡೌನ್ ಲೋಡ್ ಮಲ್ತ್ ದ್ ಕೇನೊಲಿ ಪಂದ್ ರೇಡಿಯೊ ಮಣಿಪಾಲ್ ಸಮುದಾಯ ಬಾನುಲಿ ಕೇಂದ್ರದ ಪ್ರಕಟಣೆ ತೆರಿಪಾದ್ಂಡ್.
ಬ್ರಹ್ಮಾವರ: ನೀಲಾವರ ಶ್ರೀ ಮಹಿಷಮರ್ದಿನೀ ದೇವಲ್ಯಡ್ ಅ.15-24 ಮುಟ್ಟ ಶರನ್ನವರಾತ್ರಿ ಉಚ್ಚಯ ನಡಪರೆ ಉಂಡು.
ಈ ಲೇಸ್ ದ ಲೆಕ್ಕೊಡು ಪ್ರತಿದಿನೊಲ ದುರ್ಗಾಹೋಮ, ವಿಜಯ ದಶಮಿದಾನಿ ಚಂಡಿಕಾ ಹೋಮ ಬೊಕ್ಕ ಬಯ್ಯಗ್ ಸಾಮೂಹಿಕ ದೀಪ ನಮಸ್ಕಾರ ಬೊಕ್ಕ ನುಪ್ಪು ಪ್ರಸಾದ ಸೇವೆ ನಡಪರೆ ಉಂಡು ಪಂದ್ ದೇವಲ್ಯದ ಪ್ರಕಟಣೆಡ್ ತೆರಿಪಾದೆರ್.
ಸುಬ್ರಹ್ಮಣ್ಯ: ಕುಕ್ಕೆ ಶ್ರೀ ಸುಬ್ರಹ್ಮಣ್ಯ ದೇವಸ್ಥಾನದ ಆಡಳಿತದ ಎಸ್.ಎಸ್ ಪಿ ಯು ಕಾಲೇಜ್ ಗ್ ಕಾಲೇಜ್ ದ ಹಿರಿಯ ಕಲ್ಪಾರ್ಥಿ ಉದ್ಯಮಿ ರಾಕೇಶ್ ಬೆಂಗಳೂರು ಮೇರ್ 1ಲಕ್ಷ ರೂ ದೇಣಿಗೆನ್ ಕೊರ್ತೆರ್. ಬುಧವಾರ ಕಾಲೇಜ್ ಗ್ ಬತ್ತ್ ದ್ ಪ್ರಾಂಶುಪಾಲೆರ್ ಸೋಮಶೇಖರ್ ನಾಯಕ್ ಮೇರೆಗ್ ದೇಣಿಗೆದ ಚೆಕ್ ಹಸ್ತಾಂತರ ಮಲ್ತೆರ್.
ಕಾಲೇಜ್ ಡ್ ನಡಪುನ ಸ್ಪಧಾತ್ಮಕ ಪರೀಕ್ಷಾ ತರಬೇತಿ ಕಾರ್ಯಗ್, ಕಾಲೇಜ್ ಡ್ ಗಾರ್ಡನಿಂಗ್ ಗ್, ಈ ದೇಣಿಗೆನ್ ಕೊರ್ತೆರ್. ಈ ಪೊರ್ತುಡು ಉಪನ್ಯಾಸಕೆರ್ ಸವಿತಾ ಕೈಲಾಸ್, ಜ್ಯೋತಿ ಪಿ ರೈ, ಸೌಮ್ಯಾ ದಿನೇಶ್, ಸುಧಾ ಇತ್ತೆರ್.
ತುಳುವೆರೆ ಆಯನೊ ಕೂಟ, ತುಳು ವರ್ಲ್ಡ್, ಮಂದಾರ ಪ್ರತಿಷ್ಠಾನ ಸಹಯೋಗಡ್ ವಾಯ್ಸ್ ಆಪ್ ಆರಾಧನ ಸಂಯೋಜನೆಡ್ ಸುರುತ ಸರ್ತಿ ಜೋಕ್ಲೆನ ತುಳು ಸಂಪೂರ್ಣ ದೇವಿ ಮಹಾತ್ಮೆ “ಜೊಕುಲೆ ಸಿರಿ ದೇವಿ ಮೈಮೆ” ಯಕ್ಷಗಾನ ಬಯಲಾಟ ನಡಪಾವುನ ಬಗೆಟ್ಟ್ ಪೂರ್ವಭಾವಿ ಸಭೆ ಯಕ್ಷರಾಧನಾ ಬಳಗದ ಮುಖ್ಯಸ್ಥೆ ಪದ್ಮಶ್ರೀ ಭಟ್ ಬೊಕ್ಕ ತುಳು ವರ್ಲ್ಡ್ ಮುಖ್ಯಸ್ಥ ಡಾ. ರಾಜೇಶ್ ಆಳ್ವ ಬದಿಯಡ್ಕ ನೇತೃತ್ವಡ್ ನಡತ್ತ್ಂಡ್.
ಸಂಪೂರ್ಣ ದೇವಿ ಮಹಾತ್ಮೆ ತುಳು ಯಕ್ಷಗಾನಗಾದ್ ಸುಮಾರ್ 40 ಜೋಕುಲೆನ್ ಆಯ್ಕೆ ಮಲ್ತ್ದ್, ತರಬೇತಿ ಕೊರಿಯೆರೆ ಸಿದ್ದತೆ ನಡತೊಂದು ಉಂಡು. ಯಕ್ಷಗಾನ ತರಬೇತುದಾರೆರ್ ಶ್ರೀಕಾಂತರಾವ್ ಬೊಕ್ಕ ಸ್ನೇಹಲತಾ ಜೋಕ್ಲೆನ ತರಬೇತಿದ ಸಂಪೂರ್ಣ ಜವಾಬ್ದಾರಿನ್ ವಹಿಸೊಂದೆರ್. ಕಾರ್ಯಕ್ರಮ ಸಂಪೂರ್ಣ ಯಶಸ್ಸ್ ಆಪುನ ನಿರೀಕ್ಷೆ ಉಂಡು ಪಂತೆರ್. ಈ ಪೊರ್ತುಡು ಪತ್ರಕರ್ತ ಡಾಕ್ಟರ್ ಮಂದಾರ ರಾಜೇಶ್ ಭಟ್, ಲೋಕೇಶ್ ಏ.ಕೆ. ವಿಟ್ಲ, ಶ್ರೀಕಾಂತ ಭಟ್, ಸ್ನೇಹಲತಾ, ಸುಬ್ರಹ್ಮಣ್ಯ ಭಟ್, ಇತ್ತೆರ್.
ಕೇಂದ್ರದ ಕಾರ್ಮಿಕೆರೆನ ಬೊಕ್ಕ ಉದ್ಯೋಗ ಸಚಿವಾಲಯದ ಅಧೀನಡ್ ಬರ್ಪುನ ಕಾರ್ಮಿಕೆರೆನ ರಾಜ್ಯ ವಿಮಾ ನಿಗಮಡ್ (ESIC) ಖಾಲಿ ಇಪ್ಪುನ 1038 ಬೇಲೆಗ್ ಅರ್ಜಿ ಪಾಡೊಲಿ.
ನೆಟ್ಟ್ ECG ಟೆಕ್ನೀಷಿಯನ್, ಜೂನಿಯರ್ ರೇಡಿಯೋಗ್ರಾಫರ್, OT ಅಸಿಸ್ಟೆಂಟ್, ರೆಕಾರ್ಡ್ ಅಸಿಸ್ಟೆಂಟ್, ಡೆಂಟಲ್ ಮೆಕ್ಯಾನಿಕ್ ಸೇರಿನಂಚೆನೆ ಬೇತೆ ಬೇಲೆಗ್ ಬೇತೆ ಬೇತೆ ರಾಜ್ಯಲೆನ ನಿಗಮಡ್ ನೇಮಕ ಆತ್ಂಡ್. ಆನ್ ಲೈನ್ ಮುಖೇನ ಅರ್ಜಿ ಸಂದಾಯೆರೆ ಅ.30 ಕ್ಕ್ ಅಕೇರಿದ ದಿನ ಆತ್ಂಡ್.
ಕಾರ್ಲ: ಅವಿಭಜಿತ ದಕ್ಷಿಣ ಕನ್ನಡ ಜಿಲ್ಲೆದ ವಿಶ್ವಕರ್ಮ ಸಂಘ ಸಂಸ್ಥೆಲೆನ ಕೇಂದ್ರ ಸಂಸ್ಥೆ ಆಯಿನ ವಿಶ್ವಕರ್ಮ ಒಕ್ಕೂಟ ಒಡಿಪುದ ಗುರ್ಕಾರೆ ಮಧು ಆಚಾರ್ಯ ಕುಡೊರ ಆಯ್ಕೆ ಆತೆರ್.
ಬಿಜೆಪಿ ಕಾರ್ಲ ವಿಧಾನಸಭೆ ಕ್ಷೇತ್ರದ ಸಾಮಾಜಿಕ ಜಾಲತಾಣ ಪ್ರಕೋಷ್ಠದ ಸಂಚಾಲಕೆರ್, ನಿಟ್ಟೆ ವಿಶ್ವಕರ್ಮ ಸಂಘದ ಗುರ್ಕಾರೆ ಹರ್ಷವರ್ಧನ್ ಆಚಾರ್ಯ ನಿಟ್ಟೆ, ಪ್ರಧಾನ ಕಾರ್ಯದರ್ಶಿಯಾದ್ ಅವಿರೋಧವಾದ್ ಆಯ್ಕೆ ಆತೆರ್.
ಐತಾರ ಒಡಿಪು ಕುಂಜಿಬೆಟ್ಟು ಗಾಯತ್ರಿ ಕಲ್ಯಾಣ ಮಂಟಪಡ್ ಆಯ್ಕೆ ಪ್ರಕ್ರಿಯೆ ನಡತ್ಂಡ್. ಗೌರವಾಧ್ಯಕ್ಷೆರಾದ್ ಯು.ಕೆ. ಸೀತಾರಾಮ ಆಚಾರ್ಯ, ಉಪಾಧ್ಯಕ್ಷೆರಾದ್ ಅಲೆವೂರು ಯೋಗೀಶ್ ಆಚಾರ್ಯ, ಕೆ.ಮುರಳೀಧರ ಆಚಾರ್ಯ, ಕೋಶಾಧಿಕಾರಿಯಾದ್ ಜನಾರ್ದನ ಎಸ್. ಆಚಾರ್ಯ, ಕಾರ್ಯದರ್ಶಿಯಾದ್ ಪ್ರಕಾಶ್ ಆಚಾರ್ಯ ನೇರಂಬಳ್ಳಿ, ಸಂಘಟನಾ ಕಾರ್ಯದರ್ಶಿಯಾದ್ ಸತೀಶ್ ಆಚಾರ್ಯ ಬೇಳೂರು, ವಸಂತ್ ಆಚಾರ್ಯ ಕಾಟಿಪಳ್ಳ, ಆಂತರಿಕ ಲೆಕ್ಕ ಪರಿಶೋಧಕೆರಾದ್ ಬಿ. ಎ. ಆಚಾರ್ಯ ಮಣಿಪಾಲ್ ಬೊಕ್ಕ ಕಾರ್ಯಕಾರಿ ಸಮಿತಿದ ಸದಸ್ಯೆರಾದ್ ಕೋಣಿ ನಾರಾಯಣ ಆಚಾರ್ಯ, ಜಿ. ಸತೀಶ್ ಆಚಾರ್ಯ ಪಡ್ಡೆದ್ರ, ಭಾರತಿ ದಿವಾಕರ, ಗೋಕುಲ್ ಆಚಾರ್ಯ, ಅರುಣ್ ಆಚಾರ್ಯ, ಎಚ್.ಎಂ. ಗಂಗಾಧರ ಆಚಾರ್ಯ, ಆನಂದ ಆಚಾರ್ಯ ವಕ್ವಾಡಿ, ರವಿ ಆಚಾರ್ಯ, ರಮೇಶ್ ಆಚಾರ್ಯ ಬಂಟಕಲ್ಲು, ಶರತ್ ಶರ್ಮಾ ಪಡ್ಡೆದ್ರ, ನೀಲಯ ಆಚಾರ್ಯ, ಸುನೀತಾ ದಿವಾಕರ ಆಚಾರ್ಯ, ಸಂಧ್ಯಾ ಲಕ್ಷ್ಮಣ ಆಚಾರ್ಯ ಆಯ್ಕೆ ಆತೆರ್.
ಉಜಿರೆ: ಉಜಿರೆದ ಶ್ರೀ ಧರ್ಮಸ್ಥಳ ಮಂಜುನಾಥೇಶ್ವರ ಸ್ವಾಯತ್ತ ಕಾಲೇಜ್ದ ರಾಷ್ಟ್ರೀಯ ಸೇವಾ ಯೋಜನಾ ಘಟಕ ಬೊಕ್ಕ ಕಾರ್ಯಕ್ರಮಾಧಿಕಾರಿ ಡಾ. ಲಕ್ಷ್ಮೀನಾರಾಯಣ ಕೆ. ಎಸ್. ಮೇರೆಗ್ ಎನ್ನೆಸ್ಸೆಸ್ ರಾಜ್ಯ ಪ್ರಶಸ್ತಿ ತಿಕ್ಕ್ದ್ಂಡ್. ಬೆಂಗಳೂರುದ ರಾಜ್ಯಪಾಲೆರ್ನ ರಾಜಭವನಡ್ ನಡತ್ತಿನ ಪ್ರಶಸ್ತಿ ಪ್ರದಾನ ಸಮಾರಂಭಡ್ ಕಾಲೇಜ್ದ ಪ್ರಿನ್ಸಿಪಾಲ್ ಡಾ.ಬಿ.ಎ.ಕುಮಾರ್ ಹೆಗ್ಡೆ ಬೊಕ್ಕ ಎನ್.ಎಸ್ ಎಸ್ ಅಧಿಕಾರಿ .ಲಕ್ಷ್ಮೀನಾರಾಯಣ್ ಕೆ ಎಸ್. ಪ್ರಶಸ್ತಿ ಸ್ವೀಕಾರ ಮಲ್ತೆರ್.
ಕಾಲೇಜ್ದ ಎನ್ನೆಸ್ಸೆಸ್ ಘಟಕ ಇಡೆಮುಟ್ಟ 10 ಸರ್ತಿ, ಕಾರ್ಯಕ್ರಮ ಅಧಿಕಾರಿಲೆಗ್ 10 ಸರ್ತಿ ಬೊಕ್ಕ ಕಲ್ಪಾರ್ಥಿಲೆಗ್ 6 ಸರ್ತಿ ರಾಜ್ಯ ಪ್ರಶಸ್ತಿ ತಿಕ್ಕ್ದ್ಂದ್. ಒಂಜಿ ಸರ್ತಿ ಇಂದಿರಾ ಗಾಂಧಿ ಎನ್ನೆಸ್ಸೆಸ್ ರಾಷ್ಟ್ರ ಪ್ರಶಸ್ತಿ ತಿಕ್ಕ್ದ್, ಪ್ರಸ್ತುತ ಪ್ರಿನ್ಸಿಪಾಲ್ ಡಾ. ಕುಮಾರ್ ಹೆಗ್ಡೆ ಮೇರೆಗ್ ರಾಷ್ಟ್ರ ಮಟ್ಟದ ಪ್ರಶಸ್ತಿ ತಿಕ್ಕ್ದ್ಂಡ್.
ಹೆಬ್ರಿ : ಕರಿನ ಮೂಜಿ ವರ್ಷರ್ದ್ ಹೆಬ್ರಿ ತಹಶೀಲ್ದಾರ್ ಆದ್ ಬೇಲೆ ಮಲ್ತೊಂದು ಇತ್ತಿನ ಪುರಂದರ್ ಕೆ. ಮೇರ್ ಹಾಸನ ಜಿಲ್ಲೆದ ಸಕಲೇಶಪುರ ತಾಲೂಕ್ದ ತಹಶೀಲ್ದಾರ್ ಆದ್ ಅ.11 ದಾನಿ ಟ್ರಾನ್ಸ್ಫರ್ ಆತೆರ್. ಮೇರ್ ಹೆಬ್ರಿ ತಾಲ್ಲೂಕ್ದ ರಡ್ಡನೇ ತಹಶೀಲ್ದಾರ್ ಆದ್ ಬೇಲೆ ಮಲ್ತೊಂದು ಇತ್ತೆರ್. ನೆರ್ದ್ ದುಂಬ್ ಕೆ. ಮಹೇಶ್ಚಂದ್ರ ತಹಶೀಲ್ದಾರ್ ಆದಿತ್ತೆರ್. ಪೊಸ ತಹಶೀಲ್ದಾರ್ನ ನೇಮಕಾತಿ ನನ ಆವೋಡಾತೆ ಪಂದ್ ತೆರಿದ್ ಬೈದ್ಂಡ್.
