October 2023

ತುಳು ಭಾಷೆನ್ ರಾಜ್ಯದ ಅಧಿಕೃತ ಭಾಷೆ ಮಲ್ಪರೆ ಬೆಂಗ್ಲೂರುಡು ಕಂಬುಲ: ಶಾಸಕೆರ್ ಅಶೋಕ್ ರೈ

ಕುಡ್ಲ: ತುಳು ಭಾಷೆನ್ ರಾಜ್ಯದ ರಡ್ಡನೇ ಅಧಿಕೃತ ಭಾಷೆಯಾದ್ ಘೋಷಣೆ ಮಲ್ಪರೆ, ಕಂಬುಲಡ್ ದಾಖಲೆ ನಿರ್ಮಾಣ ಮಲ್ಪರೆ ಬೆಂಗ್ಲೂರುಡು ಕಂಬುಲ ಆಯೋಜನೆ ಮಲ್ತ್ ದ ಪಂದ್ ಪುತ್ತೂರು ಶಾಸಕೆರ್ ಅಶೋಕ್ ರೈ ಪಂಡೆರ್.

ಕುಡ್ಲಡ್ ಸುದ್ದಿಗಾರೆನೊಟ್ಟಿಗೆ ಪಾತೆರ್ನ ಮೇರ್, ತುಳು ಭಾಷೆನ್ ಹೆಚ್ಚುವರಿ ಭಾಷೆಯಾದ್ ಘೋಷಣೆ ಮಲ್ಪರೆ ಐನ್ ಇಲಾಖೆರ್ದ್ ಎನ್‌ಒಸಿ ಬರೊಡು. ಯಾನ್ ವಿಧಾನಸಭೆಟ್ಟ್ ತುಳುತ್ತ ಬಗೆಟ್ಟ್ ಪಾತೆರ್ನಗನೇ ಐನ್ ಇಲಾಖೆಗ್ ಪತ್ರ ಪೋತ್ಂಡ್. ಅಧಿಕಾರಿಲು ಅಯಿನ್ ಫಾಲೋಅಪ್ ಮಲ್ತೊಂದು ಉಲ್ಲೆರ್. ಒಂಜಿ ಇಲಾಖೆರ್ದ್ ಎನ್‌ಒಸಿ ಬೈದ್ಂಡ್. ಒರಿನ ನಾಲ್ ಇಲಾಖೆರ್ದ್ ಎನ್‌ಒಸಿ ಬರೊಡಾತೆ. ಅವು ಬತ್ತಿನ ಕೂಡ್ಲೆ ಹೆಚ್ಚುವರಿ ಭಾಷೆಯಾದ್ ಘೋಷಣೆ ಮಲ್ಪುನ ಕಾರ್ಯ ಆಯೆರೆ ಉಂಡು. ಈ ಸರ್ತಿ ತುಳು ಸಾಹಿತ್ಯ ಅಕಾಡೆಮಿದ ಗುರ್ಕಾರೆ ಏರಾಪೆರೋ ಅಕ್ಲೆಗ್ ಆಯಿನ್ ಟಾರ್ಗೆಟ್ ಕೊರ್ದು ಎನ್‌ಒಸಿನ್ ಕೂಡ್ಲೆ ಕಾರ್ಯ ಮಲ್ಪುವ. ಈ ಮುಖೇನ ತುಳುನ್ ರಾಜ್ಯಡ್ ಹೆಚ್ಚುವರಿ ಭಾಷೆಯಾದ್ ಮಲ್ಪುನ ಕೆಲಸನ್ ಮಲ್ತೆ ಮಲ್ಪುವ ಪಂದ್ ಭರವಸೆ ಕೊರಿಯೆರ್.

ಬೊಕ್ಕ ಬೆಂಗ್ಲೂರು ಕಂಬುಲದ ಬಗೆಟ್ಟ್ ತೆರಿಪಾಯಿನ ಮೇರ್, ಕಂಬುಲದ ಕರೆತ್ತ ಉದ್ದ ಸಾಮಾನ್ಯ 145ಮೀ. ಉಂಡು. ಬೆಂಗ್ಲೂರು ಕಂಬುಲಡ್ ಕರೆತ್ತ ಉದ್ದ 155ಮೀ. ಉಂಡು. ಬೆಂಗ್ಲೂರು ಕಂಬುಲ ಮಾತೆಟ್ಲಾ ದಾಖಲೆ ಮಲ್ಪರೆ ಉಂಡು. ಕಂಬುಲ ಕರೆಟ್ಲಾ ದಾಖಲೆ ಮಲ್ಪೆರೆ ಉಂಡು. ಕಂಬುಲದ ಕರೆತ್ತ ಪುದರ್ ನನಲ ನಿರ್ಧಾರ ಆತಿಜಿ. ಮಹಾರಾಣಿಯೆರೆಗ್ ಸಂಬಂಧ ಪಟ್ಟಿನ ಪುದರ್ ನ್ ದೀಯೆರೆ ಆರ್ ಸಮ್ಮತಿ ಕೊರ್ತಿಜೆರ್. ಇತ್ತೆನೇ ಸಾಮಾಜಿಕ ಜಾಲತಾಣಡ್ 230 ದಾತ್ ಪುದರ್ ಬೈದ್ಂಡ್. ಪ್ರಮುಖೆರೆಡ ಚರ್ಚೆ ಮಲ್ತ್ ದ್ ನವೆಂಬರ್ 4-5 ತ್ತೊಲಯಿ ಕರೆಕ್ಕ್ ಪುದರ್ ನ್ ಅಕೇರಿ ಮಲ್ಪುವ ಪಂದ್ ಪಂಡೆರ್.

ಸ್ಥಿತ್ಯಂತರಡ್ ಬಂಟೆರ್, ಶಿಕ್ಷಣ ಬೊಕ್ಕ ನಿರುದ್ಯೋಗದ ವಿಚಾರ ಸಂಕಿರಣ

ಒಡಿಪು: ವಿಶ್ವ ಬಂಟ ಸಮ್ಮೇಳನದ ಲೆಕ್ಕೊಡು ಸ್ಥಿತ್ಯಂತರಡ್ ಬಂಟೆರ್, ಶಿಕ್ಷಣ ಬೊಕ್ಕ ನಿರುದ್ಯೋಗದ ಬಗೆಟ್ಟ್ ವಿಚಾರ ಸಂಕಿರಣ ಅಮ್ಮಣ್ಣಿ ರಾಮಣ್ಣ ಶೆಟ್ಟಿ ಸಭಾಂಗಣಡ್ ಐತಾರ ನಡತ್ಂಡ್.

ಹೇರಂಬ ಇಂಡಸ್ಟ್ರೀಸ್ ಲಿ. ಸಿಎಂಡಿ ಕನ್ಯಾನ ಸದಾಶಿವ ಶೆಟ್ಟಿ ಮೇರ್ ಲೇಸ್ ಉದಿಪನ ಮಲ್ತೆರ್.
ಗುರ್ಕಾರ್ಮೆನ್ ವಿಶ್ವಾತ್ ಕೆಮಿಕಲ್ಸ್ ದ ಸಿಎಂಡಿ ಬಿ.ವಿವೇಕ ಶೆಟ್ಟಿ, ಜಾಗತಿಕ ಬಂಟರ ಸಂಘಲೆನ ಒಕ್ಕೂಟದ ಗುರ್ಕಾರೆ ಐಕಳ ಹರೀಶ್ ಶೆಟ್ಟಿ ಒಯಿಸ್ ದಿತ್ತೆರ್.

ಕರ್ನಾಟಕ ಜಾನಪದ ಯಕ್ಷಗಾನ ಬೊಕ್ಕ ತುಳು ಸಾಹಿತ್ಯ ಅಕಾಡೆಮಿ ಮಾಜಿ ಸದಸ್ಯೆರ್ ಪ್ರೊ. ಭಾಸ್ಕರ ರೈ ಕುಕ್ಕುವಳ್ಳಿ ಮೇರ್ ಪಾತೆರ್ದ್, ಇತ್ತೆದ ಶಿಕ್ಷಣ ಒಂಚಿ ಪೋವೊಂದು ಉಂಡು, ನಿರುದ್ಯೋಗನೇ ಸೃಷ್ಟಿ ಮಲ್ಪುನ ಶಿಕ್ಷಣ ಸಂಸ್ಥೆಲು ಉದ್ಯೋಗ ಕೊರ್ಪುನೆ ಎಂಚ? ಮುಲ್ಪ ಕಲ್ತಿನ ಅರ್ಹ ಜವನೆರೆಗ್ ಉದ್ಯೋಗ ತಿಕ್ಕಂದೆ ವಿದೇಶಗ್ ಪೋವೊಡಾಪುಂಡು. ನೆನ್ ಪ್ರತಿಭಾ ಪಲಾಯನ ಪನ್ಪೆರ್ ಪ್ರತಿಭಾವಂತ ಬಂಟ ಸಮುದಾಯದ ಜವನೆರೆನ್ ನಮ್ಮ ಸಮಾಜದ ಅಭಿವೃದ್ಧಿಡ್ ಎಂಚ ಸೇರ್ಸಾವೊಡು ಪನ್ಪುನ ದಿಟ್ಟಿಡ್ ವಿಚಾರ ವಿನಿಮಯ ನಡಪೊಡು ಪಂದ್ ಪಂಡೆರ್.

ಹೇರಂಬ ಇಂಡಸ್ಟ್ರಿಸ್ ಬೊಂಬೈದ ಸಿಎಂಡಿ, ಜಾಗತಿಕ ಬಂಟರ ಸಂಘಲೆನ ಒಕ್ಕೂಟದ ಮಹಾದಾನಿ ಕನ್ಯಾನ ಸದಾಶಿವ ಶೆಟ್ಟಿ ಮೇರ್ ಪಾತೆರ್ದ್, ಬಂಟೆರೆಗ್ ಕೃಷಿ ಪ್ರಧಾನ ಆಯಿನ ಹಿನ್ನೆಲೆ ಉಂಡು. ನಮ ಆಸಕ್ತಿ ಇಪ್ಪುನ ಕ್ಷೇತ್ರಡ್ ಉದ್ಯೋಗ ಮಲ್ಪೊಡು. ‌ಎನ್ನ ಕಂಪೆನಿಡ್ 2500 ಜನ ಕೆಲಸ ಮಲ್ತೊಂದು ಉಲ್ಲೆರ್. ಶಿಕ್ಷಣ ಪಡೆಯಿನಕುಲು ನಮ ವಾ ಕ್ಷೇತ್ರಡ್ ಸಾಧನೆ ಮಲ್ಪೊಡು ಅವ್ವೇ ಕ್ಷೇತ್ರಡ್ ಬೇನೊಡು. ಯಾನ್ ಕಾಸ್ ನೇ ಸಾಧನೆ ಪಂದ್ ಪನ್ಪುಜಿ. ಆಂಡ ಜನರ್ದ್ ಗುರುತಿಸಾವುನ ನಿಜವಾಯಿನ ಸಾಧನೆ‌ ಪಂದ್ ಪಂಡೆರ್.

ಉಪೇಂದ್ರ ಶೆಟ್ಟಿ ಮೇರ್ ಪಾತೆರ್ದ್, ಉದ್ಯೋಗಗ್ ಬೋಡಾಯಿನ ಅರ್ಹತೆ ಇಜ್ಜಿಂಡ ನಮ ನಮಡ ಇಪ್ಪುನ ಕೌಶಲ್ಯನ್ ಅಭಿವೃದ್ಧಿ ಮಲ್ಪೊಡು. ನೆಕ್ಕಾದ್ ಬಂಟೆರೆನ ಸಂಘಟನೆಲು ಅಗತ್ಯ ಇಪ್ಪುನ ಆರ್ಥಿಕ ವ್ಯವಸ್ಥೆನ್ ಮಲ್ಪೊಡು ಪಂದ್ ಪಂಡೆರ್.

ಅದಾನಿ ಗ್ರೂಫ್ ದ ಕಿಶೋರ್ ಆಳ್ವ ಪಾತೆರ್ದ್, ನಮ್ಮ ದೇಶಡ್ ಮಸ್ತ್ ಗುಣಮಟ್ಟದ ಶಿಕ್ಷಣ ಸಂಸ್ಥೆಲು ಉಂಡು. ಇಂಚಾದ್ ಉದ್ಯೋಗ ನಾಡಿಯೆರೆ ಕಷ್ಟ ಅಪುಜಿ. ನಮ್ಮ ಜಿಲ್ಲೆಡೇ ಉದ್ಯೋಗ ಸೃಷ್ಟಿ ಮಲ್ಪುನ ಕೆಲಸ ಆವೊಡು. ಜವನೆರ್ ರಾಜಕೀಯಗ್ ಬರೊಡು. ಆಪಗ ಶಿಕ್ಷಣ ಬೊಕ್ಕ ಉದ್ಯೋಗದ ವ್ಯವಸ್ಥೆ ಬದಲಾಪುಂಡು ಪಂದ್ ಪಂಡೆರ್.

ಪ್ರದೀಪ್ ರೈ ಪಾತೆರ್ದ್, ಮಸ್ತ್ ಸ್ಥಿತಿವಂತರಾಯಿನ ಬಂಟೆರ್ ಬಡ ಬಂಟ ಕುಟುಂಬದ ಜೋಕುಲೆನ್ ಶೈಕ್ಷಣಿಕ ಉದ್ದೇಶಕ್ಕಾದ್ ದತ್ತು ಪಡೆವೊಡು. ನೆರ್ದ್ ನನದ ದಿನಟ್ಟ್ ಬಡತನ, ನಿರುದ್ಯೋಗದ ಸಮಸ್ಯೆ ನಿರ್ಮೂಲನೆ ಆಪುಂಡು ಪಂದ್ ಪಂಡೆರ್.

ಪ್ರಾಧ್ಯಾಪಕಿ ಡಾ. ಪೂರ್ಣಿಮಾ ಎಸ್. ಶೆಟ್ಟಿ ಪಾತೆರ್ದ್, ಸುರುಕು ನಮ ಜೋಕುಲೆಗ್ ಎಡ್ಡೆ ಗುಣಮಟ್ಟದ ಶಿಕ್ಷಣ ಕೊರೊಡು. ಜೋಕುಲು ಉದ್ಯೋಗಗಾದ್ ಬೇತೆ ದೇಶಗ್ ಪೋಪುನೆನ್ ತಪ್ಪಾಯೆರೆ ನಮ‌್ಮ ಸಮಾಜದ ಉದ್ಯಮಿಲು ಮನಸ್ ಮಲ್ಪೊಡು ಪಂದ್ ಪಂಡೆರ್.

ತೋನ್ಸೆ ಆನಂದ ಶೆಟ್ಟಿ ಪಾತೆರ್ದ್, ಶಿಕ್ಷಣ ಬೊಕ್ಕ ಉದ್ಯೋಗ ಒಂಜೇ ಪಾವೊಲಿದ ರಡ್ಡ್ ಮೋನೆ ಇತ್ತಿಲೆಕ್ಕ. ಶಿಕ್ಷಣ ಪಡೆಂಡ ಮಾತ್ರ ಉದ್ಯೋಗ ತಿಕ್ಕುಂಡು. ಅವ್ವೇ ರೀತಿ ಭಾಷೆಲ ಮುಖ್ಯ. ಬೇತೆ ಬೇತೆ ಕಡೆಟ್ಟ್ ಪೋನಗ ಅಲ್ಪದ ಭಾಷೆನ್ ಪಾತೆರೊಡಾಪುಂಡು. ಭಾಷೆ ಗೊತ್ತಿಜ್ಜಿಂಡ ಸಮಸ್ಯೆ ಆಪುಂಡು. ಇತ್ತೆ ಕೆಮಿಕಲ್ ಇಂಜಿನಿಯರ್ ಲೆನ ಅವಶ್ಯಕತೆ ಮಸ್ತ್ ಉಂಡು. ಆಂಡ ಅವೆನ್ ಕಲ್ಪುನಕ್ಲೆನ ಸಂಖ್ಯೆ ಮಸ್ತ್ ಕಮ್ಮಿ. ಇಂಚಾದ್ ಅವಕಾಶ ಇಪ್ಪುನ ಕ್ಷೇತ್ರಡ್ ಸಾಧನೆ ಮಲ್ಪೊಡು. ಜೋಕುಲೆಗ್ ಟಿವಿ, ಮೊಬೈಲ್ ಕೊರಿಯೆರೆ ಬಲ್ಲಿ. ಅವು ನಿಕ್ಲೆನ ಜೋಕುಲೆನ್ ಹಾಳ್ ಮಲ್ಪುಂಡು ಪಂದ್ ಪಂಡೆರ್.

ಜಾಗತಿಕ ಬಂಟರ ಸಂಘಲೆನ ಒಕ್ಕೂಟದ ಪ್ರಧಾನ ಕಾರ್ಯದರ್ಶಿ ಜಯಕರ ಶೆಟ್ಟಿ ಇಂದ್ರಾಳಿ ಬಿನ್ನೆರೆನ್ ಎದ್ಕೊನಿಯೆರ್. ಆರ್ಗಾನಿಕ್ ಗ್ರೂಪ್ ಆಫ್ ಇಂಡಸ್ಟ್ರೀಸ್ ಬೊಂಬೈದ ಸಿಎಂಡಿ ಆನಂದ ಎಂ.ಶೆಟ್ಟಿ ತೋನ್ಸೆ, ಆದಾನಿ ಗ್ರೂಪ್, ದಕ್ಷಿಣಭಾರತದ ಉಪಾಧ್ಯಕ್ಷೆರ್ ಕಿಶೋರ್ ಆಳ್ವ, ಆಸ್ಪೆನ್‌ ಎಸ್‌ ಇಝಡ್ ಸೀನಿಯರ್ ಜನರಲ್ ಮೆನೇಜರ್ ಅಶೋಕ್ ಕುಮಾರ್ ಶೆಟ್ಟಿ, ಇಸ್ಸಾರ್ ಫೈನಾನ್ಸಿಯಲ್ ಸರ್ವೀಸಸ್ ಲಿ. ಬೊಂಬೈದ ಸಿಎಂಡಿ ಡಾ.ಆರ್. ಕೆ. ಶೆಟ್ಟಿ, ಬೆಂಗ್ಲೂರುದ ಯುನಿವರ್ಸಲ್ ಗ್ರೂಫ್ ಆಫ್ ಇನ್ ಸ್ಟಿಟ್ಯೂಷನ್ ಉಪೇಂದ್ರ ಶೆಟ್ಟಿ, ಬೊಂಬೈ ವಿಶ್ವವಿದ್ಯಾನಿಲಯ ಪ್ರಾಧ್ಯಾಪಕಿ ಡಾ. ಪೂರ್ಣಿಮಾ ಎಸ್. ಶೆಟ್ಟಿ ವಿಷಯ ಮಂಡನೆ ಮಲ್ತೆರ್. ಕದ್ರಿ ನವನೀತ್ ಶೆಟ್ಟಿ ಲೇಸ್ ದ ಸುಧಾರಿಕೆ ಮಲ್ತೆರ್.

ರೇಡಿಯೊ ಮಣಿಪಾಲಡ್ ಯೋಗ ಸುಯೋಗ ಸರಣಿ ಲೇಸ್

ಮಣಿಪಾಲ: ರೇಡಿಯೊ ಮಣಿಪಾಲ್ 90.4 Mhz ಡ್ ಯೋಗ ಸುಯೋಗ ಸರಣಿ ಲೇಸ್ ದ 31ನೇ ಸಂಚಿಕೆ ಅ.30 ಸೋಮಾರ ಬಯ್ಯಗ್ 4.15 ಕ್ಕ್ ಪ್ರಸಾರ ಆಂಡ್.

ಈ ಲೇಸ್ ಡ್ ಒಡಿಪು ಚಿಟ್ಪಾಡಿದ ಶ್ರೀ ಗುರುಕೃಪಾ ಯೋಗ ವಿದ್ಯಾ ಪ್ರತಿಷ್ಠಾನಡ್ ಯೋಗ ಶಿಕ್ಷಕೆರ್ ಆರ್ ಶಿವಕುಮಾರ್ ಪಾಲ್ ಪಡೆಯೆರ್. ಅ.31 ಕ್ಕ್ ಮಧ್ಯಾಹ್ನ 12.15 ಕ್ಕ್ ಕುಡೊರ ಪ್ರಸಾರ ಆಪುಂಡು.

ಈ ಲೇಸ್ ನ್ ರೇಡಿಯೊ ಮಾತ್ರ ಅತ್ತಂದೆ ಆಂಡ್ರಾಯ್ಡ್ ಫೋನ್ ಬೊಕ್ಕ ಐಫೋನ್ ಡ್ ರೇಡಿಯೋ ಮಣಿಪಾಲ್ ಆಫ್ ಡೌನ್‌ಲೋಡ್ ಮಲ್ತ್ ದ್ ಕೇನೊಲಿ ಪಂದ್ ರೇಡಿಯೊ ಮಣಿಪಾಲ್ ಸಮುದಾಯ ಬಾನುಲಿ ಕೇಂದ್ರದ ಪ್ರಕಟಣೆ ತೆರಿಪಾದ್ಂಡ್.