ಗ್ಯಾಸ್ ತೋರುದು 16 ಜನ ತೀರ್ ಪೋಯಿನ ಘಟನೆ ದಕ್ಷಿಣ ಆಫ್ರಿಕಾದ ಜೊಹಾನ್ಸ್ ಬರ್ಗ್ ದ ಮುಡಾಯಿ ದಿಕ್ಕ್ ಡ್ ಇಪ್ಪುನ ಬೋಕ್ಸ್ ಬರ್ಗ್ ಡ್ ನಡತ್ಂಡ್.
ನೆರ್ದ್ ದುಂಬು 24 ಜನ ತೀರ್ ಪೋತೆರ್ ಪಂದ್ ವರದಿ ಆದಿತ್ತ್ಂಡ್. ಸರ್ಕಾರದ ಪೊಲಬುದ ಪ್ರಕಾರ 16 ಜನ ತೀರ್ ಪೋತೆರ್ ಪಂದ್ ತೆರಿದ್ ಬೈದ್ಂಡ್.
ಒಡಿಪು: ರೈಲ್ ದ ಪಟ್ಟೆದ ಕರೆಂಟ್ ಕಂಬದ ಮಿತ್ತ್ ಮರ ಬೂರಿನ ಘಟನೆ ಒಡಿಪು ಜಿಲ್ಲೆದ ಬ್ರಹ್ಮಾವರ ತಾಲೂಕ್ ದ ಮಟಪಾಡಿ ಗ್ರಾಮಡ್ (ಜು.4) ಕೋಡೆ ರಾತ್ರೆ ನಡತ್ಂಡ್.
ನೆರ್ದಾವರ ಕೆಲವು ಗಂಟೆ ರೈಲ್ ಸಂಚಾರ ಇಜ್ಜಂಡ್. ಇನಿ ಬೊಲ್ಪುಗು ಮರನ್ ದೆತ್ತ್ ದೆರ್. ಅಂಚಾದ್ ಕುಡ ರೈಲ್ ಸಂಚಾರ ಸುರು ಆತ್ಂಡ್.
ದ.ಕ ಜಿಲ್ಲಾ ರಾಜ್ಯೋತ್ಸವ ಪ್ರಶಸ್ತಿ ಪಡೆದಿನ ತೋಕೂರು ಶ್ರೀ ಸುಬ್ರಹ್ಮಣ್ಯ ಮಹಾಗಣಪತಿ ಸ್ಪೋರ್ಟ್ಸ್ ಕ್ಲಬ್ (ರಿ.) ನೆತ್ತ 2023-24ನೇ ಸಾಲ್ ದ ಪದಾಧಿಕಾರಿಲೆನ್ ಅಜಪುನ ಲೇಸ್ ಇಂಚೊಗು ನಡತ್ಂಡ್.
ಅಧ್ಯಕ್ಷೆರಾದ್ ಜಗದೀಶ್ ಕುಲಾಲ್, ಗೌರವಾಧ್ಯಕ್ಷೆರಾದ್ ಪ್ರಶಾಂತ್ ಕುಮಾರ್ ಬೇಕಲ್, ಉಪಾಧ್ಯಕ್ಷೆರಾದ್ ಸುನಿಲ್ ದೇವಾಡಿಗ, ಪ್ರಧಾನ ಕಾರ್ಯದರ್ಶಿಯಾದ್ ದೀಪಕ್ ಸುವರ್ಣ, ಕೋಶಾಧಿಕಾರಿಯಾದ್ ಪದ್ಮನಾಭ ಶೆಟ್ಟಿ, ಜತೆ ಕಾರ್ಯದರ್ಶಿಯಾದ್ ಗಣೇಶ್ ದೇವಾಡಿಗ ಬೊಕ್ಕ ಸುರೇಖಾ, ಕಾರ್ಯಾಧ್ಯಕ್ಷೆರಾದ್ ಸಂತೋಷ್ ದೇವಾಡಿಗ, ಮಹಿಳಾ ಕಾರ್ಯಾಧ್ಯಕ್ಷೆರಾದ್ ಯಶೋಧಾ ದೇವಾಡಿಗ, ಸಾಂಸ್ಕೃತಿಕ ಕಾರ್ಯದರ್ಶಿಯಾದ್ ಗೀತಾ ಸದಾನಂದ ಶೆಟ್ಟಿಗಾರ್ ಬೊಕ್ಕ ಪ್ರಮೀಳಾ ಹರೀಶ್, ಕ್ರೀಡಾ ಕಾರ್ಯದರ್ಶಿಯಾದ್ ಮಹಮ್ಮದ್ ಯೂನುಸ್, ಆರೋಗ್ಯ ನಿಧಿ ಕಾರ್ಯದರ್ಶಿಯಾದ್ ಸಂತೋಷ್ ಕುಮಾರ್, ಪರಿಸರ ಸಂರಕ್ಷಣಾ ಕಾರ್ಯದರ್ಶಿಯಾದ್ ಜಗದೀಶ್ ಕೋಟ್ಯಾನ್ ಬೊಕ್ಕ ಸಂಪತ್ ದೇವಾಡಿಗ, ಆಂತರಿಕ ಲೆಕ್ಕ ಪರಿಶೋಧಕೆರಾದ್ ಸುಭಾಸ್ ಅಮೀನ್, ಕ್ರಿಕೆಟ್ ಕೂಟದ ನಾಯಕೆಯಾದ್ ಗೌತಮ್ ಬೆಲ್ಚಡ, ಉಪನಾಯಕೆಯಾದ್ ಲಿಖಿತ್ ಶೆಟ್ಟಿ ಆಯ್ಕೆ ಆತೆರ್.
ಎಸ್ ಎಸ್ಎಲ್ ಸಿ ಪಾಸಾಯಿನ ಅಭ್ಯರ್ಥಿಲು ಈಶಾನ್ಯ ವಲಯದ ರೈಲ್ವೆ ಇಲಾಖೆಡ್ ಖಾಲಿ ಇಪ್ಪುನ 1104 ಅಪ್ರೆಂಟಿಸ್ ಬೇಲೆಗ್ ಅರ್ಜಿ ಪಾಡೊಲಿ.
ನೆಟ್ಟ್ ಫಿಟ್ಟರ್, ವೆಲ್ಡರ್, ಇಲೆಕ್ಟ್ರಿಷಿಯನ್, ಕಾರ್ಪೆಂಟರ್ ಬೇಲೆ ಉಂಡು. ಈ ಬೇಲೆಗ್ ಅರ್ಜಿ ಪಾಡುನಕುಲು ಎಸ್ ಎಸ್ ಎಲ್ ಸಿಡ್ ಶೇ.50 ದಾತ್ ಮಾರ್ಕ್ ಪಡೆದಿಪ್ಪೊಡು. ಆಗಸ್ಟ್ 2 ಅರ್ಜಿ ಸಂದಾಯೆರೆ ಅಕೇರಿದ ತಾರೀಕ್ ಆತ್ಂಡ್. ಅಂಚೆನೆ ಎಚ್ಚದ ಪೊಲಬುಗಾದ್ https://ner.indianrailways.gov.in ವೆಬ್ಸೈಟ್ ಗ್ ಭೇಟಿ ಕೊರೊಲಿ.
ಕುಡ್ಲ: ಭಾರೀ ಗಾಳಿ ಬರ್ಸಗ್ ಕಟ್ವಾನದ ಮಿತ್ತ್ ಪಾಡಿನ ಮಲ್ಲ ಹೋರ್ಡಿಂಗ್ ತಿರ್ತ್ ಬೂರ್ದು, ಕಟ್ವಾನದ ಕೈತಲ್ ಉಂತಾಯಿನ ಸುಮಾರ್ ಗಾಡಿಗ್ ಪೆಟ್ಟಾಯಿನ ಘಟನೆ ಜು.5 ಬುಧಾರ ಬಿಕರ್ನಕಟ್ಟೆಡ್ ನಡತ್ಂಡ್.
ಈ ಘಟನೆಡ್ ಕೆಲವು ಅಂಗಡಿಗ್ ಪೆಟ್ಟಾತ್ಂಡ್. ಜಾಗೆಗ್ ಬತ್ತಿನ ಪೊಲೀಸೆರ್ ಹೋರ್ಡಿಂಗ್ ನ್ ದೈದೆರ್. ನೆರ್ದ್ ನಂತೂರು-ಪಡೀಲ್ ಮಾರ್ಗಡ್ ಒಂತೆ ಪೊರ್ತು ಗಾಡಿ ಸಂಚಾರಗ್ ತೊಂದರೆ ಆತ್ಂಡ್. ಅದೃಷ್ಟವಶಾತ್, ಹೋರ್ಡಿಂಗ್ ಬೂರ್ನಗ ತಿರ್ತ್ ಏರ್ಲಾ ಇಜ್ಜಂದಿನೆರ್ದಾವೆರ ಒವ್ವೇ ಜೀವಗ್ ತೊಂದರೆ ಆತಿಜಿ.
ಕುಡ್ಲ: ದಕ್ಷಿಣ ಕನ್ನಡ ಜಿಲ್ಲೆಡ್ ಸೋಮಾರ ಮಧ್ಯಾಹ್ನರ್ದ್ ಇತ್ತೆಲ ಬರ್ಸ ಬರೊಂದು ಉಂಡು. ನೆಕ್ಕ್ ಹವಾಮಾನ ಇಲಾಖೆ ಇನಿ ರೆಡ್ ಅಲರ್ಟ್ ಘೋಷಣೆ ಮಲ್ದ್ಂಡ್.
ನನದ 24 ಗಂಟೆಡ್ ತುಳುನಾಡ್ ಡ್ 20 ಸೆ.ಮೀ ಬರ್ಸ ಬರ್ಪಿನ ಅಂದಾಜಿ ಉಂಡು. ಅಂಚಾದ್ ಮೀನ್ ಗಾರೆರ್ ಕಡಲ್ ಗ್ ಜಪ್ಪದಿಲೆಕ್ಕ ಎಚ್ಚರಿಕೆ ಕೊರ್ತುಂಡು. ಅತ್ತಂದೆ ಶಾಲೆ ಕಾಲೇಜ್ ಗ್ ಇನಿ ದ.ಕ ಜಿಲ್ಲಾಧಿಕಾರಿ ರಜೆ ಘೋಷಣೆ ಮಲ್ದೆರ್. ತುಳುನಾಡ್ ಡ್ ಜುಲೈ 6, 7 ಕ್ಕ್ ಆರೆಂಜ್ ಅಲರ್ಟ್ ಘೋಷಣೆ ಆತ್ಂಡ್. ಬೊಕ್ಕ 8,9 ಕ್ಕ್ ಯೆಲ್ಲೋ ಅಲರ್ಟ್ ಘೋಷಣೆ ಆತ್ಂಡ್.
ದಕ್ಷಿಣ ಕನ್ನಡ ಜಿಲ್ಲೆಡ್ ಜು.3 ಬೊಲ್ಪುರ್ದ್ ಜು.5 ಬೊಲ್ಪು ಮುಟ್ಟ ಬೊಲ್ತೇರ್ ತಾಲೂಕ್ ದ ಮರೋಡಿಡ್ 202.5 ಮಿಲಿಮೀಟರ್ ಬರ್ಸ ಬೈದ್ಂಡ್. ಬೊಲ್ತೇರ್ ದ ಬಳಂಜಡ್ 196ಮಿ.ಮೀ, ಬಂಟ್ವಾಳ ತಾಲೂಕ್ ದ ಪಜೀರ್ ಡ್ 188 ಮಿ.ಮೀ ಬರ್ಸ ಬೈದ್ಂಡ್.
ಡೆಲ್ಲಿಡ್ ಜು.7 ಕ್ಕ್ ಬಿಜೆಪಿದ ಬೃಹತ್ ಸಭೆ ನಡಪರೆ ಉಂಡು.
ಈ ಸಭೆಟ್ಟ್ ಬಿಜೆಪಿ ರಾಷ್ಟ್ರೀಯ ಅಧ್ಯಕ್ಷೆರ್ ಜೆ.ಪಿ.ನಡ್ಡಾ, ರಾಷ್ಟ್ರೀಯ ಪ್ರಧಾನ ಕಾರ್ಯದರ್ಶಿ ಬಿಎಲ್ ಸಂತೋಷ್ ಸೇರಿನಂಚನೆ ಮತ ರಾಜ್ಯದ ರಾಜ್ಯಾಧ್ಯಕ್ಷೆರ್ ಪಾಲ್ ಪಡೆಯೆರೆ ಉಲ್ಲೆರ್.
ಮೊಕುಲು ಅತ್ತಂದೆ ರಾಜ್ಯದ ಮತ ಸಂಘಟನೆದ ಸಚಿವೆರ್ ಬೊಕ್ಕ ಉಸ್ತುವಾರಿಲು ಪಾಲ್ ಪಡೆಯೆರೆ ಉಲ್ಲೆರ್. ಈ ಸಭೆತ್ತ ಗುರ್ಕಾರ್ಮೆನ್ ರಾಷ್ಟ್ರೀಯ ಅಧ್ಯಕ್ಷೆರ್ ಒಯಿಸೊನ್ವೆರ್. ನನ ಬರ್ಪಿನ ಲೋಕಸಭೆ ವೋಟುದ ಕಾರ್ಯತಂತ್ರನ್ ಈ ಸಭೆಟ್ಟ್ ಆಲೋಚನೆ ಮಲ್ಪೆರೆ ಉಂಡು ಪಂದ್ ವರದಿ ಆತ್ಂಡ್.
ಭಾರತೀಯ ಪಶುಪಾಲನ್ ನಿಗಮ್ ಲಿಮಿಟೆಡ್ (BPNL) ಡ್ ಖಾಲಿ ಇಪ್ಪುನ 3444 ಬೇಲೆಗ್ ಅರ್ಜಿ ಸಂದಾಯೆರೆ ಇನಿಯೇ ಕಡೆತ್ತ ದಿನ ಆತ್ಂಡ್.
ನೆಟ್ಟ್ ಸರ್ವೇಯರ್, ಇನ್ ಚಾರ್ಚ್ ಸರ್ವೇಯರ್ ಬೇಲೆ ಉಂಡು. 10ನೇ ಕ್ಲಾಸ್, ಪಿಯುಸಿ ಪಾಸಾಯಿನ ಆಸಕ್ತ ಬೊಕ್ಕ ಅರ್ಹ ಅಭ್ಯರ್ಥಿಲು ಆನ್ ಲೈನ್ ಡ್ ಅರ್ಜಿ ಸಂದಾವೊಲಿ. ನೆತ್ತ ವೆಬ್ಸೈಟ್: www.bharatiyapashupalan.com
ರಾಜ್ಯ ಸರ್ಕಾರದ ವಿರುದ್ಧ ಬಿಜೆಪಿ ಪೊರ್ಂಬಾಟ ನಡಪಾಯಿನ ಬೆರಿಕ್ಕೆ ಇನಿ ಯುವ ಕಾಂಗ್ರೆಸ್ ಬಿಜೆಪಿ ಕಚೇರಿದ ಎದುರುಡ್ ಮಲ್ಲ ಪೊರ್ಂಬಾಟ ಮಲ್ಪರೆ ಉಂಡು.
ಯೂತ್ ಕಾಂಗ್ರೆಸ್ ಅಧ್ಯಕ್ಷೆರ್ ಮೊಹಮ್ಮದ್ ಹ್ಯಾರೀಸ್ ನಲಪಾಡ್ ಮುತಾಲಿಕೆಡ್ ಕೇಂದ್ರ ಸರ್ಕಾರ ಅನ್ನಭಾಗ್ಯಗ್ ಎಚ್ವದ ಅರಿ ಕೊರಂದಿನೆನ್ ವಿರೋಧಿಸಾದ್ ಈ ಪೊರ್ಂಬಾಟ ಮಲ್ಪರೆ ಉಲ್ಲೆರ್. ಅತ್ತಂದೆ ಕುಡೊಂಜಿ ಕಡೆಟ್ಟ್ ಬಿಜೆಪಿ ಸಂಸದೆರೆನ ಕಚೇರಿಗ್ ಪೊಗ್ಗೆರೆ ಕಾಂಗ್ರೆಸ್ ಕಾರ್ಯಕರ್ತೆರ್ ಆಲೋಚನೆ ಮಲ್ದೆರ್ ಪಂದ್ ವರದಿ ಆತ್ಂಡ್.
ನಾಗಾಲ್ಯಾಂಡ್ ದ ರಾಷ್ಟ್ರೀಯ ಹೆದ್ದಾರಿಡ್ ಭೂಮಿ ಅದ್ ರ್ ದ್, ಗುಡ್ಡೆಡಿತ್ತಿನ ಮಲ್ಲ ಪಾದೆ ಕಲ್ಲ್ ಕಾರ್ ದ ಮಿತ್ತ್ ಬೂರ್ದು 2 ಜನ ತೀರ್ ಪೋಯೆರ್.
ಈ ಘಟನೆಡ್ ಬಾಕಿದ 3 ಜನಕ್ಕ್ ಪೆಟ್ಟಾತ್ಂಡ್. ನೆತ್ತ ವಿಡಿಯೋ ವೈರಲ್ ಆತ್ಂಡ್. ನಾಗಾಲ್ಯಾಂಡ್ ಮುಖ್ಯಮಂತ್ರಿ ನೇಬಿ ಬಿರು ಮೇರ್ ತನ್ನ ಟ್ವಿಟರ್ ಡ್ ಈ ಘಟನೆದ ಬಗ್ಗೆ ಸಂತಾಪ ತೆರಿಪಾದೆರ್.
