ಶಕ್ತಿ ಯೋಜನೆದ ಮುಖೇನ ಪೊಂಜೋವ್ ನಕ್ಲೆಗ್ ರಾಜ್ಯ ಇಡೀ ಧರ್ಮೊಗು ಪ್ರಯಾಣ ಮಲ್ಪರೆ ಅವಕಾಶ ಉಂಡು.
ಈ ಸೌಲಭ್ಯ ಪಡೆಯೆರೆ ಕಲ್ಪಾರ್ಥಿಲು https://sevasindhu.karnataka.gov.in ಗ್ ಅರ್ಜಿ ಸಂದಾವೊಡು. ಈ ಸೌಲಭ್ಯನ್ https://mybmtc.karnataka.gov.in ಡ್ ಲ ಪಡೆವೊಲಿ. ಕಲ್ಪಾರ್ಥಿಲೆಗ್ ರಿಯಾಯಿತಿ ದರಡ್ ಈ ಸೌಲಭ್ಯ ಉಂಡು. ಕಲ್ಪಾರ್ಥಿಲು ರಾಜ್ಯದ ವಾ ಮೂಲೆಡ್ ಬೋಡಾಂಡಲ ಈ ಪಾಸ್ ಡ್ ಪ್ರಯಾಣ ಮಲ್ಪೊಲಿ. ಆಂಡ ಕಲ್ಪಾರ್ಥಿಲು ಮಾತ್ರ ನಿಗದಿತ ದೂರಗ್ ಬಿಎಂಟಿಸಿ ಬಸ್ ಟ್ಟ್ ಪ್ರಯಾಣ ಮಲ್ಪೊಲಿ.
ಪಕ್ಷಿಕೆರೆ ಪದ್ಮಶ್ರೀ ಪುರಸ್ಕೃತ ಸಾಲು ಮರದ ತಿಮ್ಮಕ್ಕ ಅಭಿಮಾನಿ ಬಳಗದ ಸದಸ್ಯೆರ್ (ಜು.7) ಕೋಡೆ ಬೆಂಗ್ಲೂರ್ ಡ್ ಇಪ್ಪುನ ಸಾಲು ಮರದ ತಿಮ್ಮಕ್ಕ ಮೆರೆನ ಸರಕಾರಿ ನಿವಾಸಗ್ ಪೋದು ಆರೆಗ್ ಮಾನಾದಿಗೆ ಮಲ್ತೆರ್.
ಈ ಪೊರ್ತುಡು ತಿಮ್ಮಕ್ಕ ಮೇರ್ ಇಡೀ ಕೂಟಗ್ ಎಡ್ಡೆಪ್ಪು ಬಯಕಿಯೆರ್. ಬೊಕ್ಕ ಕೂಟದ ಸದಸ್ಯೆರ್ ಆರೆನ ಸ್ವಗ್ರಾಮವಾಯಿನ ಮಾಗಡಿ ತಾಲೂಕ್ ಹುಲಿಕಲ್ಲ್ ಡ್ ಇಪ್ಪುನ ಆರೆನ ಮೂಲದ ಇಲ್ಲದ ಕೈತಲ್ ಆರೇ ನಡ್ನ ಮರಕ್ಲೆನ್ ತೂದು ಕುಸಿ ಪಡೆಯೆರ್. ಅವೆರ್ದ್ ಬೊಕ್ಕ ಸದಸ್ಯೆರ್ ಪಕ್ಷಿಕೆರೆ ಪರಿಸರೊಡು ಕೈತಲ್ ಕರಿನ 25 ವರ್ಷೊರ್ದಿಂಚ ಕೂಟದಕುಲು ಮಲ್ತಿನ ಪರಿಸರದ ಬೇಲೆದ ಬಗೆಟ್ಟ್ ಆರೆಗ್ ತೆರಿಪಾಯೆರ್.
ಪುತ್ತೂರ್: ಮಾಜಿ ಸಚಿವೆರ್, ಮಾಜಿ ಸಂಸದೆರ್ ವಿನಯ್ ಕುಮಾರ್ ಸೊರಕೆ ಮೆರೆನ ಅಮ್ಮ ಸುನೀತಿ ಅಚ್ಯುತ ಸೊರಕೆ (91) ಮೇರ್ ಹುಷಾರ್ ಇಜ್ಜಂದೆ ಇನಿ ಪುತ್ತೂರ್ ಖಾಸಗಿ ಆಸ್ಪತ್ರೆಡ್ ತೀರ್ ಪೋಯೆರ್.
ಮೆರೆಗ್ 3 ಜನ ಆಣ್ ಜೋಕುಲು, 2 ಪೊಣ್ಣು ಜೋಕುಲು, 8 ಪುಲ್ಲಿನಕುಲು, ಬೊಕ್ಕ 3 ಪುಲ್ಲಿಲೆನ ಜೋಕುಲು ಉಲ್ಲೆರ್. ಮೆರೆನ ಅಕೇರಿದ ಕ್ರಿಯೆ ಇನಿ ಮಧ್ಯಾಹ್ನ 1.30 ರ್ದ್ ಬೊಕ್ಕ ತನ್ನ ಇಲ್ಲ್ ಪುತ್ತೂರ್ ತಾಲೂಕ್ ದ ಸರ್ವೇ ಗ್ರಾಮದ ಸೊರಕೆಡ್ ನಡಪುಂಡು.
CBSE 10 ಬೊಕ್ಕ 12 ಕ್ಲಾಸ್ ದ ಪೂರಕ ಪರೀಕ್ಷೆದ ಪ್ರವೇಶ ಪತ್ರ ಬುಡುಗಡೆ ಮಲ್ದ್ಂಡ್.
ಸಾಮಾನ್ಯ ಕಲ್ಪಾರ್ಥಿಲು cbseit.in ವೆಬ್ಸೈಟ್ ಡ್ ತನ್ನ ಶಾಲೆದ ಪೊಲಬುದೊಟ್ಟಿಗೆ ಲಾಗ್ ಇನ್ ಮಲ್ಪುನ ಮುಖೇನ ಪ್ರವೇಶ ಕಾರ್ಡ್ ನ್ ಡೌನ್ಲೋಡ್ ಮಲ್ಪೊಡು. ಪೂರಕ ಪರೀಕ್ಷೆ ಜು.17 ರ್ದ್ ಸುರು ಆಪುಂಡು. CBSE 10 ಬೊಕ್ಕ 12 ನೇ ಕ್ಲಾಸ್ ದ ರಿಸಲ್ಟ್ ನ್ ಮೇ 12 ಕ್ಕ್ ಬುಡುಗಡೆ ಮಲ್ದ್ಂಡ್.
ಮುಖ್ಯಮಂತ್ರಿ ಸಿದ್ದರಾಮಯ್ಯ ಮೇರ್ ಸುಕ್ರಾರದಾನಿ ಮಂಡನೆ ಮಲ್ತಿನ ರಾಜ್ಯ ಬಜೆಟ್ ಮಾತ ವರ್ಗದಕ್ಲೆನ ಅಭಿವೃದ್ಧಿನ್ ಗ್ಯಾರಂಟಿಯಾದ್ ಮಲ್ಪುನ ಬಜೆಟ್ ಆದುಂಡು ಪಂದ್ ಕೆಪಿಸಿಸಿ ಪ್ರಧಾನ ಕಾರ್ಯದರ್ಶಿ ಪದ್ಮರಾಜ್ ಆರ್. ತೆರಿಪಾದೆರ್.
ಸರ್ವರೆಗ್ಲ ಸಮಪಾಲ್ ಸಮಬಾಳು, ಬಡವೆರ್ನ ಕಲ್ಯಾಣ, ಸಾಮಾಜಿಕ ನ್ಯಾಯ, ಸಾಮಾಜಿಕ ಸಮಾನತೆದ ಬಜೆಟ್ ನ್ ಮಂಡನೆ ಮಲ್ತ್ ದ್ ಸರ್ಕಾರ ಬಡವರ ಪರವಾದ್ ಉಂಡು ಪನ್ಪಿನೆನ್ ಎಂಬುದನ್ನು ಸಾಬೀತು ಮಲ್ದೆರ್. 5 ಗ್ಯಾರಂಟಿ ಯೋಜನೆಲೆಗ್ 52 ಸಾವಿರ ಕೋಟಿ ರೂ. ಅನುದಾನ, ಇಂದಿರಾ ಕ್ಯಾಂಟಿನ್ಗೆ 100 ಕೋಟಿ ರೂ. ಅನುದಾನ, ರೈತೆರೆಗ್ ಬಡ್ಡಿ ದಾಂತೆ ಸಾಲ ಸೌಲಭ್ಯನ್ 3ರಿಂದ 5 ಲಕ್ಷ ರೂ.ಗ್ ಎಚ್ಚ ಮಲ್ದೆರ್. ಸಮಾಜ ಕಲ್ಯಾಣ ಇಲಾಖೆಗೆ 11 ಸಾವಿರ ಕೋಟಿ ರೂ. ಅನುದಾನ, ಜಾನುವಾರು ಆಕಸ್ಮಿಕವಾದ್ ಸೈತ್ಂಡ್ ಅನುಗ್ರಹ ಯೋಜನೆಡ್ 10 ಸಾವಿರ ರೂ. ಪರಿಹಾರ ಮೂಲಸೌಕರ್ಯ ಅಭಿವೃದ್ಧಿಗಗ್ ಅನುದಾನ ಮೀಸಲು ದೀತೆರ್. ರೈತೆರ್ನ ಆದಾಯ ಜಾಸ್ತಿ ಮಲ್ಪರೆ ಯೋಜನೆ, ಮೀನುಗಾರ ಮಹಿಳೆಯೆರ್ನ ಸಾಲ ಮಿತಿ 3 ಲಕ್ಷ ರೂ. ಗ್ ಎಚ್ಚ ಮಲ್ದಿನಿ, ಮೀನ್ ಪತ್ತುನ ಬೋಟ್ ಡೀಸೆಲ್ ಮಿತಿ ಹೆಚ್ಚಳ, ದೇಶಡೇ ಸುರುತ್ತ ಸರ್ತಿ ಅಂಗಾಂಗ ಜೋಡನೆ ಆಸ್ಪತ್ರೆ, ಸರ್ಕಾರಿ ಶಾಲೆ ಅಭಿವೃದ್ಧಿಗ್ 550 ಕೋಟಿ ರೂ. ಮೀಸಲು, ಪರಿಷ್ಕೃತ ಪಠ್ಯ ಪರಿಷ್ಕರಣೆ, ಶಾಲಾ ಕಾಲೇಜಿಡ್ ಪೊಸ ಪಾಯಿಕಾನೆ ನಿರ್ಮಾಣಗ್ 200 ಕೋಟಿ ರೂ., 1-10ನೇ ಕ್ಲಾಸ್ ದ ಜೋಕ್ಲೆಗ್ ತೆತ್ತಿ, ಬಾರೆದ ಪರ್ಂದ್, ಜಿಲ್ಲಾ, ತಾಲೂಕು ಆಸ್ಪತ್ರೆಡ್ 219 ಡಯಾಲಿಸಿಸ್ ಸೆಂಟರ್ ಗ್ 92 ಕೋಟಿ, ಆರೋಗ್ಯ ಇಲಾಖೆಗೆ 14 ಸಾವಿರ ಕೋಟಿ ರೂ, ಮಾತ ಜಿಲ್ಲಾ ಆಸ್ಪತ್ರೆಡ್ ಸಿಟಿ, ಎಂಆರ್ಐ ಸ್ಕ್ಯಾನಿಂಗ್ ವ್ಯವಸ್ಥೆ, ಹಿಂದುಳಿದ ವರ್ಗದ ಕಲ್ಪಾರ್ಥಿಲೆಗ್ ಅರಿವು ಯೋಜನೆ ಇಂಚ ಮಸ್ತ್ ಜನಪರ ಯೋಜನೆ ಘೋಷಣೆ ಮಲ್ತ್ ದ್ ಅಭಿವೃದ್ಧಿ ಗ್ಯಾರಂಟಿ ಕೊರ್ತೆರ್ ಪಂದ್ ಪದ್ಮರಾಜ್ ಬಜೆಟ್ ದ ಬಗೆಟ್ಟ್ ಮೆಚ್ಚಿಗೆ ತೆರಿಪಾದೆರ್.
ಪುನೀತ್ ರಾಜ್ಕುಮಾರ್ ಪುದರ್ ಡ್ ಆಸ್ಪತ್ರೆಲೆಡ್ ಎಇಡಿ ಯಂತ್ರದ ಸ್ಥಾಪನೆ ಮಲ್ತ್ ದ್ ಹೃದಯಾಘಾತ ಪತ್ತೆ ಮಲ್ಪುನ ಸರ್ಕಾರದ ಕ್ರಮ ಸ್ವಾಗತಾರ್ಹ.ಆಂಡ ನಾರಾಯಣಗುರು ಅಭಿವೃದ್ಧಿ ನಿಗಮ ಸ್ಥಾಪನೆ ಮಲ್ತ್ ದ್ ವರ್ಷಗ್ 250 ಕೋಟಿ ರೂಪಾಯಿ ಮೀಸಲು ಕೊರ್ಪಿನವು ಪ್ರಣಾಲಿಕೆಡ್ ಕೊರ್ತೆರ್. ಆಂಡ ಈ ಬಜೆಟ್ಡ್ ಪ್ರಸ್ತಾಪ ಮಲ್ಪಂದಿನವು ನಿರಾಶೆ ಆತ್ಂಡ್. ದುಂಬುದ ದಿನಟ್ಟ್ ಈ ಬಗೆಟ್ಟ್ ಸರ್ಕಾರದ ಗಮನೊಗು ಕನರೆ ಉಂಡು ಪಂದ್ ಪದ್ಮರಾಜ್ ಆರ್. ತೆರಿಪಾದೆರ್.
ಮುಲ್ಕಿ : ಪಲಿಮಾರು ಗ್ರಾಮದ ಅವರಾಲು ಮಟ್ಟು ನಿವಾಸಿ ರಾಜು ಎನ್ ಪೂಜಾರಿ (87) ಮೇರ್ ಇನಿ ಬೊಲ್ಪುಗು ದೇವೆರೆ ಪಾದ ಸೇರಿಯೆರ್.
ಬೊಂಬೈಡ್ ಬ್ಯಾಂಕ್ ಆಪ್ ಬರೋಡಾಡ್ ಮಸ್ತ್ ವರ್ಷ ಸೇವೆ ಸಂದಾದ್ ನಿವೃತ್ತಿಯಾದ್ ಊರುಡು ವಾಸ ಮಲ್ತೊಂದಿತ್ತೆರ್. ಬೆನ್ನಿದ ಬೇಲೆ ಅಂಚೆನೆ ಸಮಾಜಸೇವೆಡ್ ಇತ್ತ್ ದ್ ಪುಗರ್ತೆ ಪಡೆದಿತ್ತೆರ್.
ರಾಜು ಪೂಜಾರ್ಲು ಹಿರಿಯ ಪತ್ರಕರ್ತೆರ್ ದಿನೇಶ್ ಅಮೀನ್ ಮಟ್ಟು ಮೆರೆನ ಅಕ್ಕನ ಕಂಡನಿ. ಮೆರೆಗ್ ಬೊಡೆದಿ ಬೊಕ್ಕ ರಡ್ಡ್ ಆಣ್ ಜೋಕುಲು ಉಲ್ಲೆರ್.
ಅರೆನ ಅಕೇರಿದ ಕಿರಿಯ ಎಲ್ಲೆ (8-7-2023) ಅವರಾಲು ಮಟ್ಟುದ ಇಲ್ಲಡ್ ಬೊಲ್ಪುಗು 9 ಗಂಟೆಗೆ ನಡಪರೆ ಉಂಡು.
ಕಾಸ್ರೋಡು: ಬೈಕ್ ಬೊಕ್ಕ ಜೀಪು ಆಕ್ಸಿಡೆಂಟ್ ಡ್ ಜವನೆಯೊರಿ ತೀರ್ ಪೋಯಿನ ಘಟನೆ ಜಾಲ್ಸೂರು ಚೆರ್ಕಳ ಮಾರ್ಗದ ಬೋವಿಕ್ಕಾನಡ್ ಕೋಡೆ ರಾತ್ರೆ ನಡತ್ಂಡ್.
ಮಲ್ಲ ಕಲ್ಲುಕಂಡದ ಅಖಿಲ್ (22) ಈ ಘಟನೆಡ್ ತೀರ್ ಪೋಯಿನ ಜವನೆ. ಈ ಬಗ್ಗೆ ಆದೂರು ಪೊಲೀಸ್ ಠಾಣೆಡ್ ಕೇಸ್ ದಾಖಲ್ ಆತ್ಂಡ್.
ಮಚ್ಚಿನ ಗ್ರಾಮದ ಕಿನ್ನಿಪಲ್ಕೆದ ಜಯ ಪೂಜಾರಿ ಮೆರೆನ ಇಲ್ಲ್ ದ ಕೊಟ್ಯಗ್ ತನ್ನತಿಗೆ ತೂ ಪೊತ್ತ್ ದ್ ಪೂರಾ ಕರೆಂಚಿನ ಘಟನೆ ಕೋಡೆ ರಾತ್ರೆ ನಡತ್ಂಡ್.
ಅತ್ತಂದೆ ಕೊಟ್ಯಡ್ ಇತ್ತಿನ ತಾರಾಯಿ, ಮರಿಯಾಲಗ್ ಮಲ್ತ್ ದ್ ದೀದಿತ್ತಿನ ಕನಕ್ಕ್ ಬೊಕ್ಕ ಸುಮಾರ್ ಸೊತ್ತುಲು ಈ ತೂಟ್ಟ್ ಪೊತ್ತ್ ದ್ ಭಸ್ಮ ಆತ್ಂಡ್. ನೆರ್ದ್ ಮೊಕ್ಲೆಗ್ ಮಸ್ತ್ ನಷ್ಟ ಆತ್ಂಡ್.
ಈ ಘಟನೆದ ಜಾಗೆಗ್ ಗ್ರಾಮ ಪಂಚಾಯತ್ ಅಧ್ಯಕ್ಷೆರಾಯಿನ ಚಂದ್ರಕಾಂತ ನಿಡ್ಡಜೆ, ಗ್ರಾಮದ V A ಸತೀಶ್ ಪಿಂಟೋ ಭೇಟಿ ಕೊರ್ದು ಪರಿಶೀಲನೆ ಮಲ್ದೆರ್.
ಕೊಯಮತ್ತೂರುದ ಡಿಐಜಿ ವಿಜಯಕುಮಾರ್ ಐಪಿಎಸ್ ಮೇರ್ ಪಾಂಥಯ ಸಲೈಡ್ ಇಪ್ಪುನ ತನ್ನ ಕ್ಯಾಂಪ್ ಕಚೇರಿಡ್ ಸುಕ್ರಾರ ಗುಂಡು ಪಾಡ್ದ್ ಆತ್ಮಹತ್ಯೆ ಮಲ್ತೊಂದೆರ್.
2009ತ್ತ ಐಪಿಎಸ್ ಬ್ಯಾಚ್ ದಾರಾಯಿನ ಮೇರ್, 2022 ನೇ ಇಸವಿಡ್ ಜನವರಿ 6 ಕ್ಕ್ ಚೆನ್ನೈದ ಅಣ್ಣಾನಗರ ಡೆಪ್ಯುಟಿ ಕಮಿಷನರ್ ಬೇಲೆರ್ದ್ ಕೊಯಮತ್ತೂರು ಡಿಐಜಿ ಆಯೆರ್. ಅತ್ತಂದೆ ಕಾಂಚೀಪುರಂ, ಕಡಲೂರು, ನಾಗಪಟ್ಟಿಣಂ ಬೊಕ್ಕ ತಿರುವರೂರ್ ಡ್ ಡಿಎಸ್ಪಿಯಾದ್ ಬೇಲೆ ಮಲ್ದೆರ್.
ಆತ್ಮಹತ್ಯೆಗ್ ಕಾರಣ ನನ ಗೊತ್ತಾವೊಡಾತೆ. ತಮಿಳುನಾಡ್ ಪೊಲೀಸೆರ್ ಕೇಸ್ ದಾಖಲ್ ಮಲ್ತ್ ದ್ ತನಿಖೆ ಮಲ್ತೊಂದು ಉಲ್ಲೆರ್.
ಬಂಟ್ವಾಳ ತಾಲೂಕ್ ದ ಸಜೀಪಮುನ್ನೂರು ಗ್ರಾಮದ ನಂದಾವರ ಗುಂಪು ಇಲ್ಲ್ ದ ಮಿತ್ತ್ ಗುಡ್ಡೆ ಜರಿದ್ ಬೂರ್ದು ಇಲ್ಲ್ ದೊಲಯಿ ಇತ್ತಿನ ರಡ್ಡ್ ಪೊಂಜೋವ್ ಲೆಡ್ ಒಂಜಿ ಪೊಂಜೋವ್ ತೀರ್ ಪೋಯಿನ ಘಟನೆ ನಡತ್ಂಡ್.
ಕುಡೊರ್ತಿನ್ ಕೈತಲ್ ದಕುಲು ಪೂರ ಸೇರ್ದ್ ಬಚಾವ್ ಮಲ್ದೆರ್. ನಂದಾವರ ನಿವಾಸಿ ಮಹಮ್ಮದ್ ಮೆರೆನ ಬೊಡೆದಿ ಝರೀನಾ (49) ಈ ಘಟನೆಡ್ ತೀರ್ ಪೋಯಿನಾರ್. ಬೊಕ್ಕ ಶಫಾ (20) ಪನ್ಪಿನಾರೆನ್ ಬಚಾವ್ ಮಲ್ದೆರ್.
ಈ ಘಟನೆದ ಜಾಗೆಡ್ ಬಂಟ್ವಾಳ ಅಗ್ನಿಶಾಮಕ ಅಧಿಕಾರಿಲು, ಪೊಲೀಸೆರ್, ತಾಲೂಕ್ ಆಡಳಿತ ಸಿಬ್ಬಂದಿ , ತಹಶೀಲ್ದಾರ್ ಎಸ್.ಬಿ.ಕೂಡಲಗಿ ಇತ್ತೆರ್.
