July 2023

ಇನಿ ನಾರಾಯಣ ಗುರು ಯುವ ವೇದಿಕೆದ 24ನೇ ವರ್ಷದ ಬ್ರಹ್ಮಶ್ರೀ ಬಂಗಾರ್ದ ಪದಕ ಕೊರ್ಪಿನ ಲೇಸ್

ಕುಡ್ಲ : ಶ್ರೀ ನಾರಾಯಣ ಗುರು ಯುವ ವೇದಿಕೆ (ರಿ.) ದ 24ನೇ ವರ್ಷದ ಬ್ರಹ್ಮಶ್ರೀ ಬಂಗಾರದ ಪದಕ ಪ್ರದಾನ, ಕಲ್ಪಾರ್ಥಿ ವೇತನ, ಸಾಧಕೆರೆಗ್ ಮಾನಾದಿಗೆದ ಲೇಸ್ (ಜು.7) ಇನಿ ಬೊಲ್ಪುಗು ಕುಡ್ಲ ಪುರಭವನಡ್ ‌ನಡಪರೆ ಉಂಡು.

ಕರ್ನಾಟಕ ವಿಧಾನಸಭೆತ್ತ ಸಭಾಧ್ಯಕ್ಷೆರ್ ಯು.ಟಿ ಖಾದರ್ ಫರೀದ್ ಈ ಲೇಸ್ ಉದಿಪನ ಮಲ್ಪುವೆರ್. ನೆತ್ತ ಗುರ್ಕಾರ್ಮೆನ್ ನಾರಾಯಣ ಗುರು ಯುವ ವೇದಿಕೆದ ಅಧ್ಯಕ್ಷೆರ್ ಬೃಜೇಶ್ ಅಂಚನ್ ಒಯಿಸೊನ್ವೆರ್. ವಿಧಾನ ಪರಿಷತ್ ಸದಸ್ಯೆರ್ ಬಿ.ಕೆ ಹರಿಪ್ರಸಾದ್ ಬ್ರಹ್ಮಶ್ರೀ ಬಂಗಾರದ ಪದಕ ಪ್ರದಾನ ಮಲ್ಪರೆ ಉಲ್ಲೆರ್. ಕುಡ್ಲ ಶಿರ್ಡಿ ಬಾಬಾ ರಿಯಲ್ ಎಸ್ಟೇಟ್ ದ ಧಣಿ ರತೀಂದ್ರನಾಥ ಹೆಚ್ ಈ ಪದಕದ ಪ್ರಾಯೋಜಕೆರಾತೆರ್. ಶಾಸಕೆರ್ ವೇದವ್ಯಾಸ ಕಾಮತ್, ಮಾಜಿ ಸಚಿವೆರ್ ವಿನಯ ಕುಮಾರ್ ಸೊರಕೆ ಕಲ್ಪಾರ್ಥಿ ವೇತನನ್ ಪಟ್ಟುವೆರ್. ಆತ್ಮಶಕ್ತಿ ಪ್ರಧಾನ ಸಂಪಾದಕೆರ್, ಶಿಕ್ಷಣ ತಜ್ಞೆರ್ ವಾಮನ ಕೆ ಮೆರೆಗ್ ತಮ್ಮನ ಮಲ್ಪರೆ ಉಲ್ಲೆರ್.

ಮಲ್ಲ ಬಿನ್ನೆರಾದ್ ಮಾಜಿ ಸಚಿವೆರ್ ಕೃಷ್ಣ ಜೆ.ಪಾಲೆಮಾರ್, ಪನಾಮ ಕಾರ್ಪೊರೇಷನ್ ಸಿಇಒ ವಿವೇಕ್ ರಾಜ್ ಪೂಜಾರಿ, ಎಸಿಪಿ ಮಹೇಶ ಕುಮಾರ್, ಅಖಿಲ ಭಾರತ ಬಿಲ್ಲವರ ಮಹಿಳಾ ಸಂಘದ ಅಧ್ಯಕ್ಷೆರ್ ಸುಮಲತಾ ಯನ್ ಸುವರ್ಣ, ಕುದ್ರೋಳಿ ಶ್ರೀ ಗೋಕರ್ಣನಾಥ ಕ್ಷೇತ್ರದ ಕೋಶಾಧಿಕಾರಿ, ಗುರುಬೆಳದಿಂಗಳು ಚೇರ್ ಮೆನ್ ಪದ್ಮರಾಜ್ ಆರ್, ದಿವ್ಯದೀಪ ಕನ್ಸ್ ಟ್ರಕ್ಸನ್ಸ್ ದ ಧಣಿ ಯಾದವ್ ಕೋಟ್ಯಾನ್, ರಾಣಿ ಅಬ್ಬಕ್ಕ ಅಕಾಡೆಮಿದ ತರಬೇತಿ ಅಧಿಕಾರಿ ಕ್ಯಾಪ್ಟನ್ ದಾಸಪ್ಪ ಪೂಜಾರಿ ನೆಕ್ಕಿಲಾರ್ ಪಾಲ್ ಪಡೆಯೆರೆ ಉಲ್ಲೆರ್. ಅಂಚೆನೆ 9 ಗಂಟೆರ್ದ ಮರಿಯಲದ ಮಿನದನ ಸಾಂಸ್ಕೃತಿಕ ಲೇಸ್ ನಡಪರೆ ಉಂಡು. ಮಧ್ಯಾಹ್ನ ವನಸ್ ದ ವ್ಯವಸ್ಥೆ ಉಂಡು ಪಂದ್ ಲೆಪ್ಪೋಲೆಡ್ ತೆರಿಪಾದೆರ್.

ಶ್ರೀಕೇತ್ರ ಧರ್ಮಸ್ಥಳಗ್ ದ.ಕ. ಜಿಲ್ಲಾ ಉಸ್ತುವಾರಿ ಸಚಿವೆರ್ ದಿನೇಶ್ ಗುಂಡೂರಾವ್ ಭೇಟಿ

ಬೊಲ್ತೇರ್: ಶ್ರೀಕ್ಷೇತ್ರ ಧರ್ಮಸ್ಥಳಗ್ ದಕ್ಷಿಣ ಕನ್ನಡ ಜಿಲ್ಲಾ ಉಸ್ತುವಾರಿ ಸಚಿವೆರ್, ಆರೋಗ್ಯ ಸಚಿವೆರ್ ದಿನೇಶ್ ಗುಂಡೂರಾವ್ ಭೇಟಿ ಕೊರ್ತೆರ್.

ಕೋಡೆ ರಾತ್ರೆನೇ ಧರ್ಮಸ್ಥಳಗ್ ಬತ್ತ್ ದ್ ವಾಸ ಇತ್ತಿನ ಮೇರ್ ಇನಿ ಬೊಲ್ಪುಗು ಧರ್ಮಸ್ಥಳದ ಧರ್ಮಾಧಿಕಾರಿ ಡಾ. ವೀರೇಂದ್ರ ಹೆಗ್ಗಡೆರೆನ್ ಭೇಟಿ ಮಲ್ತ್ ದ್ ದೇವೆರೆನ ದರ್ಶನ ಪಡೆತೆರ್.

ಈ ಪೊರ್ತುಡು ಮೆರೆನೊಟ್ಟಿಗೆ ವಿಧಾನ ಪರಿಷತ್ ಸದಸ್ಯೆರ್ ಹರೀಶ್ ಕುಮಾರ್ ಬೊಕ್ಕ ಕಾಂಗ್ರೆಸ್ ಮುಖಂಡೆರ್ ರಕ್ಷಿತ್ ಶಿವರಾಂ ಇತ್ತೆರ್.

ದಕ್ಷಿಣ ಕನ್ನಡ ಜಿಲ್ಲಾ ಅಪರ ಜಿಲ್ಲಾಧಿಕಾರಿಯಾದ್ ಡಾ.ಜಿ.ಸಂತೋಷ್ ಕುಮಾರ್ ನೇಮಕ

ಕುಡ್ಲ: ದಕ್ಷಿಣ ಕನ್ನಡ ಜಿಲ್ಲಾ ಅಪರ ಜಿಲ್ಲಾಧಿಕಾರಿಯಾದ್ ಡಾ.ಸಂತೋಷ ಕುಮಾರ್‌ ಮೇರ್ ನೇಮಕ ಆತೆರ್.

ದ.ಕ.ಜಿಲ್ಲಾ ಅಪರ ಜಿಲ್ಲಾಧಿಕಾರಿ ಆದಿತ್ತಿನ ಎಚ್.ಕೃಷ್ಣಮೂರ್ತಿ ವರ್ಗಾವಣೆ ಆಯಿನ ಕಾರಣ ಮೆರೆನ ಜಾಗೆಗ್ ಚಿಕ್ಕಬಳ್ಳಾಪುರದ ಉಪವಿಭಾಗಾಧಿಕಾರಿ ಆದಿತ್ತಿನ ಸಂತೋಷ್ ಮೆರೆನ್ ನೇಮಕ ಮಲ್ಪರೆ ಸರಕಾರ ಸುಕ್ರಾರ ಆದೇಶ ಕೊರ್ತುಂಡು.

ಜುಲೈ 16 ರ್ದ್ ಗೃಹ ಲಕ್ಷ್ಮೀ ಯೋಜನೆಗ್ ಅರ್ಜಿ ಸಂದಾವೊನ ಪ್ರಕ್ರಿಯೆ ಸುರು

ಬೆಂಗ್ಲೂರ್: ಗೃಹ ಲಕ್ಷ್ಮೀ ಯೋಜನೆಗ್ ಅರ್ಜಿ ಸಂದಾವುನ ಪ್ರಕ್ರಿಯೆ ಜುಲೈ 16 ರ್ದ್ ಸುರು ಆಪುಂಡು.

ಆಗಸ್ಟ್‌ 15 ಅತ್ತಂಡ 16 ಕ್ಕ್ ನಿಕ್ಲೆನ ಎಕೌಂಟ್ ಗ್ ಕಾಸ್ ಬರ್ಪುಂಡು ಪಂದ್ ಸಿಎಂ ಸಿದ್ದರಾಮಯ್ಯೆರ್ ತೆರಿಪಾದೆರ್‌.

ಮೇರ್ ಸುಕ್ರಾರ ಬಜೆಟ್‌ ಮಂಡನೆದ ಬೊಕ್ಕ ಪಾತೆರ್ದ್, ಈ ಬಜೆಟ್‌ ಐನ್ ಗ್ಯಾರಂಟಿಲು ಬೊಕ್ಕ ಎಂಕ್ಲೆನ ವೋಟುದ ಪ್ರಣಾಳಿಕೆಡ್ ತೆರಿಪಾಯಿನ ಭರವಸೆಲು ಉಂಡು. ಉಂದು ಗ್ಯಾರಂಟಿ ಬಜೆಟ್‌ ಆತ್ಂಡ್ ಪಂದ್ ಪಂಡೆರ್.

ವಿಟ್ಲಡ್ ಬಲ್ಲ್ ಪಾಡೊಂದು ತೀರ್ ಪೋಯಿನ ಜವನೆ

ವಿಟ್ಲ: ಜವನೆಯೊರಿ ಬಲ್ಲ್ ಪಾಡೊಂದು ತೀರ್ ಪೋಯಿನ ಘಟನೆ ವಿಟ್ಲಡ್ ನಡತ್ಂಡ್.

ಪ್ರಶಾಂತ್ ಮೇಗಿನಪೇಟೆ (30) ತೀರ್ ಪೋಯಿನಾರ್. ‌ಮೇರ್ ಸರಕಾರಿ ಆಸ್ಪತ್ರೆಡ್ ಡಿ ಗ್ರೂಪ್ ಡ್ ಬೇಲೆ ಮಲ್ತೊಂದು ಇತ್ತೆರ್. ಮೆರೆಗ್ ಬೊಡೆದಿ ಬೊಕ್ಕ ಬಾಲೆ ಉಲ್ಲೆರ್.

ದೈವಾರಾಧನೆದ ನಿಂದನೆ, ಪೊಂಜೋವ್ ನಕ್ಲೆನ ಬಗ್ಗೆ ಬೊರ್ಚಂದಿನ ಪೋಟೋ ಪೋಸ್ಟ್ ಮಲ್ತಿನ ಕೇಸ್ ದ ಆರೋಪಿ ಅರೆಸ್ಟ್

ಟ್ವಿಟರ್ ಡ್ ನಕಲಿ ಎಕೌಂಟ್ ಡ್ ತುಳುನಾಡ್ ದ ದೈವಾರಾಧನೆನ್ ನಿಂದನೆ ಬೊಕ್ಕ ಪೊಂಜೋವ್ ನಕ್ಲೆನ ಬಗ್ಗೆ ಬೊರ್ಚಂದಿನ ಪೋಟೋನ್ ಪೋಸ್ಟ್ ಮಲ್ತಿನ ಕೇಸ್ ದ ಆರೋಪಿನ್ ಸೆನ್ ಕ್ರೈಮ್ ಪೊಲೀಸೆರ್ ಅರೆಸ್ಟ್ ಮಲ್ದೆರ್.

ಬೆಂಗಳೂರು ಉತ್ತರ ತಾಲೂಕು ಅಮೃತಹಳ್ಳಿ ನಿವಾಸಿ ಶಿವರಾಜ್ ಎಚ್. ಕೆ (37) ಆರೋಪಿ.

ಈ ಬಗೆಟ್ಟ್ ತುಳುನಾಡ್ ದ ದೈವಾರಾಧನೆ ಸಂರಕ್ಷಣಾ ಯುವ ವೇದಿಕೆ (ರಿ.) ದಕುಲು ಸೆನ್ ಕ್ರೈಮ್ ಪೊಲೀಸೆರೆಗ್ ದೂರು ಕೊರ್ದಿತ್ತೆರ್. ಅಂಚನೆ ಪೊಲೀಸೆರ್ ಕ್ರೈಮ್ ಪೊಲೀಸ್ ಠಾಣೆಡ್ ಕೇಸ್ ದಾಖಲ್ ಮಲ್ತ್ ಇತ್ತೆರ್.

ಆರೋಪಿನ್ ಕುಡ್ಲದ 7ನೇ ಜೆ.ಎಂ.ಎಫ್.ಸಿ ಕೋರ್ಟ್ ಹಾಜರ್ ಮಲ್ದೆರ್.

ಈ ಕೇಸ್ ದ ಆರೋಪಿನ್ ಪತ್ತುನ ಬೇಲೆಡ್ ಕುಡ್ಲ ಪೇಂಟೆದ ಪೊಲೀಸ್ ಆಯುಕ್ತೆರ್ ಕುಲದೀಪ್ ಕುಮಾರ್ ಆರ್ ಜೈನ್, ಸಿಸಿಬಿ ಘಟಕದ ಎಸಿಪಿ ಆಯಿನ ಪಿಎ ಹೆಗ್ಡೆ, ಕುಡ್ಲ ಪೇಂಟೆದ ಸೆನ್ ಕ್ರೈಮ್ ಪೊಲೀಸ್ ಠಾಣೆದ ಪೊಲೀಸ್ ಇನ್ಸ್ ಪೆಕ್ಟರ್ ಸತೀಶ್ ಎಂಪಿ ಬೊಕ್ಕ ಸಿಬ್ಬಂದಿಲು ಇತ್ತೆರ್.

ರೇಡಿಯೊ ಮಣಿಪಾಲ್ ಡ್ ಕಥೆ ಕೇಳೋಣ ಸರಣಿ ಲೇಸ್

ಮಣಿಪಾಲ: ರೇಡಿಯೊ ಮಣಿಪಾಲ್ 90.4 Mhz ಡ್ ಕನ್ನಡ ಸಾಹಿತ್ಯ ಪರಿಷತ್ ಒಡಿಪು ಜಿಲ್ಲೆ ಬೊಕ್ಕ ತಾಲೂಕ್ ಘಟಕದ ಒಟ್ಟುಸೇರಿಗೆಡ್ ಕಥೆ ಕೇಳೋಣ ಸರಣಿ ಲೇಸ್ ದ 62ನೇ ಸಂಚಿಕೆ ಜು.8 ಸನಿಯಾರ ಬಯ್ಯಗ್ 4.30ಕ್ಕ್ ಪ್ರಸಾರ ಆಪುಂಡು.

ಈ ಸಂಚಿಕೆಡ್ ಸಾಹಿತ್ಯಾಸಕ್ತೆರ್, ರಂಗನಟೆ ಆಯಿನ ಮೋಹನ್ ಮಾರ್ನಾಡ್ ಪಾಲ್ ಪಡೆಯೆರೆ ಉಲ್ಲೆರ್. ನನ ಜು.9 ಕ್ಕ್ ಮಧ್ಯಾಹ್ನ 12.30ಕ್ಕ್ ಕುಡೊರ ಪ್ರಸಾರ ಆಪುಂಡು.

ತರಕಾರಿ ಬಿಲೆ ಕುಡ ಎಚ್ಚ

ರಾಜ್ಯಡ್ ತರಕಾರಿ ಬಿಲೆ ದಿನರ್ದ್ ದಿನಕ್ಕ್ ಎಚ್ಚಾವೊಂದೆ ಉಂಡು. ಇನಿ ಕುಡ ಬಿಲೆ ಎಚ್ಚಾತ್ಂಡ್.

ಟೊಮೆಟೋ ಕೆಜಿಗ್ 120 ಆತ್ಂಡ್. ನೀರುಳ್ಳಿ ಬಿಲೆ 6 ರೂ. ಎಚ್ಚಾತ್ಂಡ್. ಗ್ರೀನ್ ಚಿಲ್ಲಿ ಬೊಕ್ಕ ಬೀಟ್ರೂಟ್ ಬಿಲೆ 6 ರೂ., ಬೇಬಿ ಕಾರ್ನ್ ಬಿಲೆ ಕೆಜಿಗ್ 13 ರೂ., ಬೊಳ್ಳುಳ್ಳಿ ಬಿಲೆ ಕೆಜಿಗ್ 14 ರೂ. ಎಚ್ಚಾತ್ಂಡ್ ಪಂದ್ ವರದಿ ಆತ್ಂಡ್. ನುರ್ಗೆ, ಬಟಾಣಿ, ಬೆಂಡೆಕಾಯಿ ಬಿಲೆ 2-5 ರೂ. ಮುಟ್ಟ ಎಚ್ಚಾತ್ಂಡ್.