July 2023

ಶಬರಿಮಲೆತ್ತ ಇತಿಹಾಸಡೇ ಸುರುತ್ತ ಸರ್ತಿ ನಡತ್ಂಡ್ ಯಕ್ಷಗಾನ

ಕುಡ್ಲ: ಇತಿಹಾಸಡೇ ಸುರುತ್ತ ಸರ್ತಿ ದೇವರನಾಡು ಕೇರಳದ ಪುಣ್ಯ ಕ್ಷೇತ್ರ ಶಬರಿಮಲೆ ಅಯ್ಯಪ್ಪ ಸ್ವಾಮಿ ದೇವೆರೆನ ಸನ್ನಿಧಿಡ್ ಜುಲೈ 19 ಗ್ ಯಕ್ಷಗಾನ ನಡತ್ಂಡ್.

ತೆಂಕುತಿಟ್ಟ್‌ದ ಪುಗರ್ತೆದ ಮೇಳಡ್ ಒಂಜಾಯಿನ ಬಪ್ಪನಾಡು ಶ್ರೀ ದುರ್ಗಾಪರಮೇಶ್ವರಿ ದಶಾವತಾರ ಯಕ್ಷಗಾನ ಮಂಡಳಿ ಮೂಲ್ಕಿ ಬೊಕ್ಕ ಯಕ್ಷ ತೆಲಿಕೆ ತಂಡದ ಕಲಾವಿದೆರ್ ಅಂಚನೆ ಪುಗರ್ತೆದ ಹಾಸ್ಯ ಕಲಾವಿದೆರ್ ದಿನೇಶ್ ಕೋಡಪದವು ಮೊಕಲೆನ ಸಂಯೋಜನೆಡ್ “ಕ್ಷೇತ್ರಪಾಲ ಉದ್ಧರಣ” ಪನ್ಪಿನ ಯಕ್ಷಗಾನ ಪ್ರದರ್ಶನ ಆಂಡ್.

ಹಿಮ್ಮೇಳಡ್ ಭಾಗವತೆರ್ ಆದ್ ಧೀರಜ್ ರೈ ಸಂಪಾಜೆ, ಮದ್ದಳೆಡ್ ರೋಹಿತ್ ಉಚ್ಚಿಲ, ಚೆಂಡೆಡ್ ಜಿತೇಶ್ ಕೋಳ್ಯೂರು ಇತ್ತೆರ್.

ಕ್ಷೇತ್ರದ ಪುದರ್ ಹಾಳ್ ಮಲ್ಪಡೆ, ಒವ್ವೇ ತನಿಖೆಲ ಮಲ್ಪಡ್ : ಡಾ.ವೀರೇಂದ್ರ ಹೆಗ್ಗಡೆರ್

“ಸೌಜನ್ಯ ಕೇಸ್‌ನ್ ಸುರುಕ್ ಸಿ.ಬಿ.ಐ ಗ್ ಕೊರ್ರೆ ಪಂತಿನೇ ಯಾನ್, ಈ ಕೇಸ್ ಗ್ ಲ ಎಂಕ್ಲೆಗ್ ಲ ದಾಲ ಸಂಬಂಧ ಇಜ್ಜಿ. ಅಕುಲ್ ದಾದ ಬೋಡಾಂಡಲ ತನಿಖೆ ಮಲ್ಪಡ್, ನನಲ ತನಿಖೆ ಮುಂದುವರಿಸಾವಡ್, ಎಂಕ್ಲೆಗ್ ದಾಲ ತೊಂದರೆ ಇಜ್ಜಿ. ಒವ್ವೆ ರೀತಿದ ಪೋಡಿಗೆ ಇಜ್ಜಿ, ಸಂಕೋಚ ಇಜ್ಜಿ, ಸಂದೇಹಲ ಇಜ್ಜಿ. ದಾಯೆ ಪಂಡ ಯಾನ್ ದುಂಬು ಎಂಚ ಇತ್ತೆನ ಅಂಚನೆ ನಿರ್ಮಲವಾದ್ ಉಲ್ಲೆ ಪಂದ್ ಧರ್ಮಸ್ಥಳ ದ ಧರ್ಮಾಧಿಕಾರಿ ಡಾ.ವೀರೇಂದ್ರ ಹೆಗ್ಗಡೆರ್ ಪಂಡೆರ್.

ಧರ್ಮಸ್ಥಳಡ್ ಗುರುವಾರ ನಡತಿನ ವಿಭಾಗೀಯ ಮುಖ್ಯಸ್ಥೆರ್ನ ಸಭೆಟ್ಟ್ ಪಾತೆರಿನ ಆರ್ ಈ ವಿಷಯ ಪಂಡೆರ್.

ಈ ಕ್ಷೇತ್ರಡ್ ಕರಿನ 60 ವರ್ಷಡ್ ಬಾರಿ ಬದಲಾವಣೆ ಆತ್‌ಂಡ್. ಮಾತಾ ಕಾರ್ಯಕ್ರಮಡ್ ಸೇವೆ, ಜನಪರ ಕಾರ್ಯಕ್ರಮನ್ ಮಲ್ತೊಂದು ಬೈದ. ಅವೆಟ್ ಏತೋ ಕೆಲಸಲು ಪೊಸ ಪೊಸ ರೀತಿಡ್ ಆತ್‌ಂಡ್. ಗ್ರಾಮೀಣಾಭಿವೃದ್ದಿ ಯೋಜನೆ ಶುರು ಅಯಿರ್ದ್ ಬೊಕ್ಕ ಅನೇಕ ಪಟ್ಟಿ ಬೈದ್ಂಡ್. ದಾಯೆಪಂಡ ಜನಕ್ಲೆಲೆಗ್ ಈ ಯೋಜನೆರ್ದ್ ಉಪಕಾರ ಆವೊಂದುಂಡು ಅಚಾಂದ್ ಎಂಕ್ಲೆಗ್ ಕೋಟ್ಯಾಂತರ ಜನಕ್ಲೆನ ಅಭಿಮಾನ ಉಂಡು. ಅಂಚನೆ ಕೆಲವರೆಗ್ ದ್ವೇಷಲ ಉಂಡು ಪಂಡೆರ್.

ಬೊಲ್ಪುರ್ದ್ ಬಯ್ಯ ಮುಟ್ಟ ಮೂಲು ಅನೇಕ ರೀತಿದ ಕೆಲಸ ಇಪ್ಪುನೆರ್ದಾತ್ರ ಇಂಚಿನ ಮಾತ ವಿಷಯ ತರೆಕ್ ಪೋಪುಜಿ.ಆಂಡ ಅನವಶ್ಯಕವಾದ್ ದಾಯೆ ಶತ್ರುತ್ವ ಬುಲೆಪಾವೊಂದುಲ್ಲೆರ್ ಪನ್ಪುನ ಮಲ್ಲ ಸಮಸ್ಯೆ. ಯಾನ್ ಈತ್ನಮುಟ್ಟ ದಾಯೆ ಮನಿಪಂದೆ ಕುಲ್ದೆ ಪಂಡ, ಯಾನ್ ಪಾತೆರ್ಂಡ ಅಯಿಕ್ ಪಾತೆರಕತೆ ಶುರು ಆಪುಂಡು. ಅಂಚ ಆವರೆ ಬಲ್ಲಿ ಪಂದ್ ಪಾತೆರ್ದಿಜಿ ಪಂದ್ ಪಂಡೆರ್.

ಇತ್ತೆ ಒಂಜಿ ಮಲ್ಲ ಮುಗಲ್ ಅಡ್ಡ ಬತ್ತಿಲೆಕ ಆತ್‌ಂಡ್. ಉಂದೆನ್ ದೆಪ್ಪೊಡ್. ಉಂದು ಎಂಕ್ಲೆರ್ದ್ ದೆಪ್ಪರೆ ಸಾಧ್ಯ ಇಜ್ಜಿ. ದೇವೆರೇ ದೆಪ್ಪೊಡು. ನೈತಿಕ ಶಕ್ತಿರ್ದ್ ಮಲ್ಲ ಶಕ್ತಿ ಒವ್ಲ ಇಜ್ಜಿ ಪಂದ್ ಖಾವಂದೆರ್ ಪಂಡೆರ್.

ಅಡ್ಯಾರ್ ಡ್ ಆ್ಯಕ್ಸಿಡೆಂಟ್: ಇಂಜಿನಿಯರಿಂಗ್ ವಿದ್ಯಾರ್ಥಿ ತೀರ್‌ಪೋಯೆರ್

ಕುಡ್ಲ: ಮಾರ್ಗದ ತಡಮೆಗ್ ಬೈಕ್ ಗುದ್ದುದು ಇಂಜಿನಿಯರಿಂಗ್ ವಿದ್ಯಾರ್ಥಿಯೊರಿ ಬುಧಾರ ಅಡ್ಯಾರ್ ದಲ್ಪ ತೀರ್‌ ಪೋಯೆರ್.

ಮಹಮ್ಮದ್ ನಶತ್(21 ವ) ತೀರ್‌ಪೋಯಿನ ವಿದ್ಯಾರ್ಥಿ
ಪಂದ್ ಗುರ್ತಿಸಾದೆರ್. ಅಡ್ಯಾರ್ ದ ಸಹ್ಯಾರ್ದಿ ಕಾಲೇಜ್‌ದ ಎದುರು ಈ ಆ್ಯಕ್ಸಿಡೆಂಟ್ ಆತ್ಂಡ್.

ರೇಡಿಯೋ ಮಣಿಪಾಲಡ್ “ಚಿಣ್ಣರ ದನಿ”

ರೇಡಿಯೊ ಮಣಿಪಾಲ್ ಬೊಕ್ಕ ವಾಯ್ಸ್ ಆಫ್ ಆರಾಧನಾ ಸಂಸ್ಥೆದ ಸಹಯೋಗಡ್ “ಚಿಣ್ಣರ ದನಿ” ಕಾರ್ಯಕ್ರಮ ಜು.19ದಾನಿ 5.30 ಗಂಟೆಗ್ ಪ್ರಸಾರ
ಆವರೆ ಉಂಡು.

ಇನಿ ಪ್ರಸಾರ ಆಪಿನ 18ನೇ ಸಂಚಿಕೆಡ್ ಬಾಲ ಪ್ರತಿಭೆ ನಂದಿನಿ ಅಲೆವೂರು ಪಾಲ್ ಪಡೆಯರೆ ಉಲ್ಲೆರ್ ಪಂದ್ ರೇಡಿಯೋ ಮಣಿಪಾಲ ಪ್ರಕಟಣೆಡ್ ತೆರಿಪಾದ್ಂಡ್.

ಜು.23: ಯುವವಾಹಿನಿ ಮುಲ್ಕಿ ಘಟಕದ ನಿರೆಲ್ಡ್ 21 ನೇ ವರ್ಷದ ಆಟಿಡೊಂಜಿ ದಿನ ಲೇಸ್

ಮೂಲ್ಕಿ: ಕರ್ನಾಟಕ ರಾಜ್ಯೋತ್ಸವ ಪ್ರಶಸ್ತಿ ಪುರಸ್ತೃತ ಯುವವಾಹಿನಿ(ರಿ) ಮೂಲ್ಕಿ ಘಟಕದ ನಿರೆಲ್ಡ್ ಇರ್ವತ್ತೊಂಜನೆ ವರ್ಸದ ಆಟಿಡೊಂಜಿ ದಿನ ಜು.23 ನೇ ಐತಾರ ಮೂಲ್ಕಿದ ಬಿಲ್ಲವ ಸಂಘೊಡ್ ನಡಪರೆ ಉಂಡು.

ಕೂಟದ ಉದಿಪನನ್ ಎಸ್.ಆರ್.ಆರ್ ಮಸಾಲ ಇಂಡಸ್ಟ್ರೀಸ್ (ಲಿ)ದ ಆಡಳಿತ ನಿರ್ದೇಶೆಕೆರ್ ಶೈಲೇಂದ್ರ ಸುವರ್ಣ , ಯುವವಾಹಿನಿ (ರಿ) ಕೇಂದ್ರ ಸಮಿತಿ ಕುಡ್ಲ ನೆತ್ತ ಗುರ್ಕಾರ್ಲು ಶ್ರೀ ರಾಜೇಶ್ ಬಿ ನಡೆಪಾಯೆರುಲ್ಲೆರ್. ಆಟಿದ ಮದಿಪುನ್ ಕುಡ್ಲ ಸೈಂಟ್ ಆಗ್ನೇಸ್ ಕಾಲೇಜ್‌ದ ಡಾ| ಅರುಣ್ ಉಳ್ಳಾಲ್ ಬೊಕ್ಕ ಲಯನ್ಸ್ ಕ್ಲಬ್ ಬಪ್ಪನಾಡು ಇನ್ಸ್ಫಯರ್ ದ ಕಡೀರ ಗುರ್ಕಾರ್ಲು ವೆಂಕಟೇಶ್ ಹೆಬ್ಬಾರ್ ನಡೆಪಾಯೆರೆ ಉಲ್ಲೆರ್. ಬಿನ್ನೆರಾದ್ ತುಳುಚಿತ್ರ ಬೊಕ್ಕ ರಂಗಭೂಮಿ ಕಲಾವಿದೆರ್ ಭೋಜರಾಜ್ ವಾಮಂಜೂರು, ಆಟಿದ ತಮ್ಮನನ್ ತುಳುಚಿತ್ರ ನಿರ್ಮಾಪಕೆರ್ ಸಂದೇಶ್ ರಾಜ್ ಬಂಗೇರ, ಕೂಟದ ತಮೇರಿನ್ ಮೂಲ್ಕಿ ಬಿಲ್ಲವ ಸಮಾಜ ಸೇವಾ ಸಂಘದ ಗುರ್ಕಾರ್ಲು ಪ್ರಕಾಶ್ ಸುವರ್ಣ, ಗುರ್ಕಾರ್ಮೆನ್ ಮೂಲ್ಕಿ ಯುವವಾಹಿನಿ ಗುರ್ಕಾರ್ಲು ಮಾಧವ ಪೂಜಾರಿ ಕಿಲ್ಪಾಡಿ ನಡೆಪಾದ್‌ ಕೊರ್ರೆ ಉಲ್ಲೆರ್.

ಕೂಟಗ್ ರಂಗ್ ಆದ್ ಮೂಲ್ಕಿ ಯುವವಾಹಿನಿ ಕಲಾವಿದೆರೆಡ್ದ್ ಆಟಿದ ನಲಿಕೆ-ತೆಲಿಕೆ- ಪದರಂಗಿತ ಲೇಸ್ ಕಾಂಡೆ 9.30 ಗಂಟೆಗ್ ಸುರುವಾಪುಂಡು. ಆಟಿದ ಅಟಿಲ್‌ದ ಕಮ್ಮೆನಗ್ ಕುಕ್ಕುದ ಉಪ್ಪಡ್, ತಿಮರೆ ಚಟ್ನಿ, ಉಪ್ಪಡ್ ಪಚ್ಚಿರ್, ಕುಡುತ್ತ ಚಟ್ನಿ, ಕುಕ್ಕುದ ಚಟ್ನಿ, ತೊಜಂಕ್, ನುರ್ಗೆ ತೊಪ್ಪು, ತೇವು ತೇಟ್ಲ, ಉರ್ಪೆಲ್ ಅರಿತ್ತ ನುಪ್ಪು, ಕುಡುತ್ತ ಸಾರ್, ತೇವು ಪದ್ಪೆ, ಪೆಲಕಾಯಿದ ಗಟ್ಟಿ, ಮೆತ್ತೆದ ಗಂಜಿ ಅಂಚನೆ ಆಟಿದ ಕಲೊಟು ಬತ್ತಿ ಬಿನ್ನೆರೆಗ್ ಅರೆಪುದಡ್ಡೆ, ಚಾ ಬಾಯಿ ಬಚ್ಚೆಲ್ಗ್, ಕಡ್ಲೆ, ಹಪ್ಪಳ ಪಟ್ಟರೆ ಉಂಡು ದ್ ಯುವವಾಹಿನಿ ಮುಲ್ಕಿ ಘಟಕದ ಪ್ರಕಟಣೆಡ್ ತೆರಿಪಾದೆರ್.