ಬೆಂಗ್ಲೂರುಡು ಕುಡೊಂಜಿ ಡಬ್ಬಲ್ ಮರ್ಡರ್: ಕುಡ್ಲಗ್ ಲಿಂಕ್ !?

ಬೆಂಗ್ಲೂರ್: ಜನ್ಮ ಕೊರಿನ ಅಪ್ಪೆ ಅಮ್ಮೆರೆನ್ ಸ್ವಂತ ಮಗೆನೇ ಕೆರ್ದ್ ತಪ್ಪಾದ್ ಪೋಯಿನ ಘಟನೆ ಕೊಡಿಗೇಹಳ್ಳಿ ಠಾಣಾ ವ್ಯಾಪ್ತಿದ ಬ್ಯಾಟರಾಯನ ಪುರಟ್ ಸೋಮಾರ ರಾತ್ರೆ ನಡದ್ಂಡ್.

ಭಾಸ್ಕರ್ ಬೊಕ್ಕ ಶಾಂತಮ್ಮ ದಂಪತಿಲೆನ್ ಅಕ್ಲೆನ ರಡ್ಡನೇ ಮಗೆ ಶರತ್ ಕೆರ್ದ್ ಪೋತೆ ಪಂದ್ ತೆರಿದ್ ಬೈದ್ಂಡ್. ಭಾಸ್ಕರ್ ಬೊಕ್ಕ ಶಾಂತಮ್ಮ ಕುಡ್ಲ ಮೂಲದಕುಲು ಪಂದ್ ಗೊತ್ತಾತ್ಂಡ್. ಮೊಕಲೆಗ್ ರಡ್ಡ್ ಜೋಕುಲ್ ಉಲ್ಲೆರ್. ಒರಿ ದುಬೈಡ್ ಕೆಲವು ವರ್ಷ ಬೇಲೆ ಮಲ್ತ್ ದ್ ಪಿರ ಬತ್ತಿತ್ತೆರ್.

ಕೇಂದ್ರ ಸರ್ಕಾರದ ಉದ್ಯೋಗಿ ಆದಿತ್ತಿನ ಶಾಂತಮ್ಮ ರಿಟೈರ್ಡ್ ಆದಿತ್ತೆರ್. ಅಪ್ಪೆ ಅಮ್ಮೆರ್‌ನೊಟ್ಟುಗು ಮೊಕ್ಲೆನ ಎಲ್ಯ ಮಗೆ ಆರೋಪಿ ಶರತ್ ಇತ್ತೆ. ಶರತ್ ಅಪಗಪಗ ಪರ್ದ್ ಬತ್ತ್‌ದ್ ಅಪ್ಪೆ ಅಮ್ಮೆರ್‌ಡ ಲಡಾಯಿ ಮಲ್ತೊಂದಿತ್ತೆಗೆ. ಅವ್ವೇ ರೀತಿ ಕೋಡೆ ರಾತ್ರೆ 8 ಗಂಟೆಗ್ ಲಡಾಯಿ ಮಲ್ತ್‌ದ್ ಕರ್ಬದ ರಾಡ್‌ರ್ದ್ ಅಪ್ಪೆ ಅಮ್ಮೆರೆಗ್ ಹಾಕ್ ದೆ. ಅಯಿರ್ದ್ ಬೊಕ್ಕ ಬಾಕಿಲ್‌ಗ್ ಬೀಗ ಪಾಡ್ದ್ ಪಾರ್ ಪೋತೆ ಪಂದ್ ಪೊಲೀಸೆರ್ ತೆರಿಪಾದೆರ್.

ಮಲ್ಲ ಮಗೆ ಪೊಪ್ಪ ಅಮ್ಮಗ್ ಫೋನ್ ಮಲ್ಪುನಗ ರಡ್ಡ್ ಜನಲ ಕಾಲ್ ದೆತ್ತೊಂದಿಜ್ಜಾಂಡ್. ಈ ಪೊರ್ತುಡು ಬರಿತ್ತ ಇಲ್ಲದಕ್ಲೆಗ್ ಕಾಲ್ ಮಲ್ತ್‌ದ್ ಪರಿಶೀಲನೆ ಮಲ್ಪುನಗ ಕೆರ್ತಿನವು ತೆರಿದ್ ಬೈದ್ಂಡ್. ಈ ಬಗೆಟ್ ಮಾಹಿತಿ ತೆರಿನ ಕೊಡಿಗೇಹಳ್ಳಿ ಪೊಲೀಸೆರ್ ಜಾಗೆಗ್ ಭೇಟಿ ಕೊರ್ದು ಪರಿಶೀಲನೆ ಮಲ್ತ್‌ದೆರ್. ಆರೋಪಿನ್ ಪೊಲೀಸೆರ್ ನಾಡೊಂದುಲ್ಲೆರ್. ಕೆಲವು ದಿನತ್ತ ಪಿರವುಡು ರಡ್ಡ್ ಜನ ಉದ್ಯಮಿಲೆನ್ ದುಂಬೊರ ಬೇಲೆಗಿತ್ತಿನಾಯೆನೇ ಕೆರ್ತಿನ ಘಟನೆ ನಡತ್ ದಿತ್ತ್ಂಡ್.