June 2023

” Adipurusha” grosses 410 crores in a week!! ಆದಿಪುರುಷ್ ಪಿಕ್ಚರ್ ಗ್ 410 ಕೋಟಿ ಕಲೆಕ್ಷನ್

ಕರಿನ ವಾರ ಬುಡುಗಡೆ ಆಯಿನ ಪ್ರಭಾಸ್, ಕೃತಿ ಸನನ್ ಅಭಿನಯದ ಆದಿಪುರುಷ್ ಪಿಕ್ಚರ್ ದ 400 ಕೋಟಿ ಕ್ಲಬ್ ಸೇರ್ ದ್ಂಡ್.

ಜಗತ್ತ್ ಇಡೀ 6 ದಿನಟ್ಟ್ 410 ಕೋಟಿ ಕಲೆಕ್ಷನ್ ಆತ್ಂಡ್ ಪಂದ್ ಚಿತ್ರಕೂಟ ತೆರಿಪಾದ್ಂಡ್. ಈ ಪಿಕ್ಚರ್ ಸುರುತ್ತ ದಿನ 140 ಕೋಟಿ ಕಲೆಕ್ಷನ್ ಮಲ್ದ್ಂಡ್. ಬೊಕ್ಕ ನೆಗೆಟಿವ್ ವಿಮರ್ಶೆಲೆನ್ ಪಡೆದ್ ಕಲೆಕ್ಷನ್ ಕಮ್ಮಿ ಆಂಡ್.

Gurupur: Demonstration near Kaikambha with regard to the death of a motorist in a bus bike accident yesterday ಗುರುಪುರ: ಖಾಸಗಿ ಬಸ್ ಗುದ್ದುದು ಬೈಕ್ ಸವಾರೆ ತೀರ್ ಪೋಯಿನ ಘಟನೆ: ಕೈಕಂಬಡ್ ಇನಿ ಕೈತಲ್ ದಕ್ಲೆನ ಪ್ರತಿಭಟನೆ

ಕುಡ್ಲ: ಗುರುಪುರ ಜಂಕ್ಷನ್ ಡ್ (ಜೂ.22) ಕೋಡೆ ಖಾಸಗಿ ಬಸ್ ಗುದ್ದುದು ಬೈಕ್ ಸವಾರೆ ತೀರ್ ಪೋಯಿನ ಘಟನೆನ್ ಖಂಡಿಸಾದ್ ಇನಿ ಕೈತಲ್ ದಕುಲು ಬಸ್‌ ನ್ ಉಂತಾದ್ ಕೈಕಂಬ ಜಂಕ್ಷನ್‌‌ ಡ್ ಪ್ರತಿಭಟನೆ ಮಲ್ದೆರ್.

ಕೋಡೆ ಈ ಆಕ್ಸಿಡೆಂಟ್ ಡ್ ಬೈಕ್ ಸವಾರೆ ಪೊಳಲಿ ಕರಿಯಂಗಳ ನಿವಾಸಿ ಸಂತೋಷ್ ಕುಮಾರ್ ಮೇರ್ ತೀರ್ ಪೋತೆರ್. ಇನಿ ಕೈಕಂಬ ಜಂಕ್ಷನ್ ಡ್ ಬರ್ಸ್ ನಡುಟ್ ಲ ಪೊರ್ಂಬಾಟ ನಡತ್ ದ್ಂಡ್. ನೆರ್ದ್ ಕೈಕಂಬ ಜಂಕ್ಷನ್ ಸಂಪೂರ್ಣ ಬ್ಲಾಕ್ ಆತ್ಂಡ್.

ಬಸ್ ನ್ ಜಾಗೆರ್ದ್ ಪೋಯೆರೆ ಬುಡಂದಿನ ಕಾರಣ ಬೆದ್ರ- ಕುಡ್ಲ, ಬಜಪೆ, ಪೊಳಲಿ ಬಿಸಿರೋಡ್ ಪೋಪಿನ ಪ್ರಯಾಣಿಕೆರ್ ಬಸ್ ಟೇ ಬಾಕಿ ಆತೆರ್.

ಈ ಘಟನೆದ ಜಾಗೆಗ್ ಬಜಪೆ ಠಾಣಾ ಪೊಲೀಸೆರ್ ಭೇಟಿ ಕೊರ್ದು ಪೊರ್ಂಬಾಟ ಮಲ್ಪುನಕ್ಲೆಡ ಪಾತೆರೊಂದು ಉಲ್ಲೆರ್.

Puttur: ASHA worker and her baby die due to delivery complications ಪುತ್ತೂರ್: ಪೆದ್ದ್ ನಗ ನೆತ್ತೆರ್ ಜಾಸ್ತಿ ಪೋದು ಆಶಾ ಕಾರ್ಯಕರ್ತೆ ತೀರ್ ಪೋಯಿನ ಬೆರಿಕ್ಕೆ ಬಾಲೆಲ ತೀರ್ ಪೋಂಡ್

ಪುತ್ತೂರ್: ಪೆದ್ದ್ ನಗ ನೆತ್ತೆರ್ ಜಾಸ್ತಿ ಪೋದು ಹಿರೇಬಂಡಾಡಿ ಗ್ರಾಮದ ಆಶಾ ಕಾರ್ಯಕರ್ತೆ ಭವ್ಯ (28) ಜೂ. 20 ಕ್ಕ್ ತೀರ್ ಪೋಯಿನ ಬೆರಿಕ್ಕೆ ಮೆರೆನ ಬಾಲೆ ಕೋಡೆ (ಗುರುವಾರ) ಬೊಲ್ಪುಗು ತೀರ್ ಪೋತ್ಂಡ್.

ಭವ್ಯ ಮೇರ್ ತನ್ನ 3 ನೇ ಬಾಲೆದ ಪೆದ್ದರೆ ಪುತ್ತೂರ್ ಸರಕಾರಿ ಆಸ್ಪತ್ರೆಗ್ ದಾಖಲಾದಿತ್ತೆರ್. ಕರಿ‌ನ ಅಂಗಾರೆ ರಾತ್ರೆ ಮೇರ್ ಆನ್ ಬಾಲೆಗ್ ಜನ್ಮ ಕೊರ್ತೆರ್. ಆಂಡ ಪೆದ್ದ್ ನಗ ನೆತ್ತೆರ್ ಜಾಸ್ತಿ ಪೋದು ತೀರ್ ಪೋಯೆರ್. ಪುಟ್ಟಿನ ಬಾಲೆನ್ ಅಂಗಾರೆ ಕುಡ್ಲದ ವೆನ್‍ಲಾಕ್ ಆಸ್ಪತ್ರೆದ ತೀವ್ರ ನಿಗಾ ಘಟಕಡ್ ದೀದಿತ್ತೆರ್. ಆಂಡ ಚಿಕಿತ್ಸೆ ಫಲಕಾರಿ ಅವಂದೆ ಬಾಲೆ ಗುರುವಾರ ಬೊಲ್ಪುಗು ತೀರ್ ಪೋತ್ಂಡ್.

ಈ ಘಟನೆದ ಬಗ್ಗೆ ಜಿಲ್ಲಾಧಿಕಾರಿ ಬೊಕ್ಕ ಜಿಲ್ಲಾ ಆರೋಗ್ಯಾಧಿಕಾರಿಗ್ ಭವ್ಯ ಮೆರೆನ ಗಂಡನಿ ಬಾಲಕೃಷ್ಣ ಗೌಡ ದೂರು ಕೊರ್ತೆರ್. ಈ ದೂರು ದೆತ್ತೊನ್ನ ಜಿಲ್ಲಾಧಿಕಾರಿ ದೂರುನ್ ಗಂಭೀರವಾದ್ ದೆತೊನುವ ಪಂದ್ ಭರವಸೆ ಕೊರ್ತೆರ್.

Manjeshwara: Thieves enter a house and do away with 60 sovereigns oof gold and 50,000 cash ಮಂಜೇಶ್ವರ: ಇಲ್ಲಗ್ ಪೊಗ್ಗುದು 60 ಪವನ್ ಬಂಗಾರ್, 50 ಸಾರ ರೂ. ಕಂಡಿನ ಕಲ್ವೆರ್

ಮಂಜೇಶ್ವರ: ಇಲ್ಲದ ಬಾಗಿಲ್ ಪುಡಾತ್ ದ್ ಉಲಯಿನ ಪೊಗ್ಗುದು ಕಲ್ವೆರ್ ಸುಮಾರ್ 60 ಪವನ್ ಬಂಗಾರ್ ಬೊಕ್ಕ 50 ಸಾರ ರೂ. ಕಾಸ್ ಕಂಡಿನ ಘಟನೆ ಮಂಜೇಶ್ವರ ರಾಗಂ ಜಂಕ್ಷನ್ ದ ಹಮೀದ್ ತಂಙಲ್ ಮೆರೆನ ಇಲ್ಲಲ್ ನಡತ್ಂಡ್.

ಈ ಬಗೆಟ್ ಮಂಜೇಶ್ವರ ಪೊಲೀಸ್ ಠಾಣೆಡ್ ಕೇಸ್ ದಾಖಲ್ ಆತ್ಂಡ್. ಪೊಲೀಸೆರ್ ತನಿಖೆ ಮಲ್ತೊಂದು ಉಲ್ಲೆರ್ ಪಂದ್ ತೆರಿದ್ ಬೈದ್ಂಡ್.

Details on how to apply for Gruha Jyothi yojana ಗೃಹಜ್ಯೋತಿ ಯೋಜನೆಗ್ ಅರ್ಜಿ ಎಂಚ ಸಂದವೊಲಿ

ಗೃಹಜ್ಯೋತಿ ಯೋಜನೆಗ್ ಅರ್ಜಿ ಸಂದಾವುನಕುಲು ಈ ಮುಖೇನ ಸಂದಾವೊಲಿ.

•https://sevasindhugs.karnataka.gov.in ಮುಖೇನ ಗೃಹಜ್ಯೋತಿ ಟ್ಯಾಬ್ ಓಪನ್ ಮಲ್ತ್ ದ್ ಕ್ಯಾಪ್ಚ್ ಕೋಡ್ ಬೊಕ್ಕ ಡಿಕ್ಲರೇಷನ್ ಕ್ಲಿಕ್ ಮಲ್ಪಿ.

•ಆಧಾರ್ ನಂಬರ್ ಎಂಟ್ರಿ ಮಲ್ತ್ ದ್, ಡಿಟೇಲ್ಸ್ ಸರಿ ಉಂಡ ಪಂದ್ ತೂಲೆ.

•ಎಸ್ಕಾಂದ ಪುದರ್ ಆಯ್ಕೆ ಮಲ್ತ್ ದ್, ಅಕೌಂಟ್ ಐಡಿ ಎಂಟ್ರಿ ಮಲ್ಪೊಲೆ.

•ನೆಟ್ಟ್ ಡಿಟೇಲ್ಸ್ ಸರಿ ಉಂಡ ಪಂದ್ ತೂಲೆ.

•ಮೊಬೈಲ್ ನಂಬರ್ ಎಂಟ್ರಿ ಮಲ್ತ್ ದ್, ಸಬ್ಮಿಟ್ ಬಟನ್ ಒತ್ತುಲೆ.

•ಬೊಕ್ಕ ಸ್ಕ್ರೀನ್ ಡ್ ಬರ್ಪಿನ ಅಕ್ನಲಜ್ ಮೆಂಟ್ ಕಾಪಿನ್ ದೆತೊನೊಲೆ.

Gruha Jyothi yojana: more than 8 lakh registrations in 3days !! ಗ್ರಹ ಜ್ಯೋತಿ ಯೋಜನೆ: 3 ದಿನಟ್ಟ್ 8 ಲಕ್ಷರ್ದ್ ಎಚ್ಚ ಜನ ನೋಂದಣಿ!

ಬೆಂಗ್ಲೂರ್: ವೋಟುಗು ದುಂಬು ಕಾಂಗ್ರೆಸ್​ ಘೋಷಣೆ ಮಲ್ತಿನ 5 ಗ್ಯಾರಂಟಿಲೆಡ್ ಒಂಜಾಯಿನ ಗೃಹಜ್ಯೋತಿ ಯೋಜನೆ ನೋಂದಣಿ ಕಾರ್ಯ ಜೂನ್​ 18 ಕ್ಕ್ ಸುರು ಆತ್ಂಡ್.

ಸುರುತ್ತ ದಿನ 96,305 ಜನ ಗ್ರಾಹಕೆರ್ ಅರ್ಜಿ ಸಂದಾಂಡ, ರಡ್ಡನೇ ದಿನ 3,34,845 ಕ್ಕ್ ಎಚ್ಚಾತ್ಂಡ್. ಮೂಜಿನೇ ದಿನಲ ಈ ಯೋಜನೆಗ್ ಭಾರೀ ಪ್ರತಿಕ್ರಿಯೆ ತಿಕ್ ದ್ಂಡ್.

ಜೂನ್ 20 ರ್ದ್ ಕರ್ನಾಟಕಡ್ ಒಟ್ಟು 8,16,631 ಗ್ರಾಹಕೆರ್ ಗೃಹ ಜ್ಯೋತಿ ಯೋಜನೆಗ್ ನೋಂದಣಿ ಮಲ್ದೆರ್. ಗೃಹ ಜ್ಯೋತಿ ಯೋಜನೆಡ್ 200 ಯೂನಿಟ್‌ ಮುಟ್ಟ ಧರ್ಮೊಗು ಕರೆಂಟ್ ಪಡೆವೊಲಿ.

ಕರ್ನಾಟಕ ಇಡೀ ಜೂನ್ 18 ರ್ದ್ ಕರ್ನಾಟಕ ಒನ್, ಗ್ರಾಮ ಒನ್ ಬೊಕ್ಕ ಬೆಂಗ್ಲೂರ್ ಒನ್ ಕೇಂದ್ರಡ್ ನೋಂದಣಿ ನಡತೊಂದು ಉಂಡು ಪಂದ್ ಅಧಿಕಾರಿಯೊರಿ ತೆರಿಪಾದೆರ್.

Sai Baba temple Shirdi discloses donations totalling to 47 crore ಶಿರಡಿ ಸಾಯಿ ಬಾಬಾಗ್ 47 ಕೋಟಿ ಕಾಣಿಕೆ

ಈ ಸರ್ತಿ ಎಪ್ರಿಲ್‌ 25 ರ್ದ್ ಜೂನ್ 15 ಮುಟ್ಟ 26 ಲಕ್ಷ ಭಕ್ತೆರ್ ಶಿರಡಿ ಸಾಯಿಬಾಬಾನ ದರ್ಶನ ಪಡೆತೆರ್ ಪಂದ್ ದೇವಲ್ಯದ ಅಧಿಕಾರಿಲು ತೆರಿಪಾದೆರ್.

ಭಕ್ತೆರ್ ಈ ಪೊರ್ತುಡು ಬೇತೆ ಬೇತೆ ರೂಪಡ್ 47 ಕೋಟಿ ರೂ. ಬಿಲೆತ್ತ ಕಾಣಿಕೆ ಸಂದಾದೆರ್. ಡಬ್ಬಿದ ಆದಾಯ 9.83 ಕೋಟಿ, ಡೆಬಿಟ್ ಬೊಕ್ಕ ಕ್ರೆಡಿಟ್ ಕಾರ್ಡ್ ಮುಖೇನ 5.15 ಕೋಟಿ, ಆನ್ ಲೈನ್ ಡೊನೇಶನ್ ಮುಖೇನ 3.34 ಕೋಟಿ, ಚೆಕ್ ಬೊಕ್ಕ ಡಿಡಿ ಮುಖೇನ 1.82 ಕೋಟಿ ರೂ. ಅಂಚೆನೆ 1.17 ಕೋಟಿ ಬಿಲೆತ್ತ ಬಂಗಾರ್, 52 ಕೆಜಿ ಬೊಳ್ಳಿ ಉಡಿಗಿರೆ ಆದ್ ಬೈದ್ಂಡ್ ಪಂದ್ ತೆರಿಪಾದೆರ್.

Women traveling for free in government buses must be treated with due respect by the staff- government order ಫ್ರೀ ಬಸ್ ಟ್ಟ್ ಪೊಂಜೊವುಲೆಡ ಮರ್ಯಾದಿ ಕೊರ್ದು ಪಾತೆರ್ರೆ ಆದೇಶ

ಶಕ್ತಿ ಯೋಜನೆಗ್ ಸಂಬಂಧಪಟ್ಟಿನಂಚೆನೆ ಕೆಎಸ್ ಆರ್ ಟಿಸಿ ಪೊಸ ಆದೇಶ ಕೊರ್ತುಂಡು.

ಚಾಲನಾ ಸಿಬ್ಬಂದಿಲು ಬಸ್ ಟ್ಟ್ ಪ್ರಯಾಣ ಮಲ್ಪುನ ಪೊಂಜೋವ್ ಪ್ರಯಾಣಿಕೆರೆಡ ಎಡ್ಡೆಡ್ ಪಾತೆರೊಡು. ಪೊಂಜೋವ್ ಪ್ರಯಾಣಿಕೆರ್ ಒವ್ವೇ ದೂರು ಕೊರಂದಿಲೆಕ್ಕ ಬೇಲೆ ಮಲ್ಪೊಡು. ಪೊಂಜೋವ್ ನಕುಲು ಇಪ್ಪುನ ಬಸ್ ನಿಲ್ದಾಣಡ್ ಬಸ್ ಉಂತಾವೊಡು. ಪೊಂಜೋವ್ ಪ್ರಯಾಣಿಕೆರೆಗ್ ಧರ್ಮೊಗು ಪ್ರಯಾಣ ಪಂದ್ ಮಕ್ಕರ್ ಮಲ್ಪೆರೆ ಬಲ್ಲಿ.‌ ಅಗೌರವರ್ದ್ ನಡಪರೆ ಬಲ್ಲಿ ಪಂದ್ ಪಂತ್ಂಡ್.

Indira Canteen introduces new menu- will include curds and milk ಇಂದಿರಾ ಕ್ಯಾಂಟೀನ್ ಡ್ ನನ‌ ಪೇರ್, ಕೊಜಪು

ಸರ್ಕಾರದ ಇಂದಿರಾ ಕ್ಯಾಂಟೀನ್ ಡ್ ನನ ಕಮ್ಮಿ ಕರ್ಚಿಡ್ ವನಸ್, ತಿಂಡಿದೊಟ್ಟಿಗೆ ಪೇರ್, ಕೊಜಪು, ನೆಯಿ, ಚೀಪೆ ತೆನಸ್ ಸೇರಿನಂಚೆನೆ ಕೆಎಮ್ ಎಫ್ ದ ನಂದಿನಿ ಬ್ರಾಂಡ್ ದ ಮಾತ ಸೊತ್ತುಲು ತಿಕ್ಕುಂಡು.

ಇಂದಿರಾ ಕ್ಯಾಂಟೀನ್ ದ ಆದಾಯ ಎಚ್ಚ ಮಲ್ಪರೆ ಸರ್ಕಾರ ಈ ಚಿಂತನೆ, ಕೆಎಂಎಫ್ ದೊಟ್ಟಿಗೆ ಇತ್ತೆ ಚರ್ಚೆ ಮಲ್ದ್ಂಡ್ ಪಂದ್ ವರದಿ ಆತ್ಂಡ್. ನೆರ್ದ್ ಕೆಎಮ್ ಎಫ್ ಗ್ಲಾ ಎಚ್ಚದ ಆದಾಯ ಬರಿಯೆರೆ ಉಂಡು.‌

A student at Shravanabelagola dies when a coconut bunch falls on his head!! ತಾರಾಯಿದ ಕೈಲ್ ಬೂರ್ದು ತೀರ್ ಪೋಯಿನ ಕಾಲೇಜ್ ಕಲ್ಪಾರ್ಥಿ

ಶ್ರವಣಬೆಳಗೊಳ: ತಾರಾಯಿದ ಕೈಲ್ ಬೂರ್ದು
ಕಾಲೇಜ್ ಕಲ್ಪಾರ್ಥಿ ಒರಿ ತೀರ್ ಪೋಯಿನ ಘಟನೆ ಗುರುವಾರ ನಡತ್ಂಡ್.

ಶ್ರವಣಬೆಳಗೊಳ ಪೇಂಟೆರ್ದ್ ಒಂತೆ ದೂರ ಉಪ್ಪುನ ಉತ್ತೇನಹಳ್ಳಿದ ರವಿ ಬೊಕ್ಕ ಅನಸೂಯ ದಂಪತಿನ ಮಗೆ ಪ್ರಜ್ವಲ್(17) ತೀರ್ ಪೋಯಿನಾರ್.

ಬರಾಳು ಕೈತಲ್ ಇಪ್ಪುನ ಬಿ.ಚೋಳೇನಹಳ್ಳಿ ಗ್ರಾಮದ ತೋಟದ ಇಲ್ಲಲ್ ಅಕುಲು ವಾಸ ಇತ್ತೆರ್.

ಏಪದಲೆಕನೆ ಪ್ರಜ್ವಲ್ ತೋಟದ ಬೇಲೆ ಮುಗಿತ್ ದ್ ಕಾಲೇಜ್ ಗ್ ಪೋವೊಂದು ಇತ್ತೆರ್. ಗುರುವಾರಲ ಬೇಲೆ ಮಲ್ಪುನಗ ಮೆರೆನ ಮಿತ್ತ್ ತಾರಾಯಿದ ಕೈಲ್ ಬೂರ್ದುಂಡು. ಕೈತಲ್ ದಕುಲು ಕೂಡ್ಲೆ ಆಸ್ಪತ್ರೆಗ್ ಲೆತೊಂದು ಪೋನಗ ಮಾರ್ಗಗ್ ತೀರ್ ಪೋತೆರ್ ಪಂದ್ ಸಂಬಂಧಿಕೆರ್ ತೆರಿಪಾದೆರ್.

ಪ್ರಜ್ವಲ್ ಶ್ರವಣಬೆಳಗೊಳದ ಸರ್ಕಾರಿ ಪದವಿಪೂರ್ವ ಕಾಲೇಜ್ ಡ್ ಫಸ್ಟ್ ಪಿಯುಸಿ ಕಲ್ತೊಂದು ಇತ್ತೆರ್.