ಬೆಂಗ್ಲೂರ್: ಕೇಂದ್ರ ಸರಕಾರ ಅರಿ ಕೊರಂದೆ ಅನ್ನಭಾಗ್ಯ ಯೋಜನೆನ್ ಅನುಷ್ಠಾನ ಮಲ್ಪಂದಿಲೆಕ್ಕ ಮಲ್ತೊಂದುಂಡು ಪಂದ್ ಮುಖ್ಯಮಂತ್ರಿ ಸಿದ್ದರಾಮಯ್ಯ ಆರೋಪ ಮಲ್ದೆರ್.
ಮೇರ್ ಬೆಂಗ್ಲೂರ್ ದ ಶಕ್ತಿ ಭವನಡ್ ಪತ್ರಿಕಾಗೊಷ್ಠಿಡ್ ಪಾತೆರ್ದ್, ಸರಕಾರ ಅರಿ ದೀವೊಂದು ಕೊರೊಂದು ಇಜ್ಜಿ, ಅರಿ ಕೊರ್ಪಿನ ಇಚಾರಡ್ ಕೇಂದ್ರ ಸರಕಾರ ರಾಜಕೀಯ ನಿರ್ಧಾರ ದೆತ್ತೊಂದುಂಡು. ಕೇಂದ್ರ ಎಷ್ಟೇ ಷಡ್ಯಂತ್ರ ಮಲ್ತ್ಂಡಲ ರಾಜ್ಯದ ಜನಕ್ಲೆಗ್ ಎಂಕುಲು ಅರಿ ಕೊರ್ಪಿನ ಗ್ಯಾರಂಟಿ ಪಂದ್ ಪಂಡೆರ್.
ರಾಜ್ಯ ಸರಕಾರ ಅಂತ್ಯೋದಯ ಬೊಕ್ಕ ಬಿಪಿಎಲ್ ಕಾರ್ಡ್ ದಕ್ಲೆಗ್ ಪ್ರತಿ ತಿಂಗೊಲ್ ತಲಾ 10 ಕೆಜಿ ಅರಿ ಕೊರಿಯೆರೆ ತೀರ್ಮಾನ ಮಲ್ತಿನ ಬಗೆಟ್, ಭಾರತೀಯ ಆಹಾರ ನಿಗಮಗ್ ಪ್ರತಿ ತಿಂಗೊಲ್ ಗ್ 2.28 ಲಕ್ಷ ಮೆಟ್ರಿಕ್ ಟನ್ ಅರಿತ್ತ ಅಗತ್ಯ ಉಂಡು ಪಂದ್ ಜೂ.9 ಕ್ಕ್ ಪತ್ರ ಬರೆತ್ಂಡ್. ನೆಕ್ಕ್ ಜೂ.12 ಕ್ಕ್ ಭಾರತೀಯ ಆಹಾರ ನಿಗಮ ಒಪ್ಪಿಗೆ ಕೊರ್ದು ಕ್ವಿಂಟಾಲ್ಗ್ 3400 ರೂ. ಡ್ ಅಕ್ಕಿ ಪೂರೈಕೆ ಮಲ್ಪುವ ಪಂದ್ ಎಂಕ್ಲೆಗ್ ಪತ್ರ ಬರೆದಿತ್ತ್ಂಡ್. ಉಂದು ಆಯಿನ ಬೊಕ್ಕ ಕೇಂದ್ರ ಸರಕಾರ ರಾಜಕೀಯ ನಿರ್ಧಾರ ದೆತ್ತೊಂದುಂಡು ಪಂದ್ ಸಿಎಂ ಬೆಚ್ಚ ಆತೆರ್.
ಜೂ.13 ಕ್ಕ್ ಕೇಂದ್ರದ ಆಹಾರ ಬೊಕ್ಕ ನಾಗರಿಕ ಪೂರೈಕೆ ಸಚಿವಾಲಯ ಭಾರತೀಯ ಆಹಾರ ನಿಗಮಗ್ ಪತ್ರ ಬರೆದ್ 15 ಲಕ್ಷ ಮೆಟ್ರಿಕ್ ಟನ್ ಗೋಧಿ ಬೊಕ್ಕ ಅರಿನ್ ಓಪನ್ ಇಪ್ಪುನ ಮಾರ್ಕೆಟ್ ಡ್ ಮಾರುನ ಯೋಜನೆಡ್ ಮಾರಿಯೆರೆ ಪಂತ್ಂಡ್.
ಅರಿ ಬುಲೆಪುನ ರಾಜ್ಯಲಾಯಿನ ಪಂಜಾಬ್, ತೆಲಂಗಾಣ, ಆಂಧ್ರ, ಛತ್ತಿಸ್ಗಡ, ಹರಿಯಾಣ ಮುಟ್ಟ ಇತ್ತೆನೇ ಆಹಾರ ಸಚಿವೆರ್ ಕೆ.ಎಚ್. ಮುನಿಯಪ್ಪ ಪಾರ್ತೆದೆರ್. ಜೂ.15ಕ್ಕ್ ಸಚಿವೆರ್ ಕೆ. ಎಚ್. ಮುನಿಯಪ್ಪ ತೆಲಂಗಾಣ ಮುಖ್ಯಮಂತ್ರಿನ್ ಭೇಟಿ ಆಯೆರೆ ಉಲ್ಲೆರ್. ಒಟ್ಟಾದ್ ಜನಕ್ಲೆಗ್ ಅನ್ನಭಾಗ್ಯ ತಿಕ್ಕುಲೆಕ್ಕ ಮಲ್ಪುನೆನೇ ಎಕ್ಲೆನ ಗುರಿ ಪಂದ್ ಸಿಎಂ ಪಂಡೆರ್.
