February 2023

Shri Kanthabare Budabare Garadi: Derabenni – Brahmakalash Abisheka ದೇರಬೆನ್ನಿ ಶ್ರೀ ಕಾಂತಾಬಾರೆ ಬೂದಾಬಾರೆ ಗರಡಿಡ್ ಮಂಚವು ಪ್ರತಿಷ್ಠೆ, ಬ್ರಹ್ಮಕಲಶಾಭಿಷೇಕ

ಮುಲ್ಕಿ: ಎಳತ್ತೂರು ಗ್ರಾಮದ ಬಾಕ್ಯಾರಕೋಡಿ ದೇರ ಬೆನ್ನಿ (ದೇವೆರೆ ಬೆನ್ನಿ) ಶ್ರೀ ಕಾಂತಾಬಾರೆ ಬೂದಾಬಾರೆ ಗರಡಿಡ್ ಮಂಚವು ಪ್ರತಿಷ್ಠೆ ಬೊಕ್ಕ ಬ್ರಹ್ಮಕಲಶ ಅಭಿಷೇಕ ಕಜ್ಜ ಫೆ.24 ಸುಕ್ರಾರ ಕಾಂಡೆ ತಿಬರ್ ಬ್ರಹ್ಮಶ್ರೀ ವೇದವ್ಯಾಸ ತಂತ್ರಿಲೆನ ಮುತಾಲಿಕೆಡ್ ನಡತ್ಂಡ್.

ಕಾಂಡೆ ದುರ್ಗಾಹೋಮ ಆದ್ ಕಾಂತಾಬಾರೆ ಬೂದಾಬಾರೆರ್ನ ಮೂರ್ತಿ ಪ್ರತಿಷ್ಠೆ, ಬ್ರಹ್ಮಕಲಶದ ಅಭಿಷೇಕ, ಬೊಕ್ಕ ಗುಡ್ಡೆ ಜುಮಾದಿ ಜಾರಂದಾಯ ದೈವ ದರ್ಶನ ಆದ್ ಅನ್ನಸಂತರ್ಪಣೆ ನಡತ್ಂಡ್.

ಈ ಪೊರ್ತುಡು ದೇರಬೆನ್ನಿ ಗರಡಿದ ಮನೋಜ್ ಪೂಜಾರಿ ಅಂಚೆನೆ ದೇರೆಬೆನ್ನಿ ಗರಡಿದ ಅಧ್ಯಕ್ಷೆರ್ ತುಷಾರ್, ಉಪಾಧ್ಯಕ್ಷೆರ್ ಚಂದ್ರಹಾಸ್ ಅಮೀನ್, ಕಾರ್ಯದರ್ಶಿ ಗೋಪಿ ಪೂಜಾರ್ತಿ, ಜೊತೆ ಕಾರ್ಯದರ್ಶಿ ಸೂರಜ್ ಅಮೀನ್, ಕೋಶಾಧಿಕಾರಿ ಹೇಮಲತ ಉಚ್ಚಿಲ, ಜತೆ ಕೋಶಾಧಿಕಾರಿ ಶೇಖರ್ ಪೂಜಾರಿ ಬೊಕ್ಕ ದೈವದ ಚಾಕಿರಿದಕುಲು, ಫ್ರೆಂಡ್ಸ್ ಕ್ಲಬ್ ಬೊಕ್ಕ ಮಹಿಳಾ ಮಂಡಳಿದ ಸದಸ್ಯೆರ್ ಅಂಚೆನೆ ಗ್ರಾಮಸ್ಥೆರ್ ಇತ್ತೆರ್.

ಬಂಡಿದ ನೇಮ ಉಚ್ಚಯ : ಫೆ.25 ಸನಿಯಾರ ಬಯ್ಯಡ್ ಮೈಸಂದಾಯ ಕೋಲ, ರಾತ್ರೆ ಶ್ರೀ ಗುಡ್ಡೆ ಜುಮಾದಿ, ಜಾರಂದಾಯ ಬಂಟ ದೈವೊಲೆನ ಗಗ್ಗರ ಸೇವೆ, ಬಂಡಿದ ನೇಮ ಉಚ್ಚಯ, ಪಂಜುರ್ಲಿ ನೇಮ, ಮಾಯಂದಾಲೆ ನೇಮ ನಡಪರೆ ಉಂಡು.

March 2nd-6 th: Ayana and Siri Jatra at Shri Mahalingeshwara temple, Atrijalu ಮಾ.2-6: ಅತ್ರಿಜಾಲು ಶ್ರೀ ಮಹಾಲಿಂಗೇಶ್ವರ ದೇವಲ್ಯಡ್ ಆಯನ, ಸಿರಿ ಜಾತ್ರೆ

ಬೊಲ್ತೇರ್: ಅತ್ರಿಜಾಲು ಶ್ರೀ ಮಹಾಲಿಂಗೇಶ್ವರ ದೇವಲ್ಯಡ್ ಆಯನ ಬೊಕ್ಕ ಸಿರಿಲೆನ ಜಾತ್ರೆ ಮಾ.2-6 ಮುಟ್ಟ ನಡಪರೆ ಉಂಡು.

ಮಾ.2 ಗುರುವಾರ ಕಲಶಾಭಿಷೇಕ, ತೋರಣ ಮೂರ್ತ ಆದ್ ಕೊಡಿ ಏರುಂಡು. ರಾತ್ರೆ ರಂಗಪೂಜೆ ನಡಪರೆ ಉಂಡು. ಮಾ.3 ಸುಕ್ರಾರ ಮಧ್ಯಾಹ್ನ ನಿತ್ಯಬಲಿ, ಮಹಾಪೂಜೆ ನಡಪರೆ ಉಂಡು. ಮಾ.4 ಮಧ್ಯಾಹ್ನ ನಿತ್ಯಬಲಿ, ಪುದೆಕಾಣಿಕೆ ಸಮರ್ಪಣೆ, ಮಹಾಪೂಜೆ, ರಾತ್ರೆ ದರ್ಶನ ಬಲಿ, ಕುಮಾರ ದರ್ಶನ ನಡಪರೆ ಉಂಡು. ಮಾ.5 ಐತಾರ ಮಧ್ಯಾಹ್ನ ನಿತ್ಯಬಲಿ, ಮಹಾಪೂಜೆ ರಾತ್ರೆ ಭೂತ ಬಲಿ, ಕವಾಟ ಬಂಧನ ನಡಪರೆ ಉಂಡು. ಮಾ.6 ಸೋಮಾರ ಬೊಲ್ಪುಗು ಮಹಾಪೂಜೆ, ದೇವೆರೆನ ಉಚ್ಚಯ, ಕುಮಾರ ದರ್ಶನ, ಮಧ್ಯಾಹ್ನ ಅನ್ನಸಂತರ್ಪಣೆ ನಡಪರೆ ಉಂಡು. ಬಯ್ಯಗ್ ಕೊಡಮಣಿತ್ತಾಯ ದೈವೊದ ಭಂಡಾರ ಬರ್ಪುಂಡು. ಬೊಕ್ಕ ದೇವೆರೆನ ಉಚ್ಚಯ, ಕುಮಾರ ಸಿರಿಕ್ಲೆನ ದರ್ಶನ, ಕಟ್ಟೆಪೂಜೆ, ಕೊಡಮಣಿತ್ತಾಯ ದೈವೊದ ನೇಮ, ಕ್ಷೇತ್ರದ ಧರ್ಮ ದೈವೊಲೆನ ಗಗ್ಗರ ಸೇವೆ ನಡಪರೆ ಉಂಡು. ಮಾ.7 ಅಂಗಾರೆ ಬೊಲ್ಪುಗು ಕೊಡಿ ಜಾವರೆ ಉಂಡು. ಈ ಲೇಸ್ ಗ್ ಮಾತೆರ್ಲಾ ಬತ್ತ್ ದ್ ಪ್ರಸಾದ ದೆತೊಂದು ಶ್ರೀ ದೇವೆರೆನ ಕೃಪೆಗ್ ಪಾತ್ರರಾವೊಡು ಪಂದ್ ತಂತ್ರಿಲು ಉದಯ ಪಾಂಗಾಣ್ಣಾಯ, ಅನುವಂಶಿಕ ಆಡಳಿತ ಮೊಕ್ತೇಸರೆರ್ ವಿಜಯ ಕುಮಾರ್, ಪ್ರಧಾನ ಅರ್ಚಕೆರ್ ಬಾಲಚಂದ್ರ ಭಟ್ ಲೆಪ್ಪೋಲೆಡ್ ತೆರಿಪಾದೆರ್.

ರಡ್ಡ್ ಜನನ್ ಕೆರ್ತಿನ ಆನೆ ಅರೆಸ್ಟ್

ಸುಬ್ರಹ್ಮಣ್ಯ: ಮೂಜಿ ದಿನತ್ತ ಪಿರವು ಕಡಬಡ್ ರಡ್ಡ್ ಜನನ್ ದೊಂಕುದು ಕೆರ್ದ್ ಪಾಡ್ದಿನ ಆನೆನ್ ಇನಿ ಕಾರ್ಯಾಚರಣೆ ಮಲ್ತ್ ದ್ ಪತ್ತ್ ದೆರ್.

ಕಡಬ ಕೈತಲ್ ದ ಮುಜೂರು ಕೊಂಬಾರು ಕಾಡ್ ಡ್ ಈ ಆನೆ ಪತ್ತೆ ಆತ್ಂಡ್. ಅಯಿಕ್ಕ್ ಮತಿ ತಪ್ಪುನ ಇಂಜೆಕ್ಷನ್ ನ್ ಗನ್ ಡ್ ಶೂಟ್ ಮಲ್ಪುನ ಮುಖೇನ ಆನೆನ್ ಪತ್ ದೆರ್. ಫೆ.20 ಕ್ ಬೊಲ್ಪುಗು ಕಡಬ ತಾಲೂಕ್ ದ ರೆಂಜಿಲಾಡಿ ಗ್ರಾಮದ ನೈಲಡ್ ಬೇಲೆಗ್ ಪೋವೊಂದು ಇತ್ತಿನ ಕೈತಲ್ ದ ಪೊಣ್ಣು ರಂಜಿತಾ (21) ಮೆರೆನ ಮಿತ್ತ್ ಆನೆ ದಾಳಿ ಮಲ್ದ್ಂಡ್. ಮೆರೆನ್ ಬಚಾವ್ ಮಲ್ಪರೆ ಪೋಯಿನ ರಮೇಶ್ ರೈ (52) ಮೇರ್ಲಾ ಆನೆ ದಾಳಿರ್ದ್ ತೀರ್ ಪೋತೆರ್. ಈ ಬಗೆಟ್ ಕೈತಲ್ ದಕುಲು ಜಿಲ್ಲಾಧಿಕಾರಿ ಬೊಕ್ಕಇಲಾಖೆಯ ಅರಣ್ಯ ಇಲಾಖೆಗ್ ತೆರಿಪಾದೆರ್. ಈ ಘಟನೆ ಬಗೆಟ್ ಮನದಾನಿಯೇ ಕಾರ್ಯಾಚರಣೆ ಸುರು ಮಲ್ತಿನ ಇಲಾಖೆದಕುಲು ಮೂಜಿ ದಿನೊರ್ದು ಬೊಕ್ಕ ಆನೆನ್ ಪತ್ತ್ ದೆರ್.

ಮಾ.3-4: ತೊಕ್ಕೊಟ್ಟು ಸ್ವಾಮಿ ಕೊರಗಜ್ಜ ಸೇವಾ ಸಮಿತಿದ ಮುತಾಲಿಕೆಡ್ ಶ್ರೀ ಸ್ವಾಮಿ ಕೊರಗಜ್ಜನ ವರ್ಷದ ನೇಮ, ಸಾಂಸ್ಕೃತಿಕ ಲೇಸ್

ತೊಕ್ಕೊಟ್ಟು ಸ್ವಾಮಿ ಕೊರಗಜ್ಜ ಸೇವಾ ಸಮಿತಿದ ಮುತಾಲಿಕೆಡ್ ಶ್ರೀ ಸ್ವಾಮಿ ಕೊರಗಜ್ಜನ ವರ್ಷದ ನೇಮ ಅಂಚೆನೆ ಸಾಂಸ್ಕೃತಿಕ ಲೇಸ್ ಮಾ.3 ಬೊಕ್ಕ 4 ಕ್ಕ್ ನಡಪರೆ ಉಂಡು.

ಮಾ.3 ಕ್ ಸುಕ್ರಾರ ಬಯ್ಯಗ್ ಶ್ರೀ ಸ್ವಾಮಿ ಕೊರಗಜ್ಜ ದೈವೊದ ಪ್ರಾರ್ತನೆದೊಟ್ಟಿಗೆ ಸಾಂಸ್ಕೃತಿಕ ಲೇಸ್ ದ ಉದಿಪನ ಆದ್ ರಾತ್ರೆ ರಂಗಚಲನ ಕುಡ್ಲ ಅಭಿನಯದ ತುಳು ಭಕ್ತಿ ಪ್ರಧಾನ ನಾಟಕ “ಮಾಯೊದ ಮಾಯ್ಕಾರೆ ನಮ್ಮ ಕೊರಗಜ್ಜೆ” ತುಳು ನಾಟಕ ನಡಪರೆ ಉಂಡು. ಮಾ.4 ಸನಿಯಾರ ಬಯ್ಯಗ್ ಸ್ವಾಮಿ ಕೊರಗಜ್ಜನ ವರ್ಷದ ನೇಮ, ರಾತ್ರೆ ಕೊರಗಜ್ಜ ಸೇವಾ ಸಮಿತಿದ ವತಿರ್ದ್ ಸಾರ್ವಜನಿಕ ಅನ್ನಸಂತರ್ಪಣೆ ನಡಪರೆ ಉಂಡು. ಈ ಲೇಸ್ ಗ್ ಭಕ್ತಾದಿಲು ಮಾತೆರ್ಲಾ ಎಚ್ಚದ ಸಂಖ್ಯೆಡ್ ಬತ್ತ್ ದ್ ಶ್ರೀ ಕೊರಗಜ್ಜ ದೈವೊದ ಕೃಪೆಗ್ ಪಾತ್ರರಾವೊಡು ಪಂದ್ ತೊಕ್ಕೊಟ್ಟು ಸ್ವಾಮಿ ಕೊರಗಜ್ಜ ಸೇವಾ ಸಮಿತಿದ ಅಧ್ಯಕ್ಷೆರ್, ಗೌರವಾಧ್ಯಕ್ಷೆರ್ ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.

ಅಬುಧಾಬಿಡ್ ನಿವೃತ್ತಿ ಆದ್ ಅಪ್ಪೆ ಇಲ್ಲಗ್ ಬರ್ರೆ ಪಿದಾಡ್ದ್ ಉಂತಿನ ದಂಪತಿಲೆಗ್ ತಮ್ಮನ

ಅಬುಧಾಬಿ: ಕರಿನ 40 ವರ್ಷೊರ್ದಿಂಚ ಯುಎಇದ ರಾಜಬೂಡು ಅಬುಧಾಬಿಡ್ ಇಪ್ಪುನ ಯೋಗೀಶ್ ಪ್ರಭು ಬೊಕ್ಕ ಚೇತನಾ ಯೋಗೀಶ್ ಪ್ರಭು ಮೊಕುಲು ತನ್ನ ವೃತ್ತಿ ಜೀವನಡ್ ನಿವೃತ್ತಿ ಆದ್ ಅಪ್ಪೆ ಇಲ್ಲಡೆ ಪಿದಾಡ್ದ್ ಉಂತಿನ ದಂಪತಿಲೆಗ್ ಅಬುಧಾಬಿದ ತುಳು-ಕನ್ನಡಿಗೆರೆನ ಪರವಾದ್ ಅಬುಧಾಬಿ ಕರ್ನಾಟಕ ಸಂಘದ ವತಿರ್ದ್ ತಮ್ಮನ ನಡತ್ಂಡ್.

ಈ ಲೇಸ್ ಡ್ ಅಬುಧಾಬಿ ಕರ್ನಾಟಕ ಸಂಘದ ಅಧ್ಯಕ್ಷೆರ್ ಸರ್ವೋತ್ತಮ ಶೆಟ್ಟಿ, ಉದ್ಯಮಿ ಸುಂದರ ಶೆಟ್ಟಿ, ಸಂಘದ ಕಾರ್ಯಕಾರಿ ಸಮಿತಿದ ಸದಸ್ಯೆರ್ ಮನೋಹರ ತೊನ್ಸೆ, ಸುಧೀರ್ ಶೆಟ್ಟಿ, Benet Dmello, ಅಲ್ತಾಫ್ M.S, ವಿಜಯ ರಾವ್, ಈಶ್ವರ್ ಉಣಕಲ್ಲ್, ಯತಿರಾಜ್ ಶೆಟ್ಟಿ, ಕೃಷ್ಣರಾಜ್ ರಾವ್ ಚೇತನ್, ಅಬುಧಾಬಿ ಕರ್ನಾಟಕ ಸಂಘದ ಥ್ರೋಬಾಲ್ ಆಟಗಾರ್ತಿ ಸಂಗೀತ ಶೆಟ್ಟಿ, ಸ್ಮಿತ ಚೌಟ, ಸುಪ್ರಿಯ ರೈ, ವಿಜಯ ತಂತ್ರಿ, ಅನುಶ್ರೀ, ಕೃಪ ಮೊಕುಲು ಶಾಲ್ ಪೊದೆಪಾದ್ ಸನ್ಮಾನ ಪತ್ರ, ಸ್ಮರಣಿಕೆ ಕೊರ್ದು ತಮ್ಮನ ಮಲ್ತೆರ್. ಈ ಪೊರ್ತುಡು ಸೌಮೀಣಿ ಸುಂದರ ಶೆಟ್ಟಿ, ಉಷ ಸರ್ವೋತ್ತಮ ಶೆಟ್ಟಿ, ಪೂರ್ಣಿಮ ಮನೋಹರ ತೋನ್ಸೆ ಇತ್ತೆರ್. ಯೋಗೀಶ್ ಪ್ರಭು ಮೆರೆನ ಬಗ್ಗೆ ಸರ್ವೋತ್ತಮ ಶೆಟ್ಟಿ, ಮನೋಹರ ತೋನ್ಸೆ, ಕೃಷ್ಣರಾಜ್ ಬೊಕ್ಕ ಚೇತನ ಯೋಗಿಶ್ ಮೆರೆನ ಬಗ್ಗೆ ಸ್ಮಿತ, ಸುಪ್ರಿಯಾ ಪಾತೆರಿಯೆರ್. ಮನೋಹರ ತೋನ್ಸೆ ಸಮ್ಮನ ನಡತಿನ ದಂಪತಿಲೆನ ಪೊಲಬುನ್ ಕೊರಿಯೆರ್. ಸರ್ವೋತ್ತಮ ಶೆಟ್ಟಿ ಎದ್ಕೊಂದು, ಸೊಲ್ಮೆ ಸಂದಾದೆರ್.

ಯೋಗೀಶ್ ಪ್ರಭು ಬೊಕ್ಕ ಚೇತನಾ ಯೋಗೀಶ್ ಪ್ರಭುನ ಎಲ್ಯ ಪೊಲಬು: ಒಡಿಪು ಜಿಲ್ಲೆದ ಕಾರ್ಲದ ಶ್ರೀ ಕೃಷ್ಣ ಪ್ರಭು ಬೊಕ್ಕ ಭಾರತಿ ಪ್ರಭುಲೆನ ಮಗೆ ಯೋಗಿಶ್ ವಿದ್ಯಾಭ್ಯಾಸನ್ ಒಡಿಪುದ ಭುವನೆಂದ್ರ ಕಾಲೇಜ್ ಡ್ ಮುಗಿತೆರ್. ವೃತ್ತಿಡ್ ಕರಿನ 40 ವರ್ಷೊರ್ದಿಂಚ ಫಸ್ಟ್ ಅಬುಧಾಬಿ ಬ್ಯಾಂಕ್ (NBAD) ವೈಸ್ ಪ್ರೆಸಿಡೆಂಟ್ (ಗ್ರೂಪ್ ಫೈನಾನ್ಸ್ ಟ್ರಶರಿ) ಯಾದ್ ಸೇವೆ ಸಂದಾದ್ ನಿವೃತ್ತರಾತೆರ್. ಪ್ರವೃತ್ತಿಡ್ ಬೇತೆ ಬೇತೆ ಸಂಘ ಸಂಸ್ಥೆಲೆಡ್ ಸೇವೆ ಸಂದಾದೆರ್. ಅಯಿಟ್ ಮುಖ್ಯವಾದ್ ಅಬುಧಾಬಿ ಕರ್ನಾಟಕ ಸಂಘ, ಅಮ್ಚಿಗಲೆ ಸಮಾಜ ಯುಎಇ, ವಿಶ್ವ ತುಳು ಸಮ್ಮೇಳ ದುಬೈ, ವಾಕಿಂಗ್ ಕ್ಲಬ್ ಅಬುಧಾಬಿ, ಭಜನಾ ಮಂಡಳಿ, ಬೊಕ್ಕ ಇಂಡಿಯನ್ ಸೋಷಿಯಲ್ ಆಂಡ್ ಕಲ್ಚರಲ್ ಸೆಂಟರ್ ದ ಅಧ್ಯಕ್ಷೆರಾದ್ ಸೇವೆ ಸಂದಾದೆರ್. ಈ ಪೊರ್ತುಡು ಬೇತೆ ಬೇತೆ ಸೇವಾ ಕಾರ್ಯದೊಟ್ಟಿಗೆ ಕೋವಿಡ್ ದ ಪೊರ್ತುಡು ಸಂದಾಯಿನ ಸೇವೆಗ್ 2021 ಟ್ ಸಂಸ್ಥೆಗ್ “ಮಹಾತ್ಮ” ಅವಾರ್ಡ್ ತಿಕ್ ದ್ಂಡ್.

ಯೋಗೀಶ್ ಮೆರೆನ ಬೊಡೆದಿ ಚೇತನ ಯೋಗೀಶ್ ಪ್ರಭು ಮೇರ್ ಅಬುಧಾಬಿ ಮಹಿಳಾ ಥ್ರೋಬಾಲ್ ಕೂಟದ ಪ್ರಮುಖ ಆಟಗಾರ್ತಿ ಆದಿತ್ತೆರ್. ISC ಅಬುಧಾಬಿ ಮಹಿಳಾ ವಿಭಾಗಡ್ ಮಹಿಳಾ ಘಟಕದ ಕನ್ವಿನರ್ ಆದ್ ಸೇವೆ ಸಂದಾದೆರ್.
ಮಗಲ್ ಆರತಿ ಪ್ರಭು ಮರ್ಮಾಯೆ ದರ್ಶನ್ ರೆಡ್ಡಿ ಸಾಫ್ಟ್‌ವೇರ್ ಇಂಜಿನಿಯರ್ ಆದ್ ಅಮೆರಿಕಡ್ ಉಲ್ಲೆರ್. ಮಗೆ ಅಜಿತ್ ಪ್ರಭು ಮೆಕ್ಯಾನಿಕಲ್ ಇಂಜಿನಿಯರಾದ್ ಯುಕೆಡ್ ಬೇಲೆಡ್ ಉಲ್ಲೆರ್.

ವರದಿ: ವಿಜಯಕುಮಾರ್ ಶೆಟ್ಟಿ ಗಾಣದಮೂಲೆ ಮಜಿಬೈಲ್ (ದುಬೈ)
ಚಿತ್ರ: ಶಿವು ಗೌಡ

ಬಜಪೆ ಬ್ರಹ್ಮಶ್ರೀ ನಾರಾಯಣಗುರು ಸಮುದಾಯ ಭವನಡ್ ಯುವವಾಹಿನಿ ಬಜಪೆ ಘಟಕದ 9 ನೇ ವರ್ಷದ ಪದಪ್ರದಾನ ಲೇಸ್

ಯುವವಾಹಿನಿ ಬಜಪೆ ಘಟಕದ 2023-24 ಸಾಲ್ ದ 9 ನೇ ವರ್ಷದ ಪೊಸ ಪದಾಧಿಕಾರಿಲೆನ ಪದಪ್ರದಾನ ಲೇಸ್ ಫೆ.19 ಐತಾರ ಮಧ್ಯಾಹ್ನ 3 ಗಂಟೆಗ್ ಬಜಪೆ ಬ್ರಹ್ಮಶ್ರೀ ನಾರಾಯಣಗುರು ಸಮುದಾಯ ಭವನಡ್ ನಡತ್ಂಡ್.

ಈ ಲೇಸ್ ನ್ ಬಜಪೆ ಇಮಾನ ನಿಲ್ದಾಣದ ಕಾರ್ ಚಾಲಕ- ಮಾಲಕೆರೆನ ಸಂಘದ ಅಧ್ಯಕ್ಷೆರ್ ಜಯಂತ್ ಸುವರ್ಣ ಅಂಬಾಳ್ ಉದಿಪನ ಮಲ್ತೆರ್. ಪೊಸ ಪದಾಧಿಕಾರಿಲೆನ ಪದಗ್ರಹಣ ಲೇಸ್ ದ ಪದಪ್ರದಾನನ್ ಕುಡ್ಲ ಯುವವಾಹಿನಿ ಕೇಂದ್ರ ಸಮಿತಿದ ಅಧ್ಯಕ್ಷೆರ್ ರಾಜೇಶ್ ಬಿ ಮಲ್ತೆರ್. ಗುರ್ಕಾರ್ಮೆನ್ ಬಜಪೆ ಯುವವಾಹಿನಿ ಘಟಕದ ಅಧ್ಯಕ್ಷೆರ್ ಉಷಾ ಶಿವಾನಂದ್ ಒಯಿಸ್ ದಿತ್ತೆರ್. ಪೊಸ ಅಧ್ಯಕ್ಷೆರಾದ್ ಮಾಧವ ಸಾಲ್ಯಾನ್, ಕಾರ್ಯದರ್ಶಿಯಾದ್ ದೀಕ್ಷಿತ್ ಪೂಜಾರಿ ಅಧಿಕಾರ ಒಯಿಸೊಂಡೆರ್. ಈ ಪೊರ್ತುಡು ಬಜಪೆ ಪಟ್ಟಣ ಪಂಚಾಯತ್ ಕಾರ್ಯಾಲಯಡ್ ಗುಮಾಸ್ತೆಯಾದ್ ಸೇವೆ ಸಂದಾವೊಂದು ಇಪ್ಪುನ ಲತಾ ಮೆರೆಗ್ ತಮ್ಮನ ನಡತ್ಂಡ್. ಈ ಲೇಸ್ ಗ್ ಮಲ್ಲ ಬಿನ್ನೆರಾದ್ ಬಜಪೆ-ಕರಂಬಾರು ಬ್ರಹ್ಮಶ್ರೀ ನಾರಾಯಣ ಗುರು ಸೇವಾ ಸಂಘದ ಉಪಾಧ್ಯಕ್ಷೆರ್ ಜಗನ್ನಾಥ ಪೂಜಾರಿ, ಶ್ರೀ ಕ್ಷೇತ್ರ ಗೆಜ್ಜೆಗಿರಿ ಆಡಳಿತ ಸಮಿತಿದ ಕಾರ್ಯದರ್ಶಿ ಮೋಹನ್ ದಾಸ್ ಬಂಗೇರ ವಾಮಂಜೂರು, ಯುವವಾಹಿನಿ ಕೇಂದ್ರ ಸಮಿತಿದ ಸಂಘಟನ ಕಾರ್ಯದರ್ಶಿ ಕಿಶೋರ್ ಕುಮಾರ್ ಸುರತ್ಕಲ್, ಲೇಸ್ ದ ಸಂಚಾಲಕೆರ್ ಯೋಗೀಶ್ ಪೂಜಾರಿ ಪಾಲ್ ಪಡೆದಿತ್ತೆರ್. ನಿಶಾಲ್ ಪೂಜಾರಿ ವರದಿ ಕೊರಿಯೆರ್. ಚಂದ್ರಶೇಖರ ಪೂಜಾರಿ ಲೇಸ್ ದ ಸುಧಾರಿಕೆ ಮಲ್ತೆರ್. ದೀಕ್ಷಿತ್ ಅಮೀನ್ ಸೊಲ್ಮೆ ಸಂದಾಯೆರ್.

ಮಂತ್ರಾಲಯಗ್ ನಟಿ ರಚಿತಾ ರಾಮ್ ಭೇಟಿ

ಕೆಲವು ದಿನತ ಪಿರವು ಮೇಲುಕೋಟೆ ದೇವಲ್ಯಗ್ ಭೇಟಿ ಕೊರ್ನ ನಟಿ ರಚಿತಾ ರಾಮ್ ಇನಿ ಮಂತ್ರಾಲಯಗ್ ಭೇಟಿ ಕೊರ್ದು ರಾಯೆರೆನ ದರ್ಶನ ಪಡೆಯೆರ್.

ರಾಯೆರೆನ ಮೂಲವೃಂದಾವನ ದರ್ಶನ ಪಡೆಯಿನ ಆರ್, ಬೊಕ್ಕ ಮಂಚಾಲಮ್ಮ ದೇವಿಗ್ ಇಸೇಸ ಪೂಜೆ ಸಂದಾಯೆರ್. ಬೊಲ್ಪುಗು 5 ಗಂಟೆಗ್ ರಚಿತಾ ರಾಮ್ ಪಜ್ಜೆ ನಮಸ್ಕಾರ ಪಾಡ್ದೆರ್. ಸಾಮಾನ್ಯವಾದ್ ಪರಕೆ ಪಂಡಿನಕುಲು ಮಠತ್ತ ಅಂಗಣೊಡು ಪಜ್ಜೆ ನಮಸ್ಕಾರ ಪಾಡುನ ವಾಡಿಕೆ ಆತ್ಂಡ್. ಅಂಚನೆ ಬಯ್ಯಗ್ ರಚಿತಾ ರಾಮ್ ಗ್ ಮಠತ್ತ ವತಿರ್ದ್ ತಮ್ಮನ ಲೇಸ್ ನಡಪರೆ ಉಂಡು.

ತುಳು ಸಂಘ ಬೊರಿವಲಿ ವತಿರ್ದ್ ನಡತ್ಂಡ್ ವರ್ಷದ ವಿಹಾರ ಕೂಟ

ಬೊಂಬೈ: ತುಳು ಸಂಘ ಬೊರಿವಲಿದ ವತಿರ್ದ್ ಫೆ.19 ಕ್ಕ್ ಮಲಾಡ್ ಪಶ್ಚಿಮದ ಮಡ್ ಕೈತಲ್ ದ ರಾಹುತ್ ಕೋಟೇಜ್ ಡ್ ವರ್ಷದ ವಿಹಾರ ಕೂಟ ನಡತ್ಂಡ್.

ಈ ಲೇಸ್ ಡ್ ಸಂಘದ ನೂದೆರ್ದ್ ಎಚ್ಚ ಜನ ಸದಸ್ಯೆರ್ ಪಾಲ್ ಪಡೆಯೆರ್. ಹಿರಿ ಕಿರಿಯೆರೆಗ್ ಬೇತೆ ಬೇತೆ ಗೊಬ್ಬೊದ ಪಂತೊ ಮಾತ್ರ ಅತ್ತಂದೆ ಸಂಗೀತ ನೃತ್ಯನ್ ಆಯೋಜನೆ ಮಲ್ತ್ ದ್ ಇತ್ತೆರ್. ಮಾತೆರ್ಲಾ ನೆಟ್ಟ್ ಪಾಲ್ ಪಡೆದ್ ಖುಷಿ ಪಡೆಯೆರ್. ಈ ಲೇಸ್ ಡ್ ಸಂಘದ ಅಧ್ಯಕ್ಷೆರ್ ಕರುಣಾಕರ ಎಂ. ಶೆಟ್ಟಿ ಮೇರ್ ಬೊಲ್ಪುರ್ದ್ ಬಯ್ಯ ಮುಟ್ಟ ವಿಹಾರ ಕೂಟಡ್ ಪಾಲ್ ಪಡೆದ್ ಯಶಸ್ವಿಯಾದ್ ನಡಪಾದ್ ಕೊರ್ನ ಮಾತ ಸದಸ್ಯೆರೆಗ್ ಸೊಲ್ಮೆ ಸಂದಾಯೆರ್. ಬೊಕ್ಕ ಮಾತ ಕಾರ್ಯನ್ ನ ಯಶಸ್ವಿಯಾದ್ ಮಲ್ತಿನ ಸಂಘದ ಪದಾಧಿಕಾರಿಲೆಗ್, ಕಾರ್ಯಕಾರಿ ಸಮಿತಿದ ಸದಸ್ಯೆರೆಗ್, ಸಾಂಸ್ಕೃತಿಕ ಸಮಿತಿ, ಮಹಿಳಾ ವಿಭಾಗ ಬೊಕ್ಕ ಯುವ ವಿಭಾಗದ ಸದಸ್ಯೆರೆಗ್ ಅಭಿನಂದನೆ ಸಂದಾಯೆರ್. ತುಳು ಸಂಘ ಬೊರಿವಲಿದ ಮಾಜಿ ಅಧ್ಯಕ್ಷೆರ್ ವಾಸು ಪುತ್ರನ್, ಪ್ರಕಾಶ್ ಶೆಟ್ಟಿ ಪೇಟೆಮನೆ, ಮಾಜಿ ಉಪಾಧ್ಯಕ್ಷೆರ್ ಪ್ರಭಾಕರ ಶೆಟ್ಟಿ ಮೊಕ್ಲೆಗ್ ಸಂಘದ ಅಧ್ಯಕ್ಷೆರ್ ಕರುಣಾಕರ ಎಂ. ಶೆಟ್ಟಿ ಕೃತಜ್ಞತೆ ಸಂದಾಯೆರ್.