October 2022

ಪೇಸಿಎಂ ಕೇಸ್: ಕಾಂಗ್ರೆಸ್ ನಾಯಕೆರೆನ ಮಿತ್ತ್ ದ ಎಫ್ ಐಆರ್ ವಜಾ

ಬೆಂಗ್ಲೂರ್: ದೇಶ ಇಡೀ ಸುದ್ದಿ ಆದ್ ಇತ್ತಿನ ಕಾಂಗ್ರೆಸ್ ಪಕ್ಷದ ಪೇಸಿಎಂ ಅಭಿಯಾನ ಕೇಸ್ ಗ್ ಸಂಬಂಧ ಪಟ್ಟಿನಂಚನೆ ಕಾಂಗ್ರೆಸ್ ಪಕ್ಷದ ರಡ್ಡ್ ನಾಯಕೆರೆ‌ನ ವಿರುದ್ಧ ದಾಖಲ್ ಆಯಿನ ಎಫ್ ಐಆರ್ ಲೆನ್ ಕರ್ನಾಟಕ ಹೈಕೋರ್ಟ್ ವಜಾ ಮಲ್ದ್ಂಡ್.

ಈ ಅರ್ಜಿದ ವಿಚಾರಣೆ ನಡಪಾಯಿನ ನ್ಯಾಯಮೂರ್ತಿ ಎಂ ನಾಗಪ್ರಸನ್ನ ಮೇರೆನ ನೇತೃತ್ವಡ್ ಏಕಸದಸ್ಯ ಪೀಠ ಈ ಆದೇಶನ್ ಕೊರ್ತುಂಡು. ಈ ಬಗೆಟ್ ಬೆಂಗ್ಲೂರ್ ನೆಲಮಂಗಲ ವಿಧಾನಸಭಾ ಕ್ಷೇತ್ರದ ಕಾಂಗ್ರೆಸ್‌ ಮುಖಂಡೆರ್ ಬೊಕ್ಕ ವಕೀಲೆರ್ ರಡ್ಡ್ ಜನತ ವಿರುದ್ಧ ಎಫ್ ಐಆರ್ ದಾಖಲ್ ಆದ್ ಇತ್ಂಡ್.

ರಾಷ್ಟ್ರಪತಿ ಮುರ್ಮು ಬಗೆಟ್ಟ್ ಬೊರ್ಚಾಂದಿನ ಪದ ಬರೆಯಿನ ಆರೋಪ: ಪತ್ರಕರ್ತೆರ್ ವಿಶ್ವೇಶ್ವರ ಭಟ್ರೆಗ್ ಸಮನ್ಸ್

ಬೆಂಗ್ಲೂರ್ : ರಾಷ್ಟ್ರಪತಿ ದ್ರೌಪದಿ ಮುರ್ಮು ಮೇರೆನ ಮಿತ್ತ್ ಅಪಮಾನ ಆಪಿನಂಚಿನ ಪದ ಪ್ರಯೋಗ ಮಲ್ದಿನ ಬಗೆಟ್ಟ್ ರಾಷ್ಟ್ರೀಯ ಮಹಿಳಾ ಆಯೋಗ (ಎನ್‌ಸಿಡಬ್ಲ್ಯೂ) ವಿಶ್ವವಾಣಿ ಪತ್ರಿಕೆದ ಪ್ರಧಾನ ಸಂಪಾದಕೆರ್ ವಿಶ್ವೇಶ್ವರ ಭಟ್ ಮೇರೆಗ್ ಸಮನ್ಸ್ ಕೊರ್ತುಂಡು.

ಈ ಬಗೆಟ್ ಟ್ವೀಟ್ ಮಲ್ತಿನ ಎನ್‌ಸಿಡಬ್ಲ್ಯೂ, ಅ. 26ದಾನಿ ಮಧ್ಯಾಹ್ನ 12.30 ಕ್ ವಿಚಾರಣೆಗ್ ಹಾಜರ್ ಅಪುಲೆಕ್ಕ ಪತ್ರಕರ್ತೆರ್ ವಿಶ್ವೇಶ್ವರ ಭಟ್ ಗ್ ನೋಟಿಸ್ ಕೊರ್ತುಂಡು. ರಾಷ್ಟ್ರಪತಿ ದ್ರೌಪದಿ ಮುರ್ಮು ಮೇರೆಗ್ ವಿಶ್ವೇಶ್ವರ್ ಭಟ್ ತನ್ನ ಅಂಕಣಡ್ ಅವಮಾನ ಮಲ್ದೆರ್ ಪಂದ್ ಸಾಮಾಜಿಕ ಜಾಲತಾಣಡ್ ಟೀಕೆಗ್ ಕಾರಣ ಆತ್ಂಡ್.

ಮಡಿಕೇರಿ: ದೇವೆರೆ ಪಾದ ಸೇರಿನ ಪೊಲೀಸೆರೆಗ್ ಗೌರವ ನಮನ ಸಲ್ಲಿಕೆ

ಮಡಿಕೇರಿ : ದೇಶಡ್ ಶಾಂತಿ, ಕಾನೂನುನ್ ಕಾಪಾಡೊಂದು ಆಸ್ತಿ ರಕ್ಷಣೆ ಪೊರ್ತುಡು ಬಲಿ ಆಯಿನ ಪೊಲೀಸ್ ಹುತಾತ್ಮೆರೆಗ್ ಪೇಂಟೆದ ಜಿಲ್ಲೆ ಪೊಲೀಸ್ ಕವಾಯತು ಮೈದಾನಡ್ ಪೊಲೀಸ್ ಹುತಾತ್ಮೆರೆನ ದಿನಾಚರಣೆ ನಡತ್ಂಡ್.

ಪ್ರಧಾನ ಜಿಲ್ಲೆ ಬೊಕ್ಕ ಸೆಷನ್ ನ್ಯಾಯಾಧೀಶೆರ್ ಎಂ.ಭೃಂಗೇಶ್, ಪೊಲೀಸ್ ಅಧೀಕ್ಷಕೆರ್ ಎಂ.ಎ.ಅಯ್ಯಪ್ಪ, ಪೊಲೀಸ್ ಅಧಿಕಾರಿ ಬೊಕ್ಕ ಸಿಬ್ಬಂದಿಲು ಹುತಾತ್ಮ ಪೊಲೀಸ್ ಸ್ಮಾರಕಗ್ ಪೂಗುಚ್ಛ ಪರ್ದ್, ಗೌರವ ನಮನ ಸಂದಾಯೆರ್. ಬೊಕ್ಕ ಜಿಲ್ಲಾ ಸಶಸ್ತ್ರ ಪೊಲೀಸ್ ಪಡೆರ್ದ್ ಮೂಜಿ ಸುತ್ತು ಕುಶಾಲುತೋಪು ರಾಪದ್ ಗೌರವ ಕೊರ್ಯೆರ್.

ಕಮ್ಯುನಿಟಿ ರೇಡಿಯೋ ಅಸೋಸಿಯೇಶನ್ ಬೊಕ್ಕ ಯೂನಿಸೆಫ್ ದ ವತಿರ್ದ್ ಸ್ವಾಸ್ಥ್ಯ ಸಂಕಲ್ಪ ಸರಣಿ ಲೇಸ್

ಕಮ್ಯುನಿಟಿ ರೇಡಿಯೋ ಅಸೋಸಿಯೇಶನ್ ಬೊಕ್ಕ ಯೂನಿಸೆಫ್ ದ ವತಿರ್ದ್ ಸ್ವಾಸ್ಥ್ಯ ಸಂಕಲ್ಪ ಸರಣಿ ಲೇಸ್ ಅ. 21ದಾನಿ ಬಯ್ಯಗ್ 4.15 ಕ್ಕ್ ರೇಡಿಯೊ ಮಣಿಪಾಲ್ 90.4Mhz ಸಮುದಾಯ ಬಾನುಲಿಡ್ ಪ್ರಸಾರ ಆಯೆರೆ ಉಂಡು.

ಈ ಲೇಸ್ ಡ್ ಸಾರ್ವಜನಿಕ ಜಾಗೆಲೆಡ್ ಕ್ಲೀನ್ ಮಲ್ಪುನ ಬೊಕ್ಕ ನೈರ್ಮಲ್ಯದ ಮಹತ್ವ ದ ಬಗೆಟ್ ಮಣಿಪಾಲ ಕೆ.ಎಂ.ಸಿದ ಸಮುದಾಯ ವೈದ್ಯಕೀಯ ವಿಭಾಗದ ಸಹಾಯಕ ಪ್ರಾಧ್ಯಾಪಕೆರ್ ಡಾ.ಈಶ್ವರಿ ಮಾಹಿತಿ ಕೊರ್ಯೆರೆ ಉಲ್ಲೆರ್. ಬೊಕ್ಕ ಅ. 22ದಾನಿ ಮಧ್ಯಾಹ್ನ 12.15 ಕ್ ಕೂಡೊರ ಈ ಕಾರ್ಯಕ್ರಮ ಪ್ರಸಾರ ಆಪುಂಡು.

ತಲಕಾವೇರಿಡ್ ಕಾವೇರಿ ಉಚ್ಚಯದ ಉದಿಪನ

ಮಡಿಕೇರಿ: ಜಲಸಂಪನ್ಮೂಲ ಇಲಾಖೆ, ಬೊಕ್ಕ ಕಾವೇರಿ ನೀರಾವರಿ ನಿಗಮದ ವತಿರ್ದ್ ಬೊಲ್ಪುಗು ತಲಕಾವೇರಿ ಕ್ಷೇತ್ರಡ್ ಗಣಪತಿ, ಈಶ್ವರ ಮಂದಿರ ಬೊಕ್ಕ ಬ್ರಹ್ಮಕುಂಡಿಕೆಗ್ ಪೂಜೆ ಸಂದಾವನ ಒಟ್ಟಿಗೆ ಕಾವೇರಿ ನದಿ ಉಚ್ಚಯಗ್ ಬಿನ್ನೆರೆರ್ದ್ ಉದಿಪನ ಆಂಡ್.

ಈ ಪೊರ್ತುಡು ಕಾವೇರಿ ನದಿ ಸಂರಕ್ಷಣಾ ಕರಪತ್ರಲೆನ ಬುಡುಗಡೆ ಮಲ್ತ್ ದ್, ಕಾವೇರಿ ನದಿ ಸಂರಕ್ಷಣೆ ಬಗೆಟ್ ಪ್ರತಿಜ್ಞಾ ವಿಧಿ ಸ್ವೀಕಾರ ಮಲ್ತೆರ್. ಬೊಕ್ಕ ಭಗಂಡೇಶ್ವರ ಕ್ಷೇತ್ರಡ್ ಪೂಜೆ, ಭಾಗಮಂಡಲ ತ್ರಿವೇಣಿ ಸಂಗಮಡ್ ಜೀವನದಿ ಕಾವೇರಿಗ್ ಮಂತ್ರ ಪಂಡಿ ಬೊಕ್ಕ ಆರತಿ ಮಲ್ತೆರ್,

ಈ ಪೊರ್ತುಡು ಕಿರಿಕೊಡ್ಲಿ ಮಠದ ಶ್ರೀ ಸದಾಶಿವ ಸ್ವಾಮೀಜಿ, ಸರ್ಕಾರಿ ಜಮೀನುಲೆನ ಸಂರಕ್ಷಣಾ ಸಮಿತಿ ಅಧ್ಯಕ್ಷೆರ್ ಬೊಕ್ಕ ಶಾಸಕೆರ್ ಕೆ.ಜಿ.ಬೋಪಯ್ಯ, ಮಡಿಕೇರಿ ಕ್ಷೇತ್ರದ ಶಾಸಕೆರ್ ಎಂ.ಪಿ.ಅಪ್ಪಚ್ಚುರಂಜನ್, ವಿಧಾನ ಪರಿಷತ್ ಸದಸ್ಯೆರ್ ಎಂ.ಪಿ.ಸುಜಾ ಕುಶಾಲಪ್ಪ, ಕರ್ನಾಟಕ ಜೀವ ವೈವಿಧ್ಯ ಮಂಡಳಿ ಅಧ್ಯಕ್ಷೆರ್ ನಾಪಂಡ ರವಿಕಾಳಪ್ಪ, ಕಾವೇರಿ ನದಿ ಸ್ವಚ್ಛತಾ ಆಂದೋಲನದ ರಾಜ್ಯ ಸಂಚಾಲಕ ಎಂ.ಎನ್. ಚಂದ್ರಮೋಹನ್, ದಕ್ಷಿಣ ಭಾರತದ ಸಾಧುಸಂತೆರ್, ಸ್ವಾಮೀಜಿಲು ಇತ್ತೆರ್.