July 2021

ದ್ವಿತೀಯ ಪಿಯುಸಿ ಫಲಿತಾಂಶ ಪ್ರಕಟ : ದಕ್ಷಿಣ ಕನ್ನಡಗ್ ಸುರುತ ಸ್ಥಾನ

ಬೆಂಗ್ಳೂರು ಜುಲೈ 20: ದ್ವಿತೀಯ ಪಿಯು ಫಲಿತಾಂಶಡ್ ಕುಡ್ಲಗ್ ಸುರುತ ಸ್ಥಾನ ಬೈದುಂಡು . ದಕ್ಷಿಣ ಕನ್ನಡದ 445 ಜೋಕುಲು 600ಕ್ಕ್ 600 ಅಂಕ ಪಡೆತೆರ್ . ದ್ವಿತೀಯ ಪಿಯು ಫಲಿತಾಂಶಡ್ ಬೆಂಗ್ಳೂರು ದಕ್ಷಿಣ ರಡ್ಡನೇ ಸ್ಥಾನ ಪಡೆತುಂಡು . ಬೆಂಗ್ಳೂರು ದಕ್ಷಿಣದ 302 ಜೋಕ್ಲೆಗ್ 600ಕ್ಕ್ 600 ಅಂಕ ಬೈದುಂಡು . 2ನೇ ಪಿಯು ಫಲಿತಾಂಶಡ್ ಬೆಂಗ್ಳೂರು ಉತ್ತರ 3ನೇ ಸ್ಥಾನ ಪಡೆತುಂಡು . ಬೆಂಗ್ಳೂರು ಉತ್ತರದ 261 ಜೋಕ್ಲೆಗ್ 600ಕ್ಕ್ 600 ಅಂಕ ಬೈದುಂಡು . ದ್ವಿತೀಯ ಪಿಯು ಫಲಿತಾಂಶಡ್ ಒಡಿಪುಗು 4ನೇ ಸ್ಥಾನ ಬೈದುಂಡು . ಒಡಿಪುದ 149 ಜೋಕ್ಲೆಗ್ 600ಕ್ಕ್ 600 ಅಂಕ ಬೈದುಂಡು .

ಜುಲೈ. 22 ಮುಟ ರಾಜ್ಯಡ್ ಬಾರಿ ಬರ್ಸ : ಹವಾಮಾನ ಇಲಾಖೆ

ಬೆಂಗ್ಳೂರು,: ಇತ್ತೇ ರಾಜ್ಯೋಡು , ಕರಾವಳಿ ಬಾಗ , ದಕ್ಷಿಣ ಒಳನಾಡು , ಮಲೆನಾಡ್ ಡ್ ವರುನಾರ್ಭಟ ಜೋರಾತುಂಡು . ಧಾರಾಕಾರ ಬರ್ಸರ್ದಾವರ ಜನಜೀವನ ಅಸ್ತವ್ಯಸ್ತ ಆತುಂಡು.ಉತ್ತರಕನ್ನಡ , ಕೊಡಗು , ಕರಾವಳಿ ಜಿಲ್ಲೆಡ್ ಬುಡoದೆ ಬರ್ಸ ಬರೊಂದು ಉಂಡು .. ಇತ್ತೇ ಜುಲೈ. 22 ತಾರೀಖ್ ಮುಟ ಕರ್ನಾಟಕದ ಕೆಲವು ಕಡೆ ಬಾರಿ ಬರ್ಸ ಬರ್ರೆ ಉಂಡು ಪಂದ್ ಹವಾಮಾನ ಇಲಾಖೆ ಮುನ್ಸೂಚನೆ ಕೊರ್ತುಂಡು .

ಒಡಿಪುದ ಸ್ವಾಗತ ಗೋಪುರೊಡು ತುಲು ಬರವುಡ್ ಪುದರ್ ಪಾಡೊಡು ಪಂದ್ ಜೈ ತುಲುನಾಡ್(ರಿ.) ಕೂಟೊರ್ದು ಅರಿಕೆ

ಒಡಿಪು, ಜುಲೈ 20: ತುಲು ಭಾಷೆಗ್ ತನ್ನನೇ ಆಯಿನ ಸ್ವಂತ ಲಿಪಿ ಉಂಡು ಈ ಲಿಪಿನ್ ಸಾವಿರಾರು ಜನಕುಲು ಇತ್ತೆ ಕಲ್ತೊಂದು ಉಲ್ಲೆರ್ . ತುಳುಲಿಪಿನ್ ಒರಿಪಾವುನಲ್ಪ ಒಡಿಪು ಜಿಲ್ಲೆ ಮಹತ್ತರವಾಯಿನ ಪಾತ್ರ ಪಡೆತುಂಡು ಮಠಟ್ ಇತ್ತೆಲ ಬಳಕೆಡ್ ಉಂಡು . ತುಳು ಲಿಪಿ ಬೊಕ್ಕ ತುಲು ಭಾಷೆದ ಪ್ರಾಚೀನ ಗ್ರಂಥವಾಯಿನ ಮಹಾಭಾರತೊ ಪನ್ಪಿನ ಮಹಾ ಗ್ರಂಥನ್ ಬರೆಯಿನಾರ್ ಒಡಿಪುದಾರ್. ಇಂಚಾದ್ ತುಳುಲಿಪಿತ ಬುಲೆಚ್ಚಿಲ್ ಗ್ ಬೊಕ್ಕ ಪುನಶ್ಚೇತನಗಾದ್ ತುಳುಲಿಪಿತ ನಾಮಫಲಕನ್ ಒಡಿಪುದ ಸ್ವಾಗತ ಗೋಪುರಡ್ ಪಾಡೊಡು ಪಂದ್ ಒಡಿಪು ವಿಧಾನಸಭಾ ಕ್ಷೇತ್ರದ ಶಾಸಕೆರಾಯಿನ ಶ್ರೀ ರಘುಪತಿ ಭಟ್‌ ಮೆರ್ಡ ಜೈ ತುಳುನಾಡ್ (ರಿ.) ಸಂಘಟನೆ ಒಡಿಪು ಪ್ರೆಸ್ ಕ್ಲಬ್‌ಡ್ ಅರಿಕೆ ಮಲ್ತೆರ್.

ಈ ಪೊರ್ತುಡು ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿದ ಸದಸ್ಯೆರಾಯಿನ ಡಾ. ಆಕಾಶ್ ರಾಜ್ ಜೈನ್, ಶ್ರೀಮತಿ ತಾರ ಉಮೇಶ್ ಆಚಾರ್ಯ, ಜೈ ತುಲುನಾಡ್ (ರಿ.) ಸಂಘಟನೆದ ಗುರ್ಕಾರ್ಲಾಯಿನ ಶ್ರೀ ಸುದರ್ಶನ್ ಸುರತ್ಕಲ್, ಪ್ರಧಾನ ಕಾರ್ಯದರ್ಶಿಯಾಯಿನ ಶ್ರೀ ಸದಾಶಿವ ಮುದ್ರಾಡಿ, ಟೈಮ್ಸ್ ಆಫ್ ಕುಡ್ಲದ ಶ್ರೀಮತಿ ಯಶೋಧ ಕೇಶವ್ ಪಾಲ್ ಪಡೆದಿತ್ತೆರ್ .

ಶ್ರೀ ಆದಿಶಕ್ತಿ ಚಾಮುಂಡೇಶ್ವರಿ ಕ್ಷೇತ್ರಗ್ ಭೇಟಿ ಕೊರಿನ ಶ್ರೀ ಅರುಣಾನಂದ ಸ್ವಾಮಿಜಿ

ಬಂಟ್ವಾಳ, ಜುಲೈ 20: ಶ್ರೀ ಆದಿಶಕ್ತಿ ಚಾಮುಂಡೇಶ್ವರಿ ಕ್ಷೇತ್ರಗ್ರಾಮ್ ಸೇನೆ ಕರ್ನಾಟಕದ ಸಂಸ್ಥಾಪಕ ಗುರ್ಕಾರ್ಲಾಯಿನ ಪ್ರಸಾದ್ ಅತ್ತಾವರ ಬೊಕ್ಕ ಶ್ರೀ ಶ್ರೀ ಶ್ರೀ ಅರುಣಾನಂದ ಸ್ವಾಮಿಜಿಮೊಕುಲು ಅಪ್ಪೆನ ಪುಣ್ಯ ಸನ್ನಿದಾನೊಗು ಭೇಟಿ ಆಯೆರ್.

ದೇವಸ್ಥಾನಡ್ ತೀರ್ಥ ಪ್ರಸಾದ, ಪೂಜಾ ಕಾರ್ಯ ಸುರು ಮಲ್ಪರೆ ವಿಶ್ವ ಹಿಂದೂ ಪರಿಷತ್

ಕುಡ್ಲ,:  ನಮ ತುಳುವೆರೆಗ್ ಪರ್ಬ ಸುರು ಆವೊಂದು ಉಪ್ಪುನ ಬಗ್ಗೆ , ದೇವಸ್ಥಾನಡ್ ತೀರ್ಥ ಪ್ರಸಾದ ಬೊಕ್ಕ ಪೂಜಾ ಸೇವೆನ್ ಆಯಿನಾತ್ ಬೇಗ ಸುರು ಮಲ್ಪರೆ ಕೋವಿಡ್‌ ತಡೆ ನಿರ್ಬಂಧ ಮಾರ್ಗಸೂಚಿ ಸಡಿಲಿಕೆ ಮಲ್ತ್ ಆದೇಶ ಕೊರೊಡು ಪಂದ್ ವಿಶ್ವ ಹಿಂದೂಪರಿಷತ್‌ ಸಂಘಟನೆ ಮುಜರಾಯಿ ಸಚಿವ ಕೋಟ ಶ್ರೀನಿವಾಸ ಪೂಜಾರಿ ಮೆರೆಗ್ ಬಿನ್ನಾಪು ಮಲ್ತೆರ್.

ಕರಿನ ವರ್ಷದ ಪ್ರಕಾರ ನಾಗರಪಂಚಮಿ, ಶ್ರೀಕೃಷ್ಣ ಜನ್ಮಾಷ್ಟಮಿ, ಗಣೇಶ ಚತುರ್ಥಿ ಪರ್ಬದ ಆಚರಣೆ, ಧಾರ್ಮಿಕ ವಿಧಿಕ್ ಚ್ಯುತಿ ಬರಂದಿಲಕ ಮಾರ್ಗದರ್ಶಿ ಸೂತ್ರಲೆನ್ ತಕ್ಷಣ ಬುಡುಗಡೆ ಪಂದ್ ಮನವಿಡ್ ಕೋರಿಕೆ ಮಲ್ತೆರ್..

ದೇವಸ್ಥಾನಡ್ ತೀರ್ಥ ಪ್ರಸಾದ ಬೊಕ್ಕ ಪೂಜಾ ಸೇವೆದ ಸುರು ಮಲ್ಪರೆ ನಾಗರಪಂಚಮಿ, ಶ್ರೀಕೃಷ್ಣ ಜನ್ಮಾಷ್ಟಮಿ, ಮೊಸರು ಕುಡಿಕೆ (ವಿಟ್ಲ ಪಿಂಡಿ), ಗಣೇಶ ಚತುರ್ಥಿ ಪರ್ಬ ದ ಪರವಾದ್ ದೇವಸ್ಥಾನಡ್ ಸಾರ್ವಜನಿಕವಾದ್ ನಡಪಾವುನ ಆಚರಣೆನ್ ಕರಿನ ವರ್ಷದ ಪ್ರಕಾರ ಧಾರ್ಮಿಕ ವಿಧಿಕ್ ಚ್ಯುತಿ ಇಜ್ಜಂದಿಲಕ ಆಚರಣೆ ಮಲ್ಪರೆ ಅಪಗನೆ ಮಾರ್ಗದರ್ಶಿ ಸೂತ್ರನ್ ಬುಡುಗಡೆ ಮಲ್ಪೊಡು ಪಂದ್ ಸಚಿವೆರೆಗ್ ಮನವಿ ಮಲ್ತೆರ್ .