ಕುಡ್ಲದ ಸುದ್ದಿ | Mangalore News

ಅಪ್ಪ ಅಮ್ಮಗ್, ಗುರುಕುಲೆಗ್ ಸುರುಕು ಗೌರವ ಕೊರೊಡು : ನಟಿ ರಚಿತಾ ರಾಮ್

ಕಲ್ಪಾರ್ಥಿಲು ಪುಟ್ಟಾಯಿನ ಅಪ್ಪ ಅಮ್ಮಗ್ ಅಂಚೆನೆ ವಿದ್ಯೆ ಕಲ್ಪಾವುನ ಗುರುಕುಲೆಗ್ ಸುರುಕ್ಕು ಗೌರವ ಕೊರಿಯೆರೆ ಕಲ್ಪೊಡು ಪಂದ್ ಸಿನಿಮಾ ನಟಿ ರಚಿತಾ ರಾಮ್ ಪಂಡೆರ್. ಆರ್ ಕಟೀಲು ಶ್ರೀ ದುರ್ಗಾಪರಮೇಶ್ವರೀ ದೇವಸ್ಥಾನದ ಶಿಕ್ಷಣ ಸಂಸ್ಥೆದ ವತಿರ್ದ್ ನಡತ್ತಿನ ಭ್ರಮರ ಇಂಚರ ನುಡಿಪರ್ಬ ಕಾರ್ಯಕ್ರಮಡ್ ಸಿನಿಮಾ ಬೊಕ್ಕ ರಂಗಭೂಮಿ ಕಾರ್ಯಕ್ರಮಡ್ ಪಾತೆರಿಯೆರ್.

ನಟೆ ರಮೇಶ್ ಭಟ್ ಪಾತೆರ್ದ್ ಮಾತ ಜನಕ್ಲೆಡ ಒರಿ ಒರಿ ಕಲಾವಿದೆ ಇಪ್ಪುವೆ, ಅವು ಬೇತೆ ಬೇತೆ ರೀತಿಡ್ ಆದಿಪ್ಪುಆಸಕ್ತಿದಾಯಕ ಬೇಲೆನ್ ಅಪಗ ಸಾಧನೆ ಮಲ್ಪೆರೆ ಸಾಧ್ಯ ಪಂದ್ ಪಂಡೆರ್. ಈ ಪೊರ್ತುಡು ಉದ್ಯಮಿ ಮೋಹನ್ ಕುಮಾರ್ ಕುಡ್ಲ, ಗಿರೀಶ್ ಶೆಟ್ಟಿ ಕಟೀಲು, ಪ್ರಶಿಲ್ ಶೆಟ್ಟಿ ಕುಡ್ತಿಮಾರುಗುತ್ತು, ವೃಂದಾ ಹೆಗ್ಡೆ, ಕಮಲಾದೇವಿ ಪ್ರಸಾದ್ ಆಸ್ರಣ್ಣ, ಬಿಪಿನ್ ಚಂದ್ರ ಶೆಟ್ಟಿ ಕೊಡೆತ್ತೂರುಗುತ್ತು ಇತ್ತೆರ್.

ಉಪ ಪ್ರಾಂಶುಪಾಲೆರ್ ರಾಜಶೇಖರ್ ಲೇಸ್ ದ ಸುದಾರಿಕೆ ಮಲ್ತೆರ್. ನಾಲ್ ವಿದ್ಯಾರ್ಥಿಲು ರಚಿತಾ ರಾಮ್ ಅರೆನ ಬೇತೆ ಬೇತೆ ರೀತಿದ ಭಾವಚಿತ್ರ ಬುಡ್ಪಾಯೆರ್. ಸ್ವತಃ ರಚಿತಾ ರಾಮ್ ಅಕ್ಲೆನ್ ಚಾವಡಿಗ್ ಲೆತ್ತ್ ದ್ ಬುಡ್ಪಾಯಿನ ಚಿತ್ರದ ಬಗ್ಗೆ ವಿವರಣೆ ಕೇಂಡೆರ್.

ಕಟೀಲ್ ಶಾಲೆಡ್ ಭ್ರಮರ ಇಂಚರ ನುಡಿ ಪರ್ಬ

ಕಟೀಲ್ : ಹಿಮಾಲಯದ ಗುಡ್ದೆರ್ದ್ ಪುಟ್ಟಿನ ನೀರ ಒಸರ್ ಕೃಷಿ ಕಂಡಡ್ ಪಸೆರ್ದ್ ಫಲ ಕೊರ್ಪುನಂಚ, ಬಾಷೆದ ಉಪಯೋಗ ಎಡ್ಡೆ ರೀತಿಡ್ ಆವೊಡು ಪಂದ್ ಗಣಕ ತಜ್ಞೆರ್ ಕೆ ಪಿ ರಾವ್ ಪಂಡೆರ್. ಆರ್ ಕಟೀಲು ಶ್ರೀ ದುರ್ಗಾಪರಮೇಶ್ವರೀ ಸಮೂಹ ಶಿಕ್ಷಣ ಸಂಸ್ಥೆದ ಆಶ್ರಯಡ್ ನಡಪುನ ಮೂಜಿ ದಿನತ್ತ “ಭ್ರಮರ ಇಂಚರ ನುಡಿ ಪರ್ಬ” ಕಾರ್ಯಕ್ರಮದ ಗುರ್ಕಾರ್ಮೆನ್ ವಹಿಸ್ ದ್ ಪಾತೆರಿಯೆರ್.

ಕಟೀಲು ಪದವಿ ಕಾಲೇಜ್ ರ್ದ್ ಸಮ್ಮೇಳನ ನಡಪುನ ಮುಟ್ಟ ಮೆರವಣಿಗೆ ನಡತ್ಂಡ್, ಮೆರವಣಿಗೆಡ್ ಭಗವದ್ಗೀತೆನ್ ಪಲ್ಲಕ್ಕಿಡ್ ಪತೊಂದು ಬತ್ತ್ ದ್ ವಿಶೇಷ ಗೌರವ ಸಲ್ಲಿಸಾಯೆರ್. ಬೇತೆ ಬೇತೆ ವೇಷಭೂಷಣಲು, ವಿದ್ಯಾರ್ಥಿಲು ಮೆರವಣಿಗೆಗ್ ಸಾಥ್ ಕೊರಿಯೆರ್.

ಹಳೆವಿದ್ಯಾರ್ಥಿ ಶೇಖರ ಪೂಜಾರಿ ಮೆರವಣಿಗೆ ಉದಿಪನ ಮಲ್ತೆರ್. ಜಾನಪದ ವಸ್ತು ಸಂಗ್ರಹಾಲಯನ್ ಆನಂದ ಸಿ ಕುಂದರ್ ಉದಿಪನ ಮಲ್ತೆರ್, ಕಾರ್ಯಕ್ರಮಡ್ ಸಾಹಿತಿ ಪಾದೆಕಲ್ಲು ವಿಷ್ಣು ಭಟ್, ಪವನಜ. ದೇವಳದ ಆಡಳಿತ ಮಂಡಳಿದ ಗುರ್ಕಾರ್ಲು ಸನತ್ ಕುಮಾರ್ ಶೆಟ್ಟಿ, ದೇವಳದ ಪ್ರಧಾನ ಅರ್ಚಕೆರ್ ಲಕ್ಷೀನಾರಾಯಣ ಅಸ್ರಣ್ಣ, ಅನಂತಪದ್ಮನಾಭ ಅಸ್ರಣ್ಣ, ಹಳೆವಿದ್ಯಾರ್ಥಿ ಸಂಘದ ಗುರ್ಕಾರ್ಲು ಲೋಕಯ್ಯ ಸಾಲಿಯಾನ್, ಕಿರಣ್ ಕುಮಾರ್ ಶೆಟ್ಟಿ, ಗ್ರೆಗರಿನ್ ತಾವ್ರೋ, ಉಪಾಧ್ಯಕ್ಷೆರ್ ಭಾರತಿ, ಸುರೇಶ್, ಬಾಲಕೃಷ್ಣ ಇತ್ತೆರ್.

ಪದವಿ ಕಾಲೇಜ್ ದ ಪ್ರಾಂಶುಪಾಲೆರ್ ಕೃಪ್ಣ ಕಾಂಚನ್, ಪದವಿ ಪೂರ್ವ ಕಾಲೇಜ್ ದ ಪ್ರಾಂಶುಪಾಲೆರ್ ಕುಸುಮಾವತಿ, ಪ್ರಾಥಮಿಕ ಶಾಲೆದ ಮುಖ್ಯೋಪಾಧ್ಯಾಯಿನಿ ಸರೋಜಿನಿ, ಆಂಗ್ಲ ಮಾಧ್ಯಮ ಶಾಲೆದ ಮುಖ್ಯೋಪಾಧ್ಯಾಯೆರ್ ಚಂದ್ರಶೇಖರ ಭಟ್, ಪ್ರಧಾನ ಅರ್ಚಕೆರ್ ಹರಿನಾರಾಯಣ ದಾಸ ಅಸ್ರಣ್ಣ ಬಿನ್ನೆರೆನ್ ಎದ್ಕೊಂದು, ಡಾ.ಕೃಷ್ಣ ಸೊಲ್ಮೆ ಸಂದಾಯ ಮಲ್ತೆರ್. ಉಪಪ್ರಾಶುಂಪಾಲೆರ್ ರಾಜಶೇಖರ್ ಲೇಸ್ ದ ಸುದಾರಿಕೆ ಮಲ್ತೆರ್.

ತಲಪಾಡಿ: ಟೋಲ್‌ಗೇಟ್ ಸಿಬ್ಬಂದಿರ್ದ್ ಗೂಂಡಾಗಿರಿ ಆರೋಪ

ಕುಡ್ಲ: ರಾಷ್ಟ್ರೀಯ ಹೆದ್ದಾರಿ ಕೇರಳಗ್ ಸಂಪರ್ಕ ಕೊರ್ಪುನ ತಲಪಾಡಿ ಟೋಲ್‌ಗೇಟ್ ಡ್ ಸಿಬ್ಬಂದಿ ಕಾರ್‌ನ್‌ ಅಡ್ಡಕಟ್ಟ್‌ದ್ ಬೋರ್ಚಾಂದಿನ ಶಬ್ದರ್ದ್‌ ನೆರ್ದ್ ಗೂಂಡಾಗಿರಿ ಮಲ್ತಿನ ಆರೋಪಗ್ ಸಂಬಂಧಿಸಾದ್ ಕಾರು ಡ್ರೈವರ್ ಪೊಲೀಸೆರೆಗ್ ದೂರು ಕೊರ್ತೆರ್.‌

ಟೋಲ್‌ ಗೇಟ್‌ಡ್ ಅಬ್ದುಲ್ ಕರೀಂ ಪನ್ಪುನಾರ್ ಕಾರ್‌ದ ಫಾಸ್ಟಾಗ್‌ರ್ದ್ ಕಾಸ್‌ ಕಟ್ಟ್‌ ಆತ್‌ಂಡ್.‌ ಆಂಡಲ ಸಿಬ್ಬಂದಿ ಗೇಟ್ ದೆಪ್ಪಂದಿನ ಕಾರಣ ಕರೀಂ ಪ್ರಶ್ನೆ ಮಲ್ತ್‌ದೆರ್.‌ ಈ ಬಗ್ಗೆ ಕರೀಂ ಟೋಲ್‌ಗೇಟ್ ಮ್ಯಾನೇಜರ್ ಬೊಕ್ಕ ಸಿಬ್ಬಂದಿನ ವಿರುದ್ಧ ಪೊಲೀಸ್ ಠಾಣೆಡ್ ದೂರು ಕೊರ್ದು ಕೇಸ್‌ ದಾಖಲಾತ್‌ಂಡ್.

ಬಂಟ್ವಾಳರ್ದ್ ತಪ್ಪಾದ್ ಪೋದಿತ್ತಿನ ಜವನೆ, ಜವಾಂದಿ ಕೇರಳಡ್ ಪತ್ತೆ

ನೆರೆಕರೆತ ಒರಿ ಆನ್ ಬೊಕ್ಕ ಪೊಣ್ಣು ಸಜಿಪಮುನ್ನೂರು ಗ್ರಾಮದಕುಲು ತಪ್ಪಾದ್ ಪೋತೆರ್ ಪನ್ದ್ ಅಕಲೆನ ಇಲ್ಲದಕುಲು ಬೇತೆ ಬೇತೆ ಕಂಪ್ಲೇಂಟ್ ಕೊರ್ದಿತ್ತೆರ್. ಮೊಕಲೆನ್ ಇತ್ತೆ ಕೇರಳಡ್ ನಾಡ್ ಪತ್ತ್ ದೆರ್.

18 ವರ್ಸದ ಆಯಿಷತ್ ರಶ್ಮಾ ಬೊಕ್ಕ 23 ವರ್ಸದ ಮೊಹಮ್ಮದ್ ಸಿನಾನ್ ನವೆಂಬರ್ 23ರ್ದ್ ತಪ್ಪಾದ್ ಪೋತೆರ್ ಪನ್ದ್ ಅಕಲೆನ ಇಲ್ಲದಕುಲು ಪೋಲೀಸ್ ಸ್ಟೇಷನ್‌ಡ್ ಒಯಿಲ್ ಕೊರ್ದಿತ್ತೆರ್. ಮೊಕಲೆನ್ ಪೋಲೀಸೆರ್ ಕೇರಳದ ಕಾಞಂಗಾಡ್‌ಡ್ ನಾಡ್ ಪತ್ತಿಯೆರ್. ಮೊಕಲೆನ್ ಅಲ್ತ್ ಬಂಟ್ವಾಳ ಸ್ಟೇಷನ್‌ಗ್ ಕನತೆರ್, ಮೊಕಲೆಗ್ ಮದಿಮೆ ಆಪಿನ ಮನಸ್ ಇತ್ತಿನವು ತೆರಿದ್ ಬೈದ್ಂಡ್.

ಮೂಜಿ ತಿಂಗೊಲುರ್ದು ಉಂತುದಿನವುಲೇ ಉಂತುದ ಕುಡ್ಲ ಪಾಲಿಕೆದ 100 ಗಾಡಿಲು

ಕುಡ್ಲ: ಕುಡ್ಲ ಮಹಾನಗರ ಪಾಲಿಕೆದ 60 ವಾರ್ಡ್‌‌ಲೆಡ್ ಕಜವು ಇಲಬರಿ ಮಲ್ತೊಂದಿತ್ತಿನ ಆ್ಯಂಟನಿ ಸಂಸ್ಥೆದ ಪಗತೆಗ್ ಇತ್ತೆ ಮಹಾನಗರ ಪಾಲಿಕೆ ಸ್ವತಃ ಕಜವು ಇಲಬರಿ ಮನ್ಪುನ ಯೋಜನೆ ಪಾಡೊಂದುಂಡು. ಆಂಡ ಕಜವು ಇಲಬರಿ ಗಾಡಿಲೆಗ್ ಚಾಲನೆ ಕೊರ್ದು ಮೂಜಿ ತಿಂಗೊಲಾಂಡಲಾ ಗಾಡಿಲು ಮಾತ್ರ ಉಂತಿನವುಲೇ ಉಲ್ಲ. ಕೇಂದ್ರ ಸರಕಾರೊದ ಸ್ವಚ್ಛ ಭಾರತ್ ಮಿಷನ್‌ದ ಅಡಿಟ್ ಕುಡ್ಲ ಪಾಲಿಕೆ ಗಾಡಿಲೆನ್ ಗೆತೊಂದಿತ್ತ್‌ದ್, 107 ಎಲ್ಯ ವೆಹಿಕಲ್, 30 ಟಿಪ್ಪರ್, 16 ಕಾಂಪ್ಯಾಕ್ಟರ್ ಒಟ್ಟು 153 ಗಾಡಿಲು ಉಲ್ಲ. ಉದಿಪನ ಆಯಿ ಬೊಕ್ಕ ಪಂಡ ಕರಿನ ಮೂಜಿ ತಿಂಗೊಲುರ್ದು ಪೇಂಟೆದ ಮಣ್ಣಗುಡ್ಡೆ ಬೊಕ್ಕ ಬೈಕಂಪಾಡಿಡ್ ಗಾಡಿಲೆನ್ ಉಂತಾದೆರ್.

ಕೆಲ ಗಾಡಿಲೆಗ್ ಇತ್ತೆನೇ ಎಲ್ಯ ಮಟ್ಟ್‌ಡ್ ಮಣ್ಣ್ ಪತ್ತ್‌ದ್ಂಡ್. ಗಾಡಿಲೆನ್ ಪಾಲಿಕೆನೇ ಕಾಸ್ ಪಾಡ್ದ್ ಗೆತೊಂದಿತ್ತ್‌ದ್, ಆಂಡ ನೆತ್ತ ಡ್ರೈವರ್, ಲೋಡರ್ ಬೇಲೆ, ವರ್ಕ್‌ಶಾಪ್ ಬೊಕ್ಕ 3 ವರ್ಷೊದ ಮೈಂಟೆನೆನ್ಸ್‌ಗ್ ಟೆಂಡರ್ ಲೆಪ್ಪುಂಡು. ಇತ್ತೆ ಆ್ಯಂಟನಿ ಸಂಸ್ಥೆಡ್ ಬೇಲೆ ಮಲ್ತೊಂದಿತ್ತಿನ ಪೌರಕಾರ್ಮಿಕೆರೆನ್ ನೇಮಕ ಮಲ್ತೊನೊಡು ಒಟ್ಟುಗು ಎಚ್ಚಿನ ಬೇಲೆಲೆಗ್ ಬೋಡಾಪಿನ ಕಾರ್ಮಿಕೆರೆನ್ ನೇಮಕ ಮಲ್ತೊನೊಡಾತೆ. ಈ ಪ್ರಕ್ರಿಯೆಲು ಕಡೆಸ್ಸಿನೆರ್ದಾವರ ನನಲಾ ಆ್ಯಂಟನಿ ಸಂಸ್ಥೆನೇ ಕೋವು ವಿಲೇವಾರಿ ಮಲ್ತೊಂದುಂಡು. ಇಂಚೆನೇ ದುಂಬರಿಂಡ ಮೈದಾನೊಡು ಉಂತುದುಪ್ಪುನ ಕೋಟಿಗಟ್ಲೆ ರೂಪಾಯಿ ಕಾಸ್‌ ಕೊರ್ದು ಗೆತೊಂದಿನ ಕಜವು ಇಲಬರಿ ಗಾಡಿಲು ದೊಂಬು, ಬರ್ಸೊರ್ದಾವರ ಗಲಸೆರಾವಂದಿಲೆಕ ಆಪಿನೆಕ್ ದುಂಬು ಅವೆನ್ ಬೇಲೆಗ್ ಜಪ್ಪಾವೊಡು. ಇಜಿಂಡ ಗಾಡಿಲೆನ ಟಯರ್, ಬ್ಯಾಟರಿ, ಇಂಜಿನ್ ಇಂಚ ಒಂಜೊಂಜೇ ತೆಟ್ಟ್‌ದ್ ಕುಡೊರ ಸರ್ವೀಸ್ ಮನ್ಪಾವುನೆತೊಟ್ಟುಗು ಪಾಲಿಕೆದ ಕುಡ ಒಂತೆ ಕಾಸ್‌ನ್ ಬೊಲ್ಲಗ್ ಬುಡ್ಲೆಕ ಆಪಿನ ಪರಿಸ್ಥಿತಿ ಉಂಡಾವು. ಆಯಿನಾತ್ ಬೇಗ ಉಂತುದಿನ ಗಾಡಿಲೆನ್ ಬೇಲೆಗ್ ಜಪ್ಪಾದ್ ಪಾಲಿಕೆದ ಕಾಸ್ ವ್ಯರ್ಥ ಆವಂದಿಲೆಕ ಕ್ರಮ ಗೆತೊನೊಡು.

ಸುರಂಗದ ಉಲಯಿತ್ತಿನ 41 ಕಾರ್ಮಿಕೆರ್ನ ರಕ್ಷಣಾ ಕಾರ್ಯ , ತಾತ್ಕಾಲಿಕ ಆಸ್ಪತ್ರೆ, ಹೆಲಿಕಾಪ್ಟರ್ ಸೇವೆ

ಡೆಹ್ರಾಡೂನ್‌: ಉತ್ತರಾಖಂಡದ ಉತ್ತರಕಾಶಿ ಸುರಂಗಡ್ 17 ದಿನರ್ದ್ ತಿಕೊಂದಿನ 41 ಕಾರ್ಮಿಕೆರೆನ ರಕ್ಷಣಾ ಕಾರ್ಯ ಅಂತಿಮ ಘಟ್ಟಗ್ ಬೈದ್, ಎನ್‌ಡಿಆರ್‌ಎಫ್‌ ತಂಡ ತಿಕ್ಕೊನ್ನ ಕಾರ್ಮಿಕೆರೆನ್ ಮುಟ್ಟುದು ಅಕ್ಲೆನ್ ಲೆತೊಂದು ಪೋಯೆರೆ ಚಿನುಕೂ ಹೆಲಿಕಾಫ್ಟರ್ ಏರ್ ಲಿಫ್ಟ್ ಗ್ ರೆಡಿ ಆದ್ ಕಾರ್ಮಿಕೆರೆನ್ ಪಿದೈ ದೆಪ್ಪೆರೆ ಸುರುಕು ವೈದ್ಯಕೀಯ ತಪಾಸಣೆಗಾದ್ ಸುರಂಗದ ಉಲಾಯಿ ತಾತ್ಕಾಲಿಕ ಆಸ್ಪತ್ರೆ ನಿರ್ಮಾಣ ಮಲ್ತ್ ದೆರ್.

ರಕ್ಷಣಾ ಕಾರ್ಯದ ಪೊರ್ತುಡು ಮಿಷನ್ ಮಾತ ಕೈ ಕೊರ್ನೆದಾತ್ರ ಕಾರ್ಯಾಚರಣೆಡ್ ವಿಳಂಬ ಆತ್ಂಡ್, ಲಾಸ್ಟ್ ಗ್ ರ‍್ಯಾಟ್‌ ಹೋಲ್‌ ಮೈನಿಂಗ್‌ ಮುಖೆನ 41 ಜನಕ್ಲೆನ್ ರಕ್ಷಣೆ ಮಲ್ಪುನ ಕಾರ್ಯ ಮುಂದುವರಿತ್ಂಡ್

ನನ 41 ಕಾರ್ಮಿಕೆರ್ ಸುಮಾರ್ 17 ದಿನರ್ದ್ ಸುರಂಗಡ್ ಇತ್ತ್ ದ್ , ಆನಿರ್ದ್ ಇನಿ ಮುಟ್ಟ ದಿನಾಲ ರಕ್ಷಣಾ ಕಾರ್ಯ ನಡತೊಂದೆ ಉಂಡು.

ಕುಡ್ಲ: ಸಾಂಕುನ ನಾಯಿಲೆಗ್ ಪಾಲಿಕೆರ್ದ್ ಲೈಸೆನ್ಸ್ ಗೆತೊನೆರೆ ಸಾರ್ವಜನಿಕೆರೆಗ್ ಸೂಚನೆ

ಕುಡ್ಲ: ಕುಡ್ಲ ಮಹಾನಗರ ಪಾಲಿಕೆ ಸೀಮೆದ 60 ವಾರ್ಡ್‌ಲೆಡ್ ನಾಯಿಲೆನ ಉಪದ್ರ ಎಚ್ಚ ಆದಿತ್ತ್‌ದ್ ಈ ನಾಯಿಲು ತುಚ್ಚುನ ಸಂಖ್ಯೆಲಾ ಎಚ್ಚನೇ ಆವೊದುಂಡು.

ಅಂಚಾದ್ ಪೇಂಟೆದ ಸಾರ್ವಜನಿಕೆರೆನ ಆರೋಗ್ಯಗ್ ಬಾರೀ ಪೆಟ್ಟ್ ಬೂರೊಂದುಂಡು. ಅಂಚೆನೇ ಪೇಂಟೆಡ್ ರೇಬಿಸ್ ಸೀಕ್ ಪಗರುನ ಸಂಭವ ಎಚ್ಚ ಆಯಿನೆದಾತ್ರ ಈ ಮಾತ ಪ್ರಕರಣೊಲೆನ್ ಲೆಕ್ಕಡ್ ದೀವೊನರೆ ಬೋಡಾದ್ ಪಾಲಿಕೆ ನಗರೊಡು ಸಾಂಕುನ ನಾಯಿಲೆಗ್ ಲೈಸೆನ್ಸ್ ಗೆತೊನೊಡು ಪಂದ್‌ ಸೂಚನೆ ಕೊರ್ತೆರ್.

ದಾಖಲೆಲು: ಸಾರ್ವಜನಿಕೆರ್ ತನ್ಕುಲು ತಾಂಕುನ ನಾಯಿಲೆಗ್ ಪಾಲಿಕೆರ್ದ್ ಲೈಸೆನ್ಸ್ ಗೆತೊನೆರ ಅರ್ಜಿದ ಪ್ರತಿ ದೆತೊನೊಡು. ವ್ಯಾಕ್ಸಿನ್ ದಾಖಲೆ, ಮಾಲೀಕೆರೆನ ಆಧಾರ್ ಕಾರ್ಡ್, ಬರಿತಿಲ್ಲದಕ್ಲೆನ NOC, ನಾಯಿದ 2 ಫೋಟೋ ಇಂಚಿನ ದಾಖಲೆಲೆನ್ ಸಂದಾದ್ ಲೈಸೆನ್ಸ್ ಗೆತೊನೊಡು.

ಅಂಚೆನೇ ಸಾಂಕುನ ಪ್ರಾಣಿಲೆನ್ ಬೊಕ್ಕ ಕಿನ್ನಿಲೆನ್ ಸಾದಿ ಬರಿಟ್ ಬುಡ್ಪುನವು ಅಂಚೆನೇ ಸಾರ್ವಜನಿಕೆರೆಗ್ ತೊಂದರೆ ಉಂಡು ಮನ್ಪುನ ತೋಜಿದ್ ಬತ್ತ್ಂಡ ಆ ಪ್ರಾಣಿಲೆನ ಮಾಲೀಕೆರೆನ ಮಿತ್ತ್ ಪಾಲಿಕೆ ನಿರ್ದಾಕ್ಷಿಣ್ಯವಾದ್ ಕ್ರಮ ಗೆತೊನುಂಡು ಪಂದ್ ಕುಡ್ಲ ಮಹಾನಗರಪಾಲಿಕೆದ ಆಯುಕ್ತೆರ್ ಪ್ರಕಟಣೆಡ್ ತೆರಿಪಾದೆರ್.

ಕೆತ್ತಿಕಲ್ಲ್‌ಡ್ ತಿಕ್ಂಡ್ ಪುರಾಪುದ ಮಲ್ಲ ದಾಖಲೆ !

ಕುಡ್ಲ : ವಾಮಂಜೂರು ಕೈತಲ್‌ದ ಕೆತ್ತಿಕಲ್ಲ್ ಪನ್ಪಿನ ಜಾಗೆಡ್ ಆ ಊರುಗು ಪುದರ್ ಬರಿಯರೆ ನೆವನ ಆದಿತ್ತಿನ ಕಲ್ಲೊಂಜಿ ತಿಕ್ಕ್‌ದ್ಂಡ್ ಪಂದ್ ತೆರಿದ್ ಬೈದ್ಂಡ್. ಕರಿನ ಸುಮಾರ್ ವರ್ಸೊಡು ಈ ಕಲ್ಲ್ ಪುದೆಲ್‌ಡ್ ಬೂರ್ದಿತ್ತ್ಂಡ್. ಸೋಮಾರ ರಾಷ್ಟ್ರೀಯ ಹೆದ್ದಾರಿ ಪ್ರಾಧಿಕಾರದಕುಲು ರೋಡು ಅಗೆಲ ಮಲ್ಪರೆ ಬಲ್ಲೆ ಪೂರಾ ದೆಪ್ಪುನಗ ಈ ಕಲ್ಲ್ ತೋಜಿದ್ ಬತ್ತ್ಂಡ್.

ಉಂದೆನ್ ತೂಯಿನ ಅಲ್ಪದಕುಲು ಅಡೆಗ್ ಬತ್ತ್ ಆ ಕಲ್ಲ್‌ನ್ ಇತ್ತೆನೇ ದೆಪ್ಪರೆ ಬಲ್ಲಿ ಪನ್ದ್ ಪನ್ಡೆರ್. ಕೆತ್ತಿಕಲ್ಲ್‌ದ ಪರತಿರಿಯೇ ಈ ಕಲ್ಲ್‌ಡ್ ತಿಕ್ಕುನ ಸಾಧ್ಯತೆ ಉಪ್ಪುನೆರ್ದಾವರ ಈ ಕಲ್ಲ್‌ನ್ ಮರ್ಯಾದೆ ಕೊರ್ದು ಪಿಜಿರ್ಪೊಡು ಪನ್ದ್ ಊರುದಕುಲು ತಾಕೀತ್ ಮಲ್ತೆರ್. ಅವೆಕ್ ಒತ್ತೊನಿನ ಅಧಿಕಾರಿಲು ಕಲ್ಲ್ ಗ್ ಒವ್ವೇ ಪೆಟ್ಟಾವಂದಿಲೆಕ್ಕ ಪಿಜಿರ್ಪುವ ಪನ್ದ್ ಪಾತೆರ ಕೊರ್ತೆರ್. ಕೆತ್ತಿಕಲ್ಲ್ ಪನ್ದ್ ಊರುಗು ಪುದರ್ ಬರ್ರೆ ಈ ಕೆತ್ತ್‌ದಿನ ಕಲ್ಲೇ ನೆವನ ಆದಿಪ್ಪು ಪನ್ದ್ ಸ್ಥಳೀಯೆರ್ ಪನ್ಪೆರ್. ಉಂದೆಕ್ ಸಾರ ವರ್ಸ ಇತಿಹಾಸ ಉಪ್ಪುನಲಾ ಸಾಧ್ಯತೆ ಉಂಡು.

ಉಂದು ತೂನಗ ಮಸ್ತ್ ಪಿರಾಕ್ದ ಪನ್ಡ 2400 ವರ್ಸ ಪಿರವುದ ಸ್ಮಾರಕ ಲೆಕ್ಕ ತೋಜುಂಡು ಪನ್ದ್ ಪುರಾತತ್ವ ತಜ್ಞೆರಾಯಿನ ಪ್ರೊ।ಮುರುಗೇಶಿ ಪನ್ಡೆರ್. ಉಂದೆತ ಬಗೆಟ್ ನನಲಾತ್ ಅಧ್ಯಯನ ಆವೊಡು. ಉಂದೆನ್ ಆ ಊರುದಕುಲು ಒರಿತೊನೊಡು, ಆ ಊರುದ ಒಂಜಿ ಮಲ್ಲ ಇತಿಹಾಸದ ಭಾಗೊ ಆದ್ ಉಂದು ಉಂಡು ಪಂದ್ ತೆರಿಪಾದೆರ್.

ಡಿ. 4ರ್ದ್ 22 ಮುಟ್ಟ ಸಂಸತ್‌ದ ಚಲಿಗಾಲೊದ ಅಧಿವೇಶನ

ಸಂಸತ್ತ್‌ದ ಚಲಿಗಾಲೊದ ಅಧಿವೇಶನೊಗು ದಿನ ಅಟ್ಟನೆ ಆತ್ಂಡ್. ಆ ಪ್ರಕಾರ ಡಿಸೆಂಬರ್ 4ರ್ದ್ 22 ಮುಟ್ಟ ಅಧಿವೇಶನ ನಡಪುಂಡು ಪನ್ದ್ ತೆರಿದ್ ಬೈದ್ಂಡ್. ಡಿಸೆಂಬರ್ 3ದಾನಿ 5 ರಾಜ್ಯೊಲೆನ ಓಟುದ ರಿಸಲ್ಟ್ ಪಿದಯಿ ಬೂರಿನ ಮನದಾನಿಯೇ ಅಧಿವೇಶನ ಸುರು ಆಪುಂಡು.

ಈ ಬಗೆಟ್ ಸಂಸದೀಯ ವ್ಯವಹಾರದ ಸಚಿವೆ ಆಯಿನ ಪ್ರಹ್ಲಾದ್ ಜೋಶಿ ಮೇರ್ ಡಿಸೆಂಬರ್ 2ಕ್ಕ್ ಕಾಂಡೆ 11 ಗಂಟೆಗ್ ಸರ್ವಪಕ್ಷದ ಸಭೆ ಲೆತ್ತ್‌ದೆರ್. ಈ ಸಲ ಅಧಿವೇಶನೊಟು ಕೆಲವು ಮಲ್ಲ ಮಟ್ಟ್ ದ ವಿಧೇಯಕ ಮಂಡನೆ ಆಪಿನ ಸಾಧ್ಯತೆ ಉಂಡು.

ಕೊಟ್ಟಾರ ಚೌಕಿ ಸರ್ಕಲ್‌ಗ್ ಕ್ಯಾ।ಪ್ರಾಂಜಲ್ ಪುದರ್

ಕಾಶ್ಮೀರದ ರಜೌರಿಡ್ ಉಗ್ರೆರೆನೊಟ್ಟುಗು ಪುನೆದ್ ದೇಶೊಗಾದ್ ಪ್ರಾಣತ್ಯಾಗ ಮಲ್ದಿನ ಪೆರ್ಮೆದ ವೀರಯೋಧೆ ಕ್ಯಾಪ್ಟನ್ ಪ್ರಾಂಜಲ್ ಮೆರೆನ ಪುದರ್‌ನ್ ಪೆರ್ಸಾದಿ ಬೊಕ್ಕ ನಗರ ಸಂಪರ್ಕ ಮಲ್ಪುನ ಕೊಟ್ಟಾರ ಚೌಕಿ ಜಂಕ್ಷನ್ ಸರ್ಕಲ್‌ಗ್ ದೀಪ ಪನ್ದ್ ಶಾಸಕೆರ್ ಭರತ್ ಶೆಟ್ಟಿ ಪಂಡೆರ್.

ಕೊಟ್ಟಾರಚೌಕಿಡ್ ಅಮರ್ ಜವಾನ್ ಪಾರ್ಕ್ ಆಪುಂಡು ಅವೆತೊಟ್ಚುಗು ಸರ್ಕಲ್‌ಗ್ ಕುಡ್ಲಡೇ ಪುಟ್ಟು ಬಲದಿನ ಕ್ಯಾ।ಪ್ರಾಂಜಲೆರೆನ ಪುದರ್ ದೀಪಿನವು ಸಮವಾದುಂಡು. ಈ ಬಗೆಟ್ ಕುಡ್ಲ ನಗರ ಪಾಲಿಕೆಡ್ ಕ್ರಮ ದೆತೊನರೆ ಓಲೆ ಬರೆದ್ ಸೂಚನೆ ಕೊರ್ಪುಂಡು ಪಂದ್‌ ಪಂತೆರ್.