Mon. Nov 23rd, 2026

ಕುಡ್ಲದ ಸುದ್ದಿ | Mangalore News

ಸೌದಿಡ್ ಕಾರ್ ಆಕ್ಸಿಡೆಂಟ್: ಹಳೆಯಂಗಡಿ ತೋಕೂರುದ ಒಂಜೇ ಕುಟುಮದ ನಾಲ್ ಜನ ತೀರ್ ಪೋಯೆರ್

ಹಳೆಯಂಗಡಿ: ಸೌದಿ ಅರೇಬಿಯಾದ ತಾಯಿಫ್ ಕೈತಲ್ ಕಾರ್ ಆಕ್ಸಿಡೆಂಟ್ ಆದ್ ಹಳೆಯಂಗಡಿ ತೋಕೂರು ಶಾಲೆದ ಕೈತಲ್‌ದ ನಾಲ್ ಜನ ತೀರ್ ಪೋಯಿನ ಘಟನೆ ನಡತ್ಂಡ್.

ತೀರ್ ಪೋಯಿನಕ್ಲೆನ್ ತೋಕೂರು ನಿವಾಸಿ ಶಮೀಮ್ ಬೊಕ್ಕ ಝರೀನಾ ದಂಪತಿಲೆನ ಮಗಲ್ ಹಿಬಾ (29) ಅರೆನ ಕಂಡನಿ ಮುಹಮ್ಮದ್ ರಮೀಝ್ (34) ಜೋಕುಲ್ ಆಯಿನ ಆರೂಶ್ (3) ಬೊಕ್ಕ ರಾಹ (3 ತಿಂಗೊಲ್) ಪಂದ್ ಗುರ್ತಿಸಾದೆರ್.

ಕತಾರ್‌ರ್ದ್ ಸೌದಿ ಅರೇಬಿಯಾಗ್ ಉಮ್ರಾ ಮಲ್ಪರೆ ಪಂದ್ ಕಾರ್‌ಡ್ ಪೋವೊಂದಿತ್ತೆರ್. ಕಾರ್‌ಡ್ ನನೊಂಜಿ ಬಾಲೆಗ್ ಮಸ್ತ್ ಪೆಟ್ಟಾದಿತ್ತ್‌ದ್, ಆಸ್ಪತ್ರೆಗ್ ದಾಖಲ್ ಮಲ್ತ್‌ದೆರ್.

ದಕ್ಷಿಣ ಕನ್ನಡ ಜಿಲ್ಲೆದ 19 ಜನತ್ತ ಮಿತ್ತ್ ಗಡಿಪಾರ್ ಆದೇಶ

ಕುಡ್ಲ: ಲೋಕಸಭಾ ಚುನಾವಣೆಡ್ ಮುನ್ನೆಚ್ಚರಿಕೆದ ಕ್ರಮವಾದ್, ಕಾನೂನು ಸುವ್ಯವಸ್ಥೆ ಕಾಪುನ ನಿಲೆಟ್ಟ್ ಕುಡ್ಲ ನಗರ ಪೊಲೀಸ್ ಕಮಿಷನರೇಟ್ ವ್ಯಾಪ್ತಿಡ್ ಕ್ರಿಮಿನಲ್ ಚಟುವಟಿಕೆಡ್ ಪಾಲ್ ಪಡೆಯಿನ 19ಜನ ರೌಡಿಶೀಟರ್‌ನಕ್ಲೆನ್ ಪೊಲೀಸ್ ಕಮಿಷನರ್ ಅನುಪಮ್ ಅಗರ್ ವಾಲ್ ಗಡಿಪಾರ್ ಮಲ್ಪುನ ಆದೇಶ ಪಾಡ್ದೆರ್.

ಬೆದ್ರದ ಅತ್ತೂರುದ ನಸೀಬ್, ಕಾಟಿಪಳ್ಳದ ಶ್ರೀನಿವಾಸ್ ಎಚ್., ಬಜ್ಪೆ ಶಾಂತಿಗುಡ್ಡೆದ ಸಫ್ವಾನ್, ಬೋಂದೆಲ್‌ದ ಜಯೇಶ್ ಯಾನೆ ಸಾಚು,ನೀರುಮಾರ್ಗ ಭಟ್ರಕೋಡಿದ ವರುಣ್ ಪೂಜಾರಿ, ಅಶೋಕ ನಗರದ ಅಝೀಝ್, ಕಾವೂರ್‌ದ ಇಶಾಮ್, ಸುರತ್ಕಲ್ ಇಡ್ಯಾದ ಕಾರ್ತಿಕ್ ಶೆಟ್ಟಿ, ಕೈಕಂಬ-ಗಣೇಶ್‌ಪುರದ ದೀಕ್ಷಿತ್ ಪೂಜಾರಿ, ಕೃಷ್ಣಾಪುರದ ಲಕ್ಷ್ಮೀಶ ಉಳ್ಳಾಲ, ಬೊಂಡಂತಿಲದ ಕಿಶೋರ್ ಸನಿಲ್, ಉಳ್ಳಾಲ ಕೋಡಿದ ಹಸೈನಾರ್ ಅಲಿ, ಕುದ್ರೋಳಿ ಕರ್ಬಲಾ ರಸ್ತೆದ ಅಬ್ದುಲ್ ಜಲೀಲ್, ಬೋಳೂರ್‌ದ ರೋಶನ್ ಕಿಣಿ, ಕಸಬಾ ಬೆಂಗರೆದ ಅಹ್ಮದ್ ಸಿನಾನ್, ಜಪ್ಪಿನಮೊಗರ್‌ದ ದಿತೇಶ್ ಕುಮಾರ್, ಬಜಾಲ್ ಕುತ್ತಡ್ಕದ ಗುರುಪ್ರಸಾದ್, ಭರತ್ ಪೂಜಾರಿ, ಜಪ್ಪು ಕುಡ್ಪಾಡಿದ ಸಂದೀಪ್ ಶೆಟ್ಟಿ ವಿರುದ್ದ ಗಡಿಪಾರು ಆದೇಶ ಪಾಡ್ದೆರ್.

ರೌಡಿಶೀಟರ್‌ನಕ್ಲೆನ ವಿರುದ್ಧ ಮಸ್ತ್ ಠಾಣೆಲೆಡ್ ಕೇಸ್‌ಲು ದಾಖಲ್ ಆದಿತ್ತ್‌ದ್, ಶಾಂತ ರೀತಿಡ್ ಚುನಾವಣೆ ಮಲ್ಪುನ ಸಲುವಾದ್ ಈ ಕ್ರಮ ದೆತೊಂದೆರ್. ಕರಿನ ರಡ್ಡ್ ದಿನರ್ದ್ 19 ರೌಡಿ ಶೀಟರ್‌ನಕ್ಲೆನ ವಿರುದ್ಧ ಗಡಿಪಾರು ಆದೇಶ ಮಲ್ತ್‌ದ ಪಂದ್ ಕಮಿಷನರ್ ತೆರಿಪಾದೆರ್.

ಜೈ ತುಳುನಾಡ್ (ರಿ.) ಬೆಂಗ್ಲೂರ್ ಎಗ್ಗೆದ 2024-25ನೇ ಸಾಲ್‌ದ ಪೆರಿಯಾಯಿನೊ (ಮಹಾಸಭೆ)

ಜೈ ತುಳುನಾಡ್ (ರಿ.) ಬೆಂಗ್ಲೂರ್ ಎಗ್ಗೆದ 2024-25ನೇ ಸಾಲ್‌ದ ಪೆರಿಯಾಯಿನೊ (ಮಹಾಸಭೆ) ಜೈ ತುಳುನಾಡ್ (ರಿ.) ಬೆಂಗ್ಲೂರ್ ಎಗ್ಗೆದ 2024-25ನೇ ಸಾಲ್‌ದ ಪೆರಿಯಾಯಿನೊ ಮಾರ್ಚ್ 17, 2024 ದಾನಿ ಮೆಜೆಸ್ಟಿಕ್‌ದ ಸ್ವಾಗತ್ ಹೋಟೆಲ್‌ಡ್ ನಡತ್ಂಡ್.

 

ಈ ಸಭೆಟ್ ಇತ್ತೆದ ಕಮಿಟಿ ಕರಿನ ವರ್ಷೊಡು ಆಯಿನ ಕಜ್ಜೊಲೆನ ಬಗೆಟ್ ವರದಿ ಕೊರಿಯೆರ್. ಅಂಚನೇ ಕೇಂದ್ರ ಕಮಿಟಿದ ಗುರ್ಕಾರ್ಲು ವಿಶು ಶ್ರೀಕೇರ ಬೊಕ್ಕ ಸಮಿತಿದ ಪದುಕೆರ್ನ ಒತ್ತು ಪಾಲ್‌ಡ್ ಪೊಸ ಎಗ್ಗೆದ ಉಂಡು ಆಂಡ್. ಧನಂಜಯ ಆಚಾರ್ಲು ಮೇರ್ ಗುರ್ಕಾರೆ ಆದ್ ಅಜತ್ತ್ ಬತ್ತೆರ್. ಒತ್ತು ಗುರ್ಕಾರೆ ಆದ್ ನಿಧೀಶ್ ಶೆಟ್ರ್, ಕಾರ್ಯಂತೆರಾದ್ ಅಕ್ಷಯ್ ಆಚಾರ್ಲು, ಒತ್ತು ಕಾರ್ಯಂತೆರಾದ್ ಶಕುಂತಳಾ ಎಸ್. ಬೊಕ್ಕ ವಿನಯ್, ಪನವುದ ಪಾಲವೆರಾದ್ ಅನುದೀಪ್ ಎಲ್ಲೂರ್ ಬೊಕ್ಕ ಒತ್ತು ಪನವುದ ಪಾಲವೆರಾದ್ ಪ್ರಗತಿ ಎಸ್., ಸಂಘಟನಾ ಕಾರ್ಯಂತೆರಾದ್ ಶರತ್ ಕೊಡವೂರ್, ಕಾಶಿನಾಥ್ ಬೊಕ್ಕ ಪ್ರಶಾಂತ್ ಎಸ್. ಪಿ. ಅಜತ್ತ್ ಬೈದೆರ್.

ಗುರ್ಕಾರ್ಲು ಆದ್ ಅಜತ್ತ್ ಬೈದಿನ ಧನಂಜಯೆರ್ ರಡ್ಡ್ ಪಾತೆರ್ದ್, ತುಲು ಬಾಸೆದ ಬುಲೆಚ್ಚಿಲ್‌ಗ್ ಅಂಚೆನೆ ಒರಿಪುಗ್ ಪೊನೆಪುವೆ ಅಂಚನೆ ತುಲುಕ್ಕ್ ಬೆನ್ಪುನಕ್ಲೆಡೊಪ್ಪ ಏಪಲ ಉಪ್ಪುವ ಬೆರಿತಾಂಗ್ ಕೊರ್ಪ. ಮಾತೆರ್ನ ಸಾಕಾರ ಬಿನ್ನೈತೊಂಡೆರ್. ವಿಶು ಶ್ರೀಕೇರ ಮೇರ್ ಜೈ ತುಲುನಾಡ್ ಸಂಘಟನೆದ ಬೆನ್ಪಟಿಕೆದ ಬಗೆಟ್, ಸಂಘಟನೆದ ನೀತಿ ನಿಯಮೊದ ಬಗೆಟ್ ತೆರಿಪಾದ್ ಪೊಸ ಎಗ್ಗೆಗ್ ಎಡ್ಡೆಪ್ಪು ಬಯಕಿಯೆರ್.

ಎಗ್ಗೆದ ಪೋಯಿಸರ್ತಿದ ಗುರ್ಕಾರೆ ವಿಶಾಲ್ ಕೊಡಿಯಾಲ್ ಮೇರ್ ಪಾತೆರ್ದ್, ಆರೆನ ಅವಧಿಡ್ ಎಗ್ಗೆರ್ದ್ ಆತಿನ ಬೆನ್ನಿ ಬೆನ್ಪಾಟಿದ ಪೊಲಬು ಕೊರಿಯೆರ್ ಅಂಚನೇ ಅವಕಾಶ ಮಲ್ತ್ ಕೊರ್ನ ಸಂಘಟನೆಗ್ ಸೊಲ್ಮೆ ಸಂದಾಯೆರ್. ನಿಧೀಶ್ ಶೆಟ್ರ್ ವರದಿ ಓದಿಯೆರ್. ಧನಂಜಯೆರ್ ಎಕ್ಕಪತ್ರ ಓದಿಯೆರ್. ಸಭೆಟ್ ಉಂಡು ಕಮಿಟಿದಕುಲು, ಕೇಂದ್ರ ಕಮಿಟಿದಕುಲು ಅಂಚನೇ ಪದುಕೆರ್ ಪಾಲ್ ದೆತೊಂದು ಲೇಸ್ ಪೊರ್ಲು ಮಲ್ತ್ ಕೊರಿಯೆರ್.

Mangalore: Lok Sabha elections 2024: Security tightened at check posts

ಲೋಕಸಭೆ ಚುನಾವಣೆ 2024: ಚೆಕ್ ಪೋಸ್ಟ್‌ ಬಿಗಿ ಭದ್ರತೆ ಮಲ್ಪಾದ್ಂಡ್

Mangalore: The Dakshina Kannada district, including Mangalore commissionerate limits, witnessed heightened security measures following the announcement of Lok Sabha election dates by the Election Commission.

Security has been bolstered at interstate and inter-district borders, with extensive vehicle checks at all checkpoints since Saturday evening. These checkpoints are equipped with advanced facilities.

Superintendent of Police C.B Rishyanth visited the Saradka checkpoint on the Kerala-Karnataka border and instructed personnel to conduct rigorous inspections.

ಎಸ್‌ಸಿಡಿಸಿಸಿ ಬ್ಯಾಂಕ್ ಅಧ್ಯಕ್ಷೆರಾದ್ ಡಾ. ಎಂ. ಎನ್. ರಾಜೇಂದ್ರ ಕುಮಾರ್ ಪದಗ್ರಹಣ

ಕುಡ್ಲ: ಸಹಕಾರಿ ಕ್ಷೇತ್ರದ ಮುಕೇನ ರಾಷ್ಟ್ರಮಟ್ಟಡ್ ದಕ್ಷಿಣ ಕನ್ನಡ ಜಿಲ್ಲೆಗ್ ಕೀರ್ತಿ ಕನಪುನ ಬೇಲೆ ಡಾ.ಎಂ.ಎನ್.ರಾಜೇಂದ್ರ ಕುಮಾರ್ ಮೆರೆನ ಮುಕೇನ ಆತ್ಂಡ್ ಪಂದ್ ಕರ್ನಾಟಕ ವಿಧಾನ ಸಭಾ ಅಧ್ಯಕ್ಷೆರ್ ಯು.ಟಿ.ಖಾದರ್ ಪಂಡೆರ್.

ಆರ್ ಪೇಂಟೆದ ಎಸ್‌ಸಿಡಿಸಿಸಿ ಬ್ಯಾಂಕ್ ಸಭಾಂಗಣಡ್ ಬ್ಯಾಂಕ್‌ದ ಅಧ್ಯಕ್ಷೆರ್ ಆದ್ ಆಯ್ಕೆಯಾಯಿನ ಡಾ.ಎಂ.ಎನ್.ರಾಜೇಂದ್ರ ಕುಮಾರ್ ಮೆರೆನ ಅಧಿಕಾರ ಸ್ವೀಕಾರ ಬೊಕ್ಕ ಪುಟ್ಟು ಪರ್ಬದ ಆಚರಣೆದ ಪೊರ್ತುಡು ಅಧ್ಯಕ್ಷತೆ ವಹಿಸಾದ್ ಎಡ್ಡೆಪ್ಪುನು ಬಯಕ್ಯೆರ್.

ರಾಜೇಂದ್ರ ಕುಮಾರ್ ಸಹಕಾರಿ ಕ್ಷೇತ್ರದ ಮುಕೇನ ಮಾತೆರೆನೆಲ ಮೋಕೆ ಬೊಕ್ಕ ವಿಶ್ವಾಸಗ್ ಪಾತ್ರರಾತಿನೆಡ್ದಾವರ ಅವಿರೋಧವಾದ್ ಆಯ್ಕೆ ಆಯರೆ ಕಾರಣ ಆಂಡ್. ಸಹಕಾರಿ ಬ್ಯಾಂಕ್ ಮಸ್ತ್ ಸಂಸ್ಥೆಲು ಬುಳೆಯರೆ ಸಹಾಯ ಮಲ್ತಿನೆಡ್ದಾವರ ಜಿಲ್ಲೆಡ್ ಬೋಡಾಯಿನಾತ್ ಕುಟುಮಲೆಗ್ ಆಧಾರವಾತ್ಂಡ್. ದುಂಬಗ್‌ಲ ಸಹಕಾರಿಲೆನ ಕನನ್ ನನಸ್ ಮಲ್ಪುಲೆಕ್ಕ ಆವಡ್ ಪಂದ್ ಎಡ್ಡೆಪ್ಪುನು ಬಯಕಿಯೆರ್.

ಅಧ್ಯಕ್ಷೆರಾದ್ ಪದಗ್ರಹಣ ಮಲ್ತಿನ ಡಾ.ಎಂ.ಎನ್.ರಾಜೇಂದ್ರ ಕುಮಾರ್ ಪಾತೆರ್ದ್, ದಕ್ಷಿಣ ಕನ್ನಡ ಕೇಂದ್ರ ಸಹಕಾರಿ ಬ್ಯಾಂಕ್ ಮಾತೆರೆನೆಲ ಸಾಮೂಹಿಕ ಪ್ರಯತ್ನದ ಫಲವಾದ್ ಎತ್ತರಗ್ ಬುಳೆಯರೆ ಸಾಧ್ಯ ಆತ್ಂಡ್. ಅವಿಭಜಿತ ದಕ್ಷಿಣ ಕನ್ನಡ ಜಿಲ್ಲೆಡ್ ರಾಜಕೀಯ ರಹಿತವಾದ್ ಕಾರ್ಯ ನಿರ್ವಹಿಸಾವೊಂದು ಬೈದ್ಂಡ್. ಮಾತ ನಿರ್ದೇಶಕೆರ್ ಅವಿರೋಧವಾದ್ ಆಯ್ಕೆ ಆಪುನ ಮುಕೇನ ರಾಜ್ಯಗ್ ಮಾದರಿಯತ್ಂಡ್. ಸಂಸ್ಥೆದ ಬುಳೆಚ್ಚಿಲ್‌ಗ್ ಕಾರಣ ಆತಿನ ಮಾತೆರೆಗ್ಲಾ ಸೊಲ್ಮೆ ಸಂದೈತ ಮಲ್ತೆರ್.

ಈ ಲೇಸ್‌ಡ್ ಮಾಜಿ ಸಚಿವೆರ್ ಅಭಯ ಚಂದ್ರ ಜೈನ್, ವಿಧಾನ ಪರಿಷತ್ ಸದಸ್ಯೆರ್ ಹರೀಶ್ ಕುಮಾರ್, ಜಾಗತಿಕ ಬಂಟರ ಸಂಘಟನೆ ಒಕ್ಕೂಟದ ಅಧ್ಯಕ್ಷೆರ್ ಐಕಳ ಹರೀಶ್ ಶೆಟ್ಟಿ, ವಿನಯ್ ಕುಮಾರ್ ಸೂರಿಂಜೆ, ಭಾಸ್ಕರ ಎಸ್. ಕೋಟ್ಯಾನ್, ಕೆ. ಹರಿಶ್ಚಂದ್ರ, ಟಿ.ಜಿ ರಾಜರಾಮ ಭಟ್, ದೇವಿ ಪ್ರಸಾದ್ ಶೆಟ್ಟಿ, ಬಿ. ಅಶೋಕ್ ಕುಮಾರ್ ಶೆಟ್ಟಿ, ಶಶಿಕುಮಾರ್ ರೈ.ಬಿ, ಎಸ್. ರಾಜು ಪೂಜಾರಿ, ಎಂ. ವಾದಿರಾಜ ಶೆಟ್ಟಿ, ಕುಶಾಲಪ್ಪ ಗೌಡ, ಎಸ್.ಎನ್. ಮನ್ಮಥ, ತಾಲೂಕು ಕೃಷಿ ಮೋನಪ್ಪ ಶೆಟ್ಟಿ ಎಕ್ಕಾರು, ಕೆ. ಜೈರಾಜ್ ಬಿ.ರೈ, ಎಸ್.ಬಿ.ಜಯರಾಮ ರೈ, ದ.ಕ ಜಿಲ್ಲಾ ಹಾಲು ಉತ್ಪಾದಕರೆ ಸಹಕಾರಿ ಸಂಘದ ಅಧ್ಯಕ್ಷೆರ್ ಸುಚರಿತ ಶೆಟ್ಟಿ ಇತ್ತೆರ್.

ಪೊರ್ಲು ಪ್ರಕೃತಿದ ನಡುಟ್ಟು ಉದಿಪನ ಆವರೆ ಉಂಡು “ರೋಹನ್ ಎಸ್ಟೇಟ್ ನೀರ್ ಮಾರ್ಗ ಹಿಲ್ಸ್”

ಕುಡ್ಲ: “ಪ್ರಕೃತಿದ ಪೊರ್ಲುಗ್ ಪುಗರ್ತೆ ಪಡೆಯಿನ ನೀರ್ ಮಾರ್ಗದ ಶಾಂತವಾಯಿನ ಬೊಕ್ಕ ಆಧುನಿಕ ಜೀವನ ಶೈಲಿಗ್ ಅಗತ್ಯ ಆಯಿನ ಮಾತ ರೀತಿದ ಸೌಕರ್ಯ ಇಪ್ಪುನ “ರೋಹನ್ ಎಸ್ಟೇಟ್ ನೀರ್ ಮಾರ್ಗ ಹಿಲ್ಸ್” ತರೆ ದೆರ್ತ್‌ದ್ ಉಂತರೆ ಉಂಡು. ನೀರ್ ಮಾರ್ಗ ಪೇಂಟೆಗ್ ಕೈತಲ್‌ಡ್ ಇಪ್ಪುನ 9.48 ಎಕ್ರೆ ವಿಸ್ತಾರ ಆಯಿನ ಪ್ರದೇಶಲೆಡ್ ರೋಹನ್ ಎಸ್ಟೇಟ್ ವಸತಿ ಬಡಾವಣೆ ನಿರ್ಮಾಣ ಆಯರೆ ಉಂಡು. ವ್ಯವಸ್ಥಿತವಾದ್ ಡೆವಲಪ್ ಮಲ್ದಿನ 96 ನಿವೇಶನಲು ಗೇಟೆಡ್ ಕಮ್ಯೂನಿಟಿದ ಪೊರ್ಲುದ ಅನುಭವನ್ ಕೊರ್ಪುಂಡು. ಅಗೆಲದ ಕಾಂಕ್ರೀಟ್ ಮಾರ್ಗ, ಬರ್ಸದ ನೀರ್ ಸುಲಭಡ್ ಪೋವರೆ ವ್ಯವಸ್ಥೆ, ನಿಕ್ಲೆನ ಮನಸ್ಸ್‌ಗ್ ಒಪ್ಪುನಂಚಿನ ವಾಸ್ತು ಪ್ರಕಾರ ಇಪ್ಪುನ ನಿವೇಶನಲು ಮುಲ್ಪ ಲಭ್ಯವಾದ್ ಉಂಡು” ಪಂದ್ ರೋಹನ್ ಎಸ್ಟೇಟ್‌ದ ಎಂ. ಡಿ. ರೋಹನ್ ಮೊಂತೇರೋ ಪತ್ರಿಕಾಗೋಷ್ಠಿಡ್ ಮಾಹಿತಿ ಕೊರಿಯೆರ್.

“ರೋಹನ್ ಎಸ್ಟೇಟ್‌ಡ್ ಇಪ್ಪುನ ಕ್ಲಬ್ ಹೌಸ್ ಎಡ್ಡೆ ರೀತಿದ ಸೌಕರ್ಯದೊಟ್ಟಿಗೆ ಅತ್ಯಾಧುನಿಕ ಜಿಮ್ ಹೊಂದುದ್ಂಡ್. ರೋಹನ್ ಎಸ್ಟೇಟ್ ನೀರ್ ಮಾರ್ಗ ಹಿಲ್ಸ್ ಕಾಲಿ ವಾಸ ಮಲ್ಪುನ ಜಾಗೆ ಅತ್ತಂದೆ ರೆಸಾರ್ಟ್‌ದ ಅನುಭವನ್ ಕೊರ್ಪುಂಡು. ಪ್ರಕೃತಿದ ಪೊರ್ಲು, ಆಕರ್ಷಕ ಪ್ರವೇಶ ದ್ವಾರ, ಇಡೀ ಬಡಾವಣೆಗ್ ಅಗೆಲವಾಯಿನ ಕಾಂಕ್ರಿಟ್ ಮಾರ್ಗ ನಿರ್ಮಿಸಾದ್ ಒವ್ವೇ ರೀತಿದ ಅಡೆತಡೆ ಇಜ್ಜಂದೆ ಸಂಚಾರದ ಅನುಭವನ್ ಪಡೆಯೊಲಿ. ಸರಿಯಾಯಿನ ಒಳ ಚರಂಡಿ, ಸ್ಟ್ರೀಟ್ ಲೈಟ್, ಬಡಾವಣೆಗ್ ಪಂದ್ ನಿರ್ಮಿಸಾಯಿನ ಪ್ರತ್ಯೇಕ ಆಯಿನ ಪರ್ಪಿನ ನೀರ್‌ದ ಸಂಪರ್ಕದ ಒಟ್ಟುಗು ಭವಿಷ್ಯಡ್ ಕುಡ್ಲ ಮಹಾನಗರ ಪಾಲಿಕೆದ ವತಿರ್ದ್ ಪೊರೈಕೆ ಮಲ್ಪುನ ಪರ್ಪಿನ ನೀರ್‌ದ ಸಂಪರ್ಕ ಪಡೆಯರೆ ಸಾಧ್ಯ ಆಪುಲೆಕ್ಕ ನೀರ್‌ದ ವ್ಯವಸ್ಥೆ ಉಂಡು. ರೋಹನ್ ಎಸ್ಟೇಟ್ ನೀರ್ ಮಾರ್ಗ ಹಿಲ್ಸ್ ಅಭಿವೃದ್ದಿ ಆವೊಂದಿತ್ತ್‌ದ್ ತನ್ನ ಇಲ್ಲ್‌ನ್ ಅತ್ತ್ಂಡ ಐಷಾರಾಮಿ ಬಂಗಲೆನ್ ನಿರ್ಮಾಣ ಮಲ್ಪರೆ ಯೋಚನೆ ಮಲ್ತೊಂದು ಇತ್ತ್ಂಡ ಮುಲ್ಪ ಉಂದೆನ್ ಕೂಡ್ಲೆ ಸುರು ಮಲ್ಪೊಲಿ.

ರೋಹನ್ ಕಾರ್ಪೊರೇಷನ್ ಸಂಸ್ಥೆ ಅನುಭವ ಇಪ್ಪುನ ವಿನ್ಯಾಸಗಾರೆರ್‍ನ ಕೂಟನೇ ಇಲ್ಲ್‌ನ್ ನಿರ್ಮಾಣ ಮಲ್ತ್ ಕೊರಿಯರೆ ಉಂಡು. 9.48 ಎಕ್ರೆದ ವಿಶಾಲವಾಯಿನ ಪ್ರದೇಶಡ್ ಲೇಔಟ್ ನಿರ್ಮಾಣ ಆದಿತ್ತ್‌ದ್ 96 ನಿವೇಶನಲು ಉಂಡು. ಇಡೀ ಲೇಔಟ್‌ ದ ಭದ್ರತೆಗಾದ್ ಹೈ ರೆಸೊಲ್ಯೂಷನ್ ಸಿ.ಸಿ. ಕ್ಯಾಮೆರಾ, ಇಂಟರ್‌ಲಾಕ್ ಪಾಡ್ದಿನ ವಾಕಿಂಗ್ ಪಾತ್, ಬ್ಯಾಡ್ಮಿಂಟನ್ ಕೋರ್ಟ್, ಜಿಮ್, ಸ್ವಿಮ್ಮಿಂಗ್ ಪೂಲ್, ಮಿನಿ ಸೂಪರ್ ಮಾರ್ಕೇಟ್, ಜೋಕ್ಲೆಗಾದ್ ಆಟೊದ ಮೈದಾನ ಇಂಚ ಪತ್ತೆರ್ದ್ ಎಚ್ಚದ ವಿಶೇಷತೆಲು ಕೂಡ್ದಿನ ಸರ್ವ ಸುಸಜ್ಜಿತ ವಸತಿ ಬಡಾವಣೆ ಉಂದುವೇ ಸುರುತ್ತ ಸರ್ತಿ ನೀರ್ ಮಾರ್ಗಡ್ ನಿರ್ಮಾಣ ಆತ್ಂಡ್ ಪಂದ್ ಪಂಡೆರ್.

ಕಾಲಿ ಜಾಗೆ ಇಪ್ಪುನ ಮಾತ ಕಡೆಟ್ಟ್ ಪರ್ಂದ್‌ದ ಬೊಕ್ಕ ಬೇತೆ ದೈಕ್ಲೆನ್ ನೆಡ್ತೆರ್. ರೋಹನ್ ಎಸ್ಟೇಟ್ ಕುಡ್ಲ ಕೈತಲ್‌ದ ನೀರ್ ಮಾರ್ಗ ಜಂಕ್ಷನ್‌ರ್ದ್ ಕಾಲಿ 200 ಮೀಟರ್ ದೂರಡ್ ರೋಹನ್ ಎಸ್ಟೇಟ್ ನಿರ್ಮಾಣ ಆತ್ಂಡ್. ಕುಡ್ಲ-ಬೆದ್ರ ಮಾರ್ಗರ್ದ್ 2 ಕಿಮೀ, ಕೇಂಬ್ರಿಜ್ ಸ್ಕೂಲ್ ನೀರ್ ಮಾರ್ಗರ್ದ್ 1.7 ಕಿಮೀ, ಕುಡ್ಲ ಜಂಕ್ಷನ್ ರೈಲ್ವೆ ಸ್ಟೇಷನ್‌ರ್ದ್ 8.3 ಕಿಮೀ ದೂರಡ್ ಇತ್ತ್‌ದ್, ಉಂದು ಮಾತೆಕ್ಕ್‌ಲ ರೋಹನ್ ಎಸ್ಟೇಟ್ ಎಡ್ಡೆ ಸಂಪರ್ಕ ವ್ಯವಸ್ಥೆ ಉಂಡು.

ರೋಹನ್ ಕಾರ್ಪೊರೇಷನ್ ಸುಮಾರ್ 30 ವರ್ಷರ್ದ್ ನಿರ್ಮಾಣ ಕ್ಷೇತ್ರಡ್ ಪುಗರ್ತೆ ಪಡೆಯಿನ ಸಂಸ್ಥೆ. ರಿಯಲ್ ಎಸ್ಟೇಟ್ ಉದ್ಯಮಡ್ ಕುಡ್ಲದ ಮಲ್ಲ ಪುದರ್‌ನ್ ಕನತ್ ಕೊರಿನ ರೋಹನ್ ಕಾರ್ಪೊರೇಷನ್ ಇತ್ತೆ ರಾಜ್ಯಡೇ ಪ್ರತಿಷ್ಠಿತ ಸಂಸ್ಥೆಯಾದ್ ಗುರ್ತಿಸಾದ್ಂಡ್. ಕುಡ್ಲದ ಉದ್ಯಮಿ ರೋಹನ್ ಮೊಂತೇರೊ ಮೆರೆನ ಮುತಾಲಿಕೆಡ್ ಸುರು ಆಯಿನ ಪ್ರಾಪರ್ಟಿ ರಿಯಲ್ ಎಸ್ಟೇಟ್ ಬೊಕ್ಕ ಡೆವೆಲಪರ್ಸ್ ಸಂಸ್ಥೆ ಪಂದ್ ರೋಹನ್ ಕಾರ್ಪೊರೇಷನ್ ಇಂಡಿಯಾ ಪ್ರೈವೇಟ್ ಲಿಮಿಟೆಡ್ ಕಂಪೆನಿಯಾದ್ ರೂಪು ಪಡೆತ್ಂಡ್. ತನ್ನ ಸಂಸ್ಥೆದ ಅಡಿಟ್ಟ್ ನಿರ್ಮಾಣ ಆಪುನ ಮಾತ ಸಮುಚ್ಚಯಲೆಡ್ ರೋಹನ್ ಮೊಂತೇರೊ ಪೊಸ ಪ್ರಯೋಗಲೆನ್ ನಡಪಾದ್ ಯಶಸ್ವಿಯಾತೆರ್. ಮುಲ್ಪ ಗ್ರಾಹಕೆರೆನ ಅಭಿಪ್ರಾಯಗ್ ಎಚ್ಚದ ಆದ್ಯತೆ ಕೊರೊಂದಿಪ್ಪುನವು ಮೊಕ್ಲೆನ ಯಶಸ್ಸ್‌ದ ಮುಟ್ಟು ಆತ್ಂಡ್.

ವಿಶೇಷತೆಲು:
* ಸುಸಜ್ಜಿತವಾದಿಪ್ಪುನ ಕ್ಲಬ್ ಹೌಸ್
* 96 ಸೈಟ್
* 30 ಬೊಕ್ಕ 40 ಅಡಿ ಅಗೆಲದ ಕಾಂಕ್ರೀಟ್ ಮಾರ್ಗ
* ಸಾದಿದ ದೀಪ
* ಕರೆಂಟ್ ಕೇಬಲ್‌
* ಪೊರ್ಲುದ ಪಾರ್ಕ್
* ಬರ್ಸದ ನೀರ್ ಸರಿಯಾದ್ ಪೋಪಿಲೆಕ್ಕ ವ್ಯವಸ್ಥೆ, ನೀರ್ ಸಂಸ್ಕರಣಾ ಘಟಕ
* 24*7 ಸಿಸಿಟಿವಿ ಭದ್ರತಾ ವ್ಯವಸ್ಥೆ
* ಮಿನಿ ಸೂಪರ್ ಮಾರ್ಕೇಟ್
* ಸ್ವಿಮ್ಮಿಂಗ್ ಪೂಲ್
* ಜಿಮ್
* ಜೋಕ್ಲೆನ ಆಟೊದ ಮೈದಾನ

ಯಡಿಯೂರಪ್ಪೆರ್ನ ಮಿತ್ತ್ ಪೋಕ್ಸೊ ಕೇಸ್ ಪೊಣ್ಣನ ಮಿತ್ತ್ ಲೈಂಗಿಕ ದೌರ್ಜನ್ಯ ಮಲ್ತಿನ ಆರೋಪ

ಪೊಣ್ಣನ ಮಿತ್ತ್ ಲೈಂಗಿಕ ದೌರ್ಜನ್ಯ ಮಲ್ತಿನ ಆರೋಪದ ಮಿತ್ತ್ ಮಾಜಿ ಮುಖ್ಯಮಂತ್ರಿ ಬಿ. ಎಸ್. ಯಡಿಯೂರಪ್ಪೆರ್ನ ವಿರುದ್ಧ ಪೋಕ್ಸೊ ಕೇಸ್ ದಾಖಲ್ ಆತ್ಂಡ್.

ಫೆಬ್ರವರಿ 2ಕ್ಕ್ ದೌರ್ಜನ್ಯ ಮಲ್ತಿನ ಆರೋಪ ಕೇಂದ್ ಬೈದ್ಂಡ್. ಈ ಬಗೆಟ್ಟ್ ಪೊಣ್ಣನ ಅಪ್ಪೆ ಸದಾಶಿವನಗರ ಪೊಲೀಸ್ ಠಾಣೆಡ್ ದೂರ್ ದಾಖಲ್ ಮಲ್ದೆರ್. ಮಾಜಿ ಸಿಎಂ ವಿರುದ್ಧ ಪೋಕ್ಸೊ ಬೊಕ್ಕ 354(ಎ) ಐಪಿಸಿ ಅಡಿಟ್ಟ್ ಕೇಸ್ ದಾಖಲ್ ಆತ್ಂಡ್.

ಏ.22-30: ತಿಬಾರ ಕೊಡಮಣಿತ್ತಾಯನ ನಡೆಟ್ಟ್ ಬ್ರಹ್ಮಕುಂಭಾಭಿಷೇಕ, ನಾಗಮಂಡಲ, ವಿಶೇಷ ಜಾತ್ರಾ ಮಹೋಚ್ಚಯ

ಕಿನ್ನಿಗೋಳಿ: ತುಳುನಾಡ್ ದ ಕಾರ್ಣಿಕದ ಪುಣ್ಯ ಮಣ್ಣ್, ಕಟೀಲ್ ಕೈತಲ್ದ ತಿಬಾರ್ ದ (ಶಿಬರೂರು) ಕೊಡಮಣಿತ್ತಾಯ ದೈವಸ್ಥಾನ ಅಂದಾಜಿ 9 ಕೋಟಿ ರೂ. ಕರ್ಚಿಡ್ ಜೀರ್ಣೋದ್ಧಾರ ಆದ್ ಏಪ್ರಿಲ್ 22-30 ತಾರೀಕ್ ಮುಟ್ಟ ಬ್ರಹ್ಮಕುಂಭಾಭಿಷೇಕ ಕಾರ್ಯಕ್ರಮ ಬೊಕ್ಕ ವಿಶೇಷ ಜಾತ್ರಾ ಮಹೋತ್ಸವ ನಡಪರೆ ಉಂಡು ಪಂದ್ ತಿಬಾರ್ ಗುತ್ತಿನಾರ್ ಉಮೇಶ್ ಎನ್. ಶೆಟ್ಟಿ ಶಿಬರೂರುಗುತ್ತು ತೆರಿಪಾಯೆರ್.

ಶ್ರೀ ಕ್ಷೇತ್ರದ ಚಾವಡಿಡ್ ಬುಧಾರ ನಡತಿನ ಸುದ್ದಿಗೋಷ್ಠಿಡ್ ಪಾತೆರಿನ ಆರ್, ಏ.22 ಕ್ಕ್ ಉಗ್ರಾಣ ಮೂರ್ತ ಆವರೆ ಉಂಡು. ಏ.26 ಕ್ಕ್ ಕಾಂಡೆ ಶ್ರೀ ಉಳ್ಳಾಯ ಕೊಡಮಣಿತ್ತಾಯ ದೈವೊಲೆಗ್ ಬ್ರಹ್ಮಶ್ರೀ ವೇದವ್ಯಾಸ ತಂತ್ರಿಲು ಶಿಬರೂರು ಮೆರೆನ ಮುತಾಲಿಕೆಡ್ ಬ್ರಹ್ಮಕುಂಭಾಭಿಷೇಕ ನಡಪರೆ ಉಂಡು. ಅವೇ ದಿನ ರಾತ್ರೆ ಈ ಕ್ಷೇತ್ರದ ವಿಶೇಷ ಸಂಪ್ರದಾಯದ ಪ್ರಕಾರ ನಾಗದೇವರೆಗ್ ನಾಗಮಂಡಲ ಸೇವೆ ನಡಪರೆ ಉಂಡು.ಏ.27-30 ಮುಟ್ಟ ವಿಶೇಷ ಜಾತ್ರಾ ಮಹೋಚ್ಚಯ ನಡಪರೆ ಉಂಡು ಪಂದ್ ತೆರಿಪಾಯೆರ್.

ಕ್ಷೇತ್ರದ ಮೊಕ್ತೇಸರೆರ್ ಮಧುಕರ ಅಮೀನ್ ಪಾತೆರ್ದ್, ಈ ಸರ್ತಿ ದಾನಿಲೆನ ಸಹಕಾರೊಡು ಬಂಗಾರ್ ದ ಪಲ್ಲಕ್ಕಿ ನಿರ್ಮಾಣ ಮಲ್ಪುನ ಉದ್ದೇಶ ಉಂಡು. ಕ್ಷೇತ್ರಡ್ 1ಕೆಜಿ ಬಂಗಾರ್ ಇತ್ತ್ ದ್ ಅವೆನ್ ಗಲಸರೆ ಸರಕಾರದ ಅನುಮತಿ ದೆತೊನ್ನ ಕೆಲಸ ಆವೊಂದುಂಡು. ಜಾತ್ರೆದ ಪೊರ್ತುಡು ಅವು ದೇವೆರೆಗ್ ಸಮರ್ಪಣೆ ಆಪಿನ ವಿಶ್ವಾಸ ಉಂಡು. ಅವ್ವತ್ತಾಂದೆ ಕ್ಷೇತ್ರದ ನಾಲ್ ಕಡೆತ್ತ ಗೋಪುರ ಪುನರ್ ನಿರ್ಮಾಣದ ಬೇಲೆ, ಮೂಲಭೂತ ಸೌಕರ್ಯದ ಬೇಲೆ ಇಂಚ ಸುಮಾರ್ 3 ಕೋಟಿ ರೂ.ದ ಬೇಲೆ ಆತ್ಂಡ್ ಪಂಡೆರ್.

ಜೀರ್ಣೋದ್ಧಾರ ಸಮಿತಿದ ಸಂಚಾಲಕೆರ್ ಸುಬ್ರಹ್ಮಣ್ಯ ಪ್ರಸಾದ್ ಪಾತೆರ್ದ್, ನಂದಿನಿ ತುದೆ ಬರಿತ್ತ ಪ್ರಕೃತಿ ರಮಣೀಯ ಕ್ಷೇತ್ರವಾಯಿನ ತಿಬಾರ್ ದ ಬ್ರಹ್ಮಕುಂಭಾಭಿಷೇಕದ ಲೇಸ್ ಗ್ 3-4 ಲಕ್ಷ ಜನ ಸೇರುನ ನಿರೀಕ್ಷೆ ಉಂಡು. ಲೇಸ್ ದ ಯಶಸ್ವಿಗ್ 26 ಸಮಿತಿಲೆನ್ ರಚನೆ ಮಲ್ತ್ ದ. ತುಳುನಾಡ್ ಡ್ ಅತಿ ಎತ್ತರವಾಯಿನ ಕಂಚಿದ ಕವಚ ಇತ್ತಿನ ಕೊಡಿಮರನ್ (58 ಅಡಿ ಎತ್ತರ) ನಿರ್ಮಾಣ ಆದ್ ಪ್ರತಿಷ್ಠಾಪನೆ ಆವರೆ ಉಂಡು.ಮಿತ್ತ್ ದ ಸಾನೊದ ಗರ್ಭ ಗುಡಿಕ್ಕ್ ಪಿತ್ತಾಳೆದ ಮುಚ್ಚಿಗೆ ಪಾಡ್ದ್ಂಡ್ ಪಂಡೆರ್.

ಜೀರ್ಣೋದ್ಧಾರ ಸಮಿತಿದ ಕಾರ್ಯಾಧ್ಯಕ್ಷೆರ್ ಪ್ರದ್ಯುಮ್ನ ರಾವ್ ಪಾತೆರ್ದ್, ಶಾಸಕೆರ್ ಬೊಕ್ಕ ಸಂಸದೆರ್ನ ಅನುದಾನೊಡು ಕ್ಷೇತ್ರದ ನಂದಿನಿ ತುದೆ ಬರಿಟ್ಟ್ 1 ಕೋಟಿ ರೂ. ಕರ್ಚಿಡ್ ತಡೆಗೋಡೆ ಕಾಮಗಾರಿ ಆವೊಂದುಂಡು. ಬ್ರಹ್ಮಕುಂಭಾಭಿಷೇಕ ಉಚ್ಚಯದ ಪೊರ್ತುಡು ಪ್ರತಿದಿನೊಲ ಸ್ವಾಮೀಜಿಲು ಬೊಕ್ಕ ಧಾರ್ಮಿಕ ಮುಖಂಡೆರ್ನ ಸಮಕ್ಷಮಡ್ ಧರ್ಮ ಸಭೆ, ಬೇತೆ ಬೇತೆ ಸಾಂಸ್ಕೃತಿಕ ಕೂಟದಕ್ಲೆರ್ದ್ ಸಾಂಸ್ಕೃತಿಕ ಕಾರ್ಯಕ್ರಮ ಅಂಚೆನೆ ಬೇತೆ ಬೇತೆ ಭಜನಾ ಮಂಡಳಿರ್ದ್ ನಿರಂತರ ಭಜನಾ ಕಾರ್ಯಕ್ರಮ ನಡಪರೆ ಉಂಡು ಪಂದ್ ತೆರಿಪಾಯೆರ್.

ಪತ್ರಿಕಾಗೋಷ್ಠಿಡ್ ಜೀತೇಂದ್ರ ಶೆಟ್ಟಿ, ಕೊರ‍್ಯಾರುಗುತ್ತು, ತುಕರಾಮ ಶೆಟ್ಟಿ, ಪರ್ಲಬೈಲುಗುತ್ತು, ಮೊಕ್ತೇಸರೆರ್ ಕಾಂತಪ್ಪ ಸಾಲಿಯಾನ್, ಸುಧಾಕರ ಶಿಬರೂರು, ಸುದೀಪ್ ಶೆಟ್ಟಿ, ಜಗದೀಶ ಶೆಟ್ಟಿ, ಸುರೇಂದ್ರ ಶೆಟ್ಟಿ, ಪಂಚಾಯತ್ ಅಧ್ಯಕ್ಷೆರ್ ಗೀತಾ ಶೆಟ್ಟಿ ಶಿಬರೂರು ಗುತ್ತು ಸುಧಾಕರ ಶೆಟ್ಟಿ, ಚಂದ್ರಹಾಸ ಶಿಬರೂರು, ಪ್ರಭಾಕರ ಶೆಟ್ಟಿ ಹೊಸಕಟ್ಟ, ಮಾಧ್ಯಮ ಸಂಚಾಲಕೆರ್ ಜಗನ್ನಾಥ ಶೆಟ್ಟಿ ಬಾಳ ಇತ್ತೆರ್.

ತಿಬಾರ್ ಕ್ಷೇತ್ರದ ಇತಿಹಾಸ

ತಿಬಾರ್ ಶ್ರೀ ಕೊಡಮಣಿತ್ತಾಯ ಕ್ಷೇತ್ರ ಭಾರಿ ಪೊರ್ಲುದ ಇತಿಹಾಸ ಇತ್ತಿನ ಕ್ಷೇತ್ರ. ತಿಬಾರ್ ಗ್ ಲ ಶ್ರೀ ಕ್ಷೇತ್ರ ಕಟೀಲಿಗ್ ಲ ಅವಿನಾಭಾವ ಸಂಬಂಧ ಇತ್ತಿನೆಕ್ಕ್ ಸಾಕ್ಷಿಯಾದ್ ವರ್ಷಲ ಕಟೀಲ್ ಜಾತ್ರೆದ ಪೊರ್ತುಡು ಕೊಡಮಣಿತ್ತಾಯನ ಭೇಟಿ ಆಪಿನವು ಏನಿಕಾಲೊರ್ದು ನಡತೊಂದು ಬೈದ್ಂಡ್. ಕುಡ್ಲರ್ದ್ 25 ಕಿ.ಮೀ. ದೂರ ಬೊಕ್ಕ ಕಟೀಲ್ ರ್ದ್ 2 ಕಿ.ಮೀ. ದೂರದ ಪೊರ್ಲು ಜಾಗೆಡ್ ನಂದಿನಿ ತುದೆತ್ತ ಬರಿಟ್ಟ್ ಶ್ರೀ ಉಳ್ಳಾಯ ಕೊಡಮಣಿತ್ತಾಯ ಬೊಕ್ಕ ಪರಿವಾರ ದೈವೊಲು ಸುಮಾರ್ 700 ವರ್ಷದ ಪಿರವುಡು ದೈವ ಭಕ್ತೆರಾಯಿನ ಶಿಬರೂರುಗುತ್ತು ತಿಮ್ಮತ್ತಿ ಕರಿವಾಳ್‌ ರೆನ ಭಕ್ತಿಗ್ ಒಲಿದ್ ನಿಲೆಯಾತಿನ ಇತಿಹಾಸ ಉಂಡು.

ಈ ಕ್ಷೇತ್ರ ಮುಜರಾಯಿ ಇಲಾಖೆಗ್ ಸೇರ್ದಿನ ಎ ಗ್ರೇಡ್ ದೈವಸ್ಥಾನವಾದಿತ್ತ್ ದ್ ಪ್ರತಿ ವರ್ಷ ಡಿಸೆಂಬರ್ ತಿಂಗೊಲ್ದ ಧನು ಸಂಕ್ರಾಂದಿದಾನಿ ಕೊಡಿ ಏರ್ ದ್ ಎಡ್ಮ ದಿನತ್ತ ಜಾತ್ರಾ ಮಹೋತ್ಸವ ನಡತೊಂದು ಲಕ್ಷಾಂತರ ಭಕ್ತೆರೆನ ಆರಾಧ್ಯ ಕೇಂದ್ರವಾದುಂಡು. ತಿಬಾರ್ ದ ಗುವೆಲ್ದ ತೀರ್ಥಗ್ ವಿಷನ್ ಅಮೃತ ಮಲ್ಪುನ ಶಕ್ತಿ ಉಂಡು. 1976 ಇಸ್ವಿಡ್ ತಿಬಾರ್ ಗುತ್ತು ಮುದ್ದಣ್ಣ ಶೆಟ್ರೆನ ಮುತಾಲಿಕೆಡ್ ಕ್ಷೇತ್ರ ಸಂಪೂರ್ಣ ನವೀಕರಣ ಆದಿತ್ತ್ ದ್, 2010 ನೇ ಇಸ್ವಿಡ್ ಕೊಂಜಾಲಗುತ್ತು ಪ್ರಭಾಕರ ಶೆಟ್ರೆನ ಮುತಾಲಿಕೆಡ್ ಊರುದ ಬೊಕ್ಕ ಪರವೂರುದ ಭಕ್ತೆರ್ನ ಸಹಕಾರಡ್ ಸುಮಾರ್ ರೂ. 5 ಕೋಟಿ ಕರ್ಚಿಡ್ ಜೀರ್ಣೋದ್ಧಾರ ಆದ್ ಈ ಸರ್ತಿ ಪೊಸತ್ತ್ ಕೊಡಿಮರ, ಸುತ್ತುಪೌಳಿ ಅಂಚೆನೆ ಬೇತೆ ಬೇತೆ ಅಭಿವೃದ್ಧಿದ ಬೇಲೆನ್ ರೂ. 9 ಕೋಟಿ ಕರ್ಚಿಡ್ ಮಲ್ತೊಂದುಂಡು.

ಹಳೆಯಂಗಡಿ ಮಹಿಳಾ ಮಂಡಲಗ್ “ಕಿತ್ತೂರು ರಾಣಿ ಚೆನ್ನಮ್ಮ” ಪ್ರಶಸ್ತಿ

ಮುಲ್ಕಿ: ಕರ್ನಾಟಕ ರಾಜ್ಯ ಮಹಿಳಾ ಬೊಕ್ಕ ಮಕ್ಕಳ ಅಭಿವೃದ್ದಿ ಇಲಾಖೆದ ಮುತಾಲಿಕೆಡ್ ಬೆಂಗ್ಲೂರ್‌ದ ಜವಾಹರ ಬಾಲಭವನ, ಕಬ್ಬನ್ ಪಾರ್ಕ್‌ಡ್ ನಡತಿನ ಮಹಿಳಾ ದಿನಾಚರಣೆದ ಅಂಗವಾದ್ ಕೊರ್ಪುನಂಚಿನ ಕಿತ್ತೂರ್ ರಾಣಿ ಚೆನ್ನಮ್ಮ ಪ್ರಶಸ್ತಿನ್ ದಕ್ಷಿಣ ಕನ್ನಡ ಜಿಲ್ಲೆದ ಮುಲ್ಕಿ ತಾಲೂಕ್‌ದ ಹಳೆಯಂಗಡಿ ಮಹಿಳಾ ಮಂಡಲ ಸಂಸ್ಥೆಗ್ ಪ್ರದಾನ ಮಲ್ದೆರ್.

ಈ ಪ್ರಶಸ್ತಿನ್ ಸಚಿವೆರ್ ಲಕ್ಷ್ಮೀ ಹೆಬ್ಬಾಳ್ಕರ್ ಮೇರ್ ಹಳೆಯಂಗಡಿ ಮಹಿಳಾ ಮಂಡಲದ ಅಧ್ಯಕ್ಷೆರ್ ರೇಷ್ಮಾ ಮೆರೆಗ್ ಪ್ರಶಸ್ತಿನ್ ಕೊರ್ದು ಮಾನಾದಿಗೆ ಮಲ್ತೆರ್.

ಈ ಪೊರ್ತುಡು ಮಂಡಲದ ಕಾರ್ಯದರ್ಶಿ ಪ್ರೇಮಲತಾ ಯೋಗೀಶ್, ಕೋಶಾಧಿಕಾರಿ ರಾಜೇಶ್ವರಿ ರಾಮನಗರ, ಕ್ರೀಡಾ ಕಾರ್ಯದರ್ಶಿ ನಿರ್ಮಲಾ ಅಂಚನೆ ರತ್ನಾ, ಗೀತಾ ಸುಕುಮಾರ್, ನಫೀಸಾ, ಪ್ರಮೀಳಾ ಇತ್ತೆರ್.

ಬ್ರಹ್ಮಕಲಶೋತ್ಸವದ ತಯಾರಿಡ್ ಬಲ್ಲಂಗುಡೇಲು ಶ್ರೀ ಪಾಡಂಗರೆ ಭಗವತೀ ಕ್ಷೇತ್ರ

ಕೇರಳ ರಾಜ್ಯದ ಕಾಸ್ರೋಡು ಜಿಲ್ಲೆದ ಚಂದ್ರಗಿರಿ ತುದೆ ಬರಿರ್ದ್ ಕರ್ನಾಟಕ ರಾಜ್ಯದ ದಕ್ಷಿಣ ಕನ್ನಡ ಜಿಲ್ಲೆದ ಮೂಲ್ಕಿ ತಾಲೂಕುದ ಸಸಿಹಿತ್ಲು ಮುಟ್ಟ ಇಪ್ಪುನ ಪದ್ನೆನ್ಮ ಭಗವತೀ ಕ್ಷೇತ್ರಲೆಡ್ ಬಲ್ಲಂಗುಡೇಲು ಶ್ರೀ ಪಾಡಂಗರೆ ಭಗವತೀ ಕ್ಷೇತ್ರಲ ಒಂಜಿ.

ಮಂಜೇಶ್ವರ ಕೈತಲ್ದ ಮಜಿಬೈಲ್ ಪನ್ಪಿನ ಪ್ರಕೃತಿ ಪೊರ್ಲುದ ಪಟ್ಟತ್ತಮೊಗರು ಪುಟ್ಟಗ್ರಾಮಡ್ ಬಲ್ಲಂಗುಡೇಲು ಪನ್ಪಿನ ಪುಣ್ಯ ಭೂಮಿಡ್ ಅತೀ ಪುರಾತನ ಕಾರಣಿಕ ಶಕ್ತಿಯಾದ್ ಒವ್ವೇ ಜಾತಿ ಪಂಗಡ ಭೇದ ಇಜ್ಜಂದೆ ಅಸಂಖ್ಯಾತ ಆಸ್ತಿಕ ಭಕ್ತಾದಿಲೆನ ಅಪ್ಪೆಯಾದ್ ಅನ್ನಪೂರ್ಣೇಶ್ವರಿಯಾದ್ ಪೂಜಿಸಾವೊಂದು ಬರೊಂದು ಇಪ್ಪುನ ದೇವತೆ ಶ್ರೀ ಪಾಡಂಗರೆ ಭಗವತಿ ಅಮ್ಮ. ಮೂಲು ಪ್ರದಾನವಾದ್ ನಡಪುನ ಉತ್ಸವಲು “ಮೂಜಿ ಸಂಕ್ರಮಣ,ಸಿಂಹತಿಂಗೊಲುಡು ಮುಪ್ಪ ದಿನ ದೀಪರಾಧನೆ, ಅಭಿಷೇಕ, ನವರಾತ್ರಿ, ತುಲಾ ಮಾಸ ಪತ್ತೆಟ್ಟ್ ತುಲಪುತ್ತರಿ,ಏಳ್ ದಿನತ್ತ ಕಳಿಯಾಟ ಉತ್ಸವ, ಒಂಜಿ ದಿನತ್ತ ವಿಷು ಸಂಕ್ರಮಣ ಬೊಕ್ಕ ಪತ್ತನಾಜೆಡ್” ಭಕ್ತ ಜನಕ್ಕುಲು ಭಕ್ತಿರ್ದ್ ನೆರವೇರಿಸಾವೊಂದು ಇಪ್ಪುನ ಸರ್ವವೇದ್ಯ.

ಬಲ್ಲಂಗುಡೇಲು ಶ್ರೀ ಭಗವತೀ ಕ್ಷೇತ್ರಗ್ ನೂದು ವರ್ಷದ ಇತಿಹಾಸ ಉಂಡು. ಅಂಚೆನೆ ವಿಶೇಷವಾಯಿನ ಪರಪೋಕು ಉಂಡು. ಕರಿನ ವರ್ಷದ (2023) ಕಳಿಯಾಟ ಮಹೋತ್ಸವದ ಪೊರ್ತುಡು ಕ್ಷೇತ್ರ ಅಜೀರ್ಣಾವಸ್ಥೆಡ್ ಇತ್ತ್ ದ್ ಅತೀ ಶೀಘ್ರಡ್ ಪುನರ್ ನಿರ್ಮಾಣ ಮಲ್ಪೊಡು ಪಂದ್ ಶ್ರೀ ಭಗವತೀ ಅಪ್ಪೆನ ನುಡಿ ಆದಿತ್ತ್ಂಡ್. ಮಾತ್ರ ಅತ್ತಂದೆ ಸಾಂಪ್ರದಾಯಿಕವಾದ್ ಶ್ರೀ ಭಗವತೀ ಮಾತೆ ಸೇರಿನ ಭಕ್ತ ಜನಕ್ಲೆರ್ದೆ ಮೂಲಧನ ಸಂಗ್ರಹ ಮಲ್ತ್ ಅನುಗ್ರಹ ಮಲ್ತ್ ದೆರ್. ಆ ಪ್ರಕಾರ ಶ್ರೀ ಕ್ಷೇತ್ರದ ತಂತ್ರಿಲೆನ ಮಾರ್ಗದರ್ಶನ ,ಗ್ರಾಮದ ಮುಖ್ಯಸ್ಥೆರ್ ಅಚಾರಪಟ್ಟ, ಗುರಿಕಾರೆರ್,ಮೂಜಿ ಗ್ರಾಮದ ಪತ್ತ್ ಸಮಸ್ತೆರ್ ಸೇರ್ದ್ ಅಷ್ಟಮಂಗಲ ಪ್ರಶ್ನೆ ಚಿಂತನೆ ಮಲ್ತೆರ್. ಪ್ರಶ್ನೆ ಚಿಂತನೆಡ್ ಕ್ಷೇತ್ರ ಪುನರ್ ನಿರ್ಮಾಣ ಅತ್ತಂದೆ ಅವೆತ ಕೈತಲ್ ಇಪ್ಪುನ ವೀರಪುತ್ರ ದೈವದ ಕ್ಷೇತ್ರನ್ಲ ಪುನರ್ ನಿರ್ಮಾಣ ಮಲ್ಪೊಡು ಪಂದ್ ತೋಜಿದ್ ಬತ್ತ್ಂಡ್.

ಶ್ರೀ ಕ್ಷೇತ್ರಡ್ ವೀರಪುತ್ರ ದೈವಗ್ ವಿಶೇಷವಾಯಿನ ಹಿನ್ನೆಲೆ ಉಂಡು. ಶ್ರೀ ಪಾಡಂಗರೆ ಭಗವತೀ ನೆಲೆ ಆವೊಡಾಂಡ ಸುರುಕ್ಕು ಬಲ್ಲಂಗುಡೇಲು ಪನ್ಪುನ ಪುಣ್ಯ ಭೂಮಿನ್ ಆಯ್ಕೆ ಮಲ್ತಿನ ವೀರಭದ್ರ ದೈವ ಪನ್ಪುನ ಇತಿಹಾಸ ಉಂಡು. ಅಂಚಾದ್ ಶ್ರೀ ಪಾಡಂಗರೆ ಭಗವತೀ ಕ್ಷೇತ್ರದ ಕೈತಲ್ ಡ್ ದೇವಸ್ಥಾನ ಬೊಕ್ಕ ಸುರುತ ಸ್ಥಾನನ್ ಪಡೆಯೊಂದುಂಡು.

ಈ ಸರ್ತಿ ಫೆ. 24 ರ್ದ್ ಫೆ.26 ಮುಟ್ಟ ಶ್ರೀ ಪಾಡಂಗರೆ ಮಾತೆನ ಬೊಕ್ಕ ಶ್ರೀ ವೀರಪುತ್ರ ದೈವದ ಅಂಚನೆ ಪರಿವಾರ ದೈವದ ಪುನರ್ ಪ್ರತಿಷ್ಠಾ ಬ್ರಹ್ಮಕಲಶೋತ್ಸವ ಶ್ರೀ ಕ್ಷೇತ್ರದ ತಂತ್ರಿವರ್ಯರಾಯಿನ ಡಾ.ರಾಮಚಂದ್ರ ಪದಕಣ್ಣಾಯರೆನ ನೇತೃತ್ವಡ್, ಶ್ರೀ ಶ್ರೀ ಯೋಗಾನಂದ ಸರಸ್ವತಿ ಸ್ವಾಮೀಜಿ ಕೊಂಡೆವೂರು ಮೆರೆನ ಶುಭಾಶೀರ್ವಾವಾದದೊಟ್ಟಿಗೆ ಬ್ರಹ್ಮಕಲಶೋತ್ಸವ ಸಮಿತಿದ ಗೌರವಾಧ್ಯಕ್ಷೆರಾಯಿನ ಸದಾಶಿವ ಶೆಟ್ಟಿ ಕುಳೂರು ಕನ್ಯಾನ,ಬ್ರಹ್ಮಕಲಶೋತ್ಸವ ಸಮಿತಿದ ಅಧ್ಯಕ್ಷೆರ್ ಗೋಪಾಲ ಎಂ .ಬಂದ್ಯೋಡು ಬೊಕ್ಕ ಊರಪರವೂರ ಮಾತೆನ ಭಕ್ತೆರೆನ ಉಪಸ್ಥಿತಿಟ್ಟ್ ನಡಪೆರೆ ಉಂಡು.

ಕಾರ್ಯಕ್ರಮತ್ತ ವಿವರ
ಫೆ.24 ತಾರೀಕ್ ದಾನಿ ಮಧ್ಯಾಹ್ನ 2.30 ಕ್ಕ್ ಹಸಿರುವಾಣಿ ಹೊರೆ ಕಾಣಿಕೆದ ಭವ್ಯ ಶೋಭಯಾತ್ರೆ.ಶೋಭಯಾತ್ರೆದ ಚಾಲನೆನ್ ಶ್ರೀ ನಾರಾಯಣ ಭಗವತೀ ಪೂಜಾರಿ ಪಟ್ಟತ್ತೂರು ಮಲ್ಪೆರೆ ಉಲ್ಲೆರ್.ಶ್ರೀ ಪಾಡಂಗರೆ ಭಗವತೀ ಭಜನಾ ಸಂಘ ಪಟ್ಟತ್ತೂರು (ತೃಪ್ತಿ ಬಳಗದಕ್ಲೆನ) ಕುಣಿತ ಭಜನೆ. ಬಯ್ಯ 6 ಗಂಟೆಗ್ ತಂತ್ರಿವರ್ಯೆರ್ ,ಋತ್ವಿಜರೆಗ್ ಬೊಕ್ಕ ಕೊಂಡೆವೂರು ಶ್ರೀ ಶ್ರೀ ಯೋಗಾನಂದ ಸರಸ್ವತಿ ಸ್ವಾಮೀಜಿಗ್ ಪೂರ್ಣ ಕುಂಭ ಸ್ವಾಗತ, ಬಯ್ಯ 6.30 ಕ್ಕ್ ಧಾರ್ಮಿಕ ಸಭಾ ಕಾರ್ಯಕ್ರಮಡ್ ಕೊಂಡೆವೂರು ಸ್ವಾಮೀಜಿರ್ದ್ ಆಶೀರ್ವಚನ, ಕ್ಷೇತ್ರದ ತಂತ್ರಿವರ್ಯೆರ್ ಮೂಡುಮನೆ ಡಾ.ಶ್ರೀ ಅಶೋಕ್ ರಾಮಚಂದ್ರ ಪದಕಣ್ಣಯ ತುಡರ್ ಅರ್ಲಾಯೆರೆ ಉಲ್ಲೆರ್. ಲೇಸ್ ದ ಗುರ್ಕಾರ್ಮೆನ್ ರವೀಂದ್ರ ಶೆಟ್ಟಿ ಕರಿಬೈಲ್ ವಹಿಸೆರೆ ಉಲ್ಲೆರ್.

ಫೆ. 25 ಮಧ್ಯಾಹ್ನ 12 ಗಂಟೆಗ್ ಚಂಡಿಕಾ ಹೋಮ, ಪ್ರಸಾದ ವಿತರಣೆ ಬೊಕ್ಕ ಕಾಂಡೆ 10 ಗಂಟೆಗ್ ಧಾರ್ಮಿಕ ಸಭಾ ಕಾರ್ಯಕ್ರಮಡ್ ಶ್ರೀ ಶ್ರೀ ಮೋಹನದಾಸ್ ಪರಮಹಂಸ ಸ್ವಾಮೀಜಿ ಶ್ರೀ ಧಾಮ ಮಾಣಿಲ ಆಶೀರ್ವಚನ ಮಲ್ಪರೆ ಉಲ್ಲೆರ್. ಈ ಲೇಸ್ ದ ಉದಿಪನನ್ ಶ್ರೀ ಶ್ರೀ ಯೋಗಾನಂದ ಸರಸ್ವತಿ ಸ್ವಾಮೀಜಿ ಮಲ್ಪೆರೆ ಉಲ್ಲೆರ್‌.
ಮಧ್ಯಾಹ್ನ ಸಾಂಸ್ಕೃತಿಕ ಕಾರ್ಯಕ್ರಮದ ಅಂಗವಾದ್ ಶಿಲ್ಪಾ ಭಟ್ ಬೊಕ್ಕ ಶಿಷ್ಯೆರೆರ್ದ್ ಕರ್ನಾಟಕ ಶಾಸ್ತ್ರೀಯ ಸಂಗೀತ ಕಾರ್ಯಕ್ರಮ , ಬಯ್ಯಗ್ 4 ಗಂಟೆಗ್ ಶ್ರೀ ದುರ್ಗಾಪರಮೇಶ್ವರಿ ಮಹಿಳಾ ಸಂಘ ಬೊಕ್ಕ ಶ್ರೀ ಶಾಸ್ತಾ ಫ್ರೆಂಡ್ಸ್ ಕಡಂಬಾರ್ ಮೇರೆನ ಪ್ರಾಯೋಜಕತ್ವಡ್ ಶ್ರೀ ಚೌಕಾರು ಮಂತ್ರವಾದಿ ಗುಳಿಗ ದೇವಸ್ಥಾನದ ಶ್ರೀ ಶಾಸ್ತಾ ಯಕ್ಷಗಾನ ಕಲಾ ಸಂಘದ ಜೋಕ್ಲೆರ್ದ್ “ಮೋಕ್ಷ ಸಂಗ್ರಾಮ” ಯಕ್ಷಗಾನ ನಡಪೆರೆ ಉಂಡು. ರಾತ್ರಿ 8.30 ರ್ದ್ ಬೇತೆ ಬೇತೆ ಭಜನಾ ಸಂಘರ್ದ್ ಭಜನಾ ಕಾರ್ಯಕ್ರಮ ನಡಪೆರೆ ಉಂಡು.

ಫೆ.26 ಕಾಂಡೆ 8 ಗಂಟೆಗ್ ಗಣಹೋಮ 109 ಕಲಶ,ಪುಣ್ಯಹವಾಚನ, ಕಾಂಡೆ 11.17 ತ್ತ ವೃಷಭ ಲಗ್ನದ ಮೂರ್ತಡ್ ಶ್ರೀ ಪಾಡಂಗರೆ ಭಗವತೀ ಮಾತೆನ ಬೊಕ್ಕ ವೀರಪುತ್ರ ದೈವದ ಬ್ರಹ್ಮಕಲಶಾಭಿಷೇಕ, ಕಾಂಡೆ 9 ಗಂಟೆಗ್ ಧಾರ್ಮಿಕ ಸಭಾಕಾರ್ಯಕ್ರಮಡ್ ಕೊಂಡೆವೂರು ಸ್ವಾಮಿಲೆರ್ದ್ ಆಶೀರ್ವಚನ ನಡಪೆರೆ ಉಂಡು. ಅಧ್ಯಕ್ಷತೆನ್ ಬ್ರಹ್ಮಕಲಶೋತ್ಸವ ಸಮಿತಿದ ಅಧ್ಯಕ್ಷೆರಾಯಿನ ಗೋಪಾಲ ಬಂದ್ಯೋಡು ವಹಿಸೆರೆ ಉಲ್ಲೆರ್. ಸಭೆತ್ತ ಉದಿಪನನ್ ಬ್ರಹ್ಮಕಲಶೋತ್ಸವ ಸಮಿತಿದ ಗೌರವಾಧ್ಯಕ್ಷೆರ್ ಸದಾಶಿವ ಶೆಟ್ಟಿ ಕುಳೂರು ಕನ್ಯಾನ ವಹಿಸೆರೆ ಉಲ್ಲೆರ್. ವಿಶ್ವರೂಪಿಣಿ ಸ್ಮರಣ ಸಂಚಿಕೆನ್ ಮುಂಡಪಲ್ಲ ಕ್ಷೇತ್ರದ ಆಡಳಿತ ಮೊಕ್ತೇಸೆರಾಯಿನ ಕೆ.ಕೆ.ಶೆಟ್ಟಿ ಮುಂಡಪಲ್ಲ ಬಿಡುಗಡೆ ಮಲ್ಪೆರೆ ಉಲ್ಲೆರ್. ಮಲ್ಲ ಬಿನ್ನೆರಾದ್ ಕಾಸ್ರೋಡು ಸಂಸದೆರಾಯಿನ ರಾಜ್ ಮೋಹನ್ ಉಣ್ಣಿತ್ತಾನ್,ಪುತ್ತೂರು ಶಾಸಕೆರ್ ಅಶೋಕ್ ಕುಮಾರ್ ರೈ, ಮಂಜೇಶ್ವರ ಶಾಸಕೆರ್ ಎ.ಕೆ.ಎಂ.ಅಶ್ರಫ್, ಉದ್ಯಮಿಲಾಯಿನ ಕೆ.ಡಿ.ಶೆಟ್ಟಿ ದಡ್ಡಂಗಡಿ, ಕೃಷ್ಣ ಎನ್.ಉಚ್ಚಿಲ್, ಭಿಷಜಾಕ್ಷಿ ಭಂಡಾರಮನೆ, ಮೋಹನ್ ಶೆಟ್ಟಿ ಮಜ್ಜಾರ್,ಕೆ. ಆರ್.ಜಯಾನಂದ,ಅಶೋಕ್ ಕುಮಾರ್ ಕತಾರ್, ಕಲಾ ರತ್ನ ಶಂನಾಡಿಗ ಕುಂಬಳೆ,ಐಲ ಕ್ಷೇತ್ರದ ಆಡಳಿತ ಮೊಕ್ತೇಸರೆರ್ ನಾರಾಯಣ ಹೆಗ್ಡೆ ಕೋಡಿಬೈಲ್,ಶ್ರೀಧರ ಶೆಟ್ಟಿ ಗುಬ್ಬೆ ಕನ್ಯಾನ,ಮುಳಿಂಜ ಕ್ಷೇತ್ರದ ಅಧ್ಯಕ್ಷೆರ್ ಹರಿನಾಥ ಭಂಡಾರಿ,ಪಟ್ಟತ್ತೂರು ಜುಮಾ ಮಸೀದಿದ ಅಧ್ಯಕ್ಷೆರ್ ಅಬ್ದುಲ್ಲ ಕೆ.,ಕುಞಿರಾಮನ್ ಶಿಲ್ಪಿ ನೆಲ್ಲಿಕಟ್ಟೆ ಅಧಿಗುಳಿ,ಕನಿಲ ಭಗವತೀ ಕ್ಷೇತ್ರದ ಅಧ್ಯಕ್ಷೆರ್ ವಿಶ್ವನಾಥ ಕುದೂರು, ಉಪ್ಪಳ ಭಗವತೀ ಕ್ಷೇತ್ರದ ಅಧ್ಯಕ್ಷೆರ್ ಸುಕುಮಾರ ಉಪ್ಪಳ, ಆರಿಕಾಡಿ ಆಲಿ ಚಾಮುಂಡಿ ಕ್ಷೇತ್ರದ ಅಧ್ಯಕ್ಷೆರ್ ಕರುಣಾಕರ,ಐಲ ಗತ್ಯಮ್ಮ ಭಗವತೀ ಕ್ಷೇತ್ರದ ಅಧ್ಯಕ್ಷೆರ್ ಆನಂದ ಎನ್.ಐಲ ಪಾಲ್ ಪಡೆಯೆರೆ ಉಲ್ಲೆರ್.

ಸಾಂಸ್ಕೃತಿಕ ಕಾರ್ಯಕ್ರಮದ ಅಂಗವಾದ್ ಮಧ್ಯಾಹ್ನ 2.30 ಗ್ ವಿಷ್ಣು ಯಕ್ಷ ಬಳಗ ಮಜಿಬೈಲ್ ಮೊಕ್ಲೆರ್ದ್ “ಸಪ್ತ ದುರ್ಗೆಯೆರ್” ಯಕ್ಷಗಾನ ತಾಳ ಮದ್ದಳೆ ಬೊಕ್ಕ ರಾತ್ರಿ 8 ಗಂಟೆರ್ದ್ ತ್ರಿಶೂಲ್ ಫ್ರೆಂಡ್ಸ್‌ ಸಂತಡ್ಕ ಆಯೋಜನೆದ ಶ್ರೀ ಶಿರಿಡಿ ಸಾಯಿಬಾಬ ಮಂದಿರ ಸಾಯಿಶಕ್ತಿ ಕಲಾ ಬಳಗ ಉರ್ವ ಚಿಲಿಂಬಿ‌ ಮೊಕ್ಲೆರ್ದ್ “ಬೊಳ್ಳಿಮಲೆತ ಶಿವಶಕ್ತಿಲು” ತುಳು ಪೌರಾಣಿಕ ನಾಟಕ ನಡಪೆರೆ ಉಂಡು.

🖋️ ವಿಜಯಕುಮಾರ್ ಶೆಟ್ಟಿ ಗಾಣದಮೂಲೆ ಮಜಿಬೈಲ್ (ದುಬೈ)

You Missed