Fri. Nov 20th, 2026

ಕುಡ್ಲದ ಸುದ್ದಿ | Mangalore News

ನ.20-22 : ಕರಂಬಾರು ಶ್ರೀ ಮಾರಿಯಮ್ಮ ಕೋಟೆ ಬಬ್ಬುಸ್ವಾಮಿ ದೈವಸ್ಥಾನಡ್ ವರ್ಷಾವಧಿ ಮಾರಿಪೂಜೆ, ನೇಮೋಚ್ಚಯ

ಕುಡ್ಲ : ಕರಂಬಾರು ಶ್ರೀ ಮಾರಿಯಮ್ಮ ಕೋಟೆ ಬಬ್ಬುಸ್ವಾಮಿ ಬೊಕ್ಕ ಪರಿವಾರ ದೈವೊಲೆನ ದೈವಸ್ಥಾನಡ್ ನ.20-22 ಮುಟ್ಟ ವರ್ಷಾವಧಿ ಮಾರಿಪೂಜೆ ಬೊಕ್ಕ ನೇಮೋತ್ಸವ ನಡಪರೆ ಉಂಡು.
ನ.20 ಗು ರಾತ್ರಿ 9 ಗಂಟೆರ್ದ್ ಮಾರಿ ಪೂಜೆ ನಡಪರೆ ಉಂಡು. ನ. 21 ಶನಿವಾರ ರಾತ್ರೆ 10.30 ಗಂಟೆರ್ದ್ ಕೋಟೆ ಬಬ್ಬುಸ್ವಾಮಿ ದೈವದ ಗಗ್ಗರ ಸೇವೆ ಬೊಕ್ಕ 2.30 ಗಂಟೆರ್ದ್ ತನ್ನಿಮಾನಿಗ ದೈವದ ಗಗ್ಗರ ಸೇವೆ ನಡಪರೆ ಉಂಡು.
ನ.22 ಐತಾರ ರಾತ್ರೆ 7.30 ಗಂಟೆರ್ದ್ ಪಂಜುರ್ಲಿ ಗುಳಿಗ ದೈವದ ಗಗ್ಗರ ಸೇವೆ ಬೊಕ್ಕ ರಾತ್ರೆ 12 ಗಂಟೆರ್ದ್ ರಾಹು ಗುಳಿಗ ದೈವದ ಗಗ್ಗರ ಸೇವೆ ನಡಪರೆ ಉಂಡು. ಈ ಸೇವೆಡ್ ಮಾತೆರ್ಲ ಬತ್ತ್‌ದ್ ಪಾಲ್ ಪಡೆವೊಡು ಪಂಡ್‌ದ್ ಕರಂಬಾರು ಶ್ರೀ ಮಾರಿಯಮ್ಮ ಕೋಟೆ ಬಬ್ಬುಸ್ವಾಮಿ ಸೇವಾ ಸಮಿತಿದ ಅಧ್ಯಕ್ಷೆರ್, ಸರ್ವಸದಸ್ಯೆರ್, ಜೋಯಿಸೆರ್, ಕರಂಬಾರು ಗುತ್ತು ಗುರಿಕಾರೆರ್, ಅರ್ಚಕ ವೃಂದ ಬೊಕ್ಕ ಗ್ರಾಮಸ್ಥೆರ್ ಬಿನ್ನಾಪು ಮಲ್ದೆರ್.

ಕಮ್ಮಿ ಅವಧಿಡ್ ಪ್ರಿಯದರ್ಶಿನಿದ ಸಾಧನೆ ಮಸ್ತ್ ಮಲ್ಲ : ಶಕೀಲಾ ಶೆಟ್ಟಿ

ಕಿನ್ನಿಗೋಳಿ: ಕೇವಲ ಐನ್ ವರ್ಸ ಪಿರ ಸುರು ಆಯಿನ ಪ್ರಿಯದರ್ಶಿನಿ ಕೋ-ಆಪರೇಟಿವ್ ಸೊಸೈಟಿ ಕಮ್ಮಿ ಅವಧಿಡ್ ಅಭಿವೃದ್ಧಿ ಸಾಧನೆ ಮಲ್ದಿನವು ಪುಗಾರ್ತೆದ ವಿಚಾರ . ಈ ಸಾಧನೆದ ಪಿರಾವು ಆಡಳಿತ ಮಂಡಳಿದ ನಿರ್ದೇಶಕೆರ್ ಬೊಕ್ಕ ಸಿಬ್ಬಂದಿಲೆನ ಪರಿಶ್ರಮ ಬೊಕ್ಕ ಬದ್ಧತೆ ಪ್ರಮುಖ ಪಾತ್ರ ಉಂಡು . ಸ್ಥಳೀಯವಾದ್ ಗ್ರಾಹಕೆರೆಗ್ ಎಡ್ಡೆ ಸ್ಪಂದನೆ ಬೊಕ್ಕ ಆತ್ಮೀಯ ಸೇವೆ ಕೊರ್ಪುನ ಸಿಬ್ಬಂದಲೆನ ಶ್ರಮ ಬೊಕ್ಕ ಬದ್ಧತೆಡ್ ಸೊಸೈಟಿ ಈ ಮಟ್ಟಗ್ ಬುಲೆಯರೇ ಸಾಧ್ಯ ಅತುಂಡ್ . ಉಂದೆ ರೀತಿದ ಜನಸ್ನೇಹಿ ಸೇವೆ ಬೊಕ್ಕ ಅಭಿವೃದ್ಧಿದ ಪಥಟ್ ಸೊಸೈಟಿ ದುಂಬು ಪೋವಡ್ ಪಂದ್ ಪಡುಪಣಂಬೂರು ಸಹಕಾರಿ ವ್ಯವಸಾಯಿಕ ಸೊಸೈಟಿ ಲಿಮಿಟೆಡ್‌ದ ನಿವೃತ್ತ ಅಧಿಕಾರಿ ಶಕೀಲಾ ಶೆಟ್ಟಿ ಪಂಡೆರ್.
ಆರ್ ಪ್ರಿಯದರ್ಶಿನಿ ಕೋ-ಆಪರೇಟಿವ್ ಸೊಸೈಟಿದ ಕಿನ್ನಿಗೋಳಿ ಶಾಖೆಡ್ ಸಹಕಾರ ಸಪ್ತಾಹ 2026ತ ಅಂಗವಾದ್ ಅಟ್ಟನೆ ಮಲ್ದಿನ ಪೆರಿಯ ಸಹಕಾರಿಲೆಗ್ ಗೌರವ ಸಮರ್ಪಣೆ ಕಾರ್ಯಕ್ರಮಡ್ ಮಾನಾದಿಗೆ ಮಲ್ತ್ ಪಾತೆರಿಯೆರ್.
ಕಾರ್ಯಕ್ರಮದ ಮಲ್ಲ ಬಿನ್ನೆರಾದ್ ಪಾಲ್ ಪಡೆಯಿನ ಜ್ಯೋತಿ ಆಪ್ಟಿಕಲ್ಸ್ ಕಿನ್ನಿಗೋಳಿದ ಮಾಲಕೆರ್ ನೋಯೆಲ್ ನವೀನ್ ಮೆಂಡೋನ್ಸ ಪಾತೆರಿಯೆರ್ .
ಈ ಪೊರ್ತುಡು ಸಹಕಾರ ಕ್ಷೇತ್ರಡ್ ದೀರ್ಘಕಾಲ ಸೇವೆ ಸಂದಾಯಿನ ಪೆರಿಯ ಸಹಕಾರಿಲಾಯಿನ ಕಿನ್ನಿಗೋಳಿ ವ್ಯವಸಾಯ ಸೇವಾ ಸಹಕಾರಿ ಬ್ಯಾಂಕ್‌ದ ನಿವೃತ್ತ ಮುಖ್ಯ ಕಾರ್ಯನಿರ್ವಹಣಾಧಿಕಾರಿ ತೆರೇಸಾ ಬೊಕ್ಕ ಕಿನ್ನಿಗೋಳಿ ವ್ಯವಸಾಯ ಸೇವಾ ಸಹಕಾರಿ ಬ್ಯಾಂಕ್‌ದ ನಿವೃತ್ತ ವ್ಯವಸ್ಥಾಪಕ ಶೇಖರ್ ಮಾಡ ಮೊಕುಲೆಗ್ ಮಾನಾದಿಗೆ ಮಲ್ತೆರ್.
ಕಾರ್ಯಕ್ರಮದ ಗುರ್ಕಾ. ರ್ಮೆ ವಹಿಸೊಂದು ಸೊಸೈಟಿದ ಗುರ್ಕಾರ್ಲು ಸಹಕಾರ ರತ್ನ ಎಚ್. ವಸಂತ್ ಬೆರ್ನಾರ್ಡ್ ಮೇರ್ ಪ್ರಾಸ್ತವಿಕವಾದ್ ಪಾತೆರಿಯೆರ್ ಮಾತನಾಡಿದರು. ನಿರ್ದೇಶಕೆರ್ ಧನಂಜಯ ಮಟ್ಟು ಬೊಕ್ಕ ರೇಖಾ ಶೆಟ್ಟಿ ಉಪಸ್ಥಿತರಿತ್ತೆರ್ .
ಶಾಖಾ ಪ್ರಬಂಧಕಿ ಅಕ್ಷತಾ ಶೆಟ್ಟಿ ಎದ್ಕೊಂದು ಕಾರ್ಯಕ್ರಮ ನಿರೂಪಣೆ ಮಲ್ತೆರ್ . ಮುಖ್ಯ ಕಾರ್ಯನಿರ್ವಹಣಾಧಿಕಾರಿ ಸುದರ್ಶನ್ ಪೂಜಾರಿ ಸೊಲ್ಮೆ ಸಂದಾಯ ಮಲ್ತೆರ್. ಸಿಬ್ಬಂದಿಲಾಯಿನ ಕ್ಯಾರಲ್ ಡಿಸೋಜಾ ಬೊಕ್ಕ ದೀಪಕ್ ಮೊಕುಲು ಮಾನಾದಿಗೆ ಓಲೆ ಓದಿಯೆರ್.

ಯುವವಾಹಿನಿದ ಪೊಸ ಆಡಳಿತ ಕಚೇರಿ ಉದಿಪನ

ಕುಡ್ಲ : ಯುವವಾಹಿನಿ (ರಿ.) ಕೇಂದ್ರ ಸಮಿತಿದ ಮಸ್ತ್ ದಿನೊತ್ತ ಕನ ಆದಿತ್ತಿನ ಪೊಸ ಆಡಳಿತ ಕಚೇರಿದ ಉದಿಪನ ಲೇಸ್ ನ.15 ಕ್ಕ್ ಐತಾರ ಕುಡ್ಲದ ವಿದ್ಯಾನಗರ, ಪಂಜಿಮೊಗರು ಪ್ರದೇಶಡ್ ಸರಕಾರರ್ದ್ ಮಂಜೂರಾತಿನ ಸಂಸ್ಥೆದ ಸ್ವಂತ ನಿವೇಶನಡ್ ನಡತ್ಂಡ್.
ಪರಮಪೂಜ್ಯ ಶ್ರೀ ವಿಖ್ಯಾತಾನಂದ ಸ್ವಾಮೀಜಿಲೆನ ಆಶೀರ್ವಚನದೊಟ್ಟಿಗೆ ನಡತಿನ ಲೇಸ್ ಡ್ ಕರ್ನಾಟಕ ಪ್ರದೇಶ ಕಾಂಗ್ರೆಸ್ ಸಮಿತಿದ ಅಧ್ಯಕ್ಷೆರ್ ಬಿ.ಕೆ. ಹರಿಪ್ರಸಾದ್ ಮೇರ್ ಪೊಸ ಆಡಳಿತ ಕಚೇರಿನ್ ಉದಿಪನ ಮಲ್ತೆರ್. ಶಾಸಕೆರ್ ಡಾ.ವೈ.ಭರತ್ ಶೆಟ್ಟಿ ಮೇರ್ ಸಭಾ ಲೇಸ್ ನ್ ಉದಿಪನ ಮಲ್ತೆರ್. ಕುದ್ರೋಳಿ ಶ್ರೀ ಗೋಕರ್ಣನಾಥ ಕ್ಷೇತ್ರದ ಕ್ಷೇತ್ರಾಡಳಿತ ಮಂಡಳಿ ಅಧ್ಯಕ್ಷೆರ್ ಜೈರಾಜ್ ಎಚ್. ಸೋಮಸುಂದರಂ ಮೇರ್ ಗುರು ಸಾನಿಧ್ಯಡ್ ತುಡರ್ ಅರ್ಲಾಯೆರ್. ಕುದ್ರೋಳಿ ಶ್ರೀ ಗೋಕರ್ಣನಾಥ ಕ್ಷೇತ್ರದ ಕೋಶಾಧಿಕಾರಿ ಪದ್ಮರಾಜ್ ಆರ್. ಪೂಜಾರಿ ನಾಮಫಲಕನ್ ಅನಾವರಣ ಮಲ್ತೆರ್.

ಯುವವಾಹಿನಿ (ರಿ.) ಕೇಂದ್ರ ಸಮಿತಿದ ಅಧ್ಯಕ್ಷೆರ್ ಅಶೋಕ್ ಕುಮಾರ್ ಪಡ್ಪು ಮೇರ್ ಲೇಸ್ ದ ಅಧ್ಯಕ್ಷತೆನ್ ಒಯಿಸೊಂದು ಪ್ರಾಸ್ತಾವಿಕವಾದ್ ಪಾತೆರ್ದ್, ಸಂಸ್ಥೆದ 40 ವರ್ಷಲೆನ ಸಂಘಟನಾ ಪಯಣ, ಸ್ವಂತ ಆಡಳಿತ ಕಚೇರಿದ ನಿರ್ಮಾಣದ ಕನ ಬೊಕ್ಕ ಅವೆನ್ ನನಸ್ ಮಲ್ಪೆರೆ ಸಹಕಾರ ಮಲ್ತಿನ ದಾನಿಲು, ಸಮಾಜದ ಬಂಧುಲು ಬೊಕ್ಕ ಸಂಘಟನೆದ ಪದುಕೆರೆನ ಕೊಡುಗೆನ್ ನೆಂಪು ಮಲ್ತ್ ದ್ ಮಾತೆರೆನ್ಲ ಎದ್ಕೊನಿಯೆರ್.
ಆಶೀರ್ವಚನ ಕೊರ್ನ ಪರಮಪೂಜ್ಯ ಶ್ರೀ ವಿಖ್ಯಾತಾನಂದ ಸ್ವಾಮೀಜಿ, ಸಮಾಜದ ಉನ್ನತಿ ಬೊಕ್ಕ ಮಾನವೀಯ ಮೌಲ್ಯಲೆನ ವೃದ್ಧಿಗ್ ಸಂಘಟಿತ ಪ್ರಯತ್ನ ಅತ್ಯಗತ್ಯ. ಶಿಕ್ಷಣ, ಸಂಸ್ಕಾರ ಬೊಕ್ಕ ಸೇವೆದ ಮುಕೇನ ಜವನೆರೆನ್ ಸಮಾಜ ಅಭಿವೃದ್ಧಿಗಾದ್ ತಯಾರಿ ಮಲ್ಪುನ ಕಾರ್ಯಡ್ ಯುವವಾಹಿನಿದ ಸೇವೆ ಮೆಚ್ಚೊಡಾಯಿನವು ಪಂದ್ ಎಡ್ಡೆಪ್ಪು ಬಯಕಿಯೆರ್.
ಮಲ್ಲ ಬಿನ್ನೆರಾದ್ ಮೆಸ್ಕಾಂ ಅಧ್ಯಕ್ಷೆರ್ ಕೆ.ಹರೀಶ್ ಕುಮಾರ್, ಬಿಲ್ಲವರ ಮಹಾ ಮಂಡಲದ ಅಧ್ಯಕ್ಷೆರ್ ಸೂರ್ಯಕಾಂತ್ ಜೆ. ಸುವರ್ಣ ಸೇರಿನಂಚೆನೆ ಸಮಾಜದ ಬೇತೆ ಬೇತೆ ಕ್ಷೇತ್ರದಕುಲು ಬೊಕ್ಕ ಗೌರವ ಉಪಸ್ಥಿತಿಡ್ ಕುಡ್ಲ ಮಹಾನಗರ ಪಾಲಿಕೆದ ನಿಕಟಪೂರ್ವ ಸದಸ್ಯೆರ್ ಅನಿಲ್ ಕುಮಾರ್, ರೋಹಿತ್ ಅಮೀನ್, ಸುಮಂಗಲಾ, ಮಾಜಿ ಸದಸ್ಯೆರ್ ದೀಪಕ್ ಪೂಜಾರಿ, ವಿಕಾಸ್ ಕಾಲೇಜ್ ದ ಟ್ರಸ್ಟಿಲು ಸೂರಜ್ ಕಲ್ಯಾ, ಡಾ.ಕಿರಣ್ ಕುಮಾರ್, ರಮೇಶ್ ಪೂಜಾರಿ ಚೇಳಾರ್, ವಿದ್ಯಾನಗರ ಶ್ರೀ ಕೃಷ್ಣ ಭಜನಾ ಮಂದಿರದ ಅಧ್ಯಕ್ಷೆರ್ ಸುನೀಲ್ ಭಂಡಾರಿ, ಯುವವಾಹಿನಿ ಗೌರವ ಸಲಹೆಗಾರೆರ್ ಟಿ.ಎನ್. ಪೂಜಾರಿ ಬೊಕ್ಕ ಡಾ. ಎನ್.ಟಿ. ಅಂಚನ್ ಸೇರಿನಂಚೆನೆ ಮಸ್ತ್ ಬಿನ್ನೆರ್ ಪಾಲ್ ಪಡೆದಿತ್ತೆರ್.
ಯುವವಾಹಿನಿ ಕಟ್ವಾನ ಸಮಿತಿದ ಸಂಚಾಲಕೆರ್ ಹರೀಶ್ ಕೆ. ಪೂಜಾರಿ ಸೊಲ್ಮೆ ಸಂದಾಯೆರ್. ರೇಣುಕಾ ಕಣಿಯೂರು ಲೇಸ್ ನ್ ಸುಧಾರಿಕೆ ಮಲ್ತೆರ್. ಯುವವಾಹಿನಿ ಕೇಂದ್ರ ಸಮಿತಿದ ಪ್ರಧಾನ ಕಾರ್ಯದರ್ಶಿ ರೇಖಾ ಗೋಪಾಲ್, ಕೋಶಾಧಿಕಾರಿ ಸತೀಶ್ ಕಿಲ್ಪಾಡಿ, ಯುವವಾಹಿನಿ ಕಟ್ವಾನ ಸಮಿತಿದ ಕಾರ್ಯದರ್ಶಿ ಜಗದೀಶ್ ಸುವರ್ಣ, ಕೋಶಾಧಿಕಾರಿ ಜಗದೀಶ್ಚಂದ್ರ ಡಿ ಕೆ ಪಾಲ್ ಪಡೆದಿತ್ತೆರ್.

ಮಂಗಳ ಕ್ರೀಡಾಂಗಣದ ಅಭಿವೃದ್ಧಿಗ್ ಸಚಿವೆರ್ ಯು.ಟಿ. ಖಾದರ್, ಮುಡಾ ಅಧ್ಯಕ್ಷೆರೆರ್ದ್ ಜಾಗೆ ಪರಿಶೀಲನೆ

ಕುಡ್ಲ : ದಕ್ಷಿಣ ಕನ್ನಡ ಜಿಲ್ಲಾ ಉಸ್ತುವಾರಿ ಸಚಿವೆರ್ ಯು.ಟಿ. ಖಾದರ್ ಬೊಕ್ಕ ಕುಡ್ಲ ನಗರಾಭಿವೃದ್ಧಿ ಪ್ರಾಧಿಕಾರದ ಅಧ್ಯಕ್ಷೆರ್ ಸಂತೋಷ್ ಕುಮಾರ್ ಶೆಟ್ಟಿ ಮೊಕುಲು ಬುಧಾರದಾನಿ ಮಂಗಳ ಕ್ರೀಡಾಂಗಣಗ್ ಭೇಟಿ ಕೊರ್ದು, ಕ್ರೀಡಾಂಗಣದ ಮಾತ ಅಭಿವೃದ್ಧಿಗ್ ಸಂಬಂಧಪಟ್‌ದ್ ಯುವ ಸಬಲೀಕರಣ ಬೊಕ್ಕ ಕ್ರೀಡಾ ಇಲಾಖೆದ ದಕ್ಷಿಣ ಕನ್ನಡ ಜಿಲ್ಲೆದ ಅಧಿಕಾರಿಲೆನೊಟ್ಟಿಗೆ ಜಾಗೆಡೇ ಚರ್ಚೆ ನಡಪಾಯೆರ್.

ಈ ಪೊರ್ತುಡು ದಕ್ಷಿಣ ಕನ್ನಡ ಜಿಲ್ಲಾಧಿಕಾರಿಲು ದರ್ಶನ್ ಎಚ್ ವಿ, ಜಿಲ್ಲಾ ಪಂಚಾಯಿತಿ ಮುಖ್ಯ ಕಾರ್ಯನಿರ್ವಹಣಾಧಿಕಾರಿ ನರ್ವಡೆ ವಿನಾಯಕ್ ಕಾರ್ಭಾರಿ, ದಕ್ಷಿಣ ಕನ್ನಡ ಜಿಲ್ಲೆದ ಯುವ ಸಬಲೀಕರಣ ಬೊಕ್ಕ ಕ್ರೀಡಾ ಇಲಾಖೆದ ಉಪನಿರ್ದೇಶಕೆರ್ ಪ್ರದೀಪ್ ಡಿಸೋಜಾ, ಲೋಕೋಪಯೋಗಿ ಇಲಾಖೆದ ಕಾರ್ಯಪಾಲಕ ಇಂಜಿನಿಯರ್ ಬೊಕ್ಕ ದಕ್ಷಿಣ ಕನ್ನಡ ಜಿಲ್ಲಾ ಯುವ ಕಾಂಗ್ರೆಸ್ ಪ್ರಧಾನ ಕಾರ್ಯದರ್ಶಿ ತೇಜಸ್ ಶೆಟ್ಟಿ ಸೇರಿನಂಚೆನೆ ಸಂಬಂಧಪಟ್ಟಿನ ಅಧಿಕಾರಿಲು ಪಾಲ್ ಪಡೆದಿತ್ತೆರ್.

ಕ್ರೀಡಾಂಗಣದ ಅಭಿವೃದ್ಧಿ ಕಾಮಗಾರಿಲು, ಕ್ರೀಡಾಪಟುಲೆಗ್ ಅಗತ್ಯ ಇಪ್ಪುನ ಮೂಲಸೌಕರ್ಯಲು ಬೊಕ್ಕ ಕ್ರೀಡಾ ಚಟುವಟಿಕೆಲೆಗ್ ಪೂರಕವಾಯಿನ ಸೌಲಭ್ಯಲೆನ ಅಭಿವೃದ್ಧಿ ಬಗ್ಗೆ ಸಮಗ್ರ ಸಮಾಲೋಚನೆ ನಡಪಾಯೆರ್.
ಮಂಗಳ ಕ್ರೀಡಾಂಗಣನ್ ನನಾತ್ ಪೊರ್ಲು ಮಲ್ತ್ ದ್, ಕ್ರೀಡಾಪಟುಲೆಗ್ ಉತ್ತಮ ಗುಣಮಟ್ಟದ ಸೌಲಭ್ಯಲೆಗ್ ಕಲ್ಪಿಸಾವುನ ದಿಟ್ಟಿಡ್ ಈ ಭೇಟಿ ಮಹತ್ವದ ಆತ್ಂಡ್.

ಲೇಬಲಿಂಗ್‌ ಗೋಲ್‌ಮಾಲ್ ಆರೋಪ: 1,240 ಕೆಜಿ ಖಾದ್ಯ ಎಣ್ಣೆ ಜಪ್ತಿ

ಕುಡ್ಲ : ತಪ್ಪು ಬ್ರ್ಯಾಂಡಿಂಗ್ ಬೊಕ್ಕ ಲೇಬಲ್ ಪಾಡ್ದ್ ಗ್ರಾಹಕೆರೆನ್ ಸಾದಿ ತಪ್ಪಾವುನ ಆರೋಪದ ಹಿನ್ನೆಲೆಡ್ ಬೈಕಂಪಾಡಿ ಕೈಗಾರಿಕಾ ಪ್ರದೇಶಡ್ ಉಪ್ಪುನ ಬೋಲಾಸ್ ಆಗ್ರೋ ಸಂಸ್ಥೆದ ಮಿತ್ತ್ ಆಹಾರ ಸುರಕ್ಷತಾ ಅಧಿಕಾರಿಲು ಕ್ರಮ ದೆತೊಂದು, ಒಟ್ಟು 1,240 ಕೆಜಿ ಖಾದ್ಯ ಎಣ್ಣೆ ವಶಕ್ಕ್ ದೆತೊಂದೆರ್.

ಅಧಿಕಾರಿಲೆನ ಮಾಹಿತಿ ಪ್ರಕಾರ,
ವಶಕ್ಕ್ ದೆತೊಂದಿನ ಎಣ್ಣೆಡ್ ಕಡಲೆಕಾಯಿ ಎಣ್ಣೆ ಬೊಕ್ಕ ತಾರಾಯಿದ ಎಣ್ಣೆಲ ಉಂಡು. ತಲಾ 10 ಕೆಜಿ ತೂಕದ 11 ಬಾಕ್ಸ್ ಕಡಲೆಕಾಯಿ ಎಣ್ಣೆ, ತಲಾ 35 ಲೀಟರ್ ಸಾಮರ್ಥ್ಯದ 30 ಕ್ಯಾನ್ ಕಡಲೆಕಾಯಿ ಎಣ್ಣೆ ಬೊಕ್ಕ ತಲಾ 20 ಕೆಜಿ ತೂಕದ ನಾಲ್ ಬಾಕ್ಸ್ ತಾರಾಯಿದ ಎಣ್ಣೆ ವಶಕ್ಕ್ ದೆತೊಂದೆರ್.
ಕಡಲೆಕಾಯಿ ಎಣ್ಣೆದ ಮೂಲ ಬೊಕ್ಕ ಲೇಬಲಿಂಗ್ ಬಗೆಟ್ಟ್ ಸಂಸಯ ಬೈದಿನೆರ್ದಾವರ ಆರೋಗ್ಯ ಇಲಾಖೆ ಅಧಿಕಾರಿಲು ಪರಿಶೀಲನೆ ಮಲ್ದೆರ್. ಚಿತ್ರದುರ್ಗ ಜಿಲ್ಲೆದ ಚಳ್ಳಕೆರೆರ್ದ್ ಕಚ್ಚಾ ಕಡಲೆಕಾಯಿ ಎಣ್ಣೆನ್ ಬೈಕಂಪಾಡಿಗ್ ಕನಪಾದ್ ಅವೆನ್ ರೀ ಪ್ಯಾಕ್ ಮಲ್ತ್‌ದ್ ‘ಕೋಲ್ಡ್ ಪ್ರೆಸ್ಡ್ ಕಡಲೆಕಾಯಿ ಎಣ್ಣೆ’ ಪಂಡ್‌ದ್ ಲೇಬಲ್ ಮಲ್ತೊಂದುಲ್ಲೆರ್ ಪನ್ಪಿನ ಆರೋಪ ಕೇಂಡ್‌ದ್ ಬೈದಿತ್ತ್ಂಡ್.

ತೆತ್ತಿದ ಗಾಡಿಡ್ ಸಾಗಾವೊಂದಿತ್ತಿನ 16 ಪೆತ್ತ ಕಂಜಿಲೆನ ರಕ್ಷಣೆ : 2 ಜನ ಅರೆಸ್ಟ್

ಕುಡ್ಲ : ಪಂಪ್‌ವೆಲ್ ಕೈತಲ್ ತೆತ್ತಿ ಕೊನೊಪಿನ ಗಾಡಿಡ್ ಅಕ್ರಮವಾದ್ ಸಾಗಾವೊಂದಿತ್ತಿನ 16 ಪೆತ್ತ ಕಂಜಿಲೆನ್ ಕಂಕನಾಡಿ ಪೊಲೀಸೆರ್ ರಕ್ಷಣೆ ಮಲ್ದೆರ್.

ಈ ಕೇಸ್‌ಡ್ ಪೊಲೀಸೆರ್ ಗಾಡಿದ ಡ್ರೈವರ್ ಮೈಸೂರು ಮೂಲದ ಮೊಹಮ್ಮದ್ ರಫೀಕ್ (52) ಬೊಕ್ಕ ರೆಹಮಾನ್ ಪನ್ಪಿನಕ್ಲೆನ್ ಅರೆಸ್ಟ್ ಮಲ್ದೆರ್.
ಪೊಲೀಸ್ ಮೂಲದ ಪ್ರಕಾರ, ತೆತ್ತಿ ಸಾಗಾಟ ಮಲ್ಪುನ ‘ಸ್ಟಾರ್ ಎಗ್’ ಪಂಡ್‌ದ್ ಬರೆತಿನ ಗಾಡಿಡ್ ಅಕ್ರಮವಾದ್ ಗೋ ಸಾಗಾಟ ಮಲ್ಪುನೆತ್ತ ಬಗೆಟ್ಟ್ ಮಾಹಿತಿ ಬೈದಿತ್ತ್ಂಡ್. ಈ ಮಾಹಿತಿದ ಆಧಾರಡ್ ಪೊಲೀಸೆರ್ ಎನ್ಎಚ್ 66 ತ್ತ ಪಂಪ್‌ವೆಲ್ ಕೈತಲ್ ಉಜ್ಜೋಡಿಡ್ ಗಾಡಿ ತಡೆಪುನಗ ಜಾನುವಾರು ಪತ್ತೆ ಆತ್ಂಡ್.
ಬೆಳಗಾವಿ ಜಿಲ್ಲೆದ ಯಮಕನಮರಡಿರ್ದ್ ಪೆತ್ತಕಂಜಿಲೆನ್ ಕನತ್‌ದ್ ಕಾಸರಗೋಡು ಕೊನೊವೊಂದಿತ್ತೆರ್ ಪಂಡ್‌ದ್ ತೆರಿದ್ ಬೈದ್ಂಡ್.

ಹಿರಿಯ ಪತ್ರಕರ್ತೆರ್ ಪಿ.ಬಿ.ಹರೀಶ್ ರೈ ಮೆರೆಗ್ ರಾಜ್ಯಮಟ್ಟದ ಸಹಕಾರ ಸಪ್ತಾಹ ಗೌರವ ಪ್ರಶಸ್ತಿ

ಕುಡ್ಲ : ಕರ್ನಾಟಕ ರಾಜ್ಯ ಸಹಕಾರ ಮಹಾ ಮಂಡಳ ಬೆಂಗಳೂರು ಬೊಕ್ಕ ದ.ಕ.ಜಿಲ್ಲಾ ಕೇಂದ್ರ ಸಹಕಾರಿ ಬ್ಯಾಂಕ್‌ದ ನಿರೆಲ್‌ಡ್ ನಡಪುನ 73ನೇ ಸಹಕಾರ ಸಪ್ತಾಹದ ಲೇಸ್‌ಡ್ ಪತ್ರಿಕಾ ರಂಗದ ಸೇವೆಗಾದ್ ಕೊರ್ಪಿನ ರಾಜ್ಯಮಟ್ಟದ ಗೌರವ ಪ್ರಶಸ್ತಿಗ್ ಹಿರಿಯ ಪತ್ರಕರ್ತೆರ್, ಮಂಗಳೂರು ಪ್ರೆಸ್ ಕ್ಲಬ್ ಅಧ್ಯಕ್ಷೆರ್ ಪಿ.ಬಿ.ಹರೀಶ್ ರೈ ಆಯ್ಕೆ ಆತೆರ್.
ಈ ಪ್ರಶಸ್ತಿಗ್ ಪುಗರ್ತೆದ ಪತ್ರಕರ್ತೆರ್, ಸಮಾಜಮುಖಿ ಚಿಂತಕೆ ಪಿ.ಬಿ.ಹರೀಶ್ ರೈ ಮೆರೆನ್ ಆಯ್ಕೆ ಮಲ್ತ್‌ದ ಪಂಡ್‌ದ್ ದ.ಕ.ಜಿಲ್ಲಾ ಕೇಂದ್ರ ಸಹಕಾರಿ ಬ್ಯಾಂಕ್ ಅಧ್ಯಕ್ಷೆರ್ ಡಾ.ಎಂ.ಎನ್.ರಾಜೇಂದ್ರ ಕುಮಾರ್ ತೆರಿಪಾದೆರ್.
73ನೇ ಸಹಕಾರ ಸಪ್ತಾಹದ ರಾಜ್ಯಮಟ್ಟದ ಕಾರ್ಯಕ್ರಮ ನವೆಂಬರ್ 20 ಕಾಂಡೆ 10 ಗಂಟೆಗ್ ಕುಡ್ಲದ ಕರಾವಳಿ ಉತ್ಸವ ಮೈದಾನಡ್ ನಡಪರೆ ಉಂಡು.

ಕುಡ್ಲ ಏರ್‌ಪೋರ್ಟ್‌ಡ್ ತತ್ತ್ ಪೋಂಡು ಮಾಮಲ್ಲ ದುರಂತ!

229 ಪ್ರಯಾಣಿಕೆರೆನ ಜೀವ ಒರಿತಿನ ಪೈಲಟ್

ಕುಡ್ಲ : ಬಜ್ಪೆ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣಡ್ ಪೈಲಟ್‌ನ ಸಮಯಪ್ರಜ್ಞೆರ್ದಾವರ ಬಾರಿ ಮಲ್ಲ ದುರಂತ ಆಪಿನವು ತತ್ತ್‌ದ್ 229 ಪ್ರಯಾಣಿಕೆರೆನ ಜೀವ ಬಚಾವ್ ಆಯಿನ ಘಟನೆ ಸೋಮಾರ ಬಯ್ಯಡ್ ನಡತ್ಂಡ್.
ಕುಡ್ಲರ್ದ್ ಬೆಂಗಳೂರುಗು ಪೋಪಿನ ವಿಮಾನ ಬಯ್ಯಡ್ 6.05 ಕ್ಕ್ ಟೇಕಾಫ್ ಆಫಿನ ಪೊರ್ತುಡು ತಾಂತ್ರಿಕ ದೋಷ ತೋಜಿದ್ ಬತ್ತ್ಂಡ್. ಉಂದೆನ್ ಕೂಡ್ಲೆ ಪತ್ತೆ ಮಲ್ತಿನ ಪೈಲಟ್ ಟೇಕಾಫ್ ಆವೊಡಿತ್ತಿನ‌ ವಿಮಾನನ್ ಕಂಟ್ರೋಲ್‌ಗ್ ಕನತ್‌ದ್ ಮಾತಾ ಪ್ರಯಾಣಿಕೆರೆನ್ ಜಪುಡಾದ್ ಮಲ್ಲ ದುರಂತನ್ ತಪ್ಪಾಯೆರ್. ವಿಮಾನಡ್ 3 ಜೋಕುಲು ಸೇರ್ದ್ 229 ಪ್ಯಾಸೆಂಜರ್ಸ್, 7 ಜನ ಸಿಬ್ಬಂದಿಲು ಇತ್ತೆರ್. ಬೊಕ್ಕ ಬೇತೆ ಅಕ್ಲೆಗ್ ಬೇತೆ ವಿಮಾನದ ವ್ಯವಸ್ಥೆ ಮಲ್ತ್‌ದ್ ಬೆಂಗಳೂರುಗು ಕಡಪಾದೆರ್ ಪಂಡ್‌ದ್ ತೆರಿದ್ ಬೈದ್ಂಡ್.

ಪಾರಂಪರಿಕ ಸ್ಮಾರಕ ಸಂರಕ್ಷಣೆಡ್ ಐತಿಹಾಸಿಕ ತಿರುವು

ಬಪ್ಪನಾಡ್ ಸ್ವಾಗತ ಗೋಪುರದ ಸ್ಥಳಾಂತರ ಕಾರ್ಯ 185 ದಿನೊತ್ತ ಸುದೀರ್ಘ ಪ್ರಯತ್ನದ ಬೊಕ್ಕ ಯಶಸ್ವಿ

ಪಾರಂಪರಿಕ ಸ್ಮಾರಕ ಸಂರಕ್ಷಣೆ, ಇಂಜಿನಿಯರಿಂಗ್ ಪರಿಣತಿ ಬೊಕ್ಕ ಧಾರ್ಮಿಕ ಬದ್ಧತೆದ ಅಪೂರ್ವ ಸಂಗಮಗ್ ಸಾಕ್ಷಿಯಾದ್, ಬಪ್ಪನಾಡ್ ಶ್ರೀ ದುರ್ಗಾಪರಮೇಶ್ವರಿ ದೇವಸ್ಥಾನದ ಐತಿಹಾಸಿಕ ಸ್ವಾಗತ ಗೋಪುರನ್ ನ.12 ಕ್ಕ್ ಯಶಸ್ವಿಯಾದ್ ಅವೆತ್ತ ಅಕೇರಿದ ಸ್ಥಾನಡ್ ಪ್ರತಿಷ್ಠಾಪನೆ ಮಲ್ತೆರ್. ಮೇ.13 ಕ್ಕ್ ಸುರು ಆಯಿನ ಈ ಸವಾಲ್ ದ ಕಾರ್ಯ ಒಟ್ಟು 185 ದಿನೊತ್ತ ಸುದೀರ್ಘ ಪ್ರಯತ್ನದ ಫಲವಾದ್ ಮುಗಿತಲ ಆಂಡ್.

1996ಟ್ಟ್ ಐಕಳ ಹರೀಶ್ ಶೆಟ್ಟಿ ಬೊಕ್ಕ ಕುಟುಂಬದಕುಲು ದೇವಸ್ಥಾನಗ್ ಸಮರ್ಪಣೆ ಮಲ್ತಿನ ಈ ಸ್ವಾಗತ ಗೋಪುರ ರಾಷ್ಟ್ರೀಯ ಮಾರ್ಗ ಅಗಲೀಕರಣದ ಲೆಕ್ಕೊಡು ದೆತ್ತಿನ ಅತ್ತಂಡ ದೆಪ್ಪುನ ಅನಿವಾರ್ಯತೆನ್ ಎದುರಿಸಾದ್ಂಡ್. ಈ ಪೊರ್ತುಡು, ಪಾರಂಪರಿಕ ರಚನೆನ್ ದೆಪ್ಪುನ ಬದಲ್ ವೈಜ್ಞಾನಿಕವಾದ್ ಸ್ಥಳಾಂತರ ಮಲ್ತ್ ದ್ ಸಂರಕ್ಷಣೆ ಮಲ್ಪು‌ನ ಪರ್ಯಾಯ ಯೋಜನೆನ್ ಎಂಜಿನಿಯರ್ ಮುಲ್ಕಿ ಜೀವನ್ ಕೆ. ಶೆಟ್ಟಿ, ಶಾರದಾ ಅಸೋಸಿಯೇಟ್ಸ್ ಮೇರ್ ಪ್ರಸ್ತಾಪ ಮಲ್ತೆರ್.

ಈ ಪಾರಂಪರಿಕ ಸಂರಕ್ಷಣಾ ಕಾರ್ಯದ ಮಹತ್ವನ್ ತೆರಿದ್ ಐಕಳ ಹರೀಶ್ ಶೆಟ್ಟಿ ಮೇರ್ ಸಂಪೂರ್ಣ ಸ್ಥಳಾಂತರ ಕಾರ್ಯದ ಕರ್ಚಿನ್ ದೆತೊನಿಯೆರೆ ಎಡ್ಡೆ ಮನಸ್ ಡ್ ದುಂಬು ಬತ್ತೆರ್. 1996ಟ್ಟ್ ಮೂಲ ಗೋಪುರನ್ ಸಮರ್ಪಣೆ ಮಲ್ತಿನ ದಾನಿಲಾದ್ ಬೊಕ್ಕ 2026ಟ್ಟ್ ಅವೆತ್ತ ಸ್ಥಳಾಂತರದ ಪೂರ ಕರ್ಚಿನ್ ದೆತೊನ್ನ ಮಹಾದಾನಿಯಾದ್ ಅರೆನ ಕೊಡುಗೆ ಇಸೇಸವಾದ್ ಮೆಚ್ಚೊಡಾಯಿನವು.

ಇಂಜಿನಿಯರಿಂಗ್ ದುಂಬಾತ್ತಿಗೆ ಬೊಕ್ಕ ಯೋಜನಾ ನಿರ್ವಹಣೆ:

ಎಂಜಿನಿಯರ್ ಮುಲ್ಕಿ ಜೀವನ್ ಕೆ. ಶೆಟ್ಟಿ ಮೇರ್ ಈ ಯೋಜನೆದ ಇಂಜಿನಿಯರ್ ಬೊಕ್ಕ ಯೋಜನಾ ಸಂಯೋಜಕೆರಾದ್ ಬೆಂದ್ ದ್, ದಾನಿಲು, ದೇವಸ್ಥಾನದ ಆಡಳಿತ ಮಂಡಳಿ, ರಾಷ್ಟ್ರೀಯ ಹೆದ್ದಾರಿ ಪ್ರಾಧಿಕಾರ (NHAI), ಬೇತೆ ಬೇತೆ ಸರ್ಕಾರಿ ಇಲಾಖೆಲು ಬೊಕ್ಕ ಕಾಮಗಾರಿ ಗುತ್ತಿಗೆದಾರೆರೆನ ನಡುಟ್ಟು ಸಮನ್ವಯ ಮಲ್ಪುನಲ್ಪ ಪ್ರಮುಖ ಪಾತ್ರ ಒಯಿಸೊಂದೆರ್.

ಎಂಜಿನಿಯರ್ ನಿತಿನ್ ದೇವಾಡಿಗ ಮೇರ್ ಸ್ಟ್ರಕ್ಚರಲ್ ಎಂಜಿನಿಯರ್ ಆದ್ ತನ್ನ ತಾಂತ್ರಿಕ ಪರಿಣತಿ ಬೊಕ್ಕ ರಚನಾತ್ಮಕ ಮಾರ್ಗದರ್ಶನನ್ ಕೊರಿಯೆರ್. ಹರಿಯಾಣದ HSPL ಸಂಸ್ಥೆ ಸ್ಥಳಾಂತರ ಕಾಮಗಾರಿದ ಅನುಷ್ಠಾನದ ಜಬದಾರಿನ್ ಮಲ್ತೆರ್.

77 ಅಡಿ ಸಮತಲ ಸ್ಥಳಾಂತರ ಬೊಕ್ಕ 4 ಅಡಿ ಲಂಬ ಎತ್ತರ ಮಲ್ಪೆರೆ ಉಂಡು.

ಒಟ್ಟು 185 ದಿನಟ್ಟ್ ಗೋಪುರದ ಸ್ಥಳಾಂತರ ಕಾರ್ಯನ್ ಐನ್ ಹಂತಡ್ ಮಲ್ಪೆರೆ:

1. ಸುರುತ್ತ ಹಂತದ ಲಂಬ ಎತ್ತರ ಮಲ್ಪೆರೆ – 3 ಅಡಿ.
2. ಪಶ್ಚಿಮ ದಿಕ್ಕ್ ರ್ದ್ ದೇವಸ್ಥಾನದ ಕಡೆಕ್ಕ್ ಸಮತಲ ಸ್ಥಳಾಂತರ – 51 ಅಡಿ.
3. ಉತ್ತರ ದಿಕ್ಕ್ ಗ್ ಸ್ಥಳಾಂತರ – 11 ಅಡಿ.
4. ಪುನಃ ಪಶ್ಚಿಮ ದಿಕ್ಕ್ ಡ್ ದೇವಸ್ಥಾನದ ಕಡೆಕ್ಕ್ ಸ್ಥಳಾಂತರ – 15 ಅಡಿ.
5. ಅಕೇರಿದ ಹೆಚ್ಚುವರಿ ಲಂಬ ಎತ್ತರ ಮಲ್ಪೆರೆ – 1 ಅಡಿ.

ಈ ಮುಕೇನ ಗೋಪುರನ್ ಒಟ್ಟು 77 ಅಡಿ ಸಮತಲವಾದ್ ಸ್ಥಳಾಂತರ ಮಲ್ತ್ ದ್, 4 ಅಡಿ ಲಂಬವಾದ್ ಎತ್ತರ ಮಲ್ತೆರ್.

ಮೂಜಿ ಪ್ರಮುಖ ತಾಂತ್ರಿಕ ಉದ್ದೇಶಲೆನ ಯಶಸ್ವಿ ಸಾಧನೆ:

ಗೋಪುರದ ಅಕೇರಿದ ಸ್ಥಾನನ್ ನಿರ್ಧಾರ ಮಲ್ಪುನಗ ಮೂಜಿ ಪ್ರಮುಖ ತಾಂತ್ರಿಕ ಬೊಕ್ಕ ಧಾರ್ಮಿಕ ಅಗತ್ಯಲೆಗ್ ಆದ್ಯತೆ ಕೊರ್ತೆರ್.

1.ರಾಷ್ಟ್ರೀಯ ಮಾರ್ಗದ ಸ್ವಾಧೀನ ಮಲ್ತಿನ ಗಡಿ ಪ್ರದೇಶದ ಪಿದಯಿಗ್ ಸ್ಥಳಾಂತರ:

ರಾಷ್ಟ್ರೀಯ ಮಾರ್ಗಗಾದ್ ಸ್ವಾಧೀನ ಮಲ್ತೊನ್ನ ಗಡಿ ಪ್ರದೇಶರ್ದ್ ಮಾಸ್ತ್ ದೂರಡ್ ಗೋಪುರನ್ ಸುರಕ್ಷಿತವಾದ್ ಸ್ಥಾಪನೆ ಮಲ್ಪುನ ಮುಕೇನ ಮಾರ್ಗ ಅಭಿವೃದ್ಧಿ ಕಾಮಗಾರಿಗ್ ಒವ್ವೇ ಅಡಚಣೆ ಅವಂದಿಲೆಕ್ಕ ಕ್ರಮ ದೆತೊಂದೆರ್.

2. ಬ್ರಹ್ಮರಥದ ಸುರಕ್ಷಿತ ಸಂಚಾರ:

ವರ್ಷೊದ ಜಾತ್ರೆದ ಪೊರ್ತುಡು ರಥಬೀದಿಡ್ ಗೋಪುರದ ಕೈತಲ್ದ ಮುಕೇನ ಪವಿತ್ರ ಬ್ರಹ್ಮರಥ ಸುರಕ್ಷಿತವಾದ್ ಸಂಚಾರ ಮಲ್ಪೆರೆ ಅಗತ್ಯವಾಯಿನ ಸ್ಥಳಾವಕಾಶನ್ ನಿಗಂಟ್ ಮಲ್ತೆರ್.

3. ಇಮಾನ ರಥತ್ತ ಸುರಕ್ಷಿತ ಸಂಚಾರ:

ವರ್ಷೊದ ಜಾತ್ರೆದ ಪೊರ್ತುಡು ಇಮಾನ ರಥ ಸ್ವಾಗತ ಗೋಪುರದ ತೀರ್ತ್ ಭಾಗರ್ದ್ ಒವ್ವೇ ಅಡಚಣೆ ಇಜ್ಜಂದೆ ಸುರಕ್ಷಿತವಾದ್ ಪೋಯೆರೆ ಅಗತ್ಯವಾಯಿನ ಲಂಬ ಎತ್ತರನ್ ಕೊರ್ತುಂಡು. ಈ ಉದ್ದೇಶಗಾದ್ ಅಕೇರಿದ ಹೆಚ್ಚುವರಿ ಒಂಜಿ ಅಡಿ ಎತ್ತರ ಮಲ್ಪುನ ಬೇಲೆನ್ ಮಲ್ಪೊಡು.

ಪ್ರಮುಖ ಇಂಜಿನಿಯರಿಂಗ್ ಸವಾಲುಲೆನ ಯಶಸ್ವಿ ನಿರ್ವಹಣೆ:

ಈ ಸ್ಥಳಾಂತರ ಕಾರ್ಯಡ್ ಸುಮಾರ್ ಕಠಿಣ ತಾಂತ್ರಿಕ ಸವಾಲು ಉಂಡು. ಇಸೇಸವಾದ್, ಮಿತ್ತ್ ಭಾಗಡ್ ಇತ್ತಿನ ಹೈಟೆನ್ಷನ್ ಕರೆಂಟ್ ವಾಯರ್ ನ್ ಸುರಕ್ಷಿತವಾದ್ ಪಾಡುನ ಬೊಕ್ಕ ಸ್ಥಳಾಂತರದ ಮಾರ್ಗಡ್ ತೀರ್ತ್ ಇತ್ತಿನ ಬೃಹತ್ ಬರ್ಸದ ನೀರ್ ಪರಪುನ ಚರಂಡಿನ್ ಮಲ್ಪುನೇ ಮಾಸ್ತ್ ಸವಾಲ್ ದ ಕೆಲಸ ಆತ್ಂಡ್.

ಮರಿಯಾಲದ ಪೊರ್ತುಡು ಈ ಮಾತ ಬೇಲೆನ್ ಯಶಸ್ವಿಯಾದ್ ಮಲ್ಪುನೇ ಯೋಜನೆದ ಕುಡೊಂಜಿ ಮಹತ್ವದ ಸಾಧನೆ ಆತ್ಂಡ್.

ಈ ಕಾರ್ಯಾಚರಣೆಡ್ ಇಸೇಸ ಟ್ರ್ಯಾಕ್ ಪಾಡುನ ವ್ಯವಸ್ಥೆ, ರೋಲರ್‌ಲು ಬೊಕ್ಕ ಕೈಚಾಲಿತ ಜ್ಯಾಕ್‌ನ್ ಗಲಸ್ ದೆರ್, ಸರಿಯಾಯಿನ ತಾಂತ್ರಿಕ ಯೋಜನೆ, ರಚನಾತ್ಮಕ ಮೇಲ್ವಿಚಾರಣೆ ಬೊಕ್ಕ ಸಂಬಂಧಪಟ್ಟಿನ ಇಲಾಖೆಲೆನ ನಿರಂತರ ಸಮನ್ವಯದೊಟ್ಟಿಗೆ ಕಾಮಗಾರಿನ್ ಯಶಸ್ವಿಯಾದ್ ಮುಗಿತಲ ಮಲ್ತೆರ್.

ನನದ ಪೀಳಿಗೆಗಾದ್ ಸಂರಕ್ಷಣೆ ಆಯಿನ ಪಾರಂಪರಿಕ ಸ್ಮಾರಕ:

ಈ ಯೋಜನೆ ಆಧುನಿಕ ಮೂಲಸೌಕರ್ಯ ಅಭಿವೃದ್ಧಿದೊಟ್ಟಿಗೆ ಪಾರಂಪರಿಕ ಸ್ಮಾರಕಲೆನ ಸಂರಕ್ಷಣೆ ಸಾಧ್ಯ ಪನ್ಪಿನೆನ್ ಇಂಜಿನಿಯರಿಂಗ್ ಪರಿಣತಿ, ದಾನಶೀಲತೆ ಬೊಕ್ಕ ಸಾಮೂಹಿಕ ಬದ್ಧತೆದ ಮುಕೇನ ಸಾಬೀತು ಮಲ್ದೆರ್.

1996ಟ್ಟ್ ಭಕ್ತಿಭಾವರ್ದ್ ದೇವಸ್ಥಾನಗ್ ಸಮರ್ಪಣೆ ಮಲ್ಪುನ ಈ ಗೋಪುರ 2026ಟ್ಟ್ ಕುಡೊಂಜಿ ಮಹತ್ವದ ದಾನಶೀಲ ಪ್ರಯತ್ನದ ಮುಕೇನ ಸಂರಕ್ಷಣೆ ಮಲ್ತ್ ದ್ ನನದ ಪೀಳಿಗೆಗ್ ಒರಿಪುಲೆಕ್ಕ ಅವಡ್.

ಒಂಜಿ ಪಾರಂಪರಿಕ ಸ್ಮಾರಕ ಒರಿಯೆರೆ ಉಂಡು. ಒಂಜಿ ಧಾರ್ಮಿಕ ಸಂಪ್ರದಾಯಗ್ ಸುರಕ್ಷತೆ ಕೊರೊಡು. ಒಂಜಿ ಮಹತ್ವದ ಇಂಜಿನಿಯರಿಂಗ್ ಸಾಧನೆ ಸಾಕಾರ ಆತ್ಂಡ್. ಒಂಜಿ ಪರಂಪರೆ ನನದ ಪೀಳಿಗೆಗಾದ್ ಸಂರಕ್ಷಣೆ ಆತ್ಂಡ್.

ಎಂಜಿನಿಯರ್ ಮುಲ್ಕಿ ಜೀವನ್ ಕೆ.ಶೆಟ್ಟಿ ಮೇರ್ ಶಾರದಾ ಅಸೋಸಿಯೇಟ್ಸ್ ದ ಸ್ಥಾಪಕೆರ್, ಮುಲ್ಕಿ ಅಸೋಸಿಯೇಷನ್ ಆಫ್ ಸಿವಿಲ್ ಎಂಜಿನಿಯರ್ಸ್ (ACEM) ಸ್ಥಾಪಕ ಅಧ್ಯಕ್ಷೆರ್, ಇಂಡಿಯನ್ ರೋಡ್ಸ್ ಕಾಂಗ್ರೆಸ್ (ನವ ಡೆಲ್ಲಿ ಕೇಂದ್ರ ರಸ್ತೆ ಸಾರಿಗೆ ಬೊಕ್ಕ ಹೆದ್ದಾರಿ ಸಚಿವಾಲಯ,) ಜೀವಮಾನ ಸದಸ್ಯೆರ್, ಹೈದರಾಬಾದ್ ಇಂಡಿಯನ್ ಗ್ರೀನ್ ಬಿಲ್ಡಿಂಗ್ ಕೌನ್ಸಿಲ್ ಸದಸ್ಯೆರ್, ಸ್ವಾಗತ ಗೋಪುರ ಸ್ಥಳಾಂತರ ಯೋಜನೆದ ಇಂಜಿನಿಯರ್ ಬೊಕ್ಕ ಯೋಜನಾ ಸಂಯೋಜಕೆರಾತೆರ್.

ನ.20 : ಕುಡ್ಲಡ್ 73ನೇ ರಾಜ್ಯಮಟ್ಟದ ಸಹಕಾರ ಸಪ್ತಾಹ

ನಾಲ್ ಜನ ಸಾಧಕೆರೆಗ್ ಸಹಕಾರ ರತ್ನ ಪ್ರಶಸ್ತಿ ಪ್ರದಾನ: ಡಾ.ಎಂಎನ್‌ಆರ್

ಕುಡ್ಲ : 73ನೇ ಅಖಿಲ ಭಾರತ ಸಹಕಾರ ಸಪ್ತಾಹದ ಅಂಗವಾದ್ ನವೆಂಬರ್ 20 ಗು ಕುಡ್ಲದ ಕರಾವಳಿ ಉತ್ಸವ ಮೈದಾನಡ್ ರಾಜ್ಯಮಟ್ಟದ ಸಹಕಾರ ಸಪ್ತಾಹ ಕಾರ್ಯಕ್ರಮ ನಡಪರೆ ಉಂಡು. ಈ ಲೇಸ್‌ಡ್ ಸಹಕಾರ ಕ್ಷೇತ್ರದ ಸಾಧಕೆರೆಗ್ ಪ್ರಶಸ್ತಿ ಪ್ರದಾನ ಬೊಕ್ಕ ಬೇತೆ ಬೇತೆ ಸಹಕಾರಿ ಸಂಘದಕ್ಲೆಗ್ ಮಾನಾದಿಗೆ ನಡಪರೆ ಉಂಡು ಪಂಡ್‌ದ್ ಕರ್ನಾಟಕ ರಾಜ್ಯ ಸಹಕಾರ ಮಾರಾಟ ಮಹಾಮಂಡಳ ಬೊಕ್ಕ ದಕ್ಷಿಣ ಕನ್ನಡ ಜಿಲ್ಲಾ ಕೇಂದ್ರ ಸಹಕಾರಿ ಬ್ಯಾಂಕ್ ಅಧ್ಯಕ್ಷೆರ್ ಡಾ. ಎಂ.ಎನ್. ರಾಜೇಂದ್ರ ಕುಮಾರ್ ತೆರಿಪಾಯೆರ್.

ಸುದ್ದಿಗೋಷ್ಠಿಡ್ ಈ ವಿಷಯ ತೆರಿಪಾಯಿನ ಆರ್, ರಾಜ್ಯಮಟ್ಟದ ಈ ಕಾರ್ಯಕ್ರಮನ್ ಸಹಕಾರ ಸಚಿವೆರ್ ಲಕ್ಷ್ಮಣ ಸಂಗಪ್ಪ ಸವದಿ ಉದಿಪನ ಮಲ್ಪುವೆರ್. ಜಿಲ್ಲಾ ಉಸ್ತುವಾರಿ ಸಚಿವೆರ್ ಯು.ಟಿ. ಖಾದರ್ ಸಹಕಾರ ಮಾಣಿಕ್ಯ ಪ್ರಶಸ್ತಿ ಪ್ರದಾನ ಮಲ್ಪುವೆರ್. ಉತ್ತಮ ಸಹಕಾರಿ ಸಂಘಲೆಗ್ ಶಾಸಕೆರ್, ಕರ್ನಾಟಕ ರಾಜ್ಯ ಸಹಕಾರ ಮಹಾಮಂಡಳದ ಅಧ್ಯಕ್ಷೆರ್ ಜಿ.ಟಿ. ದೇವೇಗೌಡ ಪ್ರಶಸ್ತಿ ಪಟ್ಟುವೆರ್ ಪಂಡ್‌ದ್ ಮಾಹಿತಿ ಕೊರಿಯೆರ್.
ಅಂಚೆನೇ 2025-26ನೇ ವರ್ಷಡ್ ಸಮಗ್ರ ಪ್ರಗತಿ ತೊಜಪಾಯಿನ ನಾಲ್ ಸಹಕಾರಿ ಸಂಘಲೆಗ್ “ಸಹಕಾರ ಮಾಣಿಕ್ಯ” ಪ್ರಶಸ್ತಿ ಕೊರಿಯರೆ ಉಲ್ಲ. ಪ್ರಶಸ್ತಿದ ಒಟ್ಟುಗು ತಲಾ 5 ಗ್ರಾಂ ಬಂಗಾರ್‌ದ ಪದಕ, 10 ಸಾವಿರ ರೂ. ದುಡ್ಡು ಬೊಕ್ಕ ಪಾರಿತೋಷಕ ಕೊರ್ದು ಗೌರವ ಮಲ್ಪರೆ ಉಂಡು. ದಕ್ಷಿಣ ಕನ್ನಡ ಮತ್ತು ಉಡುಪಿ ಜಿಲ್ಲೆದ ಅತ್ಯುತ್ತಮ ಕೃಷಿ ಪತ್ತಿನ, ಮಹಿಳಾ, ಹೈನುಗಾರಿಕೆ, ಮೀನುಗಾರಿಕೆ, ಕ್ರೆಡಿಟ್ ಅಂಚೆನೆ ಸೌಹಾರ್ದ ಸಹಕಾರಿ ಸಂಘೊಲು ಬೊಕ್ಕ 100 ವರ್ಷ ಆಚರಣೆ ಮಲ್ದಿನ ಸಹಕಾರ ಸಂಘಲೆನ್‌ಲ ಸನ್ಮಾನ ಮಲ್ಪರೆ ಉಂಡು ಪಂಡೆರ್.

35 ಸಾರರ್ದ್‌ಲ ಎಚ್ಚ ನವೋದಯ ಸ್ವಸಹಾಯ ಗುಂಪು

ಅವಿಭಜಿತ ದಕ್ಷಿಣ ಕನ್ನಡ ಜಿಲ್ಲೆಡ್ 35 ಸಾರರ್ದ್‌ಲ ಎಚ್ಚ ನವೋದಯ ಸ್ವಸಹಾಯ ಗುಂಪುಲು ಕೆಲಸ ಮಲ್ತೊಂದಿತ್ತ್‌ದ್ ಬಡವೆರ್‌ನ್ ಆರ್ಥಿಕವಾದ್ ಬಲ ಮಲ್ಪುನೆಟ್ಟ್ ಮಲ್ಲ ಪಾತ್ರ ವಹಿಸಾದೆರ್. ಈ ಹಿನ್ನೆಲೆಡ್ ರಡ್ಡ್ ಜಿಲ್ಲೆದ ಅತ್ಯುತ್ತಮ ಸ್ವಸಹಾಯ ಗುಂಪುಲೆಗ್ ಗೌರವ ಮಲ್ಪರೆ ಉಂಡು. ಉಂದುವೇ ಸಂದರ್ಭಡ್ ಪತ್ರಿಕಾ ರಂಗದ ಒರಿ ಸಾಧಕೆರ್ ಅಂಚೆನೆ ಮೂಡುಬಿದಿರೆ ತರಬೇತಿ ಕೇಂದ್ರಡ್ ರ‌್ಯಾಂಕ್ ಪಡೆತಿನ ಇರ್ವೆರೆನ್ ಗೌರವ ಮಲ್ಪರೆ ಉಂಡು ಪಂದ್ ಪಂಡೆರ್.
ಪತ್ರಿಕಾಗೋಷ್ಠಿಡ್ ಗೋಪಾಲಕೃಷ್ಣ ಭಟ್, ಜಯರಾಜ್ ಶೆಟ್ಟಿ, ಶಶಿಕುಮಾರ್ ರೈ ಬಲ್ಯೊಟ್ಟು ಇತ್ತೆರ್.

“ಸಹಕಾರ ಚಳುವಳಿದ ಸಾಧನೆಲೆನ್ ನೆಂಪು ಮಲ್ಪುನೆತ್ತ ಒಟ್ಟುಗು ನನ ದುಂಬಗ್ ಸಹಕಾರಿ ಕ್ಷೇತ್ರದ ಬೆಳವಣಿಗೆಗ್ ಪೊಸ ಪೊಸ ಚಿಂತನೆ ಮಲ್ಪುನು, ಅವೆನ್ ಕಾರ್ಯಗತ ಮಲ್ಪುನು ಸಹಕಾರ ಸಪ್ತಾಹದ ಮುಖ್ಯ ಉದ್ದೇಶವಾದುಂಡು”

ಡಾ. ಎಂ.ಎನ್. ರಾಜೇಂದ್ರ ಕುಮಾರ್,
ಅಧ್ಯಕ್ಷೆರ್,
ಕರ್ನಾಟಕ ರಾಜ್ಯ ಸಹಕಾರ ಮಾರಾಟ ಮಹಾಮಂಡಳ ಬೊಕ್ಕ ದಕ್ಷಿಣ ಕನ್ನಡ ಜಿಲ್ಲಾ ಕೇಂದ್ರ ಸಹಕಾರಿ ಬ್ಯಾಂಕ್

You Missed