Wed. Nov 18th, 2026

November 18, 2026

ಲೇಬಲಿಂಗ್‌ ಗೋಲ್‌ಮಾಲ್ ಆರೋಪ: 1,240 ಕೆಜಿ ಖಾದ್ಯ ಎಣ್ಣೆ ಜಪ್ತಿ

ಕುಡ್ಲ : ತಪ್ಪು ಬ್ರ್ಯಾಂಡಿಂಗ್ ಬೊಕ್ಕ ಲೇಬಲ್ ಪಾಡ್ದ್ ಗ್ರಾಹಕೆರೆನ್ ಸಾದಿ ತಪ್ಪಾವುನ ಆರೋಪದ ಹಿನ್ನೆಲೆಡ್ ಬೈಕಂಪಾಡಿ ಕೈಗಾರಿಕಾ ಪ್ರದೇಶಡ್ ಉಪ್ಪುನ ಬೋಲಾಸ್ ಆಗ್ರೋ ಸಂಸ್ಥೆದ ಮಿತ್ತ್ ಆಹಾರ ಸುರಕ್ಷತಾ ಅಧಿಕಾರಿಲು ಕ್ರಮ ದೆತೊಂದು, ಒಟ್ಟು 1,240 ಕೆಜಿ ಖಾದ್ಯ ಎಣ್ಣೆ ವಶಕ್ಕ್ ದೆತೊಂದೆರ್.

ಅಧಿಕಾರಿಲೆನ ಮಾಹಿತಿ ಪ್ರಕಾರ,
ವಶಕ್ಕ್ ದೆತೊಂದಿನ ಎಣ್ಣೆಡ್ ಕಡಲೆಕಾಯಿ ಎಣ್ಣೆ ಬೊಕ್ಕ ತಾರಾಯಿದ ಎಣ್ಣೆಲ ಉಂಡು. ತಲಾ 10 ಕೆಜಿ ತೂಕದ 11 ಬಾಕ್ಸ್ ಕಡಲೆಕಾಯಿ ಎಣ್ಣೆ, ತಲಾ 35 ಲೀಟರ್ ಸಾಮರ್ಥ್ಯದ 30 ಕ್ಯಾನ್ ಕಡಲೆಕಾಯಿ ಎಣ್ಣೆ ಬೊಕ್ಕ ತಲಾ 20 ಕೆಜಿ ತೂಕದ ನಾಲ್ ಬಾಕ್ಸ್ ತಾರಾಯಿದ ಎಣ್ಣೆ ವಶಕ್ಕ್ ದೆತೊಂದೆರ್.
ಕಡಲೆಕಾಯಿ ಎಣ್ಣೆದ ಮೂಲ ಬೊಕ್ಕ ಲೇಬಲಿಂಗ್ ಬಗೆಟ್ಟ್ ಸಂಸಯ ಬೈದಿನೆರ್ದಾವರ ಆರೋಗ್ಯ ಇಲಾಖೆ ಅಧಿಕಾರಿಲು ಪರಿಶೀಲನೆ ಮಲ್ದೆರ್. ಚಿತ್ರದುರ್ಗ ಜಿಲ್ಲೆದ ಚಳ್ಳಕೆರೆರ್ದ್ ಕಚ್ಚಾ ಕಡಲೆಕಾಯಿ ಎಣ್ಣೆನ್ ಬೈಕಂಪಾಡಿಗ್ ಕನಪಾದ್ ಅವೆನ್ ರೀ ಪ್ಯಾಕ್ ಮಲ್ತ್‌ದ್ ‘ಕೋಲ್ಡ್ ಪ್ರೆಸ್ಡ್ ಕಡಲೆಕಾಯಿ ಎಣ್ಣೆ’ ಪಂಡ್‌ದ್ ಲೇಬಲ್ ಮಲ್ತೊಂದುಲ್ಲೆರ್ ಪನ್ಪಿನ ಆರೋಪ ಕೇಂಡ್‌ದ್ ಬೈದಿತ್ತ್ಂಡ್.

ಉಡುಪಿ: ಪರ ಜೈಲ್‌ಡ್ ಕುರಿದಿನ ಸ್ಥಿತಿಟ್ಟ್ ಪುನ ಪತ್ತೆ !

ಉಡುಪಿ : ಪರತ್ತ್ ತಾಲೂಕು ಕಚೇರಿ ಕೈತಲ್ದ ಪರ ಜೈಲ್‌ಡ್ ಗುರ್ತು ಪತ್ತೆ ಆವಂದಿನ ಜನತ್ತ ಕುರಿದಿನ ಪುನ ಪತ್ತೆ ಆತ್ಂಡ್.

ಈ ಜನ ಸುಮಾರ್ 10 ದಿನತ್ತ ಪಿರವುಡು ಸೈತ್ ಪೋದುಪ್ಪು ಪಂಡ್‌ದ್ ಅಂದಾಜಿ ಮಲ್ದೆರ್. ಹುಷಾರ್ ದಾಂತೆ ತೀರ್ ಪೋದುಪ್ಪು ಪನ್ಪಿನಲ ಸಂಸಯ ಉಂಡು. ಆ ಜನತ್ತ ಪುದರ್, ಅಡ್ರೆಸ್ ಪತ್ತೆ ಆತಿಜಿ. ಅರೆನ ಸಂಬಂಧಿಕೆರ್, ಕುಟುಂಬದಕುಲು ಏರ್ಲಾ ಇತ್ತ್ಂಡ ಉಡುಪಿ ನಗರ ಪೊಲೀಸ್ ಠಾಣೆಗ್ ಸಂಪರ್ಕ ಮಲ್ಪೊಲಿ ಪಂಡ್‌ದ್ ಪೊಲೀಸೆರ್ ತೆರಿಪಾದೆರ್.
ಪುನತ್ತ ವಾಸನೆ ಬರೊಂದಿತ್ತಿನೆನ್ ತೂದು ಸಮಾಜ ಸೇವಕೆ ನಿತ್ಯಾನಂದ ಒಳಕಾಡು ಮೇರ್ ಜಾಗೆಗ್ ಬತ್ತ್‌ದ್ ಪುನನ್ ಅಜ್ಜರಕಾಡ್ ಆಸ್ಪತ್ರೆಗ್ ಕೊನೊವರೆ ಸಹಾಯ ಮಲ್ತೆರ್.
ಉಡುಪಿ ನಗರ ಪೊಲೀಸ್ ಠಾಣೆ ಎಸ್‌ಐ ರತ್ನಾಕರ್ ಪೊಲೀಸ್ ಸಿಬ್ಬಂದಿ ಆನಂದ್ ಗಾಣಿಗ, ಎಲ್ಲಲಿಂಗ ಬೊಕ್ಕ ಪ್ರಸನ್ನ ಜಾಗೆಗ್ ಬತ್ತ್‌ದ್ ಮಹಜರ್ ಮಲ್ದೆರ್.

You Missed