Mon. Nov 23rd, 2026

ಕುಡ್ಲದ ಸುದ್ದಿ | Mangalore News

ಬೊಂಬೈ ಬಂಟರ ಸಂಘ ಸಿಟಿ ಪ್ರಾದೇಶಿಕ ಸಮಿತಿರ್ದ್ ನಡತ್ಂಡ್ ಸನಾತನ ನಡಕೆದ ಸತ್ಸಂಗ ಲೇಸ್

ತುಳುನಾಡು ತುಳುವೆರೆನ ಬೂಡು. ಬೇತೆ ಬೇತೆ ಕಲೆಕ್ಲೆನ ನೆಲೆ ಉಂದು. ಪಡ್ಡಾಯಿ ಕಡಲ್ ಮೂಡಾಯಿ ಘಟ್ಟ, ತೆನ್ಕಾಯಿ ಚಂದ್ರಗಿರಿ, ಕೇರಳದ ಕಾಸ್ರೋಡು, ಬಡಕಾಯಿ ಅಂಕೋಲ ಗಡಿ ಮುಟ್ಟ ವಿಸ್ತಾರವಾಯಿನವು ತುಳುನಾಡು.

ಮುಲ್ಪದ ತುಳುವೆರೆನ ಆಚರಣೆ ಬೇಸಾಯ ಮಲ್ಪುನ ಕಲೆ, ದೈವ ದೇವೆರ್ ನಾಗಾರಾಧನೆ, ವನಸ್ ತಿಂಡಿ ತೆನಸ್, ಉಡುಗೆ ತೊಡುಗೆ, ಜನಪದ ಗೊಬ್ಬು, ಪರ್ಬದ ದಿನ ಮಾತಲ ಸೇರ್ದ್ ತುಳು ಸಂಸ್ಕ್ರತಿ ಪಂದ್ ಲೆಪ್ಪುವೆರ್. ತುಳುನಾಡು ಬೊಕ್ಕ ಬಂಟೆರ್ ಒಂಜೇ ಪಾವೊಲಿದ ರಡ್ಡ್ ಮೋನೆಲು ಪಂಡ ತಪ್ಪಾವಂದ್. ತುಳುನಾಡ್ ದ ಸಾಮಾಜಿಕ, ಆರ್ಥಿಕ, ಸಾಂಸ್ಕ್ರತಿಕ ಬೊಕ್ಕ ಧಾರ್ಮಿಕ ರಂಗಡ್ ಬಂಟ ಸಮುದಾಯದ ಕೊಡುಗೆ ಅನನ್ಯವಾಯಿನವು. ಇತ್ತೆದ ಆಧುನಿಕ ಕಾಲ ಸ್ಥಿತಿ ಬಿರುಗಾಳಿಗ್ ತಿಕ್ಕೊಂದು ಅವಿಭಕ್ತ ಕುಟುಂಬಲು ಹಾಳಾವೊಂದು ಉಂಡು. ಅಜ್ಜೆರ್ ಅಜ್ಜಿ, ಪಿಜ್ಜೆರ್, ಪಿಜ್ಜಿ, ಮಾಮು ಮಾಮಿ, ಮೈತಿನೆ, ಮೈತಿದಿ, ಜೋಕುಲು, ಪುಲ್ಲಿಯಲ್ಲು ಇಪ್ಪುನ ಇಲ್ಲ್ ಲು ಇತ್ತೆ ಬಜೀ ಅಪ್ಪೆ ಅಮ್ಮೆ, ಜೋಕುಲು ಪನ್ಪುನಡೆಗ್ ಬೈದ್ಂಡ್. ಎಚ್ಚದ ಬಂಟೆರ್ ಬೆಂಗ್ಲೂರು ಬೊಂಬೈ, ವಿದೇಶಡ್ ಉಲ್ಲೆರ್. ಅಲ್ಪದ ಸಂಸ್ಕ್ರತಿಗ್ ಸೇರೊಂದೆರ್.

ಇತ್ತೆದ ಜೋಕುಲು ನನದ ಭವಿಷ್ಯ. ಸಂಸ್ಕ್ರತಿನ್ ಒರಿಪಾದ್ ಬುಲೆಪಾವೊಡಾಂಡ ಅಕುಲು ಸಂಸ್ಕ್ರತಿನ್ ಮರತ್ ಬುಡ್ಪುನ ಅಪಾಯನ್ ತೆರಿನ ಬೊಂಬೈ ಬಂಟರ ಸಂಘದ ಸಿಟಿ ಪ್ರಾದೇಶಿಕ ಸಮಿತಿ ಆಯೋಜನೆ ಮಲ್ತಿನ ಸತ್ಸಂಗ ಲೇಸ್ ನಿಜವಾದ್ಲ ಎಡ್ಡೆ ಪ್ರಯತ್ನ. ಬೊಕ್ಕ ಸಕಾಲಿಕ ಬೇಲೆ ಆತ್ಂಡ್.

ಮುಲ್ಪ‌ ಮಸ್ತ್ ಕುಷಿ ಕೊರ್ನ ಇಸಯ ದಾದ ಪಂಡ 122 ಬಂಟ ಜೋಕ್ಲೆರ್ದ್ ಸನಾತನ ನಡತೆದ ಸತ್ಸಂಗ ನಡಪಾಯಿನವು. ಉಂದು ಮಸ್ತ್ ಅದ್ಭುತವಾಯಿನ ಪ್ರಯತ್ನ. ಜೋಕ್ಲೆನ ದೆಸೆಟ್ಟ್ ಅಕ್ಲೆನ್ ನೆತ್ತ ಪರಿಚಯ ಮಲ್ಪುನಗ ಪಜ್ಜಿ ಗೋಡೆಗ್ ದಕ್ಕಿನ ಕಲ್ಲ್ ಚುಚ್ಚಿದ್ ಉಂತುಲೆಕ್ಕ ಜೋಕ್ಲೆನ ಮನಸ್ಸ್ ಡ್ ಬೇರ್ ಊರುದು ಉಂತುಂಡು. ನೆಕ್ಕಾದ್ ಸಿಟಿ ಪ್ರಾದೇಶಿಕ ಸಮಿತಿದ ಮಾತೆರೆನ್ಲ ಮೆಚ್ಚೊಡು.

ಜನವರಿ 27 ಬಯ್ಯಗ್ ಶ್ರೀಮಹಾವಿಷ್ಣು ದೇವಲ್ಯಡ್ ಮಾತೆರ್ಲಾ ಒಟ್ಟಾದ್ ಮಲ್ತಿನ ಸಾಮೂಹಿಕ ಪ್ರಾರ್ತನೆ, ಜೋಕುಲು ಬೊಕ್ಕ ಪೋಷಕೆರ್, ಸಿಟಿ ಪ್ರಾದೇಶಿಕ ಕಾರ್ಯಕಾರಿ ಸಮಿತಿದ ಮಾತ ಸದಸ್ಯೆರ್ ಸೇರ್ದ್ ಭಾರಿ ಭಕ್ತಿ ಶ್ರದ್ಧೆಡ್ ನಡಪಾಯಿನ ಶ್ರೀ ಸರಸ್ವತೀ ದೇವಿನ ಮೆರವಣಿಗೆ ಲೇಸ್ ಗ್ ಧಾರ್ಮಿಕ ಸ್ಪರ್ಶ ಕೊರ್ಪುನಲ್ಪ ಯಶಸ್ವಿ ಆತ್ಂಡ್.

ಬಂಟರ ಭವಿಷ್ಯ ಪುದರ್ ದ ಇಸೇಸ ಬೊಕ್ಕ ಅಪರೂಪದ ಲೇಸ್ ಡ್ ಪಾಲ್ ಪಡೆಯಿನ‌ ಮಾತ ಜೋಕುಲು ಮುಂಡೊಗು ಚಂದನ, ಕುಂಕುಮದ ನಾಮ, ಬಲತ್ತ ಬರಿಕ್ಕ್ ಚಕ್ರ ಎಡತ್ತ ಬರಿಕ್ಕ್ ಶಂಖದ ಮುದ್ರೆದೊಟ್ಟಿಗೆ ದೇವತಾ ಸ್ವರೂಪಿಯಾದ್ ಪೊರ್ಲು ತೋಜಿಯೆರ್. ಇಡೀ ಲೇಸ್ ಡ್ ಸತ್ಸಂಗದ ಸನಾತನ ಸನ್ನಡತೆದ ವಾತಾವರಣನ್ ನಿರ್ಮಿಸಾವೊನೊಟ್ಟಿಗೆ ಅಲೌಕಿಕ ಅನುಭವನ್ ಕೊರ್ತುಂಡು. ಸುರುಕ್ಕು ಲೇಸ್ ಗ್ ಬತ್ತಿನ ಬಂಟ ಪರಿವಾರಗ್ ಪಾನಕ ಕೊರ್ದು ಎದ್ಕೊನಿಯೆರ್. ಉದಿಪನದ ಪೊರ್ತುಡು ಗಣ್ಯೆರೆನ ಸಮಕ್ಷಮ, ಜೋಕ್ಲೆರ್ದೆ ತಾರೆದ ಸಿಂಗಾರ ಪೂ ಅರಳಾದ್, ತುಡರ್ ಅರ್ಲಾದ್ ಚಾಲನೆ ಕೊರಿಯೆರ್. ಗಣ್ಯೆರೆಗ್ ಪೂತ್ತ ಮಾಲೆ, ಪೇಟದ ಬದಲ್ ಗ್ ಸಿರಿಧಾನ್ಯ ಕೊರ್ದು ಮಾನಾದಿಗೆ ಮಲ್ತೆರ್. ಉಂದು ಸತ್ಸಂಗಗ್ ಒಂಜಿ ಇಸೇಸ ಮೆರುಗು ಕೊರ್ದಿತ್ತ್ಂಡ್.

ಶ್ರೀ ಮಹಾವಿಷ್ಣು ಜಾತ್ರೆದ ಪೊರ್ತುಡು ಜೋಕ್ಲೆರ್ದ್ ಶ್ಲೋಕ ಪಠಣ, ಭಜನೆ ಮಲ್ಪುನ ಲೇಸ್ ನಡಪಾವ ಪಂದ್ ನಿರ್ಧಾರ ಮಲ್ದ್ಂಡ್. ಉಂದು ಮಾತೆಕ್ಲಾ ಮಿಗಿಲಾದ್ ಕಣ್ಣ್ ಗ್ ತೋಜುನ ನಿಜ ದೇವೆರ್ ಅಪ್ಪ, ಅಮ್ಮಗ್ ಜೋಕ್ಲೆಲೆರ್ದ್ ಪಾದ ಪೂಜೆ, ಪುಷ್ಪಾರ್ಚನೆ, ಆರತಿ ಬೆಳಗಾವುನವು ಇಡೀ ಲೇಸ್ ದ ಮುಖ್ಯ ಇಸಯ ಆತ್ಂಡ್. ಬೊಕ್ಕ ಉಂದುವೇ ಸನಾತನ ಸನ್ನಡತೆ. ಉಂದುವೇ ಸತ್ಸಂಗ. ಮಾತ ಜೋಕುಲು ಮನಸಾರೆ ಈ ಪಾದ ಪೂಜೆನ್ ಮಲ್ಪುನಗ ಪೋಷಕೆರೆನ ಕಣ್ಣ್ ಡ್ ಖುಷಿ ತೋಜೊಂದು ಇತ್ತ್ಂಡ್.

ಜೋಕುಲು ಆರತಿ ಮಲ್ಪುನಗ ಅಂತೂ ಕೆಲವು ಪೊಷಕೆರೆನ ಮನಸ್ ದಿಂಜಿದ್ ಬತ್ತ್ಂಡ್. ಉಂದುವೇ ಲೇಸ್ ದ ಯಶಸ್ವಿ ಅತ? ಜೋಕ್ಲೆನೊಟ್ಟಿಗೆ ತರೆಕ್ಕ್ ಅಪ್ಪ ಅಮ್ಮ ಪೋಷಕೆರ್ ಆಯಸ್ಸು ವೃದ್ದಿಗಾದ್ ಮಂತ್ರಾಕ್ಷತೆ ಪಾಡ್ದ್ ಆಶೀರ್ವಾದ ಮಲ್ತೆರ್. ಪಾದ ಪೂಜೆ ಮಲ್ಪುನಗ ಮಂತ್ರಘೋಷ ಮಾತೆರೆನ್ಲಾ ನನಾತ್ ಭಕ್ತಿಭಾವದಡಿಕ್ಕ್ ಕೊನೊಂಡು. ಅವೆರ್ದ್ ಬೊಕ್ಕ ಪ್ರತಿಯೊರಿ ಜೋಕ್ಲೆಗ್ಲಾ ಕಾಣಿಕೆ ಡಬ್ಬಿ ಕೊರ್ದು ಅಕ್ಲೆನ ಕೈಕ್ಕ್ ಕಾಸ್ ನ್ ಕೊರ್ದು ಆ ಕಾಣಿಕೆನ್ ಶ್ರೀ ಮಹಾವಿಷ್ಠು ದೇವೆರೆಗ್ ಅರ್ಪಣೆ ಮಲ್ತೆರ್. ಕಾಣಿಕೆ ಡಬ್ಬಿನ್ ಜೋಕ್ಲೆಗ್ ಕೊರಿಯೆರ್. ಅವ್ವತ್ತಂದೆ ಜೋಕ್ಲೆಗ್ ಪಾದ ಪೂಜೆಗ್ ಪ್ಲೇಟ್ ನ್ ಕೊರ್ದು ಪಾದ ಪೂಜೆ ಆಯಿನ ಬೊಕ್ಕ ನೆಂಪುಗಾದ್ ಆ ಪ್ಲೇಟ್ ನ್ ಜೋಕ್ಲೆಗ್ ಕೊರಿಯೆರ್. ನೆತ್ತೊಟ್ಟಿಗೆ ಪ್ರತಿ ಬಾಲೆಗ್ ವಸ್ತ್ರದಾನ ಮಲ್ತೆರ್. ಬೊಕ್ಕ ಉಡುಗಿರ, ಚಾಕೋಲೇಟ್‌ ಕೊರಿಯೆರ್.

ಗುರುಕುಲಾಯಿನ ವಿದ್ವಾನ್ ಅರವಿಂದ ಬನ್ನಿಂತಾಯೆರ್ ವೇದ, ಶಾಸ್ತ್ರ, ದಿನ ನಿತ್ಯ ಚಟುವಟಿಕೆಡ್ ದೇವೆರೆನ್ ಪ್ರಾರ್ಥನೆ ಮಲ್ಪುನ ರೀತಿ ಬಗೆಟ್ಟ್ ವಿವರಣೆ ಕೊರ್ದು, ನನಗ್ ಸುರು ಮಲ್ಪುನ ಗುರುಕುಲಡ್ ಜೋಕ್ಲೆಗ್ ಸವಿಸ್ತಾರವಾಯಿನ ಭೋದನೆ ಕೊರ್ರೆ ಉಂಡು ಪಂದ್ ಭರವಸೆ ಕೊರಿಯೆರ್. ನೆತ್ತೊಟ್ಟಿಗೆ ಪ್ರತಿ ವರ್ಷ ನಡಪುನ ಶ್ರೀ ಮಹಾವಿಷ್ಣು ಜಾತ್ರೆಡ್ ಈ ಚಿಣ್ಣರ ಶ್ಲೋಕ ಪಠಣ ಭಜನೆದೊಟ್ಟಿಗೆ ದೇವೆರೆನ ಬಲಿಪೂಜೆ ನಡಪಾಯೆರೆ ಉಂಡು ಪಂದ್ ತೆರಿಪಾಯೆರ್.

ಈ ಸತ್ಸಂಗಡ್ 122 ಜೋಕುಲು ಬೊಕ್ಕ ಅಕ್ಲೆನ ಪಾಲಕೆರ್ ಪೋಷಕೆರ್ ಪಾಲ್ ಪಡೆದಿತ್ತೆರ್. ಬೊಂಬೈದ ಇತಿಹಾಸಡೇ ಸುರುತ್ತ ಸರ್ತಿ ಪನ್ಪುನಂಚಿನ ಸತ್ಸಂಗ ನಡತ್ಂಡ್. ಈತೆ ಅತ್ತ್ ಚಿಣ್ಣೆರೆರ್ದ್ ಲೇಸ್ ಉದಿಪನ ಮಲ್ಪುನಗ ಬಂಟ ಭವಿಷ್ಯ ಪದ್ಯ ಪಂಡೆರ್. ಈ ಪದ್ಯನ್ ಈ ಲೇಸ್ ಗ್ ಪಂದೇ ಐಲೇಸಾ ದಿ ವಾಯ್ಸ್‌ ಆಫ್‌ ಓಷನ್‌ (ರಿ.) ಸಂಸ್ಥೆ ನಿರ್ಮಾಣ ಮಲ್ದ್ಂಡ್. ಈ ಪದ್ಯಗ್ ಅಂಧ್ರಪ್ರದೇಶದ ಯುವ ಕಂಪೋಸರ್‌ ಅಕ್ಷಯ್‌ ಮ್ಯೂಸಿಕ್‌ ಕೊರ್ಂಡ ಅಶೋಕ್‌ ಪಕ್ಕಳ ಮೇರ್ ಪದ್ಯ ಬರೆತೆರ್. ಈ ಪದ್ಯ ಬಂಟರ ಸಂಘದ ಶೈಲಜಾ ಅಮರನಾಥ್‌ ಶೆಟ್ಟಿ, ಪ್ರಶಸ್ತಿ ವಿಜೇತೆರ್ ಡಾ. ಪಲ್ಲವಿ ಬೊಕ್ಕ ರಾಶಿ, ಮಾಸ್ಟರ್‌ ಸುವಿದ್‌ ಮಾರ್ನಾಡ್‌, ಸ್ವರ ಮಾರ್ನಾಡ್‌ ಮೊಕ್ಲೆನ ಸ್ವರಟ್ಟ್ ರೇವತಿ ರಾಗಡ್ ಪಂತೆರ್. ಮಾತೆರೆನ್ಲಾ ಈ ಪದ್ಯ ಮೋಡಿ ಮಲ್ದ್ಂಡ್.

ಬಂಟ ಭವಿಷ್ಯ ಸತ್ಸಂಗಡ್ ಶ್ರೀ ಮಹಾವಿಷ್ಣು ಪಾಠ ಶಾಲೆನ್ ಉದಿಪನ ಮಲ್ತೆರ್. ನೆತ್ತ ವರ್ಷಪೂರ್ತಿ ಪ್ರಾಯೋಜಕತ್ವನ್ ಡಾ. ಆರ್‌ ಕೆ ಶೆಟ್ಟಿ ಮೇರ್ ಮಲ್ಪುವೆ ಪಂಡೆರ್. ಲೇಸ್ ನ್ ಡಾ. ಪೊರ್ಣಿಮಾ ಶೆಟ್ಟಿ ನಡಪಾದ್ ಕೊರಿಯೆರ್. ಸುರೇಂದ್ರಕುಮಾರ್ ಮಾರ್ನಾಡ್ ಸೊಲ್ಮೆ ಸಂದಾಯೆರ್.

ಈ ಲೇಸ್ ಗ್ ಅನುವು ಮಲ್ತ್ ದ್ ಕೊರಿನ ಬೊಂಬೈ ಬಂಟರ ಸಂಘದ ಗುರ್ಕಾರೆ ಪ್ರವೀಣ್ ಭೋಜ ಶೆಟ್ಟಿ ಬೊಕ್ಕ ಕೂಟ, ಸಿಟಿ ಪ್ರಾದೇಶಿಕ ಸಮಿತಿದ ಕಾರ್ಯಾಧ್ಯಕ್ಷೆರ್ ಅಶೋಕ್ ಪಕ್ಕಳ, ಸಿಟಿ ಪ್ರಾದೇಶಿಕ ಸಮಿತಿದ ಸರ್ವ ಸದಸ್ಯೆರ್, ಮಹಿಳಾವಿಭಾಗ, ಯೂತ್ ವಿಂಗ್‌ ಸಹಕಾರ ಮಲ್ತಿನ ಸರ್ವೆಗ್ಲಾ ಅಭಿನಂದನೆಲು. ಸೊಲ್ಮೆದ ಭಾವನೆ ಮೂಡಿಸಾಯಿನ ಸಾರ್ಥಕ ಲೇಸ್. ಲೇಸ್ ದ ಅಕೇರಿಡ್ ಊರುದ ರುಚಿಶುಚಿ ಆಯಿನ ತೆನಸುಲು ಮಾತೆರ್ನಲ ಬಂಜಿ ತಂಪು ಮಲ್ತ್ಂಡ್ . ಈ ಲೇಸ್ ನ್ ಆಯೋಜನೆ ಮಲ್ತಿನ ಸಿಟಿ ಪ್ರಾದೇಶಿಕ ಸಮಿತಿಗ್ ಕೈ ಜೋಡಿಸಾಯಿನ ಮಾತೆರೆಗ್ಲಾ ಕುಡೊರ ಸೊಲ್ಮೆಲು.

ವರದಿ: ನೀತಾ ರಾಜೇಶ್ ಶೆಟ್ಟಿ

ಫೆ.7-8: ಕಾಪಿಕಾಡ್‌ ಉಮಾಮಹೇಶ್ವರಿ ದೇವಸ್ಥಾನಡ್‌ ಜಾತ್ರಾ ಮಹೋತ್ಸವ

ಉಳ್ಳಾಲ: ಕಾಪಿಕಾಡ್‌ ಶ್ರೀ ಉಮಾಮಹೇಶ್ವರಿ ದೇವಸ್ಥಾನಡ್‌ ಫೆ.7 ಬೊಕ್ಕ 8 ತಾರೀಕ್‌ ದಾನಿ ಶ್ರೀ ಕ್ಷೇತ್ರದ ತಂತ್ರಿಲಾಯಿನ ಬ್ರಹ್ಮಶ್ರೀ ಕುಂಟಾರು ರವೀಶ್‌ ತಂತ್ರಿಲೆನ ಮಾರ್ಗದರ್ಶನ ಬೊಕ್ಕ ನೇತೃತ್ವಡ್‌ ವರ್ಷಾಧಿದ ಜಾತ್ರಾ ಮಹೋಚ್ಚಯ ನಡಪೆರೆ ಉಂಡು.

 

ಫೆ.7 ತಾರೀಕ್‌ ದಾನಿ ಕಾಂಡೆ ಗಣಪತಿ ಹೋಮ, ನವಕ ಕಲಶಾಭಿಷೇಕ, ಮಧ್ಯಾಹ್ನ ಮಹಾಪೂಜೆ, ಪ್ರಸಾದ ವಿತರಣೆ, ಅನ್ನಸಂತರ್ಪಣೆ, ರಾತ್ರೆ ಸಾಮೂಹಿಕ ರಂಗಪೂಜೆ, ಮಹಾಪೂಜೆ ಬೊಕ್ಕ ಭೂತ ಬಲಿ ಉಚ್ಚಯ ನಡಪೆರೆ ಉಂಡು.

ಫೆ.8 ತಾರೀಕ್‌ ದಾನಿ ಕಾಂಡೆ ದೇವೆರ್ನ ಉತ್ಸವ, ದರ್ಶನ ಬಲಿ, ಬಟ್ಟಲ್‌ ಕಾಣಿಕೆ, ರಾಜಾಂಗಣ ಪ್ರಸಾದ, ಮಂತ್ರಾಕ್ಷತೆ, ಮಹಾಪೂಜೆ, ಅನ್ನಸಂತರ್ಪಣೆ ನಡಪೆರೆ ಉಂಡು. ರಾತ್ರೆ 8 ಗಂಟೆಗ್‌ ಮಹಾಪೂಜೆ, ಅನ್ನಸಂತರ್ಪಣೆ, ಪಂಜುರ್ಲಿ ದೈವದ ನೇಮೋಚ್ಚಯ, ಬೊಕ್ಕ ಗುಳಿಗ ದೈವದ ಕೋಲ ನಡಪೆರೆ ಉಂಡು.
ಈ ಮಾತ ಕಾರ್ಯಕ್ರಮಡ್ ಎಚ್ಚಿನ ಸಂಖ್ಯೆಡ್ ಪಾಲ್ ಪಡೆದ್ ತನು-ಮನ-ಧನದೊಟ್ಟಿಗೆ ಸಹಕಾರ ಮಲ್ತ್ ಗಂಧ ಪ್ರಸಾದ ಸ್ವೀಕಾರ ಮಲ್ಪೊಡು ಪಂದ್ ಲೆಪ್ಪೋಲೆಡ್ ತೆರಿಪಾದೆರ್.

ಕೊಡವೂರು :ಕವಿ ಅರುಣಾಬ್ಜ ಸಂಸ್ಮರಣೆ

ಜೈ ತುಳುನಾಡ್ (ರಿ) ಒಡಿಪು ವಲಯ ಅಂಚನೆ ಹಳೆವಿದ್ಯಾರ್ಥಿ ಸಂಘ, ಯುವಕ ಸಂಘ (ರಿ) ಕೊಡವೂರು ಉಂದೆತ್ತ ಮುತಾಲಿಕೆಡ್ ಕವಿ ಅರುಣಾಬ್ಜ ಮೆರೆನ ಸಂಸ್ಮರಣಾ ಲೇಸ್ ಇಂಚಿಪ್ಪಗ್ ಕೊಡವೂರ್‌ಡ್ ನಡತ್ಂಡ್.

ಕೊಡವೂರು ತೊಂದುಬೆಟ್ಟು ಸಾದಿಡ್ ಸ್ಥಳೀಯ ಆಡಳಿತರ್ದ್ ಅಧಿಕೃತವಾದ್ ಅರುಣಾಬ್ಜ ಮಾರ್ಗ ಪಂದ್ ಘೋಷಣೆ ಮಲ್ತ್‌ದಿತ್ತ್‌ದ್ ನಗರಸಭಾ ಸದಸ್ಯೆರ್ ವಿಜಯ ಕೊಡವೂರು ಪುದರ್ ಪಲವೆನ್ ಪಾಡಿಯೆರ್.

ಮಲ್ಲ ಬಿನ್ನೆರಾದ್ ತುಳು ಸಾಹಿತ್ಯ ಅಕಾಡೆಮಿದ ಮಾಜಿ ಸದಸ್ಯೆರ್ ಡಾ| ಆಕಾಶ್ ರಾಜ್ ಜೈನ್ ಪಾತೆರ್ದ್, ತುಳು ಭಾಷೆ 8ನೇ ಪರಿಚ್ಛೇದಗ್ ಸೇರ್ಪಡೆಯಾಪುನ ಪೂರ್ವಭಾವಿಯಾದ್ ತುಳುಕ್ಕ್ ಶಾಸ್ತ್ರೀಯ ಸ್ಥಾನಮಾನ ತಿಕ್ಕುಲೆಕ್ಕ ಆಯರೆ ತುಳು ಭಾಷೆದ ಯೋಗ್ಯತೆನ್ ತುಳುವೆರ್ ಆಯಿನ ನಮ ಆಡಳಿತ ನಡಪಾವುನ ಸರ್ಕಾರ ಕೈ ಅಂಚನೆ ನಾಡ್‌ದ ಜನಕ್ಲೆಗ್ ತೆರಿಯೊನುನ ಅನಿವಾರ್ಯತೆ ಉಂಡು ಪಂದ್ ಪಂಡೆರ್.

ತುಳು ಪರ ಸಂಘಟಕೆರ್ ಶರತ್ ಕೊಡವೂರು 14ನೇ ಶತಮಾನಡ್ ತುಳು ಲಿಪಿಟ್ಟ್ ಮಹಾಭಾರತ ಬರೆಯಿನ ಕವಿ ಅರುಣಾಬ್ಜನ ಬಗೆಟ್ ಪಾತೆರಿಯೆರ್.

ಈ ಪೊರ್ತುಡು ಕೊಡವೂರು ಶ್ರೀ ಶಂಕರನಾರಾಯಣ ದೇವಸ್ಥಾನದ ವ್ಯವಸ್ಥಾಪನಾ ಸಮಿತಿದ ಅಧ್ಯಕ್ಷೆರ್ ಸಾಧು ಸಾಲ್ಯಾನ್, ಶ್ರೀ ಶಂಕರನಾರಾಯಣ ಶಿಕ್ಷಣ ಪ್ರತಿಷ್ಠಾನದ ಅಧ್ಯಕ್ಷೆರ್ ಟಿ.ರಾಘವೇಂದ್ರ ರಾವ್, ಸುಮನಸಾ ಕೊಡವೂರು ಉಂದೆತ್ತ ಅಧ್ಯಕ್ಷೆರ್ ಪ್ರಕಾಶ್ ಜಿ ಕೊಡವೂರು, ಅಯ್ಯಪ್ಪ ಭಕ್ತ ವೃಂದದ ಗುರುಸ್ವಾಮಿ ರಾಮ ಸೇರಿಗಾರ್, ಹಳೆವಿದ್ಯಾರ್ಥಿ ಸಂಘದ ಅಧ್ಯಕ್ಷೆರ್ ಸತೀಶ್ ಕೊಡವೂರು, ಯುವಕ ಸಂಘದ ಅಧ್ಯಕ್ಷೆರ್ ದೀಪಕ್ ವಿ. ದೇವಾಡಿಗ ಪಾಲ್ ಪಡೆದ್ ಇತ್ತೆರ್.

ಯುವಕ ಸಂಘದ ಗೌರವಾಧ್ಯಕ್ಷೆರ್ ಪ್ರಭಾತ್ ಕೋಟ್ಯಾನ್, ಹಿಂದೂ ಯುವ ಸೇನೆದ ಅಜಿತ್ ಕೊಡವೂರು, ಅಶೋಕ್ ಶೆಟ್ಟಿಗಾರ್, ಜೈ ತುಳುನಾಡ್ ಸಂಚಾಲಕೆರ್ ಸುಮಂತ್ ಹೆಬ್ರಿ, ರಾಜೇಂದ್ರ ಬಾಚನಬೈಲು, ಶೇಖರ್ ಉದ್ದಿನ ಹಿತ್ತಲು, ಸಂತೋಷ್ ದೇವಾಡಿಗ,ಸಾಗರ್ ಭಂಡಾರಿ, ಸುಶೀಲ ಜಯಕರ್, ಶೈಲಜ, ಸ್ವಾತಿ ಕೊಡವೂರು ಈ ಪೊರ್ತುಡು ಇತ್ತೆರ್. ಸಂತೋಷ್ ಕಟಪಾಡಿ ಬತ್ತಿನ ಬಿನ್ನೆರೆನ್ ಎದ್ಕೊನಿಯೆರ್. ವಿಶಾಂತ್ ಲೇಸ್ ಸುಧಾರಿಕೆ ಮಲ್ತ್‌ದ್ ಸೊಲ್ಮೆ ಸಂದೈತ ಮಲ್ತೆರ್.

ಐಕಳಬಾವ ಕಂಬುಲ ಐಕಳೋತ್ಸವ ಡಾ| ಎಂ.ಎನ್ ರಾಜೇಂದ್ರ ಕುಮಾರ್ ಮೆರೆಗ್ ಕರಾವಳಿ ರತ್ನ ಪುರಸ್ಕಾರ

ಕಿನ್ನಿಗೋಳಿ: ಐಕಳಡ್ ನಡಪುನ ಕಂಬುಲ ಜಾನಪದ ಬೊಕ್ಕ ಧಾರ್ಮಿಕ ಐತಿಹಾಸ ಇಪ್ಪುನವು. ಉಂದು ಒಂಜಿ ಗ್ರಾಮದ ಪರ್ಬಲ ಅಂದ್. ಉಭಯ ಜಿಲ್ಲೆಡ್ ನಡಪುನ ಎಚ್ಚಿನ ಕಂಬುಲಗ್ ಬ್ಯಾಂಕ್ ವತಿರ್ದ್ ಸಹಕಾರ ಕೊರೊಂದು ಉಲ್ಲ ಪಂದ್ ಡಾ| ಎಂ.ಎನ್ ರಾಜೇಂದ್ರ ಕುಮಾರ್ ಪಂಡೆರ್. ಆರ್ ಶನಿವಾರ ಬಯ್ಯಗ್ ಐಕಳ ಬಾವ ಕಾಂತಾಬಾರೆ ಬೂದಾಬಾರೆ 48ನೇ ವರ್ಷದ ಕಂಬುಲದ ಸಭೆನ್ ಉದಿಪನ ಮಲ್ತ್‌ದ್ ಪಾತೆರಿಯೆರ್. ಐಕಳ ಬಾವ ದೇವಿಪ್ರಸಾದ್ ಶೆಟ್ಟಿ ಸಮಿತಿದ ಆದ್ಯಕ್ಷೆರ್ ಆಯಿಬೊಕ್ಕ ಕಂಬುಲಗ್ ಪೊಸ ರೂಪ ತಿಕ್ಕ್‌ದ್ಂಡ್.

ಬೇತೆ ಕಂಬುಲಗ್ ಮಾದರಿ ಆಪುನ ಮಾತ್ರ ಅತ್ತಂದೆ ದೇಶ ವಿದೇಶಡ್ ಐಕಳ ಕಂಬುಲದ ಬಗ್ಗೆ ಪಾತೆರುನಂಚ ಆತ್ಂಡ್. ಸರಕಾರರ್ದ್ ಕಂಬುಲಗ್ ಸಹಕಾರ ತಿಕ್ಕಡ್ ಪಂದ್ ಹಾರೈಸಾಯೆರ್. ವಿಧಾನ ಪರಿಷತ್ ವಿಪಕ್ಷ ನಾಯಕೆರ್ ಕೋಟ ಶ್ರೀನಿವಾಸ ಪೂಜಾರಿ ಬೊಕ್ಕ ಡಾ| ಎಂ.ಎನ್ ರಾಜೇಂದ್ರ ಕುಮಾರ್ ಕಂಬುಲ ಕರೆಟ್ಟ್ ಗೇಟ್ ಸಿಸ್ಟಮ್ ಬೊಕ್ಕ ಪೋಟೋಫಿನಿಶ್ ತಂತ್ರಜ್ಞಾನಗ್ ಚಾಲನೆ ಕೊರಿಯೆರ್. ಜಾಗತಿಕ ಬಂಟರ ಸಂಘದ ಒಕ್ಕೂಟದ ಅಧ್ಯಕ್ಷೆರ್ ಐಕಳ ಹರೀಶ್ ಶೆಟ್ಟಿ ಗುರ್ಕಾರ್ಮೆನ್ ವಹಿಸ್‌ದ್ ಇತ್ತೆರ್. ಮಾಜಿ ಸಚಿವೆರ್ ರಮಾನಾಥ ರೈ, ಕೆಪಿಸಿಸಿ ಪ್ರಧಾನ ಕಾರ್ಯದರ್ಶಿ ಮಿಥುನ್ ರೈ, ವಿನಯ ಕುಮಾರ್ ಸೋರಿಂಜೆ, ಜಯಕರ ಶೆಟ್ಟಿ, ಇಂದ್ರಾಳಿ, ಆಳ್ವಾಸ್ ಶಿಕ್ಷಣ ಸಂಸ್ಥೆದ ವಿವೇಕ್ ಆಳ್ವ, ಕೃಷ್ಣ ಪ್ಯಾಲೇಸ್‌ದ ಕೃಷ್ಣ ಶೆಟ್ಟಿ, ಉಮಾ ಕೃಷ್ಣ ಶೆಟ್ಟಿ, ಕೊಳಕೆ ಇರ್ವತ್ತೂರು, ಬಾಸ್ಕರ ಕೋಟ್ಯಾನ್, ರೋಹಿತ್ ಹೆಗ್ಡೆ ಎರ್ಮಾಳು, ಎಸ್‌ಡಿಸಿಸಿ ಬ್ಯಾಂಕ್ ನಿರ್ದೇಶಕೆರ್ ಶಶಿಕುಮಾರ್ ರೈ ಮುಲ್ಲಟ್ಟು, ವಾದಿರಾಜ ಶೆಟ್ಟಿ ಮುಂಡ್ಕೂರು, ಬಾಲಕೃಷ್ಣ ಶೆಟ್ಟಿ, ಸುಚರಿತ ಶೆಟ್ಟಿ, ಐಕಳ ಗುಣಪಾಲ ಶೆಟ್ಟಿ ಮುಂಬಯಿ, ಐಕಳ ಗ್ರಾ.ಪಂ ಅಧ್ಯಕ್ಷೆರ್ ದಿವಾಕರ ಚೌಟ, ಜಯಪ್ರಕಾಶ್ ತುಂಬೆ, ವೇಣುಗೋಪಾಲ ಶೆಟ್ಟಿ, ಸುದೀರ ಕುಮಾರ್ ಶೆಟ್ಟಿ, ಗೋಪಾಲಕೃಷ್ಣ ಭಟ್, ನಮ್ಮ ಕುಡ್ಲ ವಾಹಿನಿದ ಲೀಲಾಕ್ಷ ಕರ್ಕೇರಾ, ಕುಶಲ ಭಂಡಾರಿ ಐಕಳ, ಪ್ರಕಾಶ್ ಶೆಟ್ಟಿ ಪಡುಹಿತ್ಲು, ಪುರಂದರ ವಿ ಶೆಟ್ಟಿ ಐಕಳ ಬಾವ, ಸ್ವರಾಜ್ ಶೆಟ್ಟಿ ಮುಂಡ್ಕೂರು, ಐಕಳ ಮುರಳೀಧರ ಶೆಟ್ಟಿ, ಲೀಲಾಧರ ಶೆಟ್ಟಿ ಈ ಪೊರ್ತುಡು ಇತ್ತೆರ್.

 

ಡಾ| ದೇವಿಪ್ರಸಾದ್ ಶೆಟ್ಟಿ ಬತ್ತಿ ಬಿನ್ನೆರೆನ್ ಎದ್ಕೊಂದು, ಚಿತ್ತರಂಜನ್ ಭಂಡಾರಿ ಸೊಲ್ಮೆ ಸಂದಾಯ ಮಲ್ತೆರ್. ಸಾಯಿನಾಥ ಶೆಟ್ಟಿ ಲೇಸ್‌ದ ಸುಧಾರಿಕೆ ಮಲ್ತೆರ್. (ಬಾಕ್ಸ್) ಕರಾವಳಿ ರತ್ನ ಪುರಸ್ಕಾರ ಪ್ರದಾನ ಐಕಳ ಕಂಬುಲದ ಗೌರಾವಾಧ್ಯಕ್ಷೆರ್ ಡಾ|ಎಂ.ಎನ್ ರಾಜೇಂದ್ರ ಕುಮಾರ್ ಮೆರೆಗ್ ಕರಾವಳಿ ರತ್ನ ಬಿರುದು ಕೊರ್ದು ಮಾನಾದಿಗೆ ಮಲ್ತೆರ್. ಜಾಗತಿಕ ಬಂಟರ ಸಂಘದ ಒಕ್ಕೂಟದ ಗುರ್ಕಾರ್ಲು ಐಕಳ ಹರೀಶ್ ಶೆಟ್ಟಿ ಅದಾನಿ ಫೌಂಡೇಶನ್ ಗುರ್ಕಾರ್ಲು ಕಿಶೋರ್ ಆಳ್ವ, ಮುಂಬಯಿ ಉದ್ಯಮಿ ಕೃಷ್ಣ ಶೆಟ್ಟಿ ದಂಪತಿಲೆನ್ ಮಾನಾದಿಗೆ ಮಲ್ತೆರ್.

ಸುಬ್ರಹ್ಮಣ್ಯಡ್ ರಾಜ್ಯಮಟ್ಟದ ಕಬಡ್ಡಿ ಪಂದ್ಯಾಟ

ಕರ್ನಾಟಕ ರಾಜ್ಯ ಅಮೆಚೂರ್ ಕಬಡ್ಡಿ ಅಸೋಸಿಯೇಷನ್, ದಕ್ಷಿಣ ಕನ್ನಡ ಜಿಲ್ಲಾ ಅಮೆಚೂರ್ ಕಬಡ್ಡಿ ಅಸೋಸಿಯೇಷನ್ ,ಕಡಬ ತಾಲೂಕು ಅಮೆಚೂರು ಕಬಡ್ಡಿ ಅಸೋಸಿಯೇಷನ್, ಬೊಕ್ಕ ರವಿ ಕಕ್ಕೆ ಪದವು ಸಮಾಜ ಸೇವಾ ಟ್ರಸ್ಟ್ ಸುಬ್ರಮಣ್ಯ ನೆತ್ತ ಒಟ್ಟು ಸೇರಿಗೆಡ್ ರಾಜ್ಯಮಟ್ಟದ ಲೆಪ್ಪು ಕೊರ್ತಿನ ಕೂಟದಕ್ಲೆರ್ದ್ ರಾತ್ರೆ ಬೊಲ್ಪುದ “ಅರ್ಜುನ ಟ್ರೋಫಿ” ಮ್ಯಾಟ್ ಕಬಡ್ಡಿ ಪಂದ್ಯಾಟ ಐತಾರ (ಇನಿ) ಸುಬ್ರಹ್ಮಣ್ಯೇಶ್ವರ ಪದವಿ ಪೂರ್ವ ಕಾಲೇಜಿದ ಮೈದಾನ್ ಡ್ ನಡಪರೆ ಉಂಡು.

ಲೇಸ್ ದ ಉದಿಪನನ್ ಶ್ರೀ ಸಂಪುಟ ನರಸಿಂಹ ಸ್ವಾಮಿ ಮಠ ಸುಬ್ರಮಣ್ಯ ಶ್ರೀ ಶ್ರೀ ವಿದ್ಯಾ ಪ್ರಸನ್ನ ತೀರ್ಥ ಸ್ವಾಮೀಜಿ ಮಲ್ಪೆರೆ ಉಲ್ಲೆರ್. ಸುಳ್ಯ ಶಾಸಕಿ ಭಾಗೀರಥಿ ಮುರುಳಿ ಅಂಚನೆ ಬೇತೆ ಬೇತೆ ಬಿನ್ನೆರ್ ಪಾಲ್ ಪಡೆಯೆರೆ ಉಲ್ಲೆರ್.

ಪಂದ್ಯಾಟಡ್ ಲೆಪ್ಪು ಕೊರ್ತಿನ ಎನ್ಮ ತಂಡದಕುಲು ಪಾಲ್ ಪಡೆಯೆರೆ ಉಲ್ಲೆರ್.
ಅಂಚನೆ ಸಾಧಕೆರೆಗೆ ಮಾನಾದಿಗೆ ನಡಪರೆ ಉಂಡು ಪಂದ್
ಸಂಘಟಕೆರ್ ತೆರಿಪಾದೆರ್.

ಕಂಬುಲ ತುಳುನಾಡ ಸಂಸ್ಕೃತಿದ ಮಾಮಲ್ಲ ನಿಶಾನೆ : ಶ್ರೀ ಚಂದ್ರಶೇಖರ ಸ್ವಾಮಿ

ಐಕಳ : ಕಂಬುಲ ತುಳುನಾಡ್ ದ ಸಾಂಸ್ಕೃತಿಕ ಲೋಕದ ಒಂಜಿ ಮಾಮಲ್ಲ ನಿಶಾನೆ ಪಂದ್ ಅಂತಾರಾಷ್ಟ್ರೀಯ ವಾಸ್ತು ತಜ್ಞೆರ್ ಶ್ರೀ ಚಂದ್ರಶೇಖರ ಸ್ವಾಮಿ ಪಂಡೆರ್.

ಆರ್ ಐಕಳ ಕಂಬುಳ ಸಮಿತಿ ವತಿರ್ದ್ ಸನಿಯಾರ ನಡತಿನ ಐಕಳಬಾವ ಕಂಬುಲ “ಐಕಳೋತ್ಸವ’ ನ್ ಉದಿಪನ ಮಲ್ತ್ ದ್ ಪಾತೆರಿಯೆರ್.
ಈ ಕಾರ್ಯಕ್ರಮಟ್ಟ್ ಶ್ರೀ ಚಂದ್ರಶೇಖರ ಸ್ವಾಮಿಲು ಬೊಕ್ಕ ಉದ್ಯಮಿ ಕನ್ಯಾನ ಸದಾಶಿವ ಶೆಟ್ಟಿ ಮೆರೆನ್ ಮಾನಾದಿಗೆ ಮಲ್ತೆರ್.


ಈ ಪೊರ್ತುಡು ಗಣೇಶ್ ಭಟ್, ವರುಣ್ ಭಟ್, ಶಾಸಕೆರ್ ಉಮಾನಾಥ ಕೋಟ್ಯಾನ್, ಜಾಗತಿಕ ಬಂಟರ ಸಂಘಗಳ ಒಕ್ಕೂಟ ಅಧ್ಯಕ್ಷೆರ್ ಐಕಳ ಹರೀಶ್ ಶೆಟ್ಡಿ, ಉದ್ಯಮಿ ಕನ್ಯಾನ ಸದಾಶಿವ ಶೆಟ್ಟಿ, ಶಾರದಾ ಭಟ್, ರಾಹುಲ್ ಭಟ್, ರಜನಿ ಸಿ ಭಟ್, ವಿಶ್ವನಾಥ ಭಟ್, ಮೂಲ್ಕಿ ಬಂಟರ ಸಂಘದ ಅಧ್ಯಕ್ಷೆರ್ ಅಶೋಕ್ ಕುಮಾರ್ ಶೆಟ್ಟಿ, ಕಿನ್ನಿಗೋಳಿ ವ್ಯವಸಾಯ ಸೇವಾ ಸಹಕಾರಿ ಸಂಘದ ಅಧ್ಯಕ್ಷೆರ್ ಲವ ಶೆಟ್ಟಿ, ಮೂಲ್ಕಿ ಠಾಣಾಧಿಕಾರಿ ವಿದ್ಯಾಧರ್ ಬೈಲಕೆರೆ, ನಿರ್ಮಾಪಕಿ ವನಿತಾ ವಿಜಯ ಕುಮಾರ್ ರೆಡ್ಡಿ, ಉದ್ಯಮಿಲಾಯಿನ ಹರೀಶ್ ಶೆಟ್ಟಿ, ದಿನಕರ ಶೆಟ್ಟಿ, ತೆರೆಸಾ ಕ್ರಾಸ್ತ, ಉದ್ಯಮಿ ಪುರಂದರ ಶೆಟ್ಟಿ, ಓಂಪ್ರಕಾಶ್ ಶೆಟ್ಟಿ, ಕೇಶವ ಅಳ್ವ, ಮುಂಬೈ ಸಮಿತಿದ ಅಧ್ಯಕ್ಷೆರ್ ಕುಶಲ್ ಭಂಡಾರಿ, ವೇಣುಗೋಪಾಲ್, ಎಂ.ಆರ್.ಪಿ.ಎಲ್ ನ ಗ್ರೂಪ್ ಮ್ಯಾನೇಜರ್ ಸುದರ್ಶನ್, ಉಳ್ಳಾಲ ಗುತ್ತು ಸದಾನಂದ ಶೆಟ್ಟಿ , ತ್ಯಾಗರಾಜ ಆಚಾರ್ಯ, ಭುವನಾಭಿರಾಮ ಉಡುಪ, ಬಾಸ್ಕರ ಶೆಟ್ಟಿ ಏಳಿಂಜೆ, ಸುಧಾಮ ಶೆಟ್ಟಿ ಐಕಳ, ಉಲ್ಲಾಸ್ ಶೆಟ್ಟಿ ಮೊಕುಲು ಮಾತ ಇತ್ತೆರ್.

ಕಂಬಳ ಸಮಿತಿ ಅಧ್ಯಕ್ಷೆರ್ ಐಕಳಬಾವದೇವಿಪ್ರಸಾದ್ ಶೆಟ್ಟಿ ಮಾತೆರೆನ್ಲ ಎದ್ಕೊಂಡೆರ್. ಸಾಯಿನಾಥ ಶೆಟ್ಟಿ ಮುಂಡ್ಕೂರು ನಿರೂಪಣೆ ಮಲ್ತೆರ್.

ಬೊಲ್ಪುಗು ಐಕಳಬಾವ ಧರ್ಮಚಾವಡಿಡ್ ವೇದಮೂರ್ತಿ ಗಣೇಶ್ ಭಟ್ ಬೊಕ್ಕ ವರುಣ್ ಭಟ್ ಮುತಾಲಿಕೆಡ್ ವಿಶೇಷ ಪ್ರಾರ್ಥನೆ, ಧಾರ್ಮಿಕ ವಿಧಿವಿಧಾನ ನಡತ್ಂಡ್. ಈ ಪೊರ್ತುಡು ಕಟೀಲು ಕ್ಷೇತ್ರದ ಅನುವಂಶಿಕ ಅರ್ಚಕೆರ್ ಶ್ರೀ ಅನಂತಪದ್ಮನಾಭ ಅಸ್ರಣ್ಣೆರ್, ಮುಲ್ಕಿ ಸೀಮೆದ ಅರಸೆರ್ ದುಗ್ಗಣ್ಣ ಸಾವಂತೆರ್, ಗೌತಮ ಜೈನ್ , ಐಕಳಬಾವ ದೇವಿಪ್ರಸಾದ್ ಶೆಟ್ಟಿ ಬೊಕ್ಕ ಐಕಳ ಕಂಬುಲ ಸಮಿತಿದ ಪದುಕೆರ್ ಇತ್ತೆರ್.

ಕುಡ್ಲ: ಪಶ್ಚಿಮ ವಲಯದ ಡಿಐಜಿಪಿಯಾದ್ ಡಾ ಎಂ ಬಿ ಬೋರಲಿಂಗಯ್ಯ ನೇಮಕ

ಕುಡ್ಲ: ಪಶ್ಚಿಮ ವಲಯ ಡಿಐಜಿಪಿ ಅಮಿತ್ ಸಿಂಗ್ ಅರೆಗ್ ಮೈಸೂರ್‌ಗ್ ವರ್ಗಾವಣೆ ಆದಿತ್ತ್‌ದ್, ಈ ಜಾಗೆಗ್ ದಕ್ಷಿಣ ವಲಯದ ಡಿಐಜಿಪಿ ಆದಿತ್ತಿನ ಡಾ.ಎಂ.ಬಿ.ಬೋರಲಿಂಗಯ್ಯ ಮೇರ್ ಪಶ್ಚಿಮ ವಲಯದ ಪೊಸ ಡಿಐಜಿಪಿ ಆದ್ ಬತ್ತ್‌ದೆರ್.

ಮಂಡ್ಯ ಜಿಲ್ಲೆ ಮದ್ದೂರು ತಾಲೂಕ್‌ದ ಮಲ್ಲನಾಯಕನಹಳ್ಳಿದ ಡಾ.ಎಂ.ಬಿ. ಬೋರಲಿಂಗಯ್ಯ 2008 ಬ್ಯಾಚ್‌ದ ಐಪಿಎಸ್ ಅಧಿಕಾರಿ. ಮೈಸೂರು ವೈದ್ಯಕೀಯ ಕಾಲೇಜಿಡ್ ಎಂಬಿಬಿಎಸ್ ಪದವಿ ಪಡೆದಿತ್ತ್‌ದ್, ಐಪಿಎಸ್‌ಗ್ ಆಯ್ಕೆಯಾಯಿ ಬೊಕ್ಕ ಕಲಬುರಗಿದ ಪೊಲೀಸ್ ತರಬೇತಿ ಶಾಲೆಡ್ ಫೌಂಡೇಶನ್ ತರಬೇತಿ ಪಡೆದ್ ತಿಪಟೂರ್‌ಡ್, ಸಹಾಯಕ ಎಸ್‌ಪಿಯಾದ್ ಸೇವೆ ಸಂದಾದೆರ್.

ಅವೆರ್ದ್ ಬೊಕ್ಕ ದಾವಣಗೆರೆ, ಒಡಿಪುಡ್ ಎಸ್ಪಿಯಾದ್, ಬೆಂಗಳೂರ್‌ಡ್ ಡಿಸಿಪಿಯಾದ್ ರಾಜ್ಯ ಗುಪ್ತಚರ ಬೊಕ್ಕ ರೈಲ್ವೆ ಪೊಲೀಸ್ ಎಸ್ಪಿಯಾದ್ ಸೇವೆ ಸಂದಾದೆರ್. ಡಿಐಜಿಪಿಯಾದ್ ಬಡ್ತಿ ಪಡೆಯಿ ಬೊಕ್ಕ ಬೆಳಗಾವಿ ನಗರ ಪೊಲೀಸ್ ಕಮಿಷನರ್ ಆದ್, ಮೈಸೂರು ದಕ್ಷಿಣ ವಲಯದ ಡಿಐಜಿಪಿಯಾದ್ ಸೇವೆ ಸಂದಾದೆರ್.

ವೇಣೂರ್ ಬಾಹುಬಲಿ ಮಹಾ ಮಸ್ತಕಾಭಿಷೇಕಗ್ ಮೈಸೂರ್ ಅರಸೆರೆಗ್ ಲೆಪ್ಪೋಲೆ

ಫೆ.22-ಮಾ.1 ಮುಟ್ಟ ವೇಣೂರ್‌ದ ಬಾಹುಬಲಿ ಸ್ವಾಮಿಗ್ ನಡಪುನ ಮಹಾಮಸ್ತಕಾಭಿಷೇಕಗ್ ಮೈಸೂರ್‌ದ ರಾಜವಂಶದ ಯುದುವೀರ್ ಕೃಷ್ಣದತ್ತ ಚಾಮರಾಜ ಒಡೆಯೆರ್ ಮೆರೆನ್ ಅಳದಂಗಡಿ ಅರಸೆರ್ ಲೆಪ್ಪು ಕೊರ್ತೆರ್. ಮೈಸೂರ್ ಅರಮನೆಗ್ ಪೋದು ಯದುವೀರ್ ಬೊಕ್ಕ ಅರೆನ ಕುಟುಮದಕ್ಲೆನ್ ಲೇಸ್‌ಗ್ ಲೆಪ್ಪು ಕೊರ್ತೆರ್.

ಅಳದಂಗಡಿ ಅರಸೆರ್ ಡಾ. ಪದ್ಮಪ್ರಸಾದ್ ಅಜಿಲೆರ್, ಅರೆನ ಬೊಡೆದಿ ಮಧುರಾ ಪದ್ಮಪ್ರಸಾದ್ ಅಜಿಲೆರ್, ಸಹೋದರೆ ಶಿವಪ್ರಸಾದ್ ಅಜಿಲೆರ್, ಅರೆನ ಬೊಡೆದಿ ರೇಖಾ ಶಿವಪ್ರಸಾದ್ ಅಜಿಲೆರ್, ಮುಲ್ಕಿ ಸೀಮೆದ ಅರಸೆರ್ ದುಗ್ಗಣ್ಣ ಸಾವಂತೆರ್ ಮೈಸೂರ್ ಅರಮನೆಡ್ ಲೆಪ್ಪೋಲೆ ಕೊರ್ತೆರ್. ಈ ಪೊರ್ತುಡು ಯದುವೀರ್ ಮೆರೆನ್ ವಿಶೇಷವಾದ್ ಮಾನಾದಿಗೆ ಮಲ್ತೆರ್.

ಕುಡೊರ ಕೈಲ್ ಪಾಡ್ಂಡ್ ಕಡ್ತಿನ ಬಾರೆ

ಕಿನ್ನಿಗೋಳಿ ಕೈತಲ್ದ ದಾಮಸ್ ಕಟ್ಟೆ ಕೋಲ್ಬೆಟ್ಟು ಮುಲ್ಪದ ಧೃತಿ ನಿಲಯದ ಪವಿತ್ರ ಮೇರೆನ ಇಲ್ಲಡ್ ಒರ ಕೈಲ್ ಪಾಡಿನ ಬಾರೆನ್ ಕಡ್ತ್ ದ್ ಒಂಜಿ ತಿಂಗೊಲು ಆಯಿಬೊಕ್ಕ ಮುದೆಲ್ ಡ್ ಕುಡ ಕೈಲ್ ಪಾಡ್ದ್ಂಡ್.

ಪುಗರ್ತೆದ ಪಿಲಿಯೇಸದಾರಿ ಒಡಿಪುದ ಅಶೋಕ್ ರಾಜ್ ನನ ನೆಂಪು ಮಾತ್ರ

ಒಡಿಪು: ಕಾಡಬೆಟ್ಟು ನಿವಾಸಿ ಪಿಲಿವೇಷಧಾರಿ, ಪಿಲಿಯೇಸಡ್ ತನ್ನನೇ ಆಯಿನ ಪುದರ್ ನ್ ಪಡೆನ ಕಾಡಬೆಟ್ಟು ಅಶೋಕ್ ರಾಜ್ ದೇವೆರೆ ಪಾದೋ ಸೇರಿಯೆರ್.

ಮಸ್ತ್ ದಿನರ್ದ್ ಹುಷಾರ್ ದಾಂತೆ ಇತ್ತಿನೆದಾತ್ರ ಅಶೋಕ್ ರಾಜ್ ಆಸ್ಪತ್ರೆಡ್ ಚಿಕಿತ್ಸೆ ಪಡೆಯೊಂದು ಇತ್ತೆರ್. ಚಿಕಿತ್ಸೆ ಫಲ ಕೊರಂದೆ ಒಡಿಪುದ ಖಾಸಗಿ ಆಸ್ಪತ್ರೆಡ್ ತೀರ್ ಪೋತೆರ್.

ಮೇರೆಗ್ ಬುಡೆದಿ, ಇಂಡಿಯನ್ ಖ್ಯಾತಿದ ಸುಷ್ಮರಾಜ್ ಅಂಚನೆ ರಡ್ಡ್ ಪೊಂಜೋಕುಲು ಉಲ್ಲೆರ್.

You Missed