ಲಕ್ಷ್ಮಣ ಮರಕಡ ಮೆರೆಗ್ ಭಗವದ್ಗೀತಾಮೃತ ಪುರಸ್ಕಾರ

ಕಟೀಲು ಮೇಳದ ಕಲಾವಿದೆರ್, ಯಕ್ಷ ಗುರು ಲಕ್ಷ್ಮಣ ಕುಮಾರ್ ಮರಕಡ ಮೆರೆಗ್ ಕದ್ರಿ ಡ್ ಶ್ರೀ ಭಗವದ್ಗೀತಾಮೃತ ಪುರಸ್ಕಾರ ದ ಒಟ್ಟುಗು “ಯಕ್ಷ ಸವ್ಯ ಸಾಚಿ” ಬಿರುದು ಕೊರ್ದು ಗೌರವ ಮಲ್ಪರೆ ಉಂಡು ಪಂದ್ ಸಂಘಟಕೆರ್ ಕದ್ರಿ ನವನೀತ ಶೆಟ್ಟಿ ತೆರಿಪಾಯೆರ್.
ಫೆಬ್ರವರಿ 12 ತಾರೀಕ್‌ಗ್ ಪ್ರಶಸ್ತಿ ಪ್ರದಾನ ಲೇಸ್ ನಡಪರೆ ಉಂಡು.
ಲಕ್ಷ್ಮಣ ಮೇರ್ ತನಿಯಪ್ಪ ಕೋಟ್ಯಾನ್ ಲಿಂಗಮ್ಮ ದಂಪತಿನ ಮಗೆ. ಡ್ರಾಫ್ಟ್ ಮೆನ್ ಮೆಕಾನಿಕಲ್ ತಾಂತ್ರಿಕ ಶಿಕ್ಷಣ ಪಡೆತೆರ್.
1992 ಇಸ್ವಿಡ್ ಶಿವರಾಮ ಪಣಂಬೂರು ಗುರುತ್ವಡ್ “ಫಲ್ಗುಣಿ ಯಕ್ಷರಂಗ ಮರಕಡ”ಡ್ ರಂಗಪ್ರವೇಶ ಮಲ್ದೆರ್.
ಗಣೇಶ ಪುರ ಮೇಳ, ಬೊಕ್ಕ ಸುರತ್ಕಲ್ ಸದಾಶಿವ ಮಹಾಗಣಪತಿ ಮೇಳಡ್ 4 ವರ್ಷ, ತಲಕಳ ಮೇಳಡ್ 4 ವರ್ಷ, ಬಪ್ಪನಾಡು ಮೇಳಡ್ 1 ವರ್ಷ, ಉಳ್ಳಾಲ ಚೀರುಂಭ ಭಗವತೀ ಮೇಳ 3 ವರ್ಷ, ಸಸಿಹಿತ್ಲು ಭಗವತಿ ಮೇಳ 1 ವರ್ಷ, ಎಡನೀರು ಮೇಳ 11 ವರ್ಷ, ಕಟೀಲು ಮೇಳಡ್ ಇತ್ತೆ 7ನೇ ವರ್ಷದ ತಿರುಗಾಟ ಮಲ್ತೊಂದುಲ್ಲೆರ್.
2007 ಟ್ ಮರಕಡಡ್ ಶುಭವರ‍್ಣ ಯಕ್ಷ ಸಂಪದ (ರಿ.) ಪನ್ಪಿನ ಸಂಸ್ಥೆನ್ ಸ್ಥಾಪನೆ ಮಲ್ತ್‌ದ್ ಪ್ರಶಸ್ತಿ ,ಸಂಮಾನ, ಗೌರವಾರ್ಪಣೆ,ಪ್ರತಿಭಾ ಪುರಸ್ಕಾರ, ಯಕ್ಷಗಾನ ತರಬೇತಿ ಕೊರ್ಪಿನ ಯಕ್ಷಗಾನ ಸಂಘಟಕೆ.
ಕಾಸರಗೋಡು ಬೊಕ್ಕ ಮಂಗಳೂರು ಪರಿಸರಡ್ ಯಕ್ಷಗಾನ ಶಿಕ್ಷಕೆರಾದ್ ತರಗತಿ ನಡಪಾದ್ ಮಸ್ತ್ ಸಮೃದ್ಧ ಶಿಷ್ಯೆರುಪ್ಪುನ ಯಕ್ಷ ಗುರು. ಲಾಲಿತ್ಯಪೂರ್ಣ ವಾದ್ ಶ್ರೀ ಕೃಷ್ಣ ನ ಪಾತ್ರ ನಿರ್ವಹಣೆ ಮಲ್ಪುನ ಯಕ್ಷಪಟು.
ಮೆರೆಗ್ ಕತಾರ್‌ಡ್ ಉದ್ಯೋಗಿ ಕೊರಗಪ್ಪ ಸಸಿಹಿತ್ಲು ಬೊಕ್ಕ ಸವಿತಾ ಸಸಿಹಿತ್ಲು ಪರಿವಾರದ ಶ್ರೀ ಕಟೀಲು ಮೇಳದ “ಶ್ರೀ ದೇವೀ ಮಹಾತ್ಮೆ ” ಸೇವೆ ಬಯಲಾಟದ ವೇದಿಕೆಡ್ (ಫೆ.12)
ವೇದಮೂರ್ತಿ ಕಟೀಲು ಶ್ರೀ ಲಕ್ಷ್ಮೀ ನಾರಾಯಣ ಆಸ್ರಣ್ಣರ ಉಪಸ್ಥಿತಿಡ್ “ಯಕ್ಷ ಸವ್ಯಸಾಚಿ” ಬಿರುದು ಕೊರ್ದು ಮಾನಾದಿಗೆ ಮಲ್ಪರೆ ಉಂಡು ಪಂದ್ ಸಂಘಟಕೆರ್ ಕದ್ರಿ ನವನೀತ ಶೆಟ್ಟಿ ತೆರಿಪಾದೆರ್.