ರಂಗಭೂಮಿ ಸಮಾಜದ ಚಿಂತನೆಗ್ ದಿಕ್ಕ್ ತೋಜಾವುನ ಶಕ್ತಿಯುತ ಮಾಧ್ಯಮ:- ಜಯಚಂದ್ರ ಹತ್ವಾರ್
ಸುರತ್ಕಲ್ ಡ್ ‘ರಂಗ ಸಂಭ್ರಮ–2026’
ರಂಗಭೂಮಿ ಸಮಾಜದ ಚಿಂತನೆಗ್ ದಿಕ್ಕ್ ತೋಜಾವುನ ಶಕ್ತಿಯುತ ಮಾಧ್ಯಮವಾದ್ ಉಂಡು.
ಕಲಾವಿದೆರ್ ಸಮಾಜದ ಸೊರ ಆದ್ ಉಲ್ಲೆರ್, ಅಕ್ಲೆನ ಸೃಜನಶೀಲತೆ ಸಮಾಜಡ್ ಚಿಂತನೆ ಮೂಡಾವುನ ಕಜ್ಜ ಮಲ್ಪುಂಡು. ಇಂಚಿನ ರಂಗೋತ್ಸವಲು ಸ್ಥಳೀಯ ಪ್ರತಿಭೆಲೆಗ್ ಚಾವಡಿ ಓದಗದ್, ಸಂಸ್ಕೃತಿ ಸಂರಕ್ಷಣೆದ ಮಲ್ಲ ಮಟ್ಟದ ಪಾತ್ರ ವಹಿಸೊನುಂಡು ಪಂದ್ ಸುರತ್ಕಲ್ ಹಿಂದೂ ವಿದ್ಯಾದಾಯಿನಿ ಸಂಘ (ರಿ) ದ ಗುರ್ಕಾರ್ಲು ಜಯಚಂದ್ರ ಹತ್ವಾರ್ ಪಂಡೆರ್.
ಆರ್ ಸುರತ್ಕಲ್ ಸ್ಪರ್ಶ ಕಲಾವಿದೆರ್ ಬೊಕ್ಕ ಸುರತ್ಕಲ್ ಕಲಾಬ್ಧಿ ಲಲಿತ ಕಲಾ ಅಧ್ಯಯನ ಕೇಂದ್ರ ಗೋವಿಂದ ದಾಸ ಕಾಲೇಜ್ ಮೊಕ್ಲೆನ ಒಟ್ಟು ಸೇರಿಗೆಡ್ ಸುರತ್ಕಲ್ ಗೋವಿಂದ ದಾಸ ಕಾಲೇಜಿದ ರಂಗ ಮಂದಿರಡ್ ಫೆ 14 ಶನಿವಾರದಾನಿ ನಡತಿನ ‘ರಂಗ ಸಂಭ್ರಮ–2026’ ಸಾಂಸ್ಕೃತಿಕ ಕಾರ್ಯಕ್ರಮದ ಗುರ್ಕಾರ್ಮೆ ವಹಿಸೊಂದು ಅಂಚೆನೆ ಲೇಸ್ ಉದಿಪನ ಮಲ್ತ್ ಪಾತೆರಿಯೆರ್.
ಈ ಲೇಸ್ ಡ್ ರಂಗಭೂಮಿ ಕ್ಷೇತ್ರಡ್ ಕೊರಿನ ಸೇವೆನ್ ತೂದು ಮಾಧವ ಭಂಡಾರಿ ಆರೆಗ್ “ರಂಗ ಸಂಭ್ರಮದ ರಂಗ ಬೊಳ್ಳಿ” ಪ್ರಶಸ್ತಿ ಪ್ರಧಾನ ಮಲ್ತೆರ್.
ಈ ಪೊರ್ತುಡು ಜಾನಪದ ಕ್ಷೇತ್ರದ ಅಪ್ಪಿ ಶೆಟ್ಟಿ, ಯಕ್ಷಗಾನ ಕ್ಷೇತ್ರದ ರೇವತಿ, ಕ್ರೀಡಾ ಕ್ಷೇತ್ರದ ಕುಮಾರಿ ಧನಲಕ್ಷ್ಮಿ, ಕಲಾ ಕ್ಷೇತ್ರದ ಶೈಲೇಶ್ ಬೈಕಂಪಾಡಿ, ಸಮಾಜಮುಖಿ ಕ್ಷೇತ್ರದ ಸಚಿನ್ ಬೆದ್ರ ಬೊಕ್ಕ ತುಳು ಭಾಷಾ ಸಾಹಿತ್ಯ ಕ್ಷೇತ್ರದ ಕಿರಣ್ ತುಳುವ ಮೊಕ್ಲೆಗ್ “ರಂಗದ ತಮ್ಮನ” ಮಾನಾದಿಗೆ ಮಲ್ತೆರ್.
ಮಿತ್ತ ಚಾವಡಿಡ್ ಮಲ್ಲ ಬಿನ್ನೆರಾದ್ ಸುರತ್ಕಲ್ ಗೋವಿಂದ ದಾಸ ಕಾಲೇಜಿದ ಪ್ರಾಂಶುಪಾಲೆರ್ ಹರೀಶ್ ಆಚಾರ್ಯ, ಸ್ಪರ್ಶ ಕಲಾವಿದೆರ್ ಉಂದೆತ್ತ ಮಾನಾದಿಗೆದ ಗುರ್ಕಾರ್ಲು ಅಂಚೆನೆ ಸುರತ್ಕಲ್ ಗೋವಿಂದ ದಾಸ ಕಾಲೇಜಿದ ಆಡಳಿತಾತ್ಮಕ ನಿರ್ದೇಶಕೆರ್ ರಮೇಶ್ ಭಟ್ ಎಸ್ ಜಿ, ನಟ ನಿರ್ದೇಶಕೆರ್ ಬರಹಗಾರೆರ್ ಜೆ. ಪಿ ತುಮಿನಾಡು, ನಟ ನಿರ್ದೇಶಕೆರ್ ಬರಹಗಾರೆರ್ ಸ್ವರಾಜ್ ಶೆಟ್ಟಿ, ರಂಗ ನಿರ್ದೇಶಕೆರ್ ಜಗನ್ ಪವರ್, ಕುಡ್ಲ ಮಹಾನಗರ ಪಾಲಿಕೆ ನಿಕಟ ಪೂರ್ವ ಪದುಕೆರ್ ವರುಣ್ ಚೌಟ ಬೊಕ್ಕ ಕುಳಾಯಿ ಸ್ವರ್ಣ ಕುಂಭನಿಧಿ (ರಿ), ಆಡಳಿತ ನಿರ್ದೇಶಕೆರ್ ನಾಗೇಶ್ ಕುಲಾಲ್ ಉಪಸ್ಥಿತರಿತ್ತೆರ್.
ಗಣರಾಜ್ಯೋತ್ಸವದ ಭವ್ಯ ಪಥಸಂಚಲನಡ್ ಪಾಲ್ ಪಡೆಯಿನ ಕು ಯುಕ್ತಿ ಆರ್ ಶೆಟ್ಟಿ, ಬೊಕ್ಕ ನಟೆರಾಯಿನ ಸ್ವರಾಜ್ ಶೆಟ್ಟಿ ಬೊಕ್ಕ ಜೆ ಪಿ ತುಮಿನಾಡು ಮೊಕ್ಲೆನ್ ಗೌರವ ಮಲ್ತೆರ್.
ಸ್ಪರ್ಶ ಕಲಾವಿದೆರ್ ಉಂದೆತ ಗುರ್ಕಾರ್ಲು ನಿಖಿಲ್ ಕುಂದರ್ ಎದ್ಕೊಂಡೆರ್, ಒತ್ತು ಗುರ್ಕಾರ್ಲು ಅರುಣ್ ಸುರತ್ಕಲ್ ಪ್ರಸ್ತಾವನೆ ಮಲ್ತೆರ್, ರಂಗ ಸಂಭ್ರಮ 2026 ತ ಗುರ್ಕಾರ್ಲು ಸುದರ್ಶನ್ ಸುರತ್ಕಲ್ ಲೇಸ್ ಸುದಾರಿಕೆ ಮಲ್ತೆರ್. ಸ್ಪರ್ಶ ಕಲಾವಿದೆರ್ ಸಂಘಟನೆದ ಮಾತಾ ಪದುಕೆರ್ ಉಪಸ್ಥಿತರಿತ್ತೆರ್.
ಈ ಲೇಸ್ ಡ್ ಅಶ್ಮಿತ್ ಎ.ಜೆ ಕುಡ್ಲ ಬೊಕ್ಕ ಕೂಟದಕೆರ್ದ್ ಸುಗಮ ಸಂಗೀತ ಬೊಕ್ಕ ತುಡರ್ ಕಲಾವಿದೆರ್ ಕಲ್ಲಡ್ಕ ಮೊಕ್ಲೆನ ಗಾಳಿಪಟ ಸಾಂಸಾರಿಕ ನಾಟಕ ನಡತ್ಂಡ್.
