ಎಸ್.ಸಿಡಿಸಿಸಿ ಬ್ಯಾಂಕ್ ಗ್ರಾಹಕೆರೆಗ್ ಡಿಜಿಟಲ್ ಬ್ಯಾಂಕಿಂಗ್- ಯುಪಿಐ ಬೊಕ್ಕ ಐಎಂಪಿಎಸ್ ಸೌಲಭ್ಯ
ಬ್ಯಾಂಕಿಂಗ್ ಸೇವೆಡ್ ದೇಶಗ್ ಮಾದರಿಯಾದ್ ಬೇಲೆ ಮಲ್ತೊಂದು ಇಪ್ಪುನ ದ.ಕ ಜಿಲ್ಲಾ ಕೇಂದ್ರ ಸಹಕಾರ ಬ್ಯಾಂಕ್ (ಎಸ್.ಸಿಡಿಸಿಸಿ) ಅತ್ಯಾಧುನಿಕ ತಂತ್ರಜ್ಞಾನದ ಬ್ಯಾಂಕಿಂಗ್ ಸೇವೆಲೆನ್ ಗ್ರಾಹಕೆರೆಗ್ ಕೊರೊಂದು ಉಂಡು. ಬ್ಯಾಂಕ್ ಇತ್ತೆನೇ ಕೋರ್ ಬ್ಯಾಂಕಿಂಗ್ ಸೇವೆದೊಟ್ಟಿಗೆ ಆರ್ ಟಿಜಿಎಸ್/ ನೆಫ್ಟ್, ಸಿಟಿಎಸ್, ಎಸ್ ಎಂಎಸ್, ಎಟಿಎಂ, ಮೊಬೈಲ್ ಬ್ಯಾಂಕಿಂಗ್, ಪಿಒಎಸ್ (POS) ಸೌಲಭ್ಯ ಸೇರಿನಂಚೆನೆ ಸುಮಾರ್ ಡಿಜಿಟಲ್ ಸೇವೆನ್ ಯಶಸ್ವಿಯಾದ್ ಕೊರೊಂದು ಉಂಡು ಪಂದ್ ಕುಡ್ಲ ದ.ಕ ಜಿಲ್ಲಾ ಕೇಂದ್ರ ಸಹಕಾರಿ ಬ್ಯಾಂಕ್ ದ ಅಧ್ಯಕ್ಷೆರ್ ಡಾ.ಎಂ.ಎನ್ ರಾಜೇಂದ್ರ ಕುಮಾರ್ದ್ ಪ್ರತಿಕಾಗೋಷ್ಠಿಡ್ ಪಂಡೆರ್.
ಬ್ಯಾಂಕಿಂಗ್ ಕ್ಷೇತ್ರ ಇಂಚಿಪ್ಪದ ವರ್ಷೊಡು ಸುಮಾರ್ ಪರಿವರ್ತನೆ ಆತ್ಂಡ್. ಡಿಜಿಟಲ್ ಸೇವೆಲು ಸಾಂಪ್ರದಾಯಿಕ ಮಾದರಿನ್ ಬದಲ್ ಮಲ್ದ್ಂಡ್. ಇತ್ತೆ ಸುಮಾರ್ ಗ್ರಾಹಕೆರ್ ಇಂಟರ್ನೆಟ್ ಬ್ಯಾಂಕಿಂಗ್, ಮೊಬೈಲ್ ಅಪ್ಲಿಕೇಶನ್ ಬೊಕ್ಕ ಅರ್ಜಂಟ್ ಗ್ ಕಾಸ್ ಪಾಡುನ ವ್ಯವಸ್ಥೆಲೆನ ಮುಕೇನ ತನ್ನ ಅಕೌಂಟ್ ಗ್ ಬುರುಲೆಕ್ಕ ನಿರೀಕ್ಷೆ ಮಲ್ತೊಂದು ಉಲ್ಲೆರ್. ಈ ದಿಟ್ಟಿಡ್ ದಕ್ಷಿಣ ಕನ್ನಡ ಜಿಲ್ಲಾ ಕೇಂದ್ರ ಸಹಕಾರಿ ಬ್ಯಾಂಕ್ ಲ ತನ್ನ ಗ್ರಾಹಕೆರೆಗ್ ಅಕ್ಲೆನ ಅವಶ್ಯಕತೆಗ್ ಅನುಗುಣವಾದ್ ಡಿಜಿಟಲ್ ಬ್ಯಾಂಕಿಂಗ್ ನ್ ಅಳವಡಿಸಾದ್ಂಡ್.
ಡಿಜಿಟಲ್ ಬ್ಯಾಂಕಿಂಗ್ ಸೇವೆನ್ ನನಾತ್ ವಿಸ್ತಾರ ಮಲ್ಪುನ ಉದ್ದೇಶರ್ದ್ ತನ್ನ ಬ್ಯಾಂಕ್ ಸೆಪ್ಟೆಂಬರ್ 16, 2025 ರ್ದ್ ಐಎಂಪಿಎಸ್ (MPS- Immediate payment service) ಸೇವೆನ್ ಸುರು ಮಲ್ದ್ಂಡ್. ಈ ಸೇವೆದ ಮುಕೇನ ತನ್ನ ಬ್ಯಾಂಕ್ ದ ಮೊಬೈಲ್ ಅಪ್ಲಿಕೇಶನ್ ಗಲಸ್ ದ್ ಗ್ರಾಹಕೆರ್ ಬೊಡಾಗನ ಕಾಸ್ ನ್ ವರ್ಗಾವಣೆ ಮಲ್ಪುನ ಸೌಲಭ್ಯನ್ ಪಡೆವೊಂದು ಉಲ್ಲೆರ್. ಐಎಂಪಿಎಸ್ ಪನ್ಪಿನವು ನ್ಯಾಷನಲ್ ಪೇಮೆಂಟ್ಸ್ ಕಾರ್ಪೊರೇಷನ್ ಆಫ್ ಇಂಡಿಯಾ (NPCI) ಅಭಿವೃದ್ಧಿ ಮಲ್ತಿನ ಅರ್ಜಂಟ್ ದ ಕಾಸ್ ವರ್ಗಾವಣೆ ವ್ಯವಸ್ಥೆ ಆತ್ಂಡ್. ಉಂದು 24×7 ವಾರ ಬೊಕ್ಕ ಸಾರ್ವಜನಿಕ ರಜೆ ದಿನಟ್ಲಾ ಉಪಯೋಗ ಆಪುಂಡು. P2A (person to account) ಮುಕೇನ ಅಕೌಂಟ್ ನಂಬರ್ ಬೊಕ್ಕ IFSC ಗಲಸ್ ದ್ ಒವ್ವೇ ಬ್ಯಾಂಕ್ ಅಕೌಂಟ್ ಗ್ ಕಾಸ್ ಪಾಡೊಲಿ.
ಇತ್ತೆ ಡಿಜಿಟಲ್ ಭಾರತ ಪರಿಕಲ್ಪನೆನ್ ನನಾತ್ ಗಟ್ಟಿ ಮಲ್ಪುನ ದಿಟ್ಟಿಡ್ ತನ್ನ ಬ್ಯಾಂಕ್ ಎಚ್ಚದ ಮಹತ್ವದ ಪಜ್ಜೆನ್ ದೀತ್ಂಡ್. ಯುಪಿಐ (UPI- united payment interface) ಸೇವೆನ್ ಜನವರಿ 21, 2026 ಕ್ಕ್ ಸುರು ಮಲ್ತಿನವು ಎಕ್ಲೆಗ್ ಮಾಸ್ತ್ ಸಂತೋಷದ ಇಸಯ ಆತ್ಂಡ್. ಯುಪಿಐ ಸೇವೆದ ಮುಕೇನ ತನ್ನ ಗ್ರಾಹಕೆರ್ ಸುಲಭವಾದ್ ಬೊಕ್ಕ ಸುರಕ್ಷಿತವಾದ್ ಕಾಸ್ ನ್ ಪಡೊಲಿ. ಗ್ರಾಹಕೆರ್ ಗೂಗಲ್ ಪೇ (Google pay) ಫೋನ್ ಪೇ (Phone pay) ಭೀಮ್ (BHIM), ವಾಟ್ಸ್ ಆಪ್ ಪೇ (WhatsApp pay), ಪೇಟಿಎಂ (Paytm, ಫ್ರೀಚಾರ್ಜ್ (Freecharge), ಸೂಪರ್ ಮನಿ (Super money), ಇಂಚಿನ ಅಪ್ಲಿಕೇಶನ್ ದ ಮುಕೇನ ಸುಲಭವಾದ್ ವ್ಯವಹಾರ ಮಲ್ಪೊಲಿ.
ಈ ಸೇವೆದ ಮುಕೇನ ಗ್ರಾಹಕೆರ್ ಬ್ಯಾಂಕ್ ಗ್ ಭೇಟಿ ಕೊರ್ಪುನ ಅವಶ್ಯಕತೆ ಇಜ್ಜಂದೆ, ಇಲ್ಲಲೇ ಅತ್ತಂಡ ಒಲ್ಪ ಬೋಡಾಂಡಲ 24×7 ಪೊರ್ತುಡು ಕಾಸ್ ಪಾಡೊಲಿ. ಉಂದು ಬೇಗವಾದ್, ಸುರಕ್ಷಿತವಾದ್ ಬೊಕ್ಕ ಸುಲಭವಾದ್ ಡಿಜಿಟಲ್ ಕಾಸ್ ಪಾಡೊನ ವಿಧಾನ ಆತ್ಂಡ್.
*ಯುಪಿಐ ಮುಕೇನ ಗ್ರಾಹಕೆರ್ ಕೂಡ್ಲೆ ಕಾಸ್ ಕಡಪಾವೊಲಿ ಬೊಕ್ಕ ದೆತೊನೊಲಿ.
*ಕಾಸ್ ದೆತೊನ್ನ ಅಕ್ಲೆನ ಯುಪಿಐ ಐಡಿಗ್ ನೇರವಾದ್ ಕಾಸ್ ಕಡಪಾವೊಲಿ.
*ಕ್ಯೂಆರ್ (QR) ಕೋಡ್ ಸ್ಕ್ಯಾನ್ ಮಲ್ತ್ ದ್ ಕಾಸ್ ಪಾಡೊಲಿ.
*ಅನ್ ಲೈನ್ ಡ್ ದೆತೊನೊಲಿ ಬೊಕ್ಕ ಬಿಲ್ಲ್ ಕಟ್ಟೊಲಿ.
*ದೇಶದ ಒವ್ವೇ ಬ್ಯಾಂಕ್ ಅಕೌಂಟ್ ಗ್ ಕಾಸ್ ಪಾಡೊಲಿ.
*ಈ ಮಾತ ವ್ಯವಹಾರಲು ಯುಪಿಐ ಪಿನ್ ಬೊಕ್ಕ ರಡ್ಡ್ ಹಂತದ ಭದ್ರತಾ ವ್ಯವಸ್ಥೆರ್ದ್ ಸುರಕ್ಷಿತವಾದ್ ಇಪ್ಪುಂಡು.
ಯುಪಿಐ ಸೇವೆರ್ದ್ ಎಲ್ಯ ವ್ಯಾಪಾರಿಲು, ರೈತೆರ್, ಅಂಗಡಿ ಮಾಲಿಕೆರ್, ವಿದ್ಯಾರ್ಥಿಲು, ಉದ್ಯೋಗಿಲು ಮಾತೆರ್ಲಾ ಪ್ರಯೋಜನ ಪಡೆವೊಲಿ. ಒರಿ ಚಿಲ್ಲರೆ ವ್ಯಾಪಾರಿಲ ಇತ್ತೆ QR ಕೋಡ್ ಮುಕೇನ ಡಿಜಿಟಲ್ ಕಾಸ್ ದೆತೊನೊಲಿ. ಉಂದು ಎಕ್ಲೆನ ಬ್ಯಾಂಕ್ ದ ಆರ್ಥಿಕತೆನ್ ನನಾತ್ ಗಟ್ಟಿ ಮಲ್ಪುಂಡು. ಉಂದು ದಿನನಿತ್ಯದ ಎಲ್ಯ ಕಾಸ್ ಪಾವತಿಗ್ ಇ-ಕಾಮರ್ಸ್ ವ್ಯವಹಾರಲೆಗ್ ಬೊಕ್ಕ ವ್ಯಕ್ತಿರ್ದ್ ವ್ಯಕ್ತಿಗ್ ಕಾಸ್ ಪಾಡೆರೆ ಮಾಸ್ತ್ ಅನುಕೂಲ ಆತ್ಂಡ್.
ಎಕ್ಲೆನ ಬ್ಯಾಂಕ್ ದ ಗ್ರಾಹಕೆರೆಗ್ ಡಿಜಿಟಲ್ ಬ್ಯಾಂಕಿಂಗ್ ಸೇವೆಲಾಯಿನ ಯುಪಿಐ ಬೊಕ್ಕ ಐಎಂಪಿಎಸ್ ಸೌಲಭ್ಯಲೆಗ್ ಅಧಿಕೃತ ಚಾಲನಾ ಲೇಸ್ ಫೆ.17 ಅಂಗಾರೆದಾನಿ (ಇನಿ) ಮಧ್ಯಾಹ್ನ 12 ಗಂಟೆಗ್ ಬ್ಯಾಂಕ್ ದ ಸಭಾಂಗಣದಡ್ ನಡಪರೆ ಉಂಡು.
ಎಕ್ಲೆನ ಬ್ಯಾಂಕ್ ಎಪಲ ಗ್ರಾಹಕೆರೆಗ್ ಅತ್ಯುತ್ತಮ ಬೊಕ್ಕ ಆಧುನಿಕ ಸೇವೆನ್ ಕೊರಿಯೆರೆ ಉಂಡು. ಯುಪಿಐ ಸೇವೆರ್ದ್ ಎಕ್ಲೆನ ಗ್ರಾಹಕೆರೆಗ್ ನನಾತ್ ಸುಲಭ ಬೊಕ್ಕ ಬೇಗವಾದ್ ಬ್ಯಾಂಕಿಂಗ್ ಅನುಭವ ತಿಕ್ಕುಂಡು ಪನ್ಪಿನ ವಿಶ್ವಾಸ ಎಕ್ಲೆಗ್ ಉಂಡು. ಅಂಚಾದ್ ಎಕ್ಲೆನ ಬ್ಯಾಂಕ್ ದ ಒವ್ವೇ ಅಭಿವೃದ್ಧಿ ಯೋಜನೆಲೆಗ್ ಎಪಲ ಪ್ರೋತ್ಸಾಹನ್ ಪತ್ರಿಕಾ ಮಾಧ್ಯಮದಕುಲು ಬೊಕ್ಕ ಚಾನೆಲ್ ದಕುಲು ಕೊರೊಂದು ಬೈದೆರ್. ಇತ್ತೆ ಎಕ್ಲೆನ ಬ್ಯಾಂಕ್ ದ ಡಿಜಿಟಲ್ ಬ್ಯಾಂಕಿಂಗ್ ವ್ಯವಸ್ಥೆಗ್ ಎಚ್ಚದ ಪ್ರಚಾರನ್ ಕೊರ್ದು, ಫೆ.17 ಅಂಗಾರೆದಾನಿ (ಇನಿ) ನಡಪುನ ಲೇಸ್ ಡ್ ಮಾತೆರ್ಲಾ ಪಾಲ್ ಪಡೆವೊಡು ಪಂದ್ ದಕ್ಷಿಣ ಕನ್ನಡ ಜಿಲ್ಲಾ ಕೇಂದ್ರ ಸಹಕಾರಿ ಬ್ಯಾಂಕ್ ದ ಅಧ್ಯಕ್ಷೆರ್ ಡಾ.ಎಂ ಎನ್ ರಾಜೇಂದ್ರ ಕುಮಾರ್ ತೆರಿಪಾದೆರ್.
