February 4, 2026

ಇನಿರ್ದ್ ಸಸಿಹಿತ್ಲು ಶ್ರೀ ಸಾರಂತಾಯ ಗರೋಡಿ ಉಳ್ಳಾಯ ದೈವಸ್ಥಾನಡ್ ಬ್ರಹ್ಮಕಲಶೋತ್ಸವ, ನೇಮೋತ್ಸವ

ತುದೆ ಕಡಲ್ದ ನಡುತ್ತ ಜಾಗೆಡ್ ನಿರ್ಮಾಣವಾದಿತ್ತಿನ ಕಾರ್ನಿಕ ಕ್ಷೇತ್ರ ಶ್ರೀ ಸಾರಂತಾಯ ಗರೋಡಿ ಉಳ್ಳಾಯ ದೈವಸ್ಥಾನ ಇತ್ತೆ ಸಂಪೂರ್ಣ ಶಿಲಾಮಯವಾದ್ ಜೀರ್ಣೋದ್ಧಾರ ಆದ್ ಫೆ.4 ಬುಧವಾರರ್ದ್ ಫೆ.10 ಅಂಗಾರೆ ಮುಟ್ಟ ಪುನರ್ ಪ್ರತಿಷ್ಠೆ, ಬ್ರಹ್ಮಕಲಶೋತ್ಸವ ಬೊಕ್ಕ ನೇಮೋತ್ಸವ ನಡಪರೆ ಉಂಡು ಪಂದ್ ಕ್ಷೇತ್ರದ ಜೀರ್ಣೋದ್ಧಾರ ಸಮಿತಿ ಅಧ್ಯಕ್ಷೆರ್ ಸಿ.ಬಿ.ಕರ್ಕೇರ ತೆರಿಪಾಯೆರ್.

ದೈವಸ್ಥಾನದ ಅಂಗಣೊಡು ಸೋಮವಾರ ನಡತಿನ ಪತ್ರಿಕಾಗೋಷ್ಠಿಡ್ ಪಾತೆರ್ನ ಆರ್, ಅಂದಾಜಿ 3.5 ಕೋಟಿ ರೂ. ಕರ್ಚಿಡ್ ನಿರ್ಮಾಣವಾಯಿನ ಈ ಶಿಲಾಮಯ ಗರೊಡಿದ ಬ್ರಹ್ಮಕಲಶೋತ್ಸವ ಬೊಕ್ಕ ನೇಮೋತ್ಸವಗ್ ಪೂರ ತಯಾರಿ ಆದಿತ್ತ್ ದ್ ಅಂದಾಜಿ 8-10 ಸಾರ ಜನ ಪಾಲ್ ಪಡೆವುನ ನಿರೀಕ್ಷೆ ಉಂಡು ಪಂಡೆರ್.

ಫೆ.4 ತಾರೀಕ್ ರ್ದ್ ಪ್ರತಿದಿನಲ ವೈದಿಕ, ಧಾರ್ಮಿಕ ಬೊಕ್ಕ ಸಾಂಸ್ಕೃತಿಕ ಕಾರ್ಯಕ್ರಮ, ಭಜನೆ ಅನ್ನಸಂತರ್ಪಣೆ ನಡಪರೆ ಉಂಡು ಪಂದ್ ಪಂಡೆರ್.

“ರಡ್ಡ್ ವರ್ಷರ್ದಿಂಚಿ ಜೀರ್ಣೋದ್ಧಾರದ ಕನ ಕಟ್‌ದ್ ದಾನಿಲೆನ ಕೈತಲ್ ಪೋನಗ ಎಂಕ್ಲೆನ ಮನವಿಗ್ ಉದಾರ ಮನಸ್‌ದ ದಾನಿಲು ಸಕಾರಾತ್ಮವಾದ್ ಸ್ಪಂದನೆ ಕೊರ್ತಿನೆತ್ತ ಫಲ ಪನ್ಪಿಲೆಕ ಭವ್ಯವಾಯಿನ ಗರೊಡಿ ಲಕ್‌ದ್ ಉಂತುದುಂಡು ಪಂದ್ ಪಂಡೆರ್.
ದೈವಸ್ಥಾನದ ಪಡ್ಡಾಯಿಡ್ ಪಾಡ್ದಿನ ರಡ್ಡ್ ವೇದಿಕೆಡ್ ಪ್ರತ್ಯೇಕವಾದ್ ಭಜನೆ, ಸಭಾ ಕಾರ್ಯಕ್ರಮ ಬೊಕ್ಕ ಸಾಂಸ್ಕೃತಿಕ ಕಾರ್ಯಕ್ರಮ ನಡಪರೆ ಉಂಡು. ಒಂಜಿ ವೇದಿಕೆಗ್ “ಉಳ್ಳಾಯ ಮದಿಪು ಚಾವಡಿ” ಪುದರ್ ದೀತ್ಂಡ್. ಬೊಕ್ಕೊಂಜೆಕ್ಕ್ ಕಾಂತುಲಕಣ ಗಡಿಪ್ರದಾನ ಯಾನೆ ಪಠೇಲ್ ಯಾದವ ಜಿ. ಬಂಗೇರ ಸಾಂಸ್ಕೃತಿಕ ವೇದಿಕೆ ಪಂದ್ ಪುದರ್ ದೀತ್ಂಡ್. “ಕಾಂತಾಬಾರೆ ಬುಧಾಬಾರೆ ಭಜಕ ವೇದಿಕೆ”ಡ್ ನಿರಂತರ ಭಜನಾ ಕಾರ್ಯಕ್ರಮ ನಡಪರೆ ಉಂಡು ಪಂದ್ ಪಂಡೆರ್.
ತುಳುನಾಡ್‌ದ ವೀರ ಪುರುಷೆರಾಯಿನ ಕಾಂತಾಬಾರೆ ಬುದಾಬಾರೆರ್ ಸುಮಾರ್ 800 ವರ್ಷದ ಪಿರವುಡು ಸ್ಥಾಪನೆ ಮಲ್ದಿನ ಈ ಗರೋಡಿನ್ ನನ ದುಂಬಗ್ ನನಾತ್ ಬೆಳಗಾವುನ ನಿಲೆಟ್ಟ್ ವಿವಿಧ ಯೋಜನೆಲೆನ್ ಪಾಡ್ದ ಪಂದ್ ಪಂಡೆರ್.
ಬ್ರಹ್ಮಕಲಶೋತ್ಸವದ ಹಿನ್ನೆಲೆಡ್ ರಚನೆ ಮಲ್ದಿನ ಬೇತೆ ಬೇತೆ ಸಮಿತಿದಕುಲು ಸಕ್ರಿಯವಾದ್ ಬೇಲೆ ಮಲ್ತೊಂದುಲ್ಲೆರ್. ಪರ್ಪಿನ ನೀರ್, ಪಾರ್ಕಿಂಗ್ ವ್ಯವಸ್ಥೆ, ಸುರಕ್ಷತಾ ವ್ಯವಸ್ಥೆ ಪೂರ ಆತ್ಂಡ್ ಪಂದ್ ಪಂಡೆರ್.
ಕ್ಷೇತ್ರದ ಪ್ರಧಾನ ದೇವೆರ್ ಶ್ರೀ ಉಳ್ಳಾಯ ಬೊಕ್ಕ ಓಡ್ಯಂತಾಯ, ಮೂಲ ಮೈಸಂದಾಯ, ಕೊಡಮಣಿತ್ತಾಯ ಪರಿವಾರ ದೈವೊಲೆಗ್ ಪಿರಾಕ್‌ದ ಆಯ ಅಳತೆದ ಮಲ್ಲ ಗರೊಡಿ ಅಂಚೆನೆ ಕಾಂತಾಬಾರೆ ಬುದಾಬಾರೆ ಬೊಕ್ಕ ಮಾಯಂದಾಲ್ ದೈವಗ್ ಬೇತೆನೆ ಗುಡಿ ನಿರ್ಮಾಣ ಆತ್ಂಡ್. ಪಡ್ಡಾಯಿ ಮೆಯಿಟ್ಟ್ ಪ್ರವೇಶದ್ವಾರ, ಎದುರು ಮೆಯಿತ್ತ ಗೋಪುರ, ತೀರ್ಥದ ಗುವೆಲ್ ಪೊಸ ರೂಪೊಡು ಮೆನ್ಕೊಂದುಂಡು ಪಂದ್ ಪಂಡೆರ್.
ಈ ಜೀರ್ಣೋದ್ಧಾರದ ಮಾಮಲ್ಲ ಯೋಜನೆ ಯಶಸ್ವಿ ಮಲ್ಪರೆ ಜೀರ್ಣೋದ್ಧಾರ ಸಮಿತಿ, ಆಡಳಿತ ಸಮಿತಿ, ಬೊಂಬೈ ಸಮಿತಿ, ಮಹಿಳಾ ಸಮಿತಿ ಮಾತ್ರ ಅತ್ತಾಂದೆ ಬೆಂಗಳೂರು ಅಂಚೆನೆ ಪರದೇಶೊಡ್ಲ ಇತ್ತಿನ ಸಮಿತಿದಕುಲು ರಾತ್ರೆ ಪಗೆಲ್ ಎನ್ನಂದೆ ಬೇಲೆ ಮಲ್ದಿನೆತ್ತ ಫಲವಾದ್ ಈತ್ ಮಲ್ಲ ಯೋಜನೆ ಯಶಸ್ವಿ ಆತ್ಂಡ್ ಪಂಡೆರ್.
ಪತ್ರಿಕಾಗೋಷ್ಠಿಡ್ ಜೀರ್ಣೋದ್ಧಾರ ಸಮಿತಿದ
ಗೌರವ ಸಲಹೆಗಾರೆರ್ ಚಂದ್ರಶೇಖರ ನಾನಿಲ್, ಆಡಳಿತ ಸಮಿತಿ ಅಧ್ಯಕ್ಷೆರ್ ಜಗನ್ನಾಥ ಆರ್ ಕೋಟ್ಯಾನ್, ಉಪಾಧ್ಯಕ್ಷೆರ್ ಅನಿಲ್ ಪೂಜಾರಿ, ಕೋಶಾಧಿಕಾರಿ ಎಸ್.ದಯಾನಂದ್,
ಶ್ರೀಧರ ವಿ. ಸುವರ್ಣ,
ಕಾಂತುಲಕಣ ಗಡಿಪ್ರದಾನರು ಪಠೇಲ್ ಮನೆತನದ ನಿರಂಜನ್ ಬಂಗೇರ, ಲೀಲಾಧರ ಬಂಗೇರ, ಬೊಂಬೈ ಸಮಿತಿದ ಅಧ್ಯಕ್ಷೆರ್ ಸತೀಶ್ ಎನ್ ಕೋಟ್ಯಾನ್, ಸಂಚಾಲಕೆರ್ ಪದ್ಮನಾಭ ಸಸಿಹಿತ್ಲು, ರವೀಂದ್ರ ಶಾಂತಿ, ಕಾರ್ಯಾಧ್ಯಕ್ಷೆರ್ ಪರಮಾನಂದ ವಿ. ಸಾಲ್ಯಾನ್, ಗೌರವ ಸಲಹೆಗಾರೆರ್ ಪದ್ಮನಾಭ ಬಂಗೇರ, ರಮೇಶ್ ಪಿ ಸನಿಲ್, ತೋಚೋಡಿ ಶೇಖರ ಪೂಜಾರಿ
ಪ್ರಧಾನ ಅರ್ಚಕೆರಾಯಿನ ಸುರೇಶ್ ಪೂಜಾರಿ ಬೊಕ್ಕ ದಾಮೋದರ ಪೂಜಾರಿ, ಮಹಿಳಾ ಸಮಿತಿದ ಅಧ್ಯಕ್ಷೆರ್ ಶಕುಂತಳಾ ಭೋಜ ಬಂಗೇರ, ಗೌರವಾಧ್ಯಕ್ಷೆರ್ ಪುಷ್ಪಾ ದಯಾನಂದ್, ಕಾರ್ಯದರ್ಶಿ ಎಸ್. ಆರ್. ಪ್ರಭಾತ್,
ಕಾರ್ಯದರ್ಶಿ ನವೀನ್ ಕುಮಾರ್, ಜೊತೆ ಕಾರ್ಯದರ್ಶಿ
ಹರೀಶ್ ಕುಮಾರ್, ಜೊತೆ ಕೋಶಾಧಿಕಾರಿ
ಯತೀಶ್ ಸಾಲ್ಯಾನ್ ಮೊಕುಲು ಮಾತ ಇತ್ತೆರ್.

ಟೂರಿಸ್ಟ್ ಆಕರ್ಷಣೆ

ಪಡ್ಡಾಯಿ ಕಡಲಬರಿ ಮುಡಾಯಿಡ್ ನಂದಿನಿ ಬೊಕ್ಕ ಶಾಂಭವಿ ತುದೆತ್ತ ಪೊರ್ಲೈಸಿರದ ಜಾಗೆಡ್ ಉಪ್ಪುನ ಈ ದೈವಸ್ಥಾನ ಹೆಚ್ಚಿನ ಸಂಖ್ಯೆಡ್ ಪ್ರವಾಸಿಗೆರೆನ್ ಆಕರ್ಷಣೆ ಮಲ್ಪುನ ವಿಶ್ವಾಸ ಉಂಡು. ಅಯಿಕ್ ಬೋಡಾಯಿನ ಯೋಜನೆಲೆನ್ ಪಾಡ್ದ್ ಕ್ಷೇತ್ತನ್ ಅಭಿವೃದ್ಧಿ ಮಲ್ಪುನ ಉದ್ದೇಶ ಉಂಡು ಪಂಡೆರ್.

ಸಾಂಸ್ಕೃತಿಕ ವೈಭವ

ಫೆ.4 ರಾತ್ರೆ 8 ಗಂಟೆರ್ದ್ ಕಲಾ ಸಾರಥಿ ತೋನ್ಸೆ ಪುಷ್ಕಳ ಕುಮಾರ್ ಮೆರೆರ್ದ್ “ಸೀಮೆದ ಉಳ್ಳಾಯನ ಕಾರ್ನಿಕ” ಕಥಾಕೀರ್ತನೆ ನಡಪರೆ ಉಂಡು. ಫೆ.5 ಕ್ಕ್ ಬಯ್ಯಡ್ ಭರತನಾಟ್ಯ, ಶಿವ ಪುರ್ಸಾದ ಬಬ್ಬರ್ಯೆ ನಾಟಕ, ಫೆ.6 ಕ್ಕ್ ಆಂಟಿ ಬೊಕ್ಕ ಅಂಕಲ್ ತುಳುನಾಟಕ,ಫೆ.7 ಕ್ಕ್ ಪೊಂಜೊವುಲೆರ್ದ್ ತುಳುವ ಕಮ್ಮೆನ ನೃತ್ಯ ರೂಪಕ, ಅಪ್ಪೆ ಭಗವತಿ ನಾಟಕ, ಫೆ.8 ಬಯ್ಯಡ್ 4 ಗಂಟೆಗ್ ವಿಠಲ ನಾಯಕ್ ಹಾಸ್ಯ ಸಂಭ್ರಮ, ರಾತ್ರೆ ಜೋಡು ಜೀಟಿಗೆ ನಾಟಕ ಬೊಕ್ಕ ಫೆ.9 ಗು ಮಧ್ಯಾಹ್ನ 1 ಗಂಟೆರ್ದ್ ಕಲಾ ಸೌರಭ ಮುಂಬೈ ಕೂಟದಕ್ಲೆರ್ದ್ ಗೀತ ಗಾನಾಮೃತ ನಡಪರೆ ಉಂಡು ಪಂದ್ ತೆರಿಪಾಯೆರ್.