February 20, 2026

‘ಸಹಕಾರ ರತ್ನ’ ಡಾ| ಎಂ.ಎನ್. ರಾಜೇಂದ್ರ ಕುಮಾರ್ ಮೆರೆನ 77ನೇ ಪುಟ್ಟುಪರ್ಬದ ಅರ್ಥಪೂರ್ಣ ಆಚರಣೆ : ಡಾ.ದೇವಿಪ್ರಸಾದ್ ಶೆಟ್ಟಿ

ಕುಡ್ಲ : ಸಹಕಾರಿ ಕ್ಷೇತ್ರಡ್ ರಾಜ್ಯ ಅಂಚೆನೆ ರಾಷ್ಟ್ರಮಟ್ಟಡ್ ಪುದರ್ ಪಡೆತಿನ ದಕ್ಷಿಣ ಕನ್ನಡ ಜಿಲ್ಲಾ ಕೇಂದ್ರ ಸಹಕಾರಿ ಬ್ಯಾಂಕ್‌ದ ಅಧ್ಯಕ್ಷೆರ್ ‘ಸಹಕಾರ ರತ್ನ’ ಡಾ| ಎಂ.ಎನ್. ರಾಜೇಂದ್ರ ಕುಮಾರ್ ಮೆರೆನ 77ನೇ ಪುಟ್ಟುಪರ್ಬದ ಸಂಭ್ರಮಾಚರಣೆನ್ ಸರಳವಾದ್ ಅಂಚೆನೆ ಅರ್ಥಪೂರ್ಣವಾದ್ ಆಚರಣೆ ಮಲ್ಪರೆ ಅವಿಭಜಿತ ದ.ಕ ಜಿಲ್ಲೆದ ಸಮಸ್ತ ಸಹಕಾರಿಲು ತೀರ್ಮಾನ ಮಲ್ತ್‌ದ” ಪಂದ್ ಅಭಿವಂದನಾ ಸಮಿತಿದ ಅಧ್ಯಕ್ಷೆರ್ ಐಕಳಬಾವ ದೇವಿಪ್ರಸಾದ್ ಶೆಟ್ಟಿ ಬೆಳಪು ತೆರಿಪಾಯೆರ್.
ಎಸ್ ಸಿಡಿಸಿಸಿ ಬ್ಯಾಂಕ್ ‌ದ ಚಾವಡಿಡ್ ಶುಕ್ರವಾರ ನಡತಿನ ಪತ್ರಿಕಾ ಗೋಷ್ಠಿಡ್ ಪಾತೆರ್ನ ಆರ್
”ಫೆ.24 ಡಾ| ಎಂ.ಎನ್. ರಾಜೇಂದ್ರ ಕುಮಾರ್ ಮೆರೆನ ಪುಟ್ಟಪರ್ಬದ ದಿನ. ಆನಿ ಕಾಂಡೆ 10.30 ಗಂಟೆಗ್ ಎಸ್‌ಸಿಡಿಸಿಸಿ ಬ್ಯಾಂಕ್‌ದ ಸಭಾಂಗಣಡ್ ಡಾ| ಎಂ.ಎನ್. ಆರ್ ಮೆರೆನ 77ನೇ ಪುಟ್ಟುಪರ್ಬದ ಸಂಭ್ರಮದ ಒಟ್ಟುಗು ಅಭಿವಂದನಾ ಕಾರ್ಯಕ್ರಮ ಬೊಕ್ಕ ಅರ್ಹ ಫಲಾನುಭವಿಲೆಗ್ ಬೇತೆ ಬೇತೆ ಸವಲತ್ತುಲೆನ್ ಪಟ್ಟು‌ನ ಕಜ್ಜ ನಡಪರೆ ಉಂಡು. ಸಹಕಾರ ಕ್ಷೇತ್ರನ್ ಗಟ್ಟಿ ಮಲ್ಪುನ ಚಿಂತನೆದ ಒಟ್ಟುಗೆ ಅವಿಭಜಿತ ದಕ್ಷಿಣ ಕನ್ನಡ ಜಿಲ್ಲೆಡ್ ಪೊಸ ಕ್ರಾಂತಿ ಮಲ್ದಿನ ಸೃಷ್ಟಿಸಿರುವ ಡಾ| ಎಂ.ಎನ್. ಆರ್ ಮಾತಾ ಸಹಕಾರಿಲೆಗ್ ಆದರ್ಶ ಆದುಲ್ಲೆರ್. ಸಹಕಾರ ಕ್ಷೇತ್ರದ ಬೆಳವಣಿಗೆಗ್ ವಿಶೇಷ ಕಾರ್ಯ ಯೋಜನೆ ಮಲ್ತ್‌ದ್ ಎಂಕ್ಲೆಗ್ ಮಾರ್ಗದರ್ಶನ ಮಲ್ದಿನ ಡಾ| ಎಂ.ಎನ್. ಆರ್ ಮೆರೆನ ಪುಟ್ಟುಪರ್ಬನ್ ಅರ್ಥಪೂರ್ಣವಾದ್ ಆಚರಣೆ ಮಲ್ಪುನ ಉದ್ದೇಶಡ್ 77 ಜನ ಅರ್ಹ ಫಲಾನುಭವಿಲೆಗ್ ಸವಲತ್ತು ಪಟ್ಟುನ ಬೇಲೆ ನಡಪರೆ ಉಂಡು. ಸರ್ವ ಧರ್ಮದ ಅರ್ಹ ವ್ಯಕ್ತಿಲೆಗ್ ಈ ಸಹಾಯ ಕೊರಿಯರೆ ಉಂಡು ಪಂದ್ ಪಂಡೆರ್.
ಈ ಲೇಸ್ ನ್ ಕರ್ನಾಟಕ ವಿಧಾನಸಭೆತ್ತ ಸಭಾಧ್ಯಕ್ಷೆರಾಯಿನ ಯು.ಟಿ.ಖಾದರ್ ಉದಿಪನ ಮಲ್ಪುವೆರ್. ಸಮಸ್ತ ಸಹಕಾರಿಲೆನ ಪರವಾದ್ ಡಾ| ಎಂ.ಎನ್. ರಾಜೇಂದ್ರ ಕುಮಾ‌ರ್ ಅಭಿವಂದನೆ ಸ್ವೀಕಾರ ಮಲ್ಪರೆ ಉಲ್ಲೆರ್. ಮಾಜಿ ಮುಖ್ಯಮಂತ್ರಿಲಾಯಿನ ಡಾ| ಎಂ. ವೀರಪ್ಪ ಮೊಯಿಲಿ ಮೇರ್ ಡಾ। ಎಂ.ಎನ್. ರಾಜೇಂದ್ರ ಕುಮಾರ್‌ ಮೆರೆನ್ ಅಭಿನಂದನೆ ಮಲ್ತ್‌ದ್ ಅಭಿವಂದನಾ ಭಾಷಣ ಮಲ್ಪುವೆರ್. ಶಾಸಕೆರ್ ಡಿ.ವೇದವ್ಯಾಸ ಕಾಮತ್ ಅಧ್ಯಕ್ಷತೆ ವಹಿಸೊನ್ವೆರ್ ಪಂದ್ ಪಂಡೆರ್.
ಪತ್ರಿಕಾಗೋಷ್ಠಿಡ್ ಬ್ಯಾಂಕ್ ಉಪಾಧ್ಯಕ್ಷೆರ್ ವಿನಯ್ ಕುಮಾರ್ ಸೂರಿಂಜೆ, ನಿರ್ದೇಶಕೆರಾಯಿನ ಎಂ. ವಾದಿರಾಜ ಶೆಟ್ಟಿ, ಭಾಸ್ಕರ್ ಎಸ್.ಕೋಟ್ಯಾನ್, ಶಶಿಕುಮಾ‌ರ್ ರೈ ಬಾಲ್ಯೊಟ್ಟು, ಎಸ್.ಬಿ. ಜಯರಾಮ ರೈ, ಮೋನಪ್ಪ ಶೆಟ್ಟಿ ಎಕ್ಕಾರು, ಸದಾಶಿವ ಉಳ್ಳಾಲ್, ಮುಖ್ಯ ಕಾರ್ಯನಿರ್ವಹಣಾಧಿಕಾರಿ ಗೋಪಾಲಕೃಷ್ಣ ಭಟ್ ಕೆ. ಮೊಕುಲು ಮಾತ ಇತ್ತೆರ್.
(ಬಾಕ್ಸ್)
77 ಜನಕ್ಕ್ ಸಕಾಯ

ಈ ಲೇಸ್‌ಡ್ 35 ಫಲಾನುಭವಿಲೆಗ್ ಸಹಾಯಧನ, 30 ವಿದ್ಯಾರ್ಥಿಲೆಗ್ ವಿದ್ಯಾರ್ಥಿ ವೇತನ-30, 5 ಜನಕ್ಕ್ ಕುಂಟು ಪೊಲ್ಲುನ ಮಿಷಿನ್, 2 ಜನ
ವಿಶೇಷ ಚೇತನೆರೆಗ್ , 5 ಜನಕ್ಕ್ ಜೇನುಗೂಡು ಪೆಟ್ಟಿಗೆ ಸೇರ್ದ್ 77 ಜನಕ್ಕ್ ಸವಲತ್ತ್ ಪಟ್ಟರೆ ಉಂಡು ಪಂದ್ ತೆರಿಪಾಯೆರ್.