ಲಕ್ಷ್ಮಣ ಮರಕಡ ಮೆರೆಗ್ “ಯಕ್ಷ ಸವ್ಯಸಾಚಿ” ಬಿರ್ದ್
ಕುಡ್ಲ : ಶ್ರೀ ಕಟೀಲು ಮೇಳದ ಕಲಾವಿದೆರ್, ಯಕ್ಷಗುರು ಲಕ್ಷ್ಮಣ ಕುಮಾರ್ ಮರಕಡ ಮೆರೆಗ್ ಕದ್ರಿ ದೇವಸ್ಥಾನದ ರಾಜಾ oಗಣಡ್ ಶ್ರೀ ಭಗವದ್ಗೀತಾಮೃತ ಪುರಸ್ಕಾರದ ಒಟ್ಟಿಗೆ “ಯಕ್ಷ ಸವ್ಯ ಸಾಚಿ” ಬಿರ್ದ್ ಕೊರ್ದು ಗೌರವ ಮಲ್ತೆರ್.
ಶ್ರೀ ಮದ್ ಭಗವದ್ಗೀತೆದ ಪ್ರಚಾರಕೆರ್,ಆಧ್ಯಾತ್ಮಿಕ ಗುರು ಸುಬ್ರಾಯ ನಂದ್ಯೋಡಿ ಮೇರ್ ಪ್ರಶಸ್ತಿ ಪ್ರದಾನ ಮಲ್ತೆರ್.
” ಲಕ್ಷ್ಮಣ ಮೇರ್ ಶಿವರಾಮ ಪಣಂಬೂರು ಮೆರೆನ ಗುರುತ್ವದಲ್ಲಿ *”ಫಲ್ಗುಣಿ ಯಕ್ಷರಂಗ ಮರಕಡ” ಮೂಲು ರಂಗಪ್ರವೇಶ ಮಲ್ತ್ದ್
ಗಣೇಶಪುರ, ಸುರತ್ಕಲ್ ಸದಾಶಿವ ಮಹಾಗಣಪತಿ, ತಲಕಳ, ಬಪ್ಪನಾಡು, ಉಳ್ಳಾಲ ಚೀರುಂಭ ಭಗವತೀ , ಸಸಿಹಿತ್ಲು ಭಗವತಿ, ಎಡನೀರು ಮೇಳಡ್ ತಿರುಗಾಟ ಮಲ್ತ್ದ್ ಕಟೀಲು ಮೇಳಡ್ ಇತ್ತೆ 7ನೇ ವರ್ಷದ ತಿರುಗಾಟ ಮಲ್ತೊಂದುಲ್ಲೆರ್.
ಮರಕಡಡ್ ಶುಭವರ್ಣ ಯಕ್ಷ ಸಂಪದ (ರಿ.) ಪನ್ಪಿನ ಕಲಾ ಸಂಸ್ಥೆನ್ ಸ್ಥಾಪನೆ ಮಲ್ತ್ದ್ ಪ್ರಶಸ್ತಿ ,ಸಂಮಾನ, ಗೌರವಾರ್ಪಣೆ,ಪ್ರತಿಭಾ ಪುರಸ್ಕಾರ, ಯಕ್ಷಗಾನ ತರಬೇತಿ ಕೊರ್ಪಿನ ಯಕ್ಷಗಾನ ಸಂಘಟಕೆರ್ಲ ಆದುಲ್ಲೆರ್ .
ಕಾಸ್ರೋಡು ಬೊಕ್ಕ ಕುಡ್ಲ ಪರಿಸರಡ್ ಯಕ್ಷಗಾನ ಶಿಕ್ಷಕೆ ಆದ್ ತರಗತಿ ಮಲ್ತ್ದ್ ಮಸ್ತ್ ಶಿಷ್ಯೆರೆನ್ ಮಲ್ತೊಂದೆರ್
ಅಮೇರಿಕಾ, ಮಸ್ಕತ್, ಆಸ್ಟ್ರೇಲಿಯಾ, ದುಬೈಡ್ ಪುಂಡು ವೇಷ, ಸ್ತ್ರೀ,ರಾಜವೇಷ,ಹಾಸ್ಯ, ಎದುರು ವೇಷ ಮಾತೆನ್ಲ ಸಮರ್ಥವಾದ್ ನಿರ್ವಹಣೆ ಮಲ್ಪುನ ಅಪೂರ್ವ ಯಕ್ಷ ಕಲಾ ಸಾಧಕೆ ” ಪಂದ್
ಕದ್ರಿ ನವನೀತ ಶೆಟ್ಟಿ ಅಭಿನಂದನೆದ ನುಡಿ ಸೇಸೆ ಪಾಡಿಯೆರ್.
ಕತಾರ್ದ ಉದ್ಯೋಗಿ ಕೊರಗಪ್ಪ ಸಸಿಹಿತ್ಲು ಬೊಕ್ಕ ಸವಿತಾ ಸಸಿಹಿತ್ಲು ಪರಿವಾರದ ಶ್ರೀ ಕಟೀಲು ಮೇಳದ ಸೇವೆ ಬಯಲಾಟದ ವೇದಿಕೆಡ್ ಮಾನಾದಿಗೆ ನಡತ್ಂಡ್. ಯಕ್ಷಗಾನ ಅಕಾಡೆಮಿ ಸದಸ್ಯೆರ್ ಮೋಹನ್ ಕೊಪ್ಪಳ ಕದ್ರಿ,ಡಾ. ಶಶಾಂಕ್, ಡಾ. ಪ್ರತೀಕ್,ಸುಧಾಕರ ರಾವ್ ಪೇಜಾವರ, ಶಿವ ಪ್ರಸಾದ್ ಪ್ರಭು, ಸಿ. ಎಸ್. ಭಂಡಾರಿ,ಪ್ರದೀಪ್ ಆಳ್ವ ಕದ್ರಿ ಇತ್ತೆರ್.
ಎಲ್ಲೂರು ರಾಮಚಂದ್ರ ಭಟ್ ನಿರೂಪಣೆ ಮಲ್ತೆರ್.
ಮೇಳದ ಮಾತಾ ಕಲಾವಿದೆರೆಗ್ ಆಟದ ಸೇವಾಕರ್ತೆರಾಯಿನ ಗೀತಾ ಪ್ರಚಾರಕಿ ಸವಿತಾ ಕೊರಗಪ್ಪ ಮೇರ್ ಅರ್ಥ ಸಹಿತ ಭಗವದ್ಗೀತೆನ್ ಪಟ್ಟಿಯೆರ್. ಅವೆರ್ದ್ ಬೊಕ್ಕ
ಕಟೀಲು ಮೇಳದ “ಶ್ರೀ ದೇವೀ ಮಹಾತ್ಮೆ ” ಸೇವೆ ಬಯಲಾಟ ನಡತ್ಂಡ್.