ನನ “ತುಳುವ ಮಹಾಸಭೆ ಇಂಟರ್ನ್ಯಾಷನಲ್” ಆದ್ ಬದಲ್
ತುಳು ನಾಡು–ನುಡಿ–ಸಂಸ್ಕೃತಿದ ಸಂರಕ್ಷಣೆ, ಸಂಶೋಧನೆ ಬೊಕ್ಕ ಸಮುದಾಯದ ಏಕತೆಗ್ ಎಸ್ ಯು. ಪಣಿಯಾಡಿ, ಅಂಜಾರು ರಾಮಣ್ಣ ಹೆಗಡೆ ನೇತೃತ್ವಡ್ ಸ್ಥಾಪನೆಯಾದ್ ನೂದು ವರ್ಷದ ಪೊರ್ಂಬಾಟ ಬೊಕ್ಕ ಸೇವೆದ ಸಂಕೇತವಾದುಪ್ಪುನ ತುಳುವ ಮಹಾಸಭೆ, 2028ನೇ ವರ್ಷಕ್ಕೆ ತನ್ನ ಶತಮಾನೋತ್ಸವ (100 ವರ್ಷ)ಗ್ ಬತ್ತ್ದ್ ಎತ್ತ್ ದ್ಂಡ್. ಈ ಐತಿಹಾಸಿಕ ಸಂದರ್ಭಡ್, ತುಳುವ ಸಮುದಾಯದ ಬೆಳವಣಿಗೆ, ಜಾಗತಿಕ ವಿಸ್ತರಣೆ ಬೊಕ್ಕ ವಿಶ್ವ ತುಳುವೆರ್ನ ಒಗ್ಗಟ್ಟ್ ನ್ ಪ್ರತಿಬಿಂಬಿಸಾವುನ ಮಹತ್ವದ ನಿರ್ಣಯನ್ ಮಹಾಸಭೆ ದೆತೊಂದುಂಡು.
ಭಾರತದ ಗಡಿ ದಾಂಟ್ದ್ ಪಿದಯಿ ದೇಶೊಡುಲ ತುಳುವ ಮಹಾಸಭೆ ಶಾಖೆಲು ಸ್ಥಾಪನೆ ಆಪಿನ ಹಿನ್ನೆಲೆಡ್, ಸಂಸ್ಥೆದ ವ್ಯಾಪ್ತಿ ಬೊಕ್ಕ ದೃಷ್ಟಿಕೋನನ್ ಸ್ಪಷ್ಟವಾದ್ ತೆರಿಪಾವುನ ಉದ್ದೇಶಡ್ “ತುಳುವ ಮಹಾಸಭೆ” ಪನ್ಪಿನ ಈ ಸಂಸ್ಥೆ ನನ “ತುಳುವ ಮಹಾಸಭೆ ಇಂಟರ್ ನ್ಯಾಷನಲ್” ಪನ್ಪಿನ ಪುದರ್ಡ್ ಬೇಲೆ ಮಲ್ಪರೆ ನಿರ್ಧಾರ ಮಲ್ದ್ಂಡ್.
ಈ ಪರಿವರ್ತನೆ ಕೇವಲ ಪುದರ್ ಬದಲಾವಣೆ ಅತ್ತ್; ಉಂದು ಜಗತ್ತ್ ಡ್ ಉಪ್ಪುನ ಮಾತಾ ತುಳುವೆರೆನ್ ಒಂಜೇ ಸಾಂಸ್ಕೃತಿಕ, ಸಾಮಾಜಿಕ ಬೊಕ್ಕ ಆರ್ಥಿಕ ವೇದಿಕೆದ ಕುಬಲ್ದಡಿಟ್ ಒಟ್ಟು ಮಲ್ಪುನ ಮಹಾ ಸಂಕಲ್ಪ ಮಲ್ದೆರ್.
ಭಾರತಡ್ ಉಪ್ಪುನ ಅಂಚೆನೆ ನನದ ದಿನಕ್ಲೆಡ್ ವಿದೇಶಡ್ಲ ಸ್ಥಾಪನೆ ಆಪಿನ ಮಾತ ಶಾಖೆಲು ಆಯಾ ದೇಶದ ಕಾನೂನು ಬೊಕ್ಕ ನಿಯಮಾವಳಿಗ್ ಅನುಗುಣವಾದ್, ತುಳುವ ಮಹಾಸಭೆ ಇಂಟರ್ನ್ಯಾಷನಲ್ ಪನ್ಪಿನ ಪುದರ್ಡ್ ಬೇಲೆ ಮಲ್ಪುಂಡು. ಸಂಘಟನೆದ ಮೂಲ ಉದ್ದೇಶ, ಮೌಲ್ಯ, ಸೆಲ್ಫ್ ಹೆಲ್ಪ್ ಗ್ರೂಪ್ ಮಾದರಿದ ಪಾರದರ್ಶಕ ಕಾರ್ಯವಿಧಾನ ಬೊಕ್ಕ ನೈತಿಕ ಬದ್ಧತೆ ಅಂಚೆನೇ ಉಪ್ಪುಂಡು.
ಇಂಚಿನ ಐತಿಹಾಸಿಕ ಪರಿವರ್ತನೆದ ನಡುಟ್ಟೇ ಶತಮಾನೋತ್ಸವನ್ ಕಾಲಿ ಆಚರಣೆಯಾದ್ ಮಾತ್ರ ಅತ್ತಾಂದೆ ತುಳುನಾಡ್ದ ಹೋರಾಟ, ಸಾಧನೆ, ಸೇವೆ ಬೊಕ್ಕ ಭವಿಷ್ಯದ ದಿಕ್ಕ್ಲೆನ್ ನಿರ್ಧಾರ ಮಲ್ಪುನ ಮಹಾ ಸಮಾಗಮವಾದ್ ರಚನೆ ಮಲ್ಪುನ ದೃಷ್ಟಿಡ್, ಜಗತ್ತ್ದ ಮಾತಾ ತುಳುವೆರೆನ್ ಸೇರ್ಸಾದ್ “ವಿಶ್ವ ತುಳುವ ಮಹಾಸಭೆ” ಪನ್ಪಿನ ಭವ್ಯ ಕಾರ್ಯಕ್ರಮನ್ ಉಡುಪಿ ಜಿಲ್ಲೆಡ್ ಅಟ್ಟಣೆ ಮಲ್ಪುನ ನಿರ್ಧಾರನ್ ತುಳುವ ಮಹಾಸಭೆ ಇಂಟರ್ನ್ಯಾಷನಲ್ ದೆತೊಂದುಂಡು.
ಉಡುಪಿ ತುಳುನಾಡ್ದ ಪವಿತ್ರ, ಸಾಂಸ್ಕೃತಿಕ ಬೊಕ್ಕ ಐತಿಹಾಸಿಕ ಕೇಂದ್ರ ಆಪಿನೆರ್ದಾವರ ಅಂಚೆನೆ ಈ ಮಹಾ ಚಳುವಳಿ ಉಡುಪಿರ್ದೇ ಸುರು ಆಪಿನೆರ್ದ್ ಈ ವಿಶ್ವಮಟ್ಟದ ಶತಮಾನೋತ್ಸವ ಲೇಸ್ಗ್ ಅತ್ಯಂತ ಸೂಕ್ತ ವೇದಿಕೆ ಆವರೆ ಉಂಡು. ಈ ವಿಶ್ವ ತುಳುವ ಮಹಾಸಭೆ ಕಾರ್ಯಕ್ರಮ ಜಗತ್ತ್ದ ಬೇತೆ ಬೇತೆ ದೇಶಡ್ ವಾಸ ಮಲ್ಪುನ ತುಳುವೆರೆನ್ ಒಂಜೇ ವೇದಿಕೆಡ್ ಒಟ್ಟು ಮಲ್ಪುನ ಮಹಾ ಸಂಭ್ರಮ ಆವರೆ ಉಂಡು.
ತುಳು ಭಾಷೆ, ಲಿಪಿ, ಸಾಹಿತ್ಯ, ಜನಪದ, ಕಲೆ, ಸಂಸ್ಕೃತಿ ಬೊಕ್ಕ ಪರಂಪರೆದ ಸಮಗ್ರ ಪ್ರದರ್ಶನ ಆವರೆ ಉಂಡು. ತುಳುವ ಮಹಾಸಭೆತ್ತ ನೂದು ವರ್ಷದ ಸಾಧನೆ, ಸೇವೆ ಬೊಕ್ಕ ಸಾಮಾಜಿಕ ಪೊರ್ಂಬಾಟೊದ ಜೀವಂತ ದಾಖಲೆ ಆವರೆ ಉಂಡು. ದುಂಬುದ ಶತಮಾನೊಗಾದ್ ತುಳುವ ಸಮುದಾಯದ ದೀರ್ಘಕಾಲೀನ ದೃಷ್ಟಿ, ಕಾರ್ಯಪಥ ಬೊಕ್ಕ ಜಾಗತಿಕ ಬದ್ಧತೆನ್ ಘೋಷಣೆ ಮಲ್ಪುನ ಮಹಾಸಂಕಲ್ಪ ಆವರೆ ಉಂಡು.
“ನೂದು ವರ್ಷದ ಪಜ್ಜೆ – ದುಂಬುದ ಶತಮಾನದ ಮಹಾ ಸಂಕಲ್ಪ” ಪನ್ಪಿನ ಧ್ಯೇಯದ ಒಟ್ಟುಗೆ
ತುಳುವ ಮಹಾಸಭೆ ಶತಮಾನೋತ್ಸವ ಸಂದರ್ಭಡ್ ತುಳುವ ಮಹಾಸಭೆ ಇಂಟರ್ನ್ಯಾಷನಲ್ ಆದ್ ಬದಲಾಪಿನ ಈ ಐತಿಹಾಸಿಕ ಕ್ಷಣ, ತುಳುನಾಡ್ದ ಇತಿಹಾಸಡ್ ಪೊಸ ಅಧ್ಯಾಯ ಬರೆಯರೆ ಇತ್ತ್ದ್ ವಿಶ್ವ ತುಳುವೆರ್ನ ಒಗ್ಗಟ್ಟ್ಗ್ ಶಾಶ್ವತ ದಿಕ್ಕ್ ಕೊರಿಯರೆ ಉಂಡು. ಶತಮಾನೋತ್ಸವ ಬೊಕ್ಕ ವಿಶ್ವ ತುಳುವ ಮಹಾಸಭೆ ಕಾರ್ಯಕ್ರಮಗ್ ಸಂಬಂಧ ಪಟಿನ ದಿನ, ರೂಪುರೇಷೆ ಬೊಕ್ಕ ಪೂರ್ವಭಾವಿ ಚಟುವಟಿಕೆದ ವಿವರ ನನ ದುಂಬಗ್ ಪ್ರಕಟ ಮಲ್ಪುವ.