ಧರ್ಮ – ನಂಬಿಕೆನ್ ವಿವೇಚನೆಗ್ ಬುಡಿ: ಹರಿ ಆಸ್ರಣ್ಣ
ಕುಡ್ಲ: ‘ದೇವಸ್ಥಾನ, ದೈವಸ್ಥಾನಲೆಗ್ ಸಂಬಂಧಪಟ್ಟಿನ ಜಾಗೆಗ್ ಅನುಗುಣವಾದ್ ನಿಯಮ, ಕ್ರಮ, ನಂಬಿಕೆಲು ಬದಲಾಪುಂಡು. ಧಾರ್ಮಿಕ ನಂಬಿಕೆಲೆನ್ ಪ್ರಶ್ನೆ ಮಲ್ಪಂದೆ ಜನಕ್ಲೆನ ವಿವೇಚನೆಗ್ ಬುರ್ದ್ ಬುಡೊಡು’ ಪಂದ್ ಶ್ರೀ ಕಟೀಲ್ ಕ್ಷೇತ್ರದ ಅರ್ಚಕೆರ್ ಹರಿನಾರಾಯಣದಾಸ ಆಸ್ರಣ್ಣ ಪಂಡೆರ್.
ಮೇರ್ ಗುರುಪುರ ದೋಣಿಂಜೆ ಗುತ್ತು ಗಡಿಪ್ರಧಾನರ್ ಪ್ರಮೋದ್ ಕುಮಾರ್ ರೈ ಮೆರೆನ ಗುರ್ಕಾರ್ಮೆಡ್, ವಿಶ್ವಹಿಂದು ಪರಿಷತ್ತ್, ಹಿಂದು ಯುವಸೇನೆ, ತುಳುನಾಡ ರಕ್ಷಣಾ ವೇದಿಕೆದ ಒಟ್ಟುಸೇರಿಗೆಡ್ ಕುಡ್ಲದ ಉರ್ವ ಶ್ರೀ ಮಾರಿಯಮ್ಮ ದೇವಸ್ಥಾನದ ಸಭಾಂಗಣಡ್ ಐತಾರ ನಡತಿನ ‘ಧರ್ಮಾವಲೋಕನ ಸಭೆ, ಧರ್ಮಾಚರಣೆ – ಒಂದು ಅವಲೋಕನ’ ಪನ್ಪಿನ ಸುರುತ್ತ ಗೋಷ್ಠಿಡ್ ‘ದೇವಸ್ಥಾನಲು ಬೊಕ್ಕ ಧರ್ಮಾಚರಣೆ’ ಇಸಯದ ಬಗೆಟ್ಟ್ ಪಾತೆರಿಯೆರ್.
ಅಂಚೆನೆ ‘ದೇವಸ್ಥಾನಗ್ ಬರ್ಪುನಕುಲು ಧರ್ಮಾಚರಣೆದ ಬಗ್ಗೆ ಪ್ರಶ್ನೆ ಮಲ್ಪುವೆರ್. ದೈವಸ್ಥಾನ, ನೇಮಲೆಗ್ ಬರಂದಿನಕುಲು ದೈವಾರಾಧನೆನ್ ವಿಮರ್ಶನೆ ಮಲ್ಪುವೆರ್. ಒಂಜಿ ಜಾಗೆ, ಒರಿ ನರಮಾನಿನ ನಂಬಿಕೆ, ನಿಯಮನ್ ಪ್ರಶ್ನೆ ಮಲ್ತ್ಂಡ ಅವು ದೂಷಣೆಗ್ ಕಾರಣವಾದ್, ಇತ್ತೆದ ದಿನಟ್ಟ್ ಸಾಮಾಜಿಕ ಜಾಲತಾಣಡ್ ವೈರಲ್ ಆದ್ ಹಿಂದು ಧರ್ಮ ಸರಿ ಇಜ್ಜಿ ಪನ್ಪುನಡೆಗ್ ಬತ್ತ್ ದ್ ಉಂತುದುಂಡು. ಅತ್ತಂದೆ ‘ದೇವಸ್ಥಾನಲೆಡ್ ಬ್ರಹ್ಮಕಲಶದ ಬೊಕ್ಕ ತಂತ್ರಿಲು ಆ ದೇವಸ್ಥಾನದ ನಿಯಮಲೆನ್ ನಿರ್ಧಾರ ಮಲ್ಪುವೆರ್. ಇತ್ತೆ ದೇವಸ್ಥಾನದ ಕಾರ್ಯನಿರ್ವಹಣಾಧಿಕಾರಿ, ಜಿಲ್ಲಾಧಿಕಾರಿಲು ದೇವಸ್ಥಾನದ ನಿಯಮಲೆನ್ ನಿರ್ಧಾರ ಮಲ್ಪುಲೆಕ್ಕ ಆತ್ಂಡ್. ಆಗಮಶಾಸ್ತ್ರದ ಪ್ರಕಾರ ಬ್ರಹ್ಮಕಲಶ ಮಲ್ಪೆರೆ ದೇವಸ್ಥಾನದ ಆಡಳಿತ ನಡಾಪುನ ಸರಕಾರನೇ ಸಹಕಾರ ಕೊರೊಂದು ಇಜ್ಜಿ’ ಪಂದ್ ಪಂಡೆರ್.
ಶರವು ಶ್ರೀ ಪರಮೇಶ್ವರ ಮಹಾಗಣಪತಿ ದೇವಸ್ಥಾನದ ಶಿಲೆ ಆಡಳಿತ ಮೊಕ್ತೇಸರೆರ್ ಶರವು ರಾಘವೇಂದ್ರ ಶಾಸ್ತಿ ಪಾತೆರ್ದ್, ‘ಪ್ರತಿ ದೇವಸ್ಥಾನಲೆಡ್ ಆ ಕ್ಷೇತ್ರಗ್ ಸಂಬಂಧಪಟ್ಟಿನ ಬೇತೆನೇ ನಿಯಮಲು ಇಪ್ಪುಂಡು. ಆ ದೇವಸ್ಥಾನಲೆಡ್ ನಡಪೊಡಾಯಿನ ಆಚರಣೆಲು ಉಂತುಂಡ ನಕಾರಾತ್ಮಕ ಅಂಶಲು ಎಚ್ಚಾಪುಂಡು. 12 ವರ್ಷಗೊರ ಬ್ರಹ್ಮಕಲಶ ಪನ್ಪುನವು ಆ ಅವಧಿಡ್ ಆಯಿನ ತಪ್ಪುಲೆನ್ ಸರಿ ಮಲ್ಪುನ ಕೆಲಸ ಆತ್ಂಡ್’ ಪಂದ್ ಪಂಡೆರ್.
ಲೇಸ್ ನ್ ಉದಿಪನ ಮಲ್ತ್ ದ್ ಆಶೀರ್ವಚನ ಕೊರ್ನ ಗುರುಪುರ ಜಂಗಮ ಸಂಸ್ಥಾನ ಮಠತ್ತ ಶ್ರೀ ರುದ್ರಮುನಿ ಮಹಾಸ್ವಾಮೀಜಿ, ಪಾತೆರ್ದ್, ‘ವೇದ, ಉಪನಿಷತ್ತ್ ನ್ ಓದನಂದೆ, ಅವೆನ್ ಜೋಕ್ಲೆಗ್ ಕಲ್ಪಂದೆ ನಮ್ಮ ಧಾರ್ಮಿಕ ಆಚರಣೆಲೆನ್ ನಮನೆ ಪ್ರಶ್ನೆ ಮಲ್ಪುನೇ ಸರಿ ಅತ್ತ್, ಹಿಂದು ಸಮಾಜನ್ ಪೊಡಾತ್ ದ್ ಗೊಬ್ಬುನಕ್ಲೆನ ಬಗ್ಗೆ ಎಚ್ಚರಡ್ ಇಪ್ಪೊಡು’ ಪಂದ್ ಪಂಡೆರ್.
ಸಭೆತ್ತ ಅಧ್ಯಕ್ಷತೆನ್ ಒಯಿಸೊನ್ನ ಗುರುಪುರ ದೋಣಿಂಜೆ ಗುತ್ತು ಗಡಿ ಪ್ರಧಾನೆರ್ ಪ್ರಮೋದ್ ಕುಮಾರ್ ರೈ ಪಾತೆರ್ದ್, ‘ಮಾತ ಸಮುದಾಯದಕ್ಲೆನ್ ಒಟ್ಟಿಗೆ ಸೇರ್ಸಾದ್ ದೇವರೆನ ಆರಾಧನೆ, ದೈವದ ಆರಾಧನೆ ಆವೊಡು, ಧರ್ಮಾದ ಆಚರಣೆಡ್ ಆಯಿನ ಲೋಪ, ವ್ಯತ್ಯಾಸನ್ ಸರಿ ಮಲ್ಪೆರೆ ಈ ಸಭೆನ್ ಆಯೋಜನೆ ಮಲ್ದ್ಂಡ್’ ಪಂದ್ ಪಂಡೆರ್.
ಈ ಪೊರ್ತುಡು ಬೆದ್ರ ಜೈನಮಠತ್ತ ಶ್ರೀ ಚಾರುಕೀರ್ತಿ ಭಟ್ಟಾರಕ ಪಟ್ಟಾಚಾರ್ಯ ಸ್ವಾಮೀಜಿ, ಮಾಣಿಲ ಶ್ರೀ ರಾಜಯೋಗಿ ಮೋಹನದಾಸ ಸ್ವಾಮೀಜಿ, ಕೇಮಾರು ಶ್ರೀ ಈಶ ವಿಠಲದಾಸ ಸ್ವಾಮೀಜಿ, ಕಾಂಞಂಗಾಡು ನಿತ್ಯಾನಂದ ಆಶ್ರಮ ಗುರುವನದ ಶ್ರೀ ವಿದ್ಯಾನಂದ ಭಾರತಿ ಸ್ವಾಮೀಜಿ, ಶಾಸಕೆರ್ ವೇದವ್ಯಾಸ ಕಾಮತ್, ಮುಲ್ಕಿ ಅರಮನೆತ್ತ ಅರಸೆರ್ ದುಗ್ಗಣ್ಣ ಸಾವಂತೆರ್, ಕೂಳೂರು ಬೀಡುದ ಆಶಿಕ್ಕುಮಾರ್ ಜೈನ್, ವೈದಿಕ ವಿದ್ವಾಂಸೆರ್ ಭಾಸ್ಕರ ಭಟ್ ಪಂಜ, ಬಪ್ಪನಾಡ್ ಕ್ಷೇತ್ರದ ಪ್ರಸಾದ್ ಭಟ್, ಜಾನಪದ ವಿದ್ವಾಂಸೆರ್ ಕೆ.ಎಲ್.ಕುಂಡಂತಾಯ, ರಾಜ್ಯ ಧಾರ್ಮಿಕ ಪರಿಷತ್ ಸದಸ್ಯೆರ್ ರವಿಶಂಕರ ಶೆಟ್ಟಿ ಬಡಾಜೆ, ಉರ್ವ ಮಾರಿಯಮ್ಮ ದೇವಸ್ಥಾನದ ಆಡಳಿತ ಮೊಕ್ತೇಸರೆರ್ ಲಕ್ಷ್ಮಣ ಅಮೀನ್ ಕೋಡಿಕಲ್, ಪ್ರಮುಖೆರ್ ಏಂತಿಮಾರು ಬೀಡುದ ಶೀನಪ್ಪ ರೈ, ಅಧಿಕಾರಿ ಜಗದೀಶ ಬೆದ್ರ, ಯೋಗೀಶ್ಕುಮಾರ್ ಜೆಪ್ಪು, ಎಸ್.ಆರ್. ಹರೀಶ್ ಆಚಾರ್ಯ, ಜನಾರ್ಧನ ಅರ್ಕುಳ, ಗಂಗಾಧರ ಶೆಟ್ಟಿ, ಡಾ. ಅಣ್ಣಯ್ಯ ಕುಲಾಲ್, ಭುಜಂಗ ಶೆಟ್ಟಿ ಜಪ್ಪುಗುಡ್ಡೆಗುತ್ತು, ರೋಹಿತ್ಕುಮಾರ್ ಕಟೀಲ್, ಭಾಸ್ಕರಚಂದ್ರ ಶೆಟ್ಟಿ, ಕಮಲಾಕ್ಷ ಗಂಧಕಾಡು, ಪ್ರಕಾಶ್ ಇಳಂತಿಲ, ಪ್ರೇಮನಾಥ ಮಾರ್ಲ ಕಾರಮೊಗರು, ಪ್ರವೀಣ್ ಕುತ್ತಾರ್, ತಿಂಗಳೆ ವಿಕ್ರಮಾರ್ಜುನ ಹೆಗ್ಡೆ, ಬೊಂಡಾಲ ಸಚ್ಚಿದಾನಂದ ಶೆಟ್ಟಿ, ಉಮೇಶ ರೈ ಮೇಗಿನ ಮನೆ, ಲೀಲಾಕ್ಷ ಬಿ. ಕರ್ಕೇರ, ದಯಾನಂದ ಕತ್ತಲ್ಸಾರ್, ಕಿರಣ್ ಉಪಾಧ್ಯಾಯ, ವಿಜಯ್ ಶೆಟ್ಟಿ, ಮಯೂರ ಕೀರ್ತಿ ಜೈನ್, ನಿತ್ಯಾನಂದ ಮುಂಡೋಡಿ, ಜಿತೇಂದ್ರ ಕೊಟ್ಟಾರಿ, ಪದ್ಮನಾಭ ಬೆದ್ರ, ಅಡ್ಯಾರ್ ಪುರುಷೋತ್ತಮ ಭಂಡಾರಿ, ಲೋಕಯ್ಯ ಗೌಡ, ದಿನಕರ ಶೆಟ್ಟಿ, ಮಾಧವ ಸುವರ್ಣ, ದಿವಾಕರ ಸಾಮಾನಿ, ಪ್ರಶಾಂತ್, ಗಂಗಾಧರ ಶೆಟ್ಟಿ, ಶಿವಪ್ಪ ನಂತೂರು ಪಾಲ್ ಪಡೆದಿತ್ತೆರ್.
ಧರ್ಮಾವಲೋಕನ ಸಮಿತಿ ಸಂಚಾಲಕೆರ್ ಪ್ರೊ.ಭಾಸ್ಕರ ರೈ ಕುಕ್ಕುವಳ್ಳಿ ಎದ್ಕೊಂದು ಪ್ರಸ್ತಾವಿಕ ಪಾತೆರಿಯೆರ್. ತುಳುನಾಡ ರಕ್ಷಣಾ ವೇದಿಕೆದ ಸ್ಥಾಪಕಾಧ್ಯಕ್ಷೆರ್ ಯೋಗೀಶ್ ಶೆಟ್ಟಿ ಜೆಪ್ಪು ಸೊಲ್ಮೆ ಸಂದಾಯೆರ್. ವಾರುಣಿ ಆಚಾರ್ಯ ಲೇಸ್ ನ್ ಸುಧಾರಿಕೆ ಮಲ್ತೆರ್.
ಅವೆರ್ದ್ ಬೊಕ್ಕ ‘ದೈವಾರಾಧನೆ – ನಾಗಾರಾಧನೆ ಬೊಕ್ಕ ಧರ್ಮಾಚರಣೆ’ ದ ರಡ್ಡನೇ ಅವಲೋಕನ ಗೋಷ್ಠಿ ನಡತ್ಂಡ್.
ಸಭೆತ್ತ ಬೊಕ್ಕ ಜಿಲ್ಲೆದ ಪುಗರ್ತೆದ ಕಲಾವಿದೆರ್ದ್ ‘ಭಕ್ತಿ ಪಾರಮ್ಯ’ ಯಕ್ಷಗಾನ ತಾಳಮದ್ದಳೆ ನಡತ್ಂಡ್. ಡಾ. ಎಂ.ಪ್ರಭಾಕರ ಜೋಶಿ, ಪ್ರೊ.ಭಾಸ್ಕರ ರೈ ಕುಕ್ಕುವಳ್ಳಿ, ರವಿ ಅಲೆವೂರಾಯ, ಜಯರಾಮ ಭಟ್ ದೇವಸ್ಯ ಅರ್ಥಧಾರಿಲಾದಿತ್ತೆರ್. ಪ್ರಶಾಂತ ರೈ ಪುತ್ತೂರ್ ಮೆರೆನ ಭಾಗವತಿಕೆಗ್ ಪ್ರಣಾಮ್ ರಾವ್ ಬೊಕ್ಕ ಮೋಹನ್ ಶರವೂರು ಚೆಂಡೆ – ಮದ್ದಳೆಡ್ ಸಹಕಾರ ಕೊರಿಯೆರ್.
