December 31, 2025

ಜ.14-15 : ಬಿಕರ್ನಕಟ್ಟೆ ದಿವ್ಯ ಬಾಲ ಯೇಸು ವಾರ್ಷಿಕ ಉಚ್ಚಯ 2026

ಕುಡ್ಲ : ಬಾಲ ಯೇಸುವಿನ ಪುಣ್ಯಕ್ಷೇತ್ರ, ಕಾರ್ಮೆಲ್ ಹಿಲ್, ಬಿಕರ್ನಕಟ್ಟೆ ಕುಡ್ಲ ಮುಲ್ತ ವಾರ್ಷಿಕ ಉಚ್ಚಯ ಜನವರಿ 14 ಬೊಕ್ಕ 15 ತಾರೀಕ್‌ಗ್ ಅದ್ದೂರಿಯಾದ್ ನಡಪರೆ ಉಂಡು ಪಂದ್ ಬಾಲಯೇಸು ಪುಣ್ಯಕ್ಷೇತ್ರ ಗುರುಮಠದ ಮುಖ್ಯಸ್ಥೆರ್ ವಂದನೀಯ ಫಾ| ಮೆಲ್ವಿನ್ ಡಿಕುನ್ಹಾ ಪತ್ರಿಕಾಗೋಷ್ಠಿ ಡ್ ತೆರಿಪಾಯೆರ್.
ಜ. 14 ಬಯ್ಯಡ್ 6 ಘಂಟೆಗ್ ಸಾಂಭ್ರಮಿಕ ಬಲಿಪೂಜೆನ್ ಅತೀ ವಂದನೀಯ ಜೆರಾಲ್ಡ್ ಐಸಾಕ್ ಲೋಬೊ, ಉಡುಪಿ ಧರ್ಮಕ್ಷೇತ್ರದ ಧರ್ಮಾಧ್ಯಕ್ಷೆರ್ ನಡಪಾದ್ ಕೊರ್ಪೆರ್. ಅವೇ ದಿನ ಕಾಂಡೆ 10 ಗಂಟೆಗ್ ವೃದ್ಧೆರ್ ಬೊಕ್ಕ ಅಸ್ವಸ್ಥರೆಗಾದ್ ಅತೀ ವಂದನೀಯ ಡಾ| ಅಲೋಶಿಯಸ್ ಪಾವ್ಲ್ ಡಿಸೋಜಾ, ಮಂಗಳೂರು ಧರ್ಮಪ್ರಾಂತ್ಯದ ನಿವೃತ್ತ ಧರ್ಮಾಧ್ಯಕ್ಷೆರ್ ವಿಶೇಷ ಬಲಿಪೂಜೆ ಮಲ್ಪುವೆರ್.
ಜ.15 ಕಾಂಡೆ 10 ಗಂಟೆಗ್ ಕಾರವಾರ ಧರ್ಮಪ್ರಾಂತ್ಯದ ಧರ್ಮಾಧ್ಯಕ್ಷೆರ್ ಅ. ವಂ. ದುಮಿಂಗ್ ಡಾಯಸ್ ಮೇರ್ ಜೋಕುಲೆಗಾದ್ ವಿಧೇಷ ಬಲಿ ಪೂಜೆ ಮಲ್ಪುವೆರ್. ವಾರ್ಷಿಕ ಉಚ್ಚಯದ ಮುಗಿತಲದ ಪ್ರಾರ್ಥನಾವಿಧಿನ್ ಬಯ್ಯಡ್ 6 ಗಂಟೆಗ್ ಅ. ವಂ. ಮೊನ್ಸಿಂಞೆರ್ ಮ್ಯಾಕ್ಸಿಂ ನೊರೊನ್ಹಾ, ಪ್ರಧಾನ ಗುರುಕುಲು, ಮಂಗಳೂರು ಧರ್ಮಪ್ರಾಂತ್ಯ ಮೇರ್ ಮಲ್ಪುವೆರ್ ಪಂದ್ ತೆರಿಪಾಯೆರ್.
ಉಚ್ಚಯದ ಅಂಗವಾದ್ ನವೇನಾ ಪ್ರಾರ್ಥನೆ ಜನವರಿ 5 ರ್ದ್ 13 ತಾ. ಮುಟ್ಟ ನಡಪರೆ ಉಂಡು. ಆ ದಿನಟ್ಟ್ ಪ್ರತಿದಿನ 9 ಪ್ರಾರ್ಥನಾ ವಿಧಿ ನಡಪುಂಡು.
ಜ. 5 ಸೋಮವಾರ ಕಾಂಡೆದ ಪ್ರಾರ್ಥನಾ ವಿಧಿನ್ ಅನಿವಾಸಿ ಭಾರತೀಯೆರೆಗಾದ್
ಬರೇಲಿ ಧರ್ಮಪ್ರಾಂತ್ಯದ ಧರ್ಮಾಧ್ಯಕ್ಷೆರ್ ಅ. ವಂ. ಇಗ್ನೇಶಿಯಸ್ ಡಿಸೋಜಾ ಮಲ್ಪುವೆರ್.
ಜ.10 ಶನಿವಾರ ಕಾಂಡೆದ ಬಲಿಪೂಜೆನ್ ಬಳ್ಳಾರಿ ಧರ್ಮಪ್ರಾಂತ್ಯದ ಧರ್ಮಾಧ್ಯಕ್ಷೆರ್ ಅ. ವಂ. ಹೆನ್ರಿ ಡಿಸೋಜ ಮೇರ್ ಜೋಕುಲೆಗಾದ್ ಮಲ್ಪುವೆರ್. ಪರಮ ಪ್ರಸಾದದ ಆರಾಧನೆ ಪ್ರತಿ ನವೆನಾ ದಿನಕ್ಲೆಡ್ 11.45 ರಿಂದ 12.30 ಮುಟ್ಟ ನಡಪುಂಡು. ಈ ಪೊರ್ತುಡು ವಿವಿಧ ಅಗತ್ಯೊಗಾದ್ ಪ್ರಾರ್ಥನೆ ನಡಪುಂಡು.
ದಿವ್ಯಬಾಲ ಯೇಸುವಿನ ಮೆರವಣಿಗೆ ಪ್ರತಿದಿನ ಬಯ್ಯಡ್ 6 ಗಂಟೆದ ಬಲಿಪೂಜೆರ್ದ್ ಬೊಕ್ಕ ನಡಪರೆ ಉಂಡು.
ಹೊರೆಕಾಣಿಕೆ ಮಹೋತ್ಸವ ಜ. 3 ಬಯ್ಯಡ್ 4.30 ಗಂಟೆಗ್ ಹೋಲಿಕ್ರಾಸ್ ಚರ್ಚ್, ಕುಲಶೇಕರರ್ದ್ ಪಿದಾಡುಂಡು. ಅಯಿರ್ದ್ ಬೊಕ್ಕ ವಂ| ಡಾ| ಪ್ರವೀಣ್ ಮಾರ್ಟಿಸ್, ಸಂತ ಅಲೋಶಿಯಸ್ ವಿಶ್ವ ವಿದ್ಯಾಲಯದ ಉಪಕುಲಪತಿ ಧ್ವಜಾರೋಹಣ ಮಲ್ಪುವೆರ್.
ಅನ್ನಸಂತರ್ಪಣೆ: ನವೇನಾ ಬೊಕ್ಕ ಪರ್ಬದ ದಿನಕ್ಲೆಡ್ ಮಧ್ಯಾಹ್ನಡ್ ಅನ್ನ ಸಂತರ್ಪಣೆ ನಡಪರೆ ಉಂಡು.
ಕಣ್ಣ್ ಪರೀಕ್ಷೆ ಶಿಬಿರ: ಜನವರಿ 7 ಕಾಂಡೆ 8.30 ರ್ದ್ ಮಧ್ಯಾಹ್ನ 1 ಗಂಟೆ ಮುಟ್ಟ ಕಣ್ಣ್ ಪರೀಕ್ಷೆ ತಪಾಸಣೆ ಶಿಬಿರ ನಡಪರೆ ಉಂಡು. ಜ. 9 ಬೊಕ್ಕ 10 ಕ್ಕ್ ಕಾಂಡೆ 8.30 ರ್ದ್ ಮಧ್ಯಾಹ್ನ 1 ಗಂಟೆ ಮುಟ್ಟ ರಕ್ತದಾನ ಶಿಬಿರ ನಡಪರೆ ಉಂಡು. ಕಾರ್ಮೆಲ್ ಇಗ್ನೆಟ್ ಕಾರ್ಯಕ್ರಮಡ್ 400 ವಿದ್ಯಾರ್ಥಿಲೆಗ್ ವಿದ್ಯಾರ್ಥಿ ವೇತನ ಪಟ್ಟರೆ ಉಂಡು. ಅಂಚೆನೆ ಶಿಲುಬೆಯ ಸಂತ ಯೊವಾನ್ನರ ಜೀವನ, ಬೋದನೆ ಆಧರಿಸಾ್್ ವಿಶೇಷ ವಸ್ತು ಪ್ರದರ್ಶನ ನಡಪರೆ ಉಂಡು ಪಂದ್ ತೆರಿಪಾಯೆರ್.
ಪ್ರತಿಕಾಗೋಷ್ಠಿಡ್ ಬಾಲಯೇಸು ಪುಣ್ಯಕ್ಷೇತ್ರದ ನಿರ್ದೇಶಕೆರ್ ವಂ. ಫಾ. ಸ್ಟೀಫನ್ ಪಿರೇರಾ, ಕಾರ್ಮೆಲ್ ಸಭೆತ್ತ ವಂ. ಫಾ| ದೀಪ್ ಫೆರ್ನಾಂಡಿಸ್, ವಲೇರಿಯನ್ ಫುರ್ಟಾಡೊ, ಬಾಳೊಕ್ ಜೆಜು ಕುಟಮ್, ವ್ಯವಸ್ಥಾಪಕೆರ್ ವಿಲ್‌ಫ್ರೆಡ್ ಲಸ್ರಾದೊ ಹಾಜರಿತ್ತೆರ್.