ಕಲ್ಪುನ ಜೋಕುಲು ಮೊಬೈಲ್ ಬುಡೊಡು, ಶಿಕ್ಷಣದೊಟ್ಟಿಗೆ ಸಂಸ್ಕೃತಿನ್ ಕಲ್ಪೊಡು : ಡಾ| ಉದಯ ಕುಮಾರ್

ಪಾವಂಜೆ ದೇವಾಡಿಗ ಸಮಾಜ ಸೇವಾ ಸಂಘದ ಮುತಾಲಿಕೆಡ್ ವಿದ್ಯಾರ್ಥಿವೇತನ ವಿತರಣೆ ಬೊಕ್ಕ ಸನ್ಮಾನ ಲೇಸ್

ಹಳೆಯಂಗಡಿ : “ಜೋಕುಲೆನ ಕಲ್ಪುನ ಆಯ್ಕೆದ ವಿಷಯೊಡು ಪೋಷಕೆರ್ ಬಲವಂತ ಮಲ್ಪುನ ಸರಿ ಅತ್ತ್, ಅಕ್ಲೆನ ಕಲ್ಪುನ ಆಯ್ಕೆನ್ ಅಕ್ಲೆನ ವಿವೇಚನೆಗ್ ಬುಡೊಡು. ನೆತ್ತೊಟ್ಟಿಗೆ ಮೊಬೈಲ್ ಗಲಸುನೆನ್ ಕಮ್ಮಿ ಮಲ್ತ್ಂಡ್ ಜೋಕುಲು ಸುಸಂಸ್ಕೃತರಾಪೆರ್” ಪಂದ್ ಕುಡ್ಲ ಸೈಂಟ್ ಆಗ್ನೇಸ್ ಕಾಲೇಜ್ ದ ಹಿಂದಿ ವಿಭಾಗದ ಅಸಿಸ್ಟೆಂಟ್ ಪ್ರೊಫೆಸರ್ ಡಾ| ಉದಯ ಕುಮಾರ್ ಮೇರ್ ಅಭಿಪ್ರಾಯ ತೆರಿಪಾಯೆರ್.

ಮೇರ್ ಇಂಚಿಪ್ಪ ದೇವಾಡಿಗ ಸಮಾಜ ಸೇವಾ ಸಂಘ (ರಿ.), ಪಾವಂಜೆ, ದೇವಾಡಿಗ ಯುವ ವೇದಿಕೆ ಪಾವಂಜೆ, ದೇವಾಡಿಗ ಮಹಿಳಾ ವೇದಿಕೆ ಪಾವಂಜೆ ಬೊಕ್ಕ ದೇವಾಡಿಗ ಸೇವಾ ಟ್ರಸ್ಟ್ (ರಿ.) ಪಾವಂಜೆದ ಒಟ್ಟುಸೇರಿಗೆಡ್ ನಡತಿನ ವಿದ್ಯಾರ್ಥಿವೇತನ ವಿತರಣೆ ಬೊಕ್ಕ ಸನ್ಮಾನ ಲೇಸ್ ದ ತುಡರ್ ಅರ್ಲಾದ್ ಪಾತೆರಿಯೆರ್‌.

ಮಲ್ಲ ಬಿನ್ನೆರಾದ್ ಬತ್ತಿನ ಅತ್ತಾವರ ಸರಕಾರಿ ಪ್ರೌಢಶಾಲೆದ ಸಹಾಯಕ ಶಿಕ್ಷಕಿ ವೀಣಾ ಗಣೇಶ್ ಪಾತೆರ್ದ್, “ಜವನೆರ್, ಜೋಕುಲು ಸಂಘಟನೆಡ್ ಪಾಲ್ ಪಡೆದ್ ಪೋಷಕೆರೆನ್, ಹಿರಿಯೆರೆನ್ ಗೌರವಿಸಾವುನ ಸಂಸ್ಕಾರನ್ ಪೋಷಕೆರ್ ಜೋಕ್ಲೆಗ್ ಕಲ್ಪಾವೊಡು” ಪಂದ್ ಪಂಡೆರ್.

ಶಿರಡಿ ಸಾಯಿ ಬಾಬಾ ಫ್ಯಾಬ್ರಿಕೇಶನ್ ಬೊಕ್ಕ ಡೆವಲಪರ್ಸ್ ಕುಡ್ಲದ ಮಾಲಕೆರ್, ಉದ್ಯಮಿ ಅಮೃತ್ ಕದ್ರಿ ಪಾತೆರ್ದ್, ಪಾವಂಜೆ ದೇವಾಡಿಗ ಸಂಘದ ಅಭಿವೃದ್ಧಿಗ್ ತನ್ನ ಕೈಟ್ಟ್ ಆಯಿನಾತ್ ಸಹಕಾರ ಕೊರ್ಪೆ ಪಂದ್ ಲೇಸ್ ಗ್ ಎಡ್ಡೆಪ್ಪು ಬಯಕಿಯೆರ್.

ಪಾವಂಜೆ ಶ್ರೀ ಮಹಾಲಿಂಗೇಶ್ವರ ಮಹಾಗಣಪತಿ ದೇವಲ್ಯದ ಜೀರ್ಣೋದ್ಧಾರ ಬೊಕ್ಕ ಬ್ರಹ್ಮಕಲಶ ಉಚ್ಚಯ ಸಮಿತಿದ ಗುರ್ಕಾರೆ ರಘು ಕೆ.ದೇವಾಡಿಗ ಮಲ್ಲ ಬಿನ್ನೆರಾದ್ ಬತ್ತ್ ದ್ ಲೇಸ್ ಗ್ ಎಡ್ಡೆಪ್ಪು ಬಯಕಿಯೆರ್.

ಲೇಸ್ ದ ಗುರ್ಕಾರ್ಮೆನ್ ಒಯಿಸ್ ದಿತ್ತಿನ ಪಾವಂಜೆ ದೇವಾಡಿಗ ಸಂಘದ ಗುರ್ಕಾರೆ ರಾಮದಾಸ್ ಪಾವಂಜೆ ಪಾತೆರ್ದ್, ಜವನೆರ್ ಸಂಘಟನೆಡ್ ಪಾಲ್ ಪಡೆಯೆರೆ ಪೋಷಕೆರ್ ಮಲ್ಲ ಪಾತ್ರ ಒಯಿಸೊನೊಡು ಪಂದ್ ಪಂಡೆರ್.

ಲೇಸ್ ಡ್ ಎಸ್.ಎಸ್.ಎಲ್.ಸಿ. ಬೊಕ್ಕ ಪಿ.ಯು.ಸಿ. 2022-23ನೇ ಸಾಲ್ ಡ್ ಎಚ್ಚ ಮಾರ್ಕ್ಸ್ ಪಡೆಯಿನ ಒಟ್ಟು 21 ಜನ ಕಲ್ಪಾರ್ಥಿಲೆಗ್ ಕಿನ್ನಿಗೋಳಿ ದಿ. ಉಮ್ಮಕ್ಕ ಮೊಯಿಲ್ದಿ ನೆಂಪುಗಾದ್ ಅರೆನ ಮಗೆ ಯಾದವ ದೇವಾಡಿಗೆರ್ನ ಕೊಡುಗೆಡ್ ವಿದ್ಯಾರ್ಥಿವೇತನನ್ ಪಟ್ಟಿಯೆರ್.

ಈ ಪೊರ್ತುಡು ನಿವೃತ್ತ ಶಿಕ್ಷಕಿ ಸಮಾಜ ಸೇವಕಿ ಮೀರಾ ಬಾಯಿ ಕೆ., ಪ್ರಗತಿಪರ ಕೃಷಿಕೆರ್ ಗಂಗಾಧರ ದೇವಾಡಿಗ ಬೆಳ್ಳಾಯಿರು ಬೊಕ್ಕ ಅಂತರಾಷ್ಟ್ರೀಯ ಸೌಂದರ್ಯ ರಾಣಿ ಪಂತೊಡು ಗೆಂದಿನ ಕುಮಾರಿ ಯಶಸ್ವಿನಿ ದೇವಾಡಿಗ ಕುಳಾಯಿ ಮೊಕ್ಲೆಗ್ ಸನ್ಮಾನ ನಡತ್ಂಡ್.

2022-23ನೇ ಸಾಲ್ ಡ್ ಎಸ್.ಎಸ್.ಎಲ್.ಸಿ.ಡ್ ಎಚ್ಚ ಮಾರ್ಕ್ಸ್ ಪಡೆಯಿನ ವಿನೀತ್ ದೇವಾಡಿಗೆರೆನ, ಪದ್ಮನೂರು ದಿ| ಬಿ.ಜಿ.ದೇವಾಡಿಗ ನೆಂಪುಗಾದ್ ಬೊಕ್ಕ ಪಿ.ಯು.ಸಿ.ಡ್ ಎಚ್ಚ ಮಾರ್ಕ್ಸ್ ಪಡೆಯಿನ ಅಡ್ಯಾರ್ ಪ್ರಖ್ಯಾತ್ ಪ್ರಶಾಂತ್, ದಿ| ಕಮಲ ಬೊಕ್ಕ ಕೊರಗ ದೇವಾಡಿಗ ನೆಂಪುಗಾದ್ ಪ್ರತಿಭಾ ಪುರಸ್ಕಾರ ಕೊರಿಯೆರ್. ಬೊಕ್ಕ ವಾರ್ಷಿಕ ಕ್ರೀಡಾಕೂಟಡ್ ಗೆಂದಿನಕ್ಲೆಗ್ ಇನಾಮು ಕೊರಿಯೆರ್.

ಕಟ್ವಾನ ಸಮಿತಿದ ಪ್ರಧಾನ ಕಾರ್ಯದರ್ಶಿ ಜನಾರ್ದನ್ ಪಡುಪಣಂಬೂರು, ದೇವಾಡಿಗ ಯುವ ವೇದಿಕೆದ ಗುರ್ಕಾರೆ ಅಶ್ವಿನ್ ಪಡುಮನೆ, ದೇವಾಡಿಗ ಮಹಿಳಾ ವೇದಿಕೆದ ಗುರ್ಕಾರೆ ವಿಮಲ ಕೆ.ದೇವಾಡಿಗ, ದೇವಾಡಿಗ ಸೇವಾ ಟ್ರಸ್ಟ್ ದ ಗುರ್ಕಾರೆ ರಮೇಶ್ ದೇವಾಡಿಗ ತೋಕೂರು ಚಾವಡಿಡ್ ಪಾಲ್ ಪಡೆದಿತ್ತೆರ್.

ಸನ್ಮಾನ ಪತ್ರನ್ ಕ್ರಮವಾದ್ ಮಹಿಳಾ ವೇದಿಕೆದ ಕಾರ್ಯದರ್ಶಿ ಮಂಜುಳಾ ಶುಭ್ರತ್, ಸದಸ್ಯೆರ್ ಅನುಪಮಾ ಅಶೋಕ್ ಬೊಕ್ಕ ಕ್ರೀಡಾ ಬೊಕ್ಕ ಸಾಂಸ್ಕ್ರತಿಕ ಕಾರ್ಯದರ್ಶಿ ವಿಜಯಲಕ್ಷ್ಮಿ ಜನಾರ್ದನ್ ಓದಿಯೆರ್. ದೇವಾಡಿಗ ಯುವ ವೇದಿಕೆದ ಕಾರ್ಯದರ್ಶಿ ನಿಖಿಲ್ ಹಳೆಯಂಗಡಿ ವಿದ್ಯಾರ್ಥಿವೇತನದ ಪಟ್ಟಿನ್ ಬೊಕ್ಕ ದೇವಾಡಿಗ ಸೇವಾ ಟ್ರಸ್ಟ್ ದ ಗುರ್ಕಾರೆ ರಮೇಶ್ ತೋಕೂರು ಗೊಬ್ಬುದ ಪಂತೊಡ್ ಗೆಂದಿನಕ್ಲೆನ ಪಟ್ಟಿನ್ ಓದಿಯೆರ್.

ಶೈಲಜಾ ವಾಮನ್, ರೋಹಿಣಿ ರಮೇಶ್ ಬೊಕ್ಕ ರಾಜೀವಿ ವಾಮನ್ ಮೊಕ್ಲೆನ ಪ್ರಾರ್ಥನೆದೊಟ್ಟಿಗೆ ಸುರುವಾಯಿನ ಲೇಸ್ ಡ್ ಕಟ್ವಾನ ಸಮಿತಿದ ಪ್ರಧಾನ ಕಾರ್ಯದರ್ಶಿ ಜನಾರ್ದನ್ ಪಡುಪಣಂಬೂರು ಪ್ರಾಸ್ತಾವಿಕ ಭಾಷಣ ಮಲ್ತ್ ದ್ ಎದ್ಕೊನಿಯೆರ್. ದೇವಾಡಿಗ ಸಂಘದ ಪ್ರಧಾನ ಕಾರ್ಯದರ್ಶಿ ಜಗದೀಶ್ ಪಲಿಮಾರ್ ಸೊಲ್ಮೆ ಸಂದಾಯೆರ್. ಕಟ್ವಾನ ಸಮಿತಿದ ಕಾರ್ಯಾಧ್ಯಕ್ಷೆರ್ ಯಾದವ ದೇವಾಡಿಗೆರ್ ಲೇಸ್ ನ್ ಸುಧಾರಿಕೆ ಮಲ್ತೆರ್.

ಲೇಸ್ ದ ಸುರುಕು ಸಾಮೂಹಿಕ ಶ್ರೀ ಸತ್ಯನಾರಾಯಣ ಪೂಜೆ ಬೊಕ್ಕ ಶನೀಶ್ವರ ಪೂಜೆನ್ ಪಾವಂಜೆ ಶ್ರೀ ಗಣೇಶ್ ಕೆ.ಭಟ್ ಮೆರೆನ ಮುತಾಲಿಕೆಡ್ ನಡತ್ಂಡ್.