ಜವನೆರ್ ಎಡ್ಡೆ ಸಾದಿಡ್ ನಡತ್ಂಡ ಮಾತ್ರ ಸಾಧಕೆರಾಯೆರೆ ಸಾಧ್ಯ: ಪಂಜ ಭಾಸ್ಕರ ಭಟ್

ಹರಿಪಾದ ಜಾರಂದಾಯನ ನಡೆಟ್ಟ್ ಪ್ರತಿಭಾ ಪುರಸ್ಕಾರ

ಮುಲ್ಕಿ: ಯುವ ಜನಾಂಗ ಶಿಕ್ಷಣದ ಒಟ್ಟುಗೆ ಸಮಾಜದ ಬೇಲೆನ್ ಮಲ್ತೊಂದು ಎಡ್ಡೆ ಸಾದಿಡ್ ನಡತ್ಂಡ ಸಾಧಕೆರಾಯೆರೆ ಸಾಧ್ಯ ಪಂದ್ ಧಾರ್ಮಿಕ ಪರಿಷತ್ ಮಾಜಿ ಸದಸ್ಯೆರ್ ವೇ.ಮೂ.ಪಂಜ ಭಾಸ್ಕರ ಭಟ್ ಪಂಡೆರ್.

ಮೇರ್ ಪಂಜ ಕೊಯಿಕುಡೆ ಗ್ರಾಮದ ಹರಿಪಾದ ಶ್ರೀ ಜಾರಂತಾಯ ದೈವೊಲ್ಯದ ವರ್ಷಾಧಿದ ನೇಮೋತ್ಸವದ ಪೊರ್ತುಡು ನಡತಿನ ಪ್ರತಿಭಾ ಪುರಸ್ಕಾರ ಪಟ್ಟುನ ಲೇಸ್ ಡ್ ಪಾತೆರಿಯೆರ್.

ಕ್ಷೇತ್ರದ ಆಡಳಿತ ಮೊಕ್ತೇಸರೆರ್ ನಲ್ಯಗುತ್ತು ಪ್ರಕಾಶ್ ಶೆಟ್ಟಿ ಪಾತೆರ್ದ್, ಕಲ್ಪಾರ್ಥಿಲು ಸವಲತ್ತುಲೆನ್ ಗಲಸೊಂದು ಶಿಕ್ಷಣ ಕ್ಷೇತ್ರಡ್ ಸಾಧಕೆರಾದ್ ದೇಶೊಗೇ ಮಾದರಿ ಆವೊಡು ಪಂದ್ ಪಂಡೆರ್.

ಚಾವಡಿಡ್ ಮಲ್ಲ ಬಿನ್ನೆರಾದ್ ಪಂಜದಗುತ್ತು ವಿಶ್ವನಾಥ ಶೆಟ್ಟಿ, ಅಶ್ವಿನ್ ಶೆಟ್ಟಿ ಕುಡುಂಬೂರು, ಶಿವಾಜಿ ಶೆಟ್ಟಿ ನಲ್ಯಗುತ್ತು ಬೊಂಬೈ, ಉಮೇಶ್ ಪಂಜ, ಭಾಸ್ಕರ ಶೆಟ್ಟಿ ಹೊಸಮನೆ, ದಿವಾಕರ ಶೆಟ್ಟಿ ನಲ್ಯಗುತ್ತು, ನವೀನ್ ಕುಮಾರ್ ಹರಿಪಾದೆ ಪಾಲ್ ಪಡೆದಿತ್ತೆರ್.

ಈ ಪೊರ್ತುಡು ಕರಿನ ಸುಮಾರ್ ವರ್ಷೊರ್ದಿಂಚ ದೈವೊದ ಸೇವೆ ಮಲ್ತೊಂದಿತ್ತಿನ ಉಮೇಶ್ ಪೂಜಾರಿ ಏಳಿಂಜೆ ಬೊಕ್ಕ ಕುಟ್ಟಿ ಪೂಜಾರಿ ಮೆರೆಗ್ ಮಾನಾದಿಗೆ ಮಲ್ತೆರ್. ಬೊಕ್ಕ ಶಿಕ್ಷಣ ಕ್ಷೇತ್ರಡ್ ಸಾಧಕೆರೆಗ್ ಪ್ರತಿಭಾ ಪುರಸ್ಕಾರ, ಬಡಪತ್ತ್ ದಕ್ಲೆಗ್ ಸಕಾಯ ಮಲ್ತೆರ್. ಈ ಲೇಸ್ ನ್ ಉಮೇಶ್ ಪಂಜ ಸುಧಾರಿಕೆ ಮಲ್ತೆರ್.