ಕೋಡ್ದಬ್ಬುನ ನಡೆಟ್ಟ್ ಅಶಕ್ತೆರ್ನ ಚಿಕಿತ್ಸೆಗಾದ್ 8.22 ಲಕ್ಷ ರೂ. ಪಟ್ಟಿನ ರವಿ ಕಟಪಾಡಿ

ಒಡಿಪು: ಈ ಸರ್ತಿ ಕೃಷ್ಣಾಷ್ಟಮಿದ ಪೊರ್ತುಡು ವೇಷ ಪಾಡ್ದ್ ಸಂಗ್ರಹ ಆಯಿನ 8 ಲಕ್ಷ ರೂಪಾಯಿನ್ 5 ಜನ ಬಡಪತ್ತ್ ದ ಅಶಕ್ತ ಜೋಕ್ಲೆಗ್ ವೈದ್ಯಕೀಯ ಚಿಕಿತ್ಸೆಗ್‌ ಕಾಸ್‌ ಹಸ್ತಾಂತರ ಮಲ್ತ್‌ದ್‌ ಮಾನವೀಯತೆ ತೊಜಪಾದೆರ್.‌ ಅ.2 ಸೋಮವಾರ ಕಟಪಾಡಿ ಶ್ರೀ ಭಗವಾನ್ ಬಬ್ಬು ಸ್ವಾಮಿ ದೈವಸ್ಥಾನ, ಕೊರಗಜ್ಜ ಕ್ಷೇತ್ರ ಪೇಟೆ ಬೆಟ್ಟು ಮೂಲು ದೈವದ ದರ್ಶನ ಸೇವೆದ ಪೊರ್ತುಡು ರವಿ ಫಲಾನುಭವಿಲೆಗ್‌ ಪನವುನು ಪಟ್ಟಿಯೆರ್.
ಈ ವರ್ಷ ರವಿ ಕಟಪಾಡಿ ಆಕರ್ಷಕ ಸೀ ಫೋಕ್ ಪನ್ಪಿನ ವೇಷ ಪಾಡ್ದ್ ಒಟ್ಟು 8,22,212 ರೂಪಾಯಿ ಸಂಗ್ರಹ ಮಲ್ತ್‌ದೆರ್. ಈ ಪನವುಡು ಕಾರ್ಲ ಕಣಜಾರು ನಿಶ್ಚಿತಾ ಕೆ. ಅರೆಗ್ 3 ಲಕ್ಷ ರೂ., ಕುಂದಾಪುರದ ಕಟ್ ಬೇಲ್ತೂರು ನಾಗೇಂದ್ರ ಅರೆಗ್ 2.5 ಲಕ್ಷ ರೂ., ಮಾರಣ ಕಟ್ಟೆ ಇಡೂರು ಸುಶಾಂತ್ ಶೆಟ್ಟಿ ಮತ್ತು ಬೊಕ್ಕ ಋತಿಕ್‌ ಬೆದ್ರ ಮೆರೆಗ್ ತಲಾ 1 ಲಕ್ಷ ರೂ., ಸಸಿಹಿತ್ಲುದ ಪೂರ್ವಿಗ್ 50 ಸಾವಿರ ರೂ. ಪನವುನು ವಿತರಣೆ ಮಲ್ತ್‌ದೆರ್. ಕರಿನ 9 ವರ್ಷರ್ದ್ ಅಸ್ಟೆಮಿದಾನಿ ವಿಚಿತ್ರ ವೇಷ ಪಾಡ್ದ್ ಸಂಗ್ರಹ ಮಲ್ತಿನ ಒಟ್ಟು 1 ಕೋಟಿ 22 ಲಕ್ಷ ರೂ. 118 ಬಡ ಅಶಕ್ತ ಜೋಕ್ಲೆಗ್ ವೈದ್ಯಕೀಯ ಚಿಕಿತ್ಸೆಗ್‌ ಕೊರ್ತ ಪಂದ್ ರವಿ ಕಟಪಾಡಿ ಈ ಪೊರ್ತುಡು ಪಂಡೆರ್.
ಕಾರ್ಯಕ್ರಮಡ್ ಶ್ರೀ ಕ್ಷೇತ್ರ ಪೇಟೆಬೆಟ್ಟು ಗುರಿಕಾರೆರಾಯಿನ ಹರಿಶ್ಚಂದ್ರ ಪಿಲಾರು ಇತ್ತೆರ್. ತುಕಾರಾಮ್ ಎಸ್. ಉರ್ವ ಸೊಲ್ಮೆ ಸಂದಾಯೆರ್. ಮಹೇಶ್ ಶೆಣೈ, ಅರ್ಚಕ ಜಯಕರ ಎ., ಪ್ರಮುಖೆರಾಯಿನ ಯಶವಂತ್, ಶಂಕರ್ ಕಟಪಾಡಿ, ರಾಜ್‌ ಗೋಪಾಲ್, ಲಕ್ಷ್ಮಣ್, ಉಮೇಶ್ ಬಪಕ್ಕ ರವಿ ಫ್ರೆಂಡ್ಸ್ ಕಟಪಾಡಿ ಈ ಪೊರ್ತುಡು ಇತ್ತೆರ್.