ಕುಡ್ಲ: ಬ್ಯಾಂಕ್ ಆಫ್ ಬರೊಡಾ ಕುಡ್ಲ ವಲಯದ ಮುತಾಲಿಕೆಡ್ ಡಾ. ಅತ್ತೂರು ಸದಾನಂದ ಶೆಟ್ರೆಗ್ ಇಂಚಿಪ್ಪ ಶಿವಮೊಗ್ಗ ಕುವೆಂಪು ವಿಶ್ವವಿದ್ಯಾನಿಲಯದ ಡಾಕ್ಟರೇಟ್ ಪ್ರದಾನ ಮಲ್ತಿನ ನಿಲೆಟ್ಟ್ ಅ.3 ಅಂಗಾರೆ ಕುಡ್ಲದ ಬ್ಯಾಂಕ್ ಆಫ್ ಬರೊಡಾ ವಲಯ ಕಚೇರಿದ ಚಾವಡಿಡ್ ಬಿನ್ನೆರೆನ ಸಮ್ಮುಖಡ್ ಮಾನಾದಿಗೆ ಮಲ್ತೆರ್.
ಉಂದುವೇ ಪೊರ್ತುಡು ಡಾ. ಅತ್ತೂರು ಸದಾನಂದ ಶೆಟ್ರ್ ಅಂಬೇಡ್ಕರ್ ವೃತ್ತದ ಕೈತಲ್, ಬ್ಯಾಂಕ್ ಆಫ್ ಬರೊಡಾದ ವಲಯ ಕಚೇರಿದ ಎದುರುಡು ಸ್ಮಾರ್ಟ್ ಸಿಟಿ ಕುಡ್ಲದ ಮುತಾಲಿಕೆಡ್ ಮುಲ್ಕಿ ಸುಂದರರಾಮ ಶೆಟ್ಟಿ ಮಾರ್ಗದ ಶಾಶ್ವತ ಪುದರ್ ಪಲವೆನ್ ಅನಾವರಣ ಮಲ್ತೆರ್.
ಮಾನಾದಿಗೆ ಪಡೆದ್ ಪಾತೆರಿನ ಡಾ. ಅತ್ತೂರು ಸದಾನಂದ ಶೆಟ್ರ್, ಮಾತ ಬ್ಯಾಂಕ್ದ ಸಿಬ್ಬಂದಿಲೆನ್ ಯಾನ್ ಮೋಕೆಡ್ ಗೌರವಡ್ ತೂತೆ. ಅಯಿತೊಟ್ಟಿಗೆ ಮಾತ ಸಾಮಾಜಿಕ ಸೇವೆಗ್ ಒವ್ವೇ ಅಪೇಕ್ಷೆ ಇಜ್ಜಂದೆ ಸಹಾಯ ಹಸ್ತ ಮಲ್ತ್ದೆ. ಯನ್ನ ಈ ಮಾನಾದಿಗೆಗ್ ನಿಕ್ಲೆನ ಆಶೀರ್ವಾದನೇ ಕಾರಣ ಪಂದ್ ಪಂಡೆರ್. ಶಾಸಕೆರ್ ವೇದವ್ಯಾಸ್ ಕಾಮತ್ ಪಾತೆರ್ದ್, ಒವ್ವೇ ಒಂಜಿ ಬೇಲೆ ಆವಡ್ ಅಯಿಕ್ಕ್ ಯಾನ್ ನಿಕ್ಲೆನ ಒಟ್ಟುಗು ಇಪ್ಪುವೆ ಪನ್ಪಿನ ವಿಶ್ವಾಸನ್ ಕೊರ್ಪೆರ್ ಸದಾನಂದ ಶೆಟ್ರ್. ಮುಲ್ಕಿ ಸುಂದರರಾಮ ಶೆಟ್ಟಿ ಮೆರೆನ ಪುದರ್ ಪಲವೆನ್ ಮಾರ್ಗಗ್ ಶಾಶ್ವತವಾದ್ ಪಾಡೊಡು ಪನ್ಪಿನವು ಮಸ್ತ್ ಜನತ್ತ ಆಸೆ ಆದಿತ್ತ್ಂಡ್. ಆ ಆಸೆ ಇನಿ ನೆರವೇರ್ದ್ಂಡ್. ಅಂಚನೆ ಎನ್ನ ಬುಳೆಚ್ಚಿಲ್ ಬೊಕ್ಕ ರಾಜಕೀಯದ ಇತಿಹಾಸಗ್ ಬೆರಿತಾಂಗ್ ಆದ್ ಇತ್ತಿನಾರ್ ಮುಲ್ಕಿ ಸುಂದರರಾಮ್ ಶೆಟ್ರ್. ಅರೆನ ನೆಂಪು ಎಂಕ್ ಏಪಲ ಇಪ್ಪುಂಡು ಪಂದ್ ಪಂಡೆರ್.
ಈ ಲೇಸ್ಡ್ ಅಧ್ಯಕ್ಷೆರಾದ್ ಬ್ಯಾಂಕ್ ಆಫ್ ಬರೊಡಾದ ಮಹಾಪ್ರಬಂಧಕೆರ್, ವಲಯ ಮುಖ್ಯಸ್ಥೆರ್ ಗಾಯತ್ರಿ ಆರ್ ವಹಿಸ್ ದಿತ್ತೆರ್. ಅಂಚನೆ ಮಲ್ಲ ಬಿನ್ನೆರಾದ್ ಮೇಯರ್ ಸುಧೀರ್ ಶೆಟ್ಟಿ ಕಣ್ಣೂರು, ಮುಖ್ಯ ಸಚೇತಕೆರ್ ಪ್ರೇಮಾನಂದ ಶೆಟ್ಟಿ ಲೇಸ್ಡ್ ಇತ್ತೆರ್.
ಈ ಪೊರ್ತುಡು ಶಾಸಕೆರ್ ವೇದವ್ಯಾಸ ಕಾಮತ್,ವಿರೋಧ ಪಕ್ಷದ ನಾಯಕೆರ್ ಪ್ರವೀಣ್ಚಂದ್ರ ಆಳ್ವ, ಕಾರ್ಪೋರೇಟರ್ ವಿನಯರಾಜ್, ಬೊಕ್ಕ ಸ್ಮಾರ್ಟ್ ಸಿಟಿತ್ತ ಮ್ಯಾನೇಜಿಂಗ್ ಡೈರೆಕ್ಟರ್ ಡಾ.ಆನಂದ್, ಜನರಲ್ ಮ್ಯಾನೇಜರ್ ಕೆ.ಎಸ್. ಅರುಣ್ ಪ್ರಭಾ, ಅಸಿಸ್ಟೆಂಟ್ ಇಂಜಿನಿಯರ್ ಗುರುಕಿರಣ್, ಎಕ್ಸಿಕ್ಯೂಟಿವ್ ಇಂಜಿನಿಯರ್ ಚಂದ್ರಕಾಂತ್, ನರೇಶ್ ಶೆಣೈ, ಜ್ಞಾನೇಶ್, ಚಂದ್ರಶೇಖರ್, ಹೃತಿಕಾ ಕನ್ಸ್ಟ್ರಕ್ಷನ್ದ ಧಣಿ ಉದಯ ಶೆಟ್ಟಿ ಬೊಕ್ಕ ಮಾಜಿ ಮೇಯರ್, ನಗರಪಾಲಿಕೆದ ಬೇತೆ ಬೇತೆ ಸಮಿತಿದ ಅಧ್ಯಕ್ಷೆರ್, ಪದಾಧಿಕಾರಿಲು ಲೇಸ್ ಡ್ ಪಾಲ್ ಪಡೆದಿತ್ತೆರ್.
pallavi shetty