ಮುಲ್ಕಿ: ಶ್ರೀ ಕೃಷ್ಣೆ ಜವನೆರೆನ ಆದರ್ಶ ಪುರುಷೆಯಾದ್, ದೀನರ ದೈವವಾದ್, ಪಂಡಿತೆರೆನ ಪಾಲ್ ಗ್ ಜ್ಞಾನಿಯಾದ್ ಉಲ್ಲೆ. ಮಹಾಭಾರತಡ್ ಇಡೀ ಯಾನ್ ಪುಟ್ಟಿನೇ ಧರ್ಮ ರಕ್ಷಣೆಗ್ ಪಂದೇ ಪನೊಂದು ಇಪ್ಪುನ ಕೃಷ್ಣೆ, ಧರ್ಮ ರಕ್ಷಣೆದೊಟ್ಟಿಗೆ ಸುಮಾರ್ ಕೆಲಸನ್ ಮಲ್ಪುವೆ. ತುಂಟತನ, ಪ್ರೀತಿ, ಕರುಣೆ, ಗಡಸುತನ, ಹಠ, ಧರ್ಮ, ಜ್ಞಾನ ಮಾತಲ ವ್ಯಕ್ತಿತ್ವ ಇಪ್ಪುನ ಒರಿಯೇ ಒರಿ ಪಂಡ ಅವು ಭಗವಾನ್ ಶ್ರೀ ಕೃಷ್ಣೆ, ಮೆರೆನ ಪುಟ್ಟು ದಿನನ್ ಶ್ರೀ ಕೃಷ್ಣ ಜನ್ಮಾಷ್ಟಮಿ ಪಂದ್ ಆಚರಣೆ ಮಲ್ಪುನವು ಕುಸಿತ್ತ ಇಚಾರ ಪಂದ್ ಲಯನ್ಸ್ ಕ್ಲಬ್ ಬಪ್ಪನಾಡು ಇನ್ಸ್ಪಿರ್ ದ ಸ್ಥಾಪಕಾಧ್ಯಕ್ಷೆರ್ ವೆಂಕಟೇಶ್ ಹೆಬ್ಬಾರ್ ಪಂಡೆರ್.
ಮೇರ್ ಶಿಮಂತೂರುದ ಶ್ರೀ ಶಾರದಾ ಸೆಂಟ್ರಲ್ ಸ್ಕೂಲ್ ಡ್ ನಡತಿನ ಶ್ರೀ ಕೃಷ್ಣ ಜನ್ಮಾಷ್ಟಮಿ ಲೇಸ್ ಡ್ ತುಡರ್ ಅರ್ಲಾದ್ ಉದಿಪನ ಮಲ್ತ್ ದ್ ಎಡ್ಡೆಪ್ಪು ಬಯಕಿಯೆರ್.
ಶಾರದ ಸೊಸೈಟಿದ ಅಧ್ಯಕ್ಷೆರ್ ಧರ್ಮದರ್ಶಿ ಡಾ. ಹರಿಕೃಷ್ಣ ಪುನರೂರು ಗುರ್ಕಾರ್ಮೆನ್ ಒಯಿಸೊಂದು ಪಾತೆರ್ದ್, ಸಂಸ್ಕತಿನ್ ದುಂಬಾರಿಸಾವೊಂದು ಪೋಪುನಲ್ಪ ವಿಫಲ ಆಂಡ, ಭಾರತದ ಸನಾತನ ನಾಗರಿಕತೆಲು ಮಾದೆ ಆಪುನೆಟ್ಟ್ ಒವ್ವೇ ಅನುಮಾನ ಇಜ್ಜಿ. ಅಂಚಾದ್ ಎಲ್ಯೆರ್ದೆ ಜೋಕುಲೆಗ್ ಸಂಪ್ರದಾಯನ್ ಕಲ್ಪಾವುನ ಕೆಲಸ ಮಲ್ಪೊಡು ಪಂದ್ ಪಂಡೆರ್.
ಅವೆರ್ದ್ ಬೊಕ್ಕ ಕಲ್ಪಾರ್ಥಿಲೆಗ್ ಮುದ್ದುಕೃಷ್ಣ ಬೊಕ್ಕ ಬಾಲಕೃಷ್ಣ ಪಂತೊ, ಕಲ್ಪಾರ್ಥಿಲೆನ ಅಮ್ಮನಕ್ಲೆಗ್ ಯಶೋದಾ ಕೃಷ್ಣ ಪಂತೊನ್ ಆಯೋಜನೆ ಮಲ್ತ್ ದ್ ಇತ್ತೆರ್.
ಈ ಪೊರ್ತುಡು ಶ್ರೀ ಶಾರದ ಸೊಸೈಟಿದ ಕಾರ್ಯದರ್ಶಿ ಪುರಂದರ ಶೆಟ್ಟಿಗಾರ್, ಕೋಶಾಧಿಕಾರಿ ಭುವನಾಭಿರಾಮ ಉಡುಪ, ನಿರ್ದೇಶಕೆರ್ ಪಟೇಲ್ ವಾಸುದೇವ ರಾವ್, ಸುರೇಶ್ ರಾವ್ ಪಿ ಎಸ್, ಶಾಲೆದ ಸಂಚಾಲಕೆರ್ ದೇವಪ್ರಸಾದ್ ಪುನರೂರು ಪಾಲ್ ಪಡೆದಿತ್ತೆರ್.
ಪ್ರಾಂಶುಪಾಲೆರ್ ಜಿತೇಂದ್ರ ವಿ ರಾವ್ ಎದ್ಕೊನಿಯೆರ್. ಸಹ ಶಿಕ್ಷಕಿ ದೀಕ್ಷಿತ ಸೊಲ್ಮೆ ಸಂದಾಯೆರ್. ಸಂದ್ಯಾ ಲೇಸ್ ದ ಸುಧಾರಿಕೆ ಮಲ್ತೆರ್.
pallavi shetty