September 5, 2023

ರಾಜ್ಯಸುಜ್ಞಾನನಿಧಿ ಅರ್ಜಿ ಸಲ್ಲಿಕೆಗ್ ಡಾ| ಹೆಗ್ಗಡೆ ಚಾಲನೆ

ಬೋಲ್ತೆರ್: ಶ್ರೀ ಕೇತ್ರ ಧರ್ಮಸ್ಥಳ ಗ್ರಾಮಾಭಿವೃದ್ಧಿ ಯೋಜನೆ (ಎಸ್‌ಕೆಡಿಆರ್‌ಡಿಪಿ)ಯ ಮುತಾಲಿಕೆಡ್ ಪ್ರಗತಿ ಬಂಧು-ಸ್ವ-ಸಹಾಯ ಸಂಘದ ಸದಸ್ಯೆರ್ನ ಜೋಕ್ಲೆನ ವೃತ್ತಿಪರ ಬೊಕ್ಕ ತಾಂತ್ರಿಕ ಶಿಕ್ಷಣಗಾದ್ ಕೊರೊಂದು ಇಪ್ಪುನ ಸುಜ್ಞಾನನಿಧಿ ಶಿಷ್ಯವೇತನ ಲೇಸ್ ದ 2023-24ನೇ ಸಾಲ್ ದ ಆನ್‌ಲೈನ್‌ ಅರ್ಜಿ ಸಲ್ಲಿಸಾವುನ ಪ್ರಕ್ರಿಯೆಗ್ ಶ್ರೀ ಕೇತ್ರ ಧರ್ಮಸ್ಥಳ ಡ್ ಸೆ.5 ಸೋಮವಾರ ದಾನಿ ಡಾ| ಡಿ. ವೀರೇಂದ್ರ ಹೆಗ್ಗಡೆ ಬೊಕ್ಕ ಹೇಮಾವತಿ ವೀ. ಹೆಗ್ಗಡೆ ಚಾಲನೆ ಕೊರಿಯೆರ್.

ಡಾ| ವೀರೇಂದ್ರ ಹೆಗ್ಗಡೆ ಲೇಸ್ ದ ಉದಿಪನ ಮಲ್ತ್ ಪಾತೆರ್ನ ಆರ್ ಶಿಕ್ಷಣ ಡ್ ವೃತ್ತಿಪರ ಬೊಕ್ಕ ತಾಂತ್ರಿಕ ಶಿಕ್ಷಣಗ್ ಅಪಾರ ಅವಕಾಶ ಉಂಡು. ಆಂಡ ಬಡವೆರ್, ಕೂಲಿ ಕಾರ್ಮಿಕೆರ್ನ ಜೋಕುಲು ಇಂಚಿನ ಶಿಕ್ಷಣ ಪಡೆಯೊನ್ನ ಕಷ್ಟ. ಬಡತನ, ಸೂಕ್ತ ಪ್ರೋತ್ಸಾಹ ಬೋಕ್ಕ ಮಾರ್ಗದರ್ಶನದ ಕೊರತೆರ್ದ್ ಪ್ರತಿಭಾನ್ವಿತ ಗ್ರಾಮೀಣ ಕಲ್ಪಾರ್ಥಿಲು ವೃತ್ತಿಪರ ಬೊಕ್ಕ ತಾಂತ್ರಿಕ ಶಿಕ್ಷಣ ಎಚ್ಚ ಪಿದಾಯಿ ಇಪ್ಪುಲಕ ಆತ್ಂಡ್. ಉಂದೆನ್ ತೆರಿದ್ ನಮ ಬಡ ಕಲ್ಪಾರ್ಥಿ ಲೆಗ್ ಸುಜ್ಞಾನನಿಧಿ ಶಿಷ್ಯವೇತನ ಲೇಸ್ ನ್ ಜಾರಿಗೆ ಮಲ್ತ.

ಸುಜ್ಞಾನನಿಧಿ ಕಾರ್ಯಕ್ರಮದಂಚ ಪ್ರಗತಿಬಂಧು ಸ್ವ-ಸಹಾಯ ಸಂಘದ ಕುಟುಂಬದ ಪ್ರತಿಭಾನ್ವಿತ ಜೋಕ್ಲೆಗ್ ತಾಂತ್ರಿಕ ಬೊಕ್ಕ ವೃತ್ತಿಪರ ಕೋರ್ಸ್ ಗ್ ಶಿಷ್ಯವೇತನ ಕೊರೊಂದು ಉಲ್ಲ. ನೆಟ್ಟ್ 3 ವರ್ಷದ ಕೋರ್ಸ್ ಗ್ ಕಲ್ಪಾರ್ಥಿಲೆಗ್ ಪ್ರತೀ ತಿಂಗೊಲು ತಲಾ 400 ರೂ. ಬೊಕ್ಕ ಅವೆರ್ದ್ ಮಿತ್ತ್ ದ 5 ವರ್ಷದ ಕೋರ್ಸ್‌ ದ ಕಲ್ಪಾರ್ಥಿಲೆಗ್ ತಲಾ 1 ಸಾವಿರ ರೂ. ಕೋರ್ಸ್‌ ಮುಗಿಪುನ ಮುಟ ನೇರವಾದ್ ಕಲ್ಪಾರ್ಥಿಲೆನ ಖಾತೆಗ್ ಪಾವತಿ ಮಲ್ಪೆರ್. 2023 ಡಿಸೆಂಬರ್‌ 31 ಮುಟ ಅರ್ಜಿ ಸಲ್ಲಿಸಾಯೆರೆ ಅವಕಾಶ ಉಂಡು ಪಂದ್ ತೆರಿಪಾದೆರ್.

ಯೋಜನೆದ ಮುಖ್ಯ ನಿರ್ವಹಣಾಧಿಕಾರಿ ಅನಿಲ್‌ ಕುಮಾರ್‌ ಎಸ್‌.ಎಸ್‌., ಹಣಕಾಸು ಪ್ರಾದೇಶಿಕ ನಿರ್ದೇಶಕ ಶಾಂತಾರಾಮ ಆರ್‌. ಪೈ, ಪ್ರಾದೇಶಿಕ ನಿರ್ದೇಶಕ ಆನಂದ ಸುವರ್ಣ, ಸಾಫ್ಟ್‌ವೇರ್‌ ಅಭಿವೃದ್ಧಿ ಮಲ್ತಿನ ಕುಡ್ಲದ ವೈಭವ್‌ ಕನ್ಸಲ್ಟೆನ್ಸಿ ಸರ್ವೀಸಸ್‌ ದ ವಿನಾಯಕ ಶೆಣೈ, ತಾಂತ್ರಿಕ ಯೋಜನಾಧಿಕಾರಿ ಪುಷ್ಪರಾಜ್‌, ಯೋಜನಾಧಿಕಾರಿ ಶೇಖರ್‌ ವೈ., ಬೋಲ್ತೆರ್ ತಾಲೂಕು ಯೋಜನಾಧಿಕಾರಿ ಸುರೇಂದ್ರ, ಸಿಎಸ್‌ಸಿ ವಿಭಾಗದ ಯೋಜನಾಧಿಕಾರಿ ಸುಪ್ರೀತ್‌ ಎಸ್‌, ಪ್ರಬಂಧಕರಾಯಿನ ಸುಮಂಗಲಾ ಈ ಪೊರ್ತುಡು ಇತ್ತೆರ್.

ಕೊಲ್ಪದಬೈಲ್ ನಿವಾಸಿ ಅನಿಲ್ ಪ್ರವೀಣ ಪಿರೇರಾ ನಾಪತ್ತೆ

ಮಾಲಾಡಿ: ತರಬೇತಿದ ಜೋಕ್ಲೆನ್ ಎಕ್ಸಾಮ್ ಗ್ ಬೆಂಗ್ಲೂರುಗ್ ಲೆತೊಂದು ಪೋದು ಬರ್ಪೆ ಪಂದ್ ಇಲ್ಲರ್ದ್ ಪೋಯಿನ ವ್ಯಕ್ತಿ ವಾಪಾಸ್ ಇಲ್ಲಗ್ ಬರಂದೆ ನಾಪತ್ತೆಯಾಯಿನ ಬಗೆಟ್ ಪುಂಜಾಲಕಟ್ಟೆ ಪೊಲೀಸ್ ಠಾಣೆಡ್ ಪ್ರಕರಣ ದಾಖಲಾತ್‌ಂಡ್.

ಬೋಲ್ತೆರ್ ತಾಲೂಕುದ ಮಾಲಾಡಿ ಗ್ರಾಮದ ಕೊಲ್ಪದಬೈಲ್ ನಿವಾಸಿ ಅನಿಲ್ ಪ್ರವೀಣ ಪಿರೇರಾ ನಾಪತ್ತೆ ಆಯಿನ ವ್ಯಕ್ತಿ.

ಅನಿಲ್ ಪ್ರವೀಣ ಪಿರೇರಾ ವಿನ್ ನ್ಯಾಷನಲ್ ಸ್ಪೇಲ್ ಬಿ ತರಬೇತಿದ ರೀಜನಲ್ ಕೋ-ಆರ್ಡಿನೇಟರ್ ಆದ್ ಕೆಲಸ ಮಲ್ತೊಂದು ಇತ್ತೆರ್. ಸೆ.2 ದಾನಿ ಬಯ್ಯಗ್ 8.30 ಗಂಟೆಗ್ ವಿನ್ ನ್ಯಾಷನಲ್ ಸ್ಪೇಲ್ ಬಿ ತರಬೇತಿದ 5 ಜನ ಜೊಕ್ಲೆನ್ ಬೆಂಗ್ಲೂರುಡು ನಡಪುನ ಎಕ್ಸಾಮ್ ಗ್ ಲೆತೊಂದು ಪೋದು ಬರ್ಪೆ ಪಂದ್ ಪೊತೆರ್. ಬೊಕ್ಕ ಸೆ.3 ದಾನಿ ರಾತ್ರಿ 8.45 ಗಂಟೆಗ್ ಕಾಲ್ ಮಲ್ತ್ ವಿಚಾರಣೆ ಮಲ್ಪುನಗ ರಾತ್ರೆ 9 ಗಂಟೆಗ್ ಬೆಂಗ್ಲೂರುರ್ದ್ ಕುಡ್ಲಗ್ ಬಸ್ಸ್ ಉಂಡು ನನ ಪಿದಡೋಡಾತೆ ಪಂದ್ ಪಂತೆರ್.

ಆoಡ ಸೆ.4 ಬೊಲ್ಪುಗು 5 ಗಂಟೆಗ್ ಎಕ್ಸಾಮ್ ಗ್ ಪೋದು ಇತ್ತಿನ ಜೋಕ್ಲೆನ್ ಲೆತೊಂದು ಬರಿಯೆರೆ ಬಿಸಿ ರೋಡ್ ಗ್ ಪೋಯಿನ ಅನಿಲ್ ಡೇಸಾ ಪನ್ಪಿನ ವ್ಯಕ್ತಿ ಸಂಪರ್ಕ ಮಲ್ಪುನಗ ಅನಿಲ್ ಬೊಲ್ಪುಗು 5 ಗಂಟೆಗ್ ಬಿಸಿ ರೋಡ್ ಗ್ ಬತ್ತ್ ದ್ ಜೋಕ್ಲೆನ್ ಬಿಸಿರೋಡು ಡ್ ಜಪ್ಪಾದ್ ಬೊಕ್ಕ ಕುಡ್ಲಡ್ ಕೆಲಸ ಮುಗಿಪಾದ್ ಬರ್ಪೆ ಪಂದ್ ಇತ್ತೆರ್.

ಬೊಕ್ಕ ಅನಿಲ್ ಗ್ ಕಾಲ್ ಮಲ್ಪುನಗ ಪೋನ್ ಸ್ವಿಚ್ ಆಫ್ ಆದ್, ಬಯ್ಯ ಆಂಡಲ ಇಲ್ಲಗ್ ಬರಂದೆ ಇಪ್ಪುನೆದಾತ್ರ ಸಂಬoಧಿಕೆರೆಡ ಬೊಕ್ಕ ಪ್ರೆಂಡ್ಸ್ ನ್ ವಿಚಾರಣೆ ಮಲ್ಪುನಗ ಅನಿಲ್ ಪತ್ತೆ ಆವಂದಿನ ತೆರಿದ್ ಬೈದುಂಡು.

ಅನಿಲ್ ಪ್ರವೀಣ ಪಿರೇರಾ ಮೆರ್ ನ ಬುಡೆದಿ ಲವಿಟ ಡಿಸೋಜ ಕೊರ್ನ ದೂರುದಂಚ ಪುಂಜಾಲಕಟ್ಟೆ ಪೊಲೀಸ್ ಠಾಣೆಡ್ ಪ್ರಕರಣ ದಾಖಲಾತ್‌ಂಡ್

ಉಬಾರ್: ಅಕ್ರಮ ಮರ ಸಾಗಾಟ; ಒರಿ ಅರೆಸ್ಟ್

ಉಬಾರ್: ರಕ್ಷಿತಾರಣ್ಯರ್ದ್ ಮರನ್ ಕಡ್ತ್ ದ್ ಅಕ್ರಮವಾದ್ ಸಾಗಾಟ ಮಲ್ತೊಂದು ಇತ್ತಿನ ಪ್ರಕರಣನ್ ಉಬಾರ್ ವಲಯ ಅರಣ್ಯಾಧಿಕಾರಿ ನೇತೃತ್ವದ ತಂಡ ಪತ್ತೆ ಮಲ್ತ್ ದ್ ಆರೋಪಿನ್ ಅರೆಸ್ಟ್ ಮಲ್ತ್ ದೆರ್.

ಆರೋಪಿ ಬಂಟ್ವಾಳ ತಾಲೂಕುದ ಪಂಜಿಕಲ್ ಗ್ರಾಮದ ಜೀವನ್ ರಾಜ್ ಪಂದ್ ತೆರಿದ್ ಬೈದುಂಡು.

ಲಾರಿಡ್ ಹೆಬ್ಬಲಸು, ನಂದಿ, ಬಣ್ಪು ಸೇರಿನಂಚ ಬಗೆ ಬಗೆತ ಜಾತಿದ ಮರದ ದಿಮ್ಮೆಲೆನ್ ಪತೊಂದು ಪೋನಗ ಅರಣ್ಯಾಧಿಕಾರಿಲು ಸುಬ್ರಹ್ಮಣ್ಯ ಕ್ರಾಸ್ ಡ್ ತಪಾಸಣೆ ಮಲ್ತ್ ಸಾಗಾಟ ಮಲ್ತೊಂದು ಇತ್ತಿನ ಲಾರಿನ್ ವಶಕ್ ಪಡೆಯೊಂದೆರ್.

ಕಾರ್ಯಾಚರಣೆಡ್ ವಲಯ ಅರಣ್ಯಾಧಿಕಾರಿ ಜಯಪ್ರಕಾಶ್, ಉಪ ವಲಯ ಅರಣ್ಯಾಧಿಕಾರಿ ರಾವುತ್ತಪ್ಪ ಬಿರಾದಾರ್, ರೆಖ್ಯಾ ಉಪವಲಯ ಅರಣ್ಯಾಧಿಕಾರಿ ಸಂತೋಷ್ ತಡ್ಲಾಗಿ, ರಾಜೇಶ್, ಪ್ರತಾಪ್, ರವಿ, ಕಿಶೋರ್ ಈ ಪೊರ್ತುಡು ಇತ್ತೆರ್.

ನಾಲ್ಕೂರು: ಅಷ್ಟೆಮಿದ ಲೆಕ್ಕಡ್ ಮೊಸರು ಕುಡಿಕೆ ಉಚ್ಚಯ

ಬೋಲ್ತೆರ್: ಯುವಶಕ್ತಿನ ಫ್ರೆಂಡ್ಸ್ ನಾಲ್ಕೂರು ನೆತ್ತ ಮುತಾಲಿಕೆಡ್ ಶ್ರೀ ಕೃಷ್ಣ ಜನ್ಮಾಷ್ಟಮಿದ ಪ್ರಯುಕ್ತ ಮೊಸರು ಕುಡಿಕೆ ಉಚ್ಚಯ ಸೆ.10 ಐತಾರದಾನಿ ನಿಟ್ಟಡ್ಕ ಶಾಲಾ ಮೈದಾನಡ್ ನಡಪೆರುಂಡು.

ಲೇಸ್ ದ ಉದಿಪನನ್ ನಾಲ್ಕೂರು ತಾರಿಪಡ್ಪು ಪ್ರಗತಿಪರ ಕೃಷಿಕೆರ್ ತಿಮ್ಮಪ್ಪ ಪೂಜಾರಿ ಮಲ್ಪೆರೆ ಉಲ್ಲೆರ್. ಮಲ್ಲ ಬಿನ್ನೆರಾದ್ ಬಳಂಜ ಗ್ರಾ.ಪಂ ದ ಉಪಾಧ್ಯಕ್ಷೆರ್ ಯಶೋಧರ ಶೆಟ್ಟಿ, ಮಜಲೋಡಿ ಪ್ರಗತಿಪರ ಕೃಷಿಕೆರ್ ಸೀತಾರಾಮ ಪೂಜಾರಿ, ನಿಟ್ಟಡ್ಕ ಜೈ ಮಾತಾ ಕೆಟರರ್ಸ್ ದ ಜನಾರ್ಧನ ಪೂಜಾರಿ, ಬಳಂಜ ಗ್ರಾ.ಪಂ ದ ಸದಸ್ಯೆರ್ ಜಯ ಶೆಟ್ಟಿ ಪಾದೆ, ಬಳಂಜ ಬ್ರಹ್ಮಶ್ರೀ ಕುಣಿತ ಭಜನೆದ ಸಂಚಾಲಕೆರ್ ಹರೀಶ್ ವೈ, ಉಬಾರ್ ಯುವ ಉದ್ಯಮಿ ಸಚಿನ್ ಶೆಟ್ಟಿ ಕುರೆಲ್ಯ, ಶ್ರೀ ಕಂಚನಿಡ್ಕ ಕ್ಷೇತ್ರದ ಗುರ್ಕಾರೆರ್ ವಿನಯ ಶೆಟ್ಟಿ ಲೇಸ್ ಡ್ ಪಾಲ್ ಪಡೆಯೆರುಲ್ಲೆರ್.

ಧಾರ್ಮಿಕ ಸಭಾ ಕಾರ್ಯಕ್ರಮದ ಗುರ್ಕಾಮೆನ್ ಬಳಂಜ ಬ್ರಹ್ಮಶ್ರೀ ನಾರಾಯಣ ಗುರು ಸೇವಾ ಸಮಿತಿದ ಗುರ್ಕಾರೆರ್ ಪ್ರವೀಣ್ ಕುಮಾರ್ ಹೆಚ್.ಎಸ್, ವಹಿಸೊನಿಯೆರೆ ಉಲ್ಲೆರ್. ಮಲ್ಲ ಬಿನ್ನೆರಾದ್ ಬೋಲ್ತೆರ್ ಶಾಸಕೆರ್ ಹರೀಶ್ ಪೂಂಜ, ವಿಧಾನ ಪರಿಷತ್ ಶಾಸಕೆರ್ ಕೆ.ಹರೀಶ್ ಕುಮಾರ್, ಬಳಂಜ ಗ್ರಾ.ಪಂ ಗುರ್ಕಾರ್ದಿ ಶೋಭಾ ಕುಲಾಲ್, ಪ್ರಗತಿಪರ ಕರಷಿಕೆರ್ ಸುರೇಶ್ ಶೆಟ್ಟಿ ಕುರೆಲ್ಯ, ಬಳಂಜ ಗ್ರಾ.ಪಂ ಸದಸ್ಯೆರ್ ಬಾಲಕೃಷ್ಣ ಪೂಜಾರಿ ಯೈಕುರಿ, ಪ್ರಗತಿಪರ ಕೃಷಿಕೆರ್ ವಿಶ್ವನಾಥ ಹೊಳ್ಳ, ಗ್ರಾ.ಪಂ ಸದಸ್ಯೆರ್ ರವೀಂದ್ರ ಬಿ ಅಮೀನ್, ಕುಡ್ಲ ಶೀಮಾತ ಎಲೆಕ್ಟಿçಕಲ್ ದ ಪ್ರವೀಣ್ ಪೂಜಾರಿ, ಬಳಂಜ-ನಾಲ್ಕೂರು ಸಾರ್ವಜನಿಕ ಗಣೇಶೊತ್ಸವದ ಗುರ್ಕಾರೆರ್ ರಾಕೇಶ್ ಹೆಗ್ಡೆ ಬಳಂಜ, ಶ್ರೀ.ಗು.ನಾ.ಸ್ವಾ.ಸೇ.ಸಂಘದ ಮಾಜಿ ಗುರ್ಕಾರೆರ್ ಸುರೇಶ್ ಪೂಜಾರಿ ಜೈಮಾತ ನಾಲ್ಕೂರು, ಧಾರ್ಮಿಕ ಉಪನ್ಯಾಸನ್ ಪ್ರಗತಿಪರ ಕೃಷಿಕೆರ್ ಸಂತೋಷ್ ಕುಮಾರ್ ಮಲ್ಪೆರೆ ಉಲ್ಲೆರ್.